1, 2. (a) Mɛɛ toiŋjɔlɛ wɔbaanyɛ wɔná amrɔ nɛɛ? (b) Mɛni hewɔ wɔnyɛɛɛ wɔná toiŋjɔlɛ ni sɛɛ efooo amrɔ nɛɛ? (Kwɛmɔ mfoniri ni yɔɔ nikasemɔ lɛ shishijee lɛ.)

WƆ FƐƐ wɔmiisumɔ toiŋjɔlɛ; wɔteŋ mɔ ko mɔ ko sumɔɔɔ haomɔ. No hewɔ lɛ, eŋɔɔ wɔnaa waa akɛ Yehowa duroɔ wɔ “Nyɔŋmɔ toiŋjɔlɛ” lɛ. Toiŋjɔlɛ nɛɛ hãa wɔtsuii ŋmɛɔ dɛmm, ni ebuɔ wɔjwɛŋmɔi ahe koni wɔkahao fe nine. (Fil. 4:6, 7) Agbɛnɛ hu, akɛni wɔjɔɔ wɔhe nɔ wɔhã Yehowa hewɔ lɛ, wɔbatsɔmɔ Nyɔŋmɔ nanemɛi, ni ‘toiŋjɔlɛ yɛ wɔ kɛ Nyɔŋmɔ’ teŋ.​—Rom. 5:1.

² Eshwɛ fioo ni Nyɔŋmɔ baahã wɔná toiŋjɔlɛ ni sɛɛ efooo. Shi amrɔ nɛɛ wɔyɛ naagbee gbii lɛ amli, ni wɔkɛ naagbai pii ni baanyɛ afite wɔtoiŋjɔlɛ lɛ kpeɔ. Ŋmɛnɛ lɛ, mɛi pii feɔ nibii ni hãaa wɔná toiŋjɔlɛ. (2 Tim. 3:1-4) Kɛfata he lɛ, esa akɛ wɔwu wɔshi Satan kɛ amale tsɔɔmɔi ni egbɛɔ eshwãa lɛ. (2 Kor. 10:4, 5) Shi ekolɛ, nɔ ni fe fɛɛ ni baanyɛ afite wɔtoiŋjɔlɛ ji, kɛ́ wɔwekumɛi ni sɔmɔɔɔ Yehowa lɛ te shi amɛwo wɔ. Amɛteŋ mɛi komɛi yeɔ wɔhe fɛo yɛ nibii ni wɔheɔ wɔyeɔ lɛ ahewɔ, amɛfolɔɔ wɔnaa akɛ wɔmiifite ekomefeemɔ ni yɔɔ weku lɛ mli lɛ, ni bei komɛi po lɛ, amɛwoɔ wɔhe gbeyei akɛ, kɛji wɔkpaaa Yehowa sɔɔmɔ lɛ, amɛkɛ  wɔ baafo tako mli. Kɛ́ wɔwekumɛi te shi amɛwo wɔ lɛ, ani esa akɛ efee wɔ naakpɛɛ? Mɛni baaye abua wɔ ni wɔnyɛ wɔdamɔ naa?

3, 4. (a) Mɛɛ gbɛ nɔ Yesu tsɔɔmɔi lɛ saa mɛi ashihilɛ he? (b) Bei pii lɛ, mɛɛ shihilɛ hãa ewaa waa kɛhãa mɛi akɛ amɛbaanyiɛ Yesu sɛɛ?

³ Yesu le akɛ jeee mɔ fɛɛ mɔ baakpɛlɛ nibii ni etsɔɔ lɛ anɔ. Ele hu akɛ ehe baahia ni esɛɛnyiɛlɔi lɛ afee ekãa, ejaakɛ mɛi baate shi awo amɛ. Kɛ́ shiteekɛwolɔi nɛɛ yafee amɛwekumɛi lɛ, ebaanyɛ efite toiŋjɔlɛ ni yɔɔ amɛwekui lɛ amli po. Yesu wie akɛ: “Nyɛkasusua akɛ miba ni mabahã toiŋjɔlɛ aba shikpɔŋ lɛ nɔ; jeee toiŋjɔlɛ hãmɔ miba, shi klante moŋ. Ejaakɛ miba koni mikɛ mligbalamɔ aba, nuu kɛ etsɛ teŋ, kɛ biyoo kɛ enyɛ teŋ, kɛ ŋa kɛ eshaayoo teŋ. Anɔkwa, mɔ diɛŋtsɛ shĩabii baatsɔmɔ ehenyɛlɔi.”​—Mat. 10:34-36.

