1, 2. (a) Umbe nsañ di nla kôhna i len ini? (b) Kii i nsôña bés i bana nsañ i len ini, i nya i yôni? (Béñge titii i bibôdle.)

BÉS bobasôna di ngwés niñ ikété nsañ, haa ni nduña. Di nlôôha ti Yéhôva mayéga inyule a nti bés “nsañ Nyambe,” hala wee ñem nwee u u ntat bés le mahoñol mabe ma lôôha bañ tééñga bés! (Filipi 4:6, 7) Kiki di bi ti bésbomede nkikip yak Yéhôva, di gwé ki “nsañ ni Nyambe,” tole maada malam ni nye.​—Rôma 5:1

² Ndi, ngéda i yé ngi kola le Nyambe a lona nsañ i nya i yôni. Minledek mi dilo di nsôk mini, mi yé nyonok ni mindañ, a bak ki le libim li bôt li ngwés momol. (2 Timôtéô 3:1-4) Bés bikristen di nlama jôs Satan sañ i pes mbuu, di jôs ki bikwéha bi biniigana a ntjam mu mbédgé. (2 Korintô 10:4, 5) Ndi i bôt ba nla lôôha tééñga nsañ wés, ba yé bôt bés ba lihaa ba ba gwé bé hémle yada ni bés. Bahogi ba nla yahal hémle yés, ba ômôk bés nsohi le di mbagal lihaa, tole ba nkônha bés woñi le ba ntjôô bés ibale di nwas bé hémle yés. Lelaa di  nlama ni tehe ngolba i nlôl bés ni bôt ba lihaa? Lelaa di nla pamba mu mandutu ngolba i nlona?

3, 4. (a) Kii biniigana bi Yésu bi nlona? (b) Imbe ngéda téntén i nla ba ndutu i noñ Yésu?

³ Yésu a bé yi le biniigana gwé bi bé lama bagal bôt, ni le i bé béda i bet ba bé noñ nye ñem ngui i bisu bi ngolba. Ngolba i, i bé lama tihba nsañ ipôla bijô bi lihaa. Yésu a kal le: “Ni hoñol bañ le me bi lo i lona nsañ hana ’isi; me bi lo bé me i lona nsañ, ndik pansoñ. Inyule me bi lo i jubus mbagla ipôla mut ni isañ, hingonda ni nyañ, nkiya ni nyôgôl. Baoo mut b’a ba bôt bé ba ndap.”​—Matéô 10:34-36.

⁴ Ngéda a nkal le “ni hoñol bañ le me bi lo i lona nsañ,” Yésu a bé sômbôl kal le, bôt bahogi ikété baemble nye ba bé lama ôt pék inyu mam ma ga yiga pémél bo, inyule ba bé noñ nye. Nwin wé u bé lama bagal bôt. I yé mbale le, njômbi Yésu i bé le ñañ nlam u añlana, he bé le i lona lisanda ikété mahaa. (Yôhanes 18:37) I nla ba nledek jam i téñbe ni biniigana bi Yésu, ibale mawanda més ma ñem nyuu tole bôt bés ba lihaa ba nkolba maliga.

5. Kii i bi pémél banigil ba Yésu?

⁵ Yésu a bé sima ngolba lihaa ikété mandutu ma banigil bé ba bé lama hônba. (Matéô 10:38) Inyu unda le ba bé banoñ Yésu, banigil bé ba bé lama hônba diyana tole i neebe yén haa ni mahaa map. Ndi, ba bi kôhna bisai bi bé loo mam ba bi nimis.​—Añ Markô 10:29, 30.

6. Kii di nlama bigda ibale bôt bés ba lihaa ba nkolba biliya gwés inyu gwélél Yéhôva?

⁶ To ngéda bôt bés ba lihaa ba nkolba biliya gwés i gwélél Yéhôva, di nke ni bisu i gwés bo, ndi di nlama bigda le gwéha yés inyu Djob ni Kristô yon i nlama ba jam li bisu. (Matéô 10:37) Di nlama ki yi le Satan a ga noode gwélél gwéha yés inyu lihaa jés inyu bôk ndéñbe yés ipañ Djob. Di wan ngim mam ma ma mbéñge ngolba lihaa, di tehe ki lelaa di nla yémbél mandutu ngolba i, i nlona bés.

