1, 2. (a) Ohange yaye ndji matu yenene okukara na yo nai? (b) Ovikwaye mbi tjita kutja atu ha kara nohange yatjiri moruveze ndwi? (Tara kotjiperendero pomautiro.)

ATUHE tu vanga okukara nohange mehupo retu, nokuhina ozongendo. Tjiri tu nondangi tjinene kutja Jehova u tu pa ‘ohange ye,’ poo oupore momuinyo mbu tu vatera kutja atu ha kara nomeripura omavi! (Fil. 4:6, 7) Mena rokutja twe riyandja oveni ku Jehova, eṱe wina tu tjaterwa kutja pe “nohange pokati ketu na Ndjambi,” nu tu noupanga ouwa kuna ye.—Rom. 5:1.

² Posi yokutja, oruveze ku Mukuru okueta ohange yatjiri ngunda karu ye ya. Momayuva omasenina wouzeu nga, mwe ura oviposa nu ovandu ovengi ve raisa ozongaro ozombi. (2 Tim. 3:1-4) OtjOvakriste, eṱe tu notjirwa kuna Satan nomahongero we woposyo nge handjaura. (2 Kor. 10:4, 5) Posi yokutja ouzeu ounene mbu ṱuna kohange yetu, mape ya au zu kovazamumwe vetu mbe heri Ovahongonone va Jehova. Tjiva mape ya ave tu tjiti ouhahu mena rongamburiro yetu, ave tu kuminine kutja tu eta ohaṋi meṱunḓu, poo ave tu tirisa kutja kave nokutuyakura meṱunḓu rukwao tji tu hina okuisa ongamburiro yetu. Omapirukiro  okuza komaṱunḓu wetu matu sokuyevara vi? Matu yenene vi okutjinda omauzeu nge za momapirukiro otja ingo?

3, 4. (a) Omahongero wa Jesus ye eta ouzeu waye? (b) Oruṋe tje rira ouzeu tjinene okukongorera Jesus?

³ Jesus aa tjiwa kutja omahongero we maye eta ohaṋi pokati kovandu, nokutja ovemukongorere mave hepa ouvanḓe okutjinda omauzeu ngo. Omapirukiro ngo mape ya aye isapo ohange pokati kovandu meṱunḓu. Jesus wa tja: “Amu tjangovasi Ami mbe era okueta ohange mouye. Indee uri, Ami hi ere okueta ohange, nungwari mbe era okueta engaruvyo. Ami mba yendera okutwa omuna kumwe na ihe, omukazona kumwe na ina, omusuko omukwe kumwe na ina omukwe; ii, ovanavita tjinene na ingwi omuini wonganda mave rire imba ovondjuwo ye omuini.”—Mat. 10:34-36.

⁴ Indu Jesus tja tja, “Amu tjangovasi Ami mbe era okueta ohange,” eye aa hee kutja ovapuratene ve tjiva mave hepa okuripurira koviṋa mbi za mokumukongorera. Ombuze ye mape ya ai haṋa ovandu. Otjingaperi kutja ondando ya Jesus ya ri oyokutjivisa ombuze youatjiri, nu kaku haṋa ovandu. (Joh. 18:37) Posi yokutja, ma rire ouzeu okuṱakamisa omahongero wa Kristus, indu omapanga wetu wopopezu poo ovazamumwe vetu tji mave pirukire ouatjiri.

5. Ovakongorere va Jesus va muna omauzeu waye?

⁵ Jesus wa tja omapirukiro okuza kovazamumwe vetu, itjimwe tjomauzeu ovakongorere ve ngu mave hepa okutjinda. (Mat. 10:38) Kutja ve pwire okurira ovakongorere va Kristus, ovahongewa ve mbo aave hepa okutjinda omanyekerero poo okunakaurwa i ovazamumwe vawo. Posi yokutja, owo va muna ovingi pu imbi mbi va pandjara.—Lesa Markus 10:29, 30.

