1, 2. a) ¿Tlen yolseuilistli uelis tikpiyaskej ipan yejuin tonaltin? b) ¿Tleka ipan yejuin tonaltin xuelis nochipa tikpiyaskej yolseuilistli? (Xkita tlaixkopinajli kampa peua tlen tomachtijtokej).

TINOCHIMEJ tiknekij tinemiskej ika yolseuilistli, maka itlaj matechajmana. Yejua ika, melak tiktlasojkamatij ika Jehová techmaka yolseuilistli. Yejuin kichiua matoyolseuikan niman techtlajpiya itech tlanemililtin niman tlen tikmachiliaj tlen teyolkokouaj (Filip. 4:6, 7). Noijki, pampa yotosentemakakej itech Jehová , tiuelij iuan “tikpiaj yolseuilistli”, kijtosneki, ika tiuelij kuajli iuan touikaj (Rom. 5:1).

² Aman tej, ok xiyejko tonajli ijkuak toTajtsin kuajkuis nochi yolseuilistli. Tinemij ipan itlamiyan tonaltin niman ika yejon, tikpiyaj miyek tlaueltin niman miyekej tlaltikpakchanejkej kichiuaj tlen xkuajli (2 Tim. 3:1-4). Noijki, akin tikchiuaj ken Cristo, kipiya ika tikixnamikiskej Satanás niman tlamachtiltin xmelajkej tlen kisemoyaua (2 Cor. 10:4, 5). San ika, tlen melak uelis techkuilis toyolseuilis yejua tochanejkauan akin xkitekichiuiliaj Jehová. Kanaj sekimej itech yejuamej techpijpinaujtiaj itech tlen tikneltokaj noso techtlajtlakoltiaj ika tikinxelouaj tochanejkauan. Noijki hasta uelis techmojtiskej ika xok techitaskej  ken inchanejkauan. ¿Kenon noneki tikitaskej ika tochanejkauan techixnamikij? ¿Tlenon uelis tikchiuaskej tla yejuin topan nochiujtika?

3, 4. a) ¿Tlenon kichiuaskia mapano itlamachtiluan Jesús? b) ¿Kemanon melak ouijtika yeskia tiktlakamatiskej Jesús?

³ Jesús kimatiya ika itlamachtiluan kinxeloskia tlaltikpakchanejkej niman ika inomachtijkauan nonekiskia yolchikaujkej yeskej pampa kintlauelitaskiaj. Yejuin uelis kichiuas maka maonia yolseuilistli ipan familias. Jesús okijto: “Ma ka xnemilikan ika nejua onikuajkik yolseuilistli ipan tlaltikpaktli. Nejua, tej, xonikuajkik yolseuilistli, yej nopampa notlauelitalos. Oniuajlaj para noxexeloskej on tlakamej. Nopampa se telpochtli kipias tlauejli itech itaj, niman se ichpochtli kipias tlauejli itech inan, niman se siuamontli kipias tlauejli itech imonan. Ijkon, tej, se kipias itlauelikniu sa no iuan ichanchanekauan” (Mat. 10:34-36).

⁴ ¿Tleka Jesús okijto: “Ma ka xnemilikan ika nejua onikuajkik yolseuilistli”? Pampa kinekiya ika tlaltikpakchanejkej makinemilikan tlenon panoskia tla kichiuaj ken yejua. Melauak, Jesús ouajla ipan yejuin tlaltikpaktli pampa otemachtiko tlen melauak, xokinxexeloko tlaltikpakchanejkej (Juan 18:37). San ika, yejon ueliskia panos. Kuakon Cristo kinekiya temachtis ika kemantika ouijtika yeskia kichiuaskej ken yejua, niman melak ouijtika yeskia ijkuak inchanejkauan noso akin imiuan nouikaj xkiseliskiaj tlen melauak.

5. ¿Tlenon yononek kixikoskej inomachtijkauan Jesús?

