1, 2. (a) Nĩ thayũ ũrĩkũ tũngĩkenera ihinda-inĩ rĩrĩ? (b) Nĩ kĩĩ gĩtũmaga twage gũkorũo na thayũ mũkinyanĩru mahinda-inĩ maya? (Rora mbica kĩambĩrĩria-inĩ gĩa gĩcunjĩ gĩkĩ.)

ITHUOTHE twendaga gũkorũo na ũtũũro ũrĩ na thayũ ũtarĩ na mĩtangĩko. Nĩ tũcokagia ngatho mũno tondũ Jehova nĩ atũheaga “thayũ wa Ngai,” na nĩguo thayũ wa thĩinĩ ũrĩa ũtũgitagĩra kuumana na meciria na maũndũ ma gũtũthumbũra. (Afil. 4:6, 7) Nĩ ũndũ wa kwĩyamũrĩra Jehova, nĩ tũkenagĩra “thayũ hamwe na Ngai,” tũgakorũo na ũrata mwega hamwe nake.—Rom. 5:1.

² O na kũrĩ ũguo, ihinda rĩa Ngai rĩa kũrehe thayũ na njĩra nginyanĩru rĩtikinyĩte. Matukũ maya ma mũico maiyũirũo nĩ njũkanĩrĩro na andũ aingĩ marĩ ma mĩerekera ĩtarĩ mĩega. (2 Tim. 3:1-4) Tũrĩ Akristiano no mũhaka tũrũe mbaara ya kĩĩroho na Shaitani na morutani ma maheeni marĩa agathagĩrĩria. (2 Kor. 10:4, 5) No ũgwati ũrĩa mũnene harĩ thayũ witũ no uume kũrĩ andũ aitũ a famĩlĩ arĩa matarĩ etĩkia. Amwe no matũnyũrũrie nĩ ũndũ wa wĩtĩkio witũ, matwĩre nĩ tũragayũkania famĩlĩ, kana matwĩre atĩ nĩ megũtũkaana twaga gũtigana na wĩtĩkio ũcio. Twagĩrĩirũo kuona ũkararia wa famĩlĩ na njĩra ĩrĩkũ? Tũngĩhiũrania atĩa  na njĩra njega na moritũ marĩa ũkararia ũcio ũrehaga?

3, 4. (a) Morutani ma Jesu makoragwo na moimĩrĩro marĩkũ? (b) Nĩ rĩ kũngĩkorũo kũrĩ kũritũ makĩria kũrũmĩrĩra Jesu?

³ Jesu nĩ aamenyaga atĩ morutani make nĩ mangĩatũmire andũ magĩe na nyamũkano na atĩ arũmĩrĩri ake nĩ mangĩkabatara gũkorũo na ũmĩrĩru wa gũthiĩ na mbere kũmũrũmĩrĩra rĩrĩa marokĩrĩrũo. Ũkararia ũcio nĩ ũngĩahutirie thayũ gatagatĩ ka andũ a famĩlĩ. Jesu oigire ũũ: “Mũtigecirie atĩ ndokire kũrehe thayũ thĩinĩ wa thĩ; ndokire kũrehe rũhiũ rwa njora, no ti thayũ. Tondũ ndokire kũrehe nyamũkano gatagatĩ ka mũndũ na ithe, mũirĩtu na nyina, na gatagatĩ ka mũtumia na nyaciarawe. Thũ cia mũndũ igaakorũo irĩ andũ a mũciĩ wake mwene.”—Mat. 10:34-36.

⁴ Jesu akiuga “Mũtigecirie atĩ ndokire kũrehe thayũ,” onanagia atĩ athikĩrĩria amwe ake nĩ maabataraga gwĩciria moimĩrĩro ma kũmũrũmĩrĩra. Ndũmĩrĩri yake nĩ ĩngĩagayũkanirie andũ. Ma nĩ atĩ muoroto wa Jesu warĩ kũhunjia ndũmĩrĩri ya ma ya Ngai, no ti gũtũma andũ magĩe na nyamũkano. (Joh. 18:37) O na kũrĩ ũguo, kũrũmĩrĩra morutani ma Kristo na wĩhokeku no gũkorũo kũrĩ kũritũ angĩkorũo andũ a famĩlĩ nĩ mararegana na ũhoro wa ma.

