1, 2. а) Мар понна ми тау карыны быгатӥськомы? б) Мар милемлы сюлмаськонъёс вае? (Учке статья кутсконысь туспуктэмез.)

 МИЛЯМ ваньмылэн потэ тупаса, номыр сярысь сюлмаськытэк улэммы. Ми тау кариськомы Иеговалы, со «Инмарлэсь каньыллыксэ» милемлы сётэ шуыса, сюлмын каньыллыкез, кудӥз сюлэмшугъяськытэк улыны юрттэ (Флп. 4:6, 7). Со сяна, Иеговалы улонмес сӥзьыса, ми «Инмарен тупаса» улӥськомы, малы ке шуоно милям соин умой кусыпъёсмы (Рим. 5:1).

² Но со дыр, куке Инмар быдэс музъем вылэ тупаса улон ваёз, ӧз вуы на. Ми улӥськомы со вакытэ, кудӥз Библиын «берпум аръёс» шуыса нимамын. Туннэ быдэс дунне вылын адямиос керетыса уло но асьсэды туж лек возё (2 Тим. 3:1—4). Христианъёслы пумитъяськоно луэ Шайтанлы но солэн зэмос луисьтэм дышетонъёсызлы, кудъёссэ со вӧлмытэ (2 Кор. 10:4, 5). Но номыр милемлы сомында сюлмаськонъёс уг вайы, дыр, кызьы оскисьтэм ӵыжы-выжыосмы. Туж вӧсь кылыны, куке соос  серекъяло милесьтым осконмес, янгыше уськыто, ми семья кусыпъёсты сӧриськомы шуыса, яке кышкато, ми осконмылэсь ӧм ке куштӥське, соос милесьтым куштӥськозы шуыса. Кызьы учконо ӵыжы-выжыосмылэн милемлы люкетыны тыршемзы шоры? Мар кароно соин сэрен кылдэм шуг-секытъёсты вормон понна?

3, 4. а) Кызьы Иисуслэн иворез адямиослэн кусыпъёссы вылын шӧдӥське? б) Кыӵе учыре тужгес но секыт Иисус сьӧры мыныны?

³ Иисус тодэ вал, ваньмыз зэмлыкез уз кылзӥське шуыса. Озьы ик со тодэ вал, дышетскисьёсызлы, Инмарлы оскымон кылён понна, кышкасьтэм луыны кулэ луоз шуыса, малы ке шуоно соослы люкетӥсьёс луозы. Куддыръя соин сэрен семья кусыпъёс тэшканы быгато. Иисус азьло ик вераз: «Эн малпалэ, музъем вылэ тупаса улон вайыны Мон лыктӥ шуыса; тупаса улон вайыны ӧй лыкты, палаш вайыса лыктӥ, Мон лыктӥ уго адямиез атаезлэсь, нылзэ анаезлэсь, кензэ анайзылэсь люкыны. Адямилэн тушмонъёсыз — семья пушказ» (Матф. 10:34—36).

⁴ «Эн малпалэ, музъем вылэ тупаса улон вайыны Мон лыктӥ» кылъёсын Иисуслэн верамез потэ вал, сое кылзӥсь адямиослы лыдэ басьтоно шуыса сое, мар луыны быгатоз, соос со сьӧры мынӥзы ке. Солэн иворез матысь адямиосты люкыны быгатэ вал. Веранэз ӧвӧл, Иисус музъем вылэ лыктӥз Инмарлэсь ӟеч иворзэ вераны, нош семьяосты люкыны ӧз лыкты (Иоанн 18:37). Но солэн потэ вал, дышетскисьёсыз мед тодозы: со сьӧры мыныны капчи ӧвӧл, тужгес но соку, куке матысь эшъёс яке ӵыжы-выжыос зэмлыкез кулэ уг каро.

5. Маин пумиськоно луэ вал Иисуслэн дышетскисьёсызлы?

