အမှန်တရားက “ငြိမ်သက်ခြင်းအစား ဓားကို” ယူဆောင်လာ
“ကမ္ဘာမြေပေါ် ငြိမ်သက်ခြင်းကို ကျွန်တော် ယူဆောင်လာတယ်လို့ မထင်ကြနဲ့။ ငြိမ်သက်ခြင်းအစား ဓားကို ယူဆောင်လာတယ်။”—မ. ၁၀:၃၄။
၁၊ ၂။ (က) အခု ဘယ်ငြိမ်သက်ခြင်းမျိုး ခံစားနေနိုင်သလဲ။ (ခ) ဒီအချိန်မှာ အေးချမ်းငြိမ်သက်မှု အပြည့်အဝ မခံစားရအောင် ဘာက တားဆီးနေသလဲ။ (ဆောင်းပါးအစမှာပါတဲ့ ရုပ်ပုံကို ကြည့်ပါ။)
ကျွန်တော်တို့အားလုံး စိုးရိမ်ပူပန်မှု ကင်းပြီး ငြိမ်းချမ်းတဲ့ အသက်တာ လိုချင်ကြတယ်။ ယေဟောဝါက ကျွန်တော်တို့ကို “ဘုရားသခင့် ငြိမ်သက်ခြင်း” ပေးထားလို့ ကျေးဇူးတင်စရာပဲ။ အဲဒါက စိုးရိမ်သောက၊ ပူပန်မှုတွေကနေ ကာကွယ်ပေးတယ်။ (ဖိ. ၄:၆၊ ၇) ယေဟောဝါဆီ ဆက်ကပ်အပ်နှံထားတဲ့အတွက် “ဘုရားသခင်နဲ့ အမြဲ ခင်မင်ရင်းနှီး” တဲ့ ဆက်ဆံရေးကောင်း ပိုင်ဆိုင်နေကြတယ်။—ရော. ၅:၁။
၂ ဒါပေမဲ့ လုံးလုံး ငြိမ်သက်အေးချမ်းတဲ့အချိန် ရောက်မလာသေးဘူး။ ခက်ခဲကျပ်တည်းတဲ့ ဒီနောက်ဆုံးကာလမှာ ပဋိပက္ခတွေ ပြည့်နှက်နေတယ်။ လူများစွာမှာ ရန်လိုတဲ့သဘောထားတွေ ရှိနေကြတယ်။ (၂ တိ. ၃:၁-၄) စာတန်နဲ့ မှားယွင်းတဲ့ သွန်သင်ချက်တွေကို ကျွန်တော်တို့ ခရစ်ယာန်တွေ တိုက်လှန်နေရတယ်။ (၂ ကော. ၁၀:၄၊ ၅) ဒါပေမဲ့ ကျွန်တော်တို့ရဲ့ အေးချမ်းငြိမ်သက်မှုကို ပျက်ပြားစေတဲ့ အကြီးမားဆုံးခြိမ်းခြောက်မှုက မယုံကြည်သူ ဆွေမျိုးသားချင်းတွေဆီက ပေါ်လာနိုင်တယ်။ တချို့က ကျွန်တော်တို့ရဲ့ ယုံကြည်ချက်တွေကို ကဲ့ရဲ့ကြမယ်။ မိသားစု ဖြိုခွဲသူလို့ စွပ်စွဲကြမယ်။ ယုံကြည်ခြင်းကို မစွန့်ရင် ကျွန်တော်တို့ကို စွန့်ပစ်မယ်လို့ ခြိမ်းခြောက်ကြမယ်။ မိသားစု ဆန့်ကျင်မှုကို ဘယ်လို ရှုမြင်သင့်သလဲ။ ဖြစ်ပေါ်လာမယ့် အခက်အခဲတွေကို အောင်မြင်စွာ ဘယ်လို ရင်ဆိုင်ဖြေရှင်းနိုင်မလဲ။
မိသားစု ဆန့်ကျင်မှု
၃၊ ၄။ (က) ယေရှုရဲ့ သွန်သင်ချက်တွေက ဘာအကျိုးဆက်တွေ ဖြစ်ပေါ်စေနိုင်သလဲ။ (ခ) ယေရှုနောက် လိုက်ဖို့ ဘယ်အချိန်မှာ အထူးသဖြင့် ခက်ခဲမလဲ။
