1, 2. а) Абони цӕхуӕн фарнӕй хайгин ан? б) Цӕмӕй ӕппундӕр мацӕбӕл тухсӕн, уомӕн нур гӕнӕн цӕмӕннӕ ес? (Кӕсӕ хузӕмӕ статьяй райдайӕни.)

АЛКЕДӔР ни фӕндуй, цӕмӕй сабур цард кӕнӕн ӕма макӕд мацӕбӕл тухсӕн. Абони Йеговӕй хъӕбӕр боз ан, ӕ фарнӕй нӕ ке исхайгин кодта. Еци фарнӕ нӕ гъӕуай кӕнуй, иуӕнгти хъаурӕ ка маруй, еци сагъӕстӕй (Фил. 4:6, 7). Удта ма нӕ цард Йеговӕн ке иснивонд кодтан, уой фӕрци «фӕрнӕй цӕрӕн Хуцауи хӕццӕ» (Ром. 5:1).

² Фал Хуцау ӕгас зӕнхӕбӕл дӕр фарнӕ нӕма искодта. Нур ци рӕстӕг цӕрӕн, уой Библи хонуй «фӕстаг бӕнттӕ», ӕма уомӕ гӕсгӕ берӕ зиндзийнӕдтӕбӕл ӕмбӕлӕн. Абони ци адӕни ’хсӕн цӕрӕн, уонӕй сӕ фулдӕр кӕрӕдземӕ знаги цӕстӕй кӕсунцӕ ӕма ӕнцӕ хилӕмондаг (2 Тим. 3:1–4). Уомӕй уӕлдай ма тох кӕнӕн Сайтани ӕма ӕ мӕнгӕ ахурӕдти хӕццӕ (2 Кор. 10:4, 5). Фал нӕ уомӕй хъӕбӕрдӕр ба, ӕвӕдзи, тухсун кӕнуй, нӕ хеуӕнттӕй Йеговӕн ка нӕ лӕггадӕ кӕнуй, етӕ нӕмӕ ке  ниффуд унцӕ, е. Цӕбӕл ӕууӕндӕн, уобӕл ходун райдайунцӕ кенӕ нин фӕззӕгъунцӕ, бийнонти цард ихалетӕ, зӕгъгӕ. Сауӕнгӕ ма нин фӕззӕгъунцӕ, зӕгъгӕ, цалинмӕ дӕ дин нӕ ниууадзай, уӕдмӕ мин дӕхе мабал фӕууинун кӕнӕ. Мадта нӕ хеуӕнттӕ нӕ нихмӕ ку уонцӕ, уӕд уомӕ цӕхуӕн цӕстӕй гъӕуама кӕсӕн? Ӕма уӕхӕн уавӕри нӕ бон ци ӕй кӕнун?

3, 4. а) Киристей ахурӕдтӕ адӕни цардбӕл куд рабӕрӕг унцӕ? б) Киристей фӕдбӕл цӕун уӕлдай зиндӕр кӕд фӕууй?

³ Йесо ӕй зудта, ӕ ахурӕдтӕ алке зӕрдӕмӕ ке нӕ цӕудзӕнцӕ. Удта ӕй зудта, ӕ фӕдбӕлдзӕугути нихмӕ дӕр ке цӕудзӕнцӕ ӕма сӕ нифсхаст ун ке гъӕудзӕй. Уой туххӕй, гӕнӕн ес, ӕма сӕ бийнонти фарнӕ дӕр фехӕла. Киристе дзурдта: «Уотӕ уӕмӕ ма кӕсӕд, ӕма ӕз зӕнхӕмӕ фарнӕ ӕрхӕссунмӕ ӕрцудтӕн. Фарнӕ ӕрхӕссунмӕ не ’рцудтӕн, фал хъӕма. Ӕз ӕрцудтӕн, цӕмӕй фурти искӕнон ӕ фиди нихмӕ, кизги ӕ мади нихмӕ, ӕма киндзи ба е ’фсийни нихмӕ. Гъо, адӕймагӕн е знӕгтӕ уодзӕнцӕ ӕхе бийнонтӕ» (Матф. 10:34–36).

