1, 2. (a) Ke khutšo efe yeo re e thabelago gona bjale? (b) Ke’ng seo se re thibelago go ba le khutšo e feletšego gona bjale? (Bona seswantšho se se lego ka mo godimo.)

KA MOKA ga rena re nyaka go phela ka khutšo, re se na dipelaelo. Re leboga Jehofa kudu gore o re neile “khutšo ya Modimo,” yeo e re thušago gore re se belaele le go nyama! (Bafil. 4:6, 7) Ka ge re ineetše go Jehofa, re ipshina ka go ba le “khutšo le Modimo,” e lego go ba bagwera ba gagwe.​—Baroma 5:1

² Lega go le bjalo, nako ya gore Modimo a dire gore mo lefaseng go be le khutšo e feletšego ga se ya tšwa e fihla. Batho ba bantši mehleng ye ya bofelo, ba dula ba elwa e bile ga ba dumelelane ka selo le ge e le sefe. (2 Tim. 3:1-4) Ka ge re le Bakriste, re swanetše go lwa le Sathane le go ganetša dithuto tša gagwe tša maaka tšeo a di phatlalatšago. (2 Bakor. 10:4, 5) Eupša ka dinako tše dingwe, batho ba gabo rena bao e sego Dihlatse tša Jehofa ba ka dira gore re se be le khutšo. Ba bangwe ba ka kwera ditumelo tša rena, ba re latofatša ka gore ke rena re aroganyago lapa, goba ba re tšhošetša ka gore ba tla re raka ka gae ge e ba re sa tlogele go ba Dihlatse tša Jehofa. Re swanetše go dira’ng  ge e ba ba gabo rena ba re ganetša go hlankela Jehofa? Re ka kgona bjang go tšwela pele re hlankela Jehofa le ge ba re ganetša?

3, 4. (a) Dithuto tša Jesu di be di ka ba le mafelelo afe? (b) Ke neng moo go bego go tlo ba thata le go feta go ba molatedi wa Jesu?

³ Jesu o be a tseba gore dithuto tša gagwe di be di tlo aroganya batho, le gore bao ba bego ba nyaka go mo latela, ba be ba swanetše go ba le sebete gore ba kgotlelele. Kganetšo yeo e be e ka dira gore go se sa ba le khutšo ka lapeng. Jesu o boletše gore: “Le se ke la nagana gore ke tletše go tliša khutšo lefaseng; ke tletše go tliša tšhoša, e sego khutšo. Gobane ke tletše go baka karogano magareng ga motho le tatagwe, morwedi le mmagwe, le magareng ga ngwetši le mmatswale. Ka kgonthe manaba a motho e tla ba batho ba lapeng la gabo.”​—Mat. 10:34-36.

⁴ Ge Jesu a be a re “Le se ke la nagana gore ke tletše go tliša khutšo,” o be a bontšha gore ba bangwe ba batheetši ba gagwe ba be ba swanetše go nagana ka ditlamorago tša go mo latela. Molaetša wa gagwe o be o ka aroganya batho. Ke therešo gore morero wa gagwe e be e se go aroganya batho, eupša e be e le go botša batho ka Modimo wa therešo. (Joh. 18:37) Lega go le bjalo, go ba molatedi wa Kriste go be go tla ba thata ge mogwera goba wa leloko a sa rate ditherešo.

5. Balatedi ba Jesu ba kgotleletše’ng?

⁵ Jesu o ile a bontšha gore go ganetšwa ke ditho tša lapa e be e tla ba bothata bjo bongwe bjo balatedi ba gagwe ba bego ba tla swanelwa ke go bo kgotlelela. (Mat. 10:38) E le gore ba dule ba mmotegela, balatedi ba gagwe ba be ba swanetše go kgotlelela go kwerwa le go aroganywa le malapa a gabo bona. Lega go le bjalo, seo ba se hweditšego ka mokgatlong wa Jehofa se feta kgole seo ba se lobilego.​—Bala Mareka 10:29, 30.

6. Ke’ng seo re swanetše go se gopola ge ba gabo rena ba re ganetša go hlankela Jehofa?

⁶ Le ge ba gabo rena ba re ganetša go hlankela Jehofa, ga re tlogele go ba rata, eupša re swanetše gopola gore go rata Modimo le Kriste go tla pele. (Mat. 10:37) Le gona, re swanetše go tseba gore Sathane o tlo leka go šomiša batho ba gabo rena gore re se sa botegela Jehofa. Anke re boleleng ka maemo a mangwe ao a akaretšago go ganetšwa ka lapeng, gomme re bone kamoo re ka kgotlelelago maemo ao.

