1, 2. (a) Soangen popohl dah me kitail kak ahneki met? (b) Dahme kahrehda kitail saikinte kak ahneki popohl unsek? (Menlau kilang tepin kilel.)

KITAIL koaros men ahneki popohl nan atail mour, oh kitail men soikala kapwunod kan. Eri kitail kin uhdahn kalahnganki me Siohwa ketikihong kitail ‘sapwellime popohl.’ Popohl wet iei me kak perekitailsang madamadau de pepehm en pwunod. (Pil. 4:6, 7) Pwehki kitail inoukihongehr Siohwa atail mour, kitail pil kin ahneki “popohl rehn Koht.” Met wehwehki me kitail kin ahneki nanpwungmwahu reh.​—Rom 5:1.

² Ahpw popohl unsek nin sampah me Koht pahn ketikihdo saikinte leledo. Kitail mihmi ni imwin rahn akan, kahrehda mie kahpwal tohto me kin kapwunode kitail. Kitail pil mi nanpwungen aramas lemei kan. (2 Tim. 3:1-4) Kitail pil anahne pelian Sehdan oh padahk likamw kan me e kin kihda. (2 Kor. 10:4, 5) Ahpw dahme kak kahrehda pwunod keieu laud iei uhwong sang kisehtail kan me sohte kin papah Siohwa. Ekei irail ele kin kemenkouruhrki dahme kitail kamehlele de nda me kitail  kin katohrepeseng peneinei. Ele re pil nda me kitail sohla kak wia kisehrail ihte ma kitail uhdihsang papah Siohwa. Ia duwen atail pahn kilangwohng uhwong pwukat sang atail peneinei? Oh ia duwen atail kak kolokol atail popohl ma met wiawi?

3, 4. (a) Dahme sapwellimen Sises padahk kan kin kahrehda? (b) Ni ahnsou dah me kin uhdahn apwal en idawehn Sises?

³ Sises mwahngih me kaidehn koaros pahn pwungki sapwellime padahk kan. E pil mwahngih me ekei pahn uhwong sapwellime tohnpadahk kan, kahrehda re pahn anahne eimah. Uhwong wet kak kauwehla popohl en arail peneinei. Sises mahsanih: “Kumwail dehr lemeleme me I kohdohn kamweimwahwihala sampah; soh, kaidehkin meleilei me I wa kohdo, pwe kedlahs. I kodohng kamwakidada liaktohrohr nanpwungen sahm akan oh nair pwutak kan, nanpwungen ihn akan oh nair serepein kan, nanpwungen lih pwopwoud pwulopwul kan oh en arail pwoud kan ar nohno kan; en emen eh imwintihti me keieu suwed, iei kiseh kan.”​—Mad. 10:34-36.

⁴ Ia wehwehn Sises eh mahsanih “Kumwail dehr lemeleme me I kohdohn kamweimwahwihala sampah”? Sises kupwurki aramas akan en ese me mie imwilahn arail pahn wiahla sapwellime tohnpadahk. Ei mehlel, dahme Sises kupwurki iei en padahkihong aramas dahme mehlel duwen Koht, a kaidehn en kahrehda liaktohrohr nan peneinei. (Sohn 18:37) Ahpw sapwellime tohnpadahk kan anahne ese me en idawehn ih sohte pahn ahnsou koaros mengei, ahpw mehlel ma kompoakparail keren kan de tohn arail peneinei sohte kin pwungki padahk mehlel.

5. Dahme sapwellimen Sises tohnpadahk kan kin lelohng?

⁵ Sises mahsanih me uhwong sang peneinei iei ehu rehn kahpwal kan me sapwellime tohnpadahk kan pahn anahne dadaur pah. (Mad. 10:38) Pwehn kaperenda Sises, sapwellime tohnpadahk kan kin dadaurete ni arail peneinei kan ar kin kemenkouruhrki irail de pil pohnsehsehla irail. Ahpw sapwellime kan kin alehdi laudsang dahme re katihasang.​—Wadek Mark 10:29, 30.

6. Dahme kitail anahne tamataman ma kisehtail kan kin uhwong kitail?

⁶ Mehnda ma kisehtail kan kin uhwong kitail pwehki atail kin kaudokiong Siohwa, kitail kin poakepoakehte irail. Ahpw kitail anahne tamataman me atail limpoak ong Koht oh Krais anahne laudsang atail limpoak ong meteikan koaros. (Mad. 10:37) Kitail pil anahne pohnese me Sehdan kak doadoahngki atail limpoak ong atail peneinei pwehn kahrehiong kitail en sohla loalopwoatohng Siohwa. Kitail pahn koasoiapene ekei irair apwal akan oh kilang ia duwen atail kak dadaurete.

