1, 2. (a) Se a te filemu telā e mafai o maua nei ne tatou? (e) Se a te mea e taofi aka ne ia tatou mai te ‵sala atu ki te filemu katoatoa i te taimi tenei? (Onoono ki te ata i te kamataga.)

E MA‵NAKO tatou katoa ki se olaga filemu telā e seai se manavase i ei. Ko oko eiloa te ‵tou loto fakafetai me e tuku mai ne Ieova ki a tatou a te “filemu o te Atua,” se lagonaga tokagamalie telā e mafai o puipui ne ia tatou mai i mafaufauga mo lagonaga sē ‵lei! (Fili. 4:6, 7) Ona ko ‵tou tukuatuga ki a Ieova, e maua foki ne tatou a te “filemu mo te Atua,” se fesokotakiga ‵lei mo ia.—Loma 5:1.

² Kae e seki oko atu ki te taimi o te Atua ke aumai ne ia te filemu katoatoa. Ko ‵fonu a aso faiga‵ta konei i kinauga, kae e tokouke a tino e maua ne latou a uiga fia fai taua. (2 Timo. 3:1-4) E pelā me ne Kelisiano, e ‵tau o taua atu tatou i te taua faka-te-agaga ki a Satani mo akoakoga ‵se kolā e fakamalosi aka ne ia. (2 Koli. 10:4, 5) Kae ko te ‵toe mea fakamataku ki te ‵tou filemu e mafai o māfua mai i ‵tou kāiga sē tali‵tonu. E mafai o fakatauemu a nisi tino ki ‵tou talitonuga, ‵losi mai mo te fakamavaevaega ne tatou a te kāiga, io me fakamatakutaku mai me ko se toe fai tatou mo vaega o te kāiga vaganā ke fulitua atu tatou ki ‵tou talitonuga. E ‵tau o pefea te ‵tou  kilokiloga ki ‵tekemaiga mai kāiga? E mafai pefea o fakafesagai atu tatou mo te manuia ki mea faiga‵ta konā?

3, 4. (a) Ne a mea aoga e maua mai i akoakoga a Iesu? (e) Ko te taimi fea e mafai ei o faigata ke tau‵tali atu i a Iesu?

³ Ne iloa ne Iesu me i ana akoakoga ka fakamavae‵vae ne ia a tino kae e ‵tau o maua ne latou kolā e tau‵tali atu i a ia a te loto malosi ke fai penā i taimi o ‵tekemaiga. E mafai o pokotia ‵tou fesokotakiga filemu mo ‵tou kāiga i ‵tekemaiga konei. Ne fai mai a Iesu: “Sa mafaufau i a au ne vau o aumai a te filemu ki te lalolagi, au ne vau o aumai te pelu kae e se ko te filemu. Me i a au ne vau o faka‵tupu a mavaevaega, ko te tagata mo tena tamana, ko te tama fafine mo tena mātua, mo te tamafine telā ko avaga mo te mātua o tena avaga. E tonu, a fili o te tino ko tino eiloa o tena kāiga ‵tonu.”—Mata. 10:34-36.

⁴ I ana pati konei “Sa mafaufau i a au ne vau o aumai a te filemu ki lalolagi,” ne fakauiga eiloa a Iesu me e manakogina ko ana tino fakalogo‵logo ke mafau‵fau ki ikuga o te tau‵tali ki a ia. E mafai o fakamavae‵vae a tino ne tena fekau. E tonu, ko te manakoga o Iesu ke folafola atu a te fekau o te munatonu a te Atua, kae ke se fakamasei a fesokotakiga. (Ioa. 18:37) Kae e mafai loa o faigata a te ‵mautakitaki i te fakamaoni ki akoakoga a Keliso māfai e ‵teke mai se taugasoa io me ko kāiga ‵pili ki te munatonu.

5. Ne a mea ne ‵tupu ki soko o Iesu?

⁵ Ne aofia ne Iesu a te logo‵mae i ‵tekemaiga mai kāiga e pelā me ko logo‵maega kolā e ‵tau o loto fia‵fia ana soko ke kufaki i ei. (Mata. 10:38) Ko te mea ke fakamaoni atu te lotou aoga ki a Keliso, ne ‵tau mo ana soko o kufaki i fakatauemuga io me vae kea‵tea mai i olotou kāiga. Kae ne maua ne latou a mea e uke fakafia atu i lō o olotou mea ne ‵galo.—Faitau te Maleko 10:29, 30.