⁵ Христослэн син азяз ярамон луон понна, солэн дышетскисьёсызлы озьы ик дась луыны кулэ вал ӵыжы-выжыоссылэн пумитъяськонзылы но (Матф. 10:38). Ӵыжы-выжыоссы соосты ултӥяны быгато вал но куддыръя соосын вераськемысь но дугдо вал. Но Иисус сьӧры мыныса, соос, ыштэмзы сярысь, тросгес басьтылӥзы. (Лыдӟы Марклэсь 10:29, 30.)

6. Мае милемлы тодамы возёно, милям ӵыжы-выжыосмы пумит луо ке, ми Иеговалы мед ужаломы-тыршомы шуыса?

⁶ Милям ӵыжы-выжыосмы люкетыны тыршо ке но Иеговалы ужаны-тыршыны, ми соосты яратӥськомы. Но ми тодамы возиськомы, нырысь ик ми Иеговаез но Иисусэз яратыны кулэ шуыса (Матф. 10:37). Озьы ик лыдэ басьтоно, милемыз осконмылэсь куштӥськытон понна, Шайтан ӵыжы-выжыосмес яратэммес уже кутыны быгатоз шуыса. Ойдолэ эскеромы куд-ог учыръёсты но вераськомы, кызьы сэрттыны-пертчыны луоз ӵыжы-выжыосмылэн люкетыны тыршеменызы сэрен кылдэм шуг-секытъёсты.

7. Кызьы христианъёслы учконо со шоры, кузпалзылэн Иеговалы ужамез-тыршемез али уг поты ке?

⁷ Библиын азьло ик верамын вал ини, соос, кинъёс кузпалъяськозы,  «трос куректон-кайгуос чидано луозы» шуыса (1 Кор. 7:28). Со семьяын, кудаз одӥгез гинэ кузпал Иеговалы оске, сюлэмшугъяськонъёс тросгес луо. Но та югдур шоры Иеговалэн синмыныз учкыны тыршоно. Кузпалдылэн Иеговалы ужамез-тыршемез али уг поты ке, со муг ӧвӧл люкиськыны яке люкиськытэк нимаз улыны (1 Кор. 7:12—16). Адӟись-Ивортӥсь луисьтэм карт семьяезлы Инмарен кусыпъёссэ тупатыны уг юртты ке но, кышноез сое гажаны кулэ, малы ке шуоно со семьялэн йырыз. Озьы ик картлы но, солэн кышноез Иеговалы уг оскы ке но, кышнозэ ас улонэзлэсь но юнгес яратоно но со сярысь сюлмаськоно (Еф. 5:22, 23, 28, 29).

8. Мар сярысь юано аслэсьтыд, кузпалыд тыныд люкетыны тырше ке Инмарлы йыбырттонэ пыриськыны?

⁸ Нош мар кароно, кузпалды тӥледлы люкетыны тырше ке Инмарлы йыбырттонэ пыриськыны? Кылсярысь, одӥг сузэрмылэн картэз сое куд-ог нуналъёсы гинэ тодытон уже пыриськыны лэзиз. Та выллем югдурын юано аслэсьтыд: «Куре-а мынам кузпалы Инмарлы ужан-тыршонэ пыриськемысь дугдыны? Уг ке, быгатӥсько-а мон солэсь кылзӥськыны?» Визьмо но лякыт сюлэмо луимы ке, со юрттоз семьяын кулэтэм керетонъёслэсь палэнскыны (Флп. 4:5).

9. Кызьы христианъёс нылпиоссэс дышетыны быгато Иеговалы оскисьтэм анайзэс яке атайзэс гажаны?

⁹ Семьяын, кудаз одӥгез гинэ кузпал Иеговалы ужа-тырше, нылпиосты будэтыны тужгес но секыт луэ. Кылсярысь, тӥледлы нылпиостэс Библиысь таӵе возетлэсь кылзӥськыны дышетоно: «Атайдэ но анайдэ сӥлы кар» (Еф. 6:1—3). Нош тӥляд кузпалды Библиысь возетъёсъя уг улы ке? Гажалэ сое но нылпиостылы пример возьматэ. Тырше котьку ушъяны кузпалдэс умой сямъёсыз понна но вералэ, тӥ сое яратӥськоды шуыса.  Ноку но эн тэргалэ кузпалдэс нылпиосты азьын. Валэктэ соослы, котькуд адями ачиз ужпум кутэ шуыса, Иеговалы ужано-тыршоно-а, ӧвӧл-а. Нылпиос асьсэды умой возизы ке, со оскисьтэм кузпаллэсь мылкыдзэ ӝутыны быгатоз зэмлыкез тодыны.

