1, 2. (a) Tunahase kulivwisa kuunda muka makumbi ano? (b) Vyuma muka vinahase kutulingisa tuhone kutwama mukuunda chamwenemwene makumbi ano? (Talenu muvwimbimbi wakulivanga.)

TUVOSENA twasaka kutwama mukuunda chakuzeneka kulizakamina. Twasakwilila chikuma Yehova hakutuhana “kuunda” chenyi chize cheji kutukinganga kuvishinganyeka vize vinahase kutuhombesa. (Fwili. 4:6, 7) Tweji kulivwisanga kuwaha kutwama “mukuunda naKalunga,” nakupwa nausoko wamwaza nayikiye, mwomwo twalihana kuli Yehova.—Loma 5:1.

² Chipwe ngocho, lwola atongola Kalunga lwakutwama mukuunda chamwenemwene kanda luchihete. Tuli nakuyoyela mumakumbi akukuminyina muze munazale vikokojola navatu vaulyanyi. (Chimo. 2, 3:1-4) Ngocho hakupwa tuvaka-Kulishitu, twatela kulwa naSatana nakufungulula kunangula chamakuli chize anakukundwiza. (Koli. 2, 10:4, 5) Kaha nawa vausoko wetu vaze kavapwa Vinjihoko vanahase kutulingisa tuhone kutwama mukuunda. Vamwe vanahase kufwefulula  vyuma twafwelela, nakutuvangijikila ngwavo twasaka kumwanga membo, nakutwivwisa woma mangana tuseze muchano. Uno twatela kulinga ngachilihi nge vausoko vanatufumbukila? Tunahase kufukila ngachilihi chamokomoko naukalu natumona?

3, 4. (a) Kunangula chaYesu chinahase kuneha vyuma muka? (b) Lwola muka chinahase kupwa chachikalu kukavangiza Yesu?

³ Yesu atachikijile ngwenyi vyuma anangwilenga navihandununa vatu, kaha vaze navamukavangiza vatela kupwa vakumika mwomwo navavafumbukilanga. Echi chinahase kulingisa vatu mutanga vahone kutwama mukuunda. Yesu ambile ngwenyi: “Kanda namushinganyeka ngwenu ngwejile nakuneha kuunda hano hamavuko. Kangwejile nakuneha kuundako, oloze poko yamukwale. Ngwejile mangana ngunehe chihandwa muli mwana walunga naise, namuli mwana wapwevo nanaye, namuli nayewenu yamutu nanayewenu. Chikupu vene vaka-kole jamutu navakapwa vaze vakuzuvo yenyi.”—Mateu 10:34-36.

⁴ Yesu hakwamba ngwenyi “kanda namushinganyeka ngwenu ngwejile nakuneha kuunda,” alumbunwine ngwenyi vatu vatela kutachikiza ukalu unahase kuvawana hakumukavangiza. Mazu enyi anahase kuneha vihandwa muvatu. Oloze mulimo ejililile Yesu wapwile wakwambulula mazu aKalunga amuchano, keshi wakujiha usoko wavatuko. (Yowa. 18:37) Kaha nawa chinahase kupwa chachikalu kutwalaho lika kukavangiza kunangula chaKulishitu kachi nge kausoko ketu chipwe sepa lyetu naseze muchano.

5. Vaka-kukavangiza Yesu vanamononga vyuma muka?

⁵ Yesu ambile ngwenyi vaze vanakumukavangiza navakavemanyina nakole kuvausoko wavo. (Mateu 10:38) Hakusaka kwivwisa Kulishitu kuwaha, tumbaji twenyi vanomikanga omu vanavatolekanga nakuvafumbukila kuvausoko wavo. Ngocho vanavakisula mwamunene chamokomoko naukalu.—Tangenu Mako 10:29, 30.

6. Vyuma muka twatela kwanuka nge vausoko wetu navatufumbukila tuseze muchano?

⁶ Twatela kutwalaho lika kuzanga vausoko wetu numba tuhu navatufumbukilanga hakusaka ngwavo tuseze kwitava chetu. Oloze twatela kwanuka ngwetu twatela kuzanga chatete Yehova naKulishitu. (Mateu 10:37) Twatela nawa kutachikiza ngwetu Satana nahase kuzachisa vausoko wetu vatufumbukile mangana tuseze muchano. Tushimutwilenu haukalu unahase kutuwana mutanga nakumona omu tunahase kuuhoneselamo.