7. Lelaa bet ba gwé sobiina nu a ta bé Mbôgi Yéhôva, ba nlama tehe libak jap bomede?

⁷ Bibel i mbéhe le i bet ba mbiiba b’a “nok njiiha ikété minsôn.” (1 Korintô 7:28) Ibale u gwé sobiina nu a ta bé Mbôgi Yéhôva, hala a nla lôôha tééñga we, tole hala a nla lona we nduña keñi ikété libii joñ. Ndi to hala, i yé nseñ le u tehe libak joñ kiki Yéhôva a ntehe jo. Libak le sobiina woñ, nu a ta bé bebee i noñ Kristô li ta bé ngim njom i kôli inyu bagla tole bos ni nye. (1 Korintô 7:12-16) Tolakii munlôm nu a ta bé i maliga a nla bé kena mam ma mbuu, a kôli ni lipém inyule nyen a yé ño u ndap lihaa. Hala a yé nlélém inyu muda nu a ta bé Mbôgi Yéhôva, mankéé a nlama gwés nye i nya i yé le a ba bebee i ti niñ yé inyu yé, a bop ki nye.​—Efésô 5:22, 23, 28, 29.

8. Mambe mambadga u nla badba ibale sobiina woñ a nyéñ le a hubus bibégés gwoñ?

⁸ Kii u nlama boñ ibale sobiina woñ a nyéñ le a hubus bibégés gwoñ? Kiki hihéga, nlôm sita yada a kal nye le a ke añal miñañ minlam ngim dilo ndigi ikété sonde. Ibale yak we u mboma nlélém jam, badba le: ‘Baa nlô wem a mbat me  le me waa bégés Yéhôva? Ibale to, baa me nla neebe jam a nkal me?’ I ba mut a nok bôt bape i nla hôla we i keñgle mindañ mi yañga ni sobiina woñ.​—Filipi 4:5.

9. Lelaa kristen i nla niiga bon bé i ti sobiina wé, nu a ngwélél bé Yéhôva lipém?

⁹ I niiga bon i nla ba ndutu téntén ibale sobiina woñ a ngwélél bé Yéhôva. Kiki hihéga, u nsômbôl niiga bon banan i nôgôl matiñ ma Bibel: “U tinak isoñ bo nyuñ lipém.” (Efésô 6:1-3) Ndi w’a boñ lelaa ibale sobiina woñ a gwé maboñok ma ma nkiha bé ni matiñ ma Bibel? Ti sobiina woñ lipém, inyu ba ndémbél lam inyu bon banan. Bok mis moñ ngii bilem gwé bilam, u béghak ki nye inyu mam malam a mboñ. Keñgle i pot mam ma nwéha nye nyuu i bisu bi bon banan. Maselna ni hala, toñle bo le hiki mut nyen a nlama pohol i gwélél Yéhôva. Bihiumul bilam bi boñge, bi nla tinde sobiina nu a ta bé Mbôgi Yéhôva i gwés maliga.

10. Lelaa bikristen bi bi yé mbiibaga ni mut nu a ta bé Mbôgi Yéhôva bi nla niiga bon bap maliga?

¹⁰ Ngim mangéda, sobiina nu a ta bé Mbôgi Yéhôva a nla gwés le boñge ba lôôs mangand ma bihaiden, tole a ti bo biniigana bi kwéha base. Basañ mbai bahogi ba nla sôña baa bap i niiga bon bap Bibel. Ndi to hala, nyañ mbai nu a yé kristen a mboñ kii yosôna a nla inyu niiga bon bé maliga ma Bibel. (Minson mi baôma 16:1; 2 Timôtéô 3:14, 15) Kiki hihéga, nlôm sita yada a nla tjél le a lôôs yigil Bibel i disiina tjap di bon, tole a tjél le a kena bo makoda. Mu kii a neebe  makidik ma, a nla ki pahal hémle yé bisu bi bon bé ngéda pôla i nene, a niigaga bo bihiumul bilam ni yi i Yéhôva. (Minson mi baôma 4:19, 20) I yé maliga le, bon bé bomede bon ba nlama yoñ makidik map i gwélél Yéhôva.​—Ndiimba Mbén 30:19, 20. *

11. Kii i nla lona mindañ ipôla bés ni bôt ba lihaa ba ba ta bé Mbôgi Yéhôva?

¹¹ Bebek, di bi bôk bé di kal bôt bés ba lihaa le di yé Mbôgi Yéhôva. Kiki hémle yés i bé nañ, di tehe nseñ i pahle bo hémle yés. (Markô 8:38) Ibale makénd u bi bana i kwélés bo i nlona we mindañ ni bôt boñ ba lihaa, wan ngim bitelbene u nla yoñ inyu suhus mindañ ipôla nan, ni tééda ndéñbe yoñ.

