1, 2. (a) Ana apano tukusasangalala ni mtendele wapi ni wapi? (b) Ligongo cici masiku agano nganitukola mtendele usyesyene pa cilambo cosope? (Alole ciwulili cacili penanipa.)

WOSOPEWE tukusasaka umi wambone, wangali cakudandawula. Yili yakusangalasya kuti Yehofa akusatupa “mtendele wa Mlungu,” wawukusatucenjela naga tukulaga nganisyo. (Afi. 4:6, 7) Soni ligongo lyakuti twalipelece kwa Yehofa, tukusasangalala kuŵa “pa mtendele ni Mlungu,” gopolela kuti tukusakola mkamulano wambone ni jwalakwejo.—Alo. 5:1.

² Nambope, ndaŵi jakuti Mlungu ayikasye mtendele pacilambo cosope nganijiŵe kwana. M’masiku gambesi gakusawusyaga ŵandu ŵajinji ali ŵaciwawa, soni ŵanganonyela yamtendele. (2 Tim. 3:1-4) Aklistuwe, tukusosekwa kuputa ngondo jausimu jakulimbana ni Satana, soni yijiganyo yaunami yakusalimbikasya. (2 Akoli. 10:4, 5) Nambo ndaŵi sine ŵacibale ŵacikulupi cakulekangana ni cetu ni ŵampaka asokonasye mnope mtendele wetu. Ŵane mpaka anyosyeje yatukusakulupilila, ŵane kutujimba magambo kuti tukutandisya gaŵikangana peŵasa, kapenasoni kutusalila kuti catutopole pamlango  naga ngatukuleka yatukukulupililayo. Ana tukusosekwa kumanyilila yamtuli naga ŵamwiŵasa mwetu akusatusisya, soni ana mpaka tutende wuli kuti tupilile?

3, 4. (a) Ana yiŵajiganyaga Yesu yakwete yakuyicisya yamtuli? (b) Ana kumkuya Yesu mpaka kuŵe kwakusawusya mnopemnope pandaŵi japi?

³ Yesu jwamanyililaga kuti ŵandu cacigaŵikangana ligongo lya yijiganyo yakwe, soni kuti ŵakusaka kumkuya akusosekwa kuŵa ŵakoseka kusimana ni yakusawusya. Yeleyi yikusasokonasya mtendele kwa ŵandu ŵapaulongo. Ni ligongo lyakwe Yesu jwatite, “Mkaganisyaga kuti nayice kukuyikasya mtendele pacilambo capasi. Nganimbika ni mtendele, nambo ni upanga. Une nayice kukulekanganya mwanace jwamlume ni babagwe, mwanace jwamkongwe ni mamagwe, soni jwamkongwe ni akwegwe ŵakwe ŵakongwe. Kusala yisyene, acimmagongo ŵa mundu taciŵa ŵamwiŵasa mwakwe.”—Mat. 10:34-36.

⁴ Yesu pakuŵeceta kuti, “Mkaganisyaga kuti nayice kukuyikasya mtendele pacilambo capasi,” jwasakaga kuti ŵakumpikanila amanyilile yacasimane nayo ligongo lyakumkuya. Ngani syaŵalalicilaga Yesu syaliji syagaŵanya ŵandu. Nambotu cakulinga ca Yesu caliji kulalicila usyesyene wa Mlungu, ngaŵaga kusokonasya ulongo wa ŵandu. (Yoh. 18:37) Nambope, Yesu jwalosisye kuti kuŵa ŵakulupicika ku yijiganyo yakwe mpaka kuŵe kwakusawusya naga acimjetu kapena ŵamwiŵasa mwetu awukanile usyesyene.

5. Ana ŵakumkuya ŵa Yesu akusasimana ni yamtuli?

⁵ Jwalijose jwakusaka kumkuya Yesu akusosekwa kuŵa jwakoseka kupilila yakusawusya. Yesu jwalosisye kuti cakusawusya cine cili kusisya kwakutyocela kwa ŵamwiŵasa. (Mat. 10:38) Kuti aŵe ŵakuŵajilwa kwa Yesu, ŵakumkuya ŵakwe akusapilila pakwanyosya kapena kwatopola pamlango. Nambo jemanjaji akusapata majali gakupunda yayilesileyo.—Aŵalanje Maliko 10:29, 30.

6. Ana tukusosekwa kumbucila cici naga acalongo acimjetu akusatusisya ligongo lyakumtumicila Yehofa?

⁶ Atamose acalongo acimjetu atusisyeje patukumtumicila Yehofa, ngatukusaleka kwanonyela. Nambo tukumbucileje kuti cinonyelo cetu kwa Mlungu ni kwa Klistu ni cacikusosekwa kuŵa pandanda. (Mat. 10:37) Tukusosekwa kumanyililasoni kuti patukwanonyela acalongo acimjetu, Satana mpaka awuwone welewu mpela upile wakutulepelekasya kuŵa ŵakulupicika kwa Yehofa. Kwende tulole yakutendekwa yampaka yitulepelekasye kuŵa ŵakulupicika, ni kaneko tutagulilane yatukusosekwa kutenda kuti tuŵepe ŵakulupicika.

