1, 2. (a) Sortu freide nanga blesi wi abi nownow kaba? (b) San kan tapu pasi gi wi fu de na ini freide na ini a ten disi? (Luku a prenki na a bigin fu na artikel.)

WI ALAMALA wani libi na ini freide, wi no wani abi broko-ede. Dati meki wi de nanga tangi taki Yehovah e gi wi „a freide fu Gado”. A freide dati kan yepi wi fu no bruya te wi abi broko-ede noso te wi e firi brokosaka (Fil. 4:6, 7). Wan tra blesi di wi abi, na taki „wi de bun nanga Gado” fu di wi gi wisrefi abra na en.​—Rom. 5:1.

² Ma a ten no doro ete taki Gado o tyari freide kon na heri grontapu. Na ini den lasti dei disi, furu feti e pasa èn bun furu sma lobi strei nanga trawan (2 Tim. 3:1-4). Wi leki Kresten musu kakafutu gi Satan èn gi den falsi leri fu en (2 Kor. 10:4, 5). Ma a moro bigi sani di kan pori a freide fu wi, na famiriman di no de na bribi. Sonwan fu den e spotu a bribi fu wi, den e krutu wi taki wi e tyari prati kon na ini a famiri, noso kande den e taigi wi taki den no o si wi  leki famiri moro efu wi no e tapu nanga a bribi fu wi. Fa wi musu si en te wi e kisi gens fu wi famiri? San o yepi wi te wi e kisi fu du nanga den sortu problema disi?

3, 4. (a) San den leri fu Yesus e du? (b) O ten a kan muilek gi wan sma fu de wan bakaman fu Yesus?

³ Yesus ben sabi taki den leri fu en ben o tyari prati kon na mindri sma èn taki den bakaman fu en ben o abi deki-ati fanowdu fu man tan horibaka gi en te den ben e kisi gens. Te famiriman e gens wi, dan dati kan pori a freide di wi abi nanga den. Yesus ben taki: „No prakseri taki mi kon fu tyari freide na grontapu. Mi no kon fu tyari freide, ma mi kon fu tyari wan feti-owru. Bika mi kon fu tyari trobi na mindri wan man nanga en papa, na mindri wan umapikin nanga en mama, èn na mindri wan yongu wefi nanga a mama fu en masra. Iya, wan sma sa abi feanti na ini en eigi osofamiri.”​—Mat. 10:34-36.

⁴ Fu san ede Yesus taki: „No prakseri taki mi kon fu tyari freide na grontapu”? Nanga den wortu dati a ben wani sori taki den arkiman fu en ben musu hori na prakseri san ben o de den bakapisi, efu den ben o tron bakaman fu en. A boskopu fu en ben kan tyari prati kon na mindri sma. A no de fu taki dati Yesus ben wani meki a boskopu fu Gado bekènti, a no ben wani pori a matifasi di sma ben abi nanga makandra (Yoh. 18:37). Ma toku a kan muilek gi wan sma fu tan gi yesi na den leri fu Krestes te den bun mati fu en, noso en famiri no wani teki a tru bribi.

5. San miti den bakaman fu Yesus?

⁵ Yesus ben taki dati den bakaman fu en ben o kisi gens fu famiriman èn fu dati ede den ben o abi fu horidoro (Mat. 10:38). Fu di den disipel fu Yesus ben wani taki a feni den bun, meki den horidoro di famiriman spotu den noso drai baka gi den. Ma den kisi moro leki san den ben lasi.​—Leisi Markus 10:29, 30.

6. San wi musu hori na prakseri efu wi famiri e gens wi fu di wi e anbegi Yehovah?

⁶ Awansi den famiriman fu wi e gens wi fu di wi e anbegi Yehovah, toku wi e tan lobi den. Ma wi no musu frigiti taki a lobi di wi abi gi Gado nanga Krestes musu kon na a fosi presi (Mat. 10:37). Wi musu frustan taki Satan o pruberi fu gebroiki a lobi di wi abi gi wi famiri fu meki wi trangayesi Yehovah. Meki wi luku wan tu situwâsi pe wi kan kisi gens fu famiriman èn wi o luku tu san wi kan du te den sortu problema disi e miti wi.

