1, 2. (1) Iraay ko manan a rihaday no mita nohatini? (2) Misamaanay hano awaayho ko soˈlinay rihaday nohatini? (Nengnengen ko satapangan coka.)

KITA maemin maolahay to rihadayay nokaˈorip, awa ko cariraw. Pafeliay ci Yihofa to dipayal kitanan, ho caka mafedfed no cariraw kita, ira ko rihaday no falocoˈ. (Filipi 4:6, 7) Maharekayto kita patafang to tireng ci Yihofaan, hato iraay ko “sakararihaday ita ato Kawas,” ngaˈay ko kalalaˈed ato Cingranan.​—Loma 5:1.

² Nikawrira, awaayho ko soˈlinay rihaday. Itini i salikoray lintad, marariday malacongis ko tamdaw. (2 Timoti 3:1-4) Kita o Krisciyang, iraay ko noˈadingoan a lalood, mamicoay kita ci Satanan ato mararaway a kimad ningra. (2 Korinto 10:4, 5) Kawra o kasomadan i, o salawina ita micoliay to pidoko ita ci Yihofaan. Alatek malikafay cangra to pihakelongan ita, makapoˈi to kita ko palacinowasay to lomaˈ, somowal to kaketonen ko kalalaˈed i cangranan.  Samaanen ita minengneng ko picoli no paro no lomaˈ ato salawina hani? Samaanen ita misiˈayaw ko pakayniay pihakelongan a pasangar hani?

3, 4. (1) O kimad ni Yis misamaanay a mifiyor to tamdaw? (2) Itini masamaanay a pakayraan mitoor ci Yisan cowa ko madoloay?

³ Mafanaˈay ci Yis, o kimad ningra o papalacinowas to tamdaw, tatimolo ko mitooray tamdaw wangaˈ, pakaremo to nika picoli no tao. O matiniay pakayraan, o mamifiyor to kalalaˈed no paro no lomaˈ. Sanay ci Yis: “O sakatayni ako i hekal i, o pararihadayay, aka ka saan ko harateng namo. Caay ko pararihadayay ko nika tayni ako, o pafangafangay ko nika tayni ako. Nawhani o sakatayni ako i, o papipacoliay to faˈinayan a wawa i mama ningra, o papipacoliay to fafahiyan a wawa i ina ningra, o papipacoliay to fafahiyan a kadafo i ina no faˈinay ningra. O mamalaˈada no tamdaw ko paro no lomaˈ ningra.”​—Matay 10:34-36.

⁴ Sanay ci Yis: “O sakatayni ako i hekal i, o pararihadayay, aka ka saan ko harateng namo,” sapatalipaˈelalaw cingra, ano mitoor cingranan, o papaira to mananan a teloc. Manaokaniw, o sapipadamaaw cingra to tamdaw mafanaˈ to Kawas, cowa ko sapipalakaw to kalalalˈed no tamdaw. (Yohani 18:37) Kawra, ano saka madimadiaw mitafo to kimad ni Kristo i, cowa ko madoloay, mangalefay ano caka kahi a micada to kimad ko widang ato paro no lomaˈ.

5. O Krisciyang alatek mamisiˈayaw to manan a pakayraan?

⁵ Somowalay ci Yis, mitoor cingranan ko tamdaw, oha mamihadidi to nika picoli no paro no lomaˈ. (Matay 10:38) O soˈlinay a mitooray ci Yisan, oha mamiemem to salikaf no paro no lomaˈ, latek liyasen no salawina. Soˈliˈlin hatira, o malayapay ita ikakaay ko nika adihay to malahedaway ita.​—ˈOsien ko Marko 10:29, 30.

6. Ano micoli to pihakelongan ita ko paro no lomaˈ i, haharatengen ita ko manan?

⁶ Soˈlin ano micoli ko salawina to pihakelongan ita, maolahayho kita cangranan. Kawra aka mapawan, ci Yihofa aci Yis ko sakakaay a kaolahan ita. (Matay 10:37) Haratengen, kalasaka dademakan ni Satan ko nika olah ita to paro no lomaˈ, mipalak to nika madimadi ita to Kawas. Lengoen ita ko pina pakayraan, sasamaanen ita misiˈayaw ko picoli no paro no lomaˈ.

