1, 2. a) An be se ka hɛɛrɛ juman lo sɔrɔ kabi sisan? b) Mun lo b’an bali ka kɛ hɛɛrɛ la bɛrɛbɛrɛ sisan? (Jaa lajɛ, barokun daminɛ na.)

AN BƐƐ b’a fɛ ka kɛ hɛɛrɛ la ani k’an yɛrɛ tanga haminankow ma. An be Jehova waleɲuman lɔn sabu a ye “Ala ka hɛrɛ” di an ma. O ye hakili sigi ye, min be se k’an tanga hami ni dusu tiɲɛ ma (Filip. 4:6, 7). An y’an yɛrɛkun di Jehova ma minkɛ, “hɛrɛ donna an ni Ala cɛ,” o kɔrɔ, jɛnɲɔgɔnya ɲuman b’an ni Ala cɛ.—Ɔrɔm. 5:1.

² Nka, Ala bena hɛɛrɛ banbali sigi wagati min na, o ma se fɔlɔ. Laban loon nunu na, kɛlɛkow ni kɛlɛtigɛlaw ka ca (2 Tim. 3:1-4). Sutana be ngalon kalanw jɛnsɛn. An kerecɛnw ka ɲi ka Sutana kɛlɛ ani ka ban a ka kalanw ma (2 Kor. 10:4, 5). Nka, n’an somɔgɔ dannabaliw b’an kɛlɛ an ka lanaya kosɔn, o yɛrɛ lo be se ka hami bila an na kosɔbɛ. Dɔw be se k’an lɔgɔbɔ an ka lanaya kosɔn wala k’a fɔ ko an be na ni bɛnbaliya ye an n’an somɔgɔw cɛ. U yɛrɛ be se k’a fɔ ko n’an ma Jehova batoli dabila, an t’olu somɔgɔ dɔ ye tugun. N’an somɔgɔw b’an kɛlɛ an ka lanaya kosɔn, an ka ɲi k’o jati cogo di? N’o ɲɔgɔn b’an kan, an be se ka to hɛɛrɛ la cogo di?

3, 4. a) Ka tugu Yezu kɔ, o nɔfɛkow be se ka kɛ mun lo ye? b) Tuma juman na a ka gwɛlɛ kosɔbɛ ka tugu Yezu kɔ?

³ Yezu tun b’a lɔn ko bɛɛ tun tɛna sɔn a ka kalanw ma ani ko dɔw tun bena a ka kalandenw kɛlɛ. O kama, kalandenw tun ka kan k’u jaa gwɛlɛya. O kɔrɔbɔli tun be se ka na ni bɛnbaliya ye somɔgɔw cɛ. Yezu ko: “Aw kana miiri ko ne nana ni hɛrɛ ye diɲɛ na dɛ. Ne ma na ni hɛrɛ ye, nga ne nana ni murujan le ye. Ne nana ka dencɛ n’a facɛ bila ɲɔgɔn na, ka denmuso n’a bamuso bila ɲɔgɔn na, ka furumuso n’a biranmuso bila ɲɔgɔn na. I ka mɔgɔw bena kɛ i juguw ye.”—Mat. 10:34-36.

⁴ Yezu ko: “Aw kana miiri ko ne nana ni hɛrɛ ye.” O kɔrɔ ko di? A tun b’a fɛ mɔgɔw k’a lɔn ko n’u kɛra ale ka kalandenw ye, u bena gwɛlɛyaw sɔrɔ. A ka kalanw tun be se ka mɔgɔw bila ɲɔgɔn na. Tiɲɛn lo ko hɛɛrɛ min be mɔgɔw cɛ, Yezu ka laɲinita tun tɛ k’o nagasi. Nka, a tun b’a fɛ ka kibaro diiman lo fɔ Ala koo la (Zan 18:37). O n’a ta bɛɛ, a tun tɛna kɛ koo nɔgɔman ye ka tugu Yezu kɔ, sanko n’an teri sɔbɛw wala an somɔgɔw banna tiɲɛn batoli ma.

