1, 2. а) Јеһова бизә нә бәхш едиб? б) Бу зәманәдә там сүлһә наил олмағымыза мане олан нәдир? (Мәгаләнин әввәлиндәки шәклә бахын.)

ӘМИН-АМАНЛЫГДА, башы динҹ јашамаг һәр кәсин арзусудур. Шүкүрләр олсун ки, Јеһова бизә Өз сүлһүнү, јәни бизи нараһатлыгдан, ниҝаранчылыгдан горујан гәлб раһатлығы бәхш едир (Филип. 4:6, 7). Һәмчинин өзүмүзү Јеһоваја һәср етдијимиз үчүн Онунла арамызда сүлһ, јәни ҝөзәл мүнасибәтләр вар (Ром. 5:1).

² Амма там сүлһү дујаҹағымыз вахт һәлә јетишмәјиб. Сон дәрәҹә чәтин олан бу зәманә мүнагишәләрлә долудур, үзүјола инсанларын сајы ҝетдикҹә азалыр (2 Тим. 3:1—4). Үстәҝәл, мәсиһи олдуғумуз үчүн Шејтанла, онун јајдығы јалан тәлимләрлә мүбаризә апармалы олуруг (2 Кор. 10:4, 5). Амма динҹлијимизи поза биләҹәк ән бөјүк фактор иманымыза шәрик олмајан гоһумларымыздыр. Бәзән гоһумларымыз әгидәмизә ришхәнд едирләр, аиләнин парчаланмасына сәбәб олдуғумузу дејирләр, динимиздән дөнмәсәк, бизимлә бүтүн әлагәләри кәсәҹәкләри илә һәдәләјирләр. Бәс онларын бу ҹүр мүнасибәтинә неҹә јанашмалыјыг? Бу кими чәтинликләри неҹә аша биләрик?

3, 4. а) Иса Мәсиһ тәлимләри илә бағлы һансы ҝерчәклији вурғуламышды? б) Мәсиһин ардынҹа ҝетмәк хүсусилә нә вахт чәтин олур?

³ Иса Мәсиһ билирди ки, онун тәлимләри инсанлар арасында фикир ајрылығына сәбәб олаҹаг. Бу исә бәзи аиләләрдә мүнасибәтләрин ҝәрҝинләшмәсинә ҝәтириб чыхараҹаг. Мәсиһ демишди: «Елә билмәјин ки, мән јер үзүнә сүлһ ҝәтирмәјә ҝәлмишәм. Мән јер үзүнә сүлһ јох, гылынҹ ҝәтирмәјә ҝәлмишәм. Мән оғулу атадан, гызы анадан, ҝәлини гајынанадан ајырмаға ҝәлмишәм. Бәли, инсанын дүшмәни өз евиндәкиләр олаҹаг» (Мәт. 10:34—36). Бу исә о демәк иди ки, Исанын ардынҹа ҝетмәк истәјәнләр ҹәсарәтли олмалыдырлар.

⁴ «Елә билмәјин ки, мән јер үзүнә сүлһ ҝәтирмәјә ҝәлмишәм» сөзләри илә Мәсиһ демәк истәјирди ки, онун ардынҹа ҝетмәк истәјән инсан нәтиҹәләри ҝөзә алмалыдыр. Сөзсүз, Исанын мәгсәди аилә телләрини зәифләтмәк дејилди. Онун амалы Аллаһдан ҝәлән һәгигәт хәбәрини бәјан етмәк иди (Јәһ. 18:37). Бунунла белә, инсанын гоһум вә достлары һәгигәти гәбул етмирсә, онун үчүн Мәсиһин тәлимләринә бағлы галмаг чәтин олаҹаг.

5. Мәсиһин давамчылары нәләрә синә ҝәрмәли олурлар?

⁵ Иса Мәсиһ давамчыларынын дөзмәли олдуглары сынаглара аилә тәрәфиндән ҝөстәрилән мүгавимәти дә дахил етмишди (Мәт. 10:38). Мәсиһә лајиг олмаг истәјәнләр јахынларынын истеһзаларына, һәтта аилә үзвләринин онлардан үз чевирмәсинә дөзмәли олурлар. Бүтүн бунлара бахмајараг, онларын газандыглары итирдикләриндән гат-гат чох олур. (Марк 10:29, 30 ајәләрини охујун.)

