1, 2. (a) I ku rhula ka muxaka muni loku hi nga tiphinaka hakona sweswi? (b) I yini lexi endlaka leswaku hi nga kumi ku rhula ka xiviri namuntlha? (Vona xifaniso lexi nga eku sunguleni ka xihloko lexi.)

HINKWERHU hi lava ku hanya hi ku rhula handle ka swiphiqo. Ha tsaka leswi Yehovha a hi nyikeke “ku rhula,” ku nga ku rhula loku endlaka leswaku hi kota ku tiyiselela swilo swo vava! (Filp. 4:6, 7) Leswi hi tinyiketeleke eka Yehovha, hi tiphina hi “ku rhula ka Xikwembu,” ku nga ku va ni vuxaka lebyinene na xona.—Rhom. 5:1.

² Hambiswiritano, a wu si fika nkarhi wa leswaku Xikwembu xi tisa ku rhula ka xiviri. Emasikwini lawa yo hetelela, ku tale vanhu lava rhandzaka timholovo ni madzolonga. (2 Tim. 3:1-4) Leswi hi nga Vakreste, hi fanele hi lwisana na Sathana swin’we ni tidyondzo takwe ta mavunwa leti a ti hlohlotelaka. (2 Kor. 10:4, 5) Kambe ku rhula loku hi nga na kona, ku nga ha kavanyetiwa hi maxaka ya hina lama nga riki Timbhoni. Man’wana ma nga ha hi hlekula, ma hi hehla hi ku vanga ku avana endyangwini kumbe ma vula leswaku ma ta tihlanganisa na hina ntsena loko ho tshika ku va Timbhoni. Hi fanele hi endla yini loko hi kanetiwa hi swirho swa ndyangu? Hi nga langutana njhani ni ntlhontlho wolowo?

3, 4. (a) Tidyondzo ta Yesu ti va khumba njhani vanhu? (b) Hi rini laha swi nga ha tikaka swinene ku landzela Yesu?

³ Yesu a a swi tiva leswaku tidyondzo takwe a ti ta vanga ku avana endyangwini naswona valandzeri vakwe a va ta boheka ku va ni xivindzi leswaku va kota ku tiyisela loko va kanetiwa. Sweswo swi nga kavanyeta ku rhula loku swirho swa ndyangu swi nga na kona. Yesu u te: “Mi nga ehleketi leswaku ndzi tise ku rhula emisaveni; a ndzi tisanga ku rhula, kambe ndzi tise banga. Hikuva ndzi tele ku ta vanga ku avana exikarhi ka jaha ni tata wa rona, ni le xikarhi ka n’wana wa nhwanyana ni mana wa yena, ni le xikarhi ka nhlomi ni n’wingi wa yona. Hakunene, valala va munhu ku ta va vanhu va ndyangu wa yena.”—Mat. 10:34-36.

⁴ Loko Yesu a ku: “Mi nga ehleketi leswaku ndzi tise ku rhula,” a a vula leswaku van’wana va vayingiseri vakwe a va fanele va anakanyisisa hi vuyelo lebyi a va ta langutana na byona loko va va valandzeri vakwe. Rungula rakwe a ri ta vanga ku avana. Entiyisweni, Yesu a a tele ku ta chumayela rungula ra Xikwembu ku nga ri ku vanga ku avana. (Yoh. 18:37) Hambiswiritano, a swi nga ta olova ku va munhu a tshama a tshembekile eka Kreste loko a kanetiwa hi vanghana kumbe swirho swa ndyangu wakwe.

5. Hi yihi miringo leyi valandzeri va Yesu va langutaneke na yona?

⁵ Loko Yesu a vulavula hi yin’wana ya miringo leyi valandzeri vakwe a va ta langutana na yona, u katse ni ku kanetiwa hi swirho swa ndyangu. (Mat. 10:38) Leswaku va kota ku tshama va tshembekile eka Yesu, vadyondzisiwa vakwe va boheke ku tiyisela ku hlekuriwa kumbe ku vengiwa hi swirho swa mindyangu ya vona. Hambiswiritano, va kume swo tala ku tlula leswi va lahlekeleke.—Hlaya Marka 10:29, 30.

