1, 2. (a) Gini zereda rengbe ani kadu na ni awere? (b) Ginipai nasa gupai nga ka ani dunga na nyenye zereda awere ya? (Oni bi gu sura duti tonatonaha.)

ANI dunduko naida zezeredi raka nga gu adunga na bakabangirise rogoho ya. Nairiwo gu tambuahe du ani na ni nga Yekova nafu “gu zereda nga ga Mbori” furani, nga gu zereda rengbe ka banda rani be gbegberẽ aberã! (Frp. 4:​6, 7) Mbiko gupai nga ani aima kpara tirani fu Yekova, ‘ani zezeredi a na Mbori,’ naida ka ya ani na wene pagume na ko.​—Rom. 5:1.

² Ono tie, regbo ata danga fu Mbori ko ye na nyenye zereda te. Gi kere yangara areme re ima hi be atagbagapai na badungu aboro nga amangi gbegberẽ apai. (2 Tim. 3:​1-4) Wangia ani aKristano, si naida ani sovura nga ga toro kuti Satana gbiati agu aziree yugopai ko akusaha. (2 Kor. 10:​4, 5) Ono gupai rengbe ka gberesapa gaani zereda ni kerehe nga sogote be agu agumerani angianga airisi Yekova ya. Agu akurayo ima rengba ka sawia gaani aida, ka kitangbanga rani nga ani naye na kparakaro ku kporo watadu ka serekpo rani nga ka ani ambunga iriso Yekova ya, i nika do rani kindi kporo. Wai du si aida ani naabi gu sogote naye be aborokporo? Wai du rengbe ani kadu na diabese rogo agu akpakarapai yo si aye na ni?

3, 4. (a) Gini maapai kurii du ga Yesu ayugopai na ni? (b) Gini regbo rengbehe kadu ni mbumbuhe ka pekafuo Yesu?

³ Yesu aima ino gupai nga gako ayugopai nika kparaka aboro akparaka na si nika ida agu aboro napeka ko du na wingbaduse tipa kaa pekako kindi ho i agbiatiyo ni na sogote. Gi sogote re aima rengba ka gberesapa gu zezeredi pagume nga ga aborokporo. Yesu aya: “Ka oni bérẽ nga ha ya mi aye ka maa zereda zegino ya; mi aye nga ka maa zereda te, ono kina baso! Bambiko mi aye ka maa kangu dagba ba gude na wirini, na dagba degude na nani, na dagba de na nakumbari; avura boro angia kina gani aborokporo.”​—Mt. 10:​34-​36.

⁴ Ho Yesu aya ni wẽ, ‘Ka oni bérẽ nga ha ya mi aye ka maa zereda ya,’ gupai ko aaida ka pehe nga si aaida kura apefuoko berẽpa asangbana peka fuoko. Gako pangbanga aima rengba ka kparaka aboro. Rengo ngaha nga, gupai Yesu aaidaha nga ka takapande gu ga Mbori pangbanga nga ga rengo, angianga ka gberesapa gu pagume nga ga aborokporo ya. (Yo. 18:37) Ono wa si avura duwo, nye ni ruruse kuti agu ayugopai nga ga Yesu aima rengba kadu ni mbumbuhe ka si du nga mbembedi abakurea boro watadu gani aborokporo aidanga na rengo te.

5. Gini apai apefuo Yesu nagbiatiyo na ni?

⁵ Yesu ape gupai nga sogote be aborokporo nga pai sa dagba agu apai yo si aida apefuoko hi he. (Mt. 10:38) Tipa ka fu ngbarago fu Yesu, gako abawiriki ima hipai ho gayo aborokporo asawia yo ni watadu ho i ado yo ni kporo a. Ono wa vura duhe wo, i ima gbia dungu ahe kisusi agu i nazanga ha.​—Oni gedi Marako 10:​29, 30.