6. Јеһоваја ибадәт етмәјимизә гаршы чыхан гоһумларла бағлы нәји јадда сахламалыјыг?

⁶ Гоһумларымызын динимизә гаршы чыхмалары онлары севмәјимизә мане олмамалыдыр. Бунунла белә, Јеһоваја вә Иса Мәсиһә мәһәббәтимиз истәнилән инсана олан мәһәббәтдән үстүн олмалыдыр (Мәт. 10:37). Бир шеји билмәлијик ки, Шејтан аиләјә, гоһумлара дујдуғумуз бағлылыг һиссимиздән истифадә едәрәк Јеһоваја сәдагәтимизи сындырмаға чалышаҹаг. Ҝәлин јахынларымызын наразылығы илә бағлы бир нечә вәзијјәтә нәзәр салаг вә ҝөрәк бу чәтинликләрин өһдәсиндән неҹә ҝәлә биләрик.

7. Һәјат јолдашы мәсиһи олмајанлар вәзијјәтләринә неҹә јанашмалыдырлар?

⁷ Мүгәддәс Китабда јазылыб ки, аилә һәјаты өзү илә чәтинликләр ҝәтирир (1 Кор. 7:28). Һәјат јолдашынызын иманыныза шәрик олмамасы исә әлавә чәтинликләрә сәбәб ола биләр. Бу заман вәзијјәтә Јеһованын ҝөзү илә бахмағы баҹармаг лазымдыр. Јолдашынызын Јеһоваја ибадәт етмәмәси бошанмағыныза вә ја ајры јашамағыныза әсас вермир (1 Кор. 7:12—16). Һәјат јолдашыныз аиләдә руһани ишләрдә башчылыг етмәсә дә, она аилә башчысы кими һөрмәт едилмәлидир. Ејнилә, мәсиһи әр иманына шәрик олмајан арвадыны фәдакарҹасына севмәли, онунла нәвазишлә давранмалыдыр (Ефес. 5:22, 23, 28, 29).

8. Һәјат јолдашыныз ибадәтинизә мәһдудијјәт гојурса, һансы суаллары ҝөтүр-гој етмәк олар?

⁸ Бәс һәјат јолдашыныз ибадәтинизлә бағлы мәһдудијјәтләр гојурса, онда неҹә? Мисал үчүн, бир баҹынын әри ондан хидмәтә јалныз һәфтәнин мүәјјән ҝүнләри чыхмағыны истәјирди. Әҝәр сиз дә охшар һалла үз-үзәсинизсә, бу суаллары ҝөтүр-гој един: Јолдашым Јеһоваја ибадәт етмәји үмумијјәтлә гадаған едир? Әҝәр белә дејилсә, бәлкә ҝүзәштә ҝетмәк олар? Ифратдан гачмаг аиләдахили мүнагишәләри минимума ендирмәјә көмәк едәҹәк (Филип. 4:5).

9. Мәсиһи олмајан валидејнинә һөрмәт етмәси үчүн ушағы неҹә өјрәтмәк олар?

 ⁹ Һәјат јолдашынызын иманда олмамасы ушаға тәрбијә вермәји чәтинләшдирә биләр. Мисал үчүн, әҝәр јолдашыныз Аллаһын јүксәк нормаларына ујғун јашамырса, сизә Мүгәддәс Китабдакы «атана вә анана һөрмәт ет» әмрини өвладыныза өјрәтмәк елә дә асан олмаја биләр (Ефес. 6:1—3). Белә һалда јахшы олар ки, һәјат јолдашыныза һөрмәт ҝөстәрмәкдә өвладларыныза нүмунә оласыныз. Јолдашынызын мүсбәт ҹәһәтләрини ҝөрүн, ону тәрифләјин. Ушағынызын јанында һәјат јолдашынызы писләјәрәк ону ҝөздән салмајын. Бунун јеринә, өвладыныза баша салын ки, Јеһоваја ибадәт етмәк шәхси сечим мәсәләсидир. Ушагларын јахшы давранышы өз нөвбәсиндә јолдашынызы һәгигәт јолуна ҹәлб едә биләр.