6. I yini leswi hi faneleke hi swi tsundzuka loko maxaka ya hina ma hi kaneta hikwalaho ka leswi hi gandzelaka Yehovha?

⁶ Hambiloko maxaka ya hina ma hi kaneta hikwalaho ka leswi hi gandzelaka Yehovha, a hi ma vengi kambe hi fanele hi rhangisa Xikwembu na Kreste evuton’wini bya hina. (Mat. 10:37) Hi fanele hi tlhela hi tsundzuka leswaku Sathana, a nga ha endla leswaku hi rhandza ngopfu swirho swa mindyangu ya hina ku tlula Yehovha. A hi kambisiseni swiyimo swin’wana leswi katsaka ku kanetiwa hi swirho swa ndyangu kutani hi vona leswaku hi nga swi hlula njhani.

7. Hi rihi langutelo leri lava vavanuna kumbe vavasati va vona va nga riki Timbhoni va faneleke va va na rona?

⁷ Bibele yi vula leswaku “lava nghenelaka vukati va ta va ni nhlomulo enyameni ya vona.” (1 Kor. 7:28) Loko nkataku a nga ri Mbhoni, u nga ha dya mbitsi u xeva hi nhlomulo. Hambiswiritano, u fanele u languta xiyimo xa wena hilaha Yehovha a xi langutaka hakona. A swi vuli swona leswaku loko nkataku a nga swi lavi ku va Mbhoni, u fanele u hambana na yena kumbe u dlaya vukati. (1 Kor. 7:12-16) Hambileswi nuna wa wena loyi a nga riki Mbhoni a nga ta ka a nga rhangeli evugandzerini, u fanele u n’wi xixima tanihi leswi a nga nhloko ya ndyangu. Hilaha ku fanaka, vavanuna lava nga Vakreste va fanele va rhandza vasati va vona lava nga riki Timbhoni.—Efe. 5:22, 23, 28, 29.

8. Hi swihi swivutiso leswi u nga tivutisaka swona loko nkataku a ku vekela swipimelo loko swi ta emhakeni yo gandzela Yehovha?

⁸ U ta endla yini loko nkataku a ku vekela swipimelo loko swi ta emhakeni yo gandzela Yehovha? Hi xikombiso, makwerhu un’wana wa xisati, nuna wakwe u n’wi byele leswaku u fanele a ya ensin’wini hi masiku yo karhi ntsena evhikini. Loko u ri exiyin’weni xo fana ni lexi, tivutise: ‘Xana nkatanga u lava leswaku ndzi tshika ku gandzela Xikwembu? Loko swi nga ri tano, xana ndzi nga n’wi yingisa?’ Ku anakanyela swi ta  endla leswaku u papalata ku holova ni nkataku swi nga fanelanga.—Filp. 4:5.

9. Vatswari lava nga Vakreste va nga va dyondzisa njhani vana va vona leswaku va xixima mutswari la nga riki Mbhoni?

⁹ Ku dyondzisa vana swi nga ha tika loko nkataku a nga ri Mbhoni. Hi xikombiso, a hi nge u lava ku dyondzisa vana wa wena leswaku va yingisa nawu wa Bibele lowu nge: “Xixima tata wa wena ni mana wa wena.” (Efe. 6:1-3) Xana u ta endla yini loko mahanyelo ya nkataku ma lwisana ni leswi Bibele yi swi vulaka? Vekela vana va wena xikombiso lexinene hi ku n’wi xixima. Xiyisisa timfanelo takwe letinene, u tlhela u khensa swilo leswinene leswi a ku endlelaka swona. U nga vulavuli ku biha hi nkataku ni vana va wena. Ematshan’weni sweswo, va hlamusele leswaku un’wana ni un’wana u fanele a tihlawulela loko a lava ku gandzela Yehovha. Loko vana va wena va tikhoma hi ndlela leyinene, swi nga ha endla leswaku nkataku a amukela ntiyiso.