7. Vandumbwetu vaze vatwama navaka-mahyavo vaze kavapwa Vinjihoko vatela kutwama ngachilihi?

⁷ Mbimbiliya yatulweza ngwayo vaze navengila muulo “navamonanga luyando mumijimba yavo.” (Koli. 1, 7:28) Nge muka-mahyenu kapwa Chinjihoko, kaha munahase kumona ukalu chikuma muulo wenu. Chipwe ngocho, mwatela kumona ulo wenu kupwa waulemu nganomu aumona Yehova. Kamwatela kulihandununa chipwe kulilukulula namuka-mahyenuko, numba tuhu keshi nakusaka kukavangiza Kulishituko. (Koli. 1, 7:12-16) Lunga uze keshi Chinjihoko keshi kuhasa kutetekela vyuma vyakushipilituko, chipwe ngocho puwenyi atela kumulemesa mwomwo apwa mutwe watanga. Kaha nawa pwevo uze kapwa Chinjihoko vatela kumuzanga chikuma kuli lunga lyenyi uze apwa Chinjiho.—Efwe. 5:22, 23, 28, 29.

8. Vihula muka mwatela kulihulisa kachi nge muka-mahyenu mwasaka kumilingisa muchiwane kupwa chachikalu kulemesa Kalunga?

⁸ Nyi ngachilihi nge muka-mahyenu mwamilingisa muchiwane kupwa chachikalu kulemesa Kalunga? Chakutalilaho, ndumbwetu umwe wapwevo vamulwezele kuli lunga lyenyi ngwenyi atela kuyanga mumulimo wamuwande hamakumbi amwe kaha. Kachi nge nayenu muka-mahyenu mwamilweza mazu kana, kaha mwatela kulihulisa ngwenu: ‘Uno ali nakungukanyisa kulemesa Kalunga tahi? Nge chiku, kutala ngwatela kumwivwilila tahi?’ Nge namwashiwisa muchima  wenu nachimikafwa muhonese ukalu umwe muulo wenu.—Fwili. 4:5.

9. Vinjiho vanahase kunangula ngachilihi vana vavo vavumbike visemi javo vaze kavapwa Vinjihoko?

⁹ Kunangula vana chinahase kupwa chachikalu chikumanyi nge muka-mahyenu kapwa Chinjihoko. Chakutalilaho, mwatela kunangula vana venu vononoke jishimbi jamuMbimbiliya jakwamba ngwavo: “Vumbikenunga masenu namanenu.” (Efwe. 6:1-3) Oloze namulinga ngachilihi nge muka-mahyenu kakavangiza jindongi jamuMbimbiliyako? Mwatela kuhana vana venu chakutalilaho chamwaza hakuvumbikanga muka-mahyenu. Mwatela kutala havilinga vyenyi vyamwaza nakumusakwililanga. Lihendenu kukuhanjikanga mazu amapi hali muka-mahyenu oku vana venu vanakwivwako. Mwatela kulumbunwina vana venu ngwenu mutu himutu atela kulisakwila kuzachila Yehova chipwe nduma. Ngocho vilinga vyamwaza vyavana venu vinahase kulingisa muka-mahyenu etavile muchano.

10. Vinjiho vanahase kunangula ngachilihi vana vavo muchano wamuMbimbiliya numba tuhu vaka-mahyavo kavapwa Vinjihoko?

¹⁰ Lwola lumwe, muka-mahya amutu uze kapwa Chinjihoko nahase kulweza vana venyi vazane muvilika vize kavyakundwiza kwitava chamuchanoko chipwe kuvanangula vyuma vize kavyazama haMbimbiliyako. Malunga vamwe vanahase kukanyisa mapwevo javo kunangula vana Mbimbiliya. Chipwe ngocho, pwevo uze apwa Chinjiho atela kuwanako jila yimwe yakunangwilamo vana venyi muchano wamuMbimbiliya. (Vili. 16:1; Chimo. 2, 3:14, 15) Chakutalilaho, lunga nahase kukanyisa puwenyi kunangula vanyike muchano wamuMbimbiliya chipwe kuyanga navo kukukunguluka. Numba tuhu ou Chinjiho mwevwilila vyuma mwahanjika lunga  lyenyi, oloze nahase kuhanjika vyalufwelelo lwenyi kuli vana venyi kachi nge chinahase, mangana vahase kutachikiza Yehova najindongi jenyi. (Vili. 4:19, 20) Chipwe ngocho, vana vatela kukalisakwila vavene kuzachila Kalunga chipwe nduma.—Lushi. 30:19, 20. *

11. Vyuma muka vinahase kuneha ukalu kachi nge vausoko wenu kavapwa Vinjihoko?

¹¹ Omu twaputukile kulinangula muchano naVinjiho jaYehova, katwalwezele vausoko wetu vyuma twalinangwilengako. Oloze omu lufwelelo lwetu lwazamine, twafwililile kulwezako vausoko wetu vyuma twalinangwilenga. (Mako 8:38) Jino nge kulinga chuma kana chinanehe ukalu mutanga yenu, kaha mwatela kukavangiza vyuma vino mangana mukeheseko vikokojola nakulama kulonga chenu.

