真理“唔系要带嚟和平，而系要带嚟刀剑”
“唔好以为我嚟系要为地上带嚟和平；我嚟唔系要带嚟和平，而系要带嚟刀剑。”——马太福音10:34
唱诗125，135首
1,2．（甲）我哋而家享有点样嘅平安？（乙）乜嘢阻碍我哋得到真正嘅和平？（请睇吓课文开头嘅图片）
我哋每一个人都好想过和平、无忧无虑嘅生活。我哋好感激有耶和华所赐嘅平安，呢种平安可以帮助我哋喺思想同感情上保持平静安宁。（腓立比书4:6,7）由于我哋献咗身俾耶和华，我哋都可以“同上帝享有和睦嘅关系”。（罗马书5:1）
2 不过，上帝带嚟真正和平嘅嗰一日仲未到。喺最后日子呢段难以应付嘅非常时期，好多人都有好争辩嘅精神，到处充满纷争。（提摩太后书3:1-4）身为基督徒，我哋都有一场 战争，要对抗撒但同佢所鼓吹嘅错误道理。（哥林多后书10:4,5）但系，对我哋嘅和平造成最大威胁嘅系不信嘅家人。有啲家人可能会嘲笑我哋嘅信仰，指责我哋破坏家庭，或者威胁我哋，如果唔放弃信仰，就同我哋断绝关系。我哋应该点样看待家人嘅反对？我哋可以点样成功应对家人反对所带嚟嘅挑战？
点样看待家人嘅反对
3,4．（甲）耶稣嘅教导带嚟乜嘢影响？（乙）对嗰啲想跟从耶稣嘅人嚟讲，乜嘢情况系个特别嘅挑战？
3 耶稣知道自己嘅教导会造成分裂，而且门徒喺受到反对嘅时候需要勇气。呢啲反对会影响家庭成员之间嘅和睦关系。耶稣话：“唔好以为我嚟系要为地上带嚟和平；我嚟唔系要带嚟和平，而系要带嚟刀剑。我嚟系要引起分裂：儿子要对抗父亲，女儿要对抗母亲，媳妇要对抗婆婆。人嘅敌人会系自己嘅家人。”（马太福音10:34-36）
4 当耶稣讲“唔好以为我嚟系要为地上带嚟和平”呢句话嘅时候，佢系想人谂清楚，如果要成为佢嘅门徒就会面对考验。佢传讲嘅信息会造成分裂。当然，耶稣嘅目的系宣扬上帝嘅信息，而唔系想破坏人同人之间嘅关系。（约翰福音18:37）不过，如果一个人嘅好友或者家人排斥真理，噉对佢嚟讲，跟从耶稣嘅教导就会系个挑战。
5．耶稣嘅门徒要面对乜嘢考验？
5 耶稣指出，佢嘅门徒必须忍受嘅痛苦包括家人嘅反对。（马太福音10:38）为咗表明配做耶稣嘅门徒，基督徒需要忍受家人嘅嘲笑，甚至俾佢哋疏远。不过，佢哋得到嘅，远远超过佢哋所失去嘅。（请读马可福音10:29,30）
6．如果亲人反对我哋崇拜耶和华，我哋一定要紧记乜嘢？
6 就算亲人反对我哋崇拜耶和华，我哋都会继续爱佢哋，但系要紧记，我哋最爱嘅系上帝同基督。（马太福音10:37）我哋亦都要知道，撒但会尝试利用我哋对家人嘅爱嚟破坏我哋对耶和华嘅忠贞。等我哋嚟睇吓同家人反对有关嘅几种情况，以及我哋可以点样成功应付呢啲挑战。
不信嘅配偶
7．有不信配偶嘅基督徒应该点样看待自己嘅情况？
7 圣经话，结咗婚嘅人“会身受患难”。（哥林多前书7:28）如果你有不信嘅配偶，你可能会经历更多嘅压力同忧虑。不过，用耶和华嘅观点嚟睇呢件事系好重要嘅。就算你嘅配偶唔跟从基督，都唔应该成为你哋离婚或者分居嘅理由。（哥林多前书7:12-16）虽然未信主嘅丈夫唔崇拜耶和华，但佢作为一家之主，应该得到应有嘅尊重。同样，即使有不信嘅妻子，基督徒丈夫都应该对佢流露出温情，表现无私嘅爱。（以弗所书5:22,23,28,29）
8．如果配偶限制你嘅崇拜活动，你可以问吓自己乜嘢问题？