7. Bakriste bao ba nago le balekane bao e sego Dihlatse tša Jehofa ba swanetše go lebelela maemo a bona ka tsela efe?

⁷ Beibele e lemoša gore bao ba tsenago lenyalong “ba tla ba le tlaišego nameng.” (1 Bakor. 7:28) Ge e ba molekane wa gago e se Hlatse ya Jehofa, o ka ba le stress le mathata a mantši go feta motho yo a nago le molekane yo e lego Hlatse ya Jehofa. Lega go le bjalo, go bohlokwa gore o lebelele maemo a gago ka tsela yeo Jehofa a a lebelelago ka yona. Taba ya gore ga bjale molekane wa gago ga a nyake go ba Hlatse ya Jehofa, ga e go fe lebaka la gore o arogane le yena goba o mo hlale. (1 Bakor. 7:12-16) Le ge monna wa gago yo e sego Hlatse ya Jehofa a ka se etelele pele dilong tša Modimo, o swanetše go mo hlompha ka gobane e sa dutše e le hlogo ya lapa. Ka mo go swanago, monna wa mokriste o swanetše go rata le go hlokomela mosadi wa gagwe yo e sego Hlatse ya Jehofa.​—Baef. 5:22, 23, 28, 29.

8. O ka ipotšiša dipotšišo dife ge molekane wa gago a go ganetša go dira dilo tše itšego ka mokgatlong wa Jehofa?

⁸ O tla dira’ng ge e ba molekane wa gago a leka go go ganetša go dira dilo tše itšego ka mokgatlong wa Jehofa? Ka mohlala, monna wa kgaetšedi yo mongwe, o ile a mo laela gore a ye tšhemong feela ka matšatši a itšego. Ge e ba o lebeletšane le boemo bja go swana le bjo, ipotšiše  gore: ‘Na molekane wa ka o nyaka gore ke tlogele go hlankela Modimo ka mo go feletšego? Ge e ba go se bjalo, na nka mo kwa?’ Go ba le tekatekano go tla go thuša gore o se fapane le molekane wa gago go sa hlokagale.​—Bafil. 4:5.

9. Bakriste ba ka ruta bana ba bona bjang go hlompha motswadi yo e sego Hlatse ya Jehofa?

⁹ Go ruta bana ba gago ka Jehofa go ka ba thatanyana ge molekane wa gago e se Hlatse ya Jehofa. Ka mohlala, o swanetše go ruta bana ba gago gore ba phele ka taelo ya ka Beibeleng ya gore: “Godiša tatago le mmago.” (Baef. 6:1-3) Eupša o tla dira’ng ge e ba molekane wa gago a se na taba le melao ya ka Beibeleng ya boitshwaro? Beela bana ba gago mohlala ka go hlompha molekane wa gago. Šetša dika tša gagwe tše dibotse le go mmotšha gore o a mo rata. Phema go bolela dilo tše mpe ka molekane wa gago pele ga bana ba gago. Go e na le moo, ba hlalosetše gore motho yo mongwe le yo mongwe o na le kgetho ya go hlankela Jehofa. Ge molekane yo e sego Hlatse ya Jehofa a bona gore bana itshwere gabotse, a ka tla borapeding bja therešong.

10. Batswadi bao balekane ba bona e sego Dihlatse tša Jehofa ba ka ruta bana ba bona bjang ditherešo tša Beibele?

¹⁰ Ka dinako tše dingwe, molekane yo e sego Hlatse ya Jehofa a ka gapeletša bana gore ba keteke matšatši ao a thulanago le dithuto tša Beibele goba ba ye kerekeng. Banna ba bangwe ba ka thibela basadi ba bona go ruta bana ba bona ka Beibele. Lega go le bjalo, mosadi wa Mokriste o swanetše go dira sohle seo a ka se kgonago go ruta bana ba gagwe therešo ya Beibele. (Dit. 16:1; 2 Tim. 3:14, 15) Ka mohlala, monna yo a nago le mosadi yo e lego Hlatse ya Jehofa a ka thibela mosadi wa gagwe go swarela ngwana wa bona thuto, goba go ya le yena dibokeng  tša Bokriste. Le ge ka tlhompho a dira seo monna wa gagwe a mo laelago sona, eupša ge sebaka se bulega a ka botša bana ba gagwe ditumelo tša gagwe, ka go re’alo a ba ruta mekgwa le go tseba Jehofa. (Dit. 4:19, 20) Eupša mafelelong bana ba gagwe ke bona ba swanetšego go itirela phetho ditabeng tša bodumedi.​—Doit. 30:19, 20. *