12. Mwomwo ika vausoko wetu vaze kavapwa Vinjihoko vanahase kutufumbukila, oloze tunahase kuvevwishisa ngachilihi?

¹² Ivwishisenunga vausoko wenu vaze kavapwa Vinjihoko. Tunahase kuwahilila mwomwo yamuchano tunalinangula, oloze vausoko wetu vanahase kushinganyeka ngwavo vali nakutuhungumwisa chipwe ngwavo tunengila mukwitava chachipi. Vanahase kushinganyeka ngwavo tunavajinji mwomwo yakuhona kwazana hamwe muvilika vyamakumbi akunoka. Shikaho twatela kuvevwishisa hakuvumbika vishinganyeka vyavo nakutachikiza kanawa vyuma vanalizakamina. (Vishi. 20:5) Kaposetolo Paulu afwililile kwivwishisa “vatu vakulisezaseza vosena” mangana avambulile mujimbu wamwaza. Nayetu nawa tunahase kulinga ngocho.—Koli. 1, 9:19-23.

13. Twatela kuhanjikanga ngachilihi navausoko wetu vaze kavapwa Vinjihoko?

¹³ Hanjikenunga mujila yayivwovu. Mbimbiliya yamba ngwayo: “Mazu enu apwenganga akukokweza shimbu yosena.” (Kolo. 4:6) Twatela kulomba Yehova atuhane shipilitu yenyi yajila mangana tusololenga mihako yashipilitu hakuhanjika navausoko wetu. Katwatela kuhamika vyuma vyosena vize vafwelelako. Kachi nge navatuhunga, kaha twatela kulondezeza chakutalilaho chavaposetolo. Paulu asonekele ngwenyi: “Hakututukana, etu tweji kukisulanga. Hakutuyanjisa, etu tweji kumikanga. Hakutuvangijikila vyavipi, etu tweji kukumbululanga mujila yayivwovu.”—Koli. 1, 4:12, 13.

14. Nganyo muka yatwama hakupwa natwamiso yamwaza?

¹⁴ Pwenunga natwamiso yamwaza. Numba tuhu kuhanjika mujila yayivwovu chinahase kutukafwa omu natutwama navausoko vaze kavapwa Vinjihoko, oloze kupwa natwamiso yamwaza chinahase kutukafwa chikuma. (Tangenu WaPetulu 1, 3:1, 2, 16.) Chakutalilaho chenu chamwaza chinahase kulingisa vausoko wenu vamone ngwavo Vinjiho jaYehova vapwa vakuwahilila muulo, veji kuzakamanga vana vavo, kaha nawa vatwama navilinga vyamwaza. Nayetu twatachikiza ngwetu numba tuhu vausoko wetu kaveshi kwitavila muchanoko, oloze twawahilila mwomwo twatachikiza ngwetu tuli nakwivwisa Yehova kuwaha.

15. Tunahase kulizanga ngachilihi kukala ukalu unahase kuneha vikokojola?

¹⁵ Lizangilenunga chimweza. Shinganyekenu havyuma vize vinahase kuneha vikokojola nakutachikiza jino mwakulingila. (Vishi. 12:16, 23) Ndumbwetu wapwevo wakuAustralia ambile ngwenyi: “Tatawenu kazangilenga Vinjihoko. Ngocho shimbu kanda tuyenga nakumumeneka, twalombelenga nalunga lyami mangana Yehova atukafwe tukamukumbululenga mujila yalikoji kukala mazu mwakahanjika. Twawahishile vihande vyakutukafwa tukashimutwile mujila yakuunda. Kachi nge tunayi nakushikama, katwashimbwilenga chikumako kuchina mwaputuka kuhanjika vihande vyeka vize vinahase kutulingisa tuputuke kuhanjika hamauka akwitava.”

