YÔSEP MUT ARIMATIA A bi yi bé i het makénd ma bi lôl nye inyu kôôge ngomin Lôk Rôma bebee. Pôntiô Pilatô a bé yiba inyu nledek wé ñem. Ndi, inyu boñ le Yésu a bana majôna ma kôli, i bé sômbla le mut a bat Pilatô mim wé. Ngéda di mbéñge lelaa mam ma bi tagbe, i boma Pilatô i bi sôk bé ba ndutu ngandak kiki Yôsep a bé le a hégda. Mbus a bi yi le Yésu a nwo toi ni njel ñane sônda wé wada, Pilatô a ti Yôsep kunde i yoñ mim. Jon a bi pala ke i homa ba bi péni Yésu, tolakii ñem u bé u ngi yédék nye.​—Markô 15:42-45.

• Njee a bé Yôsep mut Arimatia?

• Mambe maada a bééna ni Yésu?

• Umbe nseñ di nla ôt mu ñañ wé?

Kaat i  Markô i  nsébél Yôsep le ‘ntipék nu lipém nu ntôñ bakéés bakeñi.’ Ntôñ bakéés u won u bé hikuu hikeñi hi bikééhene hi Lôk Yuda ha ngéda i. (Markô 15:1, 43) Jon Yôsep a bé ñéga wada mu litén jé, tel i i bé ti nye kunde i telep bisu bi ngomin Lôk Rôma. Hala a nhélés bé bés le yak Yôsep a bé ngwañ mut.​—Matéô 27:57.

Ntôñ bakéés wonsôna u bé oo Yésu. Bôt ba bé sal mu, ba bi ôô jimb inyu nol nye. Ndi ba bé sébél Yôsep le “loñge mut ni mut a téé sép.” (Lukas 23:50) Maselna ni bôt ba bé sal ni nye, a bé mut maliga, ni maboñok malam, a boñok biliya i noñ mambén ma Djob. U héya hala, “a ba bem Ane Nyambe,” hala a ntoñol inyuki a yila nnigil Yésu wada. (Markô 15:43; Matéô 27:57) I nene le a bé gwés miñañ mi Yésu inyule maliga ni telepsép bi bé nseñ ngandak i mis mé.

Yôhanes 19:38 a nkal inyu Yôsep le “a ba nnigil Yésu, ndi nditi inyu woñi Lôk Yuda.” Kii Yôsep a bé kon woñi? A bé yi le Lôk Yuda i bé oo Yésu, ni le ba bé ba pémés nu ni nu a bé hémle Yésu ndap yap likoda. (Yôhanes 7:45-49; 9:22) I pémés mut likoda jap i bé kobla le ba bé oo nye, ba keñglege nye, ini Lôk Yuda ipe i bé bagal nye. Jon Yôsep a bé kon woñi i pahal hémle yé i mbamba. Ibale a boñ hala, ki a bi nimis tel yé ni lipém jé.

Yôsep a bé bé nyetama i boma ndutu i. Inoñnaga ni kaat Yôhanes 12:42, “ngandak baane i hémle yaga nye, ndi ba ba pahal bé hala inyu Farisai, le ba tiga le ba héya bo ntôñ.” (Yôhanes 12:42) Mut numpe nu a bi boma nlélém jam, a bé Nikôdémô, yak nye a bé ntipék wada i ntôñ bakéés.​—Yôhanes 3:1-10; 7:50-52.

To hala kii Yôsep a bé nnigil, a bé la bé pahal hala i mbamba. Hala a bé ndutu ngandak, téntén inyu ini njom Yésu a bi ti: “Hala nyen hiki mut a mpahal me bisu bi bôt, yak me m’a pahal nye bisu bi Tata nu a yé ngii. Ndi tonjee a ntañba me bisu bi bôt, yak me m’a tañba nye bisu bi Tata nu a yé ngii.” (Matéô 10:32, 33) Yôsep a bi tañba bé Yésu, ndi a bi bana bé to makénd i pahal hémle yé. Lelaa inyu yoñ?

Inyu bégés Yôsep, Bibel i nkal le a nit bé jimb li, ntôñ bakéés bakeñi u bi ôô inyu nol Yésu. (Lukas 23:51) Kiki bôt bahogi ba nkal, i nene le Yôsep a bé bé minkaa mi Yésu. To kii i léña, Yôsep a  bé lama nôgda njôghe bisu bi ngitelepsép i​—ndi a bééna bé njel i héñha mam!