၃ ယေရှုဟာ မိမိရဲ့ သွန်သင်ချက်တွေက လူတွေကို ကွဲပြားစေမယ်၊ ဆန့်ကျင်မှုကို ရင်ဆိုင်နိုင်အောင် နောက်လိုက်တွေ ရဲစွမ်းသတ္တိရှိဖို့ လိုမယ်ဆိုတာ သိထားတယ်။ ဒီဆန့်ကျင်မှုက မိသားစုဝင်တွေရဲ့ သင့်မြတ်ငြိမ်သက်တဲ့ ဆက်ဆံရေးကို ထိခိုက်စေနိုင်တယ်။ “ကမ္ဘာမြေပေါ် ငြိမ်သက်ခြင်းကို ကျွန်တော် ယူဆောင်လာတယ်လို့ မထင်ကြနဲ့။ ငြိမ်သက်ခြင်းအစား ဓားကို ယူဆောင်လာတယ်။ အဖေနဲ့ သား၊ အမေနဲ့ သမီး၊ ယောက္ခမနဲ့ ချွေးမ စိတ်ဝမ်းကွဲပြားစေဖို့ ကျွန်တော် ရောက်လာတာ။ ကိုယ့်အိမ်သူအိမ်သားတွေဟာ ကိုယ့်ရန်သူ ဖြစ်လိမ့်မယ်” လို့ ယေရှုပြောတယ်။—မ. ၁၀:၃၄-၃၆။
၄ “ကမ္ဘာမြေပေါ် ငြိမ်သက်ခြင်းကို ကျွန်တော် ယူဆောင်လာတယ်လို့ မထင်ကြနဲ့” လို့ ပြောတဲ့အခါ မိမိနောက် လိုက်ခြင်းကြောင့် ကြုံတွေ့ရနိုင်တဲ့ အကျိုးဆက်တွေကို စဉ်းစားဖို့ လိုကြောင်း နားထောင်နေသူတွေကို ပြောနေတာဖြစ်တယ်။ ယေရှုရဲ့ သတင်းက လူတွေကို ကွဲပြားစေနိုင်တယ်။ ဒါပေမဲ့ ယေရှုရဲ့ ရည်ရွယ်ချက်က လူတွေရဲ့ ဆက်ဆံရေးကို ဖျက်ဆီးဖို့ မဟုတ်ဘဲ ဘုရားသခင့် အမှန်တရားသတင်း ကြေညာဖို့ ဖြစ်တယ်။ (ယော. ၁၈:၃၇) မိတ်ဆွေတွေ၊ မိသားစုဝင်တွေ အမှန်တရားကို ငြင်းပယ်တယ်ဆိုရင် ခရစ်တော်ရဲ့ သွန်သင်ချက်ကို သစ္စာရှိရှိ စွဲကိုင်ထားဖို့ ခက်ခဲနိုင်တယ်။
၅။ ယေရှုရဲ့ နောက်လိုက်တွေ ဘာကြုံတွေ့ရမလဲ။
၅ နောက်လိုက်တွေ လိုလိုလားလား ခံရပ်ရမယ့် ဆင်းရဲဒုက္ခတွေထဲမှာ မိသားစု ဆန့်ကျင်မှုကြောင့် ခံစားရမယ့် နာကျင်မှုကိုလည်း ယေရှု ထည့်ပြောခဲ့တယ်။ (မ. ၁၀:၃၈) ခရစ်တော်နဲ့ ထိုက်တန်ကြောင်း သက်သေပြဖို့ တပည့်တွေဟာ ကဲ့ရဲ့လှောင်ပြောင်မှု၊ မိသားစုဝင်တွေရဲ့ စိမ်းကားမှုကိုတောင် ခံရပ်ရမယ်။ ဒါပေမဲ့ ဆုံးၡုံးသွားတာထက် အဆများစွာ ပြန်ရမယ်။—မာကု ၁၀:၂၉၊ ၃၀ ကိုဖတ်ပါ။
၆။ ယေဟောဝါကို ကိုးကွယ်ဖို့ ဆွေမျိုးသားချင်းတွေ ဆန့်ကျင်တဲ့အခါ ဘာကို သတိရ,ရမလဲ။
