1, 2. (a) Unsa nga kalinaw ang atong matagamtam? (b) Unsay babag sa pagbaton ug bug-os nga kalinaw karon? (Tan-awa ang hulagway sa sinugdan sa artikulo.)

KITANG tanan gustog malinawong kinabuhi, nga walay gikabalak-an. Mapasalamaton gyod ta nga gihatag ni Jehova kanato “ang kalinaw sa Diyos”​—kalinaw sa hunahuna nga manalipod nato batok sa makapatugawng panghunahuna ug pagbati! (Filip. 4:6, 7) Tungod sa atong pagdedikar kang Jehova, matagamtam pod nato ang “pakigdait uban sa Diyos,” usa ka maayong relasyon kaniya.​—Roma 5:1.

² Pero, wala pa moabot ang panahon nga ipahinabo sa Diyos ang bug-os nga kalinaw. Ang kataposang mga adlaw punog panag-away, ug daghang tawo ang bayolente. (2 Tim. 3:1-4) Ingong mga Kristohanon, duna tay espirituwal nga pagpakiggubat batok kang Satanas ug sa bakak nga mga pagtulon-an nga iyang gipakaylap. (2 Cor. 10:4, 5) Pero ang kinadak-ang hagit sa atong pagpakigdait mahimong maggikan sa dili magtutuong mga paryente. Lagmit ang pipila magbiaybiay sa atong tinuohan, magpasangil nga gibungkag nato ang pamilya, o maghulga nga palayason ta kon dili ta moundang sa pag-alagad.  Unsay angay natong panglantaw sa pagsupak sa pamilya? Unsay atong buhaton aron magmalamposon ta sa pagsagubang niini nga mga pagsulay?

3, 4. (a) Unsay epekto sa mga pagtulon-an ni Jesus? (b) Kanus-a mas lisod ang pagsunod kang Jesus?

³ Si Jesus nahibalo nga ang iyang gipanudlo makapabahin sa mga tawo. Nahibalo sab siya nga gikinahanglan sa iyang mga sumusunod ang kaisog sa pagsagubang sa pagsupak. Kini nga pagsupak makaapektar sa malinawong relasyon tali sa mga membro sa pamilya. Si Jesus miingon: “Ayaw hunahunaa nga ako mianhi aron sa pagdalag pakigdait sa yuta; ako mianhi aron sa pagdala, dili sa pakigdait, kondili sa espada. Kay ako mianhi sa pagpahinabog panagkabahin, sa lalaki batok sa iyang amahan, ug sa anak nga babaye batok sa iyang inahan, ug sa batan-ong asawa batok sa iyang ugangang babaye. Sa pagkatinuod, ang mga kaaway sa usa ka tawo mao unya ang mga tawo sa iyang kaugalingong panimalay.”​—Mat. 10:34-36.

⁴ Sa pag-ingong “Ayaw hunahunaa nga ako mianhi aron sa pagdalag pakigdait,” gipasabot ni Jesus nga kinahanglang hunahunaon sa iyang mamiminaw ang ilang maagoman sa pagsunod kaniya. Ang iyang mensahe posibleng makapabahin sa mga tawo. Siyempre, tuyo ni Jesus ang pagtudlo sa kamatuoran bahin sa Diyos, dili ang pagbungkag ug relasyon. (Juan 18:37) Bisan pa niana, mahimong lisod ang pagtuman sa mga pagtulon-an ni Kristo kon may suod nga higala o membro sa pamilya nga dili modawat sa kamatuoran.

5. Unsay naeksperyensiyahan sa mga sumusunod ni Jesus?

⁵ Si Jesus naghisgot nga apil sa kinahanglang antoson sa iyang mga sumusunod mao ang pagsupak sa pamilya. (Mat. 10:38) Aron mapamatud-ang takos kang Kristo, kinahanglang antoson nila ang pagbugalbugal o bisan ang pagsalikway sa ilang pamilya. Apan, mas dako ang ilang madawat kay sa mawala kanila.​—Basaha ang Marcos 10:29, 30.

