1, 2. а) Иро кʹижан әʹдьлайа мә һәйә? б) Чьрʹа иро әм нькарьн бь тʹәмами әʹдьлайеда бьжин? (Бьньһерʹә шькле әʹԝльн.)

ӘМ ГЬШК жи дьхԝазьн бей чәтьнайа у хәма әʹдьлайеда бьжин. Әм гәләк рʹази нә жь Йаһоԝа, кӧ әԝ «әʹдьлайийа Хԝәде» дьдә мә. Әв әʹдьлайи али мә дькә, ԝәки әм гәләк хәмгин нәбьн у дьлрʹьһʹәт бьн (Фили. 4:6, 7). Хенщи ве йәке, «әʹдьлайийа мә тʹәви Хԝәде» һәйә, демәк һәләԛәтийа баш тʹәви ԝи, чьмки мә хԝә тʹәсмили ԝи кьрийә (Рʹом. 5:1).

² Ле ньһа һе әԝ ԝәʹдә нәһатийә кӧ Хԝәде бь тʹәмами әʹдьлайе бинә сәр әʹрде. Әм дьжин рʹожед ахьрийеда, демәк ԝи ԝәʹдәйи чахе гәләк шәрʹ-дәʹԝ һәнә у чьԛас дьчә мәрьв хьраб дьбьн (2 Тимтʹ. 3:1-4). Һьн жи әм Мәсиһи мьԛабьли Шәйтʹан у һинкьрьнед ԝийә ԛәлп шәрʹ дькьн (2 Корн. 10:4, 5). Ле йа лапә хьраб әԝ ә, кӧ щара әʹдьлайа мә хьраб дьбә тʹәви нәфәред мә у мәрьвед мәйи незик, чьмки әм Шәʹдед Йаһоԝа нә. Дьбәкә һьнәк жь ԝан мә дькʹәньн сәва баԝәрийа мә, йан жи мә нәһәԛ дькьн кӧ әм малбәте һәв дьԛәтиньн, йан жи мә дьтьрсиньн кӧ һәрге әм баԝәрийа хԝә нәһельн, әԝана ԝе мә ида ԛәбул нәкьн. Ле гәло һʹале ӧсада, әм гәрәке ча хԝә бьдьнә кʹьфше? Әм ча  дькарьн әʹдьлайе хԝәй кьн чахе тьштед ӧса дьԛәԝьмьн?

3, 4. а) Ча мәрьв сәр һинкьрьнед Иса дьньһерʹин? б) Чь дәрәщада илаһи чәтьн ә пәй Иса һәрʹьн?

³ Иса фәʹм дькьр кӧ ԝе нә һʹәму мәрьв һинкьрьнед ԝи ԛәбул кьн. Әԝи ӧса жи заньбу ԝәки ԝанрʹа мерхаси лазьм ә, чьмки ԝе һәбьн мәрьв кӧ пәй ԝан кʹәвьн. У әԝ пәйкʹәтьн ԝе алийе нәфәрада жи пешда бьһата. Иса гот: «Нәфькьрьн кӧ әз һатьмә дьне әʹдьлайийе биньм. Әз нәһатьм әʹдьлайийе биньм, ле шур. Чьмки әз һатьм кӧрʹ жь баве, ԛизе жь де у буке жь хԝәсийе бьԛәтиньм у дьжмьнед мерьв ԝе жь мала ԝи бьн» (Мәт. 10:34-36).

⁴ Чахе Иса гот, «Нәфькьрьн кӧ әз һатьмә дьне әʹдьлайийе биньм», бь ван гьлийа әԝи да кʹьфше кӧ һәрге кәсәк бьбә шагьрте ԝи, ԝе рʹасти чәтьнайа бе. Рʹастийа кӧ Иса бәла дькьр дькарьбу мәрьва жь һәв бьԛәтинә, мәсәлә чахе һәвал йан мәрьвед незик рʹастийе ԛәбул нәкьрана. Ле нета Иса әԝ нибу кӧ нәфәра жь һәв бьԛәтинә, әԝи дьхԝәст кӧ рʹастийа Хԝәде бьгьһижә мәрьва (Йуһʹн. 18:37). Ләма шагьртед ԝи рʹьнд фәʹм дькьрьн кӧ ԝе һеса нибә хԝә ль һинкьрьнед ԝи бьгьрьн.