10. Кызьы христианъёс нылпиоссылы Библия сярысь вераны быгато, соослэн кузпалзы Иеговалы уг йыбыртъя ке?

¹⁰ Куддыръя Иеговалы оскисьтэм кузпал нылпиоссэ сульдэръёслы-идолъёслы йыбыртъянэн герӟаськем праздникъёсы пыриськыны косыны быгатоз, яке Библилы пумит луись дышетонъёс пыӵатыны. Куд-ог картъёс кышнооссэс нылпиоссылы Библия сярысь вераны уг лэзё. Сыӵе учыре но кышнооссылы лэсьтоно ваньзэ, мае быгато, нылпиоссылы Библиысь иворез пыӵатон понна (Ап. уж. 16:1; 2 Тим. 3:14, 15). Нош сузэрмылэн картэз нылпиосыныз Библия дышетыны яке соосты кенешлэн пумиськонъёсаз нуллыны уг лэзьы ке? Зэм, христиан кышномуртлы картсэ гажано но кылзӥськоно солэсь но луэмезъя нылпиосызлы аслаз осконэз сярысь верано. Озьы со соослы Иегова сярысь но солэн вылӥ эсэпъёсыз сярысь тодыны юрттоз (Ап. уж. 4:19, 20). Но тодамы возёно, нылпиослы асьсэлы ужпум кутоно шуыса, Инмарлы ужано-тыршоно-а, ӧвӧл-а (К. Зак. 30:19, 20) a.

11. Маин сэрен Адӟись-Ивортӥсь луисьтэм ӵыжы-выжыосынымы кусыпъёсмы сӧриськыны быгато?

¹¹ Адӟись-Ивортӥсьёсын Библия дышетыны кутскемды бере тӥ ӵыжы-выжыостылы со сярысь ӧд вералэ, вылды. Но осконды юнмамъя, тӥ валады, выль осконды сярысь верано ини шуыса (Марк 8:38). Мар кароно, тӥ со сярысь ӵыжы-выжыостылы верады но кусыпъёсты сӧриськизы ке? Ойдолэ эскеромы куд-ог вамышъёсты, кудъёсыз юрттозы ӵыжы-выжыосыныды но тупаны, Иеговалы но оскымон кыльыны.

12. Малы куддыръя ӵыжы-выжыосмы милемлы люкетыны тыршо но мар юрттоз милемлы соосты валаны?

¹² Адӟись-Ивортӥсь луисьтэм ӵыжы-выжыостэс валаны тырше. Зэмлыкез тодэммы бере милям сюлэммы шумпотонэн пачылмыны быгатоз, нош ӵыжы-выжыосмы малпаны быгатозы, милемыз пӧязы яке сектае кыскизы шуыса. Соос малпало, вылды, ми соосты ум яратӥське ни шуыса, малы ке шуоно соосын ӵош праздникъёсы пыриськемысь дугдӥмы. Соос кышканы но быгатозы, милемыз Инмар каргалоз шуыса. Тырше югдур шоры ӵыжы-выжыостылэн синмынызы учкыны но сак кылзэ соосты, тодон понна, малы соос зэмзэ ик сюлмасько (Мад. 20:5). Апостол Павел ассэ пӧртэм адямиос интые пуктылӥз, соослы ӟеч иворез веран понна. Ми но асьмеды мукет адямиос интые пуктыны тыршимы ке, со милемлы юрттыны быгатоз (1 Кор. 9:19—23).

13. Кызьы вераськоно ӵыжы-выжыосын, кудъёсыз Иеговалы уг оско?