6. Unsay angayng hinumdoman kon supak ang atong mga paryente sa atong pagsimba kang Jehova?

⁶ Bisag supak ang atong mga paryente sa atong pagsimba kang Jehova, padayon nato silang higugmaon. Pero angay natong hinumdoman nga kinahanglang unahon nato ang atong gugma sa Diyos ug kang Kristo. (Mat. 10:37) Hinumdoman sab nato nga mahimong gamiton ni Satanas ang atong gugma sa pamilya aron mobiya ta kang Jehova. Atong konsiderahon ang pipila ka situwasyon diin mahitabo ang pagsupak sa pamilya ug susihon kon sa unsang paagi molampos sa pag-atubang niini.

7. Unsaon nimo paglantaw ang imong situwasyon kon dili Saksi ang imong kapikas?

⁷ Ang Bibliya nagpasidaan nga kadtong magminyo “makaagom ug kasakitan sa ilang unod.” (1 Cor. 7:28) Kon dili Saksi ang imong kapikas, lagmit madugangan ang imong stress ug kabalaka. Bisan pa niana, kinahanglang lantawon nimo ang imong situwasyon sama sa panglantaw ni Jehova. Dili balidong rason nga bulagan o diborsiyohan ang imong kapikas tungod lang kay dili siya Saksi. (1 Cor. 7:12-16) Bisan tingalig dili manguna ang imong bana sa espirituwal nga mga butang, kinahanglan gihapon siyang tahoron ingong ulo sa pamilya. Sa susama, kinahanglang pakitaan sa Kristohanong bana ang iyang dili Saksing asawa ug nagsakripisyo sa kaugalingong gugma ug malumong pagmahal.​—Efe. 5:22, 23, 28, 29.

8. Unsay puwede nimong ipangutana sa kaugalingon kon limitahan sa imong kapikas ang imong pagsimba?

⁸ Unsa kaha kon limitahan sa imong kapikas ang imong pagsimba? Pananglitan, usa ka sister ang giingnan sa iyang bana kon unsa lang mga adlawa siya puwedeng mosangyaw. Kon ingon ani pod ang imong situwasyon,  pangutan-a ang kaugalingon: ‘Gidid-an ba gyod ko sa akong kapikas sa pagsimba sa Diyos? Kon wala, puwede ba nakong sundon ang iyang hangyo?’ Ang pagkamakataronganon makatabang nga mamenosan ang problema sa kaminyoon.​—Filip. 4:5.

9. Unsaon pagtudlo sa mga Kristohanon ang ilang mga anak sa pagpasidungog sa dili Saksing ginikanan?

⁹ Mas lisod ang pagbansay sa imong mga anak kon dili Saksi ang imong kapikas. Pananglitan, kinahanglan nimong itudlo nila ang sugo sa Bibliya: “Pasidunggi ang imong amahan ug ang imong inahan.” (Efe. 6:1-3) Pero komosta kon wala magsunod ang imong kapikas sa taas nga sukdanan sa Bibliya? Pasidunggi ang imong kapikas aron sundogon ka sa imong mga anak. Pagpokus sa maayong mga hiyas sa imong kapikas, ug isulti ang imong apresasyon kaniya. Ayaw pagsultig dili maayo bahin sa imong kapikas atubangan sa imong mga anak. Hinuon, ipatin-aw kanila nga personal nga desisyon ang pag-alagad kang Jehova. Ang maayong panggawi sa imong mga anak lagmit makadani sa imong kapikas sa tinuod nga pagsimba.

10. Sa unsang paagi matudloan sa Kristohanong ginikanan ang ilang mga anak sa paghigugma kang Jehova?

¹⁰ Usahay, obligahon sa dili Saksing kapikas ang mga anak nga moapil sa paganong mga selebrasyon o mokat-on sa bakak nga mga pagtulon-an. Lagmit did-an sa pipila ka bana ang Kristohanong kapikas sa pagtudlo sa ilang mga anak bahin sa Bibliya. Bisan pa niana, buhaton sa asawa ang iyang maarangan sa pagtudlo sa mga bata sa kamatuoran. (Buh. 16:1; 2 Tim. 3:14, 15) Pananglitan, dili tingali tugtan sa bana ang iyang Saksing asawa nga pormal nga estadihan ang gagmayng bata o dad-on  sila sa tigom. Bisag tahoron niya ang desisyon sa iyang bana, puwede gihapon niyang isulti sa mga bata ang kamatuoran kon may kahigayonan. Pinaagi niana, makakat-on ang mga bata bahin kang Jehova ug sa iyang mga sukdanan. (Buh. 4:19, 20) Siyempre, ang mga anak kinahanglang modesisyon sa ulahi bahin sa ilang pag-alagad.​—Deut. 30:19, 20. *

