1, 2. (a) Ino nduumuno luli buti ndotukonzya kujana lino? (b) Ino ncinzi citulesya kujana luumuno lwini-lwini mazuba aano? (Amubone cifwanikiso icili kumatalikilo aacibalo.)

TOONSE tulayanda kupona buumi bwaluumuno, ibutajisi zyakulibilika. Eelo kaka tulamulumba Jehova kuti ulatupa “luumuno lwa Leza,” kuliiba mumoyo kwalo ikukonzya kutukwabilila kumizeezo iinyonganya alimwi akukulimvwa bubi! (Flp. 4:6, 7) Kuyungizya waawo, akaambo kakulyaaba kuli Jehova, tulakkomana ‘aluumuno a Leza,’ cilongwe cibotu anguwe.—Rom. 5:1.

² Nokuba boobo, ciindi ncayanda Leza kutegwa alete luumuno lwini-lwini tacinasika pe. Mazuba aano aamamanino aakatazya azwide mazwanga, alimwi bantu banji bajisi muuya wakukazyanya. (2Tim. 3:1-4) Mbotuli Banakristo, tweelede kuyuma munkondo yakumuuya njotulwana Saatani anjiisyo zyakubeja zyalo nzyasumpula. (2Kor. 10:4, 5) Pele cintu cipati icilangilwa kubikka luumuno lwesu muntenda cilakonzya kuzwa kuli bacibbululu ibatali Bakamboni. Bamwi balakonzya kutufwubaazya akaambo kanzyotusyoma, balakonzya kututamikizya kwaandaanya mukwasyi, naa kutukonga kuti balaleka kujatana  andiswe ikuti naa twazumanana alusyomo lwesu. Mbuti mbotweelede kukubona kukazyigwa abanamukwasyi? Mbuti mbotukonzya kuzwidilila notulwana buyumuyumu ibuboola akaambo kakukazyigwa?

3, 4. (a) Ino njiisyo zya Jesu inga zyabajatikizya buti bantu? (b) Ino ndilili nocikonzya kuyuma kapati kutobela Jesu?

³ Jesu wakalizyi kuti njiisyo zyakwe zyakali kuyoobaandaanya bantu alimwi akuti ibamutobela bakeelede kuba basicamba nobakazyigwa. Kukazyigwa ooku kwali kukonzya kulujatikizya luumuno akati kabanamukwasyi. Jesu wakaamba kuti: “Mutayeeyi kuti ndakaboola kuleta luumuno anyika; ndakaboola kuleta panga ikutali luumuno. Nkaambo ndakaboola kuleta lwaandaano akati kamwana musankwa abausyi, mwana musimbi abanyina, amukamwana abanyinazyala. Masimpe, basinkondo bamuntu bayooba bantu bamuŋanda yakwe mwini.”—Mt. 10:34-36.

⁴ Naakali kwaamba kuti “Mutayeeyi kuti ndakaboola kuleta luumuno,” Jesu wakali kupandulula kuti ibakali kumuswiilila bamwi bakaleelede kuyeeya kujatikizya zintu zibyaabi zyakali kulangilwa akaambo kakumutobela. Mulumbe wakwe wakali kuyoobaandaanya bantu. Mubwini, makanze a Jesu akali aakwaambilizya mulumbe wa Leza wakasimpe, kutali kunyonganya zilongwe. (Joh. 18:37) Nokuba boobo, kukakatila cakusyomeka kunjiisyo zya Kristo cakali kukonzya kuba cintu ciyumu ikuti balongwe naa banamukwasyi bakakaka kasimpe.

5. Ino nzintu nzi nzyobacitikilwa basikutobela Jesu?

⁵ Jesu wakabubikkilizya abuyumuyumu bwakukazyigwa abanamukwasyi kuti ncibeela camapenzi ngobeelede kuliyumya basikumutobela. (Mt. 10:38) Kutegwa batondezye kuti baleelela kuzulilwa kuli Kristo, basikwiiya bakwe bakeelede kuliyumya kukufwubaazyigwa nokuba kukakwa kuli banamukwasyi. Nokuba boobo, bakajana zintu zinji kapati kwiinda nzyobakasweekelwa.—Amubale Marko 10:29, 30.