7. Ana ŵali paulombela ni mundu jwangakulupilila akusosekwa kujiwona wuli nganiji?

⁷ Baibulo jikusatukalamusya kuti ŵali paulombela “tacikola yakusawusya m’cilu mwawo.” (1 Akoli. 7:28) Naga ali paulombela ni mundu jwakulekangana najo cikulupi, yakusawusyayi komboleka kutupa. Nambope, akusosekwa kujiwona nganiji mwakusajiwonela Yehofa. Naga ŵamkwawo ngakusaka kumkuya Yesu lyeleli nganiliŵa ligongo lyakupikanika lyakuti amasye kapena kulekangana ulombela. (1 Akoli. 7:12-16) Atamose kuti jwamlume jwangakulupilila ngaŵa mkulongolela pa yindu yausimu, nambo akusosekwa kumcimbicisyape ligongo ali mtwe wa liŵasalyo. M’yoyosoni, naga m’bale akwete jwamkongwe jwangakulupilila akusosekwape kumnonyela mnope.—Aef. 5:22, 23, 28, 29.

8. Ana akusosekwa kuliwusya yiwusyo yapi naga ŵamkwawo akwaŵicila malile pa yindu yakwaya kulambila?

⁸ Nambi wuli naga ŵamkwawo akwaŵicila malile pa yindu yine yakwaya kulambila? Mwambone, mlongo jwine ŵamkwakwe ŵam’ŵicile masiku gakuti ajinjileje mu undumetume.  Naga wawojo akusimanasoni ni yampela yeleyi, aliwusye kuti, ‘Ana ŵamkwanguŵa cakulinga cawo cili kundekasya kumtumicila Mlungu? Naga nganiciŵa celeco, ana mpaka ngambe kwiticisya yakusakayo?’ Kupikanicisya yindu mpaka kwakamucisye kunandiya kangana.—Afi. 4:5.

9. Ana Aklistu mpaka ŵajiganye wuli ŵanace kumcimbicisya nangolo jwawo jwangakulupilila?

⁹ Kwajiganya ŵanace mpaka kuŵe kwakusawusyasoni naga ŵamkwawo nganaŵa Ŵamboni. Mwambone, akusosekwa kwajiganya ŵanace ŵawo kupikanila maloŵe ga m’Baibulo gakuti, “Mwacimbicisyeje baba ŵenu ni mama ŵenu.” (Aef. 6:1-3) Nambi wuli naga ŵamkwawo ŵangakuya ndamo syapenani sya m’Baibulo? Alosyeje cisyasyo cambone kwa ŵanace ŵawo mwakwacimbicisyape ŵamkwawowo. Ayamicileje mnope ndamo syawo syambone. Aŵambaleje kusala yakulepela ya ŵamkwawo pameso pa ŵanace. Nambo, ŵasalileje ŵanacewo kuti jwalijose akusasagula jika kumtumicila Yehofa kapena iyayi. Ndamo syambone sya ŵanace mpaka simtendekasye nangolo jwawo jwangakulupilila kuti atande usyesyene.

10. Ana ŵali pa ulombela ni mundu jwangakulupilila mpaka ŵajiganye wuli ŵanace usyesyene wa m’Baibulo?

¹⁰ Ndaŵi sine, ŵamkwawo ŵangakulupilila mpaka ŵasalile ŵanace kuti asangalaleje pa yindimba yakutyocela ku dini jaunami kapena kwajiganya yikulupi ya dini jaunami. Acalume ŵane akusalekasya ŵamkwawo kwajiganya wanace Baibulo. Atamose yili m’yoyo, akusosekwape kutenda yampaka akombole pakwajiganya ŵanace ŵawo usyesyene ŵa m’Baibulo. (Mase. 16:1; 2 Tim. 3:14, 15) Mwambone, jwamlume jwele ŵamkwakwe ali Ŵamboni mpaka ŵalekasye ŵamkwakwewo kutenda lijiganyo lya Baibulo ni ŵanace  kapena kwajigala kumisongano ja Ciklistu. Pakulosya kwacimbicisya ŵamkwakwewo mpaka apikanile yeleyi, nambo upile paupatikene ŵasalileje ŵanacewo ya cikulupi cakwe. Yeleyi yicakamucisya ŵanacewo kulijiganya ndamo syambone soni kummanyilila Yehofa. (Mase. 4:19, 20) Pambesi pakwe, ŵanacewo mpaka asagule kumtumicila Yehofa.—Deut. 30:19, 20. *

