1, 2. 1) ¿Tlake tlaseuilistli tijpiaj ipan ni tonali? 2) ¿Kenke amo senkistok tiitstokej ika tlaseuilistli? (Xikita nopa achtoui tlaixkopinkayotl).

AMO aka kineki motekipachojtos, nochi tijnekij tiitstosej ika tlaseuilistli. Yeka tlauel tijtlaskamatiliaj toTeotsij pampa techmakatok “tlaseuilistli”. Ni techpaleuia kuali ma tijyolmatikaj pampa amo timoiljuiaj ipan tlamantli tlen techtekipachoua (Filip. 4:6, 7). Uan pampa tijmaktilijtokej Jehová tonemilis, techpaleuia ma tiitstokaj ika tlaseuilistli pampa “timoyoltlalijtokej iuaya toTeko”, o timouampojchijtokej iuaya (Rom. 5:1).

² Ipan ni tonali, toTeotsij ayamo kichiua senkistok ma tiitstokaj ika tlaseuilistli. Tiitstokej ipan itlamia tonali, yeka onka miak kuesoli uan maseualmej katli amo kualmej (2 Tim. 3:1-4). Uan katli tijtekipanouaj toTeotsij nojkia kejuak timoteuijtokej iuaya Satanás uan tijchiuaj kampeka amo tijneltokasej tlen kimoyaua (2 Cor. 10:4, 5). Uan onka seyok tlamantli tlen kichiuaskia ayokmo ma tiyolpakikaj: kema tochampoyouaj amo kitekipanouaj Jehová. Uelis sekij techpinajtiaj pampa tijneltokaj sekinok tlamantli o uelis kiijtouaj san tikinxelouaj tochampoyouaj. Uan uelis techiljuiaj nama ayokmo tielij tlen ininchampoyouaj. ¿Kenijkatsa kinamiki tikitasej nopa tlaouijkayotl?  ¿Tlake techpaleuis ma tikixnamikikaj nopa tlaouijkayotl?

3, 4. 1) ¿Tlake kimajtoya Jesús? 2) ¿Kema Jesús itokilijkauaj kimatiskiaj ouij kitokilisej?

³ Jesús kimajtoya nochi tlen tlamachtiyaya kichiuaskia maseualmej ma moxelokaj uan kimajtoya itokilijkauaj monekiyaya amo majmauisej pampa kintlatsakuiltiskiaj. Ayokmo itstoskiaj ika tlaseuilistli ininuaya ininchampoyouaj. Jesús kiijtok: “Amo ximoiljuikaj niualajtok para onkas tlaseuilistli ipan ni Tlaltipaktli. ¡Axneli! Eltok keja niualajtok ika machete. Niualajtok para nikinxejxelos tlakamej. Nopampa na tlakamej moiyokatlalisej tlen inintata, uan ichpokamej moiyokatlalisej tlen ininnana. Uan yeyojmej moiyokatlalisej tlen ininyejnaua. Uan se tlakatl tlen nechneltoka uelis kinpias ikualankaitakauaj tlen ichampoyouaj” (Mat. 10:34-36).

⁴ Kema kiijtok “amo ximoiljuikaj niualajtok para onkas tlaseuilistli”, kinekiyaya maseualmej ma kimatikaj tlake panoskia tlaj kitokiliskiaj. Jesús kinekiyaya kimoyauas nopa kuali tlamachtili, uan maske amo kinekiyaya kinxelos maseualmej, kimajtoya nopa kena panoskia (Juan 18:37). Kinekiyaya kinmachtis kemantika ouij kimatiskiaj kitokilisej, uan tlauel ouij eliskia kema ininchampoyouaj o ininuampoyouaj amo kinekiskiaj kitekipanosej toTeotsij.

5. ¿Tlake kiixnamiktokej se keskij Cristo itokilijkauaj?