5. Yezu ka kalandenw ye gwɛlɛya jumanw lo sɔrɔ?

⁵ Yezu y’a fɔ a ka kalandenw ye ko n’u somɔgɔw b’u kɛlɛ, u ka ɲi ka sɔn k’o muɲu (Mat. 10:38). Tuma min na Yezu ka kalandenw somɔgɔw y’u lɔgɔbɔ wala ka ban u la, u y’o koo muɲu walisa k’u koo diya Yezu ye. Nka u ye min sɔrɔ o la, o nafa ka bon ka tɛmɛ u bɔnɛna min na.—Mariki 10:29, 30 kalan.

6. An ka ɲi ka mun lo to an hakili la n’an somɔgɔw b’an kɛlɛ an ka lanaya kosɔn?

⁶ Hali n’an somɔgɔw b’an bali ka Jehova bato, an bele b’u kanu. Nka, an k’a to an hakili la ko an ka ɲi ka Jehova ni Yezu lo kanu ka tɛmɛ olu kan (Mat. 10:37). An k’a lɔn fana ko komi an b’an somɔgɔw kanu, Sutana bena a ɲini ka tɛmɛ o fɛ k’an ka kantigiya nagasi. An ka gwɛlɛya dɔw lajɛ ani an k’a filɛ an be se k’u muɲu cogo min na.

7. N’i furuɲɔgɔn tɛ Jehova bato, i ka ɲi k’o koo jati cogo di?

⁷ Bibulu b’an lasɔmi ko mɔgɔ minw bena furu, olu “bena tɔɔrɔba sɔrɔ.” (1 Kor. 7:28). N’i furuɲɔgɔn tɛ Jehova Seere ye, o be se ka dɔ fara i ka hami kan furu kɔnɔ. Nka, a kɔrɔtanin lo i ka koow jati i ko Jehova b’u jati cogo min na. Jehova b’a fɔ ko an tɛ se ka faran wala ka an ka furu sa n’an furuɲɔgɔn ye sabu a t’ale bato (1 Kor. 7:12-16). Hali n’i cɛɛ tɛ Jehova bato ani a t’i ɲɛminɛ Alakow la, i ka kan k’a bonya sabu ale lo ye denbaya kuntigi ye. N’i ye balimacɛ ye ani i muso tɛ Jehova bato, i ka ɲi k’a kanu ani k’i janto a la kosɔbɛ.—Efɛz. 5:22, 23, 28, 29.

8. N’i furuɲɔgɔn b’a ɲini k’i bali ka Jehova bato bɛrɛbɛrɛ, i ka ɲi k’i yɛrɛ ɲininga mun lo la?

⁸ Nka, n’i furuɲɔgɔn b’a ɲini k’i bali ka Jehova bato bɛrɛbɛrɛ do? Ɲɛyirali fɛ, balimamuso dɔ cɛɛ y’a fɔ a ye ko a t’a fɛ a ka waajuli kɛ loon dɔw la lɔgɔkun kɔnɔ. N’o ɲɔgɔn y’i sɔrɔ i yɛrɛ ɲininga ko: “Yala n’ furuɲɔgɔn ko n’ ka Jehova batoli dabila le wa? N’o tɛ, yala n’ be se ka sɔn a ta ma wa?” N’i be koow kɛ ka dama kɛɲɛ, o be se k’i tanga gwɛlɛya caaman ma i ka furu kɔnɔ.—Filip. 4:5.

9. Kerecɛn be se k’a deenw dɛmɛ cogo di u k’a furuɲɔgɔn dannabali bonya?

⁹ N’i furuɲɔgɔn tɛ Jehova bato, deenw kololi be se ka gwɛlɛya. Ɲɛyirali fɛ, i ka ɲi k’i deenw dɛmɛ ka Bibulu ka  cikan nin sira tagama: “I k’i faa n’i baa bonya.” (Efɛz. 6:1-3). Nka, n’i furuɲɔgɔn tɛ Bibulu ka sariyaw sira tagama do? O bɛɛ n’a ta, i k’a bonya. O la, i bena kɛ ɲɛyirali ɲuman ye i deenw fɛ. I ka sinsin i furuɲɔgɔn ka jogo ɲumanw kan. A be koo ɲuman minw bɛɛ kɛ, a waleɲuman lɔn u kosɔn. Kana a tɔgɔ jugu fɔ i deenw ɲɛɛ na. A ɲɛfɔ u ye ko an kelen kelen bɛɛ lo ka ɲi k’a latigɛ n’an bena Jehova bato wala n’an tɛna a bato. I deenw ka kɛwale ɲumanw be se k’a to i furuɲɔgɔn b’a ɲini ka Jehova lɔn.