6. Ginipai si aida ani tingidihe ka si du nga agumerani nasoga rani mbiko gupai nga ani nairiso Yekova?

⁶ Zavura ho agumerani asoga rani ni mbiko gupai nga ani nairiso Yekova, ani nakpinyemu yo kindi, ono si naida ani tingidi gupai nga gaani nyemuse tipa Mbori gbiati Kristo naye mbata. (Mt. 10:37) Si naida ani tingidi gupai a nga Satana ima rengba ka mangasunge na gaani nyemuse tipa gaani aborokporo tipa ka gberesa pa gaani padu ni ruruse. Ani furanga tipa kura apai awere nga gu nabipa gu sogote naye be aborokporo na ki bi wai rengbe ani ka diabe agu akpakarapai si aye na ni.

7. Wai du si aida agu aboro adunga gayo abadiarogatise ni ndikidi aidipase ya naabi gupai du yo rogoho?

⁷ Ziazia Kekeapai nape gupai nga agu aboro namanga rogatise, “pai afúda boroyo afuda.” (1 Kor. 7:​28) Ka si du nga gamo badiarogatise nga ndikidi idipase te, mo ima rengba ka gbiatiro na dungu fudifudiapai gbiati abakabangirise rogo gamo rogatise yo kisusi. Ono wa vura duhe wo, si ni nyanyakipa pai foro mo naabi gupai du mo rogoho wa gu Yekova abihe. Zanga du gamo badiarogatise na nyemu ka pekafuo Yesu nga ndikidi ndupai tipa oni kparaka watadu oni mbu tironi te. (1 Kor. 7:12-16) Wa vura duhe nga gu kumbakudee angianga ndikidi idipase ya arengbanga kaa ngbembatayo rogo agu apai nga ga toro te, si naida i nairisa ko airisa mbiko padu ko ni barii aborokporo. Wakina gure a, gu diakumba angianga ndikidi idipase ya, si naida gu kumbani nga Kristano naayugo nyemuse ayugo furi na kini ngerefuo ri.​—Ef. 5:​22, 23, 28, 29.

8. Gini asanahe rengbe mo ka sana tiro na ni ka si du nga gamo badiarogatise naasada ka umbasi gu regbo mo adiaha kuti agu apai nga ga iriso Yekova?

⁸ Na ka si du nga gamo badiarogatise naasada ka umbasi gu regbo mo adiaha kuti agu apai nga ga iriso Yekova? Ni kpiapai, kumbaku kura wirina sa ape gupai furi nga ri naandu gene tungusapai yo kina rogo kura bete aˈuru. Ka mo bi tiro rogo ngbatungapai wa gure, si naida mo sana tiro nga: ‘Ya mo gimi badiarogatise naya aya fere wẽ mi mbu iriso Yekova? Ka ngia wo duhe te, ya mo si naida mi gi gupai ko apehe?’ Du na ruru berã ima rengba ka undo ro mo ne kura bete akpakarapai nga ga rogatise.​—Frp. 4:5.

9. Wai du rengbe aKristano ka yugopai fu awiriyo i naairisa gu vungugude angianga ndikidi idipase ya?

 ⁹ Raba agude ima rengba kadu ni mbumbuhe ka si du nga gamo badiarogatise nga ndikidi idipase te. Ni kpiapai, si naida mo yugupai fu awiro i naairisa gu rugute nga ga Ziazia Kekeapai naya: “Mo írisi bamo na namo.” (Ef. 6:​1-3) Ono na ka si du nga gamo badiarogatise apekanga fuo agu arugute nga ga Ziazia Kekeapai nibipa sino mangaapai te? Mo moi wene kpiapai ni irisa mo gamo badiarogatise. Mo naagbeberã ro kuti gani wene asino, na kini fu tambuahe funi. Si aidanga mo naapeka gbegberẽ afugo bara gamo badiarogatise ku bangiri awiro te. Kuba gure, mo saki gupai fuyo nga ai boro si aida ni sia singia ni naida ka iriso Yekova. Ga agude wene sino mangaapai ima rengba ka ye na gu vungugude angianga ndikidi idipase ya ku rogo ndikidi irisombori.