7. Ia duwen omw pahn kilangwohng omw irairo ma omw pwoudo sohte kin papah Siohwa?

⁷ Paipel katamankihong kitail me ma emen pahn pwopwoudida, e “pahn kin diar apwal tohto.” (1 Kor. 7:28) Ma ke pwoudiki emen me sohte kin papah Siohwa, met kak kalaudehla kapwunod nan omw mouren pwopwoud. Ahpw e kesempwal ken kilangwohng omw irairo ni ahlohte me Siohwa kin ketin wia. Siohwa ketin mahsanih me kitail sohte kak tohrohrasang de mweisang atail pwoudo ihte pwehki e sohte kin papah Siohwa. (1 Kor. 7:12-16) Ma kowe emen sister oh omw pwoudo sohte kin papah Siohwa oh sohte kin tiengla mwowe nan kaudok mehlel, ke anahnehte en wauneki ih nin duwen tapwin peneinei. Oh ma kowe emen brother oh omw pwoudo sohte kin papah Siohwa, ke anahnehte en poakohng oh apwalih ih ni keneinei.​—Ep. 5:22, 23, 28, 29.

8. Peidek dah kan me ke kak idek rehmw ma omw pwoudo song en keinepwi omw kaudok?

⁸ Dahme ke pahn wia ma omw pwoudo song en keinepwi omw kaudok? Ahn sister men eh pwoudo padahkihong ih me e kak kohla kalohk rahn keite nan wihk ehu. Ma ke mi nan soangen irairo, pein idek rehmw: ‘Ei pwoudo kin ndindaiong ie en uhdihsang douluhl kaudokiong Siohwa? Ma soh, I kak kapwaiada dahme ei pwoudo  mwahuki?’ Ma ke kin toupahrek, ke sohte pahn ahneki kahpwal tohto nan omw mouren pwopwoudo.​—Pil. 4:5.

9. Ia duwen Kristian kan ar kak padahkihong neirail seri kan en wauneki arail pahpa de nohno me sohte kin papah Siohwa?

⁹ E kak apwal en kaiahnehda noumw seri kan ma omw pwoudo sohte kin papah Siohwa. Karasepe, ke anahne padahkihong noumw seri ko ren peikiong kehkehlik en Paipel, me mahsanih: “Kahkahki semomw oh inomw.” (Ep. 6:1-3) Ahpw dahme ke pahn wia ma omw pwoudo sohte kin idawehn koasoandi kan en Paipel? Ke kak wiahda mehn kahlemeng mwahu ong noumw seri kan sang ni omw kin wauneki omw pwoudo. Medewe duwen irair kaselel kan en omw pwoudo, oh padahkihong ih me ke kin kalahnganki soahng mwahu koaros me e kin wia. Dehr nda eh sapwung kan mwohn noumw seri kan. Ahpw kawehwehiong irail me emenemen anahne pilada ma e pahn papah Siohwa. Ma ke kaiahnehda noumw seri kan en wauneki arail pahpao de nohno me sohte kin papah Siohwa, arail mehn kahlemeng mwahu kakete kahrehiong omw pwoudo en men sukuhlki duwen Siohwa.

10. Ia duwen Kristian pahpa de nohno kan ar kak padahkihong neirail seri kan en poakohng Siohwa?

¹⁰ Ekei me sohte kin papah Siohwa ele men seri ko en kasarawih rahn kan de sukuhlki padahk kan sang pelien lamalam likamw. Ekei ohl ele keinapwihdi arail pwoud Kristian kan en dehr padahkihong neira seri ko duwen Paipel. Ahpw pil nan soangen irair wet, sistero pahn wia dahme e kak pwehn padahkihong seri ko padahk mehlel. (Wiewia 16:1; 2 Tim. 3:14, 15) Karasepe, ohl emen me sohte kin papah Siohwa ele sohte men eh pwoud Kristiano en onop Paipel rehn neira seri ko de wahla irail en iang mihting kan. Sistero pahn kin  wauneki eh pilipilo, ahpw e kakete koasoiaiong seri ko duwen dahme e kamehlele ahnsou koaros me e kak. Ni ahl wet, seri ko kak sukuhlki duwen Siohwa oh sapwellime koasoandi kan ong dahme pwung oh sapwung. (Wiewia 4:19, 20) Imwilahn met, seri ko pahn anahne pilada ma re pahn papah Siohwa de soh.​—Deud. 30:19, 20. *

11. Dahme kak kahrehda kahpwal rehn kisehtail kan me sohte kin papah Siohwa?

¹¹ Ni ahnsou me kitail tepida onop rehn Sounkadehdehn Siohwa kan, mwein kitail sohte padahkihong atail peneineio. Ahpw ni ahnsou me atail pwoson lalaudla, kitail esehda me kitail anahne padahkihong irail me kitail men papah Siohwa. (Mark 8:38) Omw loalopwoatohng Koht ele kahredahr kahpwal nanpwungen kowe oh omw peneineio. Kitail pahn koasoiapene soahng kei me ke kak wia pwehn kolokol popohl oh pil kolokolte omw lelepek ong Siohwa.