10. Ni furuɲɔgɔn kelen lo be Jehova bato, a be se k’a deenw kalan cogo di tiɲɛn koo la?

¹⁰ Tuma dɔw la, furuɲɔgɔn dannabali be se k’a ɲini ko a deenw k’u niin don fɛti dɔw la minw jujɔn bɔra kafiriyakow la. A be se k’a ɲini fana ko u k’a deenw kalan ngalon lannakow la. Cɛɛ dɔ be se k’a muso bali ka bibulukalan kɛ n’u deenw ye. O n’a ta bɛɛ, muso ka ɲi k’a seko kɛ k’a deenw kalan tiɲɛn koo la (Kɛw. 16:1; 2 Tim. 3:14, 15). Ɲɛyirali fɛ, balimamuso dɔ ka cɛɛ be se ka ban ko a kana bibulukalan kɛ n’u deen fitininw ye wala ka taga n’u ye lajɛnw na. Balimamuso be se ka sɔn a cɛɛ ta ma. Nka n’a ye sababu sɔrɔ, a bele be se k’a ka limaniya kofɔ a deenw ye. O cogo la, u bena Jehova lɔn ani k’a ka sariyaw fana lɔn ɲuman ni juguman koo la (Kɛw. 4:19, 20). A laban, a deenw lo ka ɲi k’a latigɛ n’u bena Jehova bato wala n’u tɛna a bato.—Deter. 30:19, 20. *

11. Mun lo be se ka kɛ gwɛlɛya sababu ye i n’i somɔgɔ dannabaliw cɛ?

¹¹ A daminɛ na, n’a sɔrɔ i m’a fɔ i somɔgɔw ye ko i be bibulukalan kɛra ni Jehova Seerew ye. Nka, komi i ka limaniya tun be barika sɔrɔla, i y’a ye ko a ka ɲi i k’a fɔ u ye ko i b’a fɛ ka Jehova bato (Mariki 8:38). N’a sɔrɔ i ye gwɛlɛya sɔrɔ n’i somɔgɔw ye sabu i be kantigiya kɛra Jehova ye. An k’a filɛ i be se ka min kɛ walisa hɛɛrɛ ka to i n’i somɔgɔw cɛ ani i bele ka to ka kantigiya kɛ Jehova ye.

12. Mun na an somɔgɔw be se k’an kɛlɛ? Nka, an be se k’a yira cogo di ko an b’an janto u dusukunnakow la?

¹² A ɲini k’i somɔgɔ dannabaliw ka dusukunnakow faamu. An dusu ka di kosɔbɛ sabu an ye tiɲɛn lɔn Ala koo la. Nka, an somɔgɔw be se k’a miiri ko mɔgɔw y’an lafili wala ko an donna ngalon diinan dɔ lo la. U be se k’a miiri fana ko an t’u kanu tugun sabu an tɛ fɛtiw kɛ n’u ye. N’a sɔrɔ u be siranna ko Ala bena an ɲangi n’an sara. An ka ɲi k’a ɲini k’u ka dusukunnakow faamu ani k’u lamɛn koɲuman walisa k’u haminankow lɔn (Talenw 20:5). Ciden Pol y’a jija ka mɔgɔ sifaw bɛɛ faamu walisa ka kibaro diiman fɔ u ye. N’an fana b’o ɲɔgɔn kɛ, an bena a lɔn an be se ka kibaro diiman fɔ an somɔgɔw ye cogo min na.—1 Kor. 9:19-23.