10. Дин ајрылығы олан аиләләрдә мәсиһи валидејн ушагларына Мүгәддәс Китаб һәгигәтләрини неҹә ашылаја биләр?

¹⁰ Елә олур ки, Јеһоваја ибадәт етмәјән тәрәф ушагларынын бүтпәрәст мәншәли бајрамларда иштирак етмәсини истәјир, јахуд онлара јалан дини тәлимләрин өјрәдилмәсиндә исрар едир. Елә дә олур ки, әр мәсиһи арвадынын ушаға Мүгәддәс Китабы өјрәтмәсини гадаған едир. Амма һәтта белә һалларда, мәсиһи гадын ушағына әлиндән ҝәлән гәдәр Јеһова Аллаһ һаггында өјрәдә биләр (Һәв. 16:1; 2 Тим. 3:14, 15). Мәсәлән, баҹымызын јолдашы она азјашлы ушағына Мүгәддәс Китаб дәрси кечмәјә, ушағы јығынҹаға апармаға иҹазә вермирсә, баҹы онун гәрарына һөрмәтлә јанашмалыдыр. Анҹаг бу, о демәк дејил ки, о, вәзијјәт дүшдүкҹә ушағынын јанында иманы барәдә данышмамалы, она мәнәви тәрбијә, Јеһова һагда билик  ашыламамалыдыр (Һәв. 4:19, 20). Сөзсүз ки, нәтиҹәдә ушаглар һансы јолу тутаҹаглары барәдә өзләри гәрар вермәлидир (Ган. 30:19, 20) *.

11. Јеһованын Шаһиди олмајан гоһумларла арамызда һансы проблем јарана биләр?

¹¹ Ола билсин, Мүгәддәс Китабы тәзә-тәзә өјрәнәндә гоһумларымыза бу һагда һеч нә демәмишдик. Лакин иманымыз артыгҹа өјрәндикләримиз барәдә ачыг данышмағын ваҹиблијини анладыг (Марк 8:38). Әҝәр сизин етигадыныз гоһумларынызын наразылығына сәбәб олубса, нөвбәти мәлумат сизә арадакы ҝәрҝинлији минимума ендирмәјә, ејни заманда Јеһоваја садиг галмаға көмәк едәҹәк.

12. а) Гоһумларымызын наразылығына нә сәбәб ола биләр? б) Онлара неҹә анлајыш ҝөстәрә биләрик?

¹² Диндашымыз олмајан гоһумлара анлајыш ҝөстәрәк. Сөзсүз ки, Мүгәддәс Китабдан өјрәндикләримиз бизә сонсуз севинҹ бәхш едиб. Амма гоһумларымыза елә ҝәлә биләр ки, бизим бејнимизи јујублар, јахуд һансыса сектаја гошулмушуг. Ја да ола билсин, онларла бајрам кечирмәмәјимизи сајмамазылыг кими гаршылаја биләрләр. Һәрдән дә олур ки, «һагг диндән» узаглашдығымызы дүшүнүб ҝәләҹәјимиз үчүн нараһат олурлар. Белә һалларда ҝәрәк онлара анлајыш ҝөстәрәк. Нараһатлыгларына гулаг асыб онлары баша дүшмәјә чалышаг (Мәс. 20:5). Һәвари Булус хош хәбәри һәр ҹүр адама чатдырмаг үчүн онлары баша дүшмәјә чалышырды. Бу ҹүр мүнасибәт бизә дә инсанларла дил тапмаға көмәк едәҹәк (1 Кор. 9:19—23).

13. Диндашымыз олмајан гоһумларымызла неҹә данышмалыјыг?