⁴ Mɛni hewɔ Yesu wie akɛ, “Nyɛkasusua akɛ miba ni mabahã toiŋjɔlɛ aba” lɛ? Ewie nakai ejaakɛ eetao ni etoibolɔi lɛ ale akɛ, kɛ́ amɛbatsɔmɔ esɛɛnyiɛlɔi lɛ, amɛkɛ naagbai baakpe. Shi no etsɔɔɔ akɛ Yesu ba ni ebafite mɛi ateŋ. Eba ni ebatsɔɔ mɛi Nyɔŋmɔ he nii koni amɛle anɔkwale lɛ. (Yoh. 18:37) Fɛɛ sɛɛ lɛ, ele akɛ mɛi ni baamɔ anɔkwale lɛ mli lɛ náŋ shihilɛ mlɛo, titri lɛ, kɛ́ amɛwekumɛi loo amɛnanemɛi ni bɛŋkɛ amɛ kpaakpa lɛ kpoo anɔkwale lɛ.

5. Mɛɛ naagbai Yesu sɛɛnyiɛlɔi komɛi kɛkpe?

⁵ Yesu wie akɛ, naagbai ni mɛi ni nyiɛɔ esɛɛ lɛ kɛbaakpe lɛ eko ji akɛ, amɛwekumɛi baate shi awo amɛ. (Mat. 10:38) Mɛi ni etswa amɛfai shi akɛ amɛbaakase Kristo lɛ ateŋ mɛi komɛi awekumɛi eye amɛhe fɛo, loo amɛkpoo amɛ po. Shi jɔɔmɔi ni amɛná lɛ fa kwraa fe nibii ni eŋmɛɛ amɛ lɛ.​—Kanemɔ Marko 10:29, 30.

6. Kɛ́ wɔwekumɛi te shi amɛwo wɔ lɛ, mɛni esa akɛ wɔkai?

⁶ Kɛ́ wɔwekumɛi te shi amɛwo wɔ po lɛ, esa akɛ wɔya nɔ wɔsumɔ amɛ. Shi esa akɛ wɔkai akɛ, ehe miihia ni wɔsumɔ Yehowa kɛ Kristo fe wɔwekumɛi lɛ. (Mat. 10:37) Kɛfata he lɛ, esa akɛ wɔhã ehi wɔjwɛŋmɔ mli akɛ, Satan baabɔ mɔdɛŋ ni ekɛ suɔmɔ ni wɔyɔɔ kɛhã wɔwekumɛi lɛ aka wɔ koni wɔkaye Yehowa anɔkwa. Nyɛhãa wɔkwɛa shihilɛi komɛi ni baanyɛ ahã wɔwekumɛi ate shi awo wɔ kɛ bɔ ni wɔbaafee wɔdamɔ naa.

