1, 2. а) Бөгүн Бурганның амыр-тайбыңын кандыг уткалыг миннип турар бис? б) Тайбыңны долузу-биле минниринге биске чүү шаптыктап турар? (Статьяның эгезинде чурукту көрүңер.)

 БИС шупту тайбың чурттаксаар бис. Ынчангаш Иеговага Бодунуң амыр-тайбыңын биске берип турары дээш өөрүп четтирер-дир бис. «Бурганның амыр-тайбыңы» бисти дүвүрелдерден камгалап, сагыш-сеткиливиске оожум байдалды тургузуп турар (Флп. 4:6, 7). Оон аңгыда Иеговага чуртталгавысты бараалгаткаш, «Бурган-биле эп-найыралдыг» апарган бис (Рим. 5:1).

² Ынчалза-даа Бурганның бүгү чер кырынга тайбыңны тургузар үези ам-даа келбээн. Бис «сөөлгү хүннерде» чурттап турар бис. Бөгүн ниитилел чөрүлдээлерден хилинчектенип чоруур база чамдык улус каржы-хажагай апарган (2 Тим. 3:1—4). Христианнар Эрликке болгаш ооң тарадып турар меге өөредиглеринге удур демисежир ужурлуг (2 Кор. 10:4, 5). Ындыг-даа болза Херечи эвес чоок улузувустуң удурланыышкыны биске оон-даа улуг бергелерни тургузуп болур. Олар чамдыкта үзел-бодалдарывысты кыжырар азы бисти өг-бүледе аңгылажыг үндүрүп турар деп буруудадыр, чок болза бүзүреливистен ойталавас болзувусса, бистен хая  көрнү бээр деп кыжаныр. Чоок улузувустуң удурланыышкынынга кандыг хамаарылгалыг болур бис база ооң-биле холбаалыг бергелерни канчаар ажып эртер бис?

3, 4. а) Иисустуң медээзи улус аразында хамаарылгаже кандыг салдар чедирип турарыл? б) Кандыг таварылгада Иисустуң эдерикчизи болуру ылаңгыя берге?

³ Иисус ооң өөредиглери аңгылажыг эккээр, ынчангаш ооң эдерикчилеринге удурланыышкыннарга шынчы артарынга дидим чорук херек деп билип турган. Ол чылдагаан-биле өг-бүлелерге дүшкүүрлүг байдал тургустунуп болур. Иисус сагындырган: «Мени бо делегейже амыр-тайбың эккээр дээш келген деп бодаваңар. Амыр-тайбың эвес, а аңгылажыг хылыжы эккээр дээш келген мен. Мен оглун ачазындан, уруун авазындан, кеннин кунчуундан аңгылаар дээш келген мен». Оон ол: «Кижиниң чоок улузу ооң дайзыннары апаар» (ЧД) — деп немээн (Мф. 10:34—36).

⁴ «Мени бо делегейже амыр-тайбың эккээр дээш келген деп бодаваңар» дээн сөстери-биле Иисус ону эдерер дээн улусту уржуктарының дугайында эки боданырынче оттурган. Иисустуң медээзи улусту чоок улузундан ырадып болур турган-даа болза, ол өг-бүлелерни аңгылаар дээш эвес, а Бургандан алыс шынны медээлээр дээш келген (Ин. 18:37). Ынчалза-даа кижиниң чоок улузу азы эш-өөрү алыс шынны тоовас болза, аңаа ооң өөреникчизи болуру белен эвес болур деп чүүлдү улус билип алзын деп, Иисус күзээн.

5. Иисустуң өөреникчилери чүү чүвеге таваржып турган?

⁵ Өг-бүлезиниң талазындан удурланыышкын — Иисустуң эдерикчилериниң ажып эртеринге белен болур ужурлуг чүүлдериниң бирээзи (Мф. 10:38). Христостуң өөреникчилериниң чоок улузу оларны кыжырып, безин чадаарда, оларның-биле чугаалажырын соксаткан турган чадавас. Ынчалза-даа Иисусту эдергеш, олар чидиргенинден-даа хөйнү ап турган. (Марк 10:29, 30 номчувут.)

6. Чоок улузувус Иеговага бараалгаарынга шаптыктап турар болза, чүнү сактыр ужурлуг бис?

⁶ Чоок улузувус Иеговага бараалгаарынга шаптыктап турар-даа болза, оларга дөмей-ле ынак бис. Ынчалза-даа Иеговага болгаш Иисуска ынакшылывыс оон-даа күштүг болур ужурлуг (Мф. 10:37). Эрлик бисти бүзүреливистен ойталазын дээш, чоок улузувуска ынакшылывысты ажыглап болур. Чоок улузувустуң удурланыышкыны-биле холбаалыг бергелерни канчаар шиитпирлеп болурул? Каш чижектен сайгарыптаалыңар.