10. Wai rengbe agu avunguagude nga aKristano ka yugo gu rengo nga ga Ziazia Kekeapai fu awiriyo rogo gu kporo du na aboro rogoho na gayo apambori ni bakiakia?

¹⁰ Ti kura aregbo, agu abadiarogatise angianga ndikidi aidipase ya ima rengba ka ya awiriyo naarimiso tiyo ku rogo agu apumbo naingi ti apagano watadu i naayugo ziree aida nga ga pambori fuyo. Kura akumbakuadee ima rengba ka ya ka gu diakumba nga Kristano yugungo pai fu agude rogo Ziazia Kekeapai yo ya. Ono ka si vura duwo, si naida gu diakumba nga Kristano mangi ai gupai rengbe ri ka mangaha tipa ka yugo gu rengo nga ga Ziazia Kekeapai fu agude. (Amo. 16:1; 2 Tim. 3:​14, 15) Ni kpiapai, gu kumba du diako ni Dezire Yekova ima rengba ka ká ka ri wirikinga Ziazia Kekeapai na rukutu awiiri ya watadu ka ri ndunga na yo tipa agu adunguratise nga ga aKristano ya. Wa vura duhe nga si naida ri irisi gako adiaberã airisa, ri ima rengba kaa fura kindi tipa gari ida fu awiiri  ho du momu ni, rogo gi gene re, ri kini rabayo na kini yugupai fuyo tipa Yekova. (Amo. 4:​19, 20) Rengo ngaha nga ti digidoho, awiiri du si nika ida i mangi gayo diaberã nibipa irisombori.​—Pa Rug. 30:​19, 20. *

11. Ginipai rengbe ka ye na tagbagapai dagbarani na agu agumerani angianga aDezire Yekova ya?

¹¹ Ti bambata regbo, si rengbe kadu nga ani aapenga gupai fu gaani aborokporo nga ani nakoda tirani na aDezire Yekova te. Ono tie, wa gaani idapase aasona, ani abi gupai nga si naida ani pepa gaani ida fuyo. (Mk. 8:​38) Ka si du nga gamo diaberã ka kakuti gamo ida ima ye na tagbagapai dagba ro na agu agumero angianga aDezire Yekova ya, mo bingo bete apai nga gu rengbe mo ka mangaha tipa ka zogosa bete atagbagapai na ki kakuti gamo ruru mangaapai.

12. Tipagine rengbe agu agumerani angianga ndikidi aidipase ya ka soga rani ti ni, ono wai du rengbe ani ka yugo rugatinapai tipa yo?

¹² Mo du na rugatinapai tipa agu agumero angianga ndikidi aidipase ya. Baraho rengbe ani kadu ni na bakere ngbarago tipa agu arengo nga ga Ziazia Kekeapai ani nawirikihe, agumerani tigayo rengbe kaa berãha nga aboro ima nanga rirani yo watadu ani ima rimo gu pambori nga ga agu aboro du gayo mangaapai ni kerehe. I ima rengba ka berãha nga ani akpingo nyemu yo berewe te bambiko ani airisanga auru-ongoda na yo te. I ima rengba kaa gunde a nga Mbori nika fu mbusa afu furani ho ani nika kpi ni. Si naida ani yugu gupai nga ani na rugatinapai tipa yo ni asada ani ka bi apai wai i abihe na ni dega ani turani wenengai ka ino agu apai i abakabangiriyo na ni. (Snz. 20:5) Gu mokedi nangia Pauro amangi bakere asadatise ka rugatiko na “aboro dunduko” tipa ka tungusa wene pangbanga fuyo, na kina gu bangisapai re rengbe ka undo rani a.​—1 Kor. 9:​19-​23.