⁴ Киристе уотӕ цӕмӕн загъта, зӕгъгӕ, «уотӕ уӕмӕ ма кӕсӕд, ӕма ӕз зӕнхӕмӕ фарнӕ ӕрхӕссунмӕ ӕрцудтӕн»? Уотӕ ’й фӕндадтӕй, цӕмӕй адӕн зононцӕ, ӕ фӕдбӕлдзӕугутӕн цӕмӕ ӕнгъӕлмӕ кӕсгӕ ’й, уой. Ке зӕгъун ӕй гъӕуй, Киристе зӕнхӕмӕ Хуцауи рӕстдзийнадӕ игъосун кӕнунмӕ ӕрцудӕй, бийнонти фарнӕ ихалунмӕ нӕ, фал (Иоан. 18:37). Фал ӕй ӕ ахуркӕнуйнӕгтӕ гъӕуама лӕдӕрдтайуонцӕ, ӕ фӕдбӕл цӕун алкӕд ӕнцон ке нӕ уодзӕй, уӕлдайдӕр ба се ’мбӕлттӕ ӕма сӕ бийнонтӕ рӕстдзийнади нихмӕ ку уонцӕ, уӕд.

5. Киристей фӕдбӕлдзӕугутӕ цӕхуӕн зиндзийнӕдтӕбӕл ӕмбалдӕнцӕ?

⁵ Киристе куд загъта, уомӕ гӕсгӕ ӕ фӕдбӕлдзӕугутӕ гъӕуама цӕттӕ уонцӕ, сӕ бийнонтӕ сӕ нихмӕ ке цӕудзӕнцӕ, уомӕ (Матф. 10:38). Киристей ахуркӕнуйнӕгтӕбӕл дӕр, ӕвӕдзи, сӕ хеуӕнттӕ худтӕнцӕ кенӕ сӕ хӕццӕ дзоргӕ дӕр нӕбал кодтонцӕ. Фал Киристей фӕдбӕл ка рацудӕй, етӕ, ци фесафтонцӕ, уомӕй берӕ фулдӕр иссирдтонцӕ. (Бакӕсӕ Марки 10:29, 30.)

6. Нӕ зӕрдӕбӕл ци гъӕуама дарӕн, нӕ хеуӕнттӕ нӕ нихмӕ ку фӕццӕунцӕ, уӕд?

⁶ Кӕд нин нӕ хеуӕнттӕ Йеговӕн лӕггадӕ кӕнунмӕ къахкъуӕрӕнтӕ ӕвӕрунцӕ, уӕддӕр сӕ уарзӕн. Фал уой дӕр нӕ иронх кӕнӕн, ӕма нин Хуцау ӕма Йесо Киристе нӕ царди фиццаг бунати ке ’нцӕ (Матф. 10:37). Уомӕй уӕлдай ма гъӕуама лӕдӕрӕн, Сайтан дӕр ӕй ке зонуй, нӕ хеуӕнтти куд уарзӕн, уой, ӕма уомӕй дӕр испайда кӕндзӕй, цӕмӕй нӕ Йеговӕй раидард кӕна. Мадта ӕркӕсӕн, нӕ хеуӕнттӕ нӕ нихмӕ куд фӕццӕунцӕ ӕма уӕхӕн уавӕри нӕ бон ци ӕй кӕнун, уомӕ.

7. Киристонӕн ӕ цардӕмбал Йеговӕн ку нӕ лӕггадӕ кӕна, уӕд уомӕ ци цӕстӕй гъӕуама кӕса?

