真理“唔係要帶嚟和平，而係要帶嚟刀劍”
“唔好以為我嚟係要為地上帶嚟和平；我嚟唔係要帶嚟和平，而係要帶嚟刀劍。”——馬太福音10:34
唱詩125，135首
1,2．（甲）我哋而家享有點樣嘅平安？（乙）乜嘢阻礙我哋得到真正嘅和平？（請睇吓課文開頭嘅圖片）
我哋每一個人都好想過和平、無憂無慮嘅生活。我哋好感激有耶和華所賜嘅平安，呢種平安可以幫助我哋喺思想同感情上保持平靜安寧。（腓立比書4:6,7）由於我哋獻咗身俾耶和華，我哋都可以“同上帝享有和睦嘅關係”。（羅馬書5:1）
2 不過，上帝帶嚟真正和平嘅嗰一日仲未到。喺最後日子呢段難以應付嘅非常時期，好多人都有好爭辯嘅精神，到處充滿紛爭。（提摩太後書3:1-4）身為基督徒，我哋都有一場 戰爭，要對抗撒但同佢所鼓吹嘅錯誤道理。（哥林多後書10:4,5）但係，對我哋嘅和平造成最大威脅嘅係不信嘅家人。有啲家人可能會嘲笑我哋嘅信仰，指責我哋破壞家庭，或者威脅我哋，如果唔放棄信仰，就同我哋斷絶關係。我哋應該點樣看待家人嘅反對？我哋可以點樣成功應對家人反對所帶嚟嘅挑戰？
點樣看待家人嘅反對
3,4．（甲）耶穌嘅教導帶嚟乜嘢影響？（乙）對嗰啲想跟從耶穌嘅人嚟講，乜嘢情況係個特别嘅挑戰？
3 耶穌知道自己嘅教導會造成分裂，而且門徒喺受到反對嘅時候需要勇氣。呢啲反對會影響家庭成員之間嘅和睦關係。耶穌話：“唔好以為我嚟係要為地上帶嚟和平；我嚟唔係要帶嚟和平，而係要帶嚟刀劍。我嚟係要引起分裂：兒子要對抗父親，女兒要對抗母親，媳婦要對抗婆婆。人嘅敵人會係自己嘅家人。”（馬太福音10:34-36）
4 當耶穌講“唔好以為我嚟係要為地上帶嚟和平”呢句話嘅時候，佢係想人諗清楚，如果要成為佢嘅門徒就會面對考驗。佢傳講嘅信息會造成分裂。當然，耶穌嘅目的係宣揚上帝嘅信息，而唔係想破壞人同人之間嘅關係。（約翰福音18:37）不過，如果一個人嘅好友或者家人排斥真理，噉對佢嚟講，跟從耶穌嘅教導就會係個挑戰。
5．耶穌嘅門徒要面對乜嘢考驗？
5 耶穌指出，佢嘅門徒必須忍受嘅痛苦包括家人嘅反對。（馬太福音10:38）為咗表明配做耶穌嘅門徒，基督徒需要忍受家人嘅嘲笑，甚至俾佢哋疏遠。不過，佢哋得到嘅，遠遠超過佢哋所失去嘅。（請讀馬可福音10:29,30）
6．如果親人反對我哋崇拜耶和華，我哋一定要緊記乜嘢？
6 就算親人反對我哋崇拜耶和華，我哋都會繼續愛佢哋，但係要緊記，我哋最愛嘅係上帝同基督。（馬太福音10:37）我哋亦都要知道，撒但會嘗試利用我哋對家人嘅愛嚟破壞我哋對耶和華嘅忠貞。等我哋嚟睇吓同家人反對有關嘅幾種情況，以及我哋可以點樣成功應付呢啲挑戰。
不信嘅配偶
7．有不信配偶嘅基督徒應該點樣看待自己嘅情況？
7 聖經話，結咗婚嘅人“會身受患難”。（哥林多前書7:28）如果你有不信嘅配偶，你可能會經歷更多嘅壓力同憂慮。不過，用耶和華嘅觀點嚟睇呢件事係好重要嘅。就算你嘅配偶唔跟從基督，都唔應該成為你哋離婚或者分居嘅理由。（哥林多前書7:12-16）雖然未信主嘅丈夫唔崇拜耶和華，但佢作為一家之主，應該得到應有嘅尊重。同樣，即使有不信嘅妻子，基督徒丈夫都應該對佢流露出温情，表現無私嘅愛。（以弗所書5:22,23,28,29）
8．如果配偶限制你嘅崇拜活動，你可以問吓自己乜嘢問題？