7. Ашааның азы кадайының Иеговага бараалгавайн турарынга христианнар кандыг хамаарылгалыг болур ужурлуг?

⁷ Өгленип алган улус амыдыралынга түрегдел көөр деп Библияда сагындырган (1 Кор. 7:28). Ашаа азы кадайы Иеговага бараалгавайн турар өг-бүледе бергелер оон-даа хөй бооп болур. Ынчалзажок бо байдалче Иегованың көрүжү-биле көөрү чугула. Өөңер ээзи (ишти) Иеговага бараалгавайн турар болза, ол аңгы чурттаарының азы чара бадыланчырының үндезини эвес-тир (1 Кор. 7:12—16). Ашаа Херечи эвес болгаш, өг-бүлезиниң Бурган-биле харылзаазы дээш сагыш човавайн турар-даа болза, кадайы ону дөмей-ле өг-бүлезиниң баштыңы кылдыр хүндүлээр ужурлуг. Ол ышкаш кадайы Иеговага бараалгавайн турар болза, ашаа дөмей-ле аңаа ынак бооп, ол дээш чылыг-чымчак сагыш човаар ужурлуг (Эф. 5:22, 23, 28, 29).

8. Ашааңар азы кадайыңар бараалгалыңарны кызыгаарлаарын оралдажып турар болза, кандыг айтырыгларны бодуңарга салып болур силер?

⁸ А бир эвес ашааңар азы кадайыңар бараалгалыңарны кызыгаарлаарын оралдажып турар болза, канчаарыл? Чижээ, бир угбавыстың ашаа ону чүгле неделяда  тодарадып айыткан хүннерде суртаалдаарын дилээн. Ындыг таварылгада: «Ашаам азы кадайым мени Бурганга бараалгаарын хоруп турары ол бе? Ындыг эвес болза, ооң аайынга кирип болур мен бе?» — деп бодуңардан айтырыңар. Чайлап бээринге белен болуру артык чөрүлдээлерден бисти камгалаар (Флп. 4:5).

9. Христианнар ажы-төлүн Иеговага бараалгавайн турар ачазынга азы авазынга хүндүткелдиг боор кылдыр, канчаар өөредип болур?

⁹ Ашаа азы кадайы Иеговага бараалгавайн турар өг-бүлеге ажы-төлдү кижизидери ылаңгыя берге. Чижээ, ажы-төлүңерге «ада-иеңерни дыңнаңар» деп айтыышкынны сагыырын өөредир ужурлуг силер (Эф. 6:1—3). Бир эвес эжиңер библейжи дүрүмнерге дүүштүр чурттавайн турар болза, канчаар? Ажы-төлүңерге эки үлегер көргүзүп, аңаа хүндүткелдиг хамаарылгалыг болуңар. Эки шынарлары дээш, ону мактаар аргаларны эрттирбейн, ынакшылыңарга бүзүредиңер. Ажы-төлүңер дыңнап турда, ону чемелевеңер. Кижи бүрүзү Иеговага бараалгаар-бараалгавазын боду шилиир деп оларга тайылбырлаңар. Ажы-төлүңерни бүзүревес ачазын азы авазын хүндүлээр кылдыр өөредир болзуңарза, ол алыс шынны сонуургай бээр чадавас.

10. Ашаа азы кадайы Иеговага бараалгавайн турар болза, христианнар ажы-төлүнге Библияның дугайында канчаар чугаалап болур?

¹⁰ Чамдыкта бүзүревес ашаа азы кадайы ажы-төлүн меге шажындан укталган байырлалдарга киржир кылдыр азы Библияга дүүшпес шажын өөредиглерин өөренир кылдыр негеп болур. Чамдык өөнүң ээлери христиан кадайларынга ажы-төлүнге Библияның дугайында чугаалаарын хоруп турар. Ынчан безин кадайлары ажы-төлүнге библейжи алыс шынны өөредир дээш, шыдаар-ла чүвезин кылыр болза эки  (Аж.-ч. 16:1; 2 Тим. 3:14, 15). Бир эвес бүзүревес ашаа кадайынга ажы-төлү-биле библейжи кичээлдер эрттирерин азы чыышче баарын чөпшээревейн турар болза, канчаарыл? Ол ашааның шиитпирин хүндүлээр ужурлуг, ынчалза-даа болдунар таварылгаларда ажы-төлүнге бүзүрелиниң дугайында ол чугаалап болур. Ынчаар ажы-төл мөзү-шынар негелделеринге өөренип, Иегованы билип алыр (Аж.-ч. 4:19, 20). Ынчалза-даа Бурганга бараалгаар-бараалгавазын олар боттары шиитпирлээр деп сактыры чугула (Ы. х. к. 30:19, 20) a.