5. Шагьртед Иса бәр чь тәйах дькьрьн?

⁵ Иса гот кӧ шагьртед ԝи ԝе алийе нәфәред хԝәда рʹасти пәйкʹәтьна бен, ләма жи ԝанрʹа сәбьр лазьм бу сәва бәр ве йәке тәйах кьн (Мәт. 10:38). Сәва кӧ һежа бьн бьбьнә шагьртед Иса, ԝана сәбьр дькьр гава нәфәред ԝан сәр ԝан дькʹәнийан йан һәла һе жи ԝана ԛәбул нәдькьрьн. Ле ԝана чь жи ӧнда кьр, һе зедә ԛазанщ кьрьн. (Бьхунә Марԛос 10:29, 30.)

6. Әм чь гәрәке бир нәкьн һәрге мәрьвед мәйи незик сәва рʹастийе пәй мә дькʹәвьн?

⁶ Чахе мәрьвед мәйи незик мьԛабьли ве йәке нә кӧ әм Йаһоԝарʹа хьзмәт дькьн, әм диса жи ԝана һʹьз дькьн. Ле әм гәрәке бир нәкьн, ԝәки һʹьзкьрьна мә һьндава Хԝәде у Мәсиһ гәрәке щийе пешьн бьгьрә (Мәт. 10:37). Әм ӧса жи гәрәке бира хԝәда хԝәй кьн, кӧ Шәйтʹан дькарә һʹьзкьрьна мә һьндава нәфәред мә бьдә хәбате, сәва кӧ әм Йаһоԝарʹа амьн нәминьн. Ԝәрә әм чәнд дәрәща шеԝьр кьн кӧ малбәтеда дькарьн бьԛәԝьмьн, у бьвиньн кӧ әм ча дькарьн чәтьнайада сәбьр кьн у хԝә рʹаст бьдьнә кʹьфше.

7. Һәрге жьн йан мере ԝә нәбаԝәр ә, һун гәрәке ча сәр ве дәрәще бьньһерʹьн?

⁷ Кʹьтеба Пирозда пешда һатә ньвисаре, ԝәки йед зәԝьщи ԝе «рʹасти охьрмед гьран бен» (1 Корн. 7:28). Һәрге кʹӧлфәт йан малхе тә нәбаԝәр ә, әԝ йәк зәԝаща тәда дькарә стрес у чәтьнайа зедә кә. Ле фәрз ә ԝәки тӧ сәр ве дәрәще бьньһерʹи ӧса ча Йаһоԝа дьньһерʹә. Әв йәк кӧ кʹӧлфәт йан жи малхе тә рʹастийе ԛәбул накә, гәрәке нәбә мәʹни кӧ һун башԛә бьжин йан жи жь һәв бьԛәтьн (1 Корн. 7:12-16). Һәрге малхе мале нәбаԝәр ә у алийе рʹӧһʹанида мьԛати малбәте набә, йәкә жьн гәрәке ԛәдьре ԝи бьгьрә, чьмки әԝ сәре малбәте йә. Ӧса жи һәрге жьн нәбаԝәр ә, мер гәрәке һьндава ԝе бь һʹьзкьрьн бә у ле хԝәй кә (Әфәс. 5:22, 23, 28, 29).

8. Һун кʹижан пьрса гәрәке бьдьнә хԝә һәрге мер йан жьна ԝә дьхԝазә кӧ һун кем Хԝәдерʹа хьзмәт кьн?

⁸ Һәрге жьн йан мере тә дьхԝазә кӧ тӧ һе кем Хԝәдерʹа хьзмәт ки, чь гәрәке бьки? Бәʹса хәбәре, мере хушкәке жерʹа готийә, ԝәки әԝ һʹәфтийе тʹәне чәнд рʹожа һәрʹә хьзмәтийе. Һәрге тӧ жи дәрәща ӧсада ни, пьрсәкә ӧса бьдә хԝә: «Гәло әԝ дьхԝазә кӧ әз ԛә Хԝәдерʹа хьзмәт нәкьм? Һәрге на, гәло әз дькарьм ве йәке бькьм чь әԝ дьхԝазә?» Һәрге тӧ бәрбьһер у сәрԝахт и, тӧйе ӧса бьки кӧ ортʹа ԝәда кем чәтьнайи һәбьн (Фили. 4:5).