5. Nĩ maũndũ marĩkũ arũmĩrĩri a Jesu macemanĩtie namo?

⁵ Jesu aagwetire gũũkĩrĩrũo nĩ andũ a famĩlĩ kũrĩ hamwe na mĩnyamaro ĩrĩa arũmĩrĩri ake magĩrĩire gũkorũo mehaarĩirie gũkirĩrĩria. (Mat. 10:38) Nĩguo arutwo a Kristo metĩkĩrĩke nĩ we, nĩ makoretwo makirĩrĩirie kũnyũrũrio na nginya gũtiganĩrio nĩ andũ a famĩlĩ ciao. O na kũrĩ ũguo, ũguni ũrĩa monete nĩ mũnene gũkĩra maũndũ marĩa morĩtwo nĩmo.—Thoma Mariko 10:29, 30.

6. Nĩ ũndũ ũrĩkũ arĩ o mũhaka tũririkane andũ aitũ a famĩlĩ mangĩũkĩrĩra kĩyo gitũ gĩa gũthathaiya Jehova?

⁶ O na rĩrĩa andũ aitũ a famĩlĩ mokĩrĩra kĩyo gitũ gĩa gũthathaiya Jehova, no tũthiaga na mbere kũmenda, ĩndĩ no mũhaka tũririkane atĩ wendo witũ harĩ Ngai na Kristo nĩguo ũkoragwo ũrĩ wa mbere. (Mat. 10:37) Ningĩ no mũhaka tũmenye atĩ Shaitani nĩ arĩgeragia kũhũthĩra wendo witũ harĩ andũ a famĩlĩ gũtũma tũtiganĩrie wĩkindĩru witũ. Rekei tuone maũndũ mamwe mahutĩtie ũkararia thĩinĩ wa famĩlĩ na tuone ũrĩa tũngĩhiũrania na njĩra njega na moritũ marĩa moimanaga na ũndũ ũcio.

7. Arĩa marĩ kĩhiko-inĩ na mũndũ ũtarĩ mwĩtĩkia magĩrĩire kuona ũndũ ũcio atĩa?

⁷ Bibilia yugaga atĩ arĩa maingĩraga thĩinĩ wa kĩhiko “nĩ marĩonaga thĩna mũtũũrĩre-inĩ wao.” (1 Kor. 7:28) Angĩkorũo mũndũ ũrĩa mũhikanĩtie nake ti mwĩtĩkia, no ũcemanie na mĩtangĩko makĩria kĩhiko-inĩ gĩaku. O na kũrĩ ũguo, nĩ ũndũ wa bata kuona ũndũ ũcio ta ũrĩa Jehova arawona. Gũkorũo atĩ ihinda-inĩ rĩrĩ ũrĩa mũhikanĩtie nake ndehaarĩirie kũrũmĩrĩra Kristo, ti gĩtũmi kĩagĩrĩru gĩa kweheranĩra kana gũtigana. (1 Kor. 7:12-16) O na gũtuĩka mũthuri ũtarĩ mwĩtĩkia no age gũtongoria maũndũ-inĩ ma kĩĩroho, nĩ agĩrĩire kũheo gĩtĩo tondũ nĩwe mũtwe wa famĩlĩ. Ũndũ ũmwe na ũcio, mũthuri Mũkristiano nĩ agĩrĩire kuonia mũtumia wake ũtarĩ mwĩtĩkia wendo muororo wa kwĩima.—Ef. 5:22, 23, 28, 29.