6. Se a te mea e ‵tau o masaua ne tatou māfai e ‵teke mai ‵tou kāiga ki ‵tou taumafaiga ke tapuaki atu ki a Ieova?

⁶ Faitalia me e ‵teke mai a ‵tou kāiga ki ‵tou taumafaiga ke tapuaki atu ki a Ieova, e tumau eiloa te ‵tou a‵lofa ki a latou, kae e ‵tau o masaua ne tatou me e ‵tau o fakamuamua te ‵tou a‵lofa ki te Atua mo Keliso. (Mata. 10:37) E ‵tau foki o iloa ne tatou i a Satani ka taumafai o fakaaoga a ‵tou a‵lofa atafai ki ‵tou kāiga ke fakaseaoga ei te ‵tou loto fakamaoni. Ke na sau‵tala nei tatou ki tulaga kolā e aofia i ei a ‵tekemaiga mai kāiga kae ke onoono aka ki te auala e mafai o fakafesagai atu mo te manuia ki mea faiga‵ta kolā e maua mai i ei.

7. E ‵tau o pefea te kilokiloga a latou kolā e a‵vaga ki tino sē tali‵tonu?

⁷ Ne fakailoa mai ne te Tusi Tapu me i tino a‵vaga “ka maua ne latou a puapuaga i te foitino.” (1 Koli. 7:28) Kafai koe e avaga ki se tino sē talitonu, e mafai o silia atu a mea fakafi‵ta mo te manavase ka maua ne koe i tou olaga avaga. E tiga eiloa te feitu tenā, se mea tāua ke maua ne koe te kilokiloga a Ieova. A te loto sē fiafia o tau avaga ke tautali i a Keliso e se ko te pogai tāua ke ‵tala ei te avaga. (1 Koli. 7:12-16) E tiga eiloa e se fai ne te tagata avaga sē talitonu a te takitakiga i mea faka-te-agaga, e ‵tau eiloa o āva koe ki a ia ona ko tena tulaga e pelā me ko te ulu o te fakapotopotoga. I se auala tai ‵pau, e ‵tau o fakaasi atu ne se tagata avaga Kelisiano a te alofa sē fakapito mo te alofa atafai ki tena avaga sē talitonu.—Efe. 5:22, 23, 28, 29.

8. Ne a fesili e mafai o ‵sili ifo ki a koe eiloa māfai tau avaga e taumafai o fakamu‵tana au mea e fai i tau tapuakiga?

⁸ E a māfai e taumafai tau avaga o fakamu‵tana au mea e fai i tau tapuakiga? E pelā mo te fai atu o te avaga a se tuagane ke kau atu fua a ia ki te galuega talai i nai aso o te vaiaso. Kafai e fakafesagai atu koe ki se tulaga tai ‵pau, ke fesili ifo ki a koe eiloa: ‘E mata, e faimālō mai taku avaga ke taofi toku  tapuaki atu ki te Atua? Kafai e se penā loa, e mafai o talia ne au te fakamolemole tenā?’ A te loto malamalama e mafai o fesoasoani mai ke ‵kalo keatea koe mai kinauga fakatauavaga.—Fili. 4:5.

9. E mafai pefea ne Kelisiano o akoako olotou tama‵liki ke āva ki olotou mātua sē tali‵tonu?

⁹ A te akoakoga o tama‵liki e mafai eiloa o faigata māfai tau avaga se tino sē talitonu. E pelā mo te akoako ne koe au tama‵liki ke faka‵logo ki te fakatonuga mai te Tusi Tapu: “Āva ki tou tamana mo tou mātua.” (Efe. 6:1-3) Kae e a māfai e se tautali atu tau avaga ki tulaga ma‵luga o te Tusi Tapu e uiga ki mea tau amioga? Fakaasi atu te uiga āva ki tau avaga. Saga atu ki ana uiga ‵lei, kae fakaasi atu tou amanaia ki tau avaga. ‵Kalo keatea mai te fai atu o pati sē ‵lei ki tau avaga i mua o au tama‵liki. I lo te fai penā, fakamatala atu ki a latou me e ‵tau mo tino taki tokotasi o fai sena filifiliga me tavini a ia ki a Ieova io me ikai. E mafai o fesoasoani atu a amioga ‵lei a tama‵liki ke ‵saga tonu atu a mātua sē tali‵tonu ki te tapuakiga tonu.