9. Мәсиһи ча гәрәке зарʹед хԝә һин кә кӧ ԛәдьре де йан баве хԝәйи нәбаԝәр бьгьрә?

 ⁹ Һәрге жьн йан мер нәбаԝәр ә, һьнге дькарә чәтьн бә зарʹа рʹаст ширәт кьн у һин кьн. Бәʹса хәбәре, һун гәрәке зарʹед хԝә һин кьн, кӧ әве тʹәмийа Кʹьтеба Пироз биньн сери: «Ԛәдьре де у баве хԝә бьгьрә» (Әфәс. 6:1-3). Ле һәрге жьн йан мере ԝә принсипед Кʹьтеба Пироз найнә сери, йәкә һун гәрәке ԛәдьре ԝи (ԝе) бьгьрьн. Ӧса һуне зарʹед хԝәрʹа мәсәла баш бьһельн. Бьфькьрьн кӧ кʹижан хәйсәт-һʹӧнӧред ԝийи (ԝейә) баш һәнә, у жерʹа бежьн кӧ һун ԝи (ԝе) ԛимәт дькьн у дьшекьриньн чь жи әԝ дькә. Сәр жьн йан мере хԝә бәр зарʹа тʹӧ щар нәкьнә котә-кот. Ле дәԝсе зарʹед хԝәрʹа шьровәкьн, кӧ һәр кәс гәрәке хԝәха бьжберә Йаһоԝарʹа хьзмәт кә йан на. Һәрге рʹабун-рʹуньштьна зарʹа баш ә, әԝ йәк дькарә де йан баве нәбаԝәр бинә сәр рʹийа Хԝәде.

10. Де-бав кӧ Мәсиһи нә ча дькарьн зарʹед хԝә рʹастийе һин кьн?

¹⁰ Һьнә мер йан жьнед нәбаԝәр, дәʹԝа дькьн ԝәки зарʹед ԝан һәрʹьнә сәр щәжьнед динед ԛәлп, йан жи һинкьрьнед динед ԛәлп һин бьн. Һьнә мер кӧ нәбаԝәр ьн, һәла һе жи изьне надьнә жьнед хԝә, ԝәки зарʹа Кʹьтеба Пироз һин кьн. Ле һьнге жи чь дәсте жьне те гәрәке бькә, сәва зарʹед хԝә рʹастийе һин кә (Кʹар. Шанд. 16:1; 2 Тимтʹ. 3:14, 15). Мәсәлә, малхе нәбаԝәр дькарә изьне нәдә жьна хԝә кӧ һинбуна Кʹьтеба Пироз дәрбаз кә тʹәви зарʹед хԝәйи бьчʹук йан жи наһелә бьвә щьвате. Рʹаст ә жьн ԛәдьре сафикьрьна мере хԝә дьгьрә, ле йәкә әԝ дькарә тʹәви зарʹед хԝә хәбәр дә дәрһәԛа баԝәрийа хԝә чахе мәщалә һәйә. Ӧса әԝ зарʹ дькарьн дәрһәԛа  Йаһоԝа у ԛанун принсипед ԝи пебьһʹәсьн (Кʹар. Шанд. 4:19, 20). Ле ахьрийеда, ида зарʹ хԝәха гәрәке сафи кьн кӧ ԝе бьбьнә хьзмәткʹаред Йаһоԝа йан на (Ԛан. Дщр. 30:19, 20). *

11. Чьрʹа ортʹа мә у мәрьвед мәйи незикда дькарьн чәтьнайи пешда бен?