⁵ Jesús okijto ika inomachtijkauan nonekiya kinektoskej kijyouiskej ika inchanejkauan kimixnamikij, niman okseki tlemach (Mat. 10:38). Akin yokiteititijkej ika kinmelaua inomachtijkauan Cristo yeskej, yokixikojkej ika kinpijpinaujtiaj niman ika inchanejkauan xok kinseliaj. San ika, miyek yokitlankej xijkon ken tlen yokipolojkej (xpoua Marcos 10:29, 30).

6. ¿Tlenon kipiya tikilnamikiskej tla tochanejkauan xkinekij matiktekichiuilikan Jehová?

⁶ Niman maski tochanejkauan xkinekij matiktekichiuilikan Jehová, tejuamej xtikajkauaj ika tikintlasojtlaj. San ika, matikilnamikikan ika kipiya kachtopa tiktlasojtlaskej toTajtsin niman Cristo (Mat. 10:37). Noijki kipiya tikilnamikiskej ika Satanás kiyejyekos ika totlasojtlalis itech tochanejkauan makichiua maka matiyolmelaujkanemikan itech Jehová. Matitlajtokan itech seki tlen uelis topan nochiuas niman kenon uelis tikimixnamikiskej.

7. ¿Kenon kipiya kitaskej tlen inpan panoua akin imixnamik xiteixpantijkauj Jehová?

⁷ Biblia techmelajkaijlia ika akin nonamiktiaj “tlajtlamach kimpajsoloua” ipan innemilis, kijtosneki, kipiyaj tlaueltin (1 Cor. 7:28). Niman, tla toixnamik xiteixpantijkauj Jehová, kanaj onias okseki tlen techkuaajmanas ipan tonamiktilis. Maski ijkon, melak noneki matikitakan tlen topan panoua ijkon ken kita toTajtsin. Tla toixnamik xkineki kitekichiuilis Jehová yejon xkichiua ika aman itech matoxelokan noso iuan matokauakan ixpan tekiuajkej (1 Cor. 7:12-16). Tesiuatsin akin kichiua ken Cristo kipiya kitlakaitas iueuentsin ken akin tlayekana itech ichanejkauan maski maka makinmachti itech toTajtsin. Noijki ijkon, teueuentsin akin kichiua ken Cristo kipiya kitlasojtlas isiuauj niman kimaluis maski xkitekichiuilia Jehová (Efes. 5:22, 23, 28, 29).

8. ¿Tlenon uelis tikchiuaskej tla toixnamik xtechkauilia matiktekichiuilikan Jehová ken tiknekiskiaj?

⁸ ¿Tlenon uelis tikchiuaskej tla toixnamik xtechkauilia matiktekichiuilikan Jehová ken tiknekiskiaj? Se neskayotl, se teueuentsin akin isiuauj iteixpantijkauj Jehová okijli ika san matenojnotsa seki tonaltin ipan semana. Tla tikixnamikij itlaj ken yejuin, matotlajtoltikan: “¿Nexchiualtijtika manikajkaua ika niktekichiuilia Jehová? Tla xijkon, ¿uelis niktlakamatis niman nikchiuas  tlen nechtlajtlanilia?”. Tla kuajli tiknemiliaj uelis techpaleuis maka matikinpeualtikan tlaueltin (Filip. 4:5).

9. ¿Kenon uelis se tokniuj kinmachtis ikoneuan makitlakaitakan ixnamik akin xiteixpantijkauj Jehová?

⁹ Tla toixnamik xkitekichiuilia Jehová, kanaj ouijtika yes tikinmachtiskej kokonej. Se neskayotl, noneki tikinmachtiskej makitlakamatikan yejuin itlanauatil Biblia: “Xtlakaita motaj niman monan” (Efes. 6:1-3). ¿Niman tla toixnamik xnoyekana ika tlen techmachtia Biblia? Tiktemakaj se kuajli neskayotl tla tiktlakaitaj toixnamik. Matikitakan tlen kuajli kichiua niman matiktlasojkamachilikan. Maka matiktejteneuakan ixpan kokonej. Tlen kema, noneki kuajli matikimijlikan ika nochimej toselti kipiya tiktlapejpeniskej tla tiktekichiuiliskej toTajtsin noso ka. Ken kuajli nouikaj kokonej, uelis kichiuas ika toixnamik makineki kixmatis Jehová.

