1, 2. (a) Ano nga kamurayawan an aton napapahimulosan yana? (b) Kay ano nga diri pa naton napapahimulosan an bug-os nga kamurayawan yana? (Kitaa an retrato hini nga pahina.)

KITA ngatanan naruruyag hin mamurayawon nga kinabuhi nga waray mga kabaraka. Mapasalamaton gud kita kan Jehova nga gintatagan kita niya hin “kamurayawan han Dios,” an murayaw nga hunahuna nga nagpapanalipod ha aton tikang ha mga kabaraka ngan negatibo nga mga pagbati! (Fil. 4:6, 7) Tungod han aton dedikasyon kan Jehova, nagpapahimulos liwat kita hin “pakigmurayaw ha Dios,” an pagkaada maopay nga relasyon ha iya.—Roma 5:1.

² Pero waray pa umabot an itinanda nga panahon han Dios ha paghatag hin bug-os nga kamurayawan ha tuna. Inin peligroso nga kataposan nga mga adlaw puno hin kasamok, ngan damu nga tawo an may mga batasan nga nagigin hinungdan hin araway. (2 Tim. 3:1-4) Sugad nga mga Kristiano, kinahanglan kita makig-away ha espirituwal kontra kan Satanas ngan ha buwa nga mga katutdoan nga iya iginpapasarang. (2 Cor. 10:4, 5) Pero an nangunguna nga hinungdan nga mahimo makagwara han aton kamurayawan  bangin magtikang ha aton diri tumuroo nga mga kapamilya. An pipira ha ira bangin magtamay han aton mga gintotoohan, mag-akusar nga kita an hinungdan han pagkabahin-bahin han pamilya, o magtarhog ha aton nga isasalikway kita kon diri naton bayaan an aton pagtoo. Paonan-o naton sadang tagdon an pagkontra han pamilya? Paonan-o naton matitipigan an kamurayawan kon umatubang kita han sugad nga pagkontra?

3, 4. (a) Ano an epekto han katutdoan ni Jesus? (b) San-o nagigin labi nga makuri an pagsunod kan Jesus?

³ Maaram hi Jesus nga an iya katutdoan magigin hinungdan han pagkabahin-bahin han katawohan ngan adton magsusunod ha iya magkikinahanglan hin kaisog ha pag-atubang hin pagkontra. An sugad nga pagkontra mahimo makaapekto ha mamurayawon nga relasyon han mga membro han pamilya. Hi Jesus nagsiring: “Ayaw kamo paghunahuna nga kinanhi ako pagdara hin kamurayawan ha tuna; kinanhi ako diri pagdara hin kamurayawan, kondi hin espada. Kinanhi ako basi pahinaboon an pagkabahin-bahin han anak nga lalaki kontra ha iya amay, han anak nga babaye kontra ha iya iroy, ngan han umagad nga babaye kontra ha iya ugangan nga babaye. Oo, magigin kaaway han usa nga tawo an iya mismo panimalay.”—Mat. 10:34-36.

⁴ Han nagsiring hi Jesus nga “Ayaw kamo paghunahuna nga kinanhi ako pagdara hin kamurayawan,” iginpapasabot niya nga an pipira han iya mamarati kinahanglan maghunahuna mahitungod han mga resulta han ira pagsunod ha iya. An iya mensahe mahimo magin hinungdan hin pagkabahin-bahin han mga tawo. Syempre, an katuyoan ni Jesus amo an pagsangyaw han mensahe han kamatuoran tikang ha Dios, diri pagdaot hin mga relasyon. (Juan 18:37) Bisan pa hito, an padayon nga pagsunod han mga katutdoan ni Jesus magigin makuri para ha usa kon an iya duok nga kasangkayan o mga kapamilya nakontra ha kamatuoran.

5. Ano an naieksperyensyahan han mga sumurunod ni Jesus?

⁵ Hi Jesus nagsiring nga an kasakit tungod han pagkontra han pamilya usa han mga butang nga kinahanglan ilubon han iya mga sumurunod. (Mat. 10:38) Basi maipakita han iya mga disipulo nga takos hira han gugma han Kristo, kinahanglan nira ilubon an pagtamay o pagsalikway pa ngani ha ira han ira pamilya. Pero, mas damu an ira nakakarawat kay han ira iginsasakripisyo.—Basaha an Marcos 10:29, 30.

6. Ano an sadang naton hinumdoman kon an aton mga kapamilya nakontra ha aton pag-alagad kan Jehova?

⁶ Bisan kon ginkukontra kita han aton mga kapamilya tungod han aton pag-alagad kan Jehova, hinigugma pa gihapon naton hira. Pero sadang naton hinumdoman nga mas hinigugma naton an Dios ngan an Kristo kay ha ira. (Mat. 10:37) Sadang liwat naton masantop nga nangangalimbasog hi Satanas nga gamiton an aton gugma ha aton mga kapamilya basi dauton an aton integridad. Hisgotan naton an pipira nga kahimtang may kalabotan ha pagkontra han pamilya ngan kitaon naton kon paonan-o naton ito malalamposan.