11. Херечи эвес төрелдер-биле хамаарылга чүү дээш баксырап болур?

¹¹ Библияны өөренип эгелээн үеңерде төрелдериңерге ооң дугайында чугаалаваан чадавас силер. Ынчалза-даа бүзүрелиңер быжыгып кээрге, чаа үзел-бодалыңарны чажырган ажыы чок деп билип каан силер (Мк. 8:38). Түңнелинде төрелдериңер-биле хамаарылгаңар баксырай берген болза, канчаар? Бурганга шынчы артпышаан, оларның-биле хамаарылганы катап тургузуп алырынга дузалаар каш базымны сайгарыптаалыңар.

12. Төрелдер чүү дээш удурланып болур база оларны бодап билиринге биске чүү дузалаар?

¹² Херечи эвес төрелдериңерни бодап билирин кызыңар. Библейжи алыс шынны билип алганывыс дээш өөрүп турар-даа болзувусса, төрелдеривис бисти мегеледип алган азы кандыг-бир сектаже киир тыртып апарган деп шын эвес бодап болур. Оларның-биле кады байырлалдар демдеглевес апаарывыска, биске ынак эвес апарган-дыр деп, олар бодап болур. Безин чадаарда, Бурган бисти каргаптар деп, олар сагышсырап болур. Байдалче төрелдериңерниң көрүжү-биле көөрүн кызып, оларның дүвүрелдериниң алыс чылдагаанын билип алыр дээш, оларны кичээнгейлиг дыңнаңар (У. ч. 20:5). Павел элчин улус-биле буянныг медээни үлежир дээш, оларның орнунга бодун салып турган. Ол арга биске база дузалап болур (1 Кор. 9:19—23).

13. Иеговага бараалгавайн турар төрелдеривис-биле канчаар чугаалажыры чогуур?

¹³ Төрелдериңер-биле эвилең-ээлдек чугаалажыңар. «Чугааңар үргүлчү... чечен-мерген болзун» деп, Библия биске сүмелеп турар (Кол. 4:6). Төрелдеривис-биле чугаалажып тургаш, эки шынарларны илередип шыдаар кылдыр, Иеговадан ыдыктыг сүлдени дилээр болзувусса эки. Оларның шажынчы үзел-бодалдарының шуптузун меге деп шынзыдып, маргыжып турган ажыы чок. Бир эвес олар сөстери азы кылдыныглары-биле бисти балыглап турар болза, элчиннерниң үлегерин өттүнүп болур бис. Павел: «Бисти бак сөглээрге, харыызынга алгап-йөрээр-дир бис; истеп-сүрерге, шыдажып эртер-дир бис. Биске бак аас эдерге, эп-чөп-биле харыылаар-дыр бис» — дээн (1 Кор. 4:12, 13).

14. Үлегерлиг алдынып турарывыс кандыг түңнелдерге чедирип болур?

¹⁴ Үлегерлиг алдыныңар. Хүндүткелдиг чугаа чугула-даа болза, ажыл-херээвис оон-даа күштүг салдар чедирер. (1 Пётр 3:1—2, 16 номчувут.) Төрелдериңер силерни көргеш, Иегованың Херечилериниң өг-бүлелериниң аас-кежиктиин, ажы-төлү дээш кайы хире сагыш човап, бедик мөзүлүг, ужур-уткалыг амыдырал тудуп чоруурун эскерзин. Төрелдеривис алыс шынны хүлээп албайн баар-даа болза, Иегованың сеткилинге кирип турарывыс дээш өөрүүр бис.

15. Чөрүлдээлерге чедирип болур байдалдарга баш бурунгаар канчаар белеткенип ап болур?

¹⁵ Түңнелин баш бурунгаар бодаңар. Кандыг байдалдар чөрүлдээлерге чедирип болурун баш бурунгаар бодап алгаш, канчаар алдынарын шиитпирлеңер (У. ч. 12:16, 23). Австралиядан бир угбавыс үлешкен: «Бээм бүзүреливиске удур турган. Олче долгаарының  мурнунда, бир эвес ол хомуданчыг чүве чугаалаптар болза, туттунуптар кылдыр, Иеговадан дуза дилээр турган бис. Чугаа эп-найыралдыг байдалга эртер кылдыр, чүнү чугаалажырын баш бурунгаар бодап аар турган бис. Оон аңгыда чугаавыс шажын дугайында изиг маргышче шилчивес кылдыр, үр чугаалашпазын кызар турган бис».