8. Nĩ ciũria irĩkũ ũngĩĩyũria angĩkorũo ũrĩa mũhikanĩtie nake nĩ arageria kũgirĩrĩria ũthathaiya waku?

⁸ Ĩ ũrĩa mũhikanĩtie nake angĩgeria kũgirĩrĩria ũthathaiya waku? Kwa ngerekano, mwarĩ wa Ithe witũ ũmwe eerirũo nĩ mũthuri wake athiage ũtungata o thikũ-inĩ imwe harĩ kiumia. Ũngĩcemania na ũndũ ta ũcio,  wĩyũrie: ‘Hihi ũrĩa tũhikanĩtie nake aroiga ndige gũthathaiya Ngai? Angĩkorũo tiguo-rĩ, no njĩtĩkĩre ũrĩa arenda?’ Gũkorũo na ũigananĩru no gũgũteithie gwĩthema ngucanio itarĩ cia o mũhaka kĩhiko-inĩ.—Afil. 4:5.

9. Akristiano mangĩruta ciana ciao atĩa gũtĩa mũciari ũtarĩ mwĩtĩkia?

⁹ No ũkorũo ũrĩ ũndũ mũritũ makĩria kũmenyeria ciana angĩkorũo ũrĩa mũhikanĩtie nake ti mwĩtĩkia. Kwa ngerekano, nĩ wagĩrĩirũo kũruta ciana ciaku gwathĩkĩra watho ũyũ wa Bibilia: “Tĩaga thoguo na nyũkwa.” (Ef. 6:1-3) No ĩ angĩkorũo ũrĩa mũhikanĩtie nake ndararũmĩrĩra ithimi cia Bibilia ciĩgiĩ mĩtugo? Iga kĩonereria kĩega na njĩra ya gũtĩa ũrĩa mũhikanĩtie nake. Rora ngumo ciake iria njega, na wonanie atĩ nĩ ũkenagio nĩwe. Wĩtheme kwaragia maũndũ moru megiĩ ũrĩa mũhikanĩtie nake mbere ya ciana ciaku. Handũ ha ũguo, mataarĩrie atĩ o mũndũ no mũhaka athuure kana nĩ egũtungatĩra Jehova. Mĩtugo mĩega ya ciana no ĩgucĩrĩrie mũciari ũrĩa ũtarĩ mwĩtĩkia ũthathaiya-inĩ wa ma.

10. Aciari Akristiano mangĩruta ciana ciao atĩa ma cia Bibilia o na marĩ famĩlĩ-inĩ ĩgayũkanĩte kĩndini?

¹⁰ Rĩmwe, mũciari ũrĩa ũtarĩ mwĩtĩkia no oige atĩ ciana ikũngũĩre maũndũ mataringaine na Bibilia kana irutwo wĩtĩkio wa maheeni wa ndini. Athuri amwe no magirie atumia ao Akristiano kũruta ciana maũndũ marĩa marĩ thĩinĩ wa Bibilia. O na kũrĩ ũguo, mũtumia Mũkristiano nĩ ekaga ũrĩa wothe angĩhota kũruta ciana ma cia Bibilia. (Atũm. 16:1; 2 Tim. 3:14, 15) Kwa ngerekano, mũthuri ũtarĩ mwĩtĩkia no agirie mũtumia wake kwĩruta Bibilia na ciana ciao nini kana gũthiĩ nacio mĩcemanio-inĩ ya Gĩkristiano. O na gũtuĩka nĩ egũtĩa matua ma mũthuri wake, mũtumia no athiĩ na mbere kwaria  ũhoro wa wĩtĩkio wake mbere ya ciana ciake rĩrĩa mĩeke yeyumĩria, na njĩra ĩyo agacimenyeria na agaciruta ũhoro wĩgiĩ Jehova. (Atũm. 4:19, 20) No thutha-inĩ, ciana ciake no mũhaka igetuĩra itua rĩgiĩ ũthathaiya.—Gũcok. 30:19, 20. *