7. Kon diri tumuroo an imo padis, ano an imo sadang magin panhunahuna mahitungod han imo kahimtang?

⁷ An Biblia nagpapahamangno nga adton mag-aasawa “magkakaada kasakitan ha ira kinabuhi.” (1 Cor. 7:28) Kon diri tumuroo an imo padis, bangin umatubang ka hin mas damu nga problema ngan kabaraka ha iyo pag-asawa. Pero importante nga subaron mo an panhunahuna ni Jehova mahitungod han imo kahimtang. Kon an imo padis nadiri pagsunod ha Kristo, diri ito makatadunganon nga rason ha pakigbulag o pakigdiborsyo. (1 Cor. 7:12-16) Bisan kon an diri tumuroo nga bana diri nangunguna ha espirituwal nga mga buruhaton, kinahanglan hiya respetuhon tungod han iya papel sugad nga ulo han pamilya. Sugad man, sadang ipakita han Kristiano nga bana an nagsasakripisyo nga gugma ngan pagpalangga ha iya diri tumuroo nga asawa.—Efe. 5:22, 23, 28, 29.

8. Ano an mahimo mo ipakiana ha imo kalugaringon kon ginlilimitahan han imo padis an imo pag-alagad?

⁸ Ano man kon ginlilimitahan han imo diri tumuroo nga padis an imo pag-alagad? Pananglitan, usa nga sister an ginsidngan han iya bana nga  magsangyaw la ha partikular nga mga adlaw han semana. Kon sugad hito an imo kahimtang, pakianhi an imo kalugaringon: ‘Karuyag ba han akon padis nga umundang ako ha pag-alagad ha Dios? Kon diri, puydi ko ba sundon an iya hangyo?’ An pagin makatadunganon makakabulig ha imo nga malikyan niyo nga mag-asawa an away nga puydi unta diri mahitabo.—Fil. 4:5.

9. Paonan-o matututdoan han mga Kristiano an ira mga anak nga pasidunggan an diri tumuroo nga kag-anak?

⁹ An pagbansay ha mga anak bangin mas makuri kon diri tumuroo an imo padis. Pananglitan, kinahanglan mo tutdoan an imo mga anak nga sundon an sugo han Biblia: “Pasidunggi an imo tatay ngan an imo nanay.” (Efe. 6:1-3) Pero ano man kon diri ginsusunod han imo padis an hitaas nga suruklan han Biblia may kalabotan ha panggawi? Ipakita an susbaranan ha pagpasidungog ha imo padis. Kitaa an iya mag-opay nga kalidad, ngan ipahayag an imo apresasyon ha mag-opay nga iya ginhihimo. Likyi an pagyakan hin negatibo mahitungod han imo padis ha atubangan han imo mga anak. Lugod, isaysay ha ira nga an kada tagsa sadang pumili kon mag-aalagad ba hiya kan Jehova o diri. An maopay nga panggawi han mga anak mahimo makabulig nga magin interesado ha tinuod nga pagsingba an diri tumuroo nga kag-anak.

10. Paonan-o matututdoan han usa nga Kristiano nga kag-anak an iya mga anak mahitungod ha mga kamatuoran ha Biblia bisan kon diri tumuroo an iya padis?

¹⁰ Usahay bangin karuyag han diri tumuroo nga padis nga makigbahin an iya mga anak ha pagano nga mga selebrasyon o tutdoan hira han buwa nga relihiyoso nga mga katutdoan. Bangin did-an han pipira nga bana an ira Kristiano nga asawa ha pagtutdo han ira mga anak mahitungod ha Biblia. Bisan pa hito, ginbubuhat han Kristiano nga asawa an iya bug-os nga mahihimo basi tutdoan an ira mga anak han mga kamatuoran ha Biblia. (Buh. 16:1; 2 Tim. 3:14, 15) Pananglitan, bangin diri tugotan han bana an  Saksi nga asawa nga dumarahan hin pormal nga pag-aram ha Biblia an ira minor-de-edad nga mga anak o nadiri nga dad-on hira ha Kristiano nga mga katirok. Bisan kon ginrirespeto niya an desisyon han iya bana, mahimo pa gihapon niya sumatan an iya mga anak mahitungod han iya mga gintoohan kon may higayon. Hito nga paagi, matututdoan niya hira mahitungod kan Jehova ngan han Iya mga suruklan ha moral. (Buh. 4:19, 20) Syempre ha urhi, an iya mga anak an sadang magdesisyon kon mag-aalagad ba hira kan Jehova o diri.—Deut. 30:19, 20. *

11. Ano an bangin magin hinungdan hin problema ha imo relasyon ha imo diri Saksi nga mga kapamilya?

¹¹ Ha tinikangan, bangin diri naton sumatan an aton mga kapamilya nga nakikig-upod kita ha mga Saksi ni Jehova. Pero samtang nagririg-on an aton pagtoo, nasasantop naton nga kinahanglan naton isumat an aton gintotoohan. (Mar. 8:38) Kon an imo pagpabilin nga marig-on ha pag-alagad nagriresulta hin problema ha imo relasyon ha imo diri Saksi nga mga kapamilya, tagda an pipira nga paagi basi maibanan an sugad nga problema ngan matipigan pa gihapon an imo integridad.

