1, 2. (a) En kuwe mane ma wan-go sani? (b) Ang’o momiyo ok wanyal bedo gi kuwe mosiko sani? (Ne picha ma ni malo.)

WADUTO dwaher dak e ngima mokuwe ma onge gi tungni. Donge wamor ahinya ni Jehova miyowa “kuwe mar Nyasaye” ma en kuwe ma ritowa mondo kik wabed gi paro ma chando chunywa! (Fil. 4:6, 7) Nikech ne wasechiwore mi obatiswa, wabedo gi “kuwe e kindwa gi Nyasaye,” ma en winjruok maber ma wan-go kode.​—Rumi 5:1.

² Kata kamano, kinde ma Nyasaye biro keloe kuwe mosiko pok ochopo. E ndalo mag gikogi, ji ohero gwandruok mang’eny gi timo timbe magalagala. (2 Tim. 3:1-4) Kaka Jokristo, onego waked matek gi Satan kod puonjge mag miriambo. (2 Kor. 10:4, 5) Kata kamano, wedewa ma ok gin Joneno nyalo miyo kuwe ma wan-go olal. Moko kuomgi nyalo jaro yie marwa, wacho ni wapogo dala, kata nyisowa ni ka ok waweyo yie marwa, to gibiro were kodwa chuth. Onego wane nade akwede ma wayudo koa kuom wedewa? Ere kaka wanyalo nyagore gi chandruoge ma akwede ma kamago kelo?

3, 4. (a) Puonj mag Yesu ne dhi kelo ang’o? (b) En kinde mane ma mako puonj mag Yesu ne dhi bedo matek ne joma oyiero luwe?

³ Yesu ne ong’eyo ni puonj mage ne dhi pogo ji, kendo joma ne luwo puonjgo ne nyaka bed gi chir mondo ginyagre gi akwedego. Akwede ma kamago ne nyalo ketho kuwe manie kind wede kata joot. Yesu nowacho niya: “Kik upar ni ne abiro kelo kuwe e piny; ne abiro kelo ligangla, to ok kuwe. Nimar ne abiro kelo pogruok e kind ng’ato gi wuon-gi, e kind nyako gi min-gi, kendo e kind chi wuowi gi min chwore. Kuom adier, wasik ng’ato nobed joode owuon.”​—Mat. 10:34-36.

⁴ Ka ne Yesu owacho ni “kik upar ni ne abiro kelo kuwe,” gima ne otemo wacho en ni joma ne winjo gik mopuonjo nonego ong’e ni ka giyiero luwe, nitie pek mang’eny ma ne gidhi romogo. Ote ma ne olando ne dhi pogo ji. En adier ni Yesu ne dwaro lando adiera mar Wach Nyasaye, to ok ketho osiep ma ni e kind ji. (Joh. 18:37) Kata kamano, mako puonj mag Yesu ne dhi bedo matek, to ahinya-ahinya ka osiepe ng’ato kata wedene kwedo adiera.

5. Gin weche mage ma jopuonjre Yesu osenanoe?

⁵ Yesu ne owacho ni akwede moa kuom wede ne dhi bedo achiel kuom gik ma jopuonjrene nyaka nanie. (Mat. 10:38) Mondo gibed mowinjore gi luwo Kristo, jopuonjre Kristo osenano sama ijarogi kata sama wedegi ojwang’ogi nikech gimakore gi adiera. Kata kamano, gueth ma giseyudo thoth ma ok nyal pim gi gik ma giselalo.​—Som Mariko 10:29, 30.

6. En ang’o ma nyaka wang’e sama wedewa kwedo kinda ma watimo e lamo Jehova?

⁶ Kata obedo ni wedewa kwedo kinda ma waketo mondo walam Jehova, nyaka wadhi nyime herogi. Kata kamano, gima nyaka wang’e en ni hera ma waherogo Jehova gi Yesu e ma onego obed mokwongo. (Mat. 10:37) Bende, onego wang’e ni Satan biro temo tiyo gi hera ma waherogo wedewa mondo okethgo winjruokwa gi Nyasaye. We wanon ane moko kuom gik ma nyalo miyo wedewa okwedwa, kod gik ma wanyalo timo mondo wanyagre gi akwedego.