7. Ano cowa pihakelong ko raramod iso, mamisamaan ko pinengneng iso to demak?

⁷ Palimoˈotay ko Fangcalay Cudad, “o mamaroray ko mararamoday a tamdaw,” sanay. (1 Korinto 7:28) Ano cowa pihakelong ko raramod iso, o macadaay iso a saroero ato cariraw, alatek mikikakaay ko nika adihay to mararamoday a Krisciyang. Itini to matiniay pakayraan, tano pinengneng ni Yihofa to demak, tada masaka limelaan. Soˈlin cowaho ka kahi mala Krisciyang ko ramod iso nohatini, cowa ko ngangaˈay kiso malacinowas anca masasiwatik to ramod iso. (1 Korinto 7:12-16) Soˈlin cowa pikerid ko faˈinay i noˈadingoan demak, kawra, o sasakaretengenho no fafahi ko faˈinay, samanen o tawki no paro no lomaˈ cingra. Mahecaday, o Krisciyang a faˈinay oha papatahekal to cowa pisateked a olah ato damsayay i caay pihakelong a fafahi ningra.​—Ifiso 5:22, 23, 28, 29.

8. Ano mikeceng ko raramod to noˈadingoan a demak iso, haratengen iso ko manan?

⁸ Ano mikeceng ko raramod to noˈadingoan a demak iso, wa misamaan kiso hani? Patinakoen, o faˈinay no cecay fafahiyan salikaka pasowal cingranan, hacowa aca romiˈad ngaˈ, ngaˈay mitosil cingra saan. Ano hatiraay i, licayen ko niyah: “Micongeday ko faˈinay takowan a midoko to Kawas han?  Ano cowa ka hatira i, samaanen ako patoor ko saali ningra hani?” Pairaen ita ko matatodongay a waywayan, ho caka malacongis ato raramod.​—Filipi 4:5.

9. Ano cowa ko Krisciyang ko raramod iso, mamisamaan pasifanaˈ to wawa mikangodo to wama wina?

⁹ Ano cowa ko Krisciyang ko raramod iso, palahad to wawa cowa ko madoloay demak. O Krisciyang tamdaw, papasifanaˈen ko wawa mitengil to limoˈot no Fangcalay Cudad: “Kangodoen ko mama ato ina iso,” sanay. (Ifiso 6:1-3) Kawra, ano caka pitoor to palinian no Fangcalay Cudad ko raramod i, wa misamaan kiso hani? Sakaretengen ko raramod, patiriˈ to ngaˈayay taˈarawan. Aka somowal to tatiih no raramod i kaˈayaw no wawa. Tadtaden cangra ono niyah a harateng to mamidoko ci Yihofaan hokira. O ngaˈayay waywayan no wawa, mamisolot to cowa pihakelong a wama anca wina to soˈlinay pihakelongan.

10. Ano cowa pihakelong ko raramod iso, mamisamaan pasifanaˈ to wawa to soˈlinay a kimad?

¹⁰ Nolatekay, cowa pihakelong a raramod alatek papirienangay to wawa tono mararaway pihakelongan a lisin, anca pasifanaˈ cangranan to mararaway a kimad. O roma faˈinay mikecengay to fafahi pasifanaˈ to wawa to Fangcalay Cudad. Soˈliˈlin hatira, o Krisciyang a fafahi mamisaˈicel a pasifanaˈ to wawa. (Dmak 16:1; 2 Timoti 3:14, 15) Ano miconged ko cowa pihakelong a faˈinay to fafahi pasifanaˈ to mimingayho a wawa, anca mikeceng to fafahi miˈorong to wawa masaˈopo i, soˈlin o mamisakareteng to saˈosi no faˈinay, kawra o aˈaˈmeten ningra ko toki a milengo to kimad i wawa, padama to wawa  mafanaˈ ci Yihofaan ato palinian Ningra. (Dmak 4:19, 20) Manaokaniw, saikor o wawa ko mamisaˈosi to mamala Krisciyang cangra hokira.​—Limoˈot 30:19, 20. *

11. O manan a demakan alatek paira to lacongis ato cowa pihakelong a salawina ita?

¹¹ Isalakat minanam kita to Fangcalay Cudad ato Misawacayay Tamdaw ni Yihofa i, cowa ka fanaˈ ko paro no lomaˈ alatek. Kawra macakatto ko noˈadingoan ita i, o papasowalento ita to nika pihakelong no mita. (Marko 8:38) Ano satimoloen iso patahekal ko saaroˈan i, aira ko kalacongis alatek. Sinanoten ko pina hapakayraan, to sasamaanen ko demak, madimadi ci Yihofaan halo mitafo to rihaday ato salawina.