၆ ယေဟောဝါကို ကိုးကွယ်ဖို့ ကျွန်တော်တို့ရဲ့ ကြိုးစားအားထုတ်မှုကို ဆွေမျိုးသားချင်းတွေ ဆန့်ကျင်ရင်တောင် သူတို့ကို ဆက်ချစ်သွားရမယ်။ ဒါပေမဲ့ ဘုရားသခင်နဲ့ ခရစ်တော်ကို ချစ်တဲ့မေတ္တာက ပထမဖြစ်မှန်း သိထားရမယ်။ (မ. ၁၀:၃၇) မိသားစုသံယောဇဉ်ကို သုံးပြီး ကျွန်တော်တို့ရဲ့ သမာဓိကို ချိုးဖျက်ဖို့ စာတန် ကြိုးစားမယ်ဆိုတာကိုလည်း သိထားရမယ်။ မိသားစု ဆန့်ကျင်မှု ပါဝင်တဲ့ အခြေအနေတချို့နဲ့ အောင်မြင်စွာ ရင်ဆိုင်နိုင်ပုံကို သုံးသပ်ကြည့်ကြရအောင်။
မယုံကြည်တဲ့ အိမ်ထောင်ဖက်
၇။ မယုံကြည်တဲ့ အိမ်ထောင်ဖက်ရှိသူတွေဟာ ကိုယ့်အခြေအနေကို ဘယ်လို ရှုမြင်သင့်သလဲ။
၇ အိမ်ထောင်ပြုသူတွေ “ဘဝဒုက္ခတွေ ကြုံတွေ့ရ” မယ်လို့ ကျမ်းစာမှာ သတိပေးထားတယ်။ (၁ ကော. ၇:၂၈) မယုံကြည်တဲ့ အိမ်ထောင်ဖက် ရှိတယ်ဆိုရင် ဖိစီးမှု၊ စိုးရိမ်ပူပန်မှု ပိုကြုံရနိုင်တယ်။ ဒါပေမဲ့ ကိုယ့်အခြေအနေကို ယေဟောဝါ ရှုမြင်သလို ရှုမြင်တတ်ဖို့ အရေးကြီးတယ်။ ခရစ်တော်နောက် အိမ်ထောင်ဖက် မလိုက်ချင်တာက ခွဲနေဖို့၊ ကွာရှင်းဖို့ ခိုင်လုံတဲ့ အကြောင်းပြချက် မဟုတ်ဘူး။ (၁ ကော. ၇:၁၂-၁၆) မယုံကြည်တဲ့ ခင်ပွန်းဟာ ဘုရားရေးရာကိစ္စတွေမှာ ဦးမဆောင်နိုင်ပေမဲ့ အိမ်ထောင်ဦးစီးဆိုတဲ့ အနေအထားကြောင့် လေးစားမှု ရသင့်တယ်။ မယုံကြည်တဲ့ ဇနီးလည်း ခရစ်ယာန်ခင်ပွန်းရဲ့ ကိုယ်ကျိုးစွန့်မေတ္တာနဲ့ ချစ်ခင်တွယ်တာမှု ရရှိသင့်တယ်။—ဧ. ၅:၂၂၊ ၂၃၊ ၂၈၊ ၂၉။
၈။ အိမ်ထောင်ဖက်က ကိုယ့်ကိုးကွယ်မှုကို ကန့်သတ်ပိတ်ပင်လာရင် ကိုယ့်ကိုယ်ကိုယ် ဘယ်မေးခွန်းတွေ မေးနိုင်သလဲ။
၈ အိမ်ထောင်ဖက်က ကိုယ့်ရဲ့ ကိုးကွယ်မှုကို ကန့်သတ်ပိတ်ပင်မယ်ဆိုရင်ကော။ ဥပမာ၊ ညီအစ်မတစ်ယောက်ကို ခင်ပွန်းက တချို့ရက်တွေမှာပဲ အမှုဆောင်လုပ်ငန်းမှာ ပါဝင်ဖို့ ခွင့်ပြုတယ်ဆိုပါစို့။ အဲဒီလို အခြေအနေမျိုး ကြုံရတယ်ဆိုရင် ‘ငါ့အိမ်ထောင်ဖက်က ဘုရားသခင်ကို မကိုးကွယ်ဖို့ တားဆီးနေတာလား။ မဟုတ်ဘူးဆိုရင် သူ့တောင်းဆိုချက်ကို လိုက်လျောနိုင်မလား’ လို့ ကိုယ့်ကိုယ်ကိုယ် မေးပါ။ အကျိုးသင့်အကြောင်းသင့်သဘောက မလိုအပ်တဲ့ အိမ်ထောင်ရေး ပြဿနာတွေကို ရှောင်ရှားစေနိုင်တယ်။—ဖိ. ၄:၅။
၉။ မယုံကြည်တဲ့ မိဘကို ရိုသေဖို့ သားသမီးတွေကို ခရစ်ယာန်တွေ ဘယ်လို သင်ပေးနိုင်သလဲ။