13. Wai du si aida ani naafura na agu agumerani angianga ndikidi aidipase ya?

¹³ Mo naafura na zera. Ziazia Kekeapai na ya, “Oni fúra na undahe dedede.” (Koro. 4:6) Ani rengbe ka sana Yekova tipa gako ziazia toro tipa ani rengbe ka yugo azuzuhe ho ani afura ni na agumerani. Si aidanga ani naatikango na yo riipa gu gayo aida dunduko nga ga ziree pambori te. Ka si du nga i imisi rani rogo fugoyo watadu rogo mangaapai yo, ani rengbe ka wirika gu kpiapai nangia ga amokedi. Pauro akepai ki ya: “I nasenga rani, ani ki fu maku; i narungosi rani, ani ki hi he. I nagberẽsa rimorani, ani ki zungadi yo.”​—1 Kor. 4:​12, 13.

14. Gini aundo du ti kakuti wene sino mangaapai?

¹⁴ Mo kakuti wene sino mangaapai. Wa vura duhe nga zezeredi fugo naundo aundo ho ani amangapai ni na agu agumerani nasoga rani, gaani wene sino mangaapai ima rengba kadu na ome ti ni kisusi. (Oni gedi 1 Petero 3:​1, 2, 16.) Na gu kpiapai mo amaaha, si naida agumero bi gupai nga aDezire Yekova nga agu aboro nagbia ngbarago ti wene rogatise, kini ngerefuo awiriyo, na kini raki gu raka du ni gigirihe rogo mangaapai yo na kidu na rogoyo ti ni. Ka si vura du vurũ nga agumerani adianga rengo kugume te, ani ima rengba kadu na gu ngbarago naye mbiko fu ngbarago fu Yekova na gaani padu ni ruruse.

15. Wai rengbe mo ka sogima agu apai kumbatayo rengbe ka ye na tagbagapai?

¹⁵ Mo sogima pai kumbatayo. Mo berãpa agu apai rengbe ka ye na tagbagapai, na ki diberã tipa wai ka mangapai kutini. (Snz. 12:​16, 23) Wirina sa ni dee Australia yo aya: “Ba kumbami aasoga rengo ni kerehe. Mbata fu mi na kumbami yambu ko rogo terefuni ka fura na ko, ani animangi kparakpee tipa Yekova undo rani ka ani karaganga pai fuko na zinga ya ho ko azinga ni. Ani anaambakada apai nga gu ani nika fura tipaha gaani fugodagbase kidu adu ni wenehe. Tipa ka ne gbangagbanga afugo nga gu naima rengba ka ye na kere kango nibipa pambori, ani anaasia bagizo gu regbo asia ani nika diaha kuti fugo na ko.”

16. Wai du rengbe mo ka diabe gu bipai nga mo naba gberãrago ti agumero?

 ¹⁶ Rengo ngaha nga, mo arengbanga ka ne atagbagapai dunduko dagbaro na agu agumero angianga ndikidi aidipase ya te. Agu atagbagapai re ima rengba ka saro mo naabihe wa ka i ya mo du nga ingahe, gbe bambiko mo ima kpinyemu agumero na mo naasada ti aregbo dunduko ka sa ngbarago tiyo. Ka mo aabi tiro wa gure, mo mangi asadatise ka maa gamo padu ni ruruse fu Yekova mbatayo fu gamo nyemuse tipa gamo aborokporo. Manga mo ho wo ima rengba ka undo agumero i bi gupai nga mangapai kuti gu rengo nga ga Ziazia Kekeapai ni gupai paha naima nyaka kisusi. Ka si vura du kina wai vurũ, mo tingidi gupai nga ka mo mangingo kura aboro ngbaome i idi na rengo te. Kuba gure, si naida i bi agu aundo tiro mo agbiaha ti pekafuo ga Yekova agene. Gaani Mbori nga boro nyemuse nafu momu fuyo i sia gu gene i aida ka pekafuoho a kina wai ko afu momu furani.​—Yes. 48:​17, 18.