16. Төрелдер-биле чөрүлдээлер дээш, бодун буруудадыр минниишкиннерни канчаар ажып эртерил?

¹⁶ Херечи эвес төрелдериңер-биле чөрүлдээге чедирип болур байдалдарның шуптузун оюп эртери болдунмас. Чөрүлдээлер дээш боттарывысты буруудадып болур бис, чүге дизе чоок улузувуска ынак болгаш, оларны хомудадыксавас бис. Ындыг минниишкиннериңер тыптып келзе, төрелдериңерге Бургандан артык ынак апаарыңарны болдурбаңар. Ынчан библейжи дүрүмнерни сагыыры силерге кайы хире чугула дээрзин төрелдериңер билип каар. Өскелерни Иеговага бүзүрей бээр кылдыр албадап шыдавас бис. Сагыш човангыр Бурганывыс Аңаа бараалгаар-бараалгавазын шилиир арганы, биске бергени дег, оларга база берип турар (Иса. 48:17, 18).

17, 18. Чоок улузувустуң бирээзи Иегованы кааптарга, ол аарышкыны канчаар ажып эртерил?

¹⁷ Чоок улузувустуң бирээзин чыыштан үндүрүптерге азы ол боду оон ойталай бээрге, ол чүүл улуг согуг бооп болур. Ону канчаар ажып эртерил?

¹⁸ Иеговага бараалгаарын уламчылаңар. Библияны доктаамал номчуп, чыыштарже барып, оларга белеткенип, суртаалдап, Бургандан күш дилеп, мөргүңер (Иуда 20, 21). А бир эвес ол бүгүнү кылырыңарга-даа аарышкыңар оожургавайн турар болза, канчаар? Сула салдынмаңар! Бараалгалга хамаарышкан ажыл-херектерни кылырын уламчылаңар. 72-ги ырның автору шын эвес бодалдарга алзып турган, ынчалза-даа ол Бурганның өргээзинге келгеш, бүгү чүвеже катап шын көрүштүг апарган (Ыд. ыр. 72:16, 17). Ол чүүл силерге база сагышсыралдарга алыспазынга дузалаар.

19. Иегованың эдип-чазаашкын хемчеглерин канчаар деткип турар бис?

¹⁹ Иегованың эдип-чазаашкын хемчеглерин деткиңер. Иегова бир кижини кезедип турда, эгезинде аарышкылыг-даа болза, сөөлүнде ол чүүл шупту улуска, ооң санында бачыт кылган кижиниң бодунга ажык-дузаны эккээр. (Еврейлерге 12:11 номчувут.) Бачыдын миннивейн турар кижи-биле моон соңгаар харылзашпаңар деп, Иегова бисти чагып турар (1 Кор. 5:11—13). Ынчангаш чеже-даа берге болза, чугула чылдагаан чокка чыыштан үндүрткен чоок киживис-биле телефон-даа, чагаа-даа, СМС-даа, электроннуг почта азы социал четкилер таварыштыр-даа чугаалашпас бис.

20. Чүү чүвеге идегээр болзувусса эки?

²⁰ Идегелди ышкынмаңар. Иегованы каапкан улус кажан-бир Олче эглип кээр деп идегээр бис, чүге дизе ынакшылдың «идегели... кажан кезээде хевээр артар» (1 Кор. 13:7). Чоок кижиңерниң эки талаже өскерлип турарын эскерзиңерзе, ол Библияны номчааш, күш кирип, Иегованың «Менче эглип кел!» дээн кыйгызынга харыылап шыдаптар кылдыр мөргүңер (Иса. 44:22).

21. Өг-бүлеңерге алыс шын «амыр-тайбың эвес, а аңгылажыг хылыжы» эккелген болза, чүнү канчаар?

²¹ Бис Иисуска кижилерден артык ынак боор ужурлуг бис, оон башка аңаа төлеп чок апаар бис. Иисус ооң өөреникчилери, чоок улузунуң удурланыышкыны турза-даа, аңаа шынчы артар дээш, эрес-дидим болур деп чигзинмейн турган. Өг-бүлеңерге алыс шын «амыр-тайбың эвес, а аңгылажыг хылыжы» эккелген болза, Иеговага ынаныңар. Ынчан Ол шупту бергелерни ажып эртериңерге дузалаар (Иса. 41:10, 13). Иегова биле Иисус чайгылыш чок бүзүрелиңер дээш силерни албан шаңнаар, олар силерге чоргаарланып турар деп бодал силерни оожуктурзун.