11. Unsa tingaliy rason nga magkaproblema ta uban sa atong dili magtutuong mga paryente?

¹¹ Sa sinugdan, lagmit wala nato pahibal-a ang atong pamilya nga nagtuon ta uban sa mga Saksi ni Jehova. Pero sa nagkadako ang atong pagtuo, atong naamgohan nga kinahanglan silang pahibaloon bahin sa atong tinuohan. (Mar. 8:38) Kon ang imong lig-ong baroganan miresultag problema tali kanimo ug sa imong dili Saksing mga paryente, konsideraha ang pipila ka paagi aron mamenosan ang problema ug magmatinumanon.

12. Ngano tingaling supakon ta sa dili magtutuong mga paryente, pero unsaon nato pagpakitag konsiderasyon sa ilang pagbati?

¹² Konsideraha ang pagbati sa dili magtutuong mga paryente. Bisag lipay kaayo ta sa atong nakat-onan sa Bibliya, lagmit ang atong mga paryente nagtuo nga kita nailad o nahimong membro sa usa ka kulto. Tingali maghunahuna sila nga wala na ta mahigugma nila kay dili na ta moapil sa ilang mga selebrasyon. Basin mabalaka pa gani sila sa mahitabo nato kon mamatay ta. Angay natong konsiderahon ang ilang pagbati ug paminawon ang ilang isulti aron masabtan ang ilang gikabalak-an. (Prov. 20:5) Si apostol Pablo naningkamot nga masabtan ang “tanang matang sa katawhan” aron masangyawan sila sa maayong balita. Puwede nato siyang sundogon.​—1 Cor. 9:19-23.

13. Unsaon nato pagpakig-estorya sa dili magtutuong mga paryente?

¹³ Magmalumo. Ang Bibliya nag-ingon: “Himoa ang inyong sinultihan nga kanunayng madanihon.” (Col. 4:6) Puwede tang mangayog balaang espiritu ni Jehova aron mapakita ang bunga niini dihang makig-estorya sa atong mga paryente. Dili ta angayng makigdebate bahin sa tanan nilang bakak nga pagtulon-an. Kon masakitan ta sa ilang gisulti o gibuhat, masundog nato ang mga apostoles. Si Pablo misulat: “Dihang gisultihag pasipala, kami nanalangin; sa dihang gilutos, kami nag-antos; sa dihang gidaot ang dungog, kami nangaliyupo.”​—1 Cor. 4:12, 13.

14. Unsay mga benepisyo sa paghupot ug maayong panggawi?

¹⁴ Hupti ang maayong panggawi. Bisag dakog ikatabang ang malumong sinultihan, ang maayong panggawi mas dakog epekto sa atong pakiglabot sa dili magtutuong mga paryente. (Basaha ang 1 Pedro 3:1, 2, 16.) Pinaagi sa imong ehemplo, ipakita sa imong mga paryente nga ang mga Saksi ni Jehova may malipayong kaminyoon, nag-atiman sa ilang mga anak, hinlo sa moral ug pisikal, ug may makapatagbawng kinabuhi. Bisag dili dawaton sa atong mga paryente ang kamatuoran, malipay gihapon ta nga nahimuot si Jehova sa atong maayong panggawi.

15. Unsaon nato pagplano para sa mga situwasyon nga lagmit moresultag problema?

¹⁵ Pagplano. Hunahunaa daan ang mga situwasyon nga lagmit moresultag problema, ug pangandam kon unsay imong himoon. (Prov. 12:16, 23) Usa ka sister sa Australia miingon: “Ang akong ugangang lalaki supak gyod sa kamatuoran. Sa dili pa manawag niya, mag-ampo mi sa akong bana nga unta tabangan mi ni Jehova nga malumong motubag kon masuko si Papa. Mangandam mig puwedeng estoryahan aron kalmado ra ang among panag-estoryahay. Aron malikayan ang taas nga panag-estoryahay  nga moresultag argumento bahin sa relihiyon, among limitahan ang oras sa among pagtawag.”