7. Onego ine weche e yo mane sama jaodi ok en Janeno?

⁷ Muma wacho achiel kachiel ni joma okendore biro bedo gi “masira e ringregi.” (1 Kor. 7:28) Masira mag kend kod parruok medore moloyo ka ng’at mikendorigo ok en Janeno. Kuom mano, dwarore ni ine weche mana kaka Jehova nenogi. Bedo ni jaodi ok dwar luwo Kristo gie sani ok en gima inyalo tiyogo mondo ipog kode dak kata iweye chuth. (1 Kor. 7:12-16) Kata obedo ni chwori ok tau e weche mag lamo, pod onego inyise luor nikech en e wi ot. Bende, dichwo ma Jakristo onego onyis chiege ma ok nie adiera hera matut.​—Efe. 5:22, 23, 28, 29.

8. Gin penjo mage minyalo penjori ka jaodi temo tami timo weche moko motudore gi lamo?

⁸ To nade ka jaodi temo tami timo weche mamoko motudore gi lamo Jehova? Kuom ranyisi, nitie nyaminwa moro ma jaode ne oyiene mana dhi lendo odiechienge moko e juma. Ka in e chal ma kamano, onego ipenjri niya: ‘Be dibed ni jaoda dwaro ni awe lamo Nyasaye? Ka  ok kamano, be en gima nyalore mondo atim atima gima owachono?’ Ka ibedo ng’ama tur, ibiro geng’o dondi-dondi e kindi gi jaodi.​—Fil. 4:5.

9. Ere kaka Jakristo nyalo puonjo nyithinde mondo gimi jaode ma ok Janeno luor?

⁹ Tiego nyithindo nyalo bedo matek ka jaodi ok en Janeno. Kuom ranyisi, onego ipuonj nyithindi luwo chik ma ni e Muma ma wacho ni: “Mi wuoru gi meru luor.” (Efe. 6:1-3) To nade ka jaodi ok luw puonj mag Muma e ngimane? Ket ranyisi maber kuom nyiso jaodi luor matut. Ket pachi kuom kido mabeyo ma en-go, kendo inyis ni idewe gadier. Kik iwuo marach e wi jaodi ka nyithindi winjo. Kar mano, onego ilernegi ni ng’ato ka ng’ato nyaka yier kende ka be obiro tiyo ne Jehova. Timbe mabeyo mag nyithindi nyalo miyo jaodi ma ok Janeno one ber mar lamo madier.

10. Ere kaka janyuol ma jaode ok Janeno nyalo puonjo nyithinde yore Jehova?

¹⁰ Seche moko, jaodi ma ok Janeno nyalo dwaro ni nyithindu otim nyasi moko ma Muma ok oyiego, kata onyalo dwaro puonjogi weche dinde mag miriambo. Chwo moko nyalo tamo mondegi mondo kik puonj nyithindgi Muma. Kata ka weche tek kamano, dhako ma Jakristo nyalo timo duto monyalo mondo opuonj nyithinde adiera mag Muma. (Tich 16:1; 2 Tim. 3:14, 15) Kuom ranyisi, jaod dhako ma Jakristo nyalo tame mondo kik opuonjre gi nyithinde kata kik odhi kodgi e chokruoge. Obiro luwo gima jaode owachono, kata kamano, sama thuolo oneno, onyalo  puonjo nyithinde yore Jehova. (Tich 4:19, 20) Gikone, nyithindogo e ma biro yiero ka be gidwaro lamo Jehova kata ooyo.​—Rap. 30:19, 20. *

11. En ang’o ma nyalo kelo ywaruok e kindi gi wedeni ma ok gin Joneno?

¹¹ Ka ne wachako tudore gi Joneno mag Jehova, samoro ne ok wanyiso wedewa. Kata kamano, kaka yiewa ne medo dongo, ne waneno ni ber ka wanyisogi gik ma wapuonjore e Muma. (Mar. 8:38) Ka chung’ni motegno osekelo ywaruok e kindi gi wedeni ma ok gin Joneno, ne ane moko kuom gik minyalo timo mondo iduok ywaruok ma kamago chien, kendo isik gi winjruok maber gi Nyasaye.