11. Ana cici campaka citandisye yakusawusya pasikati pa m’weji ni acalongo acimjetu ŵangakulupilila?

¹¹ Patwagambile kutanda kwene kulijiganya Baibulo ni Ŵamboni sya Yehofa, komboleka kuti nganitwasalilaga acalongo acimjetu. Nambo cikulupi cetu pacakulaga, twatandite kwasalila yatukusakulupilila. (Maliko 8:38) Naga akuyiwona kuti pana yakusawusya yine kutandila paŵasalile ya cikulupi cawo, aganicisye matala gampaka akuye pakunandiya yakusawusyayi ni kwendelecela kuŵa ŵakulupicika.

12. Ana acalongo acimjetu mpaka atusisyeje ligongo cici, soni ana mpaka tulosye wuli kuti tukwapikanicisya?

¹² Ŵapikanicisyeje acalongo acimjawo ŵangakulupilila. Patulijiganyisye usyesyene wa m’Baibulo tukusaŵa ŵakusangalala mnope. Nambo acalongo acimjetu komboleka kuyiwona yindu mwamtundu wine. Mpaka aganisyeje kuti Ŵamboni atuloŵesye kapena tukwamba kuya yindu yakuti ngatukuyimanyilila. Komboleka kuyiwonasoni mpela tulesile kwanonyela ligongo ngatukutenda nawo yindimba yine. Mwinesoni mpaka aganisyeje kuti patuciwapo, wakumoto basi. Tukusosekwa kwapikanila cenene pakutusalila yeleyi, ligongo komboleka kuti akututendela canasa yisyesyene. (Miy. 20:5) Ndumetume Paulo jwalinjililaga kwapikanicisya “ŵandu ŵamitundu josope” ni cakulinga cakuti akombole kwalalicila. Yeleyi yili yakamucisyasoni kwa m’weji.—1 Akoli. 9:19-23.

13. Ana tuŵeceteje mwamtuli ni acalongo acimjetu ŵangakulupilila?

¹³ Aŵeceteje nawo mwakuwusimana mtima. Baibulo jikusati, “Ndaŵi syosope maloŵe genu gaŵeje gakusangalasya.” (Akolo. 4:6) Mpaka tum’ŵende Yehofa kuti atukamucisye kulosya ndamo sya msimu wakwe patukuŵecetana ni acalongo acimjetu. Ngatukusosekwa kusisya yijiganyo yosope ya dini jawo. Naga atuŵecetele kapena kututendela yindu yakupweteka, tutendeje yaŵatendaga ŵandumetume. Paulo jwalembile kuti, “Pakutunyosya, tukusiŵajaliwa. Pakutulagasya, tukusapilila mwakulitimalika. Soni pakutulambucisya, tukusajanga mwakuwusimana mtima.”—1 Akoli. 4:12, 13.

14. Ana kola ndamo syambone kwana umbone wamtuli?

¹⁴ Akaleka ndamo syambone. Atamose kuti kuŵeceta mwakuwusimana mtima kuli kwakamucisya naga acalongo acimjawo akwasisya, kulosya ndamo syambone mpaka kukamucisyesoni mnope. (Aŵalanje 1 Petulo 3:1, 2, 16.) Acalongo acimjawo akomboleje kulola kuti Ŵamboni sya Yehofa akusakola maŵasa gakusangalala, akusiŵalela cenene ŵanace, soni akusalingalinga kuya ndamo syambone. Cinga acalongo acimjetu catande usyesyene kapena iyayi, nambope mpaka tuŵe ŵakusangalala kumanyilila kuti Yehofa akusangalala ni kulupicika kwetu.

15. Ana mpaka tukosecele wuli kuti tuŵambale kangana ni acalongo acimjetu?

¹⁵ Akoseceleje cile. Aganicisyeje yampaka yitandisye ukangani, kaneko akoseceleje yampaka atende. (Miy. 12:16, 23) Mlongo jwine jwa ku Australia jwatite, “Akwegwe ŵangu ŵalume akusasisya mnope usyesyene, mwamti ndaŵi sine akusaŵeceta mwaukali. M’yoyo, mkanitujawule kumangwawo, ŵamkwangu ni une tukusalongola kupopela kwa Yehofa kuti akatukamucisye  kwajanga mtima uli mmalo. Tukusakosecelasoni cile ngani syakuti tukakunguluce nawo. Pakogopa kutagulilana nawo yejinji ya dini yampaka yitandisye ukangani, tukusaliŵicila malile paulewu wa ndaŵi jatukusaka kunguluka nawo.”

