1, 2. 1) ¿Toni yolseuilis uelis tikpiaskej axkan? 2) ¿Keyej axkan amo ueli senkis tikpiaj yolseuilis? (Xikonita taixkopin ipeujyan tamachtilis.)

TINOCHIN tiknekij tiyolseujkanemiskej uan amo timotekipachoskej. Yejua ika, timotasojkamatij maj Jiova techmaka “mouiskayolseuilis”. Nejin uelis techpaleuis maj amo tiknemilikan nion maj tikmachilikan tein techtekipachos (Filip. 4:6, 7). Uan kemej timotemaktijkejya iuan Jiova, no tikpiaj “yolseuilis iuan Dios”, tein kijtosneki ke kuali timouikaj iuan (Rom. 5:1).

² Sayoj ke, ayamo ejko tonal keman Dios senkis kiualkuis yolseuilis. Kemej tinemij itech itamian tonalmej, onkak miak kuejmolmej uan miakej sayoj kitemouaj takuejmolchiuaskej (2 Tim. 3:1-4). Uan no, moneki tikixnamikiskej Satanás uan tamachtilismej tein amo melaujkej tein kimoyaua (2 Cor. 10:4, 5). Sayoj ke tein uelis okachi techtekipachos yejua keman techixnamikij tochankauan akin amo kitekitiliaj Jiova. Xa sekin techkejkelouaj porin taman tein tikneltokaj oso kijtouaj ke tikinxelojtokej tochankauan. Xa  hasta techiluiskej ke amo techitaskejok kemej tiininchankauan. ¿Keniuj moneki tikitaskej nejon taixnamikilis? ¿Toni uelis tikchiuaskej itech nejin ueyi ouijkayot?

3, 4. 1) ¿Toni kiualkuiskia itamachtilis Jesús? 2) ¿Kemanian okachi ouij yeskia se kitojtokas Jesús?

³ Jesús kimatia ke amo nochin kiseliskiaj tein tamachtiaya. No kimatia ke sekin kinixnamikiskiaj imomachtijkauan uan yejua ika monekiskia yeskij yolchikaujkej. Nejin taixnamikilis no ueliskia kinxelos kalyetouanij. Yejua kijtoj: “Amo xiknemilikan ke Nejuatsin niuala para namechualkuilis sayo in yek yetolis nikan taltikpak. [...] Ta, namechualkuilis ne teuilis uan ne xejxelolis. Uan no niuala para ma in tekoneu de se kalyetoni kixnamiki itat, uan para ma in teichpoch moxejxelos de inan, uan para ma in tesiuamon ma amo kiyekitas imonan. Uan kuak se tagat takuautamatis nouan, ijkuakon yejua kitauelitaske ichankauan” (Mat. 10:34-36).

⁴ ¿Keyej kijtoj Jesús: “Amo xiknemilikan ke Nejuatsin niuala para namechualkuilis sayo in yek yetolis”? Porin kinekia maj taltikpakneminij kinemilianij tein panoskia komo mochiuayaj itatojtokakauan. Jesús amo kinekia kinxexelos taltikpakneminij, ta kinekia kinmachtis tein melauak (Juan 18:37). Cristo kinekia tamachtis ke kemansa ouij yeskia se kitojtokas, okachiok keman se itasojikniuan oso se ichankauan teixnamikiskiaj.

5. ¿Toni kijyouianij imomachtijkauan Jesús?

⁵ Jesús kijtoj ke se taman tein imomachtijkauan moneki motemakaskej kijyouiskej yejua keman ininchankauan kinixnamikij (Mat. 10:38, TNM). Kemej kinekij kiyolpaktiskej Cristo, itatojtokakauan taxikouaj keman ininchankauan kinkejkelouaj oso hasta kinixtopeuaj. Sayoj ke kiselianij okachi ke tein kipolouanij (xikonixtajtolti Marcos 10:29, 30).

6. ¿Toni moneki tikelnamikiskej komo tochankauan techixnamikij?

⁶ Maski tochankauan techixnamikij porin tiktekitiliaj Jiova, tiksentokaj tikintasojtaj. Sayoj ke moneki tikelnamikiskej ke moneki okachi tikintasojtaskej Dios uan Cristo (Mat. 10:37). No moneki tikelnamikiskej ke Satanás kitemos kichiuas maj tiktayekanaltikan netasojtalis tein tikinpialiaj tochankauan uan ijkon maj amo tiktakamatikanok Jiova. Maj tikitakan seki ouijkayomej tein uelis tikpanoskej uan toni uelis tikchiuaskej.

7. ¿Keniuj moneki kiitaskej tein kipanotokej akin ininnamik amo itaixpantijkauj Jiova?