12. Cowa pihakelong a salawina hano micoli kitanan? Sasamaanen ita patahekal to siniˈada cangranan?

¹² Siniˈada to falocoˈ no salawina. Tona mafanaˈayto kita to Kimad no Fangcalay Cudad a mahemeken, alatek mararaw ko piharateng no salawina to masaˈfitay kita, anca micomoday i katalawan a pihakelongan. Tona cowa pikihatiya cangranan malawla to lisin, cowato ka olah cangranan wa saan. Lacemcemen to malatiihto kita. Siniˈadaen cangra, tengilen ko sowal nangra, mafanaˈ to lacemcem no falocoˈ nangra. (Taneng 20:5) Tarokos ci Pawlo toha sapitenakaw to ratoh, mikiemelay mafanaˈ to masamaamaanay a tamdaw. Todongen ita ci Pawlo, ho mafanaˈ to sasamaanen padama ko salawina.​—1 Korinto 9:19-23.

13. Sasamaanen ita masasowal ko cowa pihakelong a salawina?

¹³ Damsay ko sasowalen. Sowal no Fangcalay Cudad: “Kararid a damsay ko sowal namo.” (Kolosay 4:6) Ngitangiten ci Yihofa pafeli to fangcalay saocor, padama kitanan ano masasowal to salawina i, patahekal kita to heci no fangcalay saocor. Aka macacoli to mararaway a pihakelongan nangra. Ano midokaˈ ko sowal nangra, anca masomaden kita to waywayan nangra, todongen ko taˈarawan ni Pawlo, sanay cingra: “Yo ˈkaken no tao kami i, pakalemeden niyam cangra. Yo kariˈangen no tao kami i, hadidi sa kami. Yo lokesen no tao kami i, o ngaˈayay a sowal ko sapacawi niyam.”​—1 Korinto 4:12, 13.

14. Ano makapah ko waywayan iso i, paira to manan a epocan?

¹⁴ Tafoen ko makapahay waywayan. Damsay ko sasowalen papadama kitanan mitafo to ngaˈayay kalalaˈed ato salawina, kawra ano makapah ko waywayan ita i, mangalefay o ciepocay. (ˈOsien ko 1 Pitiro 3:1, 2, 16.) Patinakoen, ci Kating, 13 ko mihecaan minanamay to Fangcalay Cudad, pakidemay a micoli ko paro no lomaˈ. Sanay ko sowal ningra: “Cowa ka fanaˈ kako to minengnengay to waywayan ako ko paro no lomaˈ, ikor o wama wina, tatosa fofo ako micadaayto to kimad.” Soˈlinna cowa picada ko salawina to kimad ano han i, o mamahemekho kita, samanen tona makapah ko waywayan ita mahemekay ci Yihofa.

15. Toha sakaecaaw macacoli ato salawina, ngaˈay a misamaan to demak kita?

¹⁵ Saˈayawen a misaday. Saˈayawen a miharateng to mamafekad ko manan to sakacacoliaw, sadayen ko hapakayraan a misaysay. (Taneng 12:16, 23) O cecay fafahiyan salikaka i Australia sanay mifanaˈ: “O wama no faˈinay ako pakidemay a micoli to pihakelongan niyam.ˈAyaw no tatayra milisoˈ kami, mingitangitan ci Yihofa padama tamiyanan, ho caka masasongtol ko caciyaw ato wama. Sadayan niyam ko hasowal ngaˈay ko nika caciyaw. Toha sakaecaaw macacoli to pihakelongan, saˈapotoan niyam ko pilisoˈ a toki.”

16. Ano ira ko nika sasongtol ato salawina i, alatek tatiihen ko harateng iso, samaanen iso miremo ko hatiraay a harateng hani?