7. Te esa akɛ mɛi ni amɛhefatalɔi bɛ anɔkwale lɛ mli lɛ ana amɛshihilɛ lɛ amɛhã tɛŋŋ?

⁷ Biblia lɛ bɔɔ mɛi fɛɛ ni boteɔ gbalashihilɛ mli lɛ kɔkɔ akɛ, “amɛbaana amanehulu yɛ amɛheloo mli.” (1 Kor. 7:28) Kɛ́ owu loo oŋa sɔmɔɔɔ Yehowa lɛ, ekolɛ naagbai kɛ haomɔi ni nyɛbaaná lɛ baafa. Kɛ̃lɛ, ehe miihia ni ona oshihilɛ lɛ tamɔ bɔ ni Yehowa naa lɛ lɛ. Onyɛŋ otse ohefatalɔ lɛ gbãla loo oyahi he ko ni lɛ hu ehi he kroko yɛ anɔkwale lɛ mli ni ebɛ lɛ hewɔ. (1 Kor. 7:12-16) Eyɛ mli akɛ kɛ́ nuu lɛ sɔmɔɔɔ Yehowa lɛ, enyɛŋ enyiɛ weku lɛ hiɛ yɛ saji ni kɔɔ Yehowa jamɔ he lɛ amli moŋ, shi akɛni ekã he eji weku lɛ yitso hewɔ lɛ, esa akɛ yoo lɛ aya nɔ abu lɛ. Nakai nɔŋŋ kɛ́ yoo lɛ bɛ anɔkwale lɛ mli shi nuu lɛ yɛ mli lɛ, esa akɛ nuu lɛ aya nɔ asumɔ lɛ ni ehiɛ lɛ dɔdɔɔdɔ.​—Efe. 5:22, 23, 28, 29.

8. Kɛ́ ohefatalɔ lɛ hãaa onyɛ osɔmɔ Yehowa bɔ ni otsui sumɔɔ lɛ, mɛɛ saji obaanyɛ obi ohe?

⁸ Ni kɛ́ owu lɛ loo oŋa lɛ hãaa onyɛ osɔmɔ Yehowa bɔ ni otsui sumɔɔ hu? Akɛ nɔkwɛmɔnɔ lɛ, nyɛmi yoo ko wu kɛɛ lɛ akɛ ekaya shiɛmɔ yɛ gbii pɔtɛi komɛi anɔ yɛ otsi lɛ mli. Kɛ́ okɛ shihilɛ nɛɛ loo ekroko ni tamɔ nakai kpe lɛ, obaanyɛ obi ohe akɛ: ‘Ani mihefatalɔ lɛ miitsɔɔ akɛ mikpa Yehowa jamɔ kwraa? Kɛjeee nakai lɛ, ani  minyɛŋ mabo lɛ toi?’ Kɛ́ onu ohefatalɔ lɛ shishi lɛ, onáŋ naagbai pii yɛ ogbãla lɛ mli.​—Fil. 4:5.

9. Mɛɛ gbɛ nɔ Kristofoi baanyɛ atsɔse amɛbii lɛ koni amɛkɛ woo ahã amɛfɔlɔi ni bɛ anɔkwale lɛ mli lɛ?

⁹ Kɛ́ ohefatalɔ lɛ sɔmɔɔɔ Yehowa lɛ, ebaanyɛ ewa kɛhã bo akɛ obaatsɔse obii lɛ. Akɛ nɔkwɛmɔnɔ lɛ, esa akɛ otsɔɔ obii lɛ nii koni amɛbo Biblia mli famɔ nɛɛ toi, akɛ: “Wo otsɛ kɛ onyɛ.” (Efe. 6:1-3) Kɛ́ owu lɛ loo oŋa lɛ ehiii shi yɛ mlai kɛ shishitoo mlai ni yɔɔ Biblia lɛ mli lɛ anaa hu? Feemɔ nɔkwɛmɔnɔ kpakpa. Okɛ woo ahã ohefatalɔ lɛ. Okɛ ojwɛŋmɔ ama esui kpakpai lɛ anɔ, ni ohiɛ asɔ nibii kpakpai fɛɛ ni efeɔ lɛ. Kaawie nibii gbohii yɛ ohefatalɔ lɛ he yɛ obii lɛ ahiɛ. Moŋ lɛ, hã obii lɛ ale akɛ esa akɛ mɔ fɛɛ mɔ akpɛ eyiŋ kɛji ebaasɔmɔ Yehowa aloo esɔmɔŋ lɛ. Obii lɛ asubaŋ kpakpa lɛ baanyɛ ahã ohefatalɔ lɛ aná he miishɛɛ akɛ ebaasɔmɔ Yehowa.