⁵ Jesús kiijtok itokilijkauaj monekiyaya kiilnamiktosej tlaijiyouiskiaj, uan kemantika ininchampoyouaj kintlaijiyouiltiskiaj (Mat. 10:38). Pampa kinekij kiyolpakiltisej Cristo, miakej kiijiyouijtokej nochi maske ininchampoyouaj kintlaijiljuiaj o kinkualankaitaj. Uan maske kiampa kinpanotok, toTeotsij nelia tlauel kinteochijtok (xijpoua Marcos 10:29, 30).

6. ¿Tlake moneki tikilnamikisej tlaj tochampoyouaj amo kinekij ma tijtekipanokaj Jehová?

⁶ Tojuantij nojua tlauel tikinikneliaj tochampoyouaj maske amo kinekij ma tijtekipanokaj Jehová. Maske tikinikneliaj, moneki tikilnamikisej san toTeotsij uan Cristo tlauel moneki ma tikiniknelikaj (Mat. 10:37). Nojkia moneki tikilnamikisej Satanás kitemolis ma tijtlauelkauakaj Jehová san pampa tikinikneliaj tochampoyouaj. Ma tikitakaj se keski tlamantli tlen ueliskia panos uan nojkia kenijkatsa uelis tikixnamikisej.

7. ¿Tlake moneki kichiuasej toikniuaj tlaj ininsiua o ininueue amo kitekipanouaj toTeotsij?

⁷ Biblia kiijtoua katli mosenkauasej kipiasej “más kuesoli” (1 Cor. 7:28). Uan nojua tlauel tijpiasej tlaouijkayotl tlaj toueue o tosiua amo kitekipanoua toTeotsij. Kema kiampa panos, moneki tikitasej kej toTeotsij kiita. Amo uelis tijkauasej o tikixpolosej totoka kampa nesi timosenkajtokej san pampa toueue o tosiua amo kitekipanoua Jehová (1 Cor. 7:12-16). Se tosiuaikni moneki kitlepanitas iueue pampa yaya kiyakana. Moneki kiampa kichiuas maske iueue amo kipaleuia kuali ma mouika iuaya toTeotsij. Nojkia, se toikni moneki kiiknelis isiua uan kimokuitlauis maske amo kitekipanoua Jehová (Efes. 5:22, 23, 28, 29).

8. ¿Tlake uelis timotlajtlanisej tlaj toueue o tosiua amo kineki senkistok ma tijtekipanokaj Jehová?

⁸ ¿Tlake uelis tijchiuasej tlaj toueue o tosiua amo kineki ma tijchiuakaj se keski tlamantli kema tijtekipanouaj Jehová? Ma timoiljuikaj ni: iueue se tosiuaikni kiiljuia ma tlajtolmoyaua san se keski tonali. Tlaj tojuantij techpanoskia, ma timotlajtlanikaj: “¿Ayokmo kineki ma nijtekipano Jehová? Tlaj amo, ¿uelis nijchiuas tlen nechiljuia?”. Tlaj kuali timoiljuisej tlake tijchiuasej, techpaleuis amo ma timokualanikaj (Filip. 4:5).

9. ¿Kenijkatsa se toikni uelis kinpaleuis ikoneuaj ma kitlepanitakaj ininnana o inintata katli amo kitekipanoua toTeotsij?

⁹ Tlaj toueue o tosiua amo kitekipanoua  Jehová, uelis tlauel ouij tikiniskaltisej tokoneuaj. Moneki tikinmachtisej ma kineltokakaj tlen Biblia tlanauatia kema kiijtoua moneki kintlepanitasej inintatauaj (Efes. 6:1-3). ¿Uan tlaj tosiua o toueue amo moyakana ika tlen kiijtoua Biblia? Tokoneuaj kinamiki kiitasej nojkia tijtlepanitaj. Ma timosentlalikaj ipan tlamantli tlen kuali kichiua uan ma tikiljuikaj tlake kuali tlamantli techpaktia. Uan amo ma tikijilnamikikaj ininixpa tokoneuaj. Kinamiki tikinixtomilisej tokoneuaj sejse maseuali moneki kitlapejpenis tlaj kitekipanos toTeotsij o amo. Tlaj tokoneuaj kuali monejnemiltiaj uelis kipaleuis toueue o tosiua nojkia ma kitekipano Jehová.

