1, 2. a) Bõe yĩng tɩ d tõe n yeel tɩ baa rũndã-rũndã menga, d tara laafɩ? b) Bõe n kɩt tɩ nan pa laafɩ zãng-zãnga? (Ges-y fotã sẽn be yĩngrã.)

TÕND fãa ratame n vɩ tɩ laafɩ la bãan beẽ, tɩ yɩɩr kaẽ ye. D sũur nooma d sẽn paam tɩ Wẽnnaam kõ-d a laafɩ wã. “Wẽnnaam laafɩ wã” yaa sũur pʋgẽ bãan sẽn sõngd tõnd tɩ d ra tall tags-kɛga, wall tagsa sẽn sãamd sũur ye. (Fili. 4:6, 7) D sẽn dɩk d meng n kõ Wẽnnaam n tũud-a wã me kɩtame tɩ d tar laafɩ ne-a, rat n yeel tɩ d tara “zems-n-taar ne Wẽnnaam,” n yaa a zo-rãmba.—Rom. 5:1.

² La wakat ning Wẽnnaam sẽn na n kɩt tɩ bãan zĩnd zĩig fãa wã nan pa ta ye. Tõnd sẽn be yaoolem wakatã, neb wʋsg yaa sũ-tʋʋlem dãmba, tɩ zĩig fãa me yaa zaba. (2 Tɩm. 3:1-4) Sẽn paase, tõnd sẽn yaa kiris-nebã, d segd n zaba ne a Sʋɩtãana, la d mao n da sak ziri wã a sẽn yelgdã ye. (2 Kor. 10:4, 5) La bũmb sẽn tõe n wa ne yɩɩr n tɩ yɩɩda, yaa d zakã rãmb sã n namsd tõnd d sẽn tũud a Zeova wã yĩnga. B tõe n yaanda tõndo, wall b yeel tɩ d welgda zakã. B pʋd n tõe n yeelame tɩ  d sã n pa bas d tũudmã, b na n yiis-d-la buudu. D zakã rãmb sã n pa rat tɩ d tũ a Zeova, d manesem segd n yɩɩ wãna? Bõe n na n sõng-d tɩ d ket n tar sũur pʋgẽ bãane?

3, 4. a) A Zeezi sẽn zãms nebã bũmb ningã wata ne bõe? b) Sẽn yɩɩd fãa, bõe n tõe n wa kɩt tɩ pa yɩ nana ne ned t’a kell n tũ a Zeezi?

³ A Zeezi ra miime tɩ pa nebã fãa n na n sak n yɩ yẽ karen-biisi, la tɩ yaa tɩlɛ t’a karen-biisã tall raoodo, bala b na n nams-b-la tũudmã yĩnga. Rẽ tõe n waa ne welgre, baa zagsã pʋsẽ. Ad a Zeezi sẽn yeele: “Ra tags-y tɩ mam waame tɩ bãan na zĩnd tẽng zug ye. Mam ka wa ne bãan ye, la yaa ne zabr sʋʋga. Bala mam waame n na n kɩt tɩ welgr zĩnd rao ne a baaba sʋka, bi-pugl ne a ma sʋka, bi-pag ne a sɩd ma sʋka, la ned yir dãmb meng n na n yɩ a bɛɛba.”—Mat. 10:34-36.

⁴ A Zeezi sẽn yeel tɩ b ‘ra tags tɩ yẽ waame tɩ bãan zĩndã,’ rat n yeelame tɩ bõe? Yaa sẽn na n sõng nebã tɩ b bãng tɩ b sã n lebg yẽ karen-biisi, pa wakat fãa la na n yɩ laafɩ ye. Yaa sɩd t’a Zeezi sẽn da rat yaa taas nebã Wẽnnaam koɛɛgã lakae, pa nebã welgr ye. (Zã 18:37) Baasgo, ned sã n dat n kell n yɩ a Zeezi karen-biiga, pa wakat fãa la na n yɩ nana, sẽn yɩɩd fãa, a zakã rãmb wall a zo-rãmb sã n pa sak n na n tũ a Zeova.