6. Matu sokuzemburuka tjike indu ovazamumwe vetu tji mave pirukire ozongondjero nḓu tu tjita okukarera Jehova?

⁶ Nangarire kutja ovazamumwe vetu ve pirukira ozongondjero zetu nḓu tu tjita okukarera Jehova, eṱe ngatu ve raisire orusuvero. Posi yokutja matu sokuzemburuka kutja tu sokusuvera Jehova na Kristus pu wo. (Mat. 10:37) Eṱe wina matu sokutjiwa kutja Satan u kondja okuungurisa orusuvero ndu tu na ro kovazamumwe vetu, okuteya oupanga wetu kuna Jehova. Ngatu tare kozongaro tjiva nḓe notjiṋa nomapirukiro nge za kovazamumwe vetu, nu tu tare kutja matu yenene vi okutjinda omauzeu nge za momapirukiro ngo.

7. Indu tji wa kupa, poo tji wa kupwa i omundu ngu heri Omuhongonone wa Jehova, mo sokumuvara vi?

⁷ Ombeibela i tu rakiza kutja ovakupasane mave munu “ouzeu mouye mbwi.” (1 Kor. 7:28) Indu tji wa kupa, poo tji wa kupwa i omundu ngu heri Omuhongonone wa Jehova, mape ya omunu omauzeu omengi morukupo. Posi yokutja, ounahepero kove okumuna ongaro mu u ri tjimuna Jehova tje i muna. Nangarire kutja omukweṋu nai kakongorere Kristus, ihi katji nakuheya kutja mo sokuhaṋika kuna ye, poo okuteya orukupo. (1 Kor. 7:12-16) Nangarire kutja omurumendu ngu heri Omuhongonone wa Jehova kamaa yenene okuhongorera eṱunḓu re moviṋa oviyapuke, eye ma sokupewa ondengero mena rokutja eye ongu ri otjiuru tjeṱunḓu. Momuano otjingewo, omukazendu ngu heri Omuhongonone wa Jehova wina ma sokuraisirwa orusuvero rwatjiri komurumendu we omukambure.—Ef. 5:22, 23, 28, 29.

8. Omapuriro yeṋe ngu mo yenene okuripura omuini, indu omukweṋu tji me ku tjaere koviṋa tjiva mbi mavi tjama nokurikotameneno woye ku Jehova?

⁸ Mo tjiti vi indu omukweṋu tji me ku tjaere koviṋa tjiva, mbi mavi tjama nomerikotameneno woye ku Jehova? Otjotjihorera, omukazendu umwe omukambure wa raerwa i omurumendu we kutja nga kare norupa motjiungura tjokuzuvarisa momayuva tjiva uriri. Tji u ri mongaro otja indjo, ripura omuini kutja, ‘Hapo omukwetu tjiri ma vanga kutja mbi ise okukarera Mukuru? Tji pe heri nao, hapo me yenene okutjita eye pu ma vanga?’ Okukara noumune ouwa, maku mu vatere kutja amu ha kara nozombata nḓe heri ohepero morukupo.—Fil. 4:5.

9. Omukambure ma hongo vi ovanatje vawo okukara nondengero komunene ngu heri Omuhongonone wa Jehova?

 ⁹ Okuhonga ovanatje veṋu mape ya aku rire ouzeu, indu umwe pweṋe tje heri Omuhongonone wa Jehova. Otjotjihorera, mo sokuhonga ovanatje voye okupuratena kerakiza rOmbeibela ndi tja: “Yozika iho na nyoko.” (Ef. 6:1-3) Posi yokutja, mo tjiti vi indu omukweṋu tje ha kongorere omirari vyOmbeibela ohunga nongaro yomeritjindiro? Raisa otjihorera otjiwa mokutenga omukweṋu. Yandja ombango kovikaṋena vye oviwa, nu raisa ondangi koviṋa oviwa mbye tjita. O hungire oviṋa ovivi ohunga nomukweṋu komurungu wovanatje veṋu. Nungwari, ve kahururira kutja omundu auhe ma sokuritoororera omuini kutja ma karere Jehova poo indee. Ongaro ombwa yovanatje veṋu, mape ya ai vatere omukweṋu, okuuta okukarera Jehova.