7. Fa yu musu si a situwâsi fu yu efu yu trowpatna no e anbegi Yehovah?

⁷ Bijbel e warskow taki den sma di e trow „o kisi banawtu na ini den libi” (1 Kor. 7:28). Efu yu trowpatna no de na bribi, dan a situwâsi disi kan meki a trowlibi fu yu moro muilek. Toku a prenspari taki yu e si sani soleki fa Yehovah e si sani. Yehovah e taki dati wi no kan gowe libi wi patna èn taki wi no kan brokotrow soso fu di wi patna no e anbegi Yehovah (1 Kor. 7:12-16). Awansi a masra fu yu no e teki fesi na ini na anbegi, toku yu musu lespeki en leki na edeman fu a famiri. Èn efu yu leki Kresten masra abi wan wefi di no e anbegi Yehovah, dan toku yu musu lobi en èn yu musu sorgu tu gi en.​—Ef. 5:22, 23, 28, 29.

8. Sortu sani yu kan aksi yusrefi te yu trowpatna no wani taki yu teki prati tumusi furu na a anbegi?

⁸ Ma fa a de te yu trowpatna no wani taki yu teki prati tumusi furu na a anbegi? Fu eksempre, wan sisa en masra taigi en taki a no wani taki a go na ini a preikiwroko tapu spesrutu dei na ini a wiki. Efu yu de na ini so wan situwâsi, dan aksi yusrefi: ’A de so taki mi masra no wani taki mi anbegi mi Gado srefisrefi moro? Èn efu dati no de so, dan mi  kan du san a aksi fu mi?’ Te yu de klariklari fu fiti yusrefi, dan dati kan yepi yu fu no abi tumusi furu problema na ini a trowlibi.​—Fil. 4:5.

9. Fa Kresten kan leri den pikin fu den fu lespeki wan papa noso mama di no de na bribi?

⁹ A no makriki ala ten fu gi yu pikin leri fu Gado te yu trowpatna no de na bribi. Fu eksempre, a prenspari taki yu e leri den pikin fu yu fu gi yesi na a rai disi fu Bijbel: „Lespeki un papa nanga un mama” (Ef. 6:1-3). Ma fa a de efu yu trowpatna no e tyari ensrefi na wan fasi di e kruderi nanga Bijbel? Lespeki yu masra so taki yu kan de wan bun eksempre gi yu pikin. Tan poti prakseri na den bun fasi fu en èn taki sani di e sori taki yu e warderi en. No taki takru fu yu patna na fesi yu pikin. Na presi fu dati, meki den kon frustan taki ibri sma musu bosroiti gi ensrefi efu a o dini Yehovah. Te den pikin e tyari densrefi bun, dan dati kan yepi fu hari a patna fu yu kon na ini a tru anbegi.

10. Fa Kresten papa nanga mama kan gi den pikin leri fu Bijbel efu a trowpatna fu den no de na bribi?

¹⁰ Son leisi, trowpatna di no de na bribi wani taki den pikin fu den e teki prati na fesa di abi fu du nanga falsi anbegi, noso taki den e kisi leri fu den sortu anbegi dati. Kande son masra no wani taki a Kresten wefi fu den e gi den pikin leri fu Bijbel. Awansi dati de so, toku wan Kresten wefi musu du ala san a man fu gi den pikin leri fu Bijbel (Tori 16:1; 2 Tim. 3:14, 15). Fu eksempre, kande a masra fu wan Kotoigi wefi no wani taki a studeri Bijbel nanga den yongu pikin fu en, noso taki a e tyari den go na den Kresten konmakandra. Aladi a wefi e lespeki a bosroiti fu en masra, toku a kan suku okasi fu taki nanga  en pikin fu a bribi fu en. Na so den kan kon sabi san bun èn san no bun èn den kan kon sabi Yehovah (Tori 4:19, 20). A no de fu taki dati te fu kaba den pikin o abi fu bosroiti gi densrefi efu den wani anbegi Yehovah.​—Deut. 30:19, 20. *

11. San kan meki taki yu e kisi problema nanga den famiriman fu yu di no de Kotoigi?

¹¹ Di wi bigin studeri Bijbel nanga Yehovah Kotoigi, dan kande wi no taigi wi famiri. Ma di a bribi fu wi kon moro tranga, dan wi kon si taki wi musu fruteri den taki wi wani dini Yehovah (Mark. 8:38). Efu a bosroiti di yu teki meki taki yu kisi problema nanga yu famiri di no de Kotoigi, dan luku wan tu sani di kan yepi yu fu tan na ini freide nanga den sondro taki yu e trangayesi Yehovah.