၉ မယုံကြည်တဲ့ အိမ်ထောင်ဖက်ရှိတယ်ဆိုရင် သားသမီးတွေကို ဧ. ၆:၁-၃) ဒါပေမဲ့ အိမ်ထောင်ဖက်က ကျမ်းစာရဲ့ မြင့်မားတဲ့စံနှုန်းတွေအတိုင်း မကျင့်ဘူးဆိုရင်ကော။ အိမ်ထောင်ဖက်ကို ရိုသေခြင်းအားဖြင့် ပုံသက်သေပြပါ။ အိမ်ထောင်ဖက်ရဲ့ အရည်အသွေးကောင်းတွေကို အာရုံစိုက်ပါ။ လေးမြတ်ကြောင်း ဖော်ပြပါ။ သားသမီးတွေရှေ့မှာ အိမ်ထောင်ဖက်ရဲ့ မကောင်းကြောင်း မပြောမိပါစေနဲ့။ ယေဟောဝါကို ဝတ်ပြုမပြုဆိုတာ တစ်ဦးစီရဲ့ ရွေးချယ်မှုဖြစ်ကြောင်း ရှင်းပြပါ။ သားသမီးတွေရဲ့ အမူအကျင့်ကောင်းက မယုံကြည်တဲ့ မိဘကို စစ်မှန်တဲ့ ဝတ်ပြုရေးဆီ ဆွဲဆောင်နိုင်တယ်။
လေ့ကျင့်ပေးရာမှာ အထူး ခက်ခဲနိုင်တယ်။ ဥပမာ၊ “မိဘကို ရိုသေပါ” ဆိုတဲ့ ကျမ်းစာ မိန့်မှာချက်ကို နာခံဖို့ သားသမီးတွေကို သင်ပေးရမယ်။ (ဖြစ်နိုင်တဲ့အခါတိုင်း သားသမီးတွေကို ကျမ်းစာအမှန်တရား သင်ပေးပါ (အပိုဒ် ၁၀ ကိုကြည့်ပါ)
၁၀။ ဘာသာရေးကွဲပြားတဲ့အိမ်ထောင်မှာ ခရစ်ယာန်မိဘတွေ ကျမ်းစာအမှန်တရားအကြောင်း သားသမီးတွေကို ဘယ်လို သင်ပေးနိုင်သလဲ။
၁၀ တစ်ခါတလေ မယုံကြည်တဲ့ အိမ်ထောင်ဖက်က သားသမီးတွေကို အယူမှား ပွဲတွေမှာ ပါဝင်ဖို့၊ မှားယွင်းတဲ့ ဘာသာရေး ယုံကြည်ချက်တွေ သင်ယူဖို့ တောင်းဆိုနိုင်တယ်။ သားသမီးတွေကို ကျမ်းစာအကြောင်း မသင်ပေးဖို့ ခရစ်ယာန်ဇနီးသည်ကို တားမြစ်နိုင်တယ်။ အဲဒီလိုအခြေအနေမှာတောင် သားသမီးတွေကို ကျမ်းစာအမှန်တရား သင်ပေးဖို့ အတတ်နိုင်ဆုံး လုပ်ဆောင်နိုင်ပါတယ်။ (တ. ၁၆:၁။ ၂ တိ. ၃:၁၄၊ ၁၅) ဥပမာ၊ အရွယ်မရောက်သေးတဲ့ သားသမီးတွေကို ကျမ်းစာ မသင်ပေးဖို့၊ အစည်းအဝေးတွေ မခေါ်သွားဖို့ သက်သေခံဇနီးသည်ကို ခင်ပွန်းက တားမြစ်နိုင်တယ်။ ခင်ပွန်းရဲ့ ဆုံးဖြတ်ချက်ကို လေးစားကြောင်းပြရင်း အခွင့်အရေးရတိုင်း သားသမီးတွေရှေ့မှာ ကိုယ့်ယုံကြည်ချက်ကို ပြောပြနိုင်တယ်။ ဒီလိုနဲ့ စာရိတ္တကောင်းဖို့ သင်ပေးနိုင်တယ်။ ယေဟောဝါအကြောင်း ပြောပြနိုင်တယ်။ (တ. ၄:၁၉၊ ၂၀) နောက်ဆုံးမှာတော့ ကိုးကွယ်မှုနဲ့ပတ်သက်လာရင် သားသမီးတွေကိုယ်တိုင် ဆုံးဖြတ်ရမှာဖြစ်တယ်။—တရား. ၃၀:၁၉၊ ၂၀။ *
စစ်မှန်တဲ့ ဝတ်ပြုရေးကို ဆန့်ကျင်တဲ့ ဆွေမျိုးသားချင်းများ