12. Ang’o momiyo wedewa nyalo kwedowa, to ere kaka wanyalo nyiso ni wadewogi?

¹² Tem ane ketori e chal mar wedeni. Kata obedo ni wabedo mamor gi adiera mag Muma ma waseng’eyo, wedewa to nyalo paro ni osewuondwa kata ni din moro magalagala oserundowa. Kata, ginyalo paro ni tinde ok waherogi nikech ok watim kodgi nyasi ma ne wajatimo kodgi ka ne pok wabedo Joneno. Ginyalo bedo gi parruok e wi kaka ngimawa biro chalo. Onego wanyis ni wadewogi kuom temo ketore e chal margi mondo wang’e gadier gik ma chandogi. (Nge. 20:5) Jaote Paulo notemo ahinya mondo ong’e “ji mopogore opogore duto” e ka obed gi nyalo mar yalonegi wach maber. Wan be wanyalo timo kamano sama watudore gi wedewa.​—1 Kor. 9:19-23.

13. Onego wawuo e yo mane gi wedewa ma ok gin Joneno?

¹³ Wuo e yo mang’won. Muma jiwowa niya: “Wecheu mondo obed mang’won.” (Kol. 4:6) Wanyalo kwayo Jehova mondo omiwa rohone maler ma biro konyowa nyiso kido mag roho sama wawuoyo gi wedewa. Kik wamin kodgi wach e wi puonj mag miriambo mantie e dinde ma gilemoe. Ka po ni wechegi kod timbegi ochwanyowa, wanyalo luwo ranyisi mar joote. Paulo nondiko niya: “Sama ji yanyowa, waguedhogi; sama isandowa, wanano; sama ji ketho nyingwa, wadwoko gi muolo.”​—1 Kor. 4:12, 13.

14. Gin ber mage ma wanyalo yudo ka wasiko ka wan-gi timbe mabeyo?

¹⁴ Bed gi timbe mabeyo. Kata obedo ni wechewa mang’won nyalo konyo sama wedewa kwedowa, timbewa mabeyo to nyalo konyo kama duong’. (Som 1 Petro 3:1, 2, 16.) Omiyo, tim gik ma nyalo miyo wedeni ong’e ni Joneno mag Jehova gin joma kend margi dhi maber, girito nyithindgi e yo maber, kit ngimagi ler, kendo gin gi chuny mokuwe. Kata ka po ni wedewa ok bi rwako adiera, wabedo mamor nikech wamoro Jehova kuom chung’ motegno.

15. Ere kaka wanyalo timo ikruok chon mondo kik wadonjre e gik ma nyalo kelo ywaruok?

¹⁵ Bed moikore. Par chon gik ma nyalo kelo ywaruok, kendo item nono kaka inyalo nyagori kodgi. (Nge. 12:16, 23) Nyaminwa moro ma wuok Australia wacho kama: “Wuon jaoda ne ok dwar Joneno ahinya. Ka pok ne wadhi lime, ne walemoga mondo Jehova okonywa wawuo kode e yo mang’won kata e seche mobedo mager. Ne waikoga gik ma ne wadhi wacho mondo mbaka odhi nyime maber. Ne waketoga kinde ma ne wadhi kawo ka walime mondo kik wabed gi  mbaka mabor ma nyalo miyo wawuo e wi weche din ma nyalo kelo ywaruok.”