11. Ke’ng seo se ka dirago gore go be le diphapano gare ga gago le batho ba geno bao e sego Dihlatse tša Jehofa?

¹¹ Mohlomongwe ge o be o thoma go ithuta le Dihlatse tša Jehofa ga se wa tsebiša batho ba geno. Eupša ge tumelo ya gago e dutše e gola, o ile wa bona gore o swanetše go ba botša ka ditumelo tša gago. (Mareka 8:38) Go thwe’ng ge e ba go emela tumelo ya gago ka sebete go bakile diphapano gare ga gago le batho ba geno bao e sego Dihlatse tša Jehofa? A re ahlaahleng dilo tšeo o ka di dirago go fokotša diphapano o dutše o botegela Jehofa.

12. Ke ka baka la’ng ba gabo rena bao e sego Dihlatse tša Jehofa ba ka re ganetša, gona re ka bontšha bjang gore re a ba naganela?

¹² Naganela batho ba geno bao e sego Dihlatse tša Jehofa. Le ge rena re ka ba re ipshina ka ditherešo tša ka Beibeleng tšeo re di rutilwego, batho ba gabo rena ba ka nagana gore re forilwe goba gore re bodumeding bjo bo sa kwešišegego. Ba ka nagana gore ga re sa ba rata ka gobane ga re sa keteka matšatši a maikhutšo le bona. Ba ka boifa le gore re ka tla ra diragalelwa ke selo se sebe ge re hwile. Re swanetše go ba naganela gomme re leke go ipea boemong bja bona, re ba theetše ka kelohloko gore re kgone go kwa seo ba tshwenyegilego ka sona. (Die. 20:5) Moapostola Paulo o ile a šoma ka thata gore a kwešiše “batho ba mehuta ka moka,” e le gore a ba botše ditaba tše dibotse. Le rena re ka holwa ke go dira se se swanago.​—1 Bakor. 9:19-23.

13. Re swanetše go bolela bjang le batho ba gabo rena bao e sego Dihlatse tša Jehofa?

¹³ Bolela ka boleta. Beibele e re: “Anke mantšu a lena ka mehla e be a kgahlišago.” (Bakol. 4:6) Re swanetše go kgopela Jehofa gore a re nee moya wa gagwe o mokgethwa e le gore re bontšhe dika tšeo di enywago ke moya woo ge re bolela le ba gabo rena bao e sego Dihlatse tša Jehofa. Ga se ra swanela go ngangišana le bona ka selo se sengwe le se sengwe seo ba se dumelago. Ge ba ka re kweša bohloko ka mantšu a bona goba ka ditiro tša bona, re swanetše go ekiša mohlala wa baapostola. Paulo o ngwadile gore: “Ge re rogwa, re a šegofatša; ge re tlaišwa, re kgotlelela ka go se fele pelo; ge re senywa leina, re araba ka boleta.”​—1 Bakor. 4:12, 13.

14. Go itshwara gabotse go ka ba le mafelelo afe?

¹⁴ Dula o itshwere gabotse. Le ge go bolela ka boleta go thuša ge re boledišana le ba gabo rena bao e sego Dihlatse tša Jehofa, go itshwara gabotse go ka thuša le go feta. (Bala 1 Petro 3:1, 2, 16.) Dira gore batho ba geno goba ba leloko bao e sego Dihlatse tša Jehofa ba bone gore Dihlatse di na le malapa ao a thabilego, di hlokomela bana ba tšona, di itshwere gabotse, di phela ka melao ya Modimo e bile di phela bophelo bjo bo nago le morero. Le ge ba leloko ba ka se amogele ditherešo, re thabišwa ke go tseba gore re kgahliša Jehofa ge re mmotegela.

15. Re ka itokišeletša bjang go rarolla dilo tšeo di ka tlago tša feleletša ka diphapano?

¹⁵ Itokiše. Nagana ka dilo tšeo di ka dirago gore go be le diphapano, gomme o bone kamoo o ka tlago wa di rarolla ka gona. (Die. 12:16, 23) Kgaetšedi wa kua Australia o re: “Ratswale o be a hloile kudu bodumedi bja therešo. Ka gona, pele re ka mo etela, nna le monna wa ka re be re rapela Jehofa gore a re thuše gore re tle re mo arabe ka boleta ge a bolela le rena gampe. Re be  re lokišeletša seo re tlago go bolela le yena ka sona gore poledišano ya rena e se feleletše ka dingangišano. E le gore re se feleletše re ngangišana ka ditaba tša bodumedi, re be re ipeela nako ya go sepela.”

