1, 2. a) ¿Mbaʼépa ikatu ñanepytyvõ jaiko hag̃ua pyʼaguapýpe? b) ¿Mbaʼérepa koʼág̃arupi oĩtante voi umi mbaʼe ñandepyʼapýva? (Ehecha pe taʼanga oĩva iñepyrũme).

ENTÉRONTE ningo jaikose pyʼaguapýpe. Upévare jaagradeseterei jareko haguére “Ñandejára pyʼaguapy”. Upéva ñanetrankilisa ha ñanepytyvõ ani hag̃ua ñapensaiterei umi mbaʼe ñandepyʼapývare ni ñamboguapy ñandejehe umíva (Filip. 4:6, 7). Ñañemeʼẽma rupi Jehovápe jaiko avei pyʼaguapýpe hendive, térã ñaime porã henondépe (Rom. 5:1).

² Upéicharõ jepe, ñandepyʼapy gueteri heta mbaʼe jaiko rupi umi ára pahápe. Koʼág̃arupi oĩ opaichagua provléma ha heta hénte oiko vaisénte voi (2 Tim. 3:1-4). Avei jagerreapaite vaʼerã ikatu hag̃uáicha ñambohovái Satanás ñuhã ha umi enseñánsa japu oúva chugui (2 Cor. 10:4, 5). Péro sapyʼánte ñambohovái avei ótro provléma ikatúva ñandepyʼapyeterei, por ehémplo oñemoĩ jave ñanderehe ñane hénte ndoservíriva Jehovápe. Haʼekuéra ikatu oñembohory umi mbaʼe jagueroviávare, térã heʼi la família noñontendeveiha ñande káusare. Ikatu voi heʼi ñande ndahaʼeveimaha ihénte ndajahejáiramo ñane rrelihión.  ¿Mbaʼéichapa jahecha vaʼerã ko situasión? ¿Mbaʼépa ikatu jajapo jasegi hag̃ua ñandepyʼaguapy?

3, 4. a) ¿Mbaʼérepa Jesús heʼi vaʼekue “ani peimoʼã aju hague amoĩ pyʼaguapy”? b) ¿Mbaʼéicha javépa ijetuʼuvéta jaiko hag̃ua Jesús disípuloramo?

³ Jesús ningo oikuaa porã vaʼekue oĩtaha ndoaseptamoʼãiva umi mbaʼe haʼe omboʼéva. Oikuaa avei oĩtaha oñemoĩva idisipulokuérare ha tekotevẽtaha ipyʼaguasu hikuái. Ikatu voi umi ihénte oñeopone, ha upévare ijetuʼúta chupekuéra oiko hag̃ua pyʼaguapýpe hendivekuéra. Jesús heʼi vaʼekue: “Ani peimoʼã aju hague amoĩ pyʼaguapy ko yvy ape ári. Ndajúi agueru hag̃ua pyʼaguapy, agueru guei joavy. Aju aporomoingo vai hag̃ua, upévare taʼýra opuʼãta túvare, ha sýre opuʼãta imembykuña, ha nuéra opuʼãta isuégra rehe. Añetehápe, pende rogaygua voi haʼéta pene enemígo” (Mat. 10:34-36).

⁴ ¿Mbaʼérepa Jesús heʼi vaʼekue “ani peimoʼã aju hague amoĩ pyʼaguapy”? Haʼe oipota kuri umi hénte oikuaa mbaʼépa ikatu oiko odesidíramo omoirũ chupe. Añetehápe ningo Jesús ou vaʼekue oikuaauka hag̃ua pe añetegua, ndahaʼéi omoingo vai hag̃ua umi famíliape (Juan 18:37). Péro idisipulokuéra oikuaa vaʼerã heta vése ndaifasilmoʼãiha osegi chupe, koʼýte peteĩ iñamigoite térã ihénte orrechasáramo pe añetegua.

5. ¿Mbaʼépa ohasa heta persóna omoirũva Jesúspe?