⁷ Biblia tanejmachtia ke akin monamiktiskej “kipiaske ouijkayot” (1 Cor. 7:28). Komo tonamik amo itaixpantijkauj Jiova, xa tikpiaskej okachi kuejmolmej iuan. Maski ijkon, moneki tikitaskej tein tikpanotokej kemej kiita Dios. Yejuatsin kijtoua ke amo uelis tikauaskej tonamik sayoj porin amo kitekitilia (1 Cor. 7:12-16). Tokniuj siuat moneki kipoujkaitas itakauj kemej itaixyekankauj maski amo kinpaleuia maj kuali mouikakan iuan Jiova. Uan tokniuj takat moneki kitasojtas inamik uan kiyekpias maski amo kitekitilia Jiova (Efes. 5:22, 23, 28, 29).

8. ¿Toni uelis timotajtaniskej komo tonamik kiixtalia seki taman itech totaueyichiualis?

⁸ ¿Uan toni uelis tikchiuaskej komo tonamik kiixtalia seki taman itech totaueyichiualis? Kemej neskayot, itakauj se tokniuj kiluij maj sayoj tanojnotsati seki tonalmej itech semana. Komo tikpanoskiaj se taman kemej nejon, maj timotajtanikan: “¿Nechiluijtok nonamik maj amo nikueyichiuaok Jiova? Komo amo, ¿uelis nikchiuas tein nechiluia?”. Komo timotemakaj tikpataskej tein uelis, techpaleuis maj amo tikpiakan miak kuejmolmej (Filip. 4:5).

9. ¿Keniuj se tokniuj uelis kinmachtis ikoneuan maj kipoujkaitakan ininpopaj maski amo kitekitilia Jiova?

 ⁹ Komo tonamik amo kitekitilia Jiova, uelis yeski semi ouij tikinmachtiskej tokoneuan. Kemej neskayot, moneki tikinmachtiskej maj kitakamatikan tanauatil tein moajsi itech Biblia kampa kijtoua ke konemej moneki kinpoujkaitaskej ininpopaj uan ininmomaj (Efes. 6:1-3). Sayoj ke ¿komo tonamik amo kichiua tein tanauatia Biblia? Maj tikpoujkaitakan, uan ijkon tikinkauiliskej se kuali neskayot tokoneuan. Maj titanemilikan itech ikualneskayouan tonamik uan maj tikiluikan ke tiktasojkamatij nochi tein kuali tein kichiua. Maj amo tikijijtokan ininixpan tokoneuan, ta moneki tikinmelauiliskej ke tisejsemej moneki tikixpejpenaskej ox tiktekitiliskej Dios. Komo tikinmachtiaj tokoneuan maj kipoujkaitakan ininpopaj maski amo kitekitilia Jiova, nejon uelis kichiuas maj kineki kiixmatis yejuatsin.

10. ¿Keniuj se tokniuj uelis kinpaleuis ikoneuan maj kiixmatikan Jiova komo inamik amo kitekitilia yejuatsin?

¹⁰ Xa takat oso siuat akin amo kitekitilia Jiova kinekis maj ikoneuan kichiuakan iluimej tein kiixnamiki tein kijtoua Biblia oso maj kiselikan tamachtilismej tein amo melaujkej. Seki takamej xa kiluiskej ininnamik akin itaixpantijkauj Jiova maj amo kinnextili ininkoneuan tein Biblia kijtoua. Sayoj ke, maski ijkon, tokniuj siuat mochikauas kinnextilis (Hech. 16:1, TNM; 2 Tim. 3:14, 15). Kemej neskayot, xa takat amo kikauas maj kinmachti Biblia ikoneuan akin nojnelmejok oso maj kinuika nechikolmej. Maski tokniuj siuat amo kiixnamikis, kemaj uelis kiniluis tein kineltoka nochipa keman uelis. Ijkon yejuan kiixmatiskej Jiova uan itanauatiluan (Hech. 4:19, 20). Satepan, keman moskaltiskej, konemej monekis  kiixpejpenaskej ox kitekitiliskej Jiova (Deut. 30:19, 20). *

11. ¿Toni uelis kichiuas maj tikpiakan kuejmolmej iniuan tochankauan akin amo itaixpantijkauan Jiova?

¹¹ Keman peuak timomachtiaj Biblia iniuan itaixpantijkauan Jiova, xa amo teyi tikiniluijkej tochankauan. Sayoj ke, keman totakuaujtamatilis okachi mochikauak, tikajsikamatkej ke monekia tikiniluiskej ke tiknekiaj tiktekitiliskej Jiova (Mar. 8:38). Komo nejon kichiuak maj tikpiakan kuejmolmej iniuan, ¿toni techpaleuis maj kuali tiyetokan iniuan uan maj tiksentokakan tiktekitilikan Jiova? Maj tikitakan seki taman.