10. ¿Kenijkatsa se toikni uelis kinmachtis ikoneuaj ika Biblia tlaj iueue o isiua amo kitekipanoua toTeotsij?

¹⁰ Kemantika katli amo kitekipanoua toTeotsij uelis kineki ikoneuaj nojkia ma itstokaj ipan iljuitl tlen kichiuaj ipan sekinok religiones o ma kineltokakaj tlen inijuantij tlamachtiaj. Sekij tlakamej amo kinkauaj ininsiua ma kinmachtikaj ininkoneuaj ika Biblia. Kema panos ni, tosiuaikni moneki kichiuas kampeka kinmachtis ikoneuaj (Hech. 16:1; 2 Tim. 3:14, 15). Uelis iueue amo kineki ma kinmachti o ma kinuika tlanechikoli ikoneuaj katli ayamo uejueyij. Maske kitlepanitas tlen kiijtoua, tosiuaikni moneki nochipa kitemolis kema uelis kinmachtis tlen ya kineltoka. Kiampa uelis kinmachtis ajkia Jehová uan tlake tlanauatia (Hech. 4:19, 20). Kema panos tonali, inijuantij moneki kitlapejpenisej tlaj kitekipanosej Jehová o amo (Deut. 30:19, 20). *

11. ¿Tlake ueliskia kichiuas ma tijpiakaj kuesoli ininuaya touikaljuaj katli amo kitekipanouaj Jehová?

¹¹ Kema tijpeualtijkej timomachtiaj Biblia ininuaya Jehová itlajtoltemakauaj, uelis amo tleno tikiniljuijkej tochampoyouaj. Uan kema kuali titlaneltokakej, tikitakej monekiyaya amo timajmauisej uan tikiniljuisej tlen timomachtiyayaj (Mar. 8:38). Tlaj tijpixtokej kuesoli ininuaya touikaljuaj pampa tijtekipanouaj Jehová, ¿tlake uelis tijchiuasej uan kiampa tiitstosej ika tlaseuilistli ininuaya uan nojkia nojua kuali tijtekipanojtosej Jehová? Ma tikitakaj se keski tlamantli.

12. ¿Kenke sekij touikaljuaj uelis amo kinekisej ma tielikaj Jehová itlajtoltemakauaj, uan tlake uelis tijchiuasej?

¹² Ma tijkuamachilikaj tlen touikaljuaj moiljuiaj. Maske tojuantij tlauel tiyolpakij pampa tijmatkej tlen melauak, uelis se keskij touikaljuaj moiljuiaj san techkajkayajtokej o timokalakijkej ipan se secta. Uelis moiljuiaj ayokmo tikinikneliaj pampa ayokmo tiiljuichiuaj ininuaya. Nojkia, uelis majmauij pampa moiljuiaj kema timikisej, tlauel techtlatsakuiltisej. Moneki tijchiuasej kampeka tijkuamachilisej tlen moiljuiaj uan kuali tikintlakakilisej, kiampa tijmatisej tlake kintekipachoua (Prov. 20:5). Apóstol Pablo kichiuayaya kampeka kikuamachilis tlen sekinok kiyolmatiyayaj. Tlaj nojkia tijchiuasej kej ya, techpaleuis ma tikiniljuikaj touikaljuaj tlake tijneltokaj (1 Cor. 9:19-23).

13. ¿Kenijkatsa kinamiki tikinnojnotsasej touikaljuaj?

¹³ Kuali ma tikinnojnotsakaj. Biblia kiijtoua: “Xikinkamauikaj ika yamanik uan ika yejyektsi” (Col. 4:6). Uelis tikiljuisej Jehová ma techmaka itonal uan kiampa uelis tikinnojnotsasej touikaljuaj ika kuali uan ika tlaiknelili. Amo kinamiki nochipa tikiniljuisej amo melauak tlen kineltokaj. Tlaj techyolkokouaj ika tlen kiijtouaj o kichiuaj, uelis tijchiuasej tlen apóstoles kichijkej. Pablo kiijtok: “Kema tlakamej techtelchiuaj, tijtlajtlaniaj toTeko ma kinteochiua. Kema techtlaijiyouiltiaj, tikijiyouiaj, tijpiaj toyolo uan tikinkamauiaj ika kuali nopa tlakamej tlen toka kamatij” (1 Cor. 4:12, 13).