¹³ Мүлајимликлә данышаг. Мүгәддәс Китабда јазылыб: «Гој сөзләриниз... үрәкачан олсун» (Кол. 4:6). Биз гоһумларымызла сөһбәт едәркән руһун бәһрәсини нүмајиш етдирмәк үчүн Јеһовадан мүгәддәс руһ истәмәлијик. Онларын јалан дини бахышлары илә бағлы һәр фикир үстүндә мүбаһисә етмәмәлијик. Гоһумларымызын сөзләри вә ја һәрәкәтләри бизи инҹидәндә һәвариләри јадымыза салаг. Һәвари Булус јазмышды: «Бизи писләјирләр, биз алгыш охујуруг. Бизи тәгиб едирләр, сәбирлә дөзүрүк. Үстүмүзә гара јаханлара мүлајим ҹаваб веририк» (1 Кор. 4:12, 13).

14. Нүмунәви давранышымыз һансы бәһрәләр верә биләр?

¹⁴ Нүмунәви давранаг. Мүлајим данышығымыз бизә гаршы чыхан гоһумларымызла мүнасибәтдә көмәк олса да, унутмајаг ки, әмәл сөздән бәлағәтли олур. (1 Бутрус 3:1, 2, 16 ајәләрини охујун.) Гој јашајышымыздан гоһумларымыза бәлли олсун ки, Јеһованын Шаһидләри тәмиз, мәналы һәјат сүрүрләр, аиләләри хошбәхт, ушаглары тәрбијәлидир. Һәтта онлар һәгигәти гәбул етмәсәләр дә, истәнилән һалда, биз Аллаһы разы салмағын севинҹини дадаҹағыг.

15. Мүбаһисәли вәзијјәтләрин гаршысыны алмаг үчүн нә едә биләрик?

¹⁵ Өнҹәдән һазырлашаг. Мүбаһисә јарада биләҹәк вәзијјәтләр барәдә өнҹәдән дүшүнүб бу вәзијјәтдә неҹә давранаҹағымызы ҝөтүр-гој едәк (Мәс. 12:16, 23). Австралијалы бир баҹы нәгл едир: «Гајынатам динимизин гәти әлејһинә иди. Һалыны сорушмаг үчүн она зәнҝ етмәздән өнҹә јолдашымла Јеһоваја дуа едиб бизә көмәк етмәсини истәјирдик ки, ишдир, бизи аҹыласа, она сәрт ҹаваб гајтармајаг. Сөһбәтимизин хош кечмәси үчүн нә барәдә данышаҹағымызы өнҹәдән фикирләширдик. Динлә бағлы гызғын мүбаһисәләрә ҝәлиб чыхмајаг дејә, чалышырдыг сөһбәти чох узатмајаг. Буна ҝөрә дә зәнҝин мүддәтини габагҹадан тәјин едирдик».

16. Гоһумларымызын наразылығына ҝөрә өзүмүзү ҝүнаһкар һисс едәндә бизә нә көмәк едә биләр?

 ¹⁶ Әлбәттә ки, гоһумларымызла арамызда јарана биләҹәк бүтүн наразылыглардан гача билмәрик. Онлары севдијимизә, хәтирләринә дәјмәк истәмәдијимизә ҝөрә, белә һаллар јарананда, ола билсин, өзүмүзү ҝүнаһкар һисс едәк. Әҝәр сиз дә өзүнүзү белә һисс едирсинизсә, Јеһоваја сәдагәти доғмаларыныза дујдуғунуз мәһәббәтдән үстүн тутун. Бу мөвгејиниз гоһумларынызын Мүгәддәс Китаба әмәл етмәјин һәјати әһәмијјәт дашыдығыны анламасына көмәк едә биләр. Һәмчинин унутмајын ки, инсанлара зорла дининизи гәбул етдирә билмәзсиниз. Мәрһәмәтли Аллаһымыз бизим кими, онлара да сечим имканы вериб. Одур ки, гој сизин нүмунәви давранышыныз инсанлара Јеһоваја ибадәт етмәјин нә гәдәр ҝөзәл олдуғуну ҝөстәрсин (Әшј. 48:17, 18).

17, 18. Аилә үзвүмүз Јеһовадан үз дөндәрәрсә, бунун аҹысына неҹә дөзә биләрик?