8 如果配偶限制你嘅崇拜活動，噉可以點做呢？例如，一個姊妹嘅丈夫只係容許佢喺一個星期裏面嘅某幾日出去傳道。如果你都面對緊類似嘅情況，請問吓自己：“我嘅配偶有冇唔俾我崇拜上帝呢？如果冇嘅話，我可唔可以作出讓步，接受佢嘅要求呢？”通情達理嘅態度可以幫助你避免不必要嘅家庭糾紛。（腓立比書4:5）
9．你可以點樣教導仔女尊重你未信嘅配偶？
9 如果你有不信嘅配偶，噉喺教導仔女方面就更加唔容易嘞。例如，你要教導仔女聽從聖經嘅吩咐：“要尊敬父母”。（以弗所書6:1-3）不過，如果你嘅配偶冇跟從聖經崇高嘅道德標準，噉又點呢？你都應該以身作則，帶頭尊重你嘅配偶。你可以留意配偶嘅優點，俾佢知道你好感激佢。要避免喺仔女面前講配偶嘅壞話。反而，要向佢哋解釋，每個人都應該自己決定事唔事奉耶和華。仔女嘅好品行可能會吸引你不信嘅配偶接受真理。
揸緊機會教導仔女聖經真理 （請睇第10段）
10．喺不信配偶嘅影響下，基督徒可以點樣教導仔女聖經真理？
10 有時，不信嘅配偶會要求仔女參與異教嘅慶祝活動，或者教仔女一啲錯誤嘅宗教道理。有啲不信嘅丈夫可能會禁止妻子教仔女聖經。即使係噉，基督徒妻子仲係會盡己所能教導仔女聖經真理。（使徒行傳16:1；提摩太後書3:14,15）例如，不信嘅丈夫可能會反對妻子同未成年嘅仔女討論聖經，或者帶佢哋參加基督徒聚會。見證人妻子會尊重丈夫嘅決定，不過一有機會，仲係會向仔女分享自己嘅信仰，教導佢哋認識耶和華同佢嘅道德標準。（使徒行傳4:19,20）當然，基督徒嘅仔女喺信仰方面最終仲係要自己做選擇。（申命記30:19,20） *
反對正確崇拜嘅親人
11．乜嘢可能會使我哋同不信嘅親人之間發生矛盾？
11 起初，我哋可能冇話俾家人知我哋同耶和華見證人學習。不過，隨住信心逐漸增長，我哋睇出需要俾佢哋知道，自己好想事奉耶和華。（馬可福音8:38）如果你勇敢表明自己嘅立場而導致自己同不信嘅親人之間發生矛盾，請諗吓以下嘅一啲方法，幫助自己減少同親人嘅衝突，繼續忠於耶和華。
12．點解不信嘅親人會反對我哋？我哋可以點樣理解佢哋嘅感受？
12 理解不信嘅親人嘅感受。我哋認識聖經真理感到好興奮，但係，親人可能以為我哋俾人呃咗或者覺得我哋入咗邪教。由於我哋冇同親人一齊按照傳統慶祝節日，親人可能會覺得我哋唔再愛佢哋，甚至會擔心我哋遭受報應，有唔好嘅結果。我哋應該企喺佢哋嘅立場考慮佢哋嘅感受，留心聆聽佢哋所講嘅，明白佢哋真正嘅憂慮。（箴言20:5）為咗向唔同嘅人分享好消息，使徒保羅盡力理解各種各樣嘅人，“對點樣嘅人，［佢］就做點樣嘅人”。我哋都可以效法保羅，嘗試理解家人嘅感受，或者可以揾到方法幫助佢哋認識真理。（哥林多前書9:19-23）
13．我哋應該點樣同不信嘅親人溝通？
13 用温和嘅態度嚟溝通。聖經話，“你哋講說話應該總係仁慈體貼”。（歌羅西書4:6）我哋可以求耶和華賜神聖力量，幫助我哋同親人溝通嘅時候能够表現神聖力量嘅果實。就算親人喺信仰方面有錯誤嘅觀點，我哋都唔需要逐一同佢哋爭詏。如果佢哋喺言行方面傷害咗我哋，我哋可以效法使徒嘅榜樣。保羅話：“俾人侮辱，我哋就祝福；俾人迫害，我哋就忍耐；俾人誹謗，我哋就温和回應。”（哥林多前書4:12,13）
14．保持良好嘅品行可以得到乜嘢益處？