12. Inyuki bôt bés ba lihaa ba ba ngwélél bé Yéhôva ba yé le ba kolba bés, ndi lelaa di nla éba le di noode nôgda yom ba nôgda?

¹² Nôgda yom bôt boñ ba lihaa ba ba ngwélél bé Yéhôva ba nôgda. Tolakii di nlôôha ba maséé inyu mam di nigil i Bibel, bôt bés ba lihaa ba nla hoñol le ba yé i lôk bés, tole di yé jôp i base makañ. Ba nla hoñol le di ngwés ha bé bo, inyule di ntégbaha ha bé mangand ni bo. Ba nla ki tôñ inyu bilôl gwés. Di nlama éba le di noode nôgda yom ba nôgda, le di noode tehe mam kiki bo, di yoñok ki ngéda i emble bo inyu yi kii i ntééñga toi bo. (Bingéngén 20:5) Ñôma Paul a bé noode nok “bôt bobasôna” inyu yi lelaa a ñañle bo miñañ minlam. Nlélém liboñok li nla hôla yak bés i len ini.​—1 Korintô 9:19-23.

13. Lelaa di nlama kwel ni bôt bés ba lihaa ba ba ngwélél bé Yéhôva?

¹³ Kwélés bo ni ñemlima. Bibel i nkal le: ‘Minkwel minan mi ba minlam ngéda yosôna.’ (Kôlôsé 4:6) Di nla bat Yéhôva mbuu mpubi wé inyu numus litam jé ngéda di mpôdôs bôt bés ba lihaa. Di nlama bé nomol ni bo inyu bikwéha gwap bi biniigana. Ibale ba mbabaa bés ni bibuk tole ni maboñok map, di nla kôna ndémbél i baôma. Paul a tila le: “Ibale ba nôôma bés, di nsayap yaa [bo]; ibale ba ntééñga bés, di nhônba ndigi; ibale ba ñôbôs bés môl, di nyemhe yaa bo.”​—1 Korintô 4:12, 13.

14. Umbe nseñ di nkôhna i ke ni bisu i bana bilem bilam ipañ bôt bés ba lihaa ba ba ta bé Mbôgi Yéhôva?

¹⁴ Ke ni bisu i bana bilem bilam. To hala kiki i kwélés bo ni libak li nwee li nhôla ikété maada més ni bôt bés ba lihaa ba ba nkolba bés, bilem gwés bilam bi nla bana ngui iloo ha. (Añ 1 Pétrô 3:1, 2, 16.) Ni njel ndémbél yoñ, boñ le bôt boñ ba lihaa ba tehe le Mbôgi Yéhôva i gwé niñ i maséé mu mandap map ma libii, le ba mbôñgôl bon bap, ni le ba yé mapubi, ba ban-ga maboñok malam, ni niñ i yé nyonok ni maséé. To ibale bôt bés ba lihaa ba neebe bé maliga kekikel, di nla kôhna maséé ma ma nlôl ni libak le manôgla més ma nlémél Yéhôva.

15. Lelaa di nla kôôba i keñgle mam ma nla lona mindañ bisu bi ngéda?

¹⁵ Kôôba i bisu bi ngéda. Hégda i mam ma nla lona mindañ, u yi kii u ga boñ inyu keñgle mo. (Bingéngén 12:16, 23) Sita yada i Ôstrélia i nkal le: “Isañ nlô wem a bé oo maliga ngandak. Ilole me ni nlô wem di nke i yuuga nye, di bé di soohe le Yéhôva a hôla bés i lim nye ngéda a mbôdôl nyai. Di bé di kôôba minkwel mi mi bé lama boñ le di  tééda nsañ. Inyu keñgle mimbôñgô mi minkwel mi mi bé béna lona bés minkaa inyu mam ma base, di bi sék minwaa mu ngéda di bé lama tégbaha ni nye.”