16. Ang’o ma wanyalo timo sama chunyi chandore nikech ok itim dwach wedeni?

¹⁶ En adier ni ok inyal geng’o ywaruok duto ma nyalo bedo e kindi gi wedeni ma ok Joneno. Nikech ihero wedeni kendo isebedo kitemo ahinya mondo imorgi, ywaruok ma kamago nyalo miyo chunyi ochandre. Ka po ni gima kamano timoreni, tem matek mondo iket makruokni gi Jehova obed mokwongo moloyo wedeni. Okang’ ma kamano biro miyo wedeni one ni kare makruok gi puonj mag Muma en gima duong’ ahinya e ngima. Kata bed ni weche chal nade, ng’e maler ni ok inyal chuno ji mondo oher adiera. Kar mano, we gine ber mar tiyo ne Jehova kokalo kuom timbeni. Nyasachwa ma jahera miyogi thuolo mar yiero yo ma gibiro luwo e ngimagi mana kaka wan be omiyowa thuolo ma kamano.​—Isa. 48:17, 18.

17, 18. Ere kaka wanyalo nyagore gi lit ma bedoe sama achiel kuom joodwa oweyo Jehova?

¹⁷ Sama achiel kuom joodu ogol e kanyakla, kata oweyo adiera kende owuon, wachno nyalo chuowi malit mana ka ligangla. Ere kaka inyalo nyagori gi litno?

¹⁸ Dhi nyime bedo modich e weche Nyasaye. Som Muma pile, ikri maber ne chokruoge kendo idhi e chokruogego ma ok ibari, dhi e tij lendo, kendo lem mondo Nyasaye omiyi teko mar nano. (Juda 20, 21) To nade ka itimo gigo duto te, to pod iwinjo ka chunyi lit alita? Kik iol! Bedo gi chenro maber e weche Nyasaye nyalo konyi tayo pachi kod chunyi. Par ane ranyisi mar jal ma ne ondiko Zaburi sula mar 73. Ne osebedo gi paro ma ok kare, kendo mano ne miyo chunye chandore. Gima ne okonye loko pache ne en dhi e od Jehova. (Zab. 73:16, 17) Bedo modich e weche Nyasaye nyalo konyi in be.

19. Ere kaka wanyalo nyiso ni wariwo lwedo kum mowuok kuom Jehova?

¹⁹ Riw lwedo kum mowuok kuom Jehova. Kata obedo ni wawinjoga malit sama ogol achiel kuom joodwa e kanyakla, kum ma kamano bang’e nyalo kelo ne ji duto ber, moriwo nyaka jarichono. (Som Jo-Hibrania 12:11.) Jehova chikowa ni kik ‘wabed kanyakla’ gi ng’ama otimo richo to otamore lokore. (1 Kor. 5:11-13) Kata ka wawinjo lit ma romo nade, ok wabi tudore gi ng’at ma kamano, obed e yor simu, sms, barua, e-mail, kata kuonde mitudruokie gi osiepe e intanet (social media).

20. En geno mane ma ok rach ka wabedogo?

²⁰ Bed gi geno. Hera ‘bedo gi geno kuom weche duto’ moriwo nyaka bedo gi geno ni jogo moweyo Jehova chieng’ moro nyalo duogo ire. (1 Kor. 13:7) Ka ineno ka achiel kuom joodu ma nogol e kanyakla osechako loko chunye, ok rach ka ikwayo Jehova mondo okonye ‘oduog ire.’​—Isa. 44:22.

21. Ang’o monego itim ka joodu kwedi nikech iluwo Yesu?

²¹ Yesu ne owacho ni ka wawinjo dhano moro amora moloyo winje, ok wawinjore luwe. Kata kamano, ne en gadier ni jopuonjrene ne dhi bedo gi chir mar makruok motegno kode kata obedo ni wedegi ne dhi kwedogi. Ka luwo Yesu osekelo “ligangla” e odu, dhi mana nyime geno kuom Jehova mondo okonyi nyagori gi pekgo e yo makare. (Isa. 41:10, 13) Bed mamor nikech Jehova gi Yesu mor kodi, kendo gibiro miyi mich nikech chung’ni motegno.