 ¹⁶ Manaokaniw, cowa ko mamasaheci a maliyas ko nika sasongtol ato caay pihakelong a salawina. Soˈlinsa ira ko nika sasongtol, alatek tatiihen ko harateng iso, samanen maolahay kiso cangranan, sapahemekaw cangranan. Ano hatiraay ko falocoˈ iso, kiemelen ko olah iso ci Yihofaan, paikakaen to olah to salawina. Fanekfek kiso alatek papadama to salawina mahapinang kora sakaˈorip a kimad no Fangcalay Cudad. Ano masamaamaanto, haratengen cowa ka ngaˈay a paciecien iso cangra micada to kimad. Paˈarawen cangra to epoc noka pitoor iso ci Yihofaan. Kanonoˈan ita Wama pafeliay i cangranan to toki a mipiliˈ to mamidoko Cingranan hokira.​—Isaya 48:17, 18.

17, 18. Ano miliyasay ci Yihofaan ko paro no lomaˈ iso i, o manan ko papadama tisowanan pakaremo to nika adada no falocoˈ?

¹⁷ Ano ira ko mafalahay no paro no lomaˈ anca sapiliyasaw to kasakopang cangra, adadaen ko falocoˈ ita, matira mapacokay no fonos. Samaanen iso miremo ko hatiraay a adada no falocoˈ hani?

¹⁸ Mararid a mirienang to noˈadingoan a demak. Patanekteken ko pasoˈlinay falocoˈ, mararid a miˈosi to Fangcalay Cudad, misaday to lalakaw no saˈopo, mirienang to mitosilay demak, mitolon ci Yihofaan pafeli to ˈicel kitanan pakahadidi. (Yuta 20,21) Ano mihaenayto kiso misaˈicel, cowaho ka lahedaw ko somad no falocoˈ i, wa misamaanto hani? Aka a pisawad! Mararid a mirienang to noˈadingoan a demak papadama tisowanan miˈimer to harateng ato falocoˈ iso. Sinanoten koya mitiliday to ˈOlic saka 73 a fedengan, iraay ko cecay liyad, mararaway ko harateng ato cariraway ko falocoˈ ningra, kawra ta micomod cingra i fangcalay sefi no Kawas i, mafalicayto ko harateng ningra. (ˈOlic 73:16, 17) Madimadi kiso midoko ci Yihofaan i, o papadama tisowanan ira ko matatodongay a noka pinengneng to demak.

19. Samaanen ita misakareteng ko pirikec a limasmas ni Yihofa?

¹⁹ Sakaretengen ko pirikec a limasmas ni Yihofa. Pirikec a limasmas ni Yihofa pairaay to epoc kitanan maemin, mahawpay koya mararaway tamdaw. Soˈlin adadaay ko falocoˈ itiya. (ˈOsien ko Hipray 12:11.) Patinakoen, palimoˈotay ci Yihofa “aka pikapot to matiraay a tamdaw”, sanay. (1 Korinto 5:11-13) Soˈliˈlin adadaay ko falocoˈ ita, ano cowa ko macalohay demak, aka pikapot to mafalahay a paro no lomaˈ, aka patingwaen, aka patikamien cangra.

20. O tatokelen ita mitala ko manan?

²⁰ Mitokel a mitala. O olah hananay, itini i maamaan a demak mitokelay a mitala o sanay, mahawpay oya miliyasay ci Yihofaan a tamdaw, mitokelay kita to papasasiyor cangra. (1 Korinto 13:7) Maˈaraw iso ano iraay ko sapatatikoraw falocoˈ no paro no lomaˈ, tolonen iso to mamalifok nangra ko ˈicel nai Kimad no Kawas, pacawi to satahidang ni Yihofa: “Kasasiyor ko falocoˈ namo a pasayni i Takowanan.”—Isaya 44:22.

21. Ano pakayniay nipihakelong iso ci Yisan a macoli no paro no lomaˈ, samaanen iso ko demak?

²¹ O sowal ni Yis ano paikakaen ita cingranan ko nika pisakareteng to tao i, cowa ka tatodong kita i cingranan sanay. Kawra pasoˈlinay cingra to tatimolo cangra, soˈlin tahalifa to sacoˈay no paro no lomaˈ, o mamadimadi cangra. Ano pakayniay nipihakelong iso ci Yisan a macoli no paro no lomaˈ, tiˈeren ci Yihofa, saalien ko sapadama Ningra pakaremo to pasangar. (Isaya 41:10, 13) Ano madimadi kiso i, mamahemek ko falocoˈ, samanen mamilifok kiso to hemek ni Yihofa aci Yis, hanaca o papalifonen nangra kiso.