10. ¿Kenon se tokniuj uelis kinmachtis inkoneuan itech Jehová tla ixnamik xTeixpantijketl?

¹⁰ Kanaj kemantika se teixnamik akin xiteixpantijkauj Jehová kinekis ika ikoneuan makipanoltikan seki iluimej tlen toTajtsin xkuelita noso mauelikan tlen temachtia tlaneltokijli xmelauak. Sekimej tlakamej kanaj xkikauiliaj isiuauj akin kitekichiuilia Jehová makinmachti inkoneuan itech Biblia. San ika, maski ipan panos yejuin, tokniuj kichiua nochi tlen ueli ika kinmachtia inkoneuan tlen melauak (Hech. 16:1; 2 Tim. 3:14, 15). Se neskayotl, kanaj tlakatl akin xnomachtia xkikauilis makinmachti itech Biblia inkoneuan akin xiuejueyimej noso makinuika tlanechikoltin. Maski tokniuj kitlakaita tlen iueuentsin yokijto, kema uelis kinnojnotsas itech tlen kineltoka nochipa ijkuak uelis. Ijkon kinmachtis itech Jehová niman itech tlen tlanauatia (Hech. 4:19, 20). Melauak, sakin sa no yejuamej kitlapejpeniskej  tla kitekichiuiliskej Jehová noso ka (Deut. 30:19, 20). *

11. ¿Tlenon uelis kichiuas matikpiyakan tlaueltin inuan tochanejkauan akin xiteixpantijkauan Jehová?

¹¹ Ijkuak opeuj tomachtiaj Biblia iuan iteixpantijkauan Jehová, kanaj xtlaj otikimijlikej tochanejkauan. San ika, ijkuak ochikauj totlaneltokil, otikitakej ika nonekiya tiyolchikaujkej yeskej niman tikimijliskej tlen tikneltokaj (Mar. 8:38). Tla pampa timelajkanemij itech Jehová yokichiuj imiuan matikpiyakan tlauejli, ¿tlenon uelis tikchiuaskej niman ijkon xpoliuis yolseuilistli niman ok timelajkanemiskej? Matikitakan seki tlen uelis tikchiuaskej.

12. ¿Tleka sekimej tochanejkauan uelis techijliskej maka matochiuakan iteixpantijkauan Jehová, niman tlenon uelis tikchiuaskej?

¹² Matikyejyekokan tikasikamatiskej tlen kinemiliaj tochanejkauan akin xnomachtiaj. Tinochimej melak otiyolpajkej ijkuak otikixmatkej tlen melauak itech Biblia. San ika, sekimej itech tochanejkauan kanaj kinemiliaj ika yotechkajkayaujkej noso ika tinemij ipan se secta. Kanaj uelis kinemiliskej ika xok tikintlasojtlaj pampa xok imiuan tiiluipanouaj. Kanaj yejuamej kinemiliaj ika toTajtsin techtlajtlakolmakas sakin tla yotimijkej. Kipiya ika tikyejyekoskej tikasikamatiskej tlen kinemiliaj niman kuajli tikinkakiskej niman ijkon tikmatiskej tlenon kintekipachoua (Prov. 20:5). Uelis tikchiuaskej tlen okijto apóstol Pablo, akin nokojtiliaya kimasikamatis nochimej tlaltikpakchanejkej pampa yejuin kikauiliaya kiminojnotsas itech iTlajtol toTajtsin. Tla noijki ijkon tikchiuaj uelis techpaleuis matikinnojnotsakan tochanejkauan itech tlen tikneltokaj (1 Cor. 9:19-23).

13. ¿Kenon kipiya tikinnojnotsaskej tochanejkauan?

