JIOVA kichiuak maj tatitanil Pablo ika tajtouani chiknaui kualtsitsin kualneskayomej tein yektikatsin espíritu kichiua maj se kipia (Gál. 5:22, 23). Nochi nejin kualneskayomej pouij itech “takilot” tein yektikatsin espíritu kichiua maj onka. * No pouij itech “chipauak talnamikilis” tein tiitatojtokakauan Cristo moneki tiknextiskej (Col. 3:10). Ijkon kemej se koujtakilot kitemaka itakilo keman kuali kiyekpiaj, aksa uelis kinextis nejin kualtsitsin kualneskayomej keman kikaua maj yektikatsin espíritu kipaleui itech inemilis (Sal. 1:1-3).

Yekinika kualneskayot tein Pablo ika tajtoj yejua netasojtalis. ¿Keyej semi kipia ipatiuj nejin kualneskayot? Pablo kijtoj ke komo amo kipiaya netasojtalis, ‘amo teyi kualtiaya’ (1 Cor. 13:2). Sayoj ke ¿toni netasojtalis, uan keniuj uelis tikpiaskej uan tiknextiskej mojmostaj?

Maski semi ouij se kijtos toni netasojtalis, Biblia kijtoua keniuj aksa akin tetasojta tanemilia uan monejnemiltia. Kemej neskayot, “yolyemanik uan kixikoa tajyouilis”, “moyolpaktijtinemi ika in yek melauak” uan “kixikojtiu nochi miak tataman tajyouilisme”, “kineltokatinemi sayo ten kuali”, “nachipa kiyolikachixtinemi Dios”, “uan nachipa kijyouijtinemi tataman ouijkayome”. Uan no, ininka motekipachoua oksekin uan se tetasojikniuj akin amo keman tekaua. Sayoj ke, akin amo tetasojta tenexikoluia, moueyineki, amo tapoujkaita, sayoj itech tanemilia uan amo tetapojpoluia. Amo tiknekij tiknextiskej nejin taman tein teijtakoua, ta tiknekij tiknextiskej netasojtalis, porin akin tetasojta “amo no kinemilijtinemi sayo ten niaxka” (1 Cor. 13:4-8).

“Dios Yejuatsin tetasojtatinemi.” (1 Juan 4:8.) Nochi tein Jiova kichiua kinextia ke tetasojta. Okachi kinextij ke tetasojta keman kiualtitanik Jesús nikan taltikpak maj tajyouiki uan maj toka momikiliki. Tatitanil Juan kijkuiloj: “Dios technextilij ya ne itetasojtalistsin ijkuin: Dios techualtitanilij ya ne iyojtsin Konetsin nikan taltikpak para maj tejuan tikpiakan ne nachipa nemilis ika ne chikaualis de Cristo. In tetasojtalis de Dios monextijtinemi ijkuin, ke amo tejuan achtopa tiktasojtakke Totajtsin Dios. Ta, achto Yejuatsin techtasojtak tejuan. Uan Yejuatsin techualtitanilij Nikonetsin yojtsin para ma Yejuatsin technekixtiltiki ka in mikilis den totajtakoluan” (1 Juan 4:9, 10). Kemej Dios techtasojta, techtapojpoluia totajtakoluan, tikchiaj tikseliskej tein kuali satepan uan uelis tinemiskej nochipaya.

Jesús kinextij ke kintasojta taltikpakneminij keman motemakak kichiuakiuj itanejnekilis Dios. Pablo kijtoj: “Totajtsin Dios techyekyolchipauak porin Jesucristo kiyekchiuako ijkon keme kimonekiltij Itajtsin. Uan Cristo motemaktij yejua mismo uan motekauilij ma kimiktikan sepa san” (Heb. 10:9, 10). Nion se taltikpaknenkej uelis kinextis  okachi ueyi netasojtalis. Jesús kijtoj: “Ne tetasojtalis ten kachi ueyi yejua nijin: Moneki ma se kitemaka inemilis para ijkon kinpaleuis oksekin itasojikniuan” (Juan 15:13). ¿Uelis titetasojtaskej kemej Jiova uan Jesús maski titajtakouanij? Kemaj. Maj tikitakan keniuj.