6. Ino ncinzi ncotweelede kuyeeya ikuti bacibbululu bakukazya kusolekesya kwesu kwakukomba Jehova?

⁶ Noliba leelyo bacibbululu nobakazya kusolekesya kwesu kwakuti tumukombe Jehova, swebo tulazumanana kubayanda, pele tweelede kuyeeya kuti luyando lwesu kuli Leza a Kristo ndolweelede kuba mubusena bwakusaanguna. (Mt. 10:37) Alimwi tweelede kuzyiba kuti Saatani uyoosoleka kubelesya luyando ndotujisi kubanamukwasyi kunyonganya kusyomeka kwesu. Atulange-lange ibukkale bumwi bujatikizya kukazyigwa mumukwasyi alimwi tubone mbotukonzya kuzwidilila kulwana buyumuyumu bujanika.

7. Mbuti aabo ibakwetene amuntu uutali Kamboni mbobeelede kububona bukkale bwabo?

⁷ Bbaibbele licenjezya kuti aabo ibakwata naa kukwatwa “banoojisi mapenzi mumibili yabo.” (1Kor. 7:28) Ikuti naa mukwetene amuntu uutali Kamboni, mulakonzya kuba azintu zinji kapati izikonzya kumupa kupenga mumizeezo alimwi akulibilika mucikwati canu. Nokuba boobo, cilayandika kapati kubona bukkale bwanu mbubwenya mbwabubona Jehova. Kutayanda kwayooyo ngomukwetene limwi kutobela Kristo lino takali kaambo kaya koomoonga ikeelede kumupa kwaandaana naa kulekana. (1Kor. 7:12-16) Nokuba kuti mulumi uutali Kamboni takonzyi kusololela mumakani aazintu zyakumuuya, weelede kulemekwa akaambo kamukuli ngwajisi wakuba mutwe wamukwasyi. Mbubwenya buyo, mulumi Munakristo weelede kumuyanda camoyo woonse mukaintu wakwe uutali Kamboni akumutondezya luzyalo.—Ef. 5:22, 23, 28, 29.

8. Ino mibuzyo nzi njomweelede kulibuzya ikuti ngomukwetene limwi wamubikkila milawo kujatikizya bukombi bwanu?

⁸ Ino mbuti kuti ngomukwetene limwi wamubikkila milawo kujatikizya bukombi bwanu? Mucikozyanyo, mucizyi umwi wakaambilwa amulumaakwe kuti katola buyo lubazu mumulimo wamumuunda mumazuba aagaminide mumvwiki. Ikuti mwalijana mubukkale buli boobu, amulibuzye kuti: ‘Sena mulumaangu uyanda kuti  ndicileke kukomba Leza wangu? Ikuti naa pe, sena inga ndakutobela kulomba kwakwe?’ Kunyoneka kulakonzya kumugwasya kutantamuka mazwanga aamwi aamucikwati.—Flp. 4:5.

9. Ino mbuti Banakristo mbobakonzya kuyiisya bana babo kulemeka muzyali uutali Kamboni?

⁹ Kuyiisya bana kulakonzya kuba cintu ciyumu kapati ikuti ngomukwetene limwi katali Kamboni. Mucikozyanyo, mweelede kubayiisya bana banu kuti beelede kuumvwida mulawo wamu Bbaibbele wakuti: “Lemeka bauso abanyoko.” (Ef. 6:1-3) Pele ino mbuti kuti ngomukwetene limwi katatobeli zyeelelo zyamu Bbaibbele zyakulilemeka zisumpukide? Amube cikozyanyo cibotu kwiinda mukumulemeka ngomukwetene limwi. Amubikkile buyo maano kubube bubotu mbwajisi, akumulumba ngomukwetene limwi. Mutanikwaambi zintu zibyaabi kujatikizya ngomukwetene limwi munsi aabana banu. Muciindi caboobo, amubapandulwide kuti muntu uuli woonse weelede kulisalila kubelekela Jehova. Kulilemeka kabotu kwabana kulakonzya kupa kuti muzyali uutali Kamboni aboole kubukombi bwakasimpe.