¹⁷ Аилә үзвүнүн јығынҹагдан кәнар олунмасы вә ја Јеһованын Шаһиди олмагдан имтина етмәси ағыр дәрддир. Әҝәр бу, бизим дә башымыза ҝәлибсә, бунун аҹысына неҹә дөзә биләрик?

¹⁸ Руһани фәалијјәтдән галмајаг. Өзүмүзү топарламаг үчүн Мүгәддәс Китабы мүнтәзәм охумаг, јығынҹаглара һазырлашыб орада иштирак етмәк, тәблиғ хидмәтиндән галмамаг, һабелә дөзүм үчүн Аллаһдан ҝүҹ истәмәк зәруридир (Јһд. 20, 21). Амма бүтүн бунлары етсәк дә, бәзән елә олур ки, ибадәтә әввәлки һәвәслә јанашмырыг, санки һәр шеји автоматик едирик. Нә олурса олсун, тәслим олмамалыјыг. Долғун руһани фәалијјәт сағлам дүшүнмәјимизә көмәк едәҹәк. 73-ҹү мәзмурун јазычысы барәдә дүшүнәк. О, јанлыш дүшүнҹәләрә гапылмыш, бәрк нараһатлыг кечирмишди, лакин Аллаһын мүгәддәс мәканына ҝирәндән сонра о, өз дүшүнҹәсинә дүзәлиш едә билди (Зәб. 73:16, 17). Бизим дә давамлы ибадәтимиз дүзҝүн бахышымызы горујуб сахламаға көмәк едәҹәк.

19. Јеһованын интизам тәдбирләринә неҹә һөрмәт ҝөстәрә биләрик?

¹⁹ Јеһованын интизам тәдбирләринә һөрмәт едәк. Аллаһын интизам тәдбирләри нә гәдәр ағрылы олса да, сон нәтиҹәдә һәр кәсә, о ҹүмләдән ҝүнаһ саһибинә дә фајда ҝәтирир. (Ибраниләрә 12:11 ајәсини охујун.) Јеһова бујурур ки, төвбә етмәјән ҝүнаһкарла отуруб-дурмајаг (1 Кор. 5:11—13). Бу, бизим үчүн нә гәдәр чәтин олса да, јығынҹагдан кәнар олунмуш аилә үзвүмүзлә лүзумсуз јерә үнсијјәт етмәмәлијик, истәр телефон, истәр месаж, мәктуб, истәрсә дә e-mail вә ја сосиал медиа васитәсилә.

20. Нәјә үмид етмәлијик?

²⁰ Үмидимизи итирмәјәк. Мәһәббәт «һәр шејә үмид едир», һәтта Јеһованы тәрк едән шәхсин бир ҝүн ҝери дөнәҹәјинә дә (1 Кор. 13:7). Јығынҹагдан кәнар олунмуш аилә үзвүмүздә јахшылыға доғру дәјишиклик мүшаһидә едириксә, дуа едә биләрик ки, о, Аллаһын Кәламындан ҝүҹ алсын вә Јеһованын «Мәнә сары дөн» чағырышына һај версин (Әшј. 44:22).

21. Иса Мәсиһин гојдуғу јолла ҝетмәјимиз аиләмиздә парчаланма јарадырса, нә етмәлијик?

²¹ Иса Мәсиһ демишди ки, һансыса инсаны ондан үстүн тутан шәхс она лајиг дејил. Бунунла белә, о әмин иди ки, аиләләриндән ҝәлән етиразлара бахмајараг, шаҝирдләринин она садиг галмаға ҹәсарәти чатаҹаг. Әҝәр Иса Мәсиһин давамчысы олмаг сизин дә аиләнизә «гылынҹ» ҝәтирибсә, Јеһоваја бел бағлајын. Әмин олун ки, О, сизә јаранан чәтинликләрин өһдәсиндән ҝәлмәјә көмәк едәҹәк (Әшј. 41:10, 13). Јеһова Аллаһын вә Иса Мәсиһин сиздән разы галдығыны, сәдагәтинизә ҝөрә сизә мүкафат верәҹәјини һеч вахт унутмајын!