Pablo techyolchikaua: “Moneki xiyolchipauke ijkon keme Yejuatsin yolchipauak. Uan ma timoyoltasojtatinemikan se uan okse ijkon keme Cristo Jesús techyoltasojtatinemi. Porin Yejuatsin kitenextij itetasojtalis kuak motemaktij ma kimiktikan por tejuan” (Efes. 5:1, 2). Nochipa moneki titetasojtaskej. Netasojtalis se kinextia ika tein se kichiua, amo sayoj ika tein se kijtoua. Juan kijkuiloj: “Nokonetsitsin, ma amo titetasojtakan sayo ika totajtoluan san nion sayo ika ten tikijtoaj ika tonenepil. Ta, de yek melau ma titetasojtakan ika nochi ten tikchiutinemij” (1 Juan 3:18). Kemej neskayot, netasojtalis tein tikpialiaj Jiova uan taltikpakneminij techolinis maj tikteixmatiltikan iTekiuajyo Dios (Mat. 24:14; Luc. 10:27). No tiknextiaj ke titetasojtaj keman amo tiyolijsiuij, keman tikualtakamej uan titetapojpoluiaj. Yejua ika, Biblia techyolmajxitia: “Ximotapojpoluikan se uan okse ijkon keme Totajtsin Dios namechtapojpoluilij ya” (Efes. 4:32).

Sayoj ke, komo tikinmelauaj oso tikinyolmajxitiaj oksekin amo kijtosneki ke amo titetasojtaj. Kemej neskayot, seki tetatmej uelis kichiuaskej nochi tein ininkonetsin kinekis porin amo kinekij maj chokaok. Sayoj ke, tetatmej akin yekmelauj kitasojtaj ininkoneuj kitakakiltiskej keman monekis. No ijkon, Jiova tetasojta, sayoj ke “kinmejmelautinemi nochi nekes ten Yejuatsin kintasojtatinemi” (Heb. 12:6). Yejua ika, keman se tamelaua keman moneki se kinextia netasojtalis (Prov. 3:11, 12). Sayoj ke moneki tikelnamikiskej ke tinochin titajtakouanij uan ke amo nochipa titetasojtaj. Yejua ika, onkak seki taman tein xa okachi kuali uelis tikchiuaskej. Maj tikitakan eyi taman tein techpaleuis.

Yekinika. Maj tiktajtanikan Dios maj techmaka iyektikatsin espíritu. Jesús kijtoj ke Jiova kinmaka iyektikatsin espíritu akin kitajtaniaj (Luc. 11:13). Komo tikchiuaj nejon uan tikauaj maj yektikatsin espíritu techpaleui, okachi titetasojtaskej (Gál. 5:16). Kemej neskayot, tayekananij uelis kitajtaniskej Jiova maj iyektikatsin espíritu kinpaleui maj kitemakakan ika netasojtalis tayolmajxitilis ika Biblia. Uan no, tetatmej uelis kitajtaniskej Dios maj iyektikatsin espíritu kinpaleui maj kintakakiltikan ininkoneuan ika netasojtalis uan maj taixejekol.

Ojpatika. Maj titanemilikan keniuj Jesús kinextij netasojtalis maski kitajyouiltijkej (1 Ped. 2:21, 23). Keman aksa techyolxokolia oso techchiuilia tein amo kuali, moneki timotajtaniskej: “¿Toni kichiuaskia Jesús?”. Leigh, se tokniuj siuat, kitelpaleuij nejin netajtanil maj kuali tanemiliani achto ke kichiuaskia teisa. Yejua kijtoua: “Se tonal, se siuat akin iuan nitekitia kintajkuilouilij oksekin akin iniuan titekitiaj uan amo kuali tajtoj noka nion tekit tein nikchiuaya. Nejon semi nechyolxokolij. Sayoj ke nimotajtanij: ‘¿Toni kichiuaskia Jesús?’. Satepan ke niknemilij tein yejua kichiuaskia, nikixtalij nikelkauas nejon uan amo itech nitanemilisok. Satepan, nikmatik ke nejon siuat kipiaya se ueyi kokolis uan semi motekipachojtoya. Nikajsikamatik ke xa amo kinekik nechyolxokolis. Nitanemilis itech netasojtalis tein kinextij Jesús hasta keman kitajyouiltijkej nechpaleuij maj nikchiua kemej yejua uan maj niknextili netasojtalis nejon siuat”. Komo tikchiuaj kemej Jesús, nochipa tiknextiskej netasojtalis.