5. Zu-loe-bʋg la sẽn tũud-b a Zeezi wã paamda?

⁵ A Zeezi yeelame tɩ yaa tɩlɛ tɩ sẽn tũud-b yẽ wã sak n tõog toogo, b zagsã rãmb sã n wa namsd-b b tũudmã yĩnga, la b tõog toog zu-loees a taab pʋgẽ me. (Mat. 10:38) Sɩd me, sẽn tũud-b a Zeezi wã zags rãmb yaal-b lame, wall b pʋd n rig-ba, pa rẽ bɩ n yiis-b buudu, la b tõoga toog sẽn na yɩl n ta a Zeezi yam. Bark nins b sẽn paamã yɩɩda b sẽn bõnã hal zĩig sẽn zãre.—Karm-y Mark 10:29, 30.

6. D zakã rãmb sã n pa rat tɩ d tũ a Zeova, bõe la d segd n tẽege?

⁶ Baa d zakã rãmb sã n pa rat tɩ d tũ a Zeova, d ket n nong-b lame. La d pa segd n yĩm tɩ yaa a Zeova ne Kiristã la d segd n nong n yɩɩd ye. (Mat. 10:37) Yɩta sõma me tɩ d tẽeg t’a Sʋɩtãan sẽn mi tɩ d nonga d zakã rãmbã, a tõe n tũnuga ne rẽ n kɩt tɩ d pa kell n maan sɩd ne a Zeova ye. D gom zu-loees a wãn yelle, la d ges d sẽn tõe n maan to-to n tõog toogo.

7. Y pagã wall y sɩdã sã n pa tũud a Zeova, bõe la y segd n tẽege?

⁷ Biiblã yeela vẽeneg tɩ sẽn kẽ-b kãadmã “na n paama yel-pakre.” (1 Kor. 7:28) Y pagã wall y sɩdã sã n pa tũud a Zeova, tõe n paasa kãadmã pʋgẽ zu-loeesã. La togame tɩ y tẽeg t’a Zeova yeelame tɩ d pa segd n bas d pag wall d sɩda, a sẽn pa kiris-ned yĩng ye. (1 Kor. 7:12-16) Saam-bi-poak sɩd sã n pa a Zeova Kaset soaba, a segd n ket n waoogd-a lame, bala yẽ la zakã soaba, baa a sẽn pa lʋɩt taoor n sõngd a zakã rãmb a Zeova tũudmã pʋgẽ wã. Saam-biig me pag sã n pa tũud a Zeova, yaa tɩlɛ t’a ket n nong-a ne a sũur fãa, la a get a yell sõma.—Efɛ. 5:22, 23, 28, 29.

8. Y to wã sã n pa rat tɩ y maan y tũudmã yɛl kẽer wa y sẽn datã, bõe la y tõe n sok y menga?

⁸ La y to wã sã n pa rat tɩ y maan y tũudmã yɛl kẽer wa y sẽn datã, y maanda wãna? Wala makre, saam-bi-poak a ye sɩd n yãk ray takɩ a sẽn tar sor n tõe n moon koɛɛgã. Yãmb me sã n bee zu-loɛɛg a woto buud pʋgẽ, bɩ y sok y meng yaa: ‘Rẽ yĩnga, a ratame tɩ m tolg n bas a Zeova tũub bɩ? Sã n pa rẽ la a rata, m tõe n maana bũmb ning a sẽn yeelã bɩ?’ Y sã n yaa sũ-bʋgsem dãmb la wʋmdba, na n sõngame tɩ zu-loees wʋsg ra zĩnd y kãadmã pʋgẽ ye.—Fili. 4:5.

9. Bõe la kiris-ned tõe n maan n sõng a kambã tɩ b waoogd b roagd ning sẽn pa tũud a Zeova wã?

⁹ Y pagã wall y sɩdã sã n pa tũud a Zeova, wakat ninga yaa toog tɩ y wub y kambã wa y sẽn datã. Wala makre, y tõe n dat n sõnga y  kambã tɩ b tũ noor ning Biiblã sẽn kõ-ba, n yetẽ tɩ b ‘waoog b ba la b ma’ wã. (Efɛ. 6:1-3) La y pagã wall y sɩdã sã n pa tũud Biiblã noyã, y maanda wãna? Y segd n ket n waoogd-a lame. Rẽ, y kõta y kambã mak-sõngo. Tagsd-y-yã a zʋg-sõma wã yelle, la y pʋʋsd-a barka, bõn-sõma nins a sẽn maand zakã rãmb neer yĩngã. Ra n tol-y n gom-y-yã a yell wẽng y kambã taoor ye. Yɩta sõma meng tɩ y wilg-b tɩ yaa ned kam fãa n yãkd a sã n na n tũu a Zeova. Y sã n wilg y kambã tɩ b waoogd b roagd ning sẽn pa tũud a Zeova wã, b mak-sõngã tõe n kɩtame t’a wa sak n tũ a Zeova.