16. Ana mpaka atende wuli kuti yikapwetekaga mnope naga ngakukamulana ni acalongo acimjawo?

¹⁶ Tukumanyilila kuti nganiyiŵa yikombolece kamulana ni acalongo acimjawo ŵanganaŵa Ŵamboni pa cilicose. Yeleyi yili yakupweteka ligongo akusiŵanonyela acalongo acimjawowo soni akusalingalinga kutenda yakwasangalasya. Naga akulipikana m’yoyo, alolecesyeje kuti kumnonyela kwawo Yehofa kuŵeje pandanda. Mwine acalongo acimjawo cacipikanicisya kuti kuya songa sya m’Baibulo jili ngani ja umi ni ciwa. Akumbucilejesoni kuti wawojo nganaŵa amkanganicisye mundu kuti atande usyesyene. Nambo ŵalece alole jika umbone wakutenda yindu mwakusasacila Yehofa. Mlungu jwetu jwacinonyelo ŵapele nombe nawo upile wakusagula kumtumicila kapena iyayi, mpela muŵatendele ni m’weji.—Yes. 48:17, 18.

17, 18. Ana cici campaka cakamucisye kupilila naga mlongo mjawo amlesile Yehofa?

¹⁷ Mlongo mjetu patyosyedwe mumpingo kapena naga alilekangenye ni mpingo, yikusatupweteka, yikusaŵa mpela akusomile ni upanga. Ana mpaka apilile wuli kupweteka kweleku?

¹⁸ Akaleka kulijiganya yausimu mwakutamilicika. Aŵalanjeje Baibulo lisiku lililyose, akoseceleje ni kusimanikwa pamisongano ndaŵi syosope, alalicileje mwakutamilicika, soni apopeleje kwa Yehofa kuti ŵakamucisye kupilila. (Yuda 20, 21) Nambi wuli naga yili mkuwoneka mpela yeleyi ngayikukamucisya? Akajasa mtima! Ajendelecele kutenda yindu yausimu, mkupita kwa ndaŵi cacitanda kupikana cenene. Cisyasyo cambone cili ca mundu juŵalembile Salimo 73. Pandanda, ŵayiwonaga yindu mwakulemweceka, mwamti yamlagasyaga mumtima. Nambo nganisyo syakwe syajongwece paŵajinjile m’nyumba ja Mlungu. (Sal. 73:16, 17) Naga akwendelecelape kumtumicila Yehofa mwakulupicika, wawojosoni mpaka yakamucisye.

19. Ana mpaka alosye wuli kuti akucimbicisya camuko ca Yehofa?

¹⁹ Acimbicisyeje camuko ca Yehofa. Mlungu akusamanyilila kuti camuko cakwe cikusamkamucisya jwakulemwa, soni ŵane wosope. Atamose kuti yikusaŵa yakupweteka, nambo kuya camukoco kukusamkamucisya kuwujilasoni kwa Yehofa. (Aŵalanje Ahebeli 12:11.) Mwambone, Yehofa akusatukalamusya kuti ‘tulece kusyoŵekana’ ni ŵakulemwa ŵangapitikuka mtima. (1 Akoli. 5:11-13) Atamose kuti yikusaŵa yili mkutupweteka mumtima, nambo tuŵambaleje kunguluka nawo cinga pa foni, pa meseji, kapena pa yikalata.

20. Ana tukusosekwa kola cembeceyo camtuli?

²⁰ Akajasa mtima. Cinonyelo “cikusajembeceya yindu yosope,” kupwatikapo kwembeceya kuti ŵandu ŵaŵamlesile Yehofa caciwujilasoni. (1 Akoli. 13:7) Naga atandite kuyiwona kuti mlongo mjawo akulosya kupitikuka mtima, apopeleje kuti Malemba gamlimbikasye soni apikanile maloŵe gakuti awujile kwa Yehofa.—Yes. 44:22.

21. Ana akusosekwa kutenda cici naga ŵamwiŵasa mwawo akwasisya ligongo lyakuti akumkuya Yesu?

²¹ Yesu ŵasasile kuti naga tukumnonyela mnope mundu kupunda jwalakwejo, ngatukuŵajilwa kuŵa jwakumkuya jwakwe. Nambope, jwakulupililaga kuti ŵakulijiganya ŵakwe caciŵa ŵakulupicika kwa jwalakwe atamose acalongo acimjawo ŵasisyeje. Naga kumkuya Yesu kwayikasisye “upanga” mwiŵasa mwawo, amjegamileje Yehofa kuti ŵakamucisye kulimbana ni yakusawusya. (Yes. 41:10, 13) Asangalaleje pakumanyilila kuti Yehofa ni Yesu akusasangalala pakwawona kuti akwendelecela kola cikulupi cakulimba soni kuti cacapa mbote.