14. ¿Kenijkatsa techpaleuia kema kuali timonejnemiltiaj?

¹⁴ Kuali ma timonejnemiltikaj. Kema kuali tikinnojnotsaj touikaljuaj, techpaleuia ma tiitstokaj ika tlaseuilistli ininuaya. Uan nojua tlauel techpaleuis tlaj kuali timonejnemiltisej (xijpoua 1 Pedro 3:1, 2, 16). Inijuantij kiitasej Jehová itlajtoltemakauaj itstokej ika pakilistli ininuaya ininsiua o ininueue, kuali kinmokuitlauiaj ininkoneuaj, amo kichiuaj tlamantli tlen amo kuali uan kuali kiyolmatij ika tlen kichiuaj. Maske touikaljuaj amo kema kitekipanosej Jehová, tojuantij uelis tiyolpakisej pampa tijmajtosej tijyolpakiltiaj toTeotsij uan amo tijtlauelkauaj.

15. ¿Tlake techpaleuis amo ma timokualanikaj ininuaya touikaljuaj?

¹⁵ Ma timoiljuikaj tlake kuesoli panoskia. Moneki kuali timoiljuisej tlake ueliskia kichiuas ma timokualanikaj ininuaya touikaljuaj uan nojkia tlake tijchiuaskiaj tlaj kiampa panoskia (Prov. 12:16, 23). Se tosiuaikni tlen Australia kiijtoua: “Noyextaj tlauel kualaniyaya pampa tieliyayaj Jehová itlajtoltemakauaj. Kema tiauiyayaj tijpaxalouaj, achtoui noueue uan na tikiljuiyayaj Jehová ma techpaleui amo tijkualankanankilisej. Kuali timoiljuiyayaj tlake tlamantli tikamanaltiskiaj iuaya uan kiampa amo timokualaniskiaj. Nojkia tijmatiyayaj tlaj tiuejkauaskiaj, kichiuaskia ma tikamanaltikaj tlen religión uan ma timokualanikaj, yeka amo tiuejkauayayaj”.

16. ¿Tlake techpaleuis amo ma timoyolkokokaj tlaj timokualanijkej iuaya se touikal?

¹⁶ Moneki tijmajtosej kemantika timokualanisej ininuaya touikaljuaj katli amo kitekipanouaj Jehová. Uelis timoyolkokouaj kema kiampa pano pampa tikinikneliaj uan nochipa  tijchijtokej kampeka tijchiuasej tlen inijuantij kinekij. Tlaj amo kuali tijyolmatij, moneki tikilnamikisej san Jehová kinamiki tlauel tikiknelisej uan amo tijtlauelkauasej, uan amo tikinachtouitlalisej tochampoyouaj san pampa tikinikneliaj. Kiampa touikaljuaj uelis kiitasej tlauel ipati tijchiuasej tlen Biblia kiijtoua, pampa uelis kichiuas ma tiitstokaj o ma timikikaj. Uan maske amo aka uelis tijchiualtisej ma kitekipano Jehová, kena uelis tikinnextilisej kenijkatsa tlauel techpaleuijtok tijchiuasej tlen Jehová kineki. Pampa toTeotsij kiniknelia, kinkaua ma kitlapejpenikaj tlake kichiuasej: tlaj kitekipanosej o amo (Is. 48:17, 18).

17, 18. ¿Tlake uelis tijchiuasej tlaj se tlen tochampoyouaj kitlauelkaua Jehová?

¹⁷ Kema se tlen tochampoyouaj kikixtiaj tlen tlanechikoli o ya iselti kiijtoua ayokmo kineki ma kiixmatikaj kej se tlen Jehová itlajtoltemakauaj, tlauel techyolkokoua, kejuak techkechiliaj se tlenijki ipan toyolo. ¿Tlake uelis tijchiuasej?