⁵ Jesús heʼi vaʼekue idisipulokuéra oĩ vaʼerãha dispuésto ohasávo heta mbaʼe ijetuʼúva, por ehémplo umi ihénte oñemoĩ jave hesekuéra (Mat. 10:38). Algúnope orrechasa ihentekuéra térã oñembohory hese omoirũ haguére Jesúspe. Péro Jesús disipulokuéra operdéramo jepe pe amista orekóva ihéntendi, ohupyty hína hetave mbaʼe porã (elee Marcos 10:29, 30).

6. ¿Mbaʼépa iporã ñanemanduʼa ñane hénte oñemoĩ jave ñanderehe jaservi haguére Jehovápe?

⁶ Ñane hentekuéra oñemoĩramo jepe ñanderehe jaservi haguére Jehovápe, ñande jahayhu chupekuéra. Péro iporã ñanemanduʼa jahayhuve vaʼerãha Ñandejárape ha Jesucrístope (Mat. 10:37). Iñimportánte avei ñanemanduʼa Satanás ikatuha oipuru pe mborayhu ñañandúva ñane héntere ñanemomombyry hag̃ua Jehovágui. Koʼág̃a jahecháta mbaʼe situasiónpa ikatu oñepresenta ha mbaʼéichapa ikatu ñambohovái.

7. ¿Mbaʼépa jajapo vaʼerã ñane ména térã ñane rembireko ndoservíriramo Jehovápe?

⁷ La Biblia heʼi umi omendáva heta iprovlemataha (1 Cor. 7:28). Ñane ména térã ñane rembireko ndahaʼéiramo Testígo, ikatu hína jahasa hetave mbaʼe ijetuʼúva ñande rogapýpe. Upéicharõ jepe iñimportánte jahecha ñane situasión Jehová ohechaháicha. Jehová ndoipotái jajesepara térã jajedivorsia, ñane rembiayhu ndoservíri haguére chupe (1 Cor. 7:12-16). Pe tembireko oservíva Jehovápe, lomímonte orrespeta vaʼerã iménape ndahaʼéiramo jepe Testígo, pórke haʼe hína la omoakãva chupe. Upéicha avei, pe ména oservíva Jehovápe lomímonte ohayhu ha okuida vaʼerã hembirekóre (Efes. 5:22, 23, 28, 29).

8. ¿Mbaʼépa iporãta ñañeporandu ñane rembiayhu omoĩsérõ ñandéve límite Jehová servísiope?

⁸ ¿Mbaʼépa ikatu rejapo ne rembiayhu omoĩsérõ ndéve límite Jehová servísiope? Por ehémplo, peteĩ ermánape iména heʼi mbaʼe diakuépa ikatu osẽ predikasiónpe. Ñaiméramo upe situasiónpe iporã ñañeporandu: “¿Ojerure piko hína chéve aheja hag̃ua Jehovápe? Oimérõ ndaupéichai, ¿ikatu piko ajapónte la ojeruréva chéve?”. Heta vése ikatu hína jajapónte la ojejeruréva ñandéve pono jaiko vai (Filip. 4:5).

9. Ne ména térã ne rembireko ndahaʼéirõ Testígo, ¿mbaʼéichapa ikatu remboʼe ne famíliape orrespeta hag̃ua chupe?

 ⁹ Ñane ména térã ñane rembireko ndoservíriramo Jehovápe ikatu ijetuʼuve hína ñandéve ñahekomboʼe hag̃ua ñane famíliape. Por ehémplo, ñamboʼe vaʼerã chupekuéra la Biblia heʼiha: “Emombaʼe nde ru ha nde sýpe” (Efes. 6:1-3). Péro, ¿mbaʼépa rejapóta ne ména térã ne rembireko ndosegírirõ umi konsého oĩva la Bíbliape? Upéicha jave nde voi remoĩ vaʼerã la ehémplo rerrespetávo chupe. Iporãta rejesarekórõ umi mbaʼe porã ne rembiayhu ojapóvare ha emombaʼe chupe upévare. Eñatende ani hag̃ua eñeʼẽ vai ne ména térã ne rembirekóre ne família rovake. Upéva rangue, eexplika chupekuéra káda persóna ikatuha odesidi oservítapa Jehovápe térãpa nahániri. Emboʼe porãramo ne famíliape ikatu hína ne rembiayhu oikuaaseve Jehovápe.