11. Nĩ kĩĩ kĩngĩtũma ũhĩtanie na andũ anyu arĩa matarĩ Aira a Jehova?

¹¹ Kĩambĩrĩria-inĩ, no gũkorũo tũtierire andũ a famĩlĩ itũ atĩ nĩ tũranyitanĩra na Aira a Jehova. No o ũrĩa wĩtĩkio witũ wathire ũgĩkũraga, nĩ tuonire harĩ bata kwaga kũhitha maũndũ marĩa twĩtĩkĩtie. (Mar. 8:38) Angĩkorũo mũrũgamo waku wa ũcamba nĩ ũratũma ũhĩtanie na andũ anyu arĩa matarĩ Aira a Jehova, reke tuone makinya marĩa ũngĩoya nĩguo ũnyihanyihie thĩna ũcio na ũtũũrie wĩkindĩru waku.

12. Hihi nĩ kĩĩ kĩngĩtũma andũ aitũ arĩa matarĩ etĩkia matũũkĩrĩre, no tũngĩhota gũtaũkĩrũo nĩo atĩa?

¹² Geria gũtaũkĩrũo nĩ andũ anyu a famĩlĩ arĩa matetĩkĩtie. O na gũtuĩka no tũkorũo na gĩkeno mũno nĩ ũndũ wa ma cia Bibilia iria twĩrutĩte, andũ aitũ a famĩlĩ no mecirie na mahĩtia atĩ nĩ kũhenererio twahenereirio kana tũkĩingĩra ndini ĩrĩ na maũndũ moru. No mecirie atĩ tũtimendete tondũ tũtikũngũyagĩra thigũkũ hamwe nao. O na no matangĩke nĩ ũndũ wa ihinda ritũ rĩũkĩte. Twagĩrĩirũo nĩ kũgeria gũtaũkĩrũo nĩo na njĩra ya kwĩĩkĩra iratũ-inĩ ciao na kũmathikĩrĩria na kinyi nĩguo tũmenye kĩrĩa kĩratũma matũtangĩkĩre. (Thim. 20:5) Mũtũmwo Paulo nĩ eerutanagĩria mũno gũtaũkĩrũo nĩ “andũ a mĩthemba yothe” nĩguo amahunjĩrie ũhoro ũrĩa mwega, na tũngĩka ũguo o na ithuĩ no tũteithĩke.—1 Kor. 9:19-23.

13. Twagĩrĩirũo kwaria na njĩra ĩrĩkũ na andũ aitũ a famĩlĩ arĩa matarĩ Aira a Jehova?

¹³ Aria na ũhooreri. Bibilia yugaga ũũ: “Aragiai ciugo njega hingo ciothe.” (Kol. 4:6) No tũhoe Jehova atũhe roho wake mũtheru nĩguo ũtũteithie kuonania maciaro maguo rĩrĩa tũraria na andũ a famĩlĩ. Tũtiagĩrĩirũo nĩ gũkararania nao igũrũ rĩgiĩ mawĩtĩkio mao mothe marĩa mataratwarana na Bibilia. Mangĩtũtuurithia kũgerera ciĩko kana ciugo ciao no twĩgerekanie na kĩonereria kĩa atũmwo. Paulo aandĩkire ũũ: “Hĩndĩ ĩrĩa twarumwo, tũkarathima; twanyarirũo, tũkomĩrĩria tũkirĩrĩirie; rĩrĩa twacambio, tũgacokia tũhooreire.”—1 Kor. 4:12, 13.

14. Ũguni wa gũkorũo na mĩthiĩre mĩega nĩ ũrĩkũ?

¹⁴ Tũũria mĩthiĩre mĩega. O na gũtuĩka kwaria na ũhooreri nĩ gũteithagia kũhiũrania na andũ a famĩlĩ arĩa maratũũkĩrĩra, mĩthiĩre itũ mĩega no ĩkorũo na moimĩrĩro mega o na makĩria. (Thoma 1 Petero 3:1, 2, 16.) Kũgerera kĩonereria gĩaku, reke andũ anyu mone atĩ aira a Jehova nĩ makoragwo na ihiko njega, nĩ marũmbũyagia ciana ciao, na matũũraga ũtũũro ũrĩ na muoroto marĩ na mĩthiĩre mĩega. O na andũ a famĩlĩ itũ mangĩaga gũgetĩkĩra ũhoro wa ma, no tũkorũo na gĩkeno nĩ ũndũ wa kũmenya atĩ nĩ twakenirie Jehova kũgerera mũtũũrĩre witũ wa wĩhokeku.