10. Vatswari lava nga Vakreste va nga va dyondzisa njhani vana va vona ntiyiso loko mutswari loyi un’wana a nga ri Mbhoni?

¹⁰ Mikarhi yin’wana vatswari lava nga riki Timbhoni va nga lava leswaku vana va hlanganyela na vona eka mikhuvo ya vuhedeni kumbe va dyondza tidyondzo ta vukhongeri bya mavunwa. Vavanuna van’wana lava nga riki Timbhoni, va nga ha alela vasati va vona leswaku va dyondzisa vana Bibele. Hambiswiritano, wansati la nga Mukreste u ta endla matshalatshala yo dyondzisa vana vakwe hi Yehovha. (Mint. 16:1; 2 Tim. 3:14, 15) Hi xikombiso, nuna la nga riki Mbhoni a nga ha alela nsati wakwe ku dyondzela vana Bibele kumbe ku famba na vona emihlanganweni ya Vukreste. Hambileswi a nga ta xixima xiboho xa nuna wakwe, kambe loko a pfulekeriwa hi  nkarhi u ta hlamusela vana vakwe hi ripfumelo rakwe, sweswo swi ta endla leswaku va dyondza mahanyelo lamanene ni ku tiva Yehovha. (Mint. 4:19, 20) Kambe, eku heteleleni vana hi vona va nga ta tihlawulela vukhongeri lebyi va byi lavaka.—Det. 30:19, 20. *

11. Hi swihi swiphiqo leswi nga ha vaka kona loko maxaka ya hina ma nga ri Timbhoni?

¹¹ Swi nga ha endleka hi nga ma byelanga maxaka ya hina loko hi sungula ku hlanganyela ni Timbhoni ta Yehovha. Kambe loko ripfumelo ra hina ri ya ri tiya, hi vone swi fanerile ku ma byela hi vukhongeri bya hina. (Mar. 8:38) Loko ku ri leswaku loko u vulavule na wona swi vange timholovo, xiya swin’wana leswi u nga swi endlaka leswaku u hunguta timholovo teto naswona u tama wa ha tshembekile.

12. I yini lexi nga endlaka leswaku maxaka ya hina ma hi kaneta naswona hi nga swi kombisa njhani leswaku ha ma anakanyela?

¹² Anakanyela maxaka lama nga riki Timbhoni. Hambileswi hi nga ha vaka hi tsakile hikwalaho ka ntiyiso lowu hi wu dyondzeke eBibeleni, kambe maxaka ya hina ma nga ha anakanya leswaku hi kanganyisiwile kumbe hi joyine vukhongeri byo biha. Va nga ha vona onge a ha ha va rhandzi hileswi hi nga ha tlangeliki tiholideyi leti va ti tlangelaka. Kumbexana va nga ha karhateka ni hi vuhlayiseki bya hina. Hi nga kombisa leswaku ha va anakanyela hi ku ringeta ku twisisa ndlela leyi va titwaka ha yona ni hi ku rhiya ndleve loko va vula swilo leswi va vilerisaka. (Swiv. 20:5) Muapostola Pawulo a a tikarhatela ku twisisa “vanhu va mixaka hinkwayo” hi xikongomelo xo va byela mahungu lamanene, na hina swi nga hi vuyerisa ku endla tano.—1 Kor. 9:19-23.