10. Mɛɛ gbɛ nɔ fɔlɔi ni ji Kristofoi lɛ baanyɛ atsɔɔ amɛbii lɛ anɔkwale lɛ kɛ́ amɛhefatalɔi lɛ jáaa Yehowa?

¹⁰ Bei komɛi lɛ, nyɛmimɛi komɛi ahefatalɔi ni sɔmɔɔɔ Yehowa lɛ sumɔɔ ni amɛbii lɛ kɛ amɛhe awo gbii juji ni jɛ amagajamɔ mli lɛ amli loo amɛtsɔɔ amɛ amale tsɔɔmɔi. Kristofoi ŋamɛi komɛi awumɛi eŋmɛɛɛ amɛ gbɛ ni amɛkɛ amɛbii lɛ akase Biblia lɛ. Shi yɛ shihilɛi ni tamɔ nakai lɛ amli po diɛŋtsɛ lɛ, ŋa lɛ baanyɛ atsɔɔ ebii lɛ anɔkwale lɛ. (Bɔf. 16:1; 2 Tim. 3:14, 15) Akɛ nɔkwɛmɔnɔ lɛ, ekolɛ ewu lɛ eŋmɛŋ lɛ gbɛ ni ekɛ ebii lɛ ata shi ni ekɛ amɛ akase nii loo ekɛ amɛ aya asafoŋ kpeei. Shi loloolo lɛ, yoo lɛ baanyɛ ekɛ ebii lɛ agba anɔkwale lɛ he sane be fɛɛ be ni hegbɛ lɛ baaba. Kɛ́ efee nakai lɛ, eetsɔɔ ebii lɛ Yehowa  kɛ eshishitoo mlai lɛ ahe nii, ni yɛ nakai beiaŋ nɔŋŋ lɛ, eetsɔɔ akɛ ebuɔ ewu lɛ. (Bɔf. 4:19, 20) Naagbee lɛ, bii lɛ diɛŋtsɛ baakpɛ amɛyiŋ kɛji amɛbaasɔmɔ Yehowa aloo amɛsɔmɔŋ lɛ.​—5 Mose 30:19, 20. *

11. Mɛni baanyɛ ahã naagbai aba wɔ kɛ wɔwekumɛi ni jeee Odasefoi lɛ ateŋ?

¹¹ Ekolɛ, be ni Yehowa Odasefoi kɛ wɔ bɔi Biblia lɛ kasemɔ lɛ, wɔkɛɛɛ wɔwekumɛi. Shi be ni wɔhemɔkɛyeli lɛ mli bawa lɛ, wɔyɔse akɛ esa akɛ wɔhã amɛle akɛ wɔkpɛ wɔyiŋ akɛ wɔbaasɔmɔ Yehowa. (Mar. 8:38) Eeenyɛ efee akɛ, be ni ohã owekumɛi lɛ le enɛ lɛ, ekɛ naagbai ba okɛ amɛ teŋ. Mɛni baaye abua bo ni oya nɔ oye Yehowa anɔkwa, ni yɛ nakai beiaŋ nɔŋŋ lɛ, toiŋjɔlɛ ahi okɛ owekumɛi lɛ ateŋ? Hã wɔsusu ekomɛi ahe wɔkwɛ.

12. Mɛni baanyɛ ahã wɔwekumɛi ni sɔmɔɔɔ Yehowa lɛ ate shi awo wɔ? Mɛni baaye abua wɔ ni wɔnu amɛ shishi?

¹² Bɔɔ mɔdɛŋ ni onu owekumɛi ni sɔmɔɔɔ Yehowa lɛ ashishi. Ŋwanejee ko bɛ he akɛ, wɔmii eshɛ wɔhe waa yɛ anɔkwalei ni wɔkase yɛ Biblia lɛ mli lɛ ahewɔ. Shi ekolɛ wɔwekumɛi lɛ nuɔ he akɛ alaka wɔ aloo wɔkɛ wɔhe eyadɔmɔ jamɔ ko ni he yɔɔ ahuntoo. Eeenyɛ efee akɛ, akɛni wɔkɛ amɛ efeee ekome kɛyeee amɛgbii juji lɛ dɔŋŋ hewɔ lɛ, amɛsusuɔ akɛ wɔsumɔɔɔ amɛ. Eeenyɛ efee po akɛ, amɛnuɔ he akɛ kɛ́ wɔgboi lɛ, Nyɔŋmɔ baagbala wɔtoi. No hewɔ lɛ, esa akɛ wɔbɔ mɔdɛŋ ni wɔnu amɛ shishi. Kɛ́ amɛwie lɛ, nyɛhãa wɔboa amɛ toi jogbaŋŋ koni wɔna nɔ tuuntu ni hãa amɛyeɔ amɛtsui yɛ wɔhewɔ lɛ. (Abɛi 20:5) Nakai bɔfo Paulo fee. Ebɔ mɔdɛŋ waa akɛ ebaanu “mɛi srɔtoi fɛɛ” shishi bɔ ni afee ni enyɛ eshiɛ sane kpakpa lɛ etsɔɔ amɛ. Kɛ́ wɔ hu wɔfee nɔ ko ni tamɔ nakai lɛ, ebaaye ebua wɔ waa.​—1 Kor. 9:19-23.