8 如果配偶限制你嘅崇拜活动，噉可以点做呢？例如，一个姊妹嘅丈夫只系容许佢喺一个星期里面嘅某几日出去传道。如果你都面对紧类似嘅情况，请问吓自己：“我嘅配偶有冇唔俾我崇拜上帝呢？如果冇嘅话，我可唔可以作出让步，接受佢嘅要求呢？”通情达理嘅态度可以帮助你避免不必要嘅家庭纠纷。（腓立比书4:5）
9．你可以点样教导仔女尊重你未信嘅配偶？
9 如果你有不信嘅配偶，噉喺教导仔女方面就更加唔容易嘞。例如，你要教导仔女听从圣经嘅吩咐：“要尊敬父母”。（以弗所书6:1-3）不过，如果你嘅配偶冇跟从圣经崇高嘅道德标准，噉又点呢？你都应该以身作则，带头尊重你嘅配偶。你可以留意配偶嘅优点，俾佢知道你好感激佢。要避免喺仔女面前讲配偶嘅坏话。反而，要向佢哋解释，每个人都应该自己决定事唔事奉耶和华。仔女嘅好品行可能会吸引你不信嘅配偶接受真理。
揸紧机会教导仔女圣经真理 （请睇第10段）
10．喺不信配偶嘅影响下，基督徒可以点样教导仔女圣经真理？
10 有时，不信嘅配偶会要求仔女参与异教嘅庆祝活动，或者教仔女一啲错误嘅宗教道理。有啲不信嘅丈夫可能会禁止妻子教仔女圣经。即使系噉，基督徒妻子仲系会尽己所能教导仔女圣经真理。（使徒行传16:1；提摩太后书3:14,15）例如，不信嘅丈夫可能会反对妻子同未成年嘅仔女讨论圣经，或者带佢哋参加基督徒聚会。见证人妻子会尊重丈夫嘅决定，不过一有机会，仲系会向仔女分享自己嘅信仰，教导佢哋认识耶和华同佢嘅道德标准。（使徒行传4:19,20）当然，基督徒嘅仔女喺信仰方面最终仲系要自己做选择。（申命记30:19,20） *
反对正确崇拜嘅亲人
11．乜嘢可能会使我哋同不信嘅亲人之间发生矛盾？
11 起初，我哋可能冇话俾家人知我哋同耶和华见证人学习。不过，随住信心逐渐增长，我哋睇出需要俾佢哋知道，自己好想事奉耶和华。（马可福音8:38）如果你勇敢表明自己嘅立场而导致自己同不信嘅亲人之间发生矛盾，请谂吓以下嘅一啲方法，帮助自己减少同亲人嘅冲突，继续忠于耶和华。
12．点解不信嘅亲人会反对我哋？我哋可以点样理解佢哋嘅感受？
12 理解不信嘅亲人嘅感受。我哋认识圣经真理感到好兴奋，但系，亲人可能以为我哋俾人呃咗或者觉得我哋入咗邪教。由于我哋冇同亲人一齐按照传统庆祝节日，亲人可能会觉得我哋唔再爱佢哋，甚至会担心我哋遭受报应，有唔好嘅结果。我哋应该企喺佢哋嘅立场考虑佢哋嘅感受，留心聆听佢哋所讲嘅，明白佢哋真正嘅忧虑。（箴言20:5）为咗向唔同嘅人分享好消息，使徒保罗尽力理解各种各样嘅人，“对点样嘅人，［佢］就做点样嘅人”。我哋都可以效法保罗，尝试理解家人嘅感受，或者可以揾到方法帮助佢哋认识真理。（哥林多前书9:19-23）
13．我哋应该点样同不信嘅亲人沟通？
13 用温和嘅态度嚟沟通。圣经话，“你哋讲说话应该总系仁慈体贴”。（歌罗西书4:6）我哋可以求耶和华赐神圣力量，帮助我哋同亲人沟通嘅时候能够表现神圣力量嘅果实。就算亲人喺信仰方面有错误嘅观点，我哋都唔需要逐一同佢哋争詏。如果佢哋喺言行方面伤害咗我哋，我哋可以效法使徒嘅榜样。保罗话：“俾人侮辱，我哋就祝福；俾人迫害，我哋就忍耐；俾人诽谤，我哋就温和回应。”（哥林多前书4:12,13）
14．保持良好嘅品行可以得到乜嘢益处？
