1, 2. (a) Hari edena maino ita moalelaia diba? (b) Dahaka dainai hari ita be maino ai ita noho lasi? (Laulau ginigunana herevalaia.)

ITA ibounai ita ura maino ai ita noho, bona ita ura lasi ita lalohekwarahi. Ita moale badina Iehova ese ita dekenai “Dirava ena maino” ia henia, unai ese ita ia gimaia dainai, ita lalohekwarahi momo lasi! (Fili. 4:6, 7) Danu, Iehova dekenai ita karaia gwauhamatana dainai, “Dirava ida maino ai ita noho.” Anina be ia ita tura henia diba.​—⁠Roma 5:1.

² To, Dirava ese maino do ia havaraia negana be ia do ginidae lasi. Inai dina gabedia be heiriheiri bona hepapahuahu karadia amo ia honu. (2 Tim. 3:1-4) Ita be Keristani taudia dainai, namona be ita hekwarahi Satani bona ena hahediba hereva koikoidia ita koua totona. (2 Kor. 10:4, 5) To iseda maino ia hadikaia diba gauna badana be iseda murimuri varavara. Reana idia haida ese ita abia dae gaudia do idia hevasehalaia, do idia gwau ita be ruma bese hapararaia taudia, eiava ita do idia rakatania bema iseda abidadama ita dogoatao noho. Ruma bese edia dagedage karadia be edena bamona do ita lalodia? Bona unai ia vara neganai, dahaka do ita karaia?

3, 4. (a) Bema ta be Iesu ena hahediba herevadia ia badinaia, dahaka do ia vara? (b) Edena bamona negadiai Iesu ita badinaia be auka?

³ Iesu ia diba taunimanima ibounai ese iena hahediba herevadia do idia abia dae lasi. Danu, ia diba ia idia badinaia taudia be dagedage do idia davaria, unai dainai idia lalogoada be namo. Unai bamona dagedage karadia ese ruma bese ena maino ia hadikaia diba. Iesu ia gwau: “Umui laloa lasi tanobada dekenai maino lau mailaia, maino lasi, to tuari kaia lau mailaia. Badina heiriheiri havaraia totona lau mai. Mero ese tamana do ia badu henia, kekeni ese sinana do ia badu henia, bona headava matamata hahinena ese ena ravana hahinena do ia badu henia. Momokani, tau ta ena inai taudia be ena ruma bese taudia.”​—⁠Mat. 10:34-36.

⁴ Iesu be inai hereva, “Umui laloa lasi tanobada dekenai maino lau mailaia” ia gwauraia neganai, ia ura taunimanima idia diba, bema ia murinai idia raka, dagedage do idia davaria. Bona unai ese ruma bese ia hapararaia diba. Momokani, Iesu be ia ura Dirava ena hereva momokani ia gwauraia hedinarai, to ia ura lasi ruma bese ia hapararaia. (Ioa. 18:37) Danu namona be idia diba, bema edia tura namodia o ruma bese be hereva momokani idia dadaraia, do ia auka Keriso idia badinaia totona.

5. Iesu murinai idia raka taudia be dahaka idia mamia?

⁵ Iesu ia gwau ia murinai idia raka taudia ese edia ruma bese edia dagedage karadia idia haheaukalaia be namo. (Mat. 10:38) Ena be edia ruma bese taudia ese idia kirikirilaidia eiava idia dadaraidia, to idia haheauka dainai Keriso ese ia lalonamo henidia. Bona hahenamo momo idia davaria.​—⁠Mareko 10:29, 30 duahia.

6. Bema iseda varavara ese ita idia dagedage henia, dahaka ita laloatao be namo?

⁶ Ena be iseda ruma bese ese ita idia dagedage henia, badina Iehova ita tomadiho henia, to idia ita lalokau henia noho be namo. To namo lasi unai ese iseda Dirava bona Keriso lalokau henia karana ia hereaia. (Mat. 10:37) Namona be ita laloatao, Satani ese iseda lalokau iseda ruma bese dekenai do ia gaukaralaia iseda abidadama ia hamanokaia totona. Ruma bese edia dagedage karadia haida bona ita hanaia daladia mani ita herevalaia.