 ¹³ Ӵыжы-выжыосыныды лякытэн вераське. Библия милемлы визь-кенеш сётэ: «Калыкен котьку визьмо, лякыт кылын вераське, отын сылалэз мед луоз» (Кол. 4:6). Иеговалэсь святой духсэ куроно, со милемлы умой сямъёсты возьматыны мед юрттоз шуыса, куке ми ӵыжы-выжыосынымы вераськиськомы. Кулэ ӧвӧл соосын споръяськыны но вераны, ваньмыз, малы соос оско, шонертэм луэ шуыса. Соос милемыз кылъёсынызы яке ужъёсынызы вӧсь каро ке, милемлы адӟем кароно апостолъёслэсь. Павел гожъяз: «Ми сярысь урод кылъёс верало, ми соосты бакель кариськомы; милемыз улляло, ми чидаськомы; милемыз тышкасько, нош ми соос понна вӧсяськиськомы [«соослы лякытэн вераськомы», ВД]» (1 Кор. 4:12, 13).

14. Кыӵе емышъёс вайыны быгатоз асьмеды адӟем карымон воземмы?

¹⁴ Асьтэды адӟем карымон возе. Тупаса улон понна, туж кулэ гажаса вераськыны, нош солэсь но кулэгес ужъёсын возьматыны, милям тупаса улэммы потэ шуыса. (Лыдӟы 1 Пётрлэсь 3:1, 2, 16.) Тӥ шоры учкыса, ӵыжы-выжыосты мед адӟозы, Иеговалэн Адӟись-Ивортӥсьёсызлэн семьяоссы юнэсь но шудоесь шуыса, соос нылпиоссы сярысь сюлмасько но вылӥ эсэпъёсъя уло шуыса. Ӵыжы-выжыосмы Иеговалы оскыны ӧз кутске ке но, ми шумпотомы, Иеговалы ярамон луиськомы шуыса.

15. Кызьы азьло ик дасяськоно югдуръёслы, кудъёсаз тупамтэос кылдыны быгатозы?

¹⁵ Азьло ик малпаськыны тырше. Азьло ик малпалэ, кыӵе югдуръёсын тупамтэос кылдыны быгатозы, но малпалэ, мар тӥ кароды (Мад. 12:16, 23). Тани мар вера Австралиысь одӥг сузэр: «Картэлэн атаез милям осконмылы туж пумит вал. Солы жингыртон азьын ми нырысь ик Иеговалы вӧсяськиськомы вал, со милемлы мед юрттоз шуыса асьмеды киямы возьыны, атаез милемлы мар ке уродзэ вераз ке. Умоен вераськыны мед быгатомы шуыса, ми азьло ик малпаськомы вал, мар сярысь вераськомы. Озьы ик ми вакчи дыр куспын вераськыны тыршимы, милям вераськонмы религия пумысен споръяськонлы медаз пӧрмы шуыса».

16. Мар кароно, ӵыжы-выжыосынымы тупамтэмы сэрен, асьмеды янгыше медам уськытэ шуыса?

¹⁶ Но малпано ӧвӧл, Адӟись-Ивортӥсь луисьтэм ӵыжы-выжыосынымы ваньмыз вӧй вылтӥ кадь мыноз шуыса. Тупамтэос кылдэмен сэрен, ми асьмеды янгыше уськытыны быгатомы, малы ке шуоно матысьёсмес ми туж яратӥськомы но милям соосты ӝоже уськытэммы уг поты. Тӥляд сыӵе шӧдонъёсты кылдо ке, эн лэзе ӵыжы-выжыостэс яратонды Инмарез яратондылэсь юнгес мед луоз шуыса. Соку матысьёсмы адӟозы, Библиысь возетъёслэсь кылзӥськон милям улонамы нырысетӥ интыын луэ шуыса. Тодамы возёно: мукетъёссэ Иеговалы оскыны кужмысь косыны ми ум быгатэ. Соос мед адӟозы,  кыӵе пайда вае милемлы Инмарлы ужан-тыршон. Сюлмаськись Инмармы соослы но, милемлы кадь ик, бырйыны ӵектэ, ужано-тыршоно-а солы, ӧвӧл-а (Ис. 48:17, 18).