13. Hi nga vulavurisana njhani ni maxaka ya hina lama nga riki Timbhoni?

¹³ Vulavula hi ndlela ya musa. Bibele yi ri: “Marito ya n’wina a ma ve ni nsovo nkarhi hinkwawo.” (Kol. 4:6) Hi nga khongela eka Yehovha hi kombela moya lowo kwetsima leswaku wu hi pfuna hi kombisa timfanelo letinene loko hi vulavula ni maxaka ya hina. A hi fanelanga hi tshamela ku sola xin’wana ni xin’wana lexi va xi vulaka hi vukhongeri bya vona. Loko va hi tlhava hi marito kumbe va hi twisa ku vava hi swiendlo, hi fanele hi tekelela xikombiso xa vaapostola. Pawulo u tsale a ku: “Loko hi tseketseriwa, ha katekisa; loko hi xanisiwa, ha tiyisela; loko hi susiwa xindzhuti, ha khongotela.”—1 Kor. 4:12, 13.

14. Hi byihi vuyelo lebyi vaka kona loko hi tikhoma hi ndlela leyinene?

¹⁴ Tikhome hi ndlela leyinene. Hambileswi ku vulavula hi ndlela ya musa swi pfunaka loko hi vulavula ni maxaka ya hina lama kanetaka, kambe ndlela leyi hi tikhomaka ha yona i ya nkoka swinene. (Hlaya 1 Pet. 3:1, 2, 16.) Ndlela leyi u hanyaka ha yona a yi endle leswaku maxaka ya wena ma swi xiya leswaku Timbhoni ta Yehovha ti tsakile evukatini bya tona, ti khathalela vana va tona ni leswaku ti tikhoma hi ndlela leyinene. Hambiloko maxaka ya hina ma nga wu amukeli ntiyiso, hi nga tiphina hi ntsako lowu tisiwaka hi ku tirhela Yehovha hi ku tshembeka.

15. Hi nga swi lunghekela njhani swiyimo leswi nga ha pfuxaka timholovo?

¹⁵ Hlela ka ha ri emahlweni. Ehleketa hi swiyimo leswi nga ha pfuxaka timholovo, kutani u lava ndlela yo langutana na swona. (Swiv. 12:16, 23) Makwerhu un’wana wa xisati wa le Australia u ri: “Tata wa nuna wa mina a nga lavi ku twa nchumu hi ntiyiso wa le Bibeleni. Loko mina ni nuna wa mina hi nga si n’wi endzela, a hi sungula hi khongela hi kombela Yehovha leswaku a hi pfuna hi vulavurisana na yena kahle. A hi hlela timhaka leti a hi ta burisana na yena ha tona ka ha ri emahlweni ku endlela leswaku ku nga pfuki timholovo. A hi nga tshami masiku yo tala loko hi n’wi endzerile ku endlela leswaku hi papalata mabulo lama nga ha pfuxaka timholovo lama khumbaka timhaka ta vukhongeri.”

16. U nga swi hlula njhani ku tivona nandzu hileswi u nga swi kotiki ku tsakisa maxaka ya wena?

 ¹⁶ Ntiyiso wa mhaka hi leswaku mikarhi yin’wana, wena ni maxaka ya wena lama nga riki Timbhoni mi ta pfa mi nga voni swilo hi tihlo rin’we. Loko sweswo swi endleka, u nga ha tivona nandzu hikwalaho ka leswi u ma rhandzaka naswona u ringetaka ku ma tsakisa. Loko u sungula ku tivona nandzu, tikarhatele ku tshama u tshembekile eka Yehovha ku tlula ndlela leyi u ma rhandzaka ha yona maxaka ya wena. Loko u endla tano, maxaka ya wena ma ta swi xiya leswaku ku hanya hi milawu ya Bibele, i mhaka ya nkoka swinene ku tlula hinkwaswo. Xin’wana lexi u faneleke u xi tsundzuka, hi leswaku a wu nge va sindzisi vanhu ku amukela ntiyiso. Ku ri na sweswo, va endle va vona vuyelo bya ku hanya hi milawu ya Yehovha. Yehovha u nyike munhu un’wana ni un’wana ntshunxeko wo tihlawulela ndlela leyi a lavaka ku hanya ha yona.—Esa. 48:17, 18.

