1, 2. (a) Dame saida mak ita iha daudauk ohin loron? (b) Tanbasá mak ita seidauk iha dame neʼebé loloos? (Haree foto iha leten.)

ITA hotu hakarak iha dame no hakarak hasees an husi laran-taridu. Tan neʼe mak ita agradese tebes ba Jeová hodi fó ninia dame ba ita. (Filipe 4:6, 7) Bainhira ita dedika ita-nia an ba Jeová, ita mós iha “dame ho Maromak”. Neʼe katak ita iha relasaun neʼebé diʼak ho nia.—Roma 5:1.

² Maibé tempu seidauk toʼo ba Maromak atu lori dame ba mundu tomak. Ita hela daudauk iha loron ikus sira, tan neʼe iha problema barak neʼebé hamosu laran-taridu. No ema barak hatudu hahalok violénsia. (2 Timóteo 3:1-4) Ita mós presiza luta hasoru Satanás ho ninia hanorin falsu oioin. (2 Korinto 10:4, 5) Maibé buat neʼebé halo ita laran-taridu liu mak bainhira ita-nia família neʼebé la adora Jeová kontra ita. Família balu goza ita kona-ba ita-nia fiar, duun katak ita sobu família, ka ameasa atu nega ita se ita la troka ita-nia fiar. Entaun, ita presiza iha hanoin saida kona-ba família nia kontra? Oinsá mak ita bele iha nafatin dame se problema hanesan neʼe mosu?

3, 4. (a) Jesus nia hanorin sei lori saida? (b) Saida mak bele halo susar ba ita atu laʼo tuir Jesus?

³ Jesus hatene katak laʼós ema hotu hakarak simu ninia hanorin. Nia mós hatene katak ema balu sei kontra ninia dixípulu sira no tan neʼe sira presiza aten-brani. Tanba ema nia kontra, neʼe mós bele halakon família nia dame. Tan neʼe mak Jesus dehan: “Keta hanoin katak haʼu mai atu lori dame ba mundu. Haʼu mai, laʼós atu lori dame, maibé lori surik. Basá haʼu mai atu haketak ema: Hodi haketak oan-mane husi aman, oan-feto husi inan, no feto-foun husi banin-feto. Neʼe duni, ema nia inimigu sei mai husi ninia umakain rasik.”—Mateus 10:34-36.

⁴ Jesus nia liafuan “keta hanoin katak haʼu mai atu lori dame”, neʼe katak sá? Jesus hakarak ema hatene katak sai ninia dixípulu bele hetan konsekuénsia balu. Ita hatene katak Jesus nia hakarak mak atu hanorin ema lia-loos kona-ba Maromak, laʼós atu sobu família. (João 18:37) Maibé Jesus hakarak ninia dixípulu sira hatene katak la fasil atu laʼo tuir nia, liuliu se ita-nia belun diʼak ka família lakohi simu lia-loos.

5. Jesus nia dixípulu sira hasoru problema saida deʼit?

⁵ Jesus hatete katak ninia dixípulu sira presiza tahan hasoru família nia kontra. (Mateus 10:38) Sira tahan duni bainhira sira-nia família goza ka nega sira, tanba sira hakarak Jesus simu sira. Maibé sira hetan bensaun barak liu fali buat neʼebé sira lakon.—Lee Marcos 10:29, 30.

6. Ita presiza hanoin-hetan saida bainhira ita-nia família kontra ita?

⁶ Maski ita-nia família kontra tanba ita adora Jeová, ita hadomi nafatin sira. Maibé ita presiza hanoin-hetan katak, ita hadomi Maromak no Kristu liu fali ema hotu. (Mateus 10:37) Ita mós presiza kuidadu tanba Satanás bele uza ita-nia domin ba família atu halo ita la hatudu laran-metin ba Jeová. Agora mai ita koʼalia kona-ba situasaun susar balu no haree toʼok oinsá mak ita bele tahan.

7. Ita tenke iha hanoin saida se Ita-nia kaben la serbí Jeová?

⁷ Bíblia fó avizu ba ita katak ema neʼebé kaben “sei hetan susar” ka problema oioin. (1 Korinto 7:28) Se Ita-nia kaben la serbí Jeová, neʼe sei lori estrese no laran-taridu liután ba Ita-nia moris kaben nian. Maibé importante atu haree Ita-nia situasaun tuir Jeová nia haree. Jeová hatete katak ita la bele haketak ka soe malu ho ita-nia kaben tan deʼit nia la serbí Jeová. (1 Korinto 7:12-16) Maski Ita-nia laʼen la serbí Jeová, Ita presiza respeitu nafatin nia nuʼudar família nia ulun. No se Ita-nia feen la serbí Jeová, Ita presiza hadomi no tau matan didiʼak ba nia.—Éfeso 5:22, 23, 28, 29.