10. E mafai pefea ne mātua Kelisiano o akoako olotou tama‵liki ki te munatonu mai te Tusi Tapu i se kāiga e mavae‵vae i mea tau lotu?

¹⁰ I nisi taimi, e faimālō ne mātua sē tali‵tonu olotou tama‵liki ke aofia i fakamanatuga fapau‵pau io me akoako atu a talitonuga ‵se fakalotu. A nisi tagata a‵vaga e taofi ne latou olotou avaga Kelisiano mai te akoako atu olotou tamaliki mai te Tusi Tapu. E se gata i ei, e fai ne se fafine avaga Kelisiano a mea e mafai ne ia o fai ke akoako ana tama‵liki ki te munatonu mai te Tusi Tapu. (Galu. 16:1; 2 Timo. 3:14, 15) E pelā mo te sē talia ne te avaga tagata ke fai faka‵lei se akoga faka-te-Tusi Tapu ne se tuagane Molimau mo ana tama‵liki io me ave latou ki fakatasiga Kelisiano. E tiga eiloa e āva tou fafine ki fakaikuga a tou tagata, e mafai eiloa ne  tou fafine fafine o fakaasi atu tena talitonuga ki ana tama‵liki i te ukega o taimi, mai te tuku atu ki a latou a akoakoga mo te iloaga e uiga ki a Ieova. (Galu. 4:19, 20) E tonu, e ‵tau eiloa o fai fakamuli ne ana tamaliki olotou fakaikuga totino e uiga ki te tapuakiga.—Teu. 30:19, 20. *

11. Se a te mea e mafai o fakamāfua aka ei se fakalavelave i tou va mo ou kāiga kolā e se ne Molimau?

¹¹ Muamua la, kāti e seki fai tatou ki ‵tou kāiga e uiga ki ‵tou fesokotakiga mo Molimau a Ieova. I te taimi e gasolo aka ei ki luga ‵tou fakatuanaki, ne lavea ne tatou te tāua ke fakaasi atu a mea e uiga ki ‵tou fakatuanaki. (Male. 8:38) Kafai ne iku atu a tou tulaga loto toa ki se fakalavelave i tou va mo ou kāiga sē tali‵tonu, ke onoono ki nisi auala ke fakafeoloolo aka ei a te kinauga kae ke tumau faeloa i te loto fakamaoni.

12. Kaia e mafai ei o ‵teke mai a ‵tou kāiga sē tali‵tonu, kae e mafai pefea o fakaasi atu ne tatou a te loto malamalama?

¹² Ke loto malamalama ki kāiga sē tali‵tonu. E tiga eiloa e mafai o fia‵fia ‵ki tatou e uiga ki muna‵tonu mai te Tusi Tapu ne tauloto ne tatou, e mafai o mafau‵fau ‵tou kāiga i a tatou ko oti ne fakaloiloigina io me aofia i se potukau ‵teke fakalotu. E mafai o mafau‵fau latou me i a tatou ko se a‵lofa ki a latou ona ko te mea e se fakamanatu fakatasi ne tatou a aso malō‵lo. E mafai o manava‵se latou ki ‵tou olaga ‵lei i aso mai mua. E ‵tau o fakaasi atu ne tatou te loto malamalama mai te taumafai ke iloa olotou lagonaga kae fakalogologo faka‵lei ke iloa ne tatou a mea e manava‵se latou ki ei. (Faata. 20:5) Ne taumafai eiloa te apositolo ko Paulo ke malamalama i “vaegā tino kese‵kese katoa” ko te mea ke fakasalalau atu ne ia te tala ‵lei ki a latou, kae e mafai o fesoasoani mai ki a tatou a te vaegā kilokiloga tenā.—1 Koli. 9:19-23.