⁷ Библи куд зӕгъуй, уомӕ гӕсгӕ  бийнонтӕ ка искӕнуй, «уонӕн сӕ царди фӕззиннуй нӕуӕг зиндзийнӕдтӕ» (1 Кор. 7:28). Бийнонтӕй еу Йегови Ӕвдесӕн ку уа, иннӕ ба нӕ, уӕдта бийнонти цард никки зиндӕр фӕууй. Фал хъӕбӕр ӕхсидзгӕ ӕй гъуддагмӕ Йегови цӕстӕй кӕсун. Дӕ цардӕмбал Йеговӕн ке нӕ лӕггадӕ кӕнуй, е дин гъӕуама рӕуонӕ ма уа, цӕмӕй ӕ хӕццӕ мабал цӕрай кенӕ си рахецӕн уай (1 Кор. 7:12–16). Кӕд дӕ сӕрихецау Йеговӕн нӕ лӕггадӕ кӕнуй ӕма бийнонти ӕууӕндундзийнадӕбӕл нӕ тухсуй, уӕддӕр ӕй гъӕуама нимайай. Уотӕ лӕгӕн дӕр кӕд ӕ бийнойнаг Йегови Ӕвдесӕн нӕй, уӕддӕр ӕй гъӕуама зӕрдиагӕй уарза (Еф. 5:22, 23, 28, 29).

8. Дӕ цардӕмбал уобӕл ку архайа, цӕмӕй Йеговӕн минкъийдӕр лӕггадӕ кӕнай, уӕд дӕ бон цӕбӕл ӕй расагъӕс кӕнун?

⁸ Фал дӕ цардӕмбал уобӕл ку архайа, цӕмӕй Йеговӕн минкъийдӕр лӕггадӕ кӕнай, уӕдта дин ци кӕнгӕ ӕй? Зӕгъӕн, еу хуӕрӕн ӕ сӕрихецау фӕлмӕнӕй загъта, цӕмӕй къуӕрей дӕргъи игъосун кӕнунмӕ ӕрмӕстдӕр кӕцидӕр бӕнтти цудайдӕ. Кӕд ду дӕр уӕхӕн уавӕри дӕ, уӕд дӕхе бафӕрсӕ: «Мӕ цардӕмбали ӕцӕгӕйдӕр уотӕ фӕндуй, цӕмӕй Йеговӕн мабал лӕггадӕ кӕнон? Кӕд нӕ, уӕд мӕ бон н’ адтайдӕ, е куд зӕгъуй, уотӕ бакӕнун?» Лӕдӕргӕй ку архайӕн, уӕд бийнонти медӕг уӕлдай хатт хӕлхъойтӕ нӕ уодзӕй (Фил. 4:5).

9. Киристӕнттӕ сӕ сувӕллӕнтти куд ахур кӕнунцӕ, цӕмӕй Йеговӕн ка нӕ лӕггадӕ кӕнуй, еци ниййерӕги дӕр нимайонцӕ?

⁹ Бийнонти медӕг Йеговӕн ӕрмӕстдӕр лӕг кенӕ уосӕ ку лӕггадӕ кӕна, уӕд сувӕллӕнттӕ гъомбӕл кӕнун уӕлдай зиндӕр фӕууй. Зӕгъӕн, дӕ сувӕллӕнтти гъӕуама ахур кӕнай Библий фӕдзӕхстмӕ игъосун: «Нимайӕ дӕ мадӕ ӕма дӕ фиди» (Еф. 6:1–3).  Фал дӕ цардӕмбал Библий уагӕвӕрдтӕмӕ гӕсгӕ ку нӕ цӕра, уӕдта? Дӕ цардӕмбали нимайӕ, ӕма дӕ сувӕллӕнттӕн дӕр уомӕй фӕнзуйнаг уо. Ӕ хуарз менеугутӕбӕл ин сагъӕс кӕнӕ ӕма ӕй ӕ хуарз гъуддӕгти туххӕй алкӕддӕр ӕстауӕ, удта ин дзорӕ, ке ӕй уарзис, уой. Дӕ сувӕллӕнтти рази ин ӕ фудкой макӕд кӕнӕ. Лӕдӕрун син кӕнӕ, адӕймагӕн ӕхе барӕ ке ӕй, Йеговӕн лӕггадӕ кӕндзӕй ӕви нӕ. Ка ’й зонуй, сувӕллӕнттӕ сӕхе куд дарунцӕ, уомӕ кӕсгӕй дӕ цардӕмбал дӕр рӕстдзийнадӕмӕ е ’ргом раздахдзӕй.