8. Ita bele husu pergunta saida deʼit ba Ita-nia an se Ita-nia kaben koko atu kontrola Ita-nia liberdade kona-ba adorasaun?

⁸ Ita presiza halo saida se Ita-nia kaben koko atu kontrola Ita-nia liberdade kona-ba adorasaun? Porezemplu, irmán ida nia laʼen hatete ba nia katak nia bele bá haklaken iha loron balu deʼit iha semana nia laran. Se Ita mak iha situasaun hanesan neʼe, husu ba Ita-nia an: ‘Haʼu-nia laʼen hapara haʼu atu la bele adora tan Jeová ka lae? Se laʼós, bele ka lae haʼu halo tuir nia?’ Se Ita mak la ulun-toos, Ita bele hamenus problema barak iha Ita-nia moris kaben nian.—Filipe 4:5, nota-rodapé.

9. Iha dalan saida mak Ita bele hanorin oan atu hatudu respeitu ba Ita-nia kaben neʼebé la serbí Jeová?

⁹ Se Ita-nia kaben la serbí Jeová, neʼe bele halo susar ba Ita atu hanorin oan. Porezemplu, Ita presiza hanorin oan atu halo tuir  Bíblia nia mandamentu kona-ba: “Hatudu respeitu ba ó-nia inan no aman.” (Éfeso 6:1-3) Maibé oinsá se Ita-nia kaben la moris tuir Bíblia nia matadalan sira? Ita bele hatudu ezemplu diʼak ba Ita-nia oan hodi hatudu respeitu ba Ita-nia kaben. Hanoin kona-ba Ita-nia kaben nia hahalok diʼak sira no fó-hatene ba nia katak Ita agradese tebes ba buat diʼak sira neʼebé nia halo. Keta koʼalia buat negativu kona-ba Ita-nia kaben iha oan sira-nia oin. Esplika ba oan sira katak, ema ida-idak mak tenke hili atu serbí ka la serbí Jeová. Se Ita treinu Ita-nia oan atu hatudu respeitu ba Ita-nia kaben, karik sira-nia ezemplu diʼak bele book Ita-nia kaben atu aprende kona-ba Jeová.

10. Oinsá mak inan-aman bele hanorin oan atu hadomi Jeová?

¹⁰ Feen ka laʼen balu neʼebé la serbí Jeová karik hakarak sira-nia oan atu aprende hanorin falsu ka halaʼo selebrasaun neʼebé la mai husi Bíblia. Karik laʼen balu mós bandu sira-nia feen atu la bele hanorin Bíblia ba oan. Maski iha situasaun hanesan neʼe, feen bele hakaʼas an nafatin atu hanorin oan kona-ba lia-loos. (Apóstolu 16:1; 2 Timóteo 3:14, 15) Porezemplu, karik laʼen lakohi ninia feen atu estuda Bíblia ho oan ka lori sira ba reuniaun. Maski feen presiza respeitu laʼen nia desizaun, nia bele uza oportunidade seluk atu koʼalia ninia fiar ba oan sira. Hodi nuneʼe oan sira bele aprende kona-ba Jeová no morál sira husi Bíblia. (Apóstolu 4:19, 20) Toʼo ikus oan mak tenke deside atu serbí Jeová ka la serbí nia. *—Deuteronômio (Ulangan) 30:19, 20.

11. Saida mak bele hamosu problema ho ita-nia família sira neʼebé la serbí Jeová?

¹¹ Bainhira ita foin estuda ho Testemuña ba Jeová, karik ita seidauk fó-hatene família. Maibé kuandu ita-nia fiar aumenta liután, ita sente presiza fó-hatene ba sira katak ita hakarak atu serbí Jeová. (Marcos 8:38) Se Ita-nia laran-metin ba Jeová hamosu problema entre Ita ho Ita-nia família, haree toʼok buat balu neʼebé Ita bele halo atu iha nafatin dame no laran-metin ba Jeová.