10. Mbuti bazyali Banakristo mbobakonzya kuyiisya bana babo kasimpe kamu Bbaibbele mumukwasyi mobaindene bukombi?

¹⁰ Ziindi zimwi, muntu uutali Kamboni ngomukwetene limwi ulakonzya kwaamba kuti bana kabatola lubazu mumapobwe aabukombi bwakubeja naa kuyiisyigwa njiisyo zyabukombi bwakubeja. Bamalumi bamwi balakonzya kukasya mukaintu Munakristo kuti kayiisya bana Bbaibbele. Nokuba boobo, mukaintu Munakristo ulacita kufwumbwa ncakonzya kutegwa ayiisye bana kasimpe kamu Bbaibbele. (Mil. 16:1; 2Tim. 3:14, 15) Mucikozyanyo, mulumi uukwete mukaintu Kamboni ulakonzya kumukasya kusololela ciiyo ca Bbaibbele kubana bacili baniini naa kuunka ambabo kumiswaangano ya Bunakristo. Nokuba kuti ulalemeka zintu nzyaamba mulumi, ulakonzya alimwi kupandulula  lusyomo lwakwe kubana bakwe ikuti coolwe cajanika, nkokuti kubayiisya kulilemeka kabotu alimwi akubapa luzyibo kujatikizya Jehova. (Mil. 4:19, 20) Nokuba boobo, mukuya kwaciindi bana bakwe beelede kulisalila mumakani aabukombi.—Dt. 30:19, 20. *

11. Ino ncinzi cikonzya kuleta buyumuyumu kuli bacibbululu ibatali Bakamboni?

¹¹ Kumatalikilo, kulakonzya kuti ambweni tiitwakabaambila bacibbululu kuti tulayanzana a Bakamboni ba Jehova. Aboobo, lusyomo lwesu mboluyaabukomena, twabona kuti cilayandika kwaamba nzyotusyoma caantangalala. (Mk. 8:38) Ikuti naa busicamba bwanu bwapa kuti kube buyumuyumu akati kanu abacibbululu ibatali Bakamboni, amulange-lange ntaamu nzyomweelede kubweza kutegwa mucesye mazwanga alimwi akuzumanana kusyomeka.

12. Ino nkaambo nzi bacibbululu ibatali Bakamboni ncobakonzya kutukazya, pele mbuti mbotukonzya kutondezya lweetelelo kulimbabo?

¹² Amube alweetelelo kuli bacibbululu ibatali Bakamboni. Nokuba kuti tulakonzya kukkomana kapati kujatikizya kasimpe kamu Bbaibbele nkotwakaiya, bacibbululu balakonzya kubona mbuli kuti twakeenwa naa twakanjila kabunga kabuzangi. Balakonzya kubona mbuli kuti tatucibayandi akaambo kakuti tatusekeleli mazuba aakulyookezya ambabo. Mane buya balakonzya kulibilika kujatikizya buumi bwesu bwakumbele. Tweelede kutondezya lweetelelo kulimbabo kwiinda mukubona zintu mbobazibona alimwi akwiinda mukuswiililisya kutegwa tumvwisye zintu nzyobalibilika. (Tus. 20:5) Mwaapostolo Paulo wakali kuyandisisya kubamvwisya “bantu bamisyobo yoonse” kutegwa abaambile makani mabotu, aboobo kucita mbwaakacita kulakonzya kutugwasya andiswe.—1Kor. 9:19-23.