12. ¿Keyej seki tochankauan xa techixnamikiskej, uan toni uelis tikchiuaskej?

¹² Maj tiktemokan tikajsikamatiskej tein kinemiliaj. Semi techyolpaktia tikixmatiskej tein yekmelauj tamachtia Biblia. Sayoj ke seki tochankauan xa kinemiliaj ke techkajkayaujkej oso ke tipouij itech se taneltokalis tein amo akin kiixmati. Xa kinemiliaj ke amo tikintasojtajok porin amo tiiluichiuajok iniuan. No uelis kinemiliskej ke timopolouilijtokej teisa. Moneki tiktemoskej tikajsikamatiskej toni kinemiliaj uan tikinkakiskej ika nejmachkayot, nejon techpaleuis maj tikmatikan toni kintekipachoua (Prov. 20:5). Tatitanil Pablo mochikauaya kiajsikamatis “itaneltokalis de cada taman se tagat”, porin nejon kipaleuiaya maj kinixmatilti kuali tanauatilmej. Komo no ijkon tikchiuaj uelis techpaleuis maj tikintapouikan tochankauan tein tikneltokaj (1 Cor. 9:19-23).

13. ¿Keniuj moneki tikinnojnotsaskej tochankauan?

¹³ Maj titajtokan ika nejmachkayot. Biblia kijtoua: “Namotajtolis nachipa ma monextijtiu ika ne iteiknelilis” (Col. 4:6). Uelis tiktajtaniskej Jiova maj techmaka iyektikatsin espíritu tein techpaleuis maj tikinnojnotsakan tochankauan ika nejmachkayot uan kualtakayot. Moneki amo tikiniluiskej ke nochi tein kineltokaj amo melauak. Komo kijtouaj oso kichiuaj teisa tein techkuejmoloua, uelis tikchiuaskej kemej tatitanilmej. Pablo kijkuiloj: “Kuak in tagayot techtejtelchiuayaj, ijkuakon tejuan tikinmouiskanankiliayaj. Uan kuak in tagayot techtokatinemiaj para techmiktiskiaj, ijkuakon tejuan nochi titaxikoayaj. Uan kuak in tagayot techtejteneuayaj, ijkuakon tejuan tikinnejmachnojnotsayaj” (1 Cor. 4:12, 13).

14. ¿Keniuj techpaleuia komo kuali timonejnemiltiaj?

¹⁴ Maj kuali timonejnemiltikan. Maski tikinnojnotsaskej tochankauan ika nejmachkayot, uelis techpaleuis maj kuali timouikakan iniuan kemej timonejnemiltiskej uelis okachi techpaleuis (xikonixtajtolti 1 Pedro 3:1, 2, 16). Komo tikauaj se kuali neskayot, uelis tikchiuaskej maj kiitakan ke itaixpantijkauan Jiova yolpakij kemej namikuanij, kinyekpiaj ininkoneuan uan chipaujkanemij uan yolpakij. Hasta komo amo keman mochiuaj itaixpantijkauan Jiova, uelis tiyolpakiskej porin tikmattokej ke tikyolpaktijtokej yejuatsin.

15. ¿Toni techpaleuis maj amo timotajtolteuikan iniuan tochankauan?

¹⁵ Maj achto tiknemilikan toni kuejmolmej uelis onkas. Maj tiknemilikan toni uelis techuikas maj timotajtolteuikan iniuan tochankauan uan maj tikixtalikan toni tikchiuaskej (Prov. 12:16, 23). Se tokniuj siuat kayot Australia kijtoua ke imontat kitelixnamikia tamachtilis tein melauak uan kemansa tel kualania. Yejua ika achto ke kinotsaskiaj, yejua uan inamik kitajtaniayaj Jiova maj kinpaleuiani maj amo kitauelnankilianij. Kinemiliayaj toni ika ueliskia kuali monojnotsaskej. Uan no, amo semi uejkaua iuan monojnotsayaj, porin nejon kinpaleuiaya  maj amo peua ika tajtouanij taneltokalis uan maj ika motajtolteuianij.

16. ¿Toni uelis techpaleuis komo timotajtakoltiaj porin timotajtolteuijkej iuan se tochankauj?