¹¹ Чахе мә дәстпекьр тʹәви Шәʹдед Йаһоԝа Кʹьтеба Пироз һин бьн, дьбәкә мә пешийе нәфәред хԝәрʹа дәрһәԛа ве йәке нәгот. Ле чахе баԝәрийа мә һе мәзьн бу, мә ида дәстпекьр дәрһәԛа баԝәрийа хԝә гьшкарʹа гьли кьн (Марԛ. 8:38). Һәрге бона рʹастийе ортʹа ԝә у мәрьвед ԝәйи незикда чәтьнайи пешда тен, ԝе баш бә гӧһ бьдьнә ԝан чәнд ширәта кʹижана әме шеԝьр кьн. Әв ширәт ԝе али ԝә бькьн тʹәви ԝан әʹдьлайе хԝәй кьн у Хԝәдерʹа амьн бьминьн.

12. Чьрʹа мәрьвед мәйи незик дькарьн мьԛабьли мә бьн, ле әм ча дькарьн ԝана фәʹм кьн?

¹² Хԝә дайньн дәԝса мәрьвед хԝәйи незик у ԝана фәʹм кьн. Әм бәхтәԝар ьн кӧ рʹастийе заньн. Ле мәрьвед мәйи незик дьбәкә дьфькьрьн, кӧ әм һатьнә хапандьне йан жи кʹәтьнә сектәке әʹщеб. У чьмки әм тʹәви ԝана щәжьна у әʹйд-ԛәйда дәрбаз накьн, дьбәкә әԝана дьфькьрьн кӧ әм ԝана ида һʹьз накьн. Һәла һе дьбәкә дьтьрсьн жи кӧ әме ахьрийеда гәләк пʹошман бьн у ахьрийа хьраб бьстиньн. Әм гәрәке ԝана фәʹм кьн у хԝә дайньн дәԝса ԝан. Ӧса жи чахе әԝана мәрʹа дьбежьн кӧ бона мә бәрхԝә дькʹәвьн, әм гәрәке гӧһ бьдьнә ԝан (Мәтʹлк. 20:5). Паԝлосе шанди дьхԝәст һʹәму щурʹә мәрьва фәʹм кә, сәва кӧ ԝанрʹа дәрһәԛа мьзгинийе гьли кә. Ве йәкеда әм жи гәрәке чʹәʹв бьдьнә ԝи (1 Корн. 9:19-23).

13. Тʹәви мәрьвед хԝәйи незик кӧ нәбаԝәр ьн, әм ча гәрәке хәбәр дьн?

¹³ Бь нәрми хәбәр дьн. Кʹьтеба Пироз дьбежә ԝәки «хәбәрдана ԝә мәʹрифәти» бә (Колс. 4:6). Әв һеса нинә, ләма жи әм гәрәке дӧада жь Йаһоԝа рʹӧһʹе пироз бьхԝазьн, сәва мәрьвед хԝәйи незикрʹа һʹәйф бьн у нәрм хәбәр дьн. Әм гәрәке бона һинкьрьнед ԛәлп кӧ әԝана баԝәр дькьн тʹәви ԝан нәкʹәвьнә дәʹԝе. Һәрге жи әԝана пе гьли йан жи кьред хԝә дьле мә дешиньн, һьнге баш ә чʹәʹв бьдьнә шандийа. Паԝлос гот: «Гава мә рʹәзил дькьн, әм дӧа ль ԝан дькьн, гава мә дьзериньн, әм сәбьр дькьн, гава наве мәрʹа дьлизьн, әм ль бәр ԝан дадьхьн» (1 Корн. 4:12, 13).

14. Чь кʹар ә чахе рʹабун-рʹуньштьна мә баш ә?

¹⁴ Рʹабун-рʹуньштьна хԝә баш хԝәй кьн. Рʹаст ә хәбәрдана нәрм дьле мәрьвед мәйи незик дькарә нәрм кә, ле рʹабун-рʹуньштьна мәйә баш дьһа дькарә ԛәԝи сәр ԝан һʹӧкӧм кә. (Бьхунә 1 Пәтрус 3:1, 2, 16.) Мәрьвед хԝәйи незикрʹа пе кьред хԝә нишан кә, ԝәки Шәʹдед Йаһоԝа дьхԝазьн зәԝаща ԝан бәхтәԝар бә, мьԛати зарʹа бьн, нав-намус у дьлша бьжин. Һәрге жи мәрьвед мәйи незик рʹастийе ԛәбул нәкьн, йәкә әм дькарьн дьлрʹьһʹәт бьн кӧ әм дьле Йаһоԝа ша дькьн, чьмки жерʹа амьн дьминьн.

