1, 2. (a) Anni nga imammo i maekspiriensa tam ta maddaggun? (b) Anni i mangifugag nittam nga maekspiriensa i permanente nga imammo ta maddaggun? (Innan i letratu ta gafu na artikulo.)

KAYÀ tam ngamin i memammo nga pattolay, nga awan tu pakavurungan. Dakal i pabalo tam megafu ta niddan ittam ni Jehova tu “imammo na,” kalmadu nga panageno nga mapprotekta nittam kontra ta kavvuru-vurung ira nga appana-panono anna mataga-tageno! (Fil. 4:6, 7) Megafu ta dedikasiottam kani Jehova, “kakkofun ittam ngana na Dios,” yatutta memammo i relasiottam sa.​—Roma 5:1.

² Ngem, ari paga zimittal i tiempo nga permanente nga irattal na Dios i imammo. Napannu tu problema anna minakkiddama nga totolay yaw nga pangurianan ira nga tiempo. (2 Tim. 3:1-4) Bilang Cristiano, egga i espiritual nga pakillabattam kontra kani Satanas anna ta falso ira nga tuddu nga ipagaramna. (2 Cor. 10:4, 5) Ngem i pinaka-mamappeligro ta imammo tam ay maggafu ta ari kapangngurug nga paparientes tam. Uyu-uyawadda i pangurug tam, akusadda ittam nga mamassirinna ta familia, onu ananassingadda ittam nga pallikuradda ittam nu ariattam ibbattan i pangurug tam.  Kunnasi tam nakuan imammatan i pangokkontra na familia? Kunnasi tam arubangan ta kapianan i problema ira nga irattalna?

3, 4. (a) Anni i efekto na tuddu ira ni Jesus? (b) Anni nga situasion nga mariga tuttulan si Jesus?

³ Ammu ni Jesus nga mamassirinna ta totolay i tuttudduna anna magawag tu sikan danuri tumuttul sa tapenu marubadda i pangokkontra. Makafekto yaw nga pangokkontra ta memammo nga relasion na familia. Kunni Jesus: “Arian nu abbattan tu zimittal ngà ta utun na davvun nga mangirattal ta imammo. Ari, ari tu imammo i nirattal ku nu ari espada. I nirattal ku ay i ari pakka-ana-anugu na ána nga lallaki anna yama da, ána nga babbay anna yena da, manugang nga babbay anna katugangad-da nga babbay. I kontra noka na tadday nga tolay, ay danuri i kabbalay na gabbalaman.”​—Mat. 10:34-36.

⁴ Ta pakkagina tu “Arian nu abbattan tu zimittal ngà ta utun na davvun nga mangirattal ta imammo,” kayà kagian ni Jesus nga mawag tu nonopan na karuan ta maggigginna sa i resulta ira na panuttul sa. Mamassirinna ta totolay i mensahena. Siempre, i pangilammuyag ta mensahe na kinakurug nga naggafu ta Dios i motibona, ari tu manaral tu pavvurulun. (Juan 18:37) Ngem, mariga lagapa itaddaggan i kinakurug nga tuddu ira ni Cristo nu ari alawatan na madukko nga kofun onu kafamilia i kinakurug.

5. Anni i naekspiriensa na disipulos ni Jesus?

⁵ Nelagum ni Jesus i taki na pangokkontra na familia bilang parte na ziga nga mawag nga attamman na disipulosna. (Mat. 10:38) Tapenu mapakurug nga mepangngo ira kani Cristo, mawag nga attamman na disipulosna i panguyu-uyaw onu kesinna ta familiada. Ngem mas aru i bendisiodda anne ta napawan nira.​—Bibbigan i Marcos 10:29, 30.

6. Anni nakuan i daddammattam nu kontran na paparientes tam i paddayaw tam kani Jehova?

⁶ Maski nu kontran na paparientes tam ira i appursigi tam nga dayawan si Jehova, iddukattam lagapa ira, ngem daddammattam nga i aya tam ta Dios anna kani Cristo i mas importante. (Mat. 10:37) Ammu tam nakuan gapa nga puede nga usan ni Satanas i pangaya tam ta familia tam tapenu daralan i kinamatalo tam. Ikonsidera tam i karuan nga situasion meyannung ta pangokkontra na familia anna innan nu kunnasi tam kapianan nga marubang i problema ira nga irattal natun.