16. Lelaa u nla boñ le kiññem i kéés bañ we inyule u nkônha bé bôt boñ ba lihaa maséé?

¹⁶ I yé ntiik le, u nla bé keñgle ngimanôgla nyensôna ni bôt boñ ba lihaa ba ba ta bé Mbôgi Yéhôva. Nya mindañ i, i nla boñ we le kiññem i kahal kéés we, téntén inyule u ngwés bo ngandak, ni le u noode lémél bo hiki ngéda. Ibale u nôgda hala, boñ biliya le ndéñbe yoñ ipañ Yéhôva i ba bisu bi gwéha u gwé inyu lihaa joñ. I bana nya bitelbene i, i nla hôla bôt boñ ba lihaa i nôgda le, i noñ matiñ ma Bibel i nlôôha ba nseñ. Ndi bigda le, u nla bé nyégsa bôt bape i neebe maliga. Ni njel ndémbél yoñ, boñ le ba tehe le i yé nseñ i noñ manjel ma Yéhôva. Djob jés li gwéha li nti yak bo pôla i pohol kii b’a boñ, kiki a mboñ lôñni bés.​—Yésaya 48:17, 18.

17, 18. Kii i nla hôla we i pamba ibale mut woñ lihaa a ntjôô Yéhôva?

¹⁷ Ngéda ba mpémés mut woñ lihaa i ntôñ, tole nyemede nyen a nyoñ makidik le a ntjôô wo, hala a nla nôgha we njôghe ngandak kiki pansoñ le i nyék kwéé. Lelaa u nla nihbe njôghe i?

¹⁸ Tééda bilem gwoñ bi mbuu. Lédés hémle yoñ ni lisoñgol li Bibel hiki ngéda, kôôba inyu makoda, u kee ki mo, yoñ ngaba i añal ñañ nlam, u soohege le Djob a ti we ngui i hônba. (Yuda 20, 21) Ndi kii u nla boñ ibale u nôgda le ñem u ta bé we mu, le u mboñ ndik mam inyu boñ? U tomb bañ! I bana bilem bilam bi mbuu i nla hôla we i tat ñem woñ ni mahoñol moñ. Béñge yom i bi pémél nwet a bi tila Tjémbi 73. A bi hôlôs mahoñol mabe, kayéle hala a tééñga nye ngandak. Ndi a bi la kodol litehge jé ngéda a bi jôp i lap Djob, homa bibégés. (Tjémbi 73:16, 17) Jon ndéñbe yoñ i bégés Yéhôva i ga hôla we i boñ nlélém.

19. Lelaa u nla unda le u ndiihe bitelbene bi Yéhôva inyu kodol bôt?

¹⁹ Neebe ngôndga u Yéhôva. Bikodlene bi, bi nla hôla bés bobasôna, yak nwet a mboñ béba i bana lisuk lilam i dilo di nlo, to ibale hala a nôgha bés njôghe nano. (Añ Lôk Héber 12:11.) Kiki hihéga, Yéhôva a nti bés oda le di “meina bañ ni” mboñbéba nu a ntjél hiel ñem. (1 Korintô 5:11-13) Tolakii di nok njôghe i ñem, di nlama tjél bana maada ni mut wés lihaa nu ba mpémés ntôñ, to sébél, to tilna nye ni njel téléfôn ni njel internet, tole ni njel bikaat.

20. Imbe botñem di nla tééda?

²⁰ Tééda botñem yoñ. Gwéha “i nhémle mam momasôna,” i nhémle yak le i bet ba ntjôô Yéhôva ba ga témb i ntôñ. (1 Korintô 13:7) Ibale u ntehe le mut woñ lihaa a yé boñ mahéñha ikété libak jé, soohe le a kôs ngui i i nlôl Bitilna, ni le a neebe nsébla u Yéhôva: “Témb i meeni.”​—Yésaya 44:22.

21. Kii u nlama boñ ibale u yé mbaglak ni lihaa joñ inyule u noñ Yésu?

²¹ Yésu a kal le, ibale di ngwés mut binam nye ki nye iloo nye, wee di kôli bé ni nye. Ndi a bé yi le banigil bé ba ga bana makénd i téñbe ni nye to ibale lihaa jap li nkolba bo. Ibale i noñ Yésu i bi lona “pansoñ” i lihaa joñ, bôdôl Yéhôva ñem le a’ hôla we i yémbél ndutu i. (Yésaya 41:10, 13) I yi le Yéhôva bo Yésu ba yé maséé ni we, ni le b’a ti we bibom inyu ndéñbe yoñ, i ga ti we maséé.