၁၁။ သက်သေခံ မဟုတ်တဲ့ ဆွေမျိုးသားချင်းတွေနဲ့ပတ်သက်ပြီး ဘာပြဿနာ ပေါ်လာနိုင်သလဲ။
၁၁ အစပိုင်းမှာတော့ ယေဟောဝါသက်သေတွေနဲ့ ပူးပေါင်းနေတဲ့အကြောင်း မိသားစုတွေကို မပြောပြတာ ဖြစ်နိုင်တယ်။ ဒါပေမဲ့ ယုံကြည်ခြင်း တိုးပွားလာတာနဲ့အမျှ ပွင့်ပွင့်လင်းလင်း ပြောဖို့ လိုမှန်း သိလာတယ်။ (မာ. ၈:၃၈) သတ္တိရှိရှိ ရပ်တည်မှုကြောင့် သက်သေခံ မဟုတ်တဲ့ ဆွေမျိုးသားချင်းတွေနဲ့ ပြဿနာဖြစ်လာရင် ပြဿနာတွေကို လျော့နည်းစေဖို့၊ သမာဓိ ဆက်ထိန်းသိမ်းနိုင်ဖို့ နည်းလမ်းတချို့ကို သုံးသပ်ကြည့်ရအောင်။
၁၂။ မယုံကြည်တဲ့ ဆွေမျိုးသားချင်းတွေ ဘာကြောင့် ဆန့်ကျင်လာနိုင်သလဲ။ သူတို့ကို စာနာကြောင်း ဘယ်လို တင်ပြနိုင်သလဲ။
၁၂ မယုံကြည်တဲ့ ဆွေမျိုးသားချင်းတွေကို စာနာပါ။ သင်ယူသိရှိလာတဲ့ ကျမ်းစာအမှန်တရားကြောင့် ကျွန်တော်တို့ ဝမ်းသာအားရဖြစ်နိုင်ပေမဲ့ ဆွေမျိုးသားချင်းတွေကတော့ ကျွန်တော်တို့ လှည့်စားခံနေရပြီ၊ ယုံကြည်ခြင်း ပြောင်းသွားပြီလို့ တလွဲယူဆနိုင်တယ်။ သူတို့နဲ့အတူ ပွဲနေ့တွေ မကျင်းပတော့တဲ့အတွက် သူတို့ကို မချစ်တော့ဘူးလို့ ထင်သွားနိုင်တယ်။ ကျွန်တော်တို့ရဲ့ ထာဝရကောင်းကျိုးအတွက် စိုးရိမ်ပေးတာမျိုးတောင် ဖြစ်နိုင်တယ်။ သူတို့ရဲ့ ရှုထောင့်ကနေ အခြေအနေတွေကို ကြည့်မြင်ပေးဖို့ ကြိုးစားခြင်း၊ သူတို့ရဲ့ စိတ်ရင်းမှန်နဲ့ စိုးရိမ်ပေးမှုကို ဂရုတစိုက် နားထောင်ပေးခြင်းအားဖြင့် စာနာမှု ပြသင့်တယ်။ (ပညာ. ၂၀:၅) တမန်တော် ပေါလုဟာ သတင်းကောင်း ဟောနိုင်ဖို့ “လူအမျိုးမျိုး” ကို နားလည်ပေးဖို့ ကြိုးစားခဲ့တယ်။ ကျွန်တော်တို့လည်း အလားတူ ကြိုးစားနိုင်ပါတယ်။—၁ ကော. ၉:၁၉-၂၃။
၁၃။ မယုံကြည်တဲ့ ဆွေမျိုးသားချင်းတွေနဲ့ ဘယ်လို ပြောဆိုသင့်သလဲ။
၁၃ နူးညံ့သိမ်မွေ့စွာ ပြောဆိုပါ။ “စကားပြောဆိုတဲ့အခါ အမြဲ ယဉ်ကျေးသိမ်မွေ့ကြပါ” လို့ ကျမ်းစာက ပြောတယ်။ (ကော. ၄:၆) ယေဟောဝါဆီ သန့်ရှင်းသော စွမ်းအားတော် တောင်းခံနိုင်တယ်။ ဒါမှ ဆွေမျိုးသားချင်းတွေနဲ့ စကားပြောတဲ့အခါ စွမ်းအားတော် အရည်အသွေး တင်ပြနိုင်မယ်။ သူတို့ရဲ့ မှားယွင်းတဲ့ ဘာသာရေး ခံယူချက်တွေအကြောင်း အငြင်းမပွားသင့်ဘူး။ ကျွန်တော်တို့ကို ထိခိုက်အောင် ပြောဆိုပြုမူတယ်ဆိုရင် တမန်တော်တွေရဲ့ ပုံသက်သေကို တုပနိုင်ပါတယ်။ “စော်ကားခံရတဲ့အခါ ဆုမွန်ကောင်း တောင်းပေးလိုက်တယ်။ ညှဉ်းဆဲခံရတဲ့အခါ စိတ်ရှည်ရှည်ထားပြီး သည်းခံလိုက်တယ်။ ကုန်းချောခံရတဲ့အခါ ညင်ညင်သာသာပဲ ပြန်ပြောလိုက်တယ်” လို့ ပေါလု ပြောတယ်။—၁ ကော. ၄:၁၂၊ ၁၃။
၁၄။ အမူအကျင့်ကောင်း ထိန်းသိမ်းခြင်းကြောင့် ဘာအကျိုးကျေးဇူးတွေ ရနိုင်သလဲ။
၁၄ အမူအကျင့်ကောင်း ထိန်းသိမ်းပါ။ နူးညံ့သိမ်မွေ့တဲ့ အပြောအဆိုက ဆန့်ကျင်တဲ့ ဆွေမျိုးသားချင်းတွေနဲ့ ပြောဆိုဆက်ဆံရာမှာ အထောက်အကူ ပြုတယ်ဆိုရင် အမူအကျင့်ကောင်းက ပိုလို့တောင် အထောက်အကူပြုနိုင်တယ်။ (၁ ပေတရု ၃:၁၊ ၂၊ ၁၆ ကိုဖတ်ပါ။) ယေဟောဝါသက်သေတွေဟာ အိမ်ထောင်ရေး သာယာတယ်၊ သားသမီးတွေကို ဂရုစိုက်ကြတယ်၊ သန့်ရှင်းကြတယ်၊ ကိုယ်ကျင့်တရား ကောင်းကြတယ်၊ ကျေနပ်စရာဘဝ ပိုင်ဆိုင်ကြတယ်ဆိုတာ ကိုယ့်ပုံသက်သေအားဖြင့် ဆွေမျိုးတွေကို သိမြင်စေပါ။ ဆွေမျိုးသားချင်းတွေ အမှန်တရားကို ဘယ်တော့မှ လက်မခံရင်တောင် သစ္စာရှိလမ်းစဉ်ကြောင့် ယေဟောဝါကို ချီးမွမ်းနိုင်လို့ ဝမ်းမြောက်နိုင်ပါတယ်။
၁၅။ ပြဿနာဖြစ်စေနိုင်တဲ့ အခြေအနေတွေအတွက် ဘယ်လို ကြိုတင်စီစဉ်ထားနိုင်သလဲ။
၁၅ ကြိုတင်စီစဉ်ပါ။ ပြဿနာ ဖြစ်စေနိုင်တဲ့ အခြေအနေတွေကို စဉ်းစားပါ။ ဘယ်လို ကိုင်တွယ်မယ်ဆိုတာ ဆုံးဖြတ်ထားပါ။ (ပညာ. ၁၂:၁၆၊ ၂၃) ဩစတြေးလျနိုင်ငံက ညီအစ်မတစ်ယောက် ဒီလိုပြောတယ်– “ယောက္ခမက အမှန်တရားကို အပြင်းအထန် ဆန့်ကျင်တယ်။ သူ့ကို ဒေါသနဲ့ မတုံ့ပြန်မိအောင် ကူညီပေးဖို့ သူ့ဆီ မသွားခင် ကျွန်မတို့ဇနီးမောင်နှံ ယေဟောဝါဆီ ဆုတောင်းလေ့ရှိတယ်။ ရင်းရင်းနှီးနှီး စကားလက်ဆုံပြောလို့ရမယ့် အကြောင်းအရာတွေကို ပြင်ဆင်တယ်။ ဘာသာရေးအကြောင်း အကြီးအကျယ် ဆွေးနွေးငြင်းခုံတာမျိုး ဖြစ်စေမယ့် စကားမျိုးကို ရှောင်တယ်။ လည်ပတ်တဲ့အချိန်ကို ကန့်သတ်ထားတယ်။”
၁၆။ ဆွေမျိုးသားချင်းတွေရဲ့ အကြိုက် မလိုက်လို့ အပြစ်ရှိတယ်ဆိုတဲ့ ခံစားချက်ကို ဘယ်လို အောင်မြင်နိုင်သလဲ။