13. Te esa akɛ wɔkɛ wɔwekumɛi ni bɛ anɔkwale lɛ mli lɛ awie ahã tɛŋŋ?

¹³ Wiemɔ kɛ mlijɔlɛ. Biblia lɛ kɛɔ akɛ: “Nyɛhãa nyɛwiemɔ he abaa nyam daa.” (Kol. 4:6) Wɔbaanyɛ wɔsɔle wɔbi Yehowa ni eduro wɔ mumɔ krɔŋkrɔŋ lɛ, bɔ ni afee ni wɔnyɛ wɔwo eyibii lɛ be ni wɔkɛ wɔwekumɛi lɛ wieɔ lɛ. Wɔkɛ amɛ akataa naa yɛ amɛhemɔkɛyelii ni ejaaa lɛ fɛɛ ahe. Kɛ́ amɛwie amɛshi wɔ, loo amɛfee wɔ nɔ ko ni yɔɔ dɔlɛ lɛ, nyɛhãa wɔkasea bɔfoi lɛ. Paulo wie akɛ: “Kɛ́ aajɛ wɔ lɛ, wɔjɔɔ; kɛ́ aawa wɔ yi lɛ, wɔfiɔ shi kɛ tsuishitoo; kɛ́ aagbe wɔhe guɔ lɛ, wɔhãa hetoo kɛ mlijɔlɛ.”​—1 Kor. 4:12, 13.

14. Kɛ́ wɔba wɔjeŋ jogbaŋŋ be fɛɛ be lɛ, mɛɛ gbɛ nɔ wɔbaaná he sɛɛ?

¹⁴ Ba ojeŋ jogbaŋŋ be fɛɛ be. Ehi akɛ wɔkɛ wɔwekumɛi lɛ baawie kɛ mlijɔlɛ, ejaakɛ no baahã toiŋjɔlɛ ahi wɔ kɛ amɛ teŋ. Shi kɛ́ wɔba wɔjeŋ jogbaŋŋ lɛ, ebaaná amɛnɔ hewalɛ waa fe wɔwiemɔi lɛ po. (Kanemɔ 1 Petro 3:1, 2, 16.) Yehowa Odasefoi yɛ miishɛɛ yɛ amɛgbalashihilɛ mli, amɛkwɛɔ amɛbii jogbaŋŋ, amɛhe tse, amɛfeee nibii gbohii, ni amɛtsui nyɔɔ amɛmli waa yɛ nɔ ni amɛkɛ amɛwala tsuɔ lɛ hewɔ. Kɛ́ wɔba wɔjeŋ jogbaŋŋ lɛ, wɔwekumɛi lɛ baana enɛ faŋŋ. Kɛ́ wɔwekumɛi lɛ ebamɔɔɔ anɔkwale lɛ mli po diɛŋtsɛ lɛ, wɔbaaná miishɛɛ akɛ nɔ ni wɔfeɔ lɛ sa Yehowa hiɛ.