10. Киристон ниййергутӕн сӕ бон ци ӕй кӕнун, цӕмӕй сӕ сувӕллӕнттӕ Йегови бауарзонцӕ?

¹⁰ Йеговӕн ка нӕ лӕггадӕ кӕнуй, еци ниййергутӕй еуӕй-еуети фӕффӕндуй, цӕмӕй сӕ сувӕллӕнттӕ бӕрӕгбӕнттӕ дӕр кӕнонцӕ, ӕма мӕнгӕ дини ахурӕдтӕ дӕр зононцӕ. Еуӕй-еу лӕгтӕ сӕ сувӕллӕнттӕн Библий кой кӕнун дӕр нӕ фӕууадзунцӕ. Фал уӕхӕн уавӕри дӕр мадӕн ӕ бон куд ӕй, уотӕ гъӕуама архайа, цӕмӕй ӕ сувӕллӕнттӕн рӕстдзийнадӕ амона (Гъуд. 16:1; 2 Тим. 3:14, 15). Зӕгъӕн, нӕ хуӕрӕн ӕ лӕг барӕ ку нӕ дӕтта, цӕмӕй сувӕллӕнтти хӕццӕ Библи ахур кӕна кенӕ сӕ ӕ хӕццӕ ӕмбурдтӕмӕ хона, уӕд ӕ бон ци ӕй кӕнун? Еци унаффӕ лӕг рахаста ӕма имӕ нӕ хуӕрӕ байгъосдзӕй, фал уӕддӕр ӕ бон уодзӕй ӕ сувӕллӕнттӕн Йегови туххӕй дзорун, фадуат ин ку фӕззинна, уӕд. Уотемӕй ӕ сувӕллӕнттӕ Хуцауи раст уагӕвӕрдтӕ базондзӕнцӕ (Гъуд. 4:19, 20). Кудфӕнди ма уа, уӕддӕр сувӕллӕнттӕ сӕхуӕдтӕ гъӕуама рахӕссонцӕ унаффӕ, Йеговӕн лӕггадӕ кӕндзӕнцӕ ӕви нӕ (Дук. з. 30:19, 20) *.

11. Нӕ хеуӕнттӕ нӕмӕ арӕх цӕй туххӕй ниффуд унцӕ?

¹¹ Ка ’й зонуй, Библи ахур кӕнун ку райдӕдтай, уӕд ӕй фиццӕгти дӕ хеуӕнттӕн нӕ загътай. Фал де ’ууӕндундзийнадӕ куд ирӕзгӕ цудӕй, уотӕ ба ’й балӕдӕрдтӕ, Йеговӕн лӕггадӕ кӕнун дӕ ке фӕндуй, уой син радзорун ке гъӕуй (Мар. 8:38). Ка ’й зонуй дӕмӕ уой туххӕй дӕ хеуӕнттӕ ниффуд уодзӕнцӕ. Мадта ӕркӕсӕн, цӕхуӕн къахдзӕфтӕ нӕ бон ӕй искӕнун, цӕмӕй нӕ хеуӕнтти хӕццӕ дӕр федауӕн ӕма Йеговӕн дӕр лӕггадӕ кӕнӕн.

12. Нӕ хеуӕнттӕ нӕ нихмӕ цӕмӕн фӕццӕунцӕ ӕма сӕ хуӕздӕр цӕй фӕрци балӕдӕрдзиан?