17, 18. Ginipai rengbe ka undo ro mo du na diabese ka gamo borokporo mbu Yekova?

¹⁷ Ho i akusa gamo borokporo ni kusayo rogo dungurati watadu ho ni akpara tini ni kusayo ti dungurati, si ima rengba kadu wa ka i ya baso du i naso ro na ni. Wai du rengbe mo ka diabe gu imisiri gipai re aye na ni?

¹⁸ Mo naamanga agu apai amanga kindi nga ga toro. Mo niinyakasi tiro ni geda mo Ziazia Kekeapai dedede, ni mbakada mo agu adunguratise nga ga aKristano na kini du pati ni, na ni manga mo kparakpee tipa gu ome mo aidaha tipa ka hipai. (Yuda 20, 21) Na ka si du nga mo mangi agi apai dunduko re vurũ mo kidu kindi rogo imisiri? Ka mo runga kuho ya! Ndu kumbatayo ka manga agu apai nga ga toro kindi ima rengba ka undo ro mo dibe agu apai nafuda ro berãro yo. Oni bingo gupai naadu tipa bake Atambuahe 73. Ko asonosi iraira bipai na ko ki da ni fudifudiko gbe berãko yo, ono ko aye ki mbakadi gako aberã ho ko arimi ni ku rogo ga Mbori ba iriso. (Tam. 73:​16, 17) Iriso mo Yekova ni ruru ro ima rengba ka undo ro mo mangi kina gu bangisapai re a.

19. Wai rengbe mo ka yugo irisa tipa ga Yekova mbakadapai nga ga fu rugute?

¹⁹ Mo irisi gu rugute nga ga Yekova. Gako mbakadapai ima rengba ka ye na wene sangbanapai kumbatayo fu gu boro mangi ingaapai na fu aboro dunduko, ka si vura du vurũ nga gu rugute re ni iˈigirã ha gbe ho i afuhe afu ni. (Oni gedi AEbere 12:11.) Ni kpiapai, Yekova naruga rani nga ‘ka ani kodinga tirani’ na agu amangi gbegberẽpai aidanga ka saberãyo ya ya. (1 Kor. 5:​11-​13) Ka ani vura du vurũ na imisiri ngbadurani yo, si naida ani ne fugo na gu gaani borokporo i nakusi ni rogo dungurati kusayo rogo terefuni, kekepai rogo terefuni, keke waraga watadu rogo internet.

20. Gini maabangirise si aida ani duadu na ni kindi?

²⁰ Mo duadu kindi na maabangirise. Ga nyemuse “maabangirise . . . anyasa nga te,” kodihe na gu maabangirise nga agu aboro naima mbu Yekova nika karagatiyo akaraga fuoko. (1 Kor. 13:7) Ka mo bi gopai nga mbembedi gamo borokporo namanga ariapai, mo ima rengba ka manga kparakpee tipa ni gbia ome rogo Ziazia Kekeapai yo na ki di gu ga Yekova zungodihe kugume nga: “Mo káraga tiro kono du mi ni.”​—Yes. 44:22.

21. Ginipai si aida mo mangihe ka si du nga gamo aborokporo nasoga ro mbiko gupai nga mo napekafuo Yesu?

²¹ Yesu aya ka ani moi pa boro mbatayo fuko, ani funga ngbarago fuko te. Ono tie, ko aima du na kido nga gako abawiriki nika duadu na wingbaduse ka kakuti gayo padu ni ruruse fuko i ki vura kaa gbiatiyo vurũ na sogote be aborokporo. Ka si du nga pekafuo Yesu ima ye na “baso” ku rogo gamo ngbadimokporo, mo du na kido kuti Yekova ko undo ro mo du na diabese rogo agu akpakarapai re. (Yes. 41:​10, 13) Mo gbia ngbarago ti ino gupai nga aYekova na Yesu na ngbarago na mo na i nika fu maku afu foro tipa gamo padu ni ruruse.