17, 18. Мар юрттоз чиданы, матысь адямимы Иеговаез кельтӥз ке?

¹⁷ Ӵыжы-выжыосмы пӧлысь кинэ ке кенешысь потто яке со ачиз Иеговаез кельтэ ке, со сюлэмамы пуртэн бышкалтэм кадь луэ. Мар кароно, сое чидан понна?

¹⁸ Вань саклыктэс Иеговалы ужан-тыршонлы висъялэ. Библиез лыдӟе, кенешлэн пумиськонъёсызлы дасяське но эн кельтэ соосты, ӟеч иворез вералэ но Инмарлэсь кужым куре (Иуда 20, 21). Нош мар кароно, тӥледлы потэ ке, ваньзэ сое сюлэмдэс понытэк лэсьтӥськоды шуыса, нош асьтэос мукетыз сярысь малпаськиськоды? Кидэс эн лэзе! Азьланяз но Иеговалы ужан-тыршонэ пыриське. Со юрттоз тӥледлы сюлэмшугъяськонъёстэс вормыны. Тодады вае, макем секыт вал сюлмаз 72-тӥ Псаломез гожъясьлэн. Шонертэм малпанъёсыныз сэрен, солэн киосыз лэзиськизы. Но со быгатӥз ассэ кияз кутыны, куке Инмарлы вӧсяськон интые пыриз (Пс. 72:16, 17). Соин ик азьланяз но Иеговалы оскымон ужалэ-тырше.

19. Кызьы ми возьматӥськомы, Иеговалэсь тупатон амалъёссэ гажаськомы шуыса?

¹⁹ Иеговалэсь тупатон амалъёссэ гажалэ. Иегова кинэ ке тупатэ ке, нырысь вӧсь луыны быгатоз, нош бератаз со пайда ваёз ваньмызлы, озьы ик сьӧлыкам адямилы но. (Лыдӟы Еврейёслы 12:11.) Кылсярысь, Иегова косэ, ми ӧпкелисьтэм сьӧлыкасьёсын кусып медам возе ни шуыса (1 Кор. 5:11—13). Соин ик, макем секыт милемлы медаз луы, но кенешысь поттэм ӵыжы-выжыенымы ми кусып ум возе ни — телефон пыр но, гожтэтъёс пыр но, электрон почта яке социальной сетьёс пыр но.

20. Марлы милемлы осконо?

²⁰ Оскондэс эн ыштэ. Яратон «чылкыт сюлмын оскиське». Озьы ик со оске солы но, Иеговаез кельтӥсьёс, куке одно ик со доры берытскозы шуыса (1 Кор. 13:7). Тӥ шӧдӥськоды ке, матысь адямиды умой пала воштӥське шуыса, вӧсяське Иеговалы, Библиез лыдӟыса но сое эскерыса, со кужым мед басьтоз но Иеговалэн ас дораз берытскыны ӧтёнэзлы мед вазиськоз шуыса (Ис. 44:22).

21. Мар кароно, зэмлык семьяяды, тупаса улон интые, палаш вайиз ке?

²¹ Иисус вера вал, ми сое котькыӵе адямиез сярысь юнгес яратыны кулэ шуыса, сотэк ми солэн син азяз ярамон ум луэ. Со дыре ик со оскиз, солэн дышетскисьёсыз кышкасьтэм луозы, но, ӵыжы-выжыоссылэн люкетэмзы шоры учкытэк, солы оскымон кылёзы шуыса. Зэмлык тӥляд семьяяды, тупаса улон интые, палаш вайиз ке, Иеговалы оскиське, со тӥледлы вань шуг-секытъёстэс вормыны юрттоз (Ис. 41:10, 13). Котьку тодады возе, Иегова но Иисус тӥледын данъясько но юн оскемды понна одно ик бакель карозы шуыса.