17, 18. I yini lexi nga ku pfunaka leswaku u kota ku langutana ni xiyimo loko xirho xa ndyangu xi tshika ku tirhela Yehovha?

¹⁷ Loko xirho xa ndyangu xi susiwa evandlheni kumbe xi tshika ku hlanganyela swa vava swinene. U nga langutana njhani ni xiyimo lexi xo vava?

¹⁸ U nga tshiki ku endla mitirho leyi fambisanaka ni ku gandzela Yehovha. Tiyisa vuxaka bya wena na Yehovha hi ku hlaya Bibele nkarhi ni nkarhi, lunghiselela u tlhela u va kona emihlanganweni ya Vukreste, vana kona ensin’wini u tlhela u khongela u kombela matimba yo kota ku tiyisela. (Yudha 20, 21) Kambe ku vuriwa yini loko ku vava loku u ku twaka ku nga heli hambiloko u endla swilo leswi hinkwaswo? U nga heli matimba! Ku endla mitirho leyi fambisanaka ni ku gandzela Yehovha swi ta endla leswaku u kota ku lawula ndlela leyi u titwaka ha yona. Xiya leswi humeleleke mutsari wa Pisalema 73. A a ri ni langutelo leri hoxeke leswi endleke a karhateka swinene, kambe u kote ku lulamisa langutelo rakwe loko a nghena etempeleni ya Yehovha. (Ps. 73:16, 17) Na wena loko u hambeta u gandzela Yehovha hi ku tshembeka u ta pfuneka.

19. U nga swi kombisa njhani leswaku wa ri xixima lunghiselelo ra Yehovha ro tshinya vadyohi?

¹⁹ Xixima ndlela leyi Yehovha a tshinyaka vadyohi ha yona. Lunghiselelo ra Yehovha ro tshinya vadyohi ri hi vuyerisa hinkwerhu ku katsa ni mudyohi hambileswi hi nkarhi wolowo swi nga ha vaka swi vava swinene. (Hlaya Vaheveru 12:11.) Hi xikombiso, Yehovha u hi byela leswaku hi “tshika ku tihlanganisa” ni vadyohi lava nga hundzukiki. (1 Kor. 5:11-13) Ku nga khathariseki ku vava loku hi ku twaka, hi fanele hi papalata ku vulavurisana ni xirho xa ndyangu lexi susiweke, ku nga va hi riqingho, ku xi rhumelela marungula hi selfoni, ku xi tsalela papila, ku xi rhumela imeyili kumbe ku vulavurisana na xona eka ti-website to endla xinghana.

20. Hi wihi ntshembo lowu hi faneleke hi va na wona?

²⁰ Vana ni ntshembo. Rirhandzu ri tshemba “swilo hinkwaswo,” ku katsa ni leswaku lava tshikeke ku tirhela Yehovha va ta tlhelela eka yena. (1 Kor. 13:7) Loko u vona onge xirho xa ndyangu lexi susiweke se xa yi tshika mikhuva ya xona leyo biha, xi katse exikhongelweni u kombela leswaku xi yingisa xikombelo xa Yehovha lexi nge: “Vuya eka mina.”—Esa. 44:22.

21. U fanele u endla yini loko swirho swa ndyangu swi ku kaneta hileswi u nga mulandzeri wa Yesu?

²¹ Yesu u vule leswaku loko hi rhandza munhu wo karhi ku tlula yena, a hi faneleki ku va vadyondzisiwa va yena. Hambiswiritano, a a tiyiseka leswaku vadyondzisiwa vakwe va ta swi kota ku tshama va tshembekile hambiloko va kanetiwa hi swirho swa mindyangu ya vona. Loko ku ri leswaku ku va mulandzeri wa Yesu swi tise “banga” endyangwini wa ka n’wina, kombela Yehovha a ku pfuna u kota ku langutana ni xiyimo xexo. (Esa. 41:10, 13) Tiyiseka leswaku Yehovha na Yesu va tsaka loko va ku vona u tshama u tshembekile naswona va ta ku katekisa.