¹² Байархайӕ, дӕ хеуӕнттӕ цӕбӕл тухсунцӕ, уой балӕдӕрун. Мах хъӕбӕр цийнӕ кӕнӕн, рӕстдзийнадӕ ке базудтан, уобӕл. Фал нӕ хеуӕнттӕмӕ ба, ка ’й зонуй, уотӕ кӕса ӕма нӕ басайдтонцӕ кенӕ цидӕр тӕссаг сектӕмӕ бахаудтан. Сӕ хӕццӕ бӕрӕгбӕнттӕ ке нӕбал фӕккӕнӕн, уой туххӕй ба сӕмӕ уотӕ фӕккӕсуй, цума сӕ нӕбал уарзӕн. Уотӕ цӕмӕн сагъӕс кӕнунцӕ, уой цӕмӕй балӕдӕрӕн, уой туххӕй сӕмӕ гъӕуама лӕмбунӕг байгъосӕн (Ӕмб. 20:5). Апостол Павел архайдта «аллихузи адӕни» балӕдӕрун,  цӕмӕй син хуарз хабар ӕнтӕстгунӕй игъосун кодтайдӕ. Мах дӕр ку архайӕн нӕ хеуӕнтти балӕдӕрун, уӕд ӕй зондзиан, сӕ хӕццӕ рӕстдзийнади туххӕй дзорун хуӕздӕр куд уодзӕй, уой (1 Кор. 9:19–23).

13. Нӕ хеуӕнтти хӕццӕ куд гъӕуама дзорӕн?

¹³ Дӕ хеуӕнтти хӕццӕ фӕлмӕнӕй дзорӕ. Библи зӕгъуй: «Уӕ дзурд алкӕддӕр уӕд фӕлмӕн» (Кол. 4:6). Е ӕнцон нӕй. Фал нӕ бон ӕй Йеговӕй сугъдӕг хъаурӕ ракорун, цӕмӕй нин банхус кӕна нӕ хеуӕнтти хӕццӕ фӕлмӕнӕй радзорун. Сӕ дин раст ке нӕй, уой дзорун син нӕ гъӕуй. Кӕд нин сӕ дзубандитӕбӕл кенӕ сӕ миутӕбӕл нӕ зӕрдӕ ходуй, уӕд нӕ бон ӕй апостол Павели дзурдтӕмӕ гӕсгӕ архайун: «Ӕлгъетунцӕ нӕ – мах син арфӕ кӕнӕн, ӕфхуӕрунцӕ нӕ – уӕддӕр бухсӕн; нӕ фудкой кӕнунцӕ – уӕддӕр сӕ хӕццӕ фӕлмӕнӕй дзорӕн» (1 Кор. 4:12, 13).

14. Хуӕрзӕгъдау цард нин цӕхуӕн арфӕдзийнӕдтӕ ӕрхӕсдзӕй?

¹⁴ Хуӕрзӕгъдау цард кӕнӕ. Е ӕхсидзгӕ цӕмӕн ӕй? Хеуӕнтти хӕццӕ фӕлмӕнӕй дзорун хуарз ӕй, фал гъуддӕгтӕн дзурдтӕй фулдӕр хъаурӕ ес. (Бакӕсӕ 1 Петури 3:1, 2, 16.) Дӕ хеуӕнттӕ ’й дӕубӕл уинӕнтӕ, Йегови Ӕвдесӕнтӕн цӕхуӕн федар бийнонтӕ ес, сӕ сувӕллӕнтти куд гъомбӕл кӕнунцӕ, цӕхуӕн кӕдзос ӕма хуӕрзӕгъдау цард кӕнунцӕ, удта куд амондгун ӕнцӕ, уой. Рӕстдзийнадӕ ӕппун ку нӕ базононцӕ, уӕддӕр ӕй зондзиан, нӕ цардӕй Йегови зӕрдӕ ке рохс кӕнӕн ӕма нин е цийнӕдзийнадӕ хӕсдзӕй.

15. Хилӕмӕ ка ӕркӕнуй, уӕхӕн уавӕртӕбӕл нӕ бон куд ӕй рагацау расагъӕс кӕнун?