¹³ Matitlajtokan ika yemanki tlajtojli. Biblia kijtoua: “Nemotlajtol ma yemanki” (Col. 4:6). Uelis tiktlajtlaniliskej Jehová matechmaka iespíritu santo niman ijkon uelis tikinnojnotsaskej tochanejkauan ika tlajtojli yemanki. Xkipiya ika tikyejyekoskej titlajtlatoskej itech nochi tlen xmelauak kineltokaj. Tla itlaj kijtouaj noso itlaj texchiuiliaj tlen techyolkokoua, uelis tikimixkopinaskej apóstoles. Pablo okijkuilo: “Ijkuak techuijuikaltiaj, tiktlajtlaniliaj Dios ma kintiochiua on yejuan techuijuikaltiaj. Niman ijkuak techtlauelitaj niman techtlajyouiltiaj, tejuamej tikimijyouiyaj. Ijkuak techteneuiliaj on tlen xkuajli, tikinnankiliaj ika tlajtojli yejuan yemanki” (1 Cor. 4:12, 13).

14. ¿Kenon techpaleuiya tiktemakaskej se kuajli neskayotl ika tonemilis?

¹⁴ Matiktemakakan se kuajli neskayotl ika tonemilis. Maski yemanki tlajtojli uelis techpaleuis matinemikan ika yolseuilistli iuan tochanejkauan, tla ika tonemilis tiktemakaj se kuajli neskayotl, yejuin uelis melak techpaleuis (xpoua 1 Pedro 3:1, 2, 16). Tla tiktemakaj se kuajli neskayotl, uelis tikchiuaskej makitakan ika iteixpantijkauan Jehová yolpakij ipan innamiktilis, kintlajpiyaj ikoneuan, innemilis chipauak niman nemij ika inyojlo. Niman maski tla tochanejkauan xkeman nomachtiskiaj, uelis tiyolpakiskej pampa tikmatstoskej ika tikpaktiaj Jehová pampa itech tiyolmelaujkanemij.

15. ¿Tlenon uelis tikchiuaskej niman ijkon maka imiuan tokamaxijxikoskej tochanejkauan?

¹⁵ Nimantsin matikitakan kanon uelis peuas tlauejli. Matiknemilikan tlenon uelis kichiuas ika matokamaxijxikokan iuan tochanejkauan, niman matiknemilikan tlenon tikchiuaskej tla panoua (Prov. 12:16, 23). Se tokniuj chanti Australia kijtoua: “Nomontaj kixnamikiya tlen melauak. Ijkuak tikonnotsayaj pampa tikmatisnekiyaj kenon nemiya, noueuentsin niman nejua tiktlajtlaniliayaj Jehová matechpaleui ika maka tiktlauelnankiliskej. Kuajli tikitayaj itech tlenon titlajtoskiaj niman ijkon san kualtsin tonojnotsaskiaj. Xtiknekiyaj tiuejkauiskej titlajtoskej, pampa yejon kichiuaya chikauak matitlajtokan itech tlen tikneltokaj,  kuakon, san tiktemachiuayaj kech iuan titlajtlatoskiaj”.

16. ¿Tlenon techpaleuis tla xkuajli tomachiliaj pampa otokamatlajtlankej iuan se tochanejkauj?

¹⁶ Melauak, xuelis nochipa tikchiuaskej maka tokamatlajtlaniskej iuan tochanejkauan. Ijkuak ijkon panoua, uelis kichiuas maka kuajli matomachilikan, pampa melak tikintlasojtlaj niman nochipa tiknekij tikinyolpaktiskej. Tla ijkon tomachiliaj, matikilnamikikan ika kachtopa noneki timelajkanemiskej itech Jehová, niman xtotlasojtlalis tlen tikmachiliaj itech tochanejkauan. Tikchiuaskej yejuin, uelis kinpaleuis tochanejkauan makitakan ika tikchiuas noso xtikchiuas tlen kijtoua Biblia uelis kichiuas matikpiyakan noso matikpolokan tonemilis. Maski san kenon, matikilnamikikan ika xuelis tikchiualtiskej yakaj makitekichiuili Jehová. Tlen kema uelis tikchiuaskej, yejua tikimititiskej kenon yotechpaleui pampa tiktlakamatij. Pampa toTajtsin kintlasojtla, kineki ika yejuamej noijki mauelikan makitlapejpenikan itech yejuin: kitekichiuiliskej noso ka (Is. 48:17, 18).