16. Unsay buhaton aron dili nimo basolon ang kaugalingon dihang dili mapahimut-an ang imong mga paryente?

¹⁶ Siyempre, di ka makadahom nga malikayan nimo ang tanang dili pagsinabtanay uban sa imong dili magtutuong mga paryente. Tingali basolon nimo ang imong kaugalingon sa maong dili pagsinabtanay, ilabina nga gimahal nimo ang imong mga paryente ug gusto nimong pahimut-an sila. Kon kanay imong gibati, paningkamoting unahon ang imong pagkamaunongon kang Jehova imbes ang gugma sa pamilya. Ang pagbuhat niana motabang sa mga paryente nga makita ang kaimportante sa pagpadapat sa mga prinsipyo sa Bibliya. Bisag unsa pa man, hinumdomi nga dili nimo mapugos ang uban sa pagdawat sa kamatuoran. Pero puwede nimong ipakita kanila ang benepisyo sa pagsunod sa mga sugo ni Jehova. Sama sa iyang gihatag nato, ang atong mahigugmaong Diyos naghatag nilag kahigayonan sa pag-alagad kaniya.​—Isa. 48:17, 18.

17, 18. Unsay makatabang nimo kon may membro sa pamilya nga mobiya kang Jehova?

¹⁷ Kon may membro sa pamilya nga mapalagpot o magpadis-asosyet, sama kinig dunggab sa espada. Unsay imong buhaton aron maagwanta ang kasakìt?

¹⁸ Padayona ang imong espirituwal nga rutina. Palig-ona ang kaugalingon pinaagi sa regular nga pagbasa sa Bibliya, pagpangandam ug pagtambong sa mga tigom, pagsangyaw, ug pag-ampo aron mahatagan kag kusog sa paglahutay. (Jud. 20, 21) Komosta kon gibuhat na nimo ning tanan pero nasakitan gihapon ka? Ayawg surender! Ang maayong espirituwal nga rutina makatabang nimo sa pagkontrolar sa imong hunahuna ug pagbati. Konsideraha ang eksperyensiya sa magsusulat sa Salmo 73. May panahon nga sayop ang iyang panglantaw ug naguol siya pag-ayo. Pero nahibalik ang iyang hustong panglantaw dihang misulod siya sa dapit sa pagsimba sa Diyos. (Sal. 73:16, 17) Makatabang sab nimo ang imong matinumanong pag-alagad kang Jehova.

19. Unsaon nimo pagpakitag pagtahod sa kahikayan ni Jehova sa pagdisiplina?

¹⁹ Tahora ang disiplina ni Jehova. Ang iyang disiplina maghatag ug kaayohan sa tanan, apil sa nakasala, bisag sakit ang epekto niini. (Basaha ang Hebreohanon 12:11.) Pananglitan, si Jehova nagsugo nato nga ‘mohunong sa pagpakig-uban’ sa dili mahinulsolong makasasala. (1 Cor. 5:11-13) Bisag sakit kini, kinahanglang likayan nato ang naandang pagpakigkontak sa napalagpot nga membro sa pamilya pinaagi sa telepono, text, sulat, e-mail, o social media.

20. Unsay padayon natong laoman?

²⁰ Ayawg wad-a ang imong paglaom. Ang gugma “molaom sa tanang butang,” apil na ang paglaom nga makabalik ra kadtong mibiya kang Jehova. (1 Cor. 13:7) Kon makakita kag ebidensiya nga nagbag-o ang usa ka suod nga membro sa pamilya, puwede kang moampo nga makabaton siyag kusog gikan sa Bibliya ug dawaton niya ang awhag ni Jehova: “Balik kanako.”​—Isa. 44:22.

21. Unsay angay nimong buhaton kon supakon ka sa imong pamilya tungod sa imong pagsunod kang Jesus?

²¹ Si Jesus nag-ingon nga kon ang atong gugma sa usa ka tawo molabaw sa atong gugma kaniya, dili ta takos niya. Pero, masaligon siya nga ang iyang mga tinun-an magmaisogon ug magmaunongon kaniya bisan pa sa pagsupak sa pamilya. Kon ang pagsunod kang Jesus nagdalag “espada” diha sa imong pamilya, salig kang Jehova aron makalahutay ka sa mga pagsulay. (Isa. 41:10, 13) Malipay ka nga imong gipahimut-an si Jehova ug Jesus ug nga ilang gantihan ang imong pagkamatinumanon.