15. Әм чь дькарьн бькьн ԝәки тʹәви мәрьвед хԝәйи незик кем бькʹәвьнә дәʹԝ-доза?

¹⁵ Пешда бьфькьрьн. Әм гәрәке пешда бьфькьрьн, кӧ чь дькарә бьбә мәʹни, ԝәки шәрʹ-дәʹԝ пешда бен, у чаԝа ԝан чәтьнайа сафи кьн (Мәтʹлк. 12:16, 23). Хушкәкә мә жь Австралйайе гьли дькә: «Хәзуре мьн гәләк мьԛабьли рʹастийе бу. Мьн тʹәви мере хԝә пешийа кӧ жерʹа тʹелехьста у бьпьрсийа әԝ ча нә, Йаһоԝарʹа дӧа дькьр сәва али мә бькә, кӧ әм бь нәрми щаба ԝи бьдьн чахе әԝ һерс дькʹәвә. Мә хԝә һазьр дькьр кӧ дәрһәԛа чь хәбәр дьн, сәва хәбәрдана мә баш дәрбаз бә. Һьн жи сәва хәбәрдана мә дьреж нәкʹьшинә  у дәрһәԛа баԝәрийе кем дәʹԝ-доз пешда бен, мә сафи кьр кем тʹәви ԝи хәбәрдьн».

16. Әм ча дькарьн дьлрʹьһʹәтийе бьстиньн һәрге әм хԝә нәһәԛ дькьн ве йәкеда кӧ дьле мәрьвед хԝәйи незик дешиньн?

¹⁶ Бәле, әм нькарьн ӧса бькьн ԝәки ԛә дәʹԝ-доз ортʹа мә у мәрьвед мәйи незикда пешда нәйен. Дьбәкә щара һун хԝә нәһәԛ дькьн чахе дәʹԝ-доз пешда тен, чьмки һун ԝана һʹьз дькьн у нахԝазьн дьле ԝан бешиньн. Һьнге һәр тьшти бькьн кӧ амьнийа ԝә һьндава Йаһоԝа щийе пешьн бьгьрә, нә кӧ һʹьзкьрьн һьндава малбәта ԝә. Ӧса әԝана ԝе фәʹм кьн кӧ гәләк фәрз ә Йаһоԝарʹа хьзмәт кьн у кӧ әʹмьре мәрьва ве йәкева гьредайи йә. Чь жи һәбә, бир нәкьн кӧ һун нькарьн зоре ԝан бькьн ԝәки рʹастийе ԛәбул кьн. Алийе хԝәда һун ԝанрʹа нишан кьн кӧ чьԛас кʹар ә чахе мәрьв рʹийа Йаһоԝада дьчә. Хԝәдейе бь һʹьзкьрьн ча мәрʹа ӧса жи ԝанрʹа мәщале дьдә, сәва бьжберьн хьзмәт кьн жерʹа йан на (Иша. 48:17, 18).

17, 18. Чь дькарә али ԝә бькә, кӧ һун тәйах кьн чахе нәфәрәки ԝә Йаһоԝа дьһелә?

¹⁷ Чахе нәфәрәки ԝә жь щьвате һатә дәрхьстьне, йан жи хԝә жь щьвате дур дьгьрә, әԝ йәк дькарә бона ԝә ӧса бә ча шур дьле ԝә хьн. Ле һун ча дькарьн бәр ве еша мәзьн тәйах кьн?