17, 18. ¿Tlenon uelis tikchiuaskej tla se tochanejkauj kikaua ikalpan Jehová?

¹⁷ Tla se tochanejkauj kikixtiaj itech tlanechikojli noso yejua kijtoua ika xok kineki yes iteixpantijkauj Jehová, melak techyolkokoua, yeskia kentla itlaj techtlalaktilijtoskiaj ipan toyojlo. ¿Tlenon uelis tikchiuaskej tla panoua yejuin?

¹⁸ Matikchiuakan tlen technisiuiya itech toTajtsin. Tla tiknekij machikaujto totlaneltokil, kipiya ika nochipa tikpouaskej Biblia, toyektlaliskej niman tiaskej tlanechikojli, tikisaskej tontenojnotsaskej niman tiktlajtlaniliskej toTajtsin matechmaka kojtilistli tlen ika titlaxikoskej (Jud. 20, 21). Niman, ¿tlenon uelis tikchiuaskej tla pampa toyolkokouaj tikchiuaj yejuin san pampa yotomatkej? Maka matisiauikan. Matikchiuakan miyek ipan itekiyo Jehová, pampa yejuin techpaleuis matikinyekanakan totlanemililuan niman tlen tikmachiliaj. Matikitakan tlenon ipan onochiuj akin okijkuilo Salmo 73. Yejua opeuj tlanemilia ken xkinamiki, yejuin okichiuj melak manoyolajmana. San ika, ijkuak san otlanemili ipan itekiyo Jehová okipaleui makiyektlali ken tlanemiliaya (Sal. 73:16, 17). Tikchiuaskej yejon noijki techpaleuis.

19. ¿Kenon tikteititiaj ika tiktlakaitaj kenon temelajkatlalia Jehová?

¹⁹ Matiktlakaitakan ken temelajkatlalia Jehová. Maski teyolkoko ijkuak san kemach temelajkatlalia, yejuin melak kinpaleuiya nochimej, noijki akin otlajtlako (xpoua Hebreos 12:11). Se neskayotl, Jehová technauatia ika maka inuan matouikakan akin tlajtlakouaj niman xnoyolkuepaj (1 Cor. 5:11-13). Maski matechyolkoko, xkipiya ika tiktejtemoskej touikaskej iuan se tochanejkauj akin yokikixtijkej itech tlanechikojli, ika teléfono, ika mensajes, ika amatlajkuiloltin, nion ika programas tlen kitekitiltiaj Internet noso redes sociales.

20. ¿Tlen tlamachialistli xkipiya ika tikpoloskej?

²⁰ Maka keman matikpolokan tlamachialistli. Tlasojtlalistli kichia nochi tlemach, niman ika yejon ok tikpiyaj tlamachialistli ika manokuepakan akin okikaujkej Jehová (1 Cor. 13:7). Tla tikitaj ika se nisiuj tochanejkauj peua kipatla ken tlanemilia, uelis tiktlajtlaniliskej toTajtsin ika Biblia makimaka chikaualistli niman makiseli yejuin tlen kiyoleujtika makichiua: “Xuajmokuepa notech” (Is. 44:22).

21. ¿Tlenon kipiya ika tikchiuaskej tla imiuan tochanejkauan tikpiyaj tlauejli pampa tikchiuaj ken Cristo?

²¹ Jesús okijto ika kipiya melak tiktlasojtlaskej xsan ijkon ken tikintlasojtlaj totlaltikpakikniuan. Yejua kineltokaya ika inomachtijkauan yolchikaujkej yeskiaj niman ijkon melajkanemiskiaj maski inchanejkauan kimixnamikiskiaj. Tla imiuan tochanejkauan tikpiyaj tlauejli pampa tikchiuaj ken Cristo, matiktejtemokan itlapaleuilis Jehová niman ijkon tikimixnamiskej tlaueltin (Is. 41:10, 13). Matikmatstokan ika Jehová niman Jesús pakij topampa niman ika techteochiuaskej pampa timelajkanemij. ¿Xmelak ika yejuin melak techyolpaktia?