12. Karik razaun saida mak ita-nia família kontra ita, maibé oinsá mak ita bele hatudu katak ita komprende sira-nia sentimentu?

¹² Koko atu komprende ita-nia família nia sentimentu. Ita kontente tebes tanba hatene ona lia-loos. Maibé ita-nia família bele hanoin katak ema lohi ita ka ita tuir relijiaun falsu. Karik sira hanoin katak ita la hadomi sira tanba la selebra ona loron-boot hamutuk ho sira. Karik sira mós sente taʼuk katak Maromak sei fó kastigu ba ita bainhira ita mate. Ita presiza hakaʼas an atu buka-hatene sira-nia hanoin no rona didiʼak bainhira sira koʼalia hodi ita bele hatene tanbasá sira iha sentimentu hanesan neʼe ba ita. (Provérbios [Amsal] 20:5) Apóstolu Paulo koko duni atu komprende kona-ba “ema oioin” hodi nia bele hanorin lia-loos ba sira. Se ita mak koko atu komprende kona-ba ita-nia família, karik neʼe bele ajuda ita hatene oinsá atu hanorin lia-loos ba sira.—1 Korinto 9:19-23.

13. Ita presiza koʼalia ho ita-nia família neʼebé la serbí Jeová iha dalan oinsá?

¹³ Koʼalia ho laran-maus. Bíblia dehan: “Sempre koʼalia ho laran-diʼak.” (Koloso 4:6) Ita bele husu Jeová haraik espíritu santu atu ajuda ita hodi hatudu laran-maus no laran-diʼak ba ita-nia família. Ita labele diskute ho sira kona-ba sira-nia fiar neʼebé laloos. Se ita sente kanek tanba sira-nia liafuan ka hahalok, diʼak atu banati-tuir apóstolu sira-nia ezemplu. Paulo hatete: “Kuandu ema koʼalia aat ami, ami husu bensaun ba sira; kuandu ema fó-terus ba ami, ami tahan ho pasiénsia; kuandu ema koʼalia bosok kona-ba ami, ami hatán ho laran-maus.”—1 Korinto 4:12, 13.

14. Hahalok diʼak bele lori rezultadu saida?

¹⁴ Hatudu nafatin hahalok diʼak. Tanbasá mak importante? Maski liuhusi koʼalia ho laran-maus bele ajuda ita atu iha nafatin dame ho ita-nia família sira, maibé hahalok diʼak sei lori rezultadu diʼak liután. (Lee 1 Pedro 3:1, 2, 16.) Liuhusi Ita-nia ezemplu, hatudu ba Ita-nia família katak Testemuña ba Jeová halaʼo moris kaben nian neʼebé kontente, sira tau matan didiʼak ba sira-nia oan, iha moris neʼebé folin no tuir morál neʼebé diʼak. Maski ita-nia família la simu lia-loos, ita haksolok nafatin tanba ita hatene katak ita-nia hahalok diʼak halo Jeová kontente.

15. Ita bele halo planu nanis kona-ba saida atu la hamosu diskute malu ho família sira?

¹⁵ Planu nanis. Hanoin uluk situasaun saida mak bele hamosu diskute malu ho família no halo planu kona-ba Ita atu halo saida iha situasaun neʼe. (Provérbios [Amsal] 12:16, 23) Irmán ida husi Austrália halo nuneʼe. Nia banin-mane neʼebé hela ketak kontra makaʼas lia-loos toʼo dala ruma sai hirus tebes. Entaun antes atu telefone nia, irmán ho ninia laʼen sempre husu Jeová ajuda sira atu la hatán iha dalan neʼebé hirus. Sira sempre prepara nanis tópiku furak atu koʼalia ho nia. No sira mós sempre hanoin uluk kona-ba tempu hira mak sira hakarak gasta atu koʼalia ho nia hodi sira-nia koʼalia la tama ba relijiaun no hamosu diskute malu.

16. Saida mak bele ajuda Ita atu la fó sala ba Ita-nia an se família sira sai hirus?

¹⁶ Ita hatene katak Ita-nia família neʼebé  fiar la hanesan bele hamosu diskute ho Ita. Se neʼe akontese, karik Ita bele fó sala ba Ita-nia an tanba Ita hadomi sira no lakohi halo sira hirus. Maibé hanoin-hetan katak Ita-nia laran-metin ba Jeová tenkesér makaʼas liu fali Ita-nia domin ba família. Se Ita-nia família mak hatene kona-ba neʼe, karik sira sei komprende katak serbí Jeová importante duni ba Ita. Ita la bele obriga ema atu simu lia-loos. Maibé Ita bele ajuda sira hodi haree katak moris tuir Jeová nia dalan lori duni rezultadu neʼebé diʼak ba Ita-nia moris. No tuir loloos, Jeová mós fó oportunidade ba sira atu hili hodi serbí nia, hanesan nia fó ba ita.—Isaías (Yesaya) 48:17, 18.