10. Ovakambure mave hongo vi ovanatje vawo ouatjiri wOmbeibela, indu umwe wawo tje heri Omuhongonone wa Jehova?

¹⁰ Povikando tjiva, omukweṋu ngu heri Omuhongonone wa Jehova mape ya a vanga kutja ovanatje ve kare norupa momikandi mbya za momerikotameneno woposyo, poo ve hongwe omahongero wozokereka zoposyo. Ovarumendu tjiva mape ya ave tjaere ovakazendu vawo mbe ri Ovahongonone va Jehova okuhonga ovanatje vawo Ombeibela. Nandarire kutja pe ri nao, omukazendu Omukriste ma sokukondja pu ma yenene okuhonga ovanatje vawo ouatjiri wOmbeibela. (Oviung. 16:1; 2 Tim. 3:14, 15) Otjotjihorera, omurumendu ngwa kupa omukazendu ngu ri Omuhongonone wa Jehova, mape ya e he mu yandjere okuhonga ovanatje vawo Ombeibela, poo okuvetwaerera kozombongarero zombongo. Eye ma sokutenga ondyero yomurumendu we, posi yokutja tja munu  oruveze rwokuhungira ohunga nongamburiro ye ku novanatje vawo, nga tjite nao. Kunao, eye ma yenene okuhonga ovanatje vawo ongaro osemba yomeritjindiro, nokuvehonga ohunga na Jehova. (Oviung. 4:19, 20) Otjiperi kutja, ovanatje vawo kombunda mave sokutoora ondando yawo oveni ohunga nokukarera Jehova.—Deut. 30:19, 20. *

11. Ovikeṋa mbi mape ya avi eta ouzeu pokati koye novazamumwe voye mbe heri Ovahongonone va Jehova?

¹¹ Rutenga mape ya kanaa twa raera ovazamumwe vetu kutja tu rihonga Ombeibela ku nOvahongonone va Jehova. Posi yokutja ongamburiro yetu tji ya uta okukura, eṱe twa muna ouhepe wokuveraera ohunga na yo. (Mar. 8:38) Indu ouṱakame woye ku Jehova tji wa eta ouzeu pokati koye novazamumwe voye mbe heri Ovahongonone va Jehova, tara komiano tjiva mbi mavi ku vatere okuhendurura ozombata pokati keṋu, nokuṱakama ku Jehova.

12. Ovikeṋa mbi mape ya avi tjiti kutja ovazamumwe vetu mbe heri Ovahongonone va Jehova ve tu pirukire, nu matu yenene vi okuveraisira otjari?

¹² Kara notjari kovazamumwe voye mbe heri Ovahongonone va Jehova. Nangarire kutja matu tjaterwa i ouatjiri wOmbeibela mbu twe rihonga, ovazamumwe vetu mape ya ave munu kutja twa pukisiwa. Mape ya wina ave munu kutja katu yevesuvera, mena rokutja katu kara puna wo rukwao pomikandi ominanḓengu. Poo mape ya ave tira kutja matu kahihamwa kombunda. Eṱe matu sokuveraisira otjari, natu ritwa mozombaze zawo. Nu matu sokupuratena nawa ku wo, tu tjiwe kutja ongwaye tji mave rikende. (Omiano 20:5) Omuapostele Paulus aa kondjo okutjiwa nawa ozongaro zovandu “avehe,” kokutja ma yenene okuvezuvarisira ombuze ombwa. Tji twa raisa ongaro otjingeyo, wina maku tu vatere.—1 Kor. 9:19-23.