၁၆ မယုံကြည်တဲ့ ဆွေမျိုးသားချင်းတွေနဲ့ သဘောထားကွဲလွဲမှုအားလုံးကိုတော့ ရှောင်နိုင်မှာ မဟုတ်ဘူး။ အထူးသဖြင့် ဆွေမျိုးသားချင်းတွေကို တကယ်ချစ်ရင်၊ သူတို့အကြိုက်လိုက်ဖို့ အမြဲကြိုးစားရင် အဲဒီသဘောထားကွဲလွဲမှုတွေကြောင့် အပြစ်ရှိတယ်လို့ ခံစားရနိုင်တယ်။ အဲဒီလို ခံစားရတယ်ဆိုရင် မိသားစုကို ချစ်တာထက် ယေဟောဝါအပေါ် သစ္စာစောင့်သိခြင်းကို ရှေ့တန်းတင်ဖို့ ကြိုးစားပါ။ ဒါဆိုရင် ကျမ်းစာအမှန်တရားကို ကျင့်သုံးခြင်းက သေရေးရှင်ရေးကိစ္စဖြစ်ကြောင်း ဆွေမျိုးသားချင်းတွေ သိမြင်လာဖို့ ကူညီပေးနိုင်တယ်။ ဘယ်လိုပဲဖြစ်ပါစေ အမှန်တရားကို လက်ခံလာဖို့ တခြားသူတွေကို တွန်းအားပေးလို့ မရကြောင်း သတိရပါ။ ယေဟောဝါရဲ့ နည်းလမ်းတွေအတိုင်း လိုက်လျှောက်ခြင်းရဲ့ အကျိုးကျေးဇူးတွေကို မြင်သာစေပါ။ မေတ္တာရှင် ဘုရားသခင်က ဘယ်လမ်းစဉ် လိုက်ရမလဲဆိုတာ ရွေးချယ်ဖို့ ကျွန်တော်တို့ကို အခွင့်အရေး ပေးသလို သူတို့ကိုလည်း အခွင့်အရေး ပေးထားတယ်။—မိသားစုဝင်တစ်ယောက် ယေဟောဝါကို စွန့်သွားခဲ့ရင်
၁၇၊ ၁၈။ မိသားစုဝင်တစ်ယောက် ယေဟောဝါကို စွန့်သွားတဲ့အခါ ရင်ဆိုင်နိုင်ဖို့ ဘာက ကူညီပေးနိုင်သလဲ။
၁၇ မိသားစုဝင်တစ်ယောက် နှင်ထုတ်ခံရရင်၊ အသင်းတော်နဲ့ ပေါင်းသင်းမှု ရပ်စဲလိုက်ရင် ဓားနဲ့ အထိုးခံရသလို နာကျင်နိုင်တယ်။ အဲဒီနာကျင်မှုကို ဘယ်လို ရင်ဆိုင်ဖြေရှင်းနိုင်သလဲ။
၁၈ ဘုရားရေးရာ လုပ်ရိုးလုပ်စဉ်အတိုင်း ဆက်လုပ်ပါ။ ကျမ်းစာ ပုံမှန် ဖတ်ရှုခြင်း၊ အစည်းအဝေးတွေကို ပြင်ဆင်တက်ရောက်ခြင်း၊ အမှုဆောင်လုပ်ငန်းမှာ ပါဝင်ခြင်း၊ ခံနိုင်ရည်ခွန်အား ပေးဖို့ ဆုတောင်းခြင်းအားဖြင့် ကိုယ့်ကိုယ်ကိုယ် တည်ဆောက်ပါ။ (ယု. ၂၀၊ ၂၁) အဲဒါတွေကို လုပ်ဆောင်နေပေမဲ့ စိတ်မပါဘူးလို့ ခံစားနေရရင်ကော။ လက်မလျှော့ပါနဲ့။ ဘုရားရေးရာ လုပ်ရိုးလုပ်စဉ်က ကိုယ့်အတွေးနဲ့ ခံစားချက်တွေကို ထိန်းချုပ်ဖို့ ကူညီပေးနိုင်တယ်။ ဆာလံ ၇၃ ရေးသားသူအကြောင်း စဉ်းစားကြည့်ပါ။ မှားယွင်းတဲ့အတွေး ဝင်လာပြီး အကြီးအကျယ် စိတ်ဒုက္ခရောက်တဲ့အခါ ဘုရားသခင့် ဝတ်ပြုရာနေရာကို သွားမှ အတွေးအခေါ်ကို ပြန်တည့်မတ်နိုင်ခဲ့တယ်။ (ဆာ. ၇၃:၁၆၊ ၁၇) ယေဟောဝါကို သစ္စာရှိရှိ ကိုးကွယ်နေခြင်းက အလားတူ ကူညီပေးနိုင်တယ်။