7. Bema emu adavana be Witnes lasi, dahaka do oi karaia?

⁷ Baibel ia gwau: “Idia headava taudia be edia tauanina ai hisihisi do idia abia.” (1 Kor. 7:28) Bema emu adavana be Witnes lasi, reana emu headava lalonai oi be gau momo dainai do oi lalohekwarahi. To gau badana be Iehova ena lalohadai hegeregerena emu hekwakwanai oi laloa. Namo lasi oi laloa, emu adavana be Witnes lasi dainai, do umui parara eiava divos be namo. (1 Kor. 7:12-16) Ena be emu Witnes lasi adavana be tomadiho karadia ia gunalaia lasi, to ia oi matauraia be namo, badina ia be ruma bese ena kwarana. Unai hegeregerena Keristani tau ese ena Witnes lasi adavana ia lalokau henia bona naria be namo.​—⁠Efe. 5:22, 23, 28, 29.

8. Bema emu adavana ese emu tomadiho karana ia koua toho, sibona dekenai dahaka henanadai do oi henia?

⁸ Bema emu adavana ese emu tomadiho karana ia koua toho be edena bamona? Hegeregere, taihu ta be ena adavana ese ia hamaoroa wiki ta lalonai dina haida sibona do ia haroro. Bema oi dekenai unai ia vara, sibona oi nanadaia: ‘Lauegu adavana ia ura egu Dirava tomadiho henia karana lau rakatania, a? Bema lasi, iena ura do lau badinaia, a?’ Bema oi laloa maoromaoro, emu headava lalonai hekwakwanai momo do idia vara lasi.​—⁠Fili. 4:5.

9. Edena dala ai Keristani taudia ese edia natudia idia durua diba, edia Witnes lasi tama o sina idia matauraia totona?

 ⁹ Bema emu adavana be Witnes lasi, do ia auka emui natudia oi hadibaia totona. Hegeregere, emu natudia do oi hadibaia inai hahegani idia badinaia totona: “Emu tamana bona emu sinana oi matauraia.” (Efe. 6:1-3) To bema emu adavana be Baibel ena kara maoromaoro taravatudia ia badinaia lasi be edena bamona? Kara namona be emu adavana do oi matauraia noho. Iena kara namodia sibona oi laloa, bona unai kara namodia dainai ia oi hanamoa. Bona emu natudia vairanai, emu adavana do oi hadikaia lasi. To idia dekenai oi hahedinaraia, ta ta sibona ese abia hidi do idia karaia, bema Iehova do idia hesiai henia eiava lasi. Bona natudia edia kara namodia dainai, Witnes lasi tama o sina be hereva momokani ia abia dae diba.

10. Keristani tau o hahine ese edena dala ai ena natudia ia hadibaia diba, bema ena adavana be Witnes lasi?

¹⁰ Nega haida Witnes lasi tama o sina do ia ura ena natudia be tanobada ena moale karadia idia karaia eiava tomadiho koikoi ena hahediba herevadia idia dibaia. Tatau haida be do idia ura lasi edia Keristani adavana ese edia natudia dekenai Baibel idia herevalaia. Herevana dahaka, namona be Keristani adavana ia hekwarahi ena natudia dekenai Baibel ena hereva momokani ia hadibaia totona. (Kara 16:1; 2 Tim. 3:14, 15) Hegeregere, Witnes hahine ena adavana ese ia do ia koua edia natudia maragidia ida Baibel do ia stadilaia o Keristani heboudia dekenai ia abidia lao totona. Hahine ese ena tau ena disisen do ia matauraia, to dala ia kehoa neganai, ena natudia dekenai Iehova ena taravatu bona dala ia hadibaia diba.  (Kara 4:19, 20) To gabeai, tomadiho kahana dekenai natudia sibona ese abia hidi do idia karaia.​—⁠Deu. 30:19, 20. *

11. Emu Witnes lasi varavara be dahaka dainai idia badu diba?

¹¹ Reana matamanai, iseda ruma bese ita hadibaia lasi ita be Iehova ena Witnes taudia ita bamoa. To iseda abidadama ia goada neganai, do ita ura iseda abidadama ita gwauraia hedinarai. (Mar. 8:38) Bema Dirava oi badinaia dainai, emu Witnes lasi varavara idia badu, dahaka do oi karaia maino oi havaraia totona?