10. Y to wã sã n pa tũud a Zeova, wãn to la y tõe n sõng y kambã tɩ b wa nong a Zeova?

¹⁰ Wakat ninga, roagd ning sẽn pa a Zeova Kaset soabã tõe n datame tɩ kambã naag n maan ziri tũudmã yɛl kẽere, wall a rat n zãms-b bũmb sẽn pa zems ne Biiblã sẽn yetã. Sã n yaa raoã n pa tũud a Zeova, tõe t’a na n gɩdga pagã t’a ra zãms b kambã Biiblã ye. Baa sã n wa yaa woto, pagã segd n maana a sẽn tõe fãa, n sõng kambã tɩ b bãng Biiblã sẽn yetã. (Tʋʋ. 16:1; 2 Tɩm. 3:14, 15) Wala makre, raoã tõe n yeela saam-bi-poakã t’a pa rat n yã-a t’a zãmsd kambã Biiblã, wall a tall-b n kẽng tigissã ye. Baa a sẽn pa na n kɩɩs a sɩdã noorã, a na n tũnuga ne segb buud toor-toor n gom Biiblã yell ne a kambã. Woto, a na n sõng-b lame tɩ b bãng a Zeova, la b bãng sõma ne wẽng n bake. (Tʋʋ. 4:19, 20) La yaa kambã meng n na n wa yãk b sã n na n tũu a Zeova.—Tõo. 30:19, 20. *

11. Bõe n tõe n wa kɩt tɩ ned ne a zak rãmb moor pa le noomẽ?

¹¹ Tõe tɩ y sẽn wa n sɩng Biiblã zãmsg ne a Zeova Kaset rãmbã, y pa togs y zakã rãmb ye. La y tẽebã sẽn wa n tar paasgã, y mikame tɩ yaa tɩlɛ tɩ y togs-b tɩ y yãka yam n na n tũ a Zeova. (Mark 8:38) Rẽ sã n kɩtame tɩ yãmb ne y zakã rãmb moor pa le noomẽ, ad bũmb a wãn y sẽn tõe n maan n bao laafɩ ne-ba, la y kell n maan sɩd me ne a Zeova.

12. D zakã rãmb sã n pa rat tɩ d tũ a Zeova, tõe tɩ yaa bõe yĩnga? Wãn to la d tõe n wilg tɩ d yaa wʋmdba?

¹² Ning-y y meng b zĩigẽ. Tõnd sẽn paam n bãng Biiblã sẽn yetã, d sũur nooma hal wʋsgo. La tõe tɩ d zakã rãmb tagsdame tɩ b belga tõndo, wall tɩ d tɩ kẽe tũudum sẽn pa sõma. B tõe n tagsdame tɩ d sẽn pa le naagd-b n maand kibs-rãmbã, yaa d sẽn pa le nong-bã yĩnga. B tõe n pʋd n yɛɛsda Wẽnnaam na n wa sɩbg tõnd d kũum poore. D ning d meng b zĩigẽ, n tags n ges yellã sẽn namsd-b to-to wã, la d kelg-b neer n bãng b sẽn maand yɩɩrã võore. (Yel. 20:5) Rẽ wɛɛngẽ, d tõe n dɩka tʋm-tʋmd a Poll togs-n-tare. A yeelame tɩ yẽ ‘maana a meng tɩ yɩ bũmb fãa, nebã fãa yĩnga,’ sẽn na yɩl n taas-b koe-noogã.—1 Kor. 9:19-23.