15. Tũngĩĩbanga atĩa kabere nĩ ũndũ wa maũndũ mangĩtũma kuumĩre ngucanio?

¹⁵ Banga kabere. Wĩcirie maũndũ marĩa mangĩtũma kuumĩre thĩna na wĩcũranie ũrĩa ũngĩhiũrania namo. (Thim. 12:16, 23) Mwarĩ wa Ithe witũ ũmwe kuuma Australia ataarĩirie ũũ: “Ithe wa mũthuri wakwa aareganaga biũ na ũhoro wa ma. Mbere ya kũmũhũrĩra thimũ, tũrĩ na mũthuri wakwa twambaga kũhoya nĩguo Jehova atũteithie tũtikamũcokerie na marakara angĩatwarĩirie ũũru. Twahaaragĩria maũndũ ma kwarĩrĩria nĩguo mĩario itũ ĩkorũo ĩrĩ ya ũrata.  Nĩguo twĩtheme mĩario ya ihinda iraya ĩrĩa ĩngĩatũmire tũcokanĩrie maũndũ-inĩ megiĩ ndini, nĩ twakoragwo tũbangĩte ihinda rĩrĩa tũngĩahũthĩrire kwaria nake.”

16. Ũngĩhiũrania atĩa na kũigua ũrĩ na mahĩtia nĩ ũndũ wa kwaga gũkenia andũ anyu?

¹⁶ Ma nĩ atĩ ndũngĩhota gwĩthema biũ kũhĩtania na andũ anyu arĩa matarĩ etĩkia. Kũhĩtania ta kũu no gũtũme ũigue ũrĩ na mahĩtia, makĩria tondũ nĩ wendete andũ anyu mũno na hĩndĩ ciothe nĩ ũgeragia kũmakenia. Angĩkorũo nĩ ũiguaga ũguo, geria kũiga wĩhokeku waku harĩ Jehova mbere ya wendo waku harĩ famĩlĩ. Mũrũgamo ta ũcio no ũteithie andũ anyu kuona atĩ kũhũthĩra motaaro ma Bibilia nĩ ũndũ wa bata mũno harĩ wee gũkĩra ũndũ ũngĩ o wothe. No o ũrĩa kũngĩkorũo kũrĩ, ririkana atĩ ndũngĩtindĩkĩrĩria andũ angĩ gwĩtĩkĩra ũhoro wa ma. Handũ ha ũguo, reke meyonere ũguni wa kũrũmĩrĩra njĩra cia Jehova makũrora. Ngai witũ ũrĩ wendo nĩ amaheaga mweke o ta ũrĩa akoragwo atũheete, wa gũthuura njĩra ĩrĩa mekwenda kũrũmĩrĩra.—Isa. 48:17, 18.

17, 18. Nĩ kĩĩ kĩngĩgũteithia gũkirĩrĩria mũndũ wa famĩlĩ angĩtiga Jehova?

¹⁷ Rĩrĩa mũndũ wa famĩlĩ eherio kana eyeheria kĩũngano-inĩ, no ũigue ta arĩ gũthecwo wathecwo na rũhiũ rwa njora. Ũngĩhiũrania atĩa na ruo rũrĩa rumanaga na ũndũ ũcio?