16. Munahase kuhonesa ngachilihi ukalu wakulihana mulonga enu vavene kachi nge vausoko wenu vali nakuyayavala?

 ¹⁶ Mwatela kutachikiza ngwenu, numba namukilikita tuhu ngachilihi kamweshi kuhonesa ukalu wosena vanahase kuneha vausoko wenu vaze kavapwa Vinjihoko. Munahase kwivwa kupihya kachi nge vausoko wenu navayayavala havyuma mwafwelela, chikumanyi nge mwavazanga chikuma. Kachi nge namwivwa ngocho, kaha fwilenu kupwa vakushishika chatete kuli Yehova kuhambakana vausoko wenu. Kumika mujila kaneyi nachikafwa vausoko wenu vamone ngwavo kukavangiza muchano wamuMbimbiliya chikiko chachilemu. Mwatela kutachikiza nawa ngwenu kamweshi kuhasa kushinjila vakwenu vetavile muchanoko. Oloze mwatela kuvahana chakutalilaho chamwaza mangana vamone nganyo yakukavangiza jishimbi jaYehova. Kalunga ketu wazangi ahana mutu himutu lisesa lyakulisakwila ivene kumulemesa chipwe nduma.—Isa. 48:17, 18.

17, 18. Vyuma muka navimikafwa mumike nge kausoko kenu naseze Yehova?

¹⁷ Nge kausoko kenu vanamufumisa muchikungulwilo chipwe nge nalihandula ivene kuliuka, kaha munahase kwivwa nge vanamituvu poko yamukwale. Uno munahase kumika ngachilihi muukalu kana?

¹⁸ Twalenuho kulinga vyuma vyakushipilitu. Likolezezenu kushipilitu hakutanganga Mbimbiliya shimbu yosena, nakuwahishilanga chimweza vyakukukunguluka, nakuyanga kukukunguluka, nakwazananga mumulimo wakwambulula nakulomba Kalunga amihane ngolo. (Yuta 20, 21) Oloze namulinga ngachilihi nge kamweshi nakulinga vyuma kana namuchima wenu wosenako? Kanda kuzeyako, oloze twalenuho lika. Echi nachimikafwa mufungulule ukalu wenu. Achitalenu vyasolokele kuli muka-kusoneka Samu 73. Mutu kana apwilenga navishinganyeka vyakuhenga ngocho evwilenga kukola kumuchima, oloze olwele vishinganyeka vyenyi omu engilile muchihela chakulemesela Kalunga. (Samu 73:16, 17) Nayenu nawa nge namuzachila Yehova mukashishi kaha namwolola vishinganyeka vyenu.

19. Tunahase kwitavila ngachilihi kuzangamisa chaYehova?

¹⁹ Itavilenu kuzangamisa chaYehova. Jila eji kuzachisanga Yehova yeji kunehanga vyuma vyamwaza kuli vosena hamwe nakuli uze nalingi shili, numba tuhu kuzangamisa kana chinahase kutwivwisa kukola kumuchima. (Tangenu WavaHepeleu 12:11.) Chakutalilaho, Yehova atulweza ‘tulitwamine kulikata’ namutu uze mwahona kupihilila nakwalumuka hashili nalingi. (Koli. 1, 5:11-13) Chipwe twivwa kupihya tuhu ngachilihi katwatela kulikata nakausoko uze vafumisa muchikungulwilo hakumutuminanga shinga chipwe kumusonekela mikanda, chipwe kumusonekela tumijimbu halikinako.

20. Mwatela kupwa nalutalililo muka?

²⁰ Pwenu nalutalililo. Zangi yeji “kutalilila vyuma vyosena,” kaha yatalilila nawa ngwayo vaze vanaseze Yehova navakakinduluka cheka. (Koli. 1, 13:7) Shikaho nge kausoko kenu ali nakwalumunako vilinga vyenyi, kaha mwatela kumulombelako ngwenu atela kukavangiza vyuma vyamuVisoneka nakwitavila kulembelela chaYehova chakwamba ngwenyi: “Kinduluka kuli ami.”—Isa. 44:22.

21. Vyuma muka mwatela kulinga nge muli nakumona ukalu mutanga yenu mwomwo yakukavangiza Yesu?

²¹ Yesu ambile ngwenyi, nge natuzanga chikuma mutu kuhambakana ikiye kaha katwamuzangako. Oloze afwelelele ngwenyi tumbaji twenyi navomika nakutwalaho lika kupwa vakushishika kuli ikiye chamokomoko nakuvafumbukila. Kachi nge kukavangiza Yesu chinanehe “poko yamukwale” mutanga yenu, kaha pendaminenu hali Yehova amikafwe muukalu kana. (Isa. 41:10, 13) Tachikizenu ngwenu Yehova naYesu veji kwivwanga kuwaha hakumika chenu, kaha navakamikisula.