13. Baa d zakã rãmb sã n pa tũud a Zeova, wãn to la d segd n gomd ne-ba?

¹³ Sõsd-y ne-b ne bʋgsem. Biiblã yeelame: “Kɩt-y tɩ yãmb goam tall bark wakat fãa n tar yamsem noom.” (Kol. 4:6) D tõe n pʋʋsa a Zeova n kos t’a sõng-d tɩ d bɩɩs zʋg-sõma nins a vʋʋsem sõngã sẽn sõngd ned t’a tallã, n tõog n gomd ne d zakã rãmb ne bʋgsem. D pa segd n baood wakat fãa n na n wilg tɩ b sẽn tẽedã yaa ziri ye. B sã n maan bũmb wall b yeel bũmb tɩ zabd tõndo, d tõe n dɩka tʋm-tʋmdbã togs-n-taare. A Poll yeelame: “Nebã tʋʋda tõndo, la tõnd ningd-b-la barka. Neb namsda tõndo, la tõnd sakda rẽnda. Hal tɩ ta moasã neb kãnegda tõndo, la tõnd belsda nebã.”—1 Kor. 4:12, 13.

14. D sã n zãad d mengã sõma, nafa wã na n yɩɩ bõe?

¹⁴ Kell-y n tall-y yel-manesem sẽn yaa sõma. Yaa sɩd tɩ d sã n gomd ne d zakã rãmb ne bʋgsem, tõe n sõngame. La yaa d sã n tar yel-manesem sẽn yaa sõma la na n sõng n yɩɩda. (Karm-y 1 Pɩyɛɛr 3:1, 2, 16.) Bɩ y mao tɩ y mak-sõngã kɩt tɩ y zakã rãmb neẽ t’a Zeova Kaset rãmbã sʋka, pagbã ne b sɩdbã zĩid-n-taarã noomame, roagdbã geta b kambã yell sõma, ned kam fãa zãada a meng sõma, tɩ b vɩɩmã tar barka. Baa d zakã rãmb sã n pa wa sak n na n tũ a Zeova, d sũur na n yɩɩ noog d sẽn mi tɩ d kell n talla yel-manesem sẽn tat a Zeova yamã.

15. Wãn to la d tõe n pĩnd n segl d menga, tɩ d sã n wa sõsd ne d zakã rãmb bɩ no-koeemd ra zĩndi?

¹⁵ Pĩnd-y n segl-y y menga. D tags n ges yɛl nins sẽn tõe n wa ne mo-yõs tõnd ne d zakã rãmb sʋkã, la d bʋgs n ges d sẽn tõe n maanega. (Yel. 12:16, 23) Saam-bi-poak sẽn be Ostrali yeelame: “Mam sɩdã baaba pʋd n da pa rat tɩ tõnd tũ a Zeova ye. Nand tɩ d bool-b telefonnẽ, maam ne m sɩdã rengd n pʋʋsa a Zeova t’a sõng-d tɩ d sã n wa sõsd bɩ d ra yik d sũur ye. D rengd n tagsa d sẽn na n gom bũmb ning yelle, tɩ sõsgã yɩ noog-noogo. Sẽn na yɩl n da wa sõs n kaoose, n wa kẽ tũudmã yɛl goam tɩ wa ne no-koɛɛma, d yãkda d sẽn na n sõs n tek wakat ninga.”

16. Mo-yõs sã n be tõnd ne d zakã rãmb sʋk d tũudmã yĩnga, bõe n na n sõng-d tɩ d ra ning d meng taale?

¹⁶ Yaa sɩd tɩ d pa tõe tɩ mo-yõsr ra zĩnd  tõnd ne d roagdb nins sẽn pa tũud a Zeova wã sʋk ye. Mo-yõsr sã n wa beẽ, d tõe n ningda d meng taale, bala d nonga d zakã rãmba, n dat n noog b sũuri. Sã n wa yaa woto, tẽeg-y tɩ yaa a Zeova la y segd n nong n yɩɩda, la tɩ yaa yẽ la y segd n sakd n yɩɩd y zakã rãmba. B sã n yã y sẽn sakd a Zeova ne y sũur fãa wã, tõe n sõng-b lame tɩ b bãng tɩ y pa reemd ne a Zeova tũudmã ye. Ra n yĩm-y tɩ y pa tõe n modg ned t’a sak n tũ a Zeova ye. La b sã n yã a Zeova noyã tũub sẽn nafd yãmb to-to wã, tõe n sõng-b lame. A Zeova kõo bãmb me sor tɩ b tõe n yãk yam n tũ-a wa tõndo.—Eza. 48:17, 18.

17, 18. Y zakã ned sã n bas a Zeova, bõe n na n sõng-y tɩ y tõog toogo?