12. Kay ano nga bangin kumontra ha aton an aton diri tumuroo nga mga kapamilya, pero paonan-o naton maipapakita ha ira an empatiya?

¹² Ipakita an empatiya ha diri tumuroo nga mga kapamilya. Bisan kon bangin nalilipay gud kita ha mga kamatuoran nga aton nahibabaroan ha Biblia, an aton mga kapamilya bangin sayop nga naghuhunahuna nga nauwat kita o nagin membro kita hin usa nga kulto. Bangin ginhuhunahuna nira nga diri na naton hira hinigugma kay diri na kita nagsiselebrar hin mga piyesta kaupod nira. Bangin nababaraka pa ngani hira han aton dadangatan kon mamatay kita. Sadang naton ipakita an empatiya pinaagi ha pangalimbasog nga hibaroan an ira panhunahuna ngan ha pagpamati ha ira hin maopay basi masabtan kon ano gud an ira ginkakabarak-an. (Prob. 20:5) Hi apostol Pablo nangalimbasog nga sabuton an “ngatanan nga klase hin tawo” basi maipasamwak niya ha ira an maopay nga sumat, ngan an pagbuhat hito mahimo liwat makabulig ha aton.—1 Cor. 9:19-23.

13. Paonan-o kita sadang makiistorya ha aton diri tumuroo nga mga kapamilya?

¹³ Magin malumo ha imo pagyakan. An Biblia nasiring: “Magin buotan kamo pirme ha iyo pagyakan.” (Col. 4:6) Mahimo kita mangaro kan Jehova han iya baraan nga espiritu basi maipakita naton an bunga hito kon nakikiistorya kita ha aton mga kapamilya. Diri kita sadang makigdebate mahitungod han ngatanan nga buwa nga katutdoan han ira relihiyon. Kon nasakitan kita han ira ginyakan o ginbuhat, mahimo naton subaron an ehemplo han mga apostol. Hi Pablo nagsurat: “Kon gin-iinsulto, nagdadayaw kami. Kon gintitimaraot, nagpapailob kami. Kon ginpapakaraot, malumo kami nga nabaton.”—1 Cor. 4:12, 13.

14. Ano an mga kapulsanan ha pagtipig hin maopay nga panggawi?

¹⁴ Tipigi an maopay nga panggawi. Bisan kon an malumo nga pagyakan nakakabulig nga matipigan an aton mamurayawon nga relasyon ha aton nakontra nga mga kapamilya, an aton maopay nga panggawi may mas daku nga epekto. (Basaha an 1 Pedro 3:1, 2, 16.) Pinaagi han imo ehemplo, ipakita ha imo mga kapamilya nga an mga Saksi ni Jehova nagpapahimulos hin malipayon nga pag-asawa, nag-aataman han ira mga anak, nagkikinabuhi nga limpyo ha moral, ngan may malipayon nga kinabuhi. Bisan kon diri karawaton han aton mga kapamilya an kamatuoran, mahimo kita magin malipayon tungod kay napapalipay naton hi Jehova pinaagi han aton pagin matinumanon ha iya.

15. Paonan-o kita makakagplano hin abanse basi malikyan an mga kahimtang nga bangin magresulta hin pagdebate?

¹⁵ Pagplano hin abanse. Hunahunaa an mga kahimtang nga bangin magresulta hin pagdebate, ngan pagplano hin abanse kon ano an imo bubuhaton. (Prob. 12:16, 23) Usa nga sister nga taga-Australia an nagsiring: “An akon ugangan nga lalaki nakontra gud ha kamatuoran. Antes namon hiya bisitahon, nag-aampo kami nga mag-asawa nga buligan kami ni  Jehova nga magin buotan ha pagbaton bisan kon nasisina hiya. Nag-aandam kami hin mga topiko nga paghihisgotan basi magin makalilipay an amon pag-iristorya. Basi malikyan an hilaba nga pag-iristorya nga kasagaran nga nagriresulta hin pagdebate mahitungod ha relihiyon, ginlilimitahan namon an oras han amon pagbisita.”