12. Fu san ede famiriman di no de na bribi kan gens wi? Fa wi kan pruberi fu frustan fa den e firi?

¹² Pruberi fu frustan fa den e firi. Aladi wi breiti srefisrefi taki wi kon sabi den tru tori fu Bijbel, toku den famiriman fu wi kan denki taki sma kori wi noso taki wi tron memre fu wan sekte. Kande den e denki taki wi no lobi den moro fu di wi no e hori den fesadei moro makandra nanga den. Kande den e frede srefi taki takru sani o pasa nanga wi baka te wi dede. Wi musu pruberi fu frustan fa den e firi èn wi musu arki den bun fu kon sabi san e gi den broko-ede (Odo 20:5). Na apostel Paulus pruberi fu frustan „ala sortu sma”, so taki a ben kan preiki a bun nyunsu gi den. A bun te wi e teki na eksempre fu en.​—1 Kor. 9:19-23.

13. Fa wi musu taki nanga den famiriman fu wi di no de Kotoigi?

¹³ Taki na wan switi fasi. Bijbel e taki: „Taki na wan switi fasi ala ten” (Kol. 4:6). Wi kan aksi Yehovah fu gi wi en santa yeye so taki wi kan sori den fasi fu en te wi e taki nanga den famiriman fu wi. Wi no musu pruberi fu haritaki nanga den fu ala den falsi leri di den e bribi. Efu den e taki noso e du sani di e hati wi, dan wi kan teki na eksempre fu den apostel. Paulus ben skrifi: „Te sma e kosi wi, wi e blesi den. Te sma e frufolgu wi, wi e horidoro nanga pasensi. Te sma e gi wi porinen, wi e piki den safri.”​—1 Kor. 4:12, 13.

14. Sortu wini a abi te wi e tan tyari wisrefi na wan fasi di fiti?

¹⁴ Tan tyari yusrefi na wan fasi di fiti. Aladi a kan yepi te wi e taki na wan switi fasi nanga famiriman di e gens wi, toku a moro bun te wi e tyari wisrefi na wan fasi di fiti. (Leisi 1 Petrus 3:1, 2, 16.) Tyari yusrefi na so wan fasi taki den famiriman fu yu e si taki Yehovah Kotoigi abi koloku trowlibi, taki den e sorgu den pikin bun, taki den e libi wan krin libi, taki den e tyari densrefi na wan fasi di fiti, èn taki den de koloku. Awansi den famiriman fu wi no e tron anbegiman fu Yehovah, toku wi kan firi prisiri fu di wi sabi taki Yehovah breiti taki wi e gi yesi na en.

15. San wi kan du fu no kisi trobi nanga wi famiri?

¹⁵ Bosroiti na fesi san yu o du. Prakseri sortu situwâsi kan tyari problema kon, èn bosroiti na fesi san yu o du (Odo 12:16, 23). Wan sisa fu Australia e fruteri: „A papa fu mi masra no ben lobi a bribi fu wi kwetikweti. Fosi wi ben e bel en fu kon sabi fa a e go nanga en, dan mi nanga mi masra ben e begi Yehovah fu yepi wi fu no piki en te a e atibron nanga wi. Wi ben e sreka na fesi sortu tori wi ben o taki nanga en so taki trobi no ben e pasa. Wi ben e bosroiti na fesi tu o langa wi ben o taki nanga en, bika efu wi ben e tan taki tori tumusi langa, dan te fu kaba wi ben kan bigin haritaki nanga makandra fu kerki tori.”