Ngéda Yésu a bi wo, Yôsep a bi yémbél woñi wé, a kit le a nit bana banigil ba Yésu bape. Makidik ma a bi yoñ, ma nene mu bibuk di nléba i kaat Markô 15:43: “A kandal nyuu, a ke yak Pilatô, a yét mim Yésu.”

I mpôna le Yôsep a bé a téé ha ngéda Yésu a bi wo. Inyu hala nyen a bi bôk a yi le Yésu a nwo, ilole Pilatô a nyi hala. Jon, ngéda Yôsep a bi bat mim wé, ngomin “a hel le a nhoo wo.” (Markô 15:44) Ibale Yôsep a bi ba toi ha ngéda Yésu a bé hoñgoo i kék njiiha, baa yom a bi tehe i bé bé le i tihba kiññem yé kayéle hala a tinde nye i yoñ bitelbene i yiba kiki nnigil Yésu? I nla ba hala. Tole a bé bebee ha ngéda i, i boñ hala. A bé sôô ha bé libak jé li nnigil.

Mbén i Lôk Yuda i bé kal le, baboñbéba ba ba bi kôs kogse i nyemb ba bé lama juba ilole hiañga hi nañal. (Ndiimba Mbén 21:22, 23) Ndi inyu Lôk Rôma, mim mi bibéba bi bôt, mi bé mi bol ha i kék, tole ba bé ba lep nwo ikété soñ i ngandak bôt. Ndi Yôsep a bé gwés bé le hala a bôña inyu mim u Yésu. A bé a gwé soñ yondo ha ipañ. Mut a bé ngi juba mu hôk liaa i, hala a ñunda le Yôsep a bé a ma tip bol  i Yérusalem, a lôlak i Arimatia *, ni le a bé sômbôl gwélél soñ i inyu jô bôt bé ba lihaa. (Lukas 23:53; Yôhanes 19:41) I jô Yésu ikété soñ het nyemede a bé lama juba i mbus ngéda, i bé unda toi le Yôsep a bé mut a nkap, ni ki le hala a bi yônôs mbañ le Mésia a bé lama juba “lôñni ngwañ mut.”​—Yésaya 53:5, 8, 9.

Bikaat bi-na bi bisu bi Bitilna bi hop Grikia bi nkal le mbus Yôsep a héya mim i kék, a bi léb wo ni puba mboñ, a niñi wo i soñ yé. (Matéô 27:59-61; Markô 15:46, 47; Lukas 23:53, 55; Yôhanes 19:38-40) Ndik Nikôdémô nyetama nyen ba nkal le a bi hôla Yôsep, a somb binunumba inyu majôna. Kiki bôt bana bo-ba ba bé bañga bôt, i mpôna le bomede bé bon ba bi héya mim. Ba bé lama sébél bagwélél bap inyu begee mim ni jô wo. To ibale ba bi gwélél bagwelnson bap, bôlô i bo-ba ba bi sal i bé bé sii jam. Mut nye ki nye a bé tihba mim u mut binam, a bé nyega inyu dilo disaambok, i bak le to imbe yom a bé tihba i bé nyega. (Ñañga Bôt 19:11; Hagai 2:13) I nya mut i, i bé lama yén haa ni bôt bape ngéda ngand i sonde Pasa yosôna, a bé lama bé yoñ ngaba ni kii yosôna i bé lama tagbe mu dilo ti. (Ñañga Bôt 9:6) Bôñha majôna ma Yésu, i bé boñ le mawanda ma bôlô ma Yôsep ma bôdôl yahal nye. Ndi, ha ngéda i, a bé bebee i neebe bikuu inyule a jô Yésu i nya i kôli, a yiba kiki nnigil wé wada.

U héya jam bikaat bi-na bi bisu bi Bitilna bi hop u Grikia bi nkal inyu majôna ma Yésu, Bibel i mpôdôl ha bé Yôsep nu Arimatia, hala a mboñ le di badba le: Kii a bi yila? Ndimbhe i yé le, di nyi bé. Inoñnaga ni yom di mbôk kal, di kôli hoñol le a bi sôk pahal i mbamba le a bé kristen. Ngéda a bi boma manoodana, hémle ni makénd mé bi bi kônde nañ iloo le bi sôs. Hala a bé yimbne ilam.

Ñañ unu u ntinde bés bobasôna i tibil wan ngim mbadga: Baa yom yo ki yo i nla ba​—kiki bo tel yés, bôlô yés, nkus wés, gwéha inyu lihaa jés, to kunde yés​—i di nti mahee iloo maada més ni Yéhôva?