12. Dahme kakete kahrehiong kisehtail kan en uhwong kitail, ahpw ia duwen atail kak kasalehiong irail me kitail pohnese arail pepehm kan?

¹² Song en wehwehki ia pepehm en kisehmw kan me sohte kin papah Siohwa. Kitail uhdahn perenki atail ese padahk mehlel sang Paipel. Ahpw kisehtail kan ele kamehlele me mie me pitihkitaildi de kitail iangalahr pwihn en sarawi ehusoahng ehu. Ele re medewe me kitail sohte poakohng irail pwehki kitail sohte kin iang irail kasarawih rahn kan. Mwein re pil masak me mehkot suwed pahn wiawihong kitail mwurin atail mehla. Kitail en song wehwehki arail pepehm oh rong kanahieng dahme re nda pwe kitail en ese dahme kahrehda re pwunodkin kitail. (Lep. Pad. 20:5) Wahnpoaron Pohl song en wehwehki “aramas koaros” pwe en kak padahkihong irail rongamwahwo. Ma kitail song en wehwehki kisehtail kan, met kak uhdahn sewese kitail en ese ia duwen atail pahn padahkihong irail padahk mehlel.​—1 Kor. 9:19-23.

13. Ia duwen atail pahn koasoiong kisehtail kan me sohte kin papah Siohwa?

¹³ En kin lokaia ni mpahi. Paipel mahsanih: “Amwail koasoi mwohn aramas en katapan oh kansenamwahu.” (Kol. 4:6) Ele met sohte mengei. Kitail kak peki rehn Siohwa sapwellime manaman pwehn sewese kitail en aktikitik oh kadekohng kisehtail kan. Kitail en dehr song en akamaikihong irail arail padahk likamw koaros. Ma dahme re nda kamedekihala kitail, kitail kak alasang wahnpoaron ko. Pohl nda: “Ma aramas akan pahn kin kerieikitala, a se pahn kin kapairailda; ma re kalokei kiht, a se kin kanengamahiong; ma re kin kasaroweikitedi, a se kin kasapahlkihong irail lokaia kadek.”​—1 Kor. 4:12, 13.

14. Ia kamwahu kan en wiewia mwahu?

¹⁴ Kolokol omw wiewia mwahu. Dahme kahrehda met kesempwal? Mehnda ma atail lokaia ni mpahi kak sewese kitail en kolokol popohl rehn kisehtail kan, atail tiahk mwahu kak pil laudsang. (Wadek 1 Piter 3:1, 2, 16.) Sang ni omw mehn kahlemeng mwahu, kisehmw kan kak kilang me Sounkadehdehn Siohwa kan kin ahneki mouren pwopwoud nsenamwahu, apwalih neirail seri kan, oh mourki mour oh tiahk mwakelekel oh nsenamwahu. Mehnda ma kisehtail kan sohte pwungki padahk mehlel, kitail kak perenki me atail wiewia mwahu kin kaperenda Siohwa.

15. Ia duwen atail kak koasoanehdi mahs dahme kitail pahn wia pwehn kak soikala akamaiong kisehtail kan?

¹⁵ Koasoanehdi mahs dahme ke pahn wia. Medewe duwen irair kan me kakete kahrehda omw pahn akamaiong kisehmw kan. Kowe eri koasoanehdi dahme ke pahn wia. (Lep. Pad. 12:16, 23) Ih met me emen sister nan Australia wia. En eh pwoudo eh pahpao uhdahn uhwong padahk mehlel oh kin lingeringerda ekei pak. Eri mwohn sistero oh eh pwoudo pahn delepwohnih, ira pahn peki sawas sang Siohwa pwehn ketin sewese ira en dehr sapeng ohlo ni lingeringer. Ira pahn medewehda  soahng mwahu kan me re kak koasoiapene. Ira kin koasoanehdi uwen reirei en ara pahn koasoiong ohlo pwehn soikala koasoakoasoi werei me kakete kahrehda arail akamaiki pelien lamalam.