Expatika. Maj timochikauakan tikinpaleuiskej oksekin maski kemansa ouij techkisas. Yejua nejon netasojtalis kinixnextia akin yekmelauj kichiuaj kemej Cristo (Juan 13:34, 35). Biblia techyolchikaua maj tikpiakan “ne kuali tamachilis tenika Cristo Jesús tanemilijtinemia”. Keman kikauak inemilis ompa iluikak, toka kikauak nochi tein kipiaya uan hasta kitemakak inemilis (Filip. 2:5-8). Komo timotemakaj tikauaskej tein yeski taman  uan titetasojtaj kemej Jesús, titanemiliskej kemej yejua uan techolinis tein kioliniaya. Nejin kichiuas maj tiktayekanaltikan tikinpaleuiskej oksekin. ¿Keniuj techpaleuia tiknextiskej nejon netasojtalis?

Keman titetasojtaj, tikseliaj miak taman tein kuali. Maj tikitakan sayoj ome.

• TIPOUIJ ITECH SE NECHIKOL TEIN MOAJSI NOYAMPA TALTIKPAK. Kemej timotasojtaj, tikmatij ke tokniuan itech tein yeski nechikol kampa titakalpanoskej techseliskej ika netasojtalis. Tein melauj, se ueyi tatiochiualis maj tokniuan itech nochi taltikpak techtasojtakan (1 Ped. 5:9). Nejon netasojtalis sayoj ueli moita itech ixolal Jiova.

• YOLSEUILIS. Biblia kijtoua: “Ika por ne tetasojtalis [...], ximoxikouilijtiyakan ne yolxokolilis ten namechiuiliaj oksekin [...,] para nachipa xikpixtinemikan ne yolseuilis se uan okse” (Efes. 4:2, 3). Tinochin tikmachiliaj yolseuilis keman timoajsij itech nechikolmej uan itech uejueyi nechikolmej, se taman tein amo moita itech taltikpak kampa nochin xexeliujtokej (Sal. 119:165; Is. 54:13). Keman timochikauaj kuali timouikaskej iniuan oksekin, tiknextiaj ke semi tikintasojtaj uan no tikyolpaktiaj toTajtsin (Sal. 133:1-3; Mat. 5:9).

Pablo kijtoj: “Tetasojtalis de Dios, yejua ne techyolmajxitijtiu” (1 Cor. 8:1). ¿Toni kijtosnekij nejin tajtolmej? Itech 1 Corintios capítulo 13, Pablo kimelauak toni kijtosneki. Yekinika, keman se tetasojta okachi se kitayekanaltia maj oksekin kuali moajsikan (1 Cor. 10:24; 13:5). Uan no, kemej ijkuak se tetasojta amo se yolijsiui, inintech se tanemilia oksekin uan se kualtakat, nejin kualneskayot kichiua maj kalyetouanij motasojtakan uan maj itech nechikolmej okachi kuali mouikakan (Col. 3:14).

Amo onkak netasojtalis tein okachi kualtsin uan tein okachi tapaleuia ke tein tikpialiaj Dios. Yejua ika, miakej taltikpakneminij akin seseko kayomej, taman kemej ixtamatij uan tajtouaj okse tajtol kisenueyichiuaj Jiova, uan kisentekitiliaj (Sof. 3:9). Maj timochikauakan mojmostaj tiknextiskej nejin kualtsin kualneskayot tein espíritu kichiua maj tikpiakan.