¹⁵ Идардмӕ уинӕ. Рагацау расагъӕс кӕнӕ, хилӕмӕ ци ӕркӕнуй ӕма уӕхӕн уавӕри куд архайдзӕнӕ, уобӕл (Ӕмб. 12:16, 23). Австралийӕй еу хуӕрӕ зӕгъуй: «Мӕ сӕрихецауи фиди зӕрдӕмӕ нӕ дин хъӕбӕр нӕ цудӕй. Ӕма имӕ уотид рабӕрӕг кӕнунмӕ ку цӕуианӕ, уӕд рагацау Йеговӕмӕ раковианӕ, цӕмӕй имӕ маци исдзорӕн, нӕ нихмӕ ести ӕфхуӕрӕн дзубандитӕ ку ракӕна, уӕд. Удта цӕмӕй нӕ дзубанди хилӕмӕ ма рахизтайдӕ, уой туххӕй цӕбӕл дзордзиан, уобӕл дӕр рагацау расагъӕс кӕнианӕ. Уомӕй уӕлдай ма имӕ берӕ дӕр нӕ басабур уайанӕ, цӕмӕй бабӕй нӕ дзубанди дини хабӕрттӕмӕ ма рахизтайдӕ ӕма си хилӕ ма рауадайдӕ».

16. Дӕ хеуӕнтти хӕццӕ кӕрӕдзей ке нӕ лӕдӕретӕ, уой туххӕй дӕхемӕ фудгин ку кӕсай, уӕд дин ци банхус кӕндзӕй?

¹⁶ Ке зӕгъун ӕй гъӕуй, уӕддӕр дӕ алкӕд нӕ лӕдӕрдзӕнцӕ ӕма кӕмидӕр цидӕр сӕ зӕрдӕмӕ нӕ цӕудзӕй. Ӕма дӕ хеуӕнтти берӕ ке уарзис, удта дӕ сӕ хӕццӕ дзӕбӕхӕй цӕрун ке фӕндуй, уомӕ гӕсгӕ, ӕвӕдзи, дӕхемӕ фудгин кӕсдзӕнӕ. Фал ди иронх ма уӕд, алкӕмӕйдӕр фулдӕр Йегови ке гъӕуама уарзай. Уотемӕй ӕй дӕ хеуӕнттӕ дӕр фӕууиндзӕнцӕ, Йеговӕн лӕггадӕ кӕнунӕй сӕйрагдӕр дин ке неци ес. Рӕстдзийнадӕ тухӕй некӕмӕн бауарзун кӕндзӕнӕ. Фал ӕй уӕддӕр уинӕнтӕ, Йегови надбӕл ке ӕрлӕудтӕ, е дин цӕхуӕн пайда хӕссуй, уой. Нӕ уарзӕгой Хуцау уонӕн дӕр дӕттуй барӕ, цӕмӕй равзаронцӕ,  лӕггадӕ ин кӕндзӕнцӕ ӕви нӕ, уой (Ис. 48:17, 18).

17, 18. Нӕ бийнонтӕй еске Йегови ку ниууадза, уӕд нин ци банхус кӕндзӕй?

¹⁷ Нӕ бийнонтӕй еске ӕмбурдӕй ку рацох кӕнунцӕ кенӕ ӕхуӕдӕг рӕстдзийнадӕ ку ниууадзуй, уӕд нин е фӕууй, цума нӕ еске кардӕй барӕхуста, уой хузӕн. Ци нин банхус кӕндзӕй еци ристӕн ниббухсун?

¹⁸ Дӕ хъауритӕ Йеговӕн лӕггадӕ кӕнунмӕ исаразӕ. Библи алли бон дӕр кӕсӕ, ӕмбурдтӕмӕ дӕхе цӕттӕ кӕнӕ, хуарз хабар игъосун кӕнӕ ӕма Хуцауӕй хъауритӕ корӕ (Иуд. 20, 21). Фал уотемӕй дӕр дӕ рист ку нӕ сабур кӕна, удта? Дӕ къохтӕ ма ӕруадзӕ! Идарддӕр дӕр Хуцауи гъуддӕгти архайӕ, ӕма дин уӕззау сагъӕсти хӕццӕ тох кӕнун ӕнцондӕр уодзӕй. Ӕргъуди кӕнӕн, 73 псалом ка ниффинста, уой. Еу рӕстӕги ин хъӕбӕр зин адтӕй ӕ сагъӕстӕ ӕма е ’нкъарӕнти хӕццӕ тох кӕнун. Фал идарддӕр дӕр Йеговӕн ке лӕггадӕ кодта, уой фӕрци ӕхе кеми ӕрцудӕй (Пс. 73:16, 17). Мах бон дӕр ӕй уотӕ архайун.