14 保持良好嘅品行。虽然温和嘅言语有助于应对亲人嘅反对，但其实，良好嘅品行更加有效。（请读彼得前书3:1,2,16）通过我哋嘅榜样，亲人可以睇出，耶和华见证人享有快乐嘅婚姻，悉心照顾仔女，过住道德洁净、心满意足嘅生活。就算佢哋唔接受真理，我哋都可以因为自己嘅良好品行令耶和华欢喜，而得到喜乐。
15．我哋可以点样提前做好计划，应付一啲可能会引发冲突嘅情况？
15 提前做好计划。要预先谂吓乜嘢情况会引发冲突，同埋点样去应对。（箴言12:16,23）一个嚟自澳大利亚嘅姊妹话：“我先生嘅爸爸对真理好反感。喺联系佢之前，先生同我会一齐祷告，求耶和华帮助我哋，喺爸爸发嬲嗰阵都能够保持冷静唔驳嘴。我哋会预先谂好讲啲乜嘢，噉样可以保持和睦嘅气氛。我哋亦都会定好要倾几长时间，噉样就可以避免因为倾太耐而倾到宗教问题，结果发生争詏。”
16．你可以点样克服因为令亲人唔开心而产生嘅内疚感？
16 当然，想同不信亲人完全冇冲突系唔可能嘅。同亲人发生冲突可能会令你觉得内疚，因为你爱自己嘅亲人，同埋一直都努力想令佢哋开心。如果你有噉嘅感觉，就要努力将你对耶和华嘅忠贞睇得比对家人嘅爱更重要。噉样做，就有可能帮助你嘅亲人睇出，事奉耶和华系好重要嘅。无论点都好，要记住你唔能够强迫其他人接受真理。相反，应该俾佢哋睇到，你按照耶和华嘅方式生活得到乜嘢益处。仁爱嘅上帝俾机会我哋选择自己嘅人生路，同样佢都会俾机会我哋嘅亲人选择要唔要事奉佢。（以赛亚书48:17,18）
如果家人离弃耶和华
17,18．如果家人离弃耶和华，乜嘢可以帮助你应付悲痛？
17 如果家人俾会众开除，或者佢自己离弃真理，你个心可能好似俾刀㓤咁痛。你可以点样应付呢种悲痛？
18 保持良好嘅崇拜习惯。为咗强化自己，我哋应该经常研读圣经、预习聚会资料以及参加聚会、参与传道工作，同埋祷告求上帝赐力量使我哋忍受得住。（犹大书20,21）如果你已经努力噉样做，伤心嘅感觉仲系挥之不去，噉点算呢？千祈唔好放弃！保持良好嘅崇拜习惯可以帮助你控制情绪，保持理智。我哋嚟睇吓诗篇73篇执笔者嘅经历。佢曾经有错误嘅观点，变得非常不满，但系佢入到圣殿之后，就改变咗自己嘅谂法。（诗篇73:16,17）你继续忠心崇拜耶和华，同样都可以帮助你调整自己。
19．你点样做就系尊重耶和华嘅管教安排？
19 尊重上帝嘅管教。虽然管教喺当时会令人难过，但从长远嚟睇，耶和华嘅安排能够为所有人，包括犯过者，带嚟最好嘅结果。（请读希伯来书12:11）例如，耶和华吩咐我哋 “唔好再同［嗰啲唔肯悔改嘅人］来往”。（哥林多前书5:11-13）虽然我哋嘅心好难过，但系我哋要避免通过电话、短信、书信、电子邮件、聊天软件或者社交网站同被开除嘅家人有不必要嘅联系。
20．我哋可以持守乜嘢希望？
20 持守希望。爱能够“凡事希望”，呢个包括盼望嗰啲离弃耶和华嘅人将来会返翻真理。（哥林多前书13:7）如果你睇到一啲迹象显示家人回心转意，就应该祷告求耶和华使家人可以从圣经得到力量，回应上帝嘅呼召：“返嚟我呢度啦”。（以赛亚书44:22）
21．如果你因为跟从耶稣而受到家人反对，应该点样做？
21 耶稣话，如果我哋将任何人睇得比佢更重要，我哋就配唔上佢。耶稣深信，就算面对家人反对，门徒都有勇气保持忠贞。如果你因为跟从耶稣而为家庭带嚟“刀剑”，就要信赖耶和华可以帮助你成功应付挑战。（以赛亚书41:10,13）知道自己付出嘅努力会令耶和华同耶稣嘅心欢喜，而且佢哋会因为你嘅忠心而奖赏你，可以帮助你继续保持喜乐。