¹⁷ B sã n yiisa y zakã ned tigingã pʋgẽ, wall yaa a mengã n yãk yam n bas a Zeova, zabda wa b sẽn kõs ned ne sʋʋga. Bõe n tõe n sõng-y tɩ y tõog toogo?

¹⁸ Ket-y n wɩngd-y ne a Zeova tʋʋmdã. Y sã n wa be yell a woto pʋgẽ, yaa tɩlɛ tɩ y keng y tẽebã. Karemd-y Biiblã daar fãa, n kẽnd tigissã n pa vaandẽ la y segend tigsg fãa sõma, n wɩngd ne koɛɛgã mooneg me, la y pʋʋsd a Zeova n kotẽ t’a kõ-y pãng tɩ y tõog toogo. (Zʋʋd 20, 21) La yãmb sã n wa getẽ tɩ y maanda bõn-kãensã fãa y we n maan bala, la tɩ y pa paamd sũ-noog a pʋgẽ? Ra koms-y raood n bas ye! Ket-y n wɩngd-y ne a Zeova tʋʋmã. Rẽ na n sõng-y lame tɩ y sũ-sãangã booge, la sõng-y tɩ y ra tagsd yɛl sẽn komsd raood ye. Woto sõnga sẽn gʋls-a Yɩɩn-sõamyã 73 soabã. Wakat n zĩnd t’a sũurã ra sãam hal wʋsgo. La a kẽnga Wẽnnaam sɛk-roogẽ wã, tɩ sõng-a t’a bas a tags-kɛgã. (Yɩɩn. 73:16, 17) Yãmb me sã n kell n tũ a Zeova ne y sũur fãa, na n sõng-y lame.

19. Wãn to la d tõe n wilg tɩ d sakda a Zeova kiblgã?

¹⁹ Sak-y-yã a Zeova kiblgã. A Zeova sã n kibl neda, a miime tɩ na n nafa a soabã la neb a taaba. Yaa sɩd tɩ kiblgã wata ne sũ-sãanga. La tõe n sõnga a soabã t’a lebg n wa a Zeova nengẽ. (Karm-y Ebre-rãmb 12:11.) D segd n saka a Zeova sẽn yeel tɩ d “ra paam lagem-n-taar” ne sẽn maan-b yel-wẽn n pa rat n tek yam n kos sugrã. (1 Kor. 5:11-13) Yaa sɩd tɩ pa nana ye. La d segd n gũusame n da wa boond ned b sẽn yiis tigingã pʋgẽ telefonnẽ, wall d toond-a mesaaz-rãmba, lɛta, pa rẽ bɩ d tũnugd ne ẽntɛrnetã n sõsd ne-a tɩ sã n pa wa n yaa tɩlɛ ye.

20. Bõe la d tõe n ket n saagdẽ?

²⁰ Tẽ-y manegre. Ket-y n saagdẽ tɩ y nedã na n lebg n waa a Zeova nengẽ, bala nonglem “tara saag-sõng ne bũmb fãa.” (1 Kor. 13:7) Y sã n gũus n yã tɩ y nedã tara manesem sẽn wilgd t’a sɩnga yam tekre, y tõe n pʋʋsa a yĩng sẽn na yɩl t’a tõog n karemd Biiblã la a zãmsd-a, n paam raood n sak a Zeova sẽn boond-a t’a ‘lebg n wa yẽ nengẽ’ wã.—Eza. 44:22.

21. Y sẽn tũud a Zeezi wã sã n kɩt tɩ yãmb ne y zakã rãmb pa le noomẽ, bõe la y segd n maane?

²¹ A Zeezi yeelame tɩ d sã n nong ninsaal n yɩɩd yẽnda, pa zems tɩ d yɩ yẽ karen-biig ye. La a ra kɩsa sɩd tɩ sẽn tũud-b yẽ wã na n talla raoodo, n kell n maan sɩd ne yẽ, baa b zagsã rãmb sã n pa rat tɩ b yɩ yẽ karen-biisi. Y sẽn tũud a Zeezi wã sã n kɩt tɩ yãmb ne y zakã rãmb pa le noomẽ, bɩ y teeg a Zeova t’a sõng-y tɩ y tõog toogo. (Eza. 41:10, 13) Maan-y sũ-noogo, y sẽn mi t’a Zeova ne a Zeezi sũy nooma y sẽn ket n maan sɩd ne-bã, la tɩ b na n ning-y-la barkã.