7. Kunnasim nakuan nga imammatan i situasiommu nu ari nga kapangngurug i atawam?

⁷ Sinabarangngan ittam na Biblia nga danuri mangatawa ay mapeggan tu “neravvunan nga kavuru-vurungan.” (1 Cor. 7:28) Nu ari kapangngurug i atawam, awayyana nga mas dakal i problema anna pakavurungammu ta pagatawa. Ngem, importante nga imammatammu i situasion nga gittana pagimamma ni Jehova. Maski nu ari nga sigga-paran nga mabbalin tu Cristiano i atawam ta maddaggun, ari nga makalanno nga rason yatun ta passinna onu diborsio. (1 Cor. 7:12-16) Maski paga ari iyorollu na ari kapangngurug nga atawa nga lalaki i espiritual ira nga gannug, merespeto nakuan yaya megafu ta yaya i ulu na familia. Matageno nakuan gapa na ari Saksi nga atawa nga babay i minassakrifisio nga aya anna fermi nga pagiddu na Cristiano nga atawana.​—Efe. 5:22, 23, 28, 29.

8. Anni ira i awayyam iyavu ta baggim nu iddan na atawam tu limitasion i serbisiom?

⁸ Kunnasi nu iddan na atawam tu limitasion i serbisiom? Angngariganna, egga sister nga binilinan na ari Saksi nga atawana nga mallawan ta karuan laman nga aggaw na ligguan. Nu kunnatun i situasiommu, iyavu mu ta baggim: ‘Ikikkiddaw kari na atawà nga iyemmakku ngana i masserbi ta Dios? Nu ari,  pabbigyakku kari i ikikkiddona?’ Malillitannu i ari pakkarantindian ta pagatawa nu rasonable ka.​—Fil. 4:5.

9. Kunnasi tudduan na Cristiano ira i ánada nga ikakua i maganada nga ari kapangngurug?

⁹ Mas mariga nga sanayan i ána nu ari kapangngurug i atawam. Angngariganna, mawag tu ituddum ta ána mu nga tuppalan yaw nga bilin na Biblia: “Ikakuam i yamam anna yenam.” (Efe. 6:1-3) Ngem kunnasi nu ari tuttuttulan na atawam i atannang nga estandarte na Biblia ta kondukta? Iyorollum i pangikakua ta atawam. Maffokus ka ta makasta ira nga ugalina, anna ikagim i appresasiommu sa. Ibitam i makkagi tu negatibo ira nga gannug meyannung ta atawam ta arubang na ánanu. Iyesplika lallagu nira nga mawag tu pilian na kada tolay nu passerbianna si Jehova. Makoffun i makasta nga kondukta na ánanu tapenu maginteres i ari mangurug nga atawam meyannung kani Jehova.

10. Kunnasi metuddu na Cristiano ira nga magana i kinakurug ta ánada maski nu ari tu Saksi i tadday nira?

¹⁰ Nu mittan, fuersan na ari Saksi ira nga atawa nga makipartisipa ta pagano ira nga selebrasion i ánada onu matudduan ta falsu ira nga tuddu na relihion. Gamman gapa na karuan nga ari Saksi nga lalaki i atawada nga Cristiano nga tudduan i ánada tu Biblia. Maski kunnatun, kuan na Cristiano nga babay i mawayyana tapenu metuddu ta ánada i kinakurug ta Biblia. (King. 16:1; 2 Tim. 3:14, 15) Angngariganna, awayya nga fugaddan na atawa nga lalaki i Saksi nga atawana nga mangikondukta tu paggigiammu tu Biblia ta menor-de-edad nga ánada onu manakina nga makistudy ira. Durante nga irespetona yatun nga desision, puedena lagapa nga ituddu ta ánana i kinakurug nu egga tiansana, tapenu masanay ira anna makilalada si Jehova. (King. 4:19, 20)  Siempre, magga maddesision lagapa noka i ànada meyannung ta paddayaw.​—Deut. 30:19, 20. *

11. Anni i awayyana nga luttuag nga problema ta ari-Saksi ira nga paparientesmu?

¹¹ Ta ollu nga nakikavulu tam ta Saksi ira ni Jehova, awayyana tu ariattam kinagi yatun ta familia tam. Durante nga dumakal ngana i pangurug tam, nalippawa tam nga mawag tu ikagi ta tanakuan i kuru-kurugattam ira. (Mar. 8:38) Nu makkaproblema i relasiommu ta paparientes mu nga ari Saksi megafu ta itaddaggammu i kinakurug, innammu i karuan nga dakkua nga kuammu tapenu mapakarianan i problema ngem makapammakatalo ka lagapa.