13. Mbuti mbotweelede kubandika abacibbululu ibatali Bakamboni?

¹³ Amubandike cabubombe. Bbaibbele lyaamba kuti: “Majwi aanu kaakondelezya lyoonse.” (Kol. 4:6) Tulakonzya kumulomba Jehova kuti atupe muuya wakwe uusalala kutegwa tucikonzye kutondezya mucelo wamuuya ciindi notwaambaula abacibbululu. Tatweelede kusola kubakazya kujatikizya njiisyo zyabo zyoonse zyabukombi bwakubeja. Ikuti naa majwi aabo naa micito yabo yatucisa kumoyo, tulakonzya kwiiya cikozyanyo cabaapostolo. Paulo wakalemba kuti: “Ibantu batutukila, tulabaleleka; notupenzyegwa tulaliyumya cakukkazika moyo; ibatubejekezya tulabaingula amoyo mubombe.”—1Kor. 4:12, 13.

14. Mbubotu nzi buliko akaambo kakuzumanana kulilemeka kabotu?

¹⁴ Amuzumanane kulilemeka kabotu. Nokuba kuti kubandika cabubombe kulakonzya kugwasya notubandika abacibbululu ibakazya, kulilemeka kwesu kubotu kulakonzya kugwasya kapati. (Amubale 1 Petro 3:1, 2, 16.) Kwiinda mucikozyanyo canu, amupe kuti babbululu banu babone kuti Bakamboni ba Jehova bajisi zikwati zyalukkomano, balabalanganya bana babo, bapona buumi buli kabotu, balalilemeka alimwi akukkutila mubuumi. Nokuba kuti babbululu tiibakatambula kasimpe, tulakonzya kujana lukkomano iluboola akaambo kakumukkomanisya Jehova kwiinda mukusyomeka kwesu.

15. Mbuti mbotukonzya kulibambila kakucili ciindi kujatikizya bukkale ibukonzya kupa kuti kube mazwanga?

¹⁵ Amulibambile kakucili ciindi. Amuyeeye kujatikizya bukkale ibukonzya kupa kuti kube mazwanga, alimwi amweezyeezye mbomukonzya kucita. (Tus. 12:16, 23) Mucizyi umwi waku Australia wakaamba kuti: “Bausyizyala bakali kukakazya kapati kasimpe. Katutanabatumina fooni kutegwa tumvwe mbobapona, mebo abalumi bangu twakali kusaanguna kupaila kuli Jehova kuti atugwasye kuti tutabainguli cabukali kuti banyema. Twakali kulibambila zibalo zyakubandika kutegwa mubandi ube wabulongwe. Kutegwa tutabi amubandi mulamfwu uukonzya kupa kuti  tutalike kukazyanya kujatikizya bukombi, twakali kulibikkila bulamfwu bwaciindi cigaminide cakubandika afooni.”

16. Mbuti mbomukonzya kuzunda penzi lyakulimvwa kuba amulandu kujatikizya kutakkomanisya babbululu banu?

¹⁶ Masimpe ngakuti, tamukonzyi kweeleba mazwanga oonse abacibbululu ibatali Bakamboni. Mazwanga aali boobo alakonzya kumupa kulimvwa kuba amulandu, ikapati akaambo kakuti mulabayanda kapati babbululu banu alimwi lyoonse mulasola kubakkomanisya. Ikuti kamulimvwa boobu, amusolekesye kusaanguna kubikkila maano kukusyomeka kwanu kuli Jehova muciindi camukwasyi wanu. Ikuzilanga munzila iili boobo zintu mubwini kulakonzya kugwasya babbululu banu kubona kuti kutobela kasimpe kamu Bbaibbele makani aabuumi alufwu. Kufwumbwa naa cili buti, amuyeeye kuti tamukonzyi kusungilizya bamwi kuzumina kasimpe. Muciindi caboobo, amubaleke kuti balibonene lwabo beni bubotu ibuliko mukutobela nzila zya Jehova. Leza wesu siluyando ubapa coolwe cakusala nzila njobayootobela mbubwenya mbwacita kulindiswe.—Is. 48:17, 18.