12. Dahaka dainai Witnes lasi varavara ese ita idia dagedage henia, bona edena bamona do ita hahedinaraia ita be edia hemami ita laloa?

¹² Emu Witnes lasi varavara edia hemami laloa. Ita dibaia hereva momokanidia dainai do ita moale bada, to reana iseda varavara do idia laloa ita idia koia eiava ita be mauri dala idauna ita badinaia. Reana do idia laloa ita be idia ita lalokau henia lasi, badina idia ida dina badadia ita moalelaia lasi. Eiava idia laloa ita mase murinai, ita dekenai gau dikana do ia vara. Namona be edia hereva ita kamonai namonamo, unai amo edia lalohadai ita lalopararalaia diba. (Aon. 20:5) Aposetolo Paulo be ia hekwarahi “taunimanima idauidau” ia lalopararalaia totona, unai amo idia dekenai sivarai namona ia hadibaia diba. Bona unai ita karaia diba danu.​—⁠1 Kor. 9:19-23.

13. Witnes lasi varavara be edena bamona do ita hereva henidia?

¹³ Mai manau ida hereva. Baibel ia gwau: “Namona be hanaihanai mai gado namo ida do umui hereva.” (Kol. 4:6) Iseda varavara ita hereva henidia neganai, Iehova ita noia ena lauma helaga ia henia totona, unai amo lauma ena huahua ita hahedinaraia diba. Namo lasi edia lalohadai koikoidia dainai ita hepapahuahu. Bema edia hereva o kara amo ita idia hahisia, aposetolo taudia edia haheitalai ita tohotohoa diba. Paulo ia gwau: “Taunimanima ese ai idia hereva dika henia neganai, idia ai hanamoa bona ai idia dagedage henia neganai, ai haheauka, bona emai ladana idia hadikaia neganai, dala namona ai idia ai hereva henia.”​—⁠1 Kor. 4:12, 13.

14. Kara namo ita hahedinaraia ena namo be dahaka?

¹⁴ Kara namo hahedinaraia noho. Mai manau ida ita hereva neganai, ita bona iseda varavara huanai maino do ia noho, to iseda kara ese namo bada ia havaraia diba. (1 Petero 3:1, 2, 16 duahia.) Emu kara amo emu varavara dekenai oi hahedinaraia, Iehova ena Witnes taudia be edia headava maurina idia moalelaia, edia natudia idia naria, bona edia mauri idia moalelaia. Ena be iseda varavara be hereva momokani idia do abia dae lasi, to ita moale badina iseda kara amo Iehova ita hamoalea diba.

15. Hepapahuahu ia vara lasi totona, dahaka ita karaia diba?

¹⁵ Palani karaia guna. Hepapahuahu idia havaraia gaudia bona hanaia daladia oi laloa. (Aon. 12:16, 23) Australia taihu ta ia gwau: “Egu ravana tauna be hereva momokani ia inai henia momokani. Ia ai do vadivadi henia lasi neganai, lau bona egu adavana be Iehova ena heduru ai noia, unai amo mai badu ida iena hereva do ai haloua lasi. Do ai herevalaia gaudia ai hegaegaelaia, unai amo ai herevahereva namonamo diba. Ia ai vadivadi henia neganai, ia ida nega daudau ai herevahereva lasi, badina dika tomadiho dainai ai hepapahuahu.”