16. San o yepi yu fu no firi fruferi te yu no kan du san yu famiri e fruwakti fu yu?

 ¹⁶ A no de fu taki dati yu no kan fruwakti taki yu no o kisi nowan enkri kesekese nanga yu famiri. Te dati pasa, dan kande yu o firi fruferi, fu di yu lobi yu famiri srefisrefi èn ala ten yu e pruberi fu du bun gi den. Efu yu e firi so, dan hori na prakseri taki yu musu lobi Yehovah moro leki yu lobi yu famiri. A sani disi kan yepi yu famiriman fu kon si o prenspari a de gi yu fu dini Yehovah. Awansi fa a no fa, hori na prakseri taki yu no kan dwengi trawan fu teki a tru anbegi. Na presi fu dati, tyari yusrefi na so wan fasi taki den man si sortu wini a e tyari kon te yu e du a wani fu Yehovah. Neleki fa wi lobi-ati Gado gi wi na okasi fu bosroiti efu wi wani dini en, na so a e gi den na okasi dati tu.​—Yes. 48:17, 18.

17, 18. San kan yepi yu fu horidoro te wan famiriman fu yu gowe libi Yehovah?

¹⁷ Te wan famiriman puru fu a gemeente noso te a hari ensrefi puru fu a gemeente, dan a sani dati kan firi neleki wan sma dyuku yu nanga wan feti-owru. San o yepi yu fu horidoro?

¹⁸ Tan poti prakseri na a anbegi fu yu. Abi a gwenti fu leisi Bijbel, sreka yusrefi gi den konmakandra èn go na den, teki prati na a preikiwroko èn begi Yehovah fu gi yu a krakti fu horidoro. Te yu e du den sani disi, dan dati o tranga a bribi fu yu (Yud. 20, 21). Ma fa a de te yu e tan firi sari taki wan famiriman fu yu no e anbegi Yehovah moro? No gi abra! Te yu e tan teki prati fayafaya na a anbegi, dan dati kan yepi fu basi den firi nanga den prakseri fu yu. Luku san ben pasa nanga a skrifiman fu Psalm 73. A ben kon abi wan fowtu denki fu sani èn a sani dati ben gi en broko-ede. Ma a ben man kenki a denki fu en di a go na a tempel fu Gado (Ps. 73:16, 17). Te yu e anbegi Yehovah nanga yu heri ati dan Yehovah kan yepi yu tu fu tan abi wan bun denki fu sani.

19. Fa yu kan sori taki yu abi lespeki gi a piri-ai di Yehovah e gi?

¹⁹ Sori lespeki gi a piri-ai di Yehovah e gi. Gado sabi taki te a e gi sma piri-ai, dan dati kan tyari wini kon gi ala sma, sosrefi gi a sma di puru fu a gemeente. Aladi a e hati te wan sma di wi lobi puru fu a gemeente, toku dati kan yepi en fu drai kon baka na Yehovah bakaten. (Leisi Hebrewsma 12:11.) Teleki a ten dati doro, wi musu lespeki a rai di Yehovah e gi wi fu ’no bumui’ nanga sma di puru fu a gemeente (1 Kor. 5:11-13). Awansi wi e sari taki wi famiriman puru fu a gemeente, toku wi no musu bel den, wi no musu seni sms noso app gi den, èn wi no musu taki nanga den tapu Internet te dati no de fanowdu.

20. Sortu howpu wi kan abi?

²⁰ No lasi howpu. Lobi „e howpu ala sani” èn fu dati ede wi e tan howpu taki den wan di gowe libi Yehovah o drai kon baka na en (1 Kor. 13:7). Efu yu e si taki a famiriman fu yu e kenki a fasi fa a ben denki, dan yu kan begi gi en taki a e kisi krakti fu Gado Wortu èn taki a e gi yesi na a kari disi fu Yehovah: „Drai kon baka na mi.”​—Yes. 44:22.

21. San yu musu du efu prati kon na ini yu famiri fu di yu tron wan bakaman fu Yesus?

²¹ Yesus ben taki dati efu wi e gi pasi taki wan libisma prenspari gi wi moro en, dan wi no warti fu de bakaman fu en. Iya, a ben abi a frutrow taki den disipel fu en no ben o frede fu tan gi yesi na en, awansi den ben e kisi gens fu den famiri. Efu „wan feti-owru” kon na ini yu famiri fu di yu tron wan bakaman fu Yesus, dan abi a frutrow taki Yehovah o yepi yu fu pasa den problema dati (Yes. 41:10, 13). Yu kan prisiri fu sabi taki Yehovah nanga Yesus breiti nanga yu èn taki den o blesi yu fu di yu e tan gi yesi na den.