13. An ka ɲi ka kuma an somɔgɔ dannabaliw fɛ cogo di?

¹³ Kuma ni dususuman ye. Bibulu b’a fɔ ko: “Aw k’aw ka kuma fɔcogo ɲa tuma bɛɛ.” (Kɔlɔs. 4:6). An be se ka hakili senu deli Jehova fɛ walisa an ka kuma an somɔgɔw fɛ ni dususuman ani ɲumanya ye. An man ɲi k’a ɲini ka sɔsɔli kɛ u ka ngalon kalan kelen kelen bɛɛ koo la. N’u ka kɛwalew wala u ka kuma y’an kɔnɔ gwan, an be se ka cidenw ladegi. Ciden Pol y’a fɔ ko: “Mɔgɔw bɛ an neni, an bɛ duba ta u ye. U bɛ tugu an nɔfɛ ka an tɔɔrɔ, an bɛ o muɲu. U bɛ an tɔgɔ tiɲɛ, an bɛ kuma ɲuman fɔ u ye.”—1 Kor. 4:12, 13, ABM.

14. Nafa juman lo b’a la ka kɛ ni tagamacogo ɲuman ye tuma bɛɛ?

¹⁴ An ka kɛ ni tagamacogo ɲuman ye. N’an be kuma ni dususuman ye, o be se k’a to hɛɛrɛ be kɛ an n’an somɔgɔw cɛ. Nka, an tagamacogo ɲuman yɛrɛ lo be se k’o hɛɛrɛ sabati kosɔbɛ (1 Piyɛri 3:1, 2, 16 kalan). I ka ɲɛyirali ɲuman fɛ, a to i somɔgɔw k’a ye ko hɛɛrɛ be Jehova seerew ka furu kɔnɔ ani k’u b’u deenw ladon ka ɲɛ. A to u k’a ye fana ko an saniyanin lo, an be ni tagama cogo ɲuman ye ani ko an wasanin lo an ka ɲɛnamaya la. Hali n’an somɔgɔw si ma sɔn tiɲɛn batoli ma, an be se ka ninsɔndiya sabu an koo ka di Jehova ye an ka kantigiya kosɔn.

15. Koo minw be se ka na ni bɛnbaliya ye, an be se ka kɔn k’an yɛrɛ labɛn u kama cogo di?

¹⁵ Kɔn k’i yɛrɛ labɛn. Miiri k’a filɛ koo minw be se ka na ni bɛnbaliya ye ele n’i somɔgɔw cɛ ani a filɛ i be se k’u ɲɛnabɔ cogo min na (Talenw 12:16, 23). Balimamuso dɔ be bɔ Ɔsitarali jamana na. A ko: “Tiɲɛn batoli man di n’ cɛɛ facɛ ye hali dɔɔni. An be to k’a weele walisa k’a lɔn a be cogo min na. O la, an be kɔn ka Jehova deli a k’an dɛmɛ an k’a jaabi ni dususuman ye. An be barokun dɔw labɛn an bena kuma minw koo la walisa an ka se ka baro kɛ teriya la. An b’a latigɛ an ka weeleli bena dan wagati min na  walisa an ka baro kana mɛɛn ani ka laban ni sɔsɔli ye diinankow kan.”

16. N’an b’an yɛrɛ jalakira sabu bɛnbaliyakow b’an n’an somɔgɔw cɛ, an be se ka see sɔrɔ o kan cogo di?

¹⁶ Tiɲɛn lo ko i tɛ se k’i yɛrɛ tanga bɛnbaliyakow bɛɛ ma n’i somɔgɔw ye. O bɛnbaliyako be se k’a to i b’i yɛrɛ jalaki sabu i b’u kanu kosɔbɛ ani i b’a fɛ k’i koo diya u ye. Nka, a to i hakili la ko i ka ɲi ka Jehova lo kanu ka tɛmɛ i somɔgɔw kan. N’i y’o kɛ, i somɔgɔw bena a faamu ko a kɔrɔtanin lo i fɛ kosɔbɛ ka Jehova bato. I k’a lɔn ko i tɛ se ka mɔgɔ waajibiya ka sɔn tiɲɛn batoli ma. Nka, a to i somɔgɔw k’a ye ko nafa b’a la ka tugu Jehova ka sariyaw kɔ. An Faa kanutigi be sababu di olu fana ma u k’a latigɛ n’u bena a bato wala n’u tɛna a bato.—Ezayi 48:17, 18.

17, 18. N’i somɔgɔ dɔ ye Jehova batoli dabila, mun lo be se k’i dɛmɛ k’o muɲu?