13. Matu sokuhungira momuano uṋe ku novazamumwe vetu mbe heri Ovahongonone va Jehova?

¹³ Hungira noupore. Ombeibela i tja: “Omambo weṋu aruhe ngaye rire omananyuṋe.” (Kol. 4:6) Eṱe matu yenene okuningira ombepo ondjapuke ku Jehova, kutja tu raise ovikaṋena vyayo, tji matu hungire ku novazamumwe vetu. Nu atu utu ozombata kuna wo ohunga nomahongero wozokereka zawo. Indu tji ve tu hihamisa nomambo poo novitjitwa vyawo, eṱe matu sokuhorera kovaapostele. Paulus wa tja: “Tu sengwa tji matu sere ondaya; tji matu tatumisiwa tu zara ondatumisiro ndji; tji matu yambururwa tu zira noukozu.”—1 Kor. 4:12, 13.

14. Okuraisa ongaro ombwa aruhe ku eta ouwa waye?

¹⁴ Ritjinda mongaro ombwa aruhe. Nandarire kutja omambo omapore ye tu vatera tji matu hungire ku novazamumwe vetu, omeritjindiro wetu omawa ye vatera kombanda yanao. (Lesa 1 Petrus 3:1, 2, 16.) Motjihorera tjoye, raisa kovazamumwe voye kutja Ovahongonone va Jehova ovandu mbe kara notukupo otuṋingandu, mbe tjevera ovanatje vawo nawa, nu mbe nehupo ewa nongaro ombwa yomeritjindiro. Nangarire kutja ovazamumwe vetu kamaave utu okukarera Jehova, otjiṋa tji matji sokutupa ondjoroka, okuyorokisa omutima wa Jehova mena rouṱakame wetu.

15. Matu yenene vi okutya komurungu woruveze, kutja atu ha kara mozongaro nḓu mape ya aze kaeta ozombata?

¹⁵ Rirongerisa rukuru. Ripurira kozongaro nḓu mape ya aze eta ozombata, nu u tye rukuru kutja mo ze tjindi vi. (Omiano 12:16, 23) Omukazendu omukambure ngwa za koAustralia wa tja: “Tate omukwe ee tu pirukire mena rokutja tu karera Jehova. Ngunda atu hiye mu tonena ongoze okumukorisa, eṱe aatu kumbu ku Jehova rutenga kutja me tu vatere okuraisa ongaro ombwa indu tja raisa omapindi. Aatu rongerisa omapu ngu matu kahungurira ko, kutja ehungi retu ri rire etunge. Kutja atu ha kara nomahungi omare ngu mape ya aye twara kozombata ohunga nozongamburiro, eṱe aatu tye rukuru kutja matu kemuryangera oure mbu ṱa pi.”

16. Otjikeṋa tji matji ku vatere kutja o he rimunu ondjo, indu tji u hina okutjita imbi ovazamumwe voye mbi mave vanga?

 ¹⁶ Otjingaperi kutja komoo undjire ko kutja ape ha kara ozombata pokati koye novazamumwe voye mbe ha karere Jehova. Ozombata otja inḓa ze yenena okutjita kutja u rimune ondjo, tjinenenene mena rokutja ove we ve suvera, nu aruhe u kondja okutjita ouwa ku wo. Tji u noumune otja imbwi, kondja okutwapo ouṱakame ku Jehova kombanda yorusuvero ndu u na ro keṱunḓu roye. Tji wa tjiti nao, mo vatere ovazamumwe voye okumuna kutja okuṱakamisa omirari vyOmbeibela otjiṋa otjinanḓengu tjinene. Nu tjiwa kutja konoo yenene okuṋiṋikiza varwe okuuta okukarera Jehova. Posi yokutja, tjita kutja ve mune mongaro yoye ouwa mbu za mokukongorera omirari vya Jehova. Mukuru wetu omunarusuvero, u ve pa oruveze okuritoororera oveni kutja mave mu kongorere poo indee, tjimuna tje tjita ku eṱe.—Jes. 48:17, 18.