16. O ka dira’ng gore o se ipone molato wa go nyamiša batho ba geno?

¹⁶ Ga se gore o tla kgona go phema maemo ka moka ao a ka dirago gore o fapane le batho ba geno bao e sego Dihlatse tša Jehofa. Ka dinako tše dingwe diphapano tše bjalo di ka dira gore o ipone molato, kudukudu ka gore o rata batho ba geno e bile o nyaka go dula o ba thabiša. Ge e ba o ikwa ka tsela yeo, dula o gopola gore o swanetše go botegela Jehofa go feta batho ba geno. Ge o emela borapedi bja therešo, ba leloko ba tla bona gore melao ya Beibele e tla pele bophelong bja gago. Go sa šetšwe gore boemo ke bofe, gopola gore o ka se gapeletše batho ba bangwe go amogela therešo ya Beibele. Go e na le moo, ba swanetše go bona ka wena gore go phela ka ditaelo tša Jehofa go a hola. Go no swana le ge Modimo wa rena yo lerato a ile a re nea sebaka sa go ikgethela tsela yeo re swanetšego go e latela, le bona o ba nea sebaka seo.​—Jes. 48:17, 18.

17, 18. Ke’ng seo se ka go thušago go kgotlelela ge setho sa lapa se tlogela Jehofa?

¹⁷ Ge setho sa lapa se kgaotšwe o ka ikwa eka ba go hlabile ka lerumo pelong. O ka dira’ng gore o kgotlelele bohloko bjoo?

¹⁸ Dula o swaregile ka go hlankela Jehofa. Bala Beibele ka mehla, lokišetša diboka gomme o be go tšona, eya tšhemong o be o rapele Jehofa gore a go thuše go kgotlelela mathata. (Juda 20, 21) Go thwe’ng ge e ba o dirile dilo tše eupša o sa dutše o ekwa bohloko? O se ke wa fela matla! Go swarega ka go hlankela Jehofa go tla go thuša gore o se nagane kudu ka mathata a gago, e bile go tla go thuša gore o kgone laola maikwelo a gago. Ela hloko seo se ilego sa diragalela mongwadi wa Psalme ya 73. O ile a se sa bona dilo gabotse gomme seo sa dula se mo tshwenya, eupša o ile a thušwa ke go ya tempeleng ya Jehofa. (Ps. 73:16, 17) Le wena ge o ka tšwela pele o hlankela Jehofa, o tla holega go swana le mongwadi yo.

19. O ka bontšha bjang gore o hlompha tayo ya Jehofa?

¹⁹ Hlompha tayo ya Jehofa. Jehofa o a tseba gore le ge tayo e kweša bohloko, e hola motho yo a kgaotšwego go akaretša le batho ka moka bao ba mo ratago. (Bala Baheberu 12:11.) Ka mohlala, Jehofa o re laela gore re “lese go gwerana” le badiradibe bao ba sa itsholego. (1 Bakor. 5:11-13) Gaešita le ge re ekwa bohloko ge setho sa lapa se kgaotšwe, re swanetše go phema go se founela, go se ngwalela molaetša ka sms, go se ngwalela lengwalo, go se romela e-mail goba go bolela le sona Inthaneteng.

20. Re ka dula re holofela’ng?

²⁰ Dula o na le kholofelo. Lerato le “holofela tšohle,” ka gona re dula re na le kholofelo ya gore batho bao ba tlogetšego Jehofa, ka letšatši le lengwe ba tla boela go yena. (1 Bakor. 13:7) Ge e ba o bona setho sa lapa se thoma go fetoga, o ka rapela Jehofa gore a se matlafatše ka Mangwalo, a se thuše go arabela kgopelong ya gagwe e rego: “Boela go nna.”​—Jes. 44:22.

21. O swanetše go dira’ng ge e ba go ba molatedi wa Jesu go tlišitše diphapano ka lapeng la geno?

²¹ Jesu o itše ge e ba re rata motho le ge e le ofe go feta yena, ga re mo swanele. Lega go le bjalo, o be a kgodišegile gore balatedi ba gagwe ba be ba tla dula ba botega le ge ba ganetšwa ke batho ba gabo bona. Ge e ba go ba molatedi wa Jesu go tlišitše “tšhoša” ka lapeng la geno, ithekge ka Jehofa gore a go thuše go kgotlela mathata. (Jes. 41:10, 13) Thabišwa ke go tseba gore Jehofa le Jesu ba ikgantšha ka wena le gore ba tla go nea moputso ka ge o ba botegetše.