¹⁶ Melauak ke amo nochipa uelis tikchiuaskej maj amo timotajtolteuikan iniuan tochankauan akin amo itaixpantijkauan Jiova. Xa timotajtakoltiskej komo panoua nejon, porin tikintasojtaj uan nochipa tiktemouaj tikinyolpaktiskej. Sayoj ke, maj tikelnamikikan ke tiktakamatiskej Jiova yejua tein moneki okachi tayekantos ke netasojtalis tein tikinpialiaj tochankauan. Ijkon, xa tikinpaleuiskej maj kiitakan ke motelneki se kitekitilis Jiova. Maj tikelnamikikan ke amo akin uelis tikchikaujkauiskej maj kitekitili. Sayoj ke, kemaj uelis tikinnextiliskej keniuj techpaleuiani tiktakamatiskej. Kemej semi tetasojta, Dios kinkaua maj kichiuakan tein tejuan tikchiujkej: kiixpejpenaskej ox kitekitiliskej (Is. 48:17, 18).

17, 18. ¿Toni uelis tikchiuaskej komo se tochankauj kikaua Jiova?

¹⁷ Komo se tochankauj kikalankixtiaj itech nechikol oso kijtoua ke amo kineki maj kiixmatikanok kemej itaixpantijkauj Jiova, techteltayokoltia, techkokoua kemej yeskia techtsoponiaj ika se espada. ¿Toni uelis tikchiuaskej komo techpanoua nejon?

¹⁸ Maj tiksentokakan tiktekitilikan Jiova. Moneki tikchikauaskej totakuaujtamatilis. Yejua ika moneki nochipa tikixtajtoltiskej Biblia, timomachtiskej tein moitas itech nechikolmej uan tiyaskej, tiksentokaskej titanojnotsaskej uan tiktajtaniskej Dios chikaualis tein techpaleuis maj titaxikokan (Jud. 20, 21). Sayoj ke ¿komo tikchiuaj nochi nejin uan tiksentokaj titayokoyaj? Maj amo timosenkauakan. Maj tiksentokakan tiktayekanaltikan itekiyo Jiova, porin nejon techpaleuis maj amo tiksentokakan itech titanemilikan uan maj kuali timomachilikan. Maj tikitakan tein kipanok akin kijkuiloj Salmo 73. Yejua peuak kiita nochi ika se amo kuali tanemilil, uan nejon kichiuak maj moteltekipacho. Sayoj ke kemej kisentokak kitekitilij Jiova, nejon kipaleuij maj kipatani itanemilil (Sal. 73:16, 17). Nejon no uelis techpaleuis tejuan.

19. ¿Keniuj tiknextiaj ke amo tikixnamikij itamelaualis Jiova?

¹⁹ Maj amo tikixnamikikan itamelaualis Jiova. Dios kimati ke itamelaualis kinpaleuia nochin, hasta akin kikalankixtiaj itech nechikol. Maski semi techtayokoltia maj kipano nejon se akin tiktasojtaj, nejon uelis kipaleuis maj mokepa iuan Jiova (xikonixtajtolti Hebreos 12:11). Hasta keman mokepas, moneki tiktakamatiskej Jiova uan amo iuan timouikaskejok (1 Cor. 5:11-13). Maski ouij techkisas, komo amo moneki, maj amo iuan titajtokan se tochankauj akin kikalankixtijkej, yeski ika teléfono, cartas, tiktajkuilouiliskej itech celular, correo electrónico oso itech redes sociales.

20. ¿Toni maj amo keman tiknemilikan?

²⁰ Maj amo tiknemilikan ke amo mokepasok. Akin tetasojta kichia nochi, uan yejua ika tiksentokaj tikchiaj maj mokepakan akin kikaujkej Jiova (1 Cor. 13:7). Komo tikitaj ke se tochankauj kipatatok itanemilil, uelis tiktajtaniskej Dios maj Biblia kipaleui maj kiseli nejin itayoleualis yejuatsin: “Ximokepa nouan” (Is. 44:22).

21. ¿Toni moneki tikchiuaskej komo itech tokalyetouanij onkak “xejxelolis” porin tiktojtokaj Jesús?

²¹ Jesús kijtoj ke moneki okachi tiktasojtaskej yejua ke se taltikpaknenkej. Uan kiyekmatia ke imomachtijkauan amo kikauaskiaj Jiova maski ininchankauan kinixnamikiskiaj. Komo itech tokalyetouanij onkak “xejxelolis” porin tiktojtokaj Jesús, maj tiktajtanikan Jiova maj techpaleui (Is. 41:10, 13). Maj tiknemilikan ke Jiova uan Jesús kinyolpaktia tein tikchiuaj uan ke techtatiochiuiskej komo amo tikinkauaj. ¿Melauj ke nejin semi techyolpaktia?