16. Paonan-o naton malalamposan an pag-abat hin kakonsensya kon diri naton napapalipay an aton mga kapamilya?

¹⁶ Syempre, diri ka makakalaom nga malilikyan mo an ngatanan nga higayon nga magdebate kamo han imo diri tumuroo nga mga kapamilya. Kon mahitabo ito, bangin makonsensya ka labi na kay hinigugma mo an imo mga kapamilya ngan karuyag mo gud nga lipayon hira. Kon ito an imo inaabat, pangalimbasog nga magin prayoridad mo an pagin maunungon kan Jehova kay han imo gugma ha imo mga kapamilya. An imo pagin maunungon kan Jehova mahimo makabulig ha ira nga masantop kon mationan-o kaimportante an pagkinabuhi uyon ha mga kamatuoran ha Biblia. Anoman an kahimtang, hinumdumi nga diri mo mapipirit an iba nga karawaton an kamatuoran. Lugod, ipakita ha imo pagkinabuhi an mga kapulsanan ha pagsunod han mga paagi ni Jehova. An aton mahigugmaon nga Dios nagtatanyag ha ira hin pariho nga oportunidad nga iya igintatanyag ha aton—pilion an pag-alagad ha iya.—Isa. 48:17, 18.

17, 18. Ano an makakabulig ha imo nga mailob an kasakit kon may kapamilya ka nga binaya kan Jehova?

¹⁷ Kon may kapamilya ka nga ginpaiwas o binulag ha kongregasyon, bangin umabat ka nga baga hin ginbuno ka hin espada. Paonan-o mo maiilob ini nga kasakit?

¹⁸ Tipigi an imo espirituwal nga rutina. Parig-ona an imo kalugaringon pinaagi han regular nga pagbasa ha Biblia, pagpangandam ngan pagtambong ha Kristiano nga mga katirok, pagsangyaw, ngan pag-ampo nga magkaada ka kusog nga makapailob. (Jud. 20, 21) Kondi ano man kon ginbubuhat mo ito ngatanan pero nasasakitan ka la gihapon? Ayaw pag-undang! An maopay nga espirituwal nga rutina makakabulig ha imo nga makontrol an imo hunahuna ngan pagbati. Tagda an eksperyensya han nagsurat han Salmos 73. Nagkaada hiya sayop nga panhunahuna ngan nakawurok gud ito ha iya, pero natadong niya ito han sinulod hiya ha lugar han pagsingba ha Dios. (Sal. 73:16, 17) An imo matinumanon nga pag-alagad kan Jehova makakabulig ha imo nga maitadong an imo sayop nga panhunahuna ngan pagbati.

19. Paonan-o mo maipapakita nga ginrirespeto mo an kahikayan ni Jehova ha pagdisiplina?

¹⁹ Respetoha an disiplina ni Jehova. Bisan kon an kahikayan han Dios ha pagdisiplina masakit ha tinikangan, may-ada ito nagpapadayon ngan maopay gud nga epekto para ha ngatanan, pati na hadton nakasala. (Basaha an Hebreo 12:11.) Pananglitan, ginsusugo kita ni Jehova nga “diri na . . . makig-upod” ha diri mabinasulon nga mga nakasala. (1 Cor. 5:11-13) Bisan kon masakit gud ito ha aton, sadang naton likyan an normal nga pakigkomunikar ha ginpaiwas nga kapamilya pinaagi ha telepono, text, surat, e-mail, o social media.

20. Ano nga paglaom an sadang naton tipigan?

²⁰ Ayaw kawad-i hin paglaom. An gugma “naglalaom han ngatanan nga butang,” salit naglalaom kita nga adton binaya kan Jehova mabalik ha iya. (1 Cor. 13:7) Kon nakikita mo nga an imo duok nga kapamilya naghihimo na hin mga pagbag-o tikang ha iya sayop nga buhat, mahimo mo ig-ampo nga magkaada hiya kusog tikang ha Kasuratan ngan sundon an hangyo ni Jehova: “Balik ha akon.”—Isa. 44:22.

21. Ano an sadang mo buhaton kon ginkukontra ka han imo mga kapamilya tungod han imo pagsunod kan Jesus?

²¹ Hi Jesus nagsiring nga kon mas hinigugma naton an bisan hin-o nga tawo kay ha iya, diri kita takos ha iya. Pero nasarig gud hiya nga magigin maisugon an iya mga disipulo nga tipigan an ira pagin maunungon ha iya bisan pa han pagkontra han pamilya. Kon an imo pagsunod kan Jesus nagdadara “hin espada” ha imo pamilya, sarig nga bubuligan ka ni Jehova nga malamposan ito nga makuri nga kahimtang. (Isa. 41:10, 13) Magin malipayon ha paghibaro nga hi Jehova ngan hi Jesus nalilipay ha imo ngan babalosan ka nira tungod han imo pagin matinumanon.