15. Bɔ ni afee ni wɔkɛ wɔwekumɛi lɛ akataa saji anaa lɛ, mɛni wɔbaanyɛ wɔtsɔ hiɛ wɔfee?

¹⁵ Tsɔ hiɛ okpɛ oyiŋ yɛ nɔ ni obaafee he. Tsɔ hiɛ osusu saji komɛi ni baanyɛ ekɛ naataamɔi aba lɛ ahe, ni okwɛ nɔ ni obaanyɛ ofee yɛ he. (Abɛi 12:16, 23) Nyɛmi yoo ko ni jɛ Australia lɛ wie akɛ: “Mishaanuu sumɔɔɔ anɔkwale lɛ kwraa. No hewɔ lɛ, dani mi kɛ miwu lɛ baatswa lɛ ni wɔbi eshi  lɛ, wɔsɔleɔ ni Yehowa aye abua wɔ koni kɛ́ ewie nɔ ko ni yɔɔ mlila lɛ, wɔmli akafu. Wɔtaoɔ saji ni yɔɔ miishɛɛ ni wɔbaanyɛ wɔkɛ lɛ agba. Bɔ ni afee ni wɔkawie pii ni sanegbaa lɛ yatsɔ béi lutulutu lɛ, wɔtsɔɔ hiɛ wɔkpɛɔ wɔyiŋ yɛ be abɔ ni wɔbaaye lɛ he.”

16. Kɛ́ owekumɛi lɛ kɛ bo taa naa yɛ nɔ ko he, ni no hã onu he akɛ ofeee ni ahi lɛ, mɛni esa akɛ okai?

¹⁶ Bɔ fɛɛ bɔ ni fee lɛ, owekumɛi ni heee yeee lɛ kɛ bo baataa naa yɛ nɔ ko he kɛ̃. Kɛ́ eba lɛ nakai lɛ, ekolɛ obaanu he akɛ ofeee ni ahi, ejaakɛ osumɔɔ owekumɛi lɛ asane waa ni osumɔɔɔ ni ofeɔ nɔ ko ni baagba amɛnaa. Shi kaimɔ akɛ, ehe miihia ni oye Yehowa anɔkwa, ni no he miihia kwraa fe suɔmɔ ni obaasumɔ owekumɛi lɛ. Kɛ́ owekumɛi lɛ yɔse enɛ lɛ, no baanyɛ aye abua amɛ ni amɛna akɛ Yehowa sɔɔmɔ ji wala kɛ gbele sane. Fɛɛ mli lɛ, hã ehi ojwɛŋmɔ mli akɛ, onyɛŋ okɛ anɔkwale lɛ afi owekumɛi lɛ anɔ. Nɔ moŋ ni obaanyɛ ofee ji, ni obaahã amɛna akɛ, Yehowa gbɛtsɔɔmɔi lɛ asɛɛ ni onyiɛ lɛ eye ebua bo waa, ni nakai nɔŋŋ ebaaye ebua amɛ hu kɛji amɛhala akɛ amɛbaasɔmɔ Yehowa.​—Yes. 48:17, 18.

17, 18. Kɛ́ owekunyo ko kpa Yehowa sɔɔmɔ lɛ, mɛni baanyɛ aye abua bo ni oya nɔ okɛ miishɛɛ asɔmɔ?

¹⁷ Kɛ́ ashwie owekunyo ko kɛje asafo lɛ mli aloo ekɛ asafo lɛ fo tako mli lɛ, eyɛ dɔlɛ waa. Onuɔ he yɛ otsuiŋ tɔ̃ɔ, tamɔ nɔ ni abã bo klante. Mɛni baaye abua bo ni onyɛ odamɔ dɔlɛ ni naa wa nɛɛ naa?

¹⁸ Feemɔ nibii ni baahã ohemɔkɛyeli lɛ mli awa ni oya nɔ ohi Yehowa masɛi. Kanemɔ Biblia lɛ daa, yaa asafoŋ kpeei be fɛɛ be ni saamɔ ohe dani oya, yaa shiɛmɔ, ni osɔle daa koni Nyɔŋmɔ awaje bo ni onyɛ ofi shi. (Yuda 20, 21) Kɛ́ oofee nibii nɛɛ fɛɛ, shi loloolo lɛ, onáaa miishɛɛ lɛ, kaahã onijiaŋ je wui! Kɛ́ otee nɔ okɛ ojwɛŋmɔ ma Yehowa sɔɔmɔ lɛ nɔ lɛ, no baaye abua bo ni okahao loo oná jwɛŋmɔ ni ejaaa. Susumɔ mɔ ni ŋma Lala 73 lɛ he okwɛ. Be ko lɛ, ená jwɛŋmɔ ni ejaaa ni no hã ehao waa. Mɛni ye ebua lɛ ni etsake ejwɛŋmɔ ni ejaaa lɛ? Etee he ni ajáa Yehowa yɛ lɛ. (Lala 73:16, 17) Kɛ́ bo hu otee nɔ ojá Yehowa lɛ, ebaaye ebua bo.