19. Йеговӕ зунд куд амонуй, уомӕн аргъ ке кӕнис, е цӕмӕй бӕрӕг уодзӕй?

¹⁹ Йеговӕ зунд куд амонуй, уомӕн аргъ кӕнӕ. Йеговӕ зунд ку фӕййамонуй, уӕд е алкӕмӕндӕр пайда ӕрхӕссуй, тӕрегъӕд ка ракодта, уомӕн дӕр. Нӕ хеуӕнттӕй ӕмбурдӕй еске ку рацох кӕнунцӕ, уӕд нин хъӕбӕр зин фӕууй, фал уотемӕй, гӕнӕн ес, ӕма еци адӕймаг фӕстӕмӕ Йеговӕмӕ раздӕха. (Бакӕсӕ Дзиуиттӕгтӕмӕ 12:11.) Зӕгъӕн, Йеговӕ нин зӕгъуй, цӕмӕй нин «еумӕйагӕй мацибал уа», ӕ тӕрегъӕдтӕбӕл ка нӕ фӕсмон кӕнуй, уой хӕццӕ (1 Кор. 5:11–13). Е ӕнцон нӕй, фал уӕддӕр гъӕуама архайӕн, цӕмӕй ӕмбурдӕй ке рацох кодтонцӕ, уӕхӕн хеуони хӕццӕ уӕлдай хатт ма дзорӕн, нӕдӕр телефонӕй, нӕдӕр финстӕгутӕй кенӕ смс-тӕй, нӕдӕр электронон почтӕй кенӕ соцсетти.

20. Нӕ зӕрдӕ идарддӕр дӕр цӕбӕл дардзиан?

²⁰ Дӕ нифс сӕттун ма уадзӕ. Уарзондзийнадӕ «алцӕбӕлдӕр ӕ нифс даруй». Уомӕ гӕсгӕ мах дӕр нӕ зӕрдӕ дарӕн, Йегови ка ниууагъта, еци адӕн имӕ фӕстӕмӕ ке раздӕхдзӕнцӕ (1 Кор. 13:7). Дӕ хеуон хуарзӕрдӕмӕ ӕййевун ке райдӕдта, уой ку уинай, уӕд Йеговӕмӕ ковӕ, цӕмӕй еци адӕймаг Библи кӕсгӕй нӕуӕгӕй бафедар уа ӕма байгъоса Йегови дзурдмӕ: «Раздӕхӕ мӕмӕ» (Ис. 44:22).

21. Киристей фӕдбӕл цӕун ке райдӕдтай, уой туххӕй дӕ бийнонтӕ дӕ нихмӕ ку цӕуонцӕ, уӕд куд кӕнгӕ ӕй?

²¹ Киристе куд загъта, уомӕ гӕсгӕ ’й цийфӕнди адӕймагӕй дӕр фулдӕр гъӕуама уарзӕн. Е ӕй федарӕй зудта, ӕ ахуркӕнуйнӕгтӕ ибӕл идарддӕр дӕр еузӕрдон ке уодзӕнцӕ, сӕ хеуӕнттӕ сӕ нихмӕ ку цӕуонцӕ, уӕддӕр. Мадта Киристей фӕдбӕлдзӕуӕг ке дӕ, уой туххӕй дӕ хеуӕнттӕ дӕ нихмӕ ку цӕуонцӕ, уӕд дӕ зӕрдӕ дарӕ Йеговӕбӕл ӕма си ӕнхус корӕ, цӕмӕй федар фӕллӕууай (Ис. 41:10, 13). Йеговӕ ӕма Йесой зӕрдӕ ке рохс кӕнис ӕма дин дӕ еузӕрдондзийнади туххӕй ӕнӕмӕнгӕй ке райарфӕ кӕндзӕнцӕ, е дин цийни хуасӕ уӕд.