10. ¿Mbaʼéichapa ikatu remboʼe ne famíliape Jehovágui oiméramo ne ména térã ne rembireko ndahaʼéi Testígo?

¹⁰ Sapyʼánte ikatu ne ména térã ne rembireko ndoservíriva Jehovápe oipota ifamília ofesteha hendive umi arete, térã oaprende umi mbaʼe irrelihión omboʼéva. Oĩ voi umi kuimbaʼe oproivíva hembirekógui omboʼe ifamíliape la Biblia. Upéicharõ jepe pe ermána ojapo vaʼerã ikatúva guive omboʼe hag̃ua imembýpe pe añetegua (Hech. 16:1; 2 Tim. 3:14, 15). Por ehémplo, ikatu hína pe ména oproivi hembirekógui ostudia la Biblia ifamília imitãvandi térã oraha chupekuéra rreunionhápe. Pe ermána orrespetáramo jepe la iména odesidíva, oñehaʼãmbaite vaʼerã oñeʼẽ imembykuérape Ñandejárare. Péicha oaprendéta hikuái Jehovágui ha umi mbaʼe haʼe oipotáva jajapo (Hech. 4:19, 20). Péro kon el tiémpo, haʼekuérama odesidíta  oservítapa Jehovápe térãpa nahániri (Deut. 30:19, 20). *

11. ¿Mbaʼépa ikatu hína ndogustái ñane hénte ndahaʼéivape Testígo?

¹¹ Ñañepyrũrõ guare jastudia la Biblia Testigokuérandi, ikatu oime ni nañamombeʼúi raʼe ñane hentekuérape. Péro amáske jajeroviave jahávo la Biblia heʼívare, jahechakuaa ñandepyʼaguasu vaʼerãha jaʼe hag̃ua chupekuéra jaserviseha Jehovápe (Mar. 8:38). ¿Mbaʼépa ikatu jajapo oiméramo ñane provléma ñane hentekuérandi jastudia haguére la Biblia? ¿Mbaʼéichapa ikatu jasegi ñandefiél Jehovápe ha jaiko pyʼaguapýpe ñane hentekuérandi? Jahechamína unas kuánta kósa ikatúva jajapo.

12. ¿Mbaʼérepa ñane hentekuéra ndoipotái jepi jaservi Jehovápe, ha mbaʼépa ikatu jajapo?

¹² Ñañehaʼãkena ñantende mbaʼépa opensa hikuái. Ñande ningo javyʼaiterei jaikuaa rupi pe añetegua oĩva Ñandejára Ñeʼẽme. Upéicharõ jepe, ñane hentekuéra ikatu hína opensa ótro ñanembotavy hague, térã jaikeha peteĩ séktape. Ha ndajafestehavéi rupi hendivekuéra umi arete, ikatu opensa hikuái ndajahayhuveimaha chupekuéra. Ikatu voi hína okyhyje hikuái oikórõ g̃uarã ñanderehe álgo ivaíva ñamano rire. Upévare iñimportánte ñantende mbaʼépa opensa hikuái, ha jajapysaka porã hesekuéra jaikuaa hag̃ua mbaʼépa la oipyʼapýva chupekuéra (Prov. 20:5). Apóstol Pablo oñehaʼã vaʼekue ontende “opaichagua tapichápe” ikatu hag̃uáicha opredika chupekuéra. Ñande avei jajapóramo upéicha, ifasilvéta ñañeʼẽ hag̃ua ñane hentekuérandi umi mbaʼe jagueroviávare (1 Cor. 9:19-23).

13. ¿Mbaʼéichapa ñañeʼẽ vaʼerã ñane hentekuéra ndoservírivandi Jehovápe?