16. Bema emu varavara oi hahisia dainai oi lalohisihisi, dahaka do oi karaia?

¹⁶ Momokani, oi bona emu Witnes lasi  varavara be gau haida dainai do umui lalotamona lasi. Unai ia vara neganai, reana do oi lalohisihisi, badina emu varavara oi lalokau henia bona oi ura idia oi hamoalea. Bema unai oi mamia, namona be Iehova badinaia karana oi atoa guna bona emu ruma bese lalokau henia karana be gabeai. Bema emu varavara be unai idia itaia, do idia laloparara Baibel ena hereva momokani badinaia karaia be mai anina bada. Herevana dahaka, namona be oi laloatao, oi be ta oi doria diba lasi hereva momokani ia abia dae totona. To gau badana be Iehova ena dala badinaia kara ena namo idia itaia. Iseda lalokau Diravana ese idia dekenai dala ia kehoa abia hidi idia karaia totona, bema ia do idia hesiai henia eiava lasi, ita dekenai ia karaia bamona.​—⁠Isa. 48:17, 18.

17, 18. Ruma bese tauna ta be Iehova ia rakatania neganai, dahaka ese oi ia durua diba?

¹⁷ Ruma bese tauna ta be kongrigeisen amo idia atoa siri eiava orea amo ia gini siri neganai, do oi lalohisihisi bada. Unai hisihisina be edena bamona do oi haheaukalaia?

¹⁸ Emu hesiai gaukara Iehova dekenai oi laloa bada. Emu abidadama hagoadaia totona, namona be dina ta ta ai Baibel oi duahia, Keristani heboudia totona oi hegaegae bona oi lao henidia, haroro gaukara oi durua, bona Iehova oi noia oi dekenai goada do ia henia oi haheauka totona. (Iuda 20, 21) To bema unai ibounai oi karaia, to oi do lalohisihisi noho be edena bamona? Oi hesiku lasi! Iehova hesiai henia karana dekenai oi bisi, unai ese oi do ia durua emu lalohadai bona hemami oi biagua totona. Salamo 73 ia torea tauna mani ita laloa. Ia danu be gau haida ia lalohekwarahilaia dainai, iena lalohadai bona hemami ia biagua diba lasi, to Iehova tomadiho henia karana ese ia durua lalohadai maorona ia abia totona. (Sal. 73:16, 17) Mai abidadama ida Iehova oi tomadiho henia neganai, oi dekenai unai ia vara diba danu.

19. Edena dala ai do oi hahedinaraia Iehova ena matahakani oi matauraia?

¹⁹ Iehova ena matahakani matauraia. Iena matahakani dainai, ita ibounai be namo ita davaria diba, idia atoa siri tauna danu, herevana unai ese lalohisihisi ia havaraia diba. (Heberu 12:11 duahia.) Hegeregere, Iehova be ita ia hagania idia helalo-kerehai lasi taudia ‘ita bamoa lasi’ totona. (1 Kor. 5:11-13) Ena be ia auka, to namo lasi idia atoa siri ruma bese tauna ita hereva henia, herevana ia be telefon, teks mesiji, revareva, e-mail, eiava Intanet amo.

20. Dahaka ita abidadama henia noho diba?

²⁰ Oi abidadama noho. “Gau ibounai lalonai [lalokau] be mai ena helaro,” unai dainai ita diba Iehova idia rakatania taudia be nega ta ia dekenai do idia giroa lou. (1 Kor. 13:7) Bema idia atoa siri ruma bese tauna ta ena kara amo ia hahedinaraia ia be ena lalona ia haidaua, ia totona do oi guriguri, unai amo Baibel ena sisiba amo goada do ia abia bona Iehova ena noinoi do ia abia dae, ia gwau: “Lau dekenai do umui giroa mai.”​—⁠Isa. 44:22.

21. Iesu oi badinaia dainai emu ruma bese ese oi idia dagedage henia neganai, dahaka do oi karaia?

²¹ Iesu ia gwau bema taunimanima ta ita lalokau henia, to ia ita lalokau henia lasi, ia be ita do ia dadaraia. To Iesu ia diba iena aposetolo taudia be mai boga-auka ida ia do idia badinaia, herevana edia ruma bese ese idia dagedage henidia. Bema Iesu oi badinaia dainai emu ruma bese ese oi idia dagedage henia, Iehova dekenai oi tabekau bona ia ese oi do ia durua. (Isa. 41:10, 13) Namona be oi moale badina Iehova bona Iesu be oi dekenai idia moale bona emu abidadama dainai oi dekenai ahuna namona do idia henia.