¹⁷ N’an somɔgɔ dɔ gwɛnna ka bɔ kafo kɔnɔ wala n’a ko ale tɛ Jehova Seere ye tugun, o be digi mɔgɔ la kosɔbɛ i n’a fɔ u ye muru lo don i la. I be se k’o dimi muɲu cogo di?

¹⁸ Jehova ka baara kɛ i ɲɛnako fɔlɔ ye. Bibulu kalan loon o loon, i yɛrɛ labɛn lajɛnw kama ani taga u la, waajuli kɛ ani Jehova deli a ka fanga d’i ma ka se ka muɲuli kɛ. N’i b’o kɛ, o bena i dɛmɛ k’i ka limaniya sabati (Zude 20, 21). N’i b’o koow bɛɛ kɛ ani i bele tɔɔrɔnin lo do? Kana i fari faga! To ka Jehova ka baara kɛ i ɲɛnako fɔlɔ ye. Kɔfɛ, o bena i dɛmɛ ka see sɔrɔ i ka miiriyaw n’i dusukunnakow kan. An ka Zaburu 73nan sɛbɛbaga ka koo lajɛ. Ale tun be ni miiriya tilenbaliw ye ani o kosɔn, a hakili tun ɲagaminin lo kosɔbɛ! Nka, a ye see sɔrɔ o kan tuma min na a tagara Alabatoso kɔnɔ (Zab. 73:16, 17). N’i be to ka Jehova bato ni kantigiya ye, o be se ka ele fana dɛmɛ.

19. Ni Jehova ye mɔgɔ dɔ kolo, i be se k’a yira cogo di ko i sɔnna o ma?

¹⁹ Sɔn Jehova ka kololi ma. Ni mɔgɔ dɔ gwɛnna ka bɔ kafo kɔnɔ, o b’an tɔɔrɔ a daminɛ na. Nka Ala b’a lɔn ko a laban, a ka kololi bena bɛɛ nafa, hali mɔgɔ min gwɛnna ka bɔ kafo kɔnɔ (Eburuw 12:11 kalan). Jehova y’a fɔ ko jurumukɛla min tɛ nimisa, an “kana jɛn n’o tigi ye fewu.” (1 Kor. 5:11-13). Hali n’an tɔɔrɔnin lo, an man ɲi k’a ɲini ka kumaɲɔgɔnya kɛ n’o tigi ye gwansan telefɔni, sms, lɛtɛrɛ,ani e-mail wala fɛɛrɛ wɛrɛ fɛ ɛntɛrɛnɛti kan.

20. An jigi be mun lo la?

²⁰ Kana i jigi tigɛ. Bibulu b’a fɔ ko kanuya “be la koo bɛɛ la.” Hali minw gwɛnna ka bɔ kafo kɔnɔ, kanuya b’a to an lanin b’a la k’u bena kɔsegi ka na Jehova ma (1 Kor. 13:7). N’i y’a ye ko i somɔgɔ dɔ ka kɛcogow be fisayara, i be se ka Jehova deli a ka barika don a la Bibulu sababu fɛ. O la, a bena sɔn Jehova ka welekan nin ma: “Aw ka segi ne ma.”—Ezayi 44:22.

21. I ka ɲi ka mun lo kɛ n’i somɔgɔw b’i kɛlɛ sabu i ye Yezu ka kalanden dɔ ye?

²¹ Yezu y’a fɔ ko an ka ɲi k’ale kanu ka tɛmɛ adamadenw bɛɛ kan. Yezu tun lanin b’a la ko a ka kalandenw bena u jaa gwɛlɛya ka kantigiya kɛ ale ye tuma bɛɛ, hali n’u somɔgɔw b’u kɛlɛ. O kama, n’i somɔgɔw b’i kɛlɛ sabu i ye Yezu ka kalanden dɔ ye, i jigi la Jehova kan. A deli a k’i dɛmɛ ka see sɔrɔ o kɔrɔbɔli kan (Ezayi 41:10, 13). I ka ɲi ka ninsɔndiya sabu i koo ka di Jehova ni Yezu ye ani u bena i duga i ka kantigiya kosɔn.