¹⁸ Tũũria mũtaratara waku wa maũndũ ma kĩĩroho. Wĩyake kĩĩroho na njĩra ya gũthomaga Bibilia ũtegũtĩrĩria, kũhaaragĩria na gũthiĩ mĩcemanio ya Gĩkristiano, kũnyitanagĩra ũtungata-inĩ, na kũhoyaga nĩguo ũheo hinya wa gũkirĩrĩria. (Jud. 20, 21) No ĩ ũngĩigua atĩ ngoro yaku ndĩrĩ maũndũ-inĩ macio, na ũrameka tu o ta mũtugo? Ndũgakue ngoro! Mũtaratara mwega wa maũndũ ma kĩĩroho no ũgũteithie kũhota gũtongoria meciria maku na ũrĩa ũraigua. Ta wĩcirie ngerekano ya mwandĩki wa Thaburi 73. Aakũrĩtie muonere ũtaarĩ mwega na nĩ aatangĩkaga mũno, no nĩ aahotire gũcenjia mwĩcirĩrie wake rĩrĩa aathire nyũmba-inĩ ya Ngai. (Thab. 73:16, 17) Gũtungatĩra Jehova ũrĩ mwĩhokeku no gũgũteithie gwĩka o ũguo.

19. Tũngĩonania gĩtĩo atĩa harĩ mũbango wa Jehova wa kũrũithia mũndũ?

¹⁹ Tĩĩa itua rĩa Jehova rĩa kũrũithia mũndũ. Mũbango ũcio no ũkorũo na moimĩrĩro mega thutha-inĩ harĩ andũ othe, o hamwe na ũrĩa wĩhĩtie, o na gũtuĩka kwa ihinda rĩu ũndũ ũcio no ũrehe ruo rũnene. (Thoma Ahibirania 12:11.) Kwa ngerekano, Jehova atwĩraga ‘tũtige gũthiaga thiritũ’ na andũ arĩa mehagia matekwĩrira. (1 Kor. 5:11-13) O na tũngĩkorũo tũrĩ na ruo rwa ngoro, no mũhaka twĩtheme kũnyitanagĩra na mũndũ wa famĩlĩ weheretio kĩũngano-inĩ kũgerera thimũ, gũtũmanĩra ndũmĩrĩri, marũa, e-mail, kana kũgerera njĩra cia kwaranĩria cia intaneti.

20. Nĩ kĩĩrĩgĩrĩro kĩrĩkũ tũngĩtũũria?

²⁰ Tũũria kĩĩrĩgĩrĩro. Wendo “wĩrĩgagĩrĩra maũndũ mothe,” nginya atĩ arĩa matigĩte Jehova nĩ marĩmũcokerera. (1 Kor. 13:7) Ũngĩona ũira ũronania atĩ mũndũ wanyu wa famĩlĩ nĩ aracenjia mĩthiĩre yake mĩũru, no ũhoe agĩe hinya kuuma Maandĩko-inĩ na etĩkĩre rĩĩtana rĩrĩ rĩa Jehova: “Coka harĩ niĩ.”—Isa. 44:22.

21. Wagĩrĩirũo gwĩka atĩa famĩlĩ yanyu ĩngĩgũũkĩrĩra nĩ ũndũ wa kũrũmĩrĩra Jesu?

²¹ Jesu oigire atĩ tũngĩiga mũndũ o na ũrĩkũ mbere yake, tũtingĩagĩrĩra kũmũrũmĩrĩra. O na kũrĩ ũguo, aarĩ na ma atĩ arutwo ake nĩ mangĩakorirũo na ũmĩrĩru wa gũtũũria wĩhokeku wao harĩ we o na magĩũkagĩrĩrũo nĩ andũ ao a famĩlĩ. Angĩkorũo kũrũmĩrĩra Jesu nĩ kũrehete “rũhiũ rwa njora” famĩlĩ-inĩ yanyu, wĩhoke Jehova agũteithie kũhiũrania na moritũ macio na njĩra njega. (Isa. 41:10, 13) Gĩa na gĩkeno nĩ ũndũ wa kũmenya atĩ Jehova na Jesu nĩ makenagio nĩwe na nĩ marĩkũhe ngerenwa nĩ ũndũ wa wĩhokeku waku.