¹³ Ñañeʼẽkena pyʼaguapýpe porãnte. La Biblia heʼi: “Pene ñeʼẽ akóinte iporã ha ijuky vaʼerã” (Col. 4:6). Jaikuaaháicha, sapyʼánte ijetuʼu jajapo hag̃ua upéva. Upéicha rupi jajerure vaʼerã Jehovápe ijespíritu sánto ikatu hag̃uáicha ñañeʼẽ pyʼaguapýpe porãnte ñane hentekuérandi. Ndovaléi ningo ñañemoĩ jajodiskuti hendivekuéra opaichagua japu ogueroviávare. Heʼírõ térã ojapórõ álgo ñanembopochýva, jasegi vaʼerã umi apóstol ehémplo. Pablo heʼi vaʼekue: “Umi hénte oñeʼẽ vai jave orerehe, rojerure Ñandejárape tohovasa chupekuéra; oĩ jave orepersegíva, orepasiénsia ha roaguanta. Ojetaky jave orerehe, rombohovái pyʼaguapýpe porãnte” (1 Cor. 4:12, 13).

14. ¿Mbaʼépa ikatu jahupyty ñanekondúkta porãrõ?

¹⁴ Ñanekondúkta porã vaʼerã. ¿Mbaʼérepa iñimportánte upéva? Añetehápe ningo ñañeʼẽramo pyʼaguapýpe ikatúta jaiko trankilove ñane hentekuérandi, péro ñanekondúkta porãrõ katu iporãitevétantema (elee 1 Pedro 3:1, 2, 16). Eheja ne hentekuéra tohecha ne ehémplo rupive mbaʼéichapa Testigokuéra osẽ porã imatrimóniope, oñangareko porã ifamíliare, oiko la Biblia heʼiháicha ha ovyʼave. Ñane hénte noñepyrũiramo jepe oservi Jehovápe, javyʼáta pórke jaikuaa haʼe ñandeguerohorytaha ñanekondúkta porãrõ.

15. ¿Mbaʼépa ikatu jajapo ani hag̃ua ñameʼẽ juruja ñane hentekuérape ojodiskuti hag̃ua ñanendive?

¹⁵ Ñaplaneáma vaʼerã mbaʼépa jajapóta. Ñapensa vaʼerã mbaʼéicha rupípa sapyʼánte ñane hentekuéra ojodiskutise ñanendive, ha upéi jakalkula avei mbaʼéichapa ikatu ñambohovái upe situasión (Prov. 12:16, 23). Peteĩ ermána Australiagua heʼi: “Che suégro ningo ndoipotaieterei vaʼekue roservi Jehovápe. Upévare, rohenói mboyve chupe roikuaa hag̃ua mbaʼéichapa oĩ, roñemboʼe che ménandi pono rorresponde vai chupe orembopochy  jave. Rohecháma voi mbaʼe témarepa roñeʼẽta rohenói jave chupe ani hag̃ua roiko vai, ha mbykymínte roñeʼẽ hendive pono roike umi téma rrelihiósope ha rojodiskuti”.

16. ¿Mbaʼépa ñanepytyvõta ani hag̃ua ñañeñandu vai ñane hentekuéra ipochýramo ñanendive?

¹⁶ Sapyʼánte ningo ndaikatúi ñarremedia ñane hentekuéra ojodiskutiséramo ñanendive. Ikatu voi ñañeñandu vai upe haguére, pórke jahayhu chupekuéra ha hiʼã ñandéve jajogueraha porã hendivekuéra. Upéicharõ jepe, ñanemanduʼa vaʼerã iñimportanteveha ñandefiél Jehovápe. Péicha haʼekuéra ikatu avei ohechakuaa mbaʼeichaitépa iñimportánte jaservi Ñandejárape. Ñande ningo ndaikatúi jaovliga avavépe oservi hag̃ua Jehovápe, péro ikatu jahechauka chupekuéra mbaʼéichapa ojapo porã ñanderehe jaservi haguére chupe. Añetehápe ningo Jehová omeʼẽ avei chupekuéra oportunida odesidi hag̃ua oservítapa chupe térãpa nahániri (Is. 48:17, 18).