16. Ia duwen omw kak powehdi omw suwedkihda omw kansensuwedihala kisehmw kan?

¹⁶ Ei mehlel, ke sohte kak soikala akamai koaros rehn kisehmw kan me sohte kin papah Siohwa. Eri ni ahnsou me met wiawi, ele ke kin suwedkihda pwehki ke poakepoake kisehmw kan oh men kaperenda irail. Ahpw tamataman me omw loalopwoatohng Siohwa anahne kehlailsang omw poakohng omw peneinei. Ni kisehmw kan ar esehda met, ele re pahn wehwehkihda ia uwen eh kesempwal en papah Siohwa. Ke sohte kak idingkihong emen en pwungki padahk mehlel. Ahpw ke kak kasalehiong meteikan ia duwen omw idawehn sapwellimen Siohwa wiewia kan eh kin seweseiuk. Oh ni mehlel, Siohwa ketikihong irail ahnsou mwahu en pilada en papah ih, duwehte me e ketin wiahiong kitail.​—Ais. 48:17, 18.

17, 18. Dahme kak seweseiuk ma emen tohn omw peneinei kohkohsang Siohwa?

¹⁷ Ni emen tohn omw peneinei eh piskenla de pein pilada en mweisang mwomwohdiso, met kak uhdahn apwal. Met kak uhdahn kamedek rasehng emen eh doakoahkin uhk kedlahs. Ia duwen omw kak dadaur pahn soangen medek wet?

¹⁸ Doulahte nsenohki omw kin papah Siohwa. Ni omw kin ahneki soangen medeko, ke anahne kakehlakahla omw pwoson. Kaukaule wadek Paipel, kaunopada ong mihting kan oh kohla iang, pousehlahte kalokalohk, oh kapakapohng Siohwa pwehn ketikihong uhk kehl en dadaurete. (Sud 20, 21) Ia duwen ma ke kin wiewia soahng pwukat koaros ahpw medeko mihmihte? Dehr uhdi! Doulahte nsenohki omw kin papah Siohwa. Kedekedeo, met pahn seweseiuk en kaunda pein omw madamadau oh pepehm kan. Met iei me wiawihong sounnting en Melkahka 73. E lelohng ahnsou ehu nan eh mour me e apwalki kaunda eh madamadau oh pepehm kan. Ahpw eh kaudokiong Siohwa sewese ih en pwurehng kilangwohng soahng kan ni ahl pwung. (Mel. 73:16, 17) Met kak wiawihong uhk.

19. Ia duwen omw kak kasalehda omw wauneki en Siohwa eh kin ketin panawih sapwellime aramas akan?

¹⁹ Wauneki sapwellimen Siohwa peneu. Koht mwahngih me sapwellime peneu pahn wia kamwahu ong koaros me pidada, pil iangahki me piskenlao. Mehnda ma e uhdahn kamedek ni emen me kitail poakohng eh ale peneu, met kak sewese ih en pwurodo rehn Siohwa. (Wadek Ipru 12:11.) Lao lel ahnsowo, kitail anahne wauneki sapwellimen Siohwa kaweid en “dehr pil kin patehng” me piskenla kan. (1 Kor. 5:11-13) Met sohte mengei. Ahpw kitail anahne soikala doadoahngki delepwohn, text, kisinlikou, e-mail, de Internet pwehn koasoiong irail.

20. Dahme kitail anahne koapworopworkihte?

²⁰ Dehr sohla ahneki koapworopwor! Limpoak kin “koapworopworki soahng koaros,” eri kitail kin koapworopworkihte me irail kan me kitail poakohng pahn pwurodo rehn Siohwa. (1 Kor. 13:7, NW) Ma e sansal me madamadau oh wiewia en emen tohn omw peneinei keren kin mwamwahula, ke kak kapakapki ih pwehn ale kehl sang Paipel oh mwekidki sapwellimen Siohwa luhk me mahsanih: “Pwurodo rehi.”​—Ais. 44:22.

21. Dahme ke anahne wia ma omw peneinei kin uhwong uhk pwehki ke kin idawehn Sises?

²¹ Sises mahsanih me atail limpoak ong ih en laudsang atail poakohng aramas koaros. Oh Sises ketin kamehlele me sapwellime tohnpadahk kan pahn ahneki eimah en kolokolete arail loalopwoatohng ih mehnda ma arail peneinei kin uhwong irail. Eri ma omw peneinei kin uhwong uhk pwehki ke kin idawehn Sises, koapworopworki Siohwa. Peki reh en ketin seweseiuk en pweida ni omw dadaurete. (Ais. 41:10, 13) Diar nsenamwahu ni omw ese me Siohwa oh Sises kin ketin kupwurperenkinuhk oh ira pahn ketin katingih omw kin lelepek.