12. Ngatta kontran ittam na kaparientes tam ira nga ari Saksi, ngem kunnasi tam mepasingan i empatia nira?

¹² Mangipasingan tu empatia ta ari kapangngurug nga paparientes. Megafu ta ayayya tam ta nagigiammu tam ira nga kinakurug ta Biblia, baka abbo na kaparientes tam nga nelogo tam onu nabbalittam nga miembro na kulto. Manonoda nga ari tam ngana ira nga iddukan megafu ta ari ittam makiselebra nira ta pagano ira nga selebrasion. Ikavurungadda gapa nga egga mesimmu nga marake nittam. Mangipasingattam nakuan tu empatia gukaban na paningan ta ganna-gannug segun ta pagimammada anna pagginna tu mapia nira tapenu mammuan i kurug ira nga ikavurungadda. (Prov. 20:5) Kinaragatan ni apostol Pablo nga alippawatan i ngamin nga klase na “totolay” tapenu melayyagayyana nira i mapia nga dumug. Makoffun gapa nittam i kunnatun nga pagimamma.​—1 Cor. 9:19-23.

13. Kunnasi tam nakuan kiyuvovugan i ari Saksi ira nga parientes tam?

¹³ Makiyuvovug tu malumamo. “Kanayun gapa nakuan nga makapagayaya anna makapagustu i uvovugan nu,” kagian na Biblia. (Col. 4:6) Kiddawattam i masanto nga espiritu ni Jehova tapenu mepasingan i vunga natun nu makiyuvovug ta kaparientes tam. Ariattam nakuan makipaddiskusion ta ngamin nga falsu nga ideyada ta relihion. Nu matakitan ta kagian onu kuadda, parigattam i ehemplo na apostoles. Nitura ni Pablo: “Nu egga i manginsulto nikami, ipakimallo mi lallagu ta Dios. Nu madara-darum kami, attammam-mi laman. Nu para-paraketad-dakami, makiyuvovug kami laman tu malumamo.”​—1 Cor. 4:12, 13.

14. Anni ira i bendision na pamattalupaddian ta makasta nga kondukta?

¹⁴ Pattalupaddianan i makasta nga kondukta. Maski makoffun i malumamo nga paguvovug, mas dakal i efekto na makasta nga kondukta tam. (Bibbigan i 1 Pedro 3:1, 2, 16.) Gukaban na ehemplom, masingan nakuan na paparientes mu nga makasta anna magayaya i pagatawa na Saksi ira ni Jehova, tangngalladda tu mapia i ánada, egga moralidadda, anna mattolay tu marenu anna kontento. Maski nu ari vuluvuga inalawà na kaparientesmi i kinakurug, magayaya kami megafu ta ammumi nga makemmemmi kani Jehova i kinamatalomi.

15. Kunnasi tam planowan i situasion ira nga posible nga mamalattuag tu problema?

¹⁵ Mapplano. Nonopan i situasion ira nga posible nga mamalattuag tu problema, tapus iplanom nu kunnasim arubangan yatun. (Prov. 12:16, 23) Niyistoria na tadday nga sister nga taga-Australia: “Kala-kalussaw na katugangakku nga lalaki i kinakurug. Nigemi nga tawagan yaya, makimallo kami na atawà kani Jehova tapenu uffunan nakami nga masippo nga arubangan i papporena. Iplanomi i topiko ira nga ipakiyuvovugmi sa tapenu makapagayaya i paggiristoriami. Tapenu ari  kuruga mabayag yatun nga marresulta tu paddidiskusion meyannung ta relihion, limitammi i oras na pakiyuvovugmi ta telepono.”