17, 18. Saida mak bele ajuda Ita se ema ida iha família husik Jeová?

¹⁷ Se ema ida husi família mak hasai husi kongregasaun ka nia hili atu lakohi serbí tan Jeová, neʼe bele halo susar tebes ba ita. Dala ruma neʼe bele halo Ita laran-kanek tebes toʼo Ita sente hanesan ema ida sona Ita ho surik. Saida mak bele ajuda Ita tahan hasoru laran-kanek neʼe?

¹⁸ Fokus nafatin atu serbí Jeová. Se Ita mak hasoru situasaun neʼe, presiza hametin liután Ita-nia fiar. Lee beibeik Bíblia, prepara no tuir reuniaun sira, haklaken nafatin, no halo orasaun husu Jeová fó forsa ba Ita atu bele tahan. (Judas 20, 21) Oinsá se Ita halo ona buat hotu neʼe maibé laran-kanek nafatin? Keta rende an! Fokus nafatin atu serbí Jeová. Tanba tempu balu liu tiha, halo beibeik buat hanesan neʼe bele ajuda Ita hatene oinsá atu kontrola Ita-nia hanoin no sentimentu. Neʼe mak buat neʼebé akontese ba ema neʼebé hakerek Salmo 73. Iha tempu ida susar tebes ba nia atu kontrola ninia hanoin no sentimentu. Maibé adora nafatin Jeová ajuda nia hodi iha hanoin neʼebé loos. (Salmo [Mazmur] 73:16, 17) Hanesan neʼe mós kona-ba Ita.

19. Oinsá mak Ita bele hatudu respeitu ba Jeová nia arranju kona-ba dixiplina?

¹⁹ Respeitu dixiplina husi Jeová. Maromak hatene katak ninia dixiplina sira sei fó rezultadu diʼak ba ema hotu, inklui mós ema neʼebé hasai husi kongregasaun. Maski Ita-nia laran rahun tebes bainhira ema neʼebé Ita hadomi hetan dixiplina, maibé neʼe bele ajuda nia atu fila fali ba Jeová iha futuru. (Lee Ebreu 12:11.) Ita tenkesér respeitu Jeová nia arranju atu “la ransu tan” ho ema neʼebé hasai ona husi kongregasaun. (1 Korinto 5:11-13) Maski la fasil atu halo tuir, maibé ita tenke hasees an atu la ransu ho família neʼebé hasai ona husi kongregasaun, maski liu deʼit husi telefone, haruka mensajen, hakerek karta, e-mail, ka ligasaun liuhusi média sosiál.

20. Ita tenke tau esperansa kona-ba saida?

²⁰ Keta lakon esperansa! Domin “tau esperansa iha buat hotu”, tan neʼe ita hein katak loron ida ita-nia família neʼebé husik ona Jeová sei fila fali ba nia. (1 Korinto 13:7) Se Ita haree katak ita-nia família komesa hadiʼa ona ninia hahalok, Ita bele halo orasaun ba nia atu nia bele hetan forsa husi Bíblia no simu fali Jeová nia konvite neʼebé hatete: “Fila fali ba haʼu”.—Isaías (Yesaya) 44:22.

21. Ita tenke halo saida se Ita-nia família kontra Ita tan deʼit Ita hakarak laʼo tuir Jesus?

²¹ Jesus hatete katak ita tenke hadomi nia liu fali hadomi ema. No Jesus mós tau fiar ba ninia dixípulu katak sira sei hatudu aten-brani atu laran-metin ba nia maski família kontra sira. Tan neʼe, se Ita-nia família mak kontra Ita tan deʼit Ita hakarak laʼo tuir Jesus, sadere ba Jeová. Husu nia ajuda Ita atu bele tahan ho susesu. (Isaías [Yesaya] 41:10, 13) Haksolok bá hodi hatene katak Jeová no Jesus kontente tebes ho Ita no sira sei fó kolen ba Ita-nia laran-metin.