17, 18. Mo yenene vi okupanḓera po, indu umwe meṱunḓu reṋu tja isa okukarera Jehova?

¹⁷ Indu umwe meṱunḓu tja kondwa kombongo poo tje riisako kombongo, tjiri otjiṋa tji tji tu hihamisa tjinene. Mo yenene vi okutjinda omauzeu otja inga?

¹⁸ Kara noprograma ombwa yomakonḓononeno woye wOmbeibela aruhe. Tunga ongamburiro yoye mokulesa Ombeibela yoye aruhe, okurirongerisa nawa nokukara aruhe pozombongarero zombongo. Kara norupa motjiungura tjokuzuvarisa, nu kumba kutja Jehova me ku pe omasa wokupanḓera po. (Judas 20, 21) Indu tji mo munu kutja kononḓero yokuungura oviṋa mbi rukwao, nu u ungura uriri mena rokutja mavi sokutjitwa, mo sokutjita vi? O yumbu ohama! Tji wa kara noprograma ombwa yomakonḓononeno wOmbeibela, mai ku vatere kutja u tjevere omeripura nongaro yomuinyo woye. Tara ku imbi mbya tjitwa komutjange wEpsalme 73. Eye wa uta okuhara omeripura woposyo nge mu kurungisa tjinene. Posi yokutja wa yenena okurundurura omeripura we, indu tja hita mOndjuwo ondjapuke ya Mukuru. (Eps. 73:16, 17) Ove tji wa karere Jehova nouṱakame, wina mo yenene okurundurura omeripura woye.

19. Mo yenene vi okuraisa ondengero kondyero yomavyuriro Jehova ndja twapo?

¹⁹ Raisa ondengero komavyuriro wa Jehova. Ondyero yomavyuriro Jehova ndja twapo i yenena okueta ouwa oukarerere ku avehe, na ku ingwi ngwa katuka wina, nangarire kutja pomautiro ye hihamisa. (Lesa Ovaheberi 12:11.) Otjotjihorera, Jehova u tu rakiza kutja atu “wana” ku nomundu ngu he ritanaura komauvi we. (1 Kor. 5:11-13) Nangarire kutja otjiṋa otjizeu, eṱe matu sokuteya oupanga ngamwa auhe ku nomuzamumwe wetu ngwa kondwa kombongo. Nu wina katu sokupaha okuhungira kuna ye pu pe heri ohepero, mongoze, mokuhindirasana ozombuze, motutuu, mozoimeila poo motungovi twomahakaeneno.

20. Matu sokukara nomaundjiro waye?

²⁰ Kara nomaundjiro. Orusuvero “ru nomaundjiro moviṋa avihe.” Nu ru nomaundjiro kutja imba mba poka ku Jehova, mave kotoka ku ye. (1 Kor. 13:7) Indu tji wa munu kutja omuzamumwe woye wa utu okuraisa ongaro ombwa, ove mo yenene okumukumbira kutja ma mune omasa mOmbeibela, nokutja ma toorere ko omikambo komeriyarikaṋeno wa Jehova nge tja: “Kotoka ku ami.”—Jes. 44:22.

21. Mo sokutjita vi indu tji mu nohaṋi meṱunḓu reṋu mena rokutja u kongorera Jesus?

²¹ Jesus wa tja, tji twa suvere omundu warwe kombanda ye, katu ya pwira ye. Posi yokutja, eye wa ri nongamburiro kutja ovahongewa ve mave kara nouvanḓe wokuṱakama ku ye, nandarire kehi yomapirukiro okuza komaṱunḓu wawo. Indu okukongorera Jesus tji kwa eta “engaruvyo” meṱunḓu reṋu, ṱaṱera ku Jehova kutja me ku vatere okutjinda omauzeu ngo nondoṋeno. (Jes. 41:10, 13) Muna ondjoroka mokutjiwa kutja Jehova na Jesus ve tjaterwa i ove, nu mave ku sere ondaya mena rouṱakame woye.