17, 18. ¿Mbaʼépa ikatu jajapo peteĩ ñane hénte ohejáramo Jehovápe?

¹⁷ ¿Mbaʼéichapa ñañeñandu peteĩ ñane hénte ojexpulsáramo térã orrenunsiáramo? Katuete ningo ñambyasyeterei ha hasy asy ñandéve. ¿Mbaʼépa ikatu jajapo péicha jave?

¹⁸ Ñañekonsentra vaʼerã Jehová servísiore. Tekotevẽterei ningo ñamombarete ñande jerovia. Upearã iñimportánte jalee la Biblia káda día, jajeprepara porã rreunionrã ha ani jafalta, japredika meme ha jajerure Jehovápe tañanemombarete ñaaguanta hag̃ua (Jud. 20, 21). ¿Mbaʼépa ikatu jajapo lomímonte jasegírõ ñañeñandu vai? ¡Ani ñañentrega! Jasegi vaʼerã ñañekonsentra Jehová servísiope. Jajapóramo péicha, mbeguekatúpe ñañeñandu porãvéta ha ndajaikomoʼãi ñapensaiterei upe situasiónre. Péicha ningo oiko vaʼekue pe oskrivi vaʼekuére Salmo 73. Peteĩ tiémpore haʼe ohasa vaʼekue umi mbaʼe ijetuʼúva ha opensaiterei upe situasiónre ha upévare oñekevranta. Péro osegi rupi ikyreʼỹ Jehová servísiope, oñeñandu porã jey (Sal. 73:16, 17). Ñandéve avei ñanepytyvõta jajapóramo upéva.

19. ¿Mbaʼéichapa ikatu jahechauka jarrespetaha Jehová disiplína?

¹⁹ Jarrespeta vaʼerã Jehová disiplína. Katuete ningo ñepyrũrã hasy asy pe disiplína, péro upéi jahechakuaáta ideprovechoha upéva enterovépe, koʼýte pe persóna ofalla vaʼekuépe (elee Hebreos 12:11). Por ehémplo, Jehová omanda ani hag̃ua jajeheʼa umi opeka ha noñarrepentírivare (1 Cor. 5:11-13). Hasýramo jepe ñandéve, natekotevẽtereíriramo, nañañeʼẽi vaʼerã peteĩ ñane hénte expulsádondi. Upéva heʼise avei noiporãmoʼãiha ñañekomunika hendive por teléfono, por mensáhe, por kárta, korréo elektróniko térã umi rred sosiál rupive.

20. ¿Mbaʼe esperánsapa ndajaperdéi vaʼerã?

²⁰ Aníkena japerde la esperánsa. Pe mborayhu ningo “ohaʼarõ opa mbaʼe”. Upévare, ani japerde la esperánsa, jasegi guei ñahaʼarõ ou jey ñane hénte térã ñane amígo oheja vaʼekue Jehovápe (1 Cor. 13:7). Jahechakuaáramo peteĩ ñane pariénte serkáno oĩva hína ko situasiónpe oñehaʼãha okambia, jajerurekuaa Jehovápe tomombarete chupe Iñeʼẽ rupive ikatu hag̃uáicha oasepta ko invitasión haʼe ojapóva: “Eju jey che rendápe” (Is. 44:22, TNM).

21. ¿Mbaʼépa ikatu jajapo ñane hénte oñemoĩramo ñanderehe ñamoirũ haguére Jesúspe?

²¹ Jesús heʼi vaʼekue jahayhuve vaʼerãha chupe entéro yvypóragui. Haʼe ojerovia vaʼekue idisipulokuéra ikatutaha osegi ifiél chupe ihentekuéra oñemoĩramo jepe hesekuéra. Ñane hénte ndoipotáiramo ñamoirũ Jesúspe, jajerure Jehovápe tañanepytyvõ ikatu hag̃uáicha ñambohovái porã koʼãichagua situasión (Is. 41:10, 13). Upéicha jajapóramo, Jehová ha Jesús ñandeguerohorýta ha ñanevendesíta ñandefiél haguére. ¡Ajépa ñanembovyʼaite upéva!