13. E ‵tau o fai‵pati atu pefea tatou ki ‵tou kāiga sē tali‵tonu?

¹³ Faipati atu mo te agamalu. “Ke fai faeloa otou pati ke ‵tagi ‵lei,” ko pati a te Tusi Tapu. (Ko. 4:6) E mafai o fakamolemole atu tatou ki a Ieova mō tena agaga tapu ko te mea ke mafai ne tatou o fakaasi atu a fuataga o te agaga māfai e fai‵pati atu ki ‵tou kāiga. E se ‵tau o kinau atu tatou e uiga ki olotou manatu ‵se fakalotu. Kafai e fakalogo‵mae ne latou a tatou ki olotou pati mo faifaiga, e mafai ne tatou o fakaakoako ki te kau apositolo. Ne tusi mai a Paulo: “Kafai e fakaitaita mai a tino, e fakamanuia atu matou. Kafai e fakasaua mai, e kufaki matou. Kafai e fatufatu mai, e tali atu matou mo te filemu.”—1 Koli. 4:12, 13.

14. Ne a mea aoga e maua mai i te tumau i amioga ‵lei?

¹⁴ Fakatumau a amioga ‵lei. E tiga eiloa e mafai o fesoasoani atu a te faipati i se auala filemu māfai ko fakafesagai atu tatou ki ‵tou kāiga ‵teke, e mafai foki o aoga malosi atu a ‵tou amioga ‵lei. (Faitau te 1 Petelu 3:1, 2, 16.) Mai i tau fakaakoakoga ‵lei, fai ke lavea ne ou kāiga me e maua ne Molimau a Ieova se olaga avaga fiafia, e tausi faka‵lei olotou tama‵liki, kae ola i se olaga ‵ma, ‵lei, kae fakafiafia. E tiga eiloa e se mafai o talia ne ‵tou kāiga a te munatonu, e mafai o maua ne tatou a te fiafia mai te fakafiafia ne tatou a Ieova e auala i ‵tou olaga fakamaoni.

15. E mafai pefea o fai ‵tou fakatokaga mai mua mō tulaga kolā e mafai o iku atu ki kinauga?

¹⁵ Fai a fakatokaga mai mua. Mafaufau ki tulaga kolā e mafai o iku atu ei ki kinauga, kae fakaiku aka te auala ke faka‵lei aka a mea konā. (Faata. 12:16, 23) E fai mai se tuagane mai Ausetalia, penei: “Ne ‵teke malosi mai a te tamana o taku avaga ki te munatonu. A koi tuai o asi atu māua ki tou tagata, ne ‵talo eiloa māua mo taku avaga ki a Ieova ke fesoasoani mai ke tali atu i se leo filemu ki faifaiga kaitaua. Ne fakatoka ne māua a mataupu ke sau‵tala fakatasi ko te mea ke fanofano ‵lei te sau‵talaga. Ke ‵kalo keatea mai i sau‵talaga ‵loa kolā e mafai eiloa o iku  atu ki kinauga e uiga ki lotu, e fakatapulā ne māua a taimi ke asi atu ki a ia.”

16. E mafai pefea o manumalo koe i lagonaga sē ‵lei e uiga ki te fakafanoanoa ne koe ou kāiga?

¹⁶ E tonu, e se mafai o ‵kalo keatea koe mai kinauga katoa mo ou kāiga sē tali‵tonu. E mafai ne kinauga konā o fai ke se ‵lei ou lagonaga, maise loa me e alofa malosi koe ki ou kāiga kae ne taumafai faeloa koe o fakafiafia latou. Kafai e penā loa ou lagonaga, taumafai ke fakamuamua ne koe te fakamaoni ki a Ieova i lō ou kāiga. E mafai o fesoasoani atu a te tulaga tenei ke lavea mai ne ou kāiga me i te fakagaluegaga o muna‵tonu mai te Tusi Tapu se mea telā e aofia i ei te ola mo te mate. I so se tulaga, ke masaua me e se mafai o faimālō ne koe a nisi tino ke talia ne latou a te munatonu. I lo te fai penā, fai ke lavea ne latou a mea aoga e maua ne koe mai te tautali i auala o Ieova. E tuku atu ne te ‵tou Atua ki a latou a mea kolā e tuku mai foki ne ia ki a tatou, ko te avanoaga ke filifili aka a te auala ka tau‵tali ei latou.—Isa. 48:17, 18.