16. Kunnasim marubang i anassing nga ari mapagayaya i kaparientes mu?

¹⁶ Siempre, ariammu ekspektan nga malillitammu ngamin i ari pakkarantindian ta ari Saksi nga paparientes mu. Baka makonsensia ka megafu tatun, nerulay nu fermi i aya mu ta paparientes mu anna kanayun nga pagustuammu ira. Nu matageno mu yatun, mappursigi ka nga pagolluan i kinamatalo mu kani Jehova anne ta pangaya mu ta familiam. Makoffun yatun tapenu masingan na paparientes mu nga mattuppal ta inango onu patay i pangiyaplika ta kinakurug na Biblia. Ngem daddamman nga ari puede ifuersa ta tanakuan nga alawatan i kinakurug. Pagurayammu lallagu nga masingadda nikaw i benefisio ira na pattuppal ta dalan ira ni Jehova. Ivuka gapa na meddu nga Dios tam i oportunidad nira nga pilian nu anni nga dalan i tuttuladda, gittana kingnguana nittam.​—Isa. 48:17, 18.

17, 18. Anni i makoffun tapenu makapagattam ka nu pinanawan na kafamiliam si Jehova?

¹⁷ Nu madisfellowship i kafamilia tam onu idis-associate-na i baggina ta kongregasion, gittana kattag na espada yatun. Kunnasim maattamman i taki natun?

¹⁸ Itulu-tuloy mu i espiritual nga rutinam. Mapasikammu i baggim nu regular nga bibbigan i Biblia, mapprepara anna magatende ta Cristiano ira nga study, mallayyagayya, anna ipakimallo i sikan tapenu makapagattam. (Jud. 20, 21) Ngem kunnasi nu matageno mu nga ari napafutu i kukukuammu, nga gittana obligasion ngana laman yatun? Ariammu magimmang! Makoffun i makasta nga espiritual nga rutina tapenu makontrol mu i appanono anna mataga-tageno mu ira. Ikonsidera i ekspiriensa na nattura ta Salmo 73. Napeggan yaya tu mali nga pagimamma anna nakkonsimision yaya, ngem nitununna i pagimammana turi ta simillung yaya ta lugar na paddayarayawan ta Dios. (Sal. 73:16, 17) Nu matalo nga dayawammu si Jehova, makuam gapa yatun.

19. Kunnasi tam merespeto i unnug ni Jehova ta paddisiplina?

¹⁹ Irespeto i disiplina ni Jehova. Mattuppal ta kapianan para ta ngamin i unnugna, nelavu i nakaliwa, maski nu mataka-taki i insigida nga efekto natun. (Bibbigan i Hebreo 12:11.) Angngariganna, zinog ittam ni Jehova nga ‘ari ittam mevulu’ onu arayyuattam i ari mabbabawi nga nakaliwa. (1 Cor. 5:11-13) Maski nu mataki yatun nittam, ibita tam i ari mepangngo ira nga pakikomunika ta nadisfellowship nga kafamilia tam gukaban na telefono, text message, tura, email, onu social media.

20. Anni i kanayun nga iddanamattam?

²⁰ Kanayun nga magiddanama. ‘Iddanaman’ na aya i ngamin nga gannug. Nelagum ta iddanamattam i panoli danuri nanaw kani Jehova. (1 Cor. 13:7) Nu memammatammu i ebidensia nga mabbabbabawi ngana i madukko nga kafamiliam, awayyam ipakimallo nga mapeggan nakuan yaya tu sikan maggafu ta Biblia anna ginnanna nakuan i pakimemallo ni Jehova: “Manoli kamu niakan.”​—Isa. 44:22.

21. Anni nakuan i kuammu nu massirinna i familiam megafu ta panuttul mu kani Jesus?

²¹ Kinagi ni Jesus nga nu ipoppollu tam i interes na maski sinni nga tolay nige sa, ari ittam mepappangngo sa. Ngem makkomfiansa yaya nga mapeggan tu sikan na nono i disipulosna tapenu mapattalupaddiadda i kinamataloda sa maski nu kokkontran ira na kafamiliada. Nu nangirattal tu “espada” ta familianu i panuttul kani Jesus, mattalo kamu kani Jehova nga uffunan nakamu nga marubang tu mapia i kapurueba ira. (Isa. 41:10, 13) Magayaya ka nakuan nga mammuan nga napagayaya mu si Jehova anni Jesus anna bala-balattadda i kinamatalo mu.