၁၉။ ယေဟောဝါရဲ့ ဆုံးမမှု အစီအစဉ်ကို လေးစားကြောင်း ဘယ်လို တင်ပြနိုင်သလဲ။
၁၉ ယေဟောဝါရဲ့ ဆုံးမမှုကို လေးစားပါ။ ဘုရားသခင့် အစီအစဉ်က အစပိုင်းမှာ နာကျင်ခံစားရစေပေမဲ့ အပြစ်ပြုသူ အပါအဝင် အားလုံးအတွက် ရေရှည်အကျိုး ခံစားစေနိုင်တယ်။ (ဟီဘရူး ၁၂:၁၁ ကိုဖတ်ပါ။) ဥပမာ၊ နောင်တမယူတဲ့ အပြစ်ပြုသူတွေနဲ့ ‘မပေါင်းဖော်’ ဖို့ ယေဟောဝါ ညွှန်ကြားထားတယ်။ (၁ ကော. ၅:၁၁-၁၃) စိတ်ထဲမှာ နာကျင်ပေမဲ့ နှင်ထုတ်ခံထားရတဲ့ မိသားစုဝင်တွေနဲ့ ဖုန်းပြောတာ၊ စာတိုပို့တာ၊ စာပို့တာ၊ အီးမေးလ်ပို့တာတွေကို ရှောင်ရမယ်။
၂၀။ ဘာကို ဆက်မျှော်လင့်နိုင်သလဲ။
၂၀ ဆက်မျှော်လင့်နေပါ။ မေတ္တာဟာ “အရာရာကို မျှော်လင့်တတ်တယ်။” အဲဒီမှာ ယေဟောဝါကို ကျောခိုင်းသွားသူတွေ ပြန်လှည့်လာမယ်ဆိုတာလည်း ပါတယ်။ (၁ ကော. ၁၃:၇) မိသားစုဝင်တစ်ယောက် သဘောထား ပြောင်းလဲသွားတဲ့ အထောက်အထား မြင်ရတဲ့အခါ ကျမ်းစာကနေ ခွန်အားရဖို့၊ “ငါ့ဆီ ပြန်လှည့်လာပါ” ဆိုတဲ့ ယေဟောဝါရဲ့ မေတ္တာရပ်ခံချက်ကို တုံ့ပြန်ဖို့ ဆုတောင်းပေးနိုင်တယ်။ —ဟေရှာ. ၄၄:၂၂။
၂၁။ ယေရှုနောက် လိုက်လို့ မိသားစုစိတ်ဝမ်းကွဲရင် ဘာလုပ်သင့်သလဲ။
၂၁ ယေရှုက မိမိထက် တခြားလူသား တစ်ယောက်ယောက်ကို ရှေ့တန်းတင်သူဟာ မိမိနဲ့ မထိုက်တန်ဘူးလို့ ပြောခဲ့တယ်။ တပည့်တွေဟာ မိသားစု ဆန့်ကျင်မှုကြား မိမိအပေါ် သစ္စာစောင့်သိမယ်ဆိုတာ ယေရှု ယုံကြည်စိတ်ချတယ်။ ယေရှုနောက် လိုက်လို့ မိသားစုထဲ “ဓား” ရောက်လာတယ်ဆိုရင် အခက်အခဲတွေကို အောင်မြင်စွာ ရင်ဆိုင်နိုင်ဖို့ ယေဟောဝါကို အားကိုးပါ။ (ဟေရှာ. ၄၁:၁၀၊ ၁၃) သင့်ကို ယေဟောဝါနဲ့ ယေရှု နှစ်သက်လို့၊ သစ္စာရှိ လမ်းစဉ်အတွက် ဆုချမှာဖြစ်လို့ ဝမ်းမြောက်နေပါ။
^ စာပိုဒ်၊ 10 ထပ်သိချင်ရင် ၂၀၀၂၊ ဩဂုတ် ၁၅ ရက်ထုတ် ကင်းမျှော်စင် “စာရှုသူများထံမှ မေးခွန်းလွှာ” ကို ကြည့်ပါ။