17, 18. Se a te mea e mafai o fesoasoani atu ki a koe māfai ko tiakina ne se tino i te kāiga a Ieova?

¹⁷ Kafai ko fakatea se kāiga io me ‵vae kea‵tea mai te fakapotopotoga, e mafai eiloa o fai te mea tenā e pelā me se tino ko ‵suki ki te naifi. E mafai pefea o kufaki ne koe te logo‵mae telā e iku mai i ei?

¹⁸ Fakatumau au polokalame faka-te-agaga. Ke fakamalosi koe mai te faitau faeloa ki te Tusi Tapu, fakatoka kae kau atu ki fakatasiga Kelisiano, kau atu ki te galuega talai, kae ‵talo atu mō te malosi ke kufaki. (Iuta 20, 21) Kae e a māfai e se tonu mo tou loto au mea e fai, kae na ko te logo‵mae fua? Ke se ‵fiu vave! E mafai o fesoasoani atu se fakasologa ‵lei o faifaiga faka-te-agaga ke mafai ne koe o pule faka‵lei atu ki ou mafaufauga mo lagonaga. Mafaufau ki te tala o te tino tusitala o te Salamo 73. Ne ati aka ne ia se kilokiloga ‵se kae ne seki ‵lei valevale ana lagonaga, kae ne mafai eiloa o faka‵tonu aka ne ia ana mafaufauga i te taimi ne ulu atu ei a ia ki te koga Tapuaki o te Atua. (Sala. 73:16, 17) A tou tapuaki mo te fakamaoni ki a Ieova e mafai o fesoasoani atu ke fai foki koe penā.

19. E mafai pefea o fakaasi atu ne koe a te āva ki fakatokaga a Ieova e uiga ki polopolokiga?

¹⁹ Ke āva ki polopolokiga a Ieova. E mafai o maua ne tatou a toe ikuga ‵lei tumau mai i ana fakatokaga, e aofia i ei a te tino fai mea ‵se, faitalia eiloa me koi fakalogo‵mae mai eiloa te mea ne tupu. (Faitau te Epelu 12:11.) E pelā mo te fakatonu mai a Ieova ki a tatou ke “fakagata te [‵tou] ‵kau fakatasi” mo tino fai mea ‵se kae se sala‵mo. (1 Koli. 5:11-13) Faitalia te logo‵mae o ‵tou loto, e ‵tau eiloa o ‵kalo keatea tatou mai te fesokotaki atu faeloa mo se kāiga fakatea e auala i telefoni, fekau aveave, tusi io me ko te itaneti.

20. Se a te fakamoemoega e mafai o fakatumau ne tatou?

²⁰ Fakatumau tou fakamoemoega. A te alofa “e fakamoemoe ki mea katoa,” e aofia i ei a te fakamoemoe me ka toe ‵foki mai ki a Ieova a latou kolā ne tiakina ne latou a Ia. (1 Koli. 13:7) Kafai e lavea ne koe a fakamaoniga me ko kamata o ‵fuli te loto o sou kāiga, ko mafai ei o ‵talo atu koe ko te mea ke mafai o maua ne tou tagata io me ko tou fafine a te malosi mai te faitau ki te Tusi Tapu kae talia te fakamolemole a Ieova: “Foki mai ki a au.”—Isa. 44:22.

21. Se a te mea e ‵tau o fai ne koe māfai tou kāiga e mavae‵vae ona ko tou tautali atu i a Iesu?

²¹ Ne fai mai a Iesu me kafai e fakamuamua ne tatou se tino i lō o ia, ka se aoga eiloa tatou mō ia. Kae ne loto talitonu eiloa a ia me ka maua ne ana soko a te loto malosi ke fakatumau te lotou fakamaoni ki a ia faitalia a ‵tekemaiga mai kāiga. Kafai e ‵teke mai tou kāiga ona ko koe e tautali i a Iesu, ke fakalagolago ki a Ieova ke fesoasoani atu ke mafai o fakafesagai atu koe ki tulaga faiga‵ta konā mo te manuia. (Isa. 41:10, 13) Ke maua te fiafia mai te iloa atu me i a Ieova mo Iesu e fia‵fia ki a koe kae ka taui atu ne lāua tou fakamaoni.