17, 18. Ino ncinzi cikonzya kumugwasya kuliyumya ikuti munamukwasyi wacileka kubelekela Jehova?

¹⁷ Ikuti munamukwasyi wagusyigwa naa walizandula kumbungano, inga mwalimvwa mbuli kuti mwayaswa panga. Ino inga mwaliyumya buti kupenzi iliboola akaambo kaceeci?

¹⁸ Amuzumanane kutobela bubambe bwanu bwakucita zintu zyakumuuya. Amuliyake kumuuya kwiinda mukubala Bbaibbele lyoonse, kulibambila alimwi akujanika kumiswaangano ya Bunakristo, kutola lubazu mumulimo wakukambauka, alimwi akulomba nguzu zyakuliyumya. (Jud. 20, 21) Pele ino mbuti kuti moyo wanu kautapyi muzintu nzyomucita, akuti mulimvwa buyo boobo? Mutatyompwi pe! Bubambe bubotu bwakucita zintu zyakumuuya bulakonzya kumugwasya alimwi kutalika kweendelezya mizeezo yanu alimwi ambomulimvwa. Amulange-lange cakacitika kumulembi wa Intembauzyo 73. Wakatalikide kuzilanga munzila iitali kabotu zintu alimwi akupenga kapati, pele wakacikonzya kululamika kuyeeya kwakwe ciindi naakanjila mubusena bwa Leza bwakukombela. (Int. 73:16, 17) Kukomba Jehova cakusyomeka kulakonzya kumugwasya kucita boobo.

19. Mbuti mbomukonzya kutondezya bulemu kububambe bwa Jehova mbwabelesya napa lulayo?

¹⁹ Amulemeke lulayo lwa Jehova. Bubambe bwakwe mukuya kwaciindi bulakonzya kuleta zilongezyo ziinda kubota kuli boonse, kubikkilizya akuli sikubisya, nokuba kuti kuzwa ciindi nocacitika-citika cilacisa kapati. (Amubale Bahebrayo 12:11.) Mucikozyanyo, Jehova utwaambila kuti ‘amuleke kuyanzana’ abasizibi ibateempwi. (1Kor. 5:11-13) Tacikwe makani ambocituciside mumoyo, tweelede kutantamuka kuyanzana amunamukwasyi uugusyidwe mumbungano kwiinda muluwaile, kulembelana tugwalo, kulembelana magwalo, ma e-mail, naa a intaneti mbuli facebook.

20. Ino mbulangizi nzi mbotweelede kuzumanana kuba ambubo?

²⁰ Amuzumanane kuba abulangizi. Luyando “lulalangila zintu zyoonse,” kubikkilizya abaabo ibakacileka kubelekela Jehova kuti bayoopiluka kulinguwe. (1Kor. 13:7) Ikuti mwabona bumboni bwakuti munamukwasyi watalika kucinca mumoyo, mulakonzya kupaila kulomba kuti ajane nguzu kuzwa mu Magwalo alimwi akuzumina kutamba kwa Jehova kwakuti: “Kopiluka kulindime.”—Is. 44:22.

21. Ncinzi ncomukonzya kucita ikuti kwaba kwaandaana mumukwasyi akaambo kakuti mutobela Jesu?

²¹ Jesu wakaamba kuti naa twasyoma muntu muciindi canguwe, ulakonzya kutukaka. Aboobo, wakalijisi lusyomo lwakuti basikwiiya bakwe balakonzya kuba abusicamba kutegwa bazumanane kusyomeka kulinguwe tacikwe makani akukazyigwa abanamukwasyi. Ikuti naa kutobela Jesu kwaleta “panga” mumukwasyi wanu, amusyome Jehova kuti amugwasye kulwana buyumuyumu. (Is. 41:10, 13) Amujane lukkomano mukuzyiba kuti Jehova a Jesu balikkomene andinywe alimwi akuti bayoomulongezya akaambo kakusyomeka kwanu.