19. Mɛni wɔbaanyɛ wɔfee kɛtsɔɔ akɛ wɔbuuu Yehowa tsɔsemɔ lɛ akɛ nɔ ko fɛlɛfɛlɛ?

¹⁹ Kaabu Yehowa tsɔsemɔ lɛ akɛ nɔ ko fɛlɛfɛlɛ. Eyɛ mli akɛ tsɔsemɔ lɛ, ‘amrɔmrɔ lɛ eyɛ dɔlɛ’ moŋ, shi naagbee lɛ, ewoɔ yibii kpakpai, ni mɔ ni ashwie lɛ lɛ kɛ mɛi fɛɛ ni fi sɛɛ lɛ baanyɛ aná he sɛɛ. (Kanemɔ Hebribii 12:11.) Akɛ nɔkwɛmɔnɔ lɛ, Yehowa efã wɔ akɛ wɔkɛ eshafeelɔi ni tsakeee amɛtsui lɛ ‘akpa bɔɔ.’ (1 Kor. 5:11-13) No hewɔ lɛ, eyɛ mli akɛ mɔ ni ashwie lɛ sane baadɔ wɔ waa moŋ, shi esaaa akɛ wɔkɛ lɛ bɔɔ, kɛ́ kɛtsɔ tɛs mɛseji nɔ jio, woloŋmaa nɔ jio, Intanɛt lɛ nɔ jio, nɔ kroko nɔ jio.

20. Mɛɛ hiɛnɔkamɔ esa akɛ wɔná?

²⁰ Kaahã ohiɛnɔkamɔ tã. Biblia lɛ kɛɔ akɛ suɔmɔ ‘hiɛ kãa nibii fɛɛ nɔ.’ (1 Kor. 13:7) No hewɔ lɛ, esa akɛ wɔná hiɛnɔkamɔ akɛ wɔwekumɛi ni ekpa Yehowa sɔɔmɔ lɛ baanyɛ aku amɛsɛɛ. Yehowa fɔ̃ɔ mɛi fɛɛ ni ekpa lɛ sɔɔmɔ lɛ nine akɛ ‘amɛkpale kɛba eŋɔɔ.’ (Yes. 44:22) No hewɔ lɛ, kɛ́ ona nɔ ko ni tsɔɔ akɛ owekunyo ko ni bɛŋkɛ bo lɛ miitsake etsui lɛ, obaanyɛ osɔle ni Yehowa atsɔ Biblia lɛ nɔ ewaje lɛ koni ekpɛlɛ ninefɔɔ nɛɛ nɔ.

21. Kɛ́ owekumɛi te shi amɛwo bo yɛ Yesu sɛɛ ni onyiɛ lɛ hewɔ lɛ, mɛni esa akɛ ofee?

²¹ Yesu kɛɛ kɛ́ wɔsumɔɔ adesa ko fe lɛ lɛ, wɔsaaa lɛ. Kɛ̃lɛ, ená nɔmimaa akɛ, kɛ́ ekaselɔi lɛ awekumɛi po te shi amɛwo amɛ lɛ, amɛbaafee ekãa ni amɛbaaya nɔ amɛye lɛ anɔkwa. Ani Yesu sɛɛ ni otswa ofai shi akɛ obaanyiɛ lɛ kɛ “klante” eba oweku lɛ mli? Belɛ, okɛ ohiɛ afɔ̃ Yehowa nɔ ni ebaaye ebua bo ni onyɛ ofi shi. (Yes. 41:10, 13) Ná nɔmimaa akɛ, Yehowa kɛ Yesu fɛɛ hiɛ sɔɔ anɔkwa ni oyeɔ lɛ, ni amɛbaajɔɔ bo.