¹⁸ Хирәт бьн шьхӧлед рʹӧһʹанида. Тʹьме Кʹьтеба Пироз бьхуньн, хԝә бона щьвате һазьр кьн, һәрʹьн хьзмәтийе, у дӧа бькьн Хԝәдерʹа сәва ԛәԝате бьдә ԝә, ԝәки һун сәбьр кьн. Ӧса баԝәрийа ԝә ԝе һе ԛәԝи бә (Щьһуд. 20, 21). Ле һәрге һун тʹәхмин дькьн кӧ дьле ԝә диса гәләк дешә, у нькарьн дьлрʹьһʹәт бьн, сьст нәбьн у ԛәԝи бьн! Ԝәʹдә дәрбаз бә, һуне ида хԝә бьгьрьн у фькьред нәбаш жь һʹьше хԝә дәрхьн. Дина хԝә бьдьнә ньвискʹаре Зәбур 73. Ԝәʹдәки ӧса һәбу чахе ньһерʹандьна ԝи нәрʹаст бу у әԝ әʹщьз бьбу. Ле чахе әԝ кʹәтә пирозгәһа Хԝәде кӧ ԝи бьһʹәбинә, әԝи ньһерʹандьна хԝә гӧһаст (Зәб. 73:16, 17). Һәрге һун жи бь хирәт Хԝәдерʹа хьзмәт кьн, һуне жи ньһерʹандьна хԝә рʹаст хԝәй кьн.

19. Әм ча дькарьн бьдьн кʹьфше кӧ ԛәдьре сафикьрьна Йаһоԝа дьгьрьн?

¹⁹ Ԛәдьре ширәткьрьна Йаһоԝа бьгьрьн. Чахе Йаһоԝа ширәт дькә у щәза дькә, әԝ йәк һʹәмуйарʹа кʹаре тинә, демәк ԝи мәрьвирʹа жи йе кӧ жь щьвате һатийә дәрхьстьне. Рʹаст ә бона ԝи чәтьн ә, ле әԝ щәзакьрьн дькарә али ԝи бькә диса вәгәрʹә бал Хԝәде. (Бьхунә Ибрани 12:11.) Мәсәлә, Йаһоԝа мәрʹа дьбежә кӧ йе гӧне хԝә тʹобә накә «тʹәви ԝи нәбьн», демәк жерʹа хәбәр нәдьн (1 Корн. 5:11-13). Рʹаст ә дьле мә сәр ԝи дьшәԝьтә, ле бей мәʹнийа фәрз әм гәрәке тʹәви ԝи хәбәр нәдьн нә пе тʹеле, нә пе нәʹме, йан емаиле у нә жи малпәрада.

20. Чьда әм гәрәке баԝәрийа хԝә ӧнда нәкьн?

²⁰ Баԝәрийа хԝә ӧнда нәкьн. Һʹьзкьрьн «һәр гав баԝәр дькә», ләма әм баԝәрийа хԝә ӧнда накьн ԝәки әԝед кӧ Йаһоԝа һиштьнә, диса вәгәрʹьнә бал ԝи (1 Корн. 13:7). Һәрге һун дьвиньн кӧ әԝ мәрьве ԝә те гӧһастьне у ньһерʹандьна хԝә дьгӧһезә, һун дькарьн бона ԝи дӧа бькьн, ԝәки әԝ жь Кʹьтеба Пироз ԛәԝате бьстинә у ԛәбул кә ве тʹәглифкьрьна Йаһоԝа: «Вәгәрʹә [бал] мьн» (Иша. 44:22).

21. Һун чь гәрәке бькьн һәрге нәфәред ԝә бона рʹастийе пәй ԝә дькʹәвьн?

²¹ Иса гот кӧ һәрге әм мәрьва һе зедә һʹьз кьн нә кӧ ԝи, әм нькарьн бьбьнә шагьртед ԝи. Ле әԝ баԝәр бу кӧ шагьртед ԝи ԝе мерхас бьн у амьн бьминьн, чахе нәфәред ԝан бона рʹастийе пәй ԝан кʹәвьн. Һәрге рʹастийе «шур» анийә мала ԝә, итʹбарийа хԝә Йаһоԝа биньн кӧ әԝе али ԝә бькә һун сәбьр кьн у ԛәԝи бьминьн (Иша. 41:10, 13). Шабуна хԝә ӧнда нәкьн, чьмки һун заньн кӧ Йаһоԝа у Иса ԝә ԛәбул дькьн, у ԝе бона амьнийа ԝә әʹсә ԝә кʹәрәм кьн.