14 保持良好嘅品行。雖然温和嘅言語有助於應對親人嘅反對，但其實，良好嘅品行更加有效。（請讀彼得前書3:1,2,16）通過我哋嘅榜樣，親人可以睇出，耶和華見證人享有快樂嘅婚姻，悉心照顧仔女，過住道德潔淨、心滿意足嘅生活。就算佢哋唔接受真理，我哋都可以因為自己嘅良好品行令耶和華歡喜，而得到喜樂。
15．我哋可以點樣提前做好計劃，應付一啲可能會引發衝突嘅情況？
15 提前做好計劃。要預先諗吓乜嘢情況會引發衝突，同埋點樣去應對。（箴言12:16,23）一個嚟自澳大利亞嘅姊妹話：“我先生嘅爸爸對真理好反感。喺聯繫佢之前，先生同我會一齊禱告，求耶和華幫助我哋，喺爸爸發嬲嗰陣都能够保持冷靜唔駁嘴。我哋會預先諗好講啲乜嘢，噉樣可以保持和睦嘅氣氛。我哋亦都會定好要傾幾長時間，噉樣就可以避免因為傾太耐而傾到宗教問題，結果發生爭詏。”
16．你可以點樣克服因為令親人唔開心而産生嘅内疚感？
16 當然，想同不信親人完全冇衝突係唔可能嘅。同親人發生衝突可能會令你覺得内疚，因為你愛自己嘅親人，同埋一直都努力想令佢哋開心。如果你有噉嘅感覺，就要努力將你對耶和華嘅忠貞睇得比對家人嘅愛更重要。噉樣做，就有可能幫助你嘅親人睇出，事奉耶和華係好重要嘅。無論點都好，要記住你唔能够强迫其他人接受真理。相反，應該俾佢哋睇到，你按照耶和華嘅方式生活得到乜嘢益處。仁愛嘅上帝俾機會我哋選擇自己嘅人生路，同樣佢都會俾機會我哋嘅親人選擇要唔要事奉佢。（以賽亞書48:17,18）
如果家人離棄耶和華
17,18．如果家人離棄耶和華，乜嘢可以幫助你應付悲痛？
17 如果家人俾會衆開除，或者佢自己離棄真理，你個心可能好似俾刀㓤咁痛。你可以點樣應付呢種悲痛？
18 保持良好嘅崇拜習慣。為咗强化自己，我哋應該經常研讀聖經、預習聚會資料以及參加聚會、參與傳道工作，同埋禱告求上帝賜力量使我哋忍受得住。（猶大書20,21）如果你已經努力噉樣做，傷心嘅感覺仲係揮之不去，噉點算呢？千祈唔好放棄！保持良好嘅崇拜習慣可以幫助你控制情緒，保持理智。我哋嚟睇吓詩篇73篇執筆者嘅經歷。佢曾經有錯誤嘅觀點，變得非常不滿，但係佢入到聖殿之後，就改變咗自己嘅諗法。（詩篇73:16,17）你繼續忠心崇拜耶和華，同樣都可以幫助你調整自己。
19．你點樣做就係尊重耶和華嘅管教安排？
19 尊重上帝嘅管教。雖然管教喺當時會令人難過，但從長遠嚟睇，耶和華嘅安排能够為所有人，包括犯過者，帶嚟最好嘅結果。（請讀希伯來書12:11）例如，耶和華吩咐我哋 “唔好再同［嗰啲唔肯悔改嘅人］來往”。（哥林多前書5:11-13）雖然我哋嘅心好難過，但係我哋要避免通過電話、短信、書信、電子郵件、聊天軟件或者社交網站同被開除嘅家人有不必要嘅聯繫。
20．我哋可以持守乜嘢希望？
20 持守希望。愛能够“凡事希望”，呢個包括盼望嗰啲離棄耶和華嘅人將來會返翻真理。（哥林多前書13:7）如果你睇到一啲迹象顯示家人回心轉意，就應該禱告求耶和華使家人可以從聖經得到力量，回應上帝嘅呼召：“返嚟我呢度啦”。（以賽亞書44:22）
21．如果你因為跟從耶穌而受到家人反對，應該點樣做？
21 耶穌話，如果我哋將任何人睇得比佢更重要，我哋就配唔上佢。耶穌深信，就算面對家人反對，門徒都有勇氣保持忠貞。如果你因為跟從耶穌而為家庭帶嚟“刀劍”，就要信賴耶和華可以幫助你成功應付挑戰。（以賽亞書41:10,13）知道自己付出嘅努力會令耶和華同耶穌嘅心歡喜，而且佢哋會因為你嘅忠心而獎賞你，可以幫助你繼續保持喜樂。