¹⁸ Nochipa ma tijchiuakaj tlen techpaleuis kuali ma titlaneltokakaj. Tlaj tijnekij nojua kuali titlaneltokasej, moneki nochipa tijpouasej Biblia, timomachtisej tlen moixtoma ipan tlanechikoli uan timonechikosej, titlajtolmoyauasej uan tikiljuisej toTeotsij ma techpaleui tikijiyouisej nochi (Jud. 20, 21). ¿Tlake uelis tijchiuas tlaj amo kuali tijyolmati maske tijchiua nopa uan nojua tlauel timoyolkokoua pampa tikilnamiktok tlen panok? ¡Xikijiyoui! Ximosentlali nojua tlauel tijtekipanos Jehová, nopa mitspaleuis amo timoseniljuijtos ipan nopa tlamantli tlen mitsyolkokoua. Ma tikilnamikikaj tlake kipanok katli kiijkuilok Salmo 73. Ya amo kuali kiyolmatiyaya uan amo yolpakiyaya pampa moiljuiyaya ipan tlamantli tlen amo kinamiki. Uan kema mosentlalik nojua kuali kitekipanos Jehová, kipaleuik ayokmo ma moiljui ipan nopa tlamantli (Sal. 73:16, 17). Tojuantij nojkia techpaleuis tlaj kiampa tijchiuasej.

19. ¿Kenijkatsa tijnextiaj tijtlepanitaj tlen Jehová kichiua kema tetlalnamiktia?

¹⁹ Ma tijtlepanitakaj tlen Jehová kichiua kema tetlalnamiktia. Maske tlauel techyolkokoua kema se akajya kitlalnamiktiaj, teipa tikitaj kenijkatsa tlauel kipaleuia katli tlajtlakolchijtok uan nojkia tojuantij (xijpoua Hebreos 12:11). Jehová technauatia amo ma timouikakaj ininuaya katli tlajtlakolchiuaj uan amo moyolkuepaj (1 Cor. 5:11-13). Maske tlauel techyolkokoua, tlaj amo moneki, amo kinamiki tijnojnotsasej se tlen tochampoyouaj katli kikixtijtokej tlen tlanechikoli yon tijkamanaljuisej ipan teléfono, tijtitlanilisej mensajes, amatlajkuiloli, se correo electrónico o ipan redes sociales.

20. ¿Tlake timotemachiaj uelis kichiuas katli tlajtlakolchijtok?

²⁰ Ma timotemachikaj sampa kitekipanos Jehová. “Se tlen teiknelia [...] kichia para sekinok ma kichiuakaj tlen kuali”, yeka timotemachiaj katli kitlauelkajtok Jehová uelis sampa kitekipanos (1 Cor. 13:7). Tlaj tikitaj se tlen tochampoyouaj katli tlajtlakolchijki kipatla itlalnamikilis, uelis tikiljuisej Jehová ma kipaleui ika Biblia uan kiampa uelis kichiuas tlen kiiljuia: “Ximokuepakaj ika na” (Is. 44:22).

21. ¿Tlake moneki tijchiuasej tlaj ipan tokalijtik eltok kejuak se “machete”?

²¹ Jesús kiijtok san ya moneki tlauel tikiknelisej uan amo seyok maseuali. Motemachiyaya itokilijkauaj amo kitlauelkauaskiaj maske ininchampoyouaj kualaniskiaj. Tlaj ipan tokalijtik eltok kejuak se “machete” pampa tijtokiliaj Jesús, ma tikiljuikaj Jehová ma techpaleui tikixnamikisej nopa kuesoli (Is. 41:10, 13). Uan nochipa ma tikilnamikikaj Jehová uan Jesús yolpakij pampa tijchiuaj tlen kinpaktia. Nojkia ma tikilnamiktokaj inijuantij techteochiuasej pampa amo tikintlauelkauaj. ¡Ni kichiua nelia tlauel ma tiyolpakikaj!