ИОСИФ, Аримафея ҫынни, хӑюлӑх ҫитерсе Понтий Пилат патне каясси пирки шутламан та пулӗ. Ҫак Рим пуҫлӑхӗ пирки питӗ кутӑн ҫын пулнине пурте пӗлнӗ. Анчах та Иисуса тивӗҫлӗн пытарас тесен камӑн та пулин Пилатран Иисусӑн ӳтне илме ирӗк ыйтмалла пулнӑ. Иосиф питӗ пӑшӑрханнӑ пулӗ. Тӗлӗнмелле те, пуҫлӑхпа вӑл лайӑхах тӗл пулса калаҫнӑ. Пилат салтаксен пуҫлӑхне чӗнсе илнӗ те Иисус вилнӗ-и тесе ыйтнӑ. Вара Иосифа унӑн ӳтне илсе кайма ирӗк панӑ. Иосиф йывӑр кӑмӑлпа Иисуса пӑталанӑ вырӑна васканӑ (Марк 15:42—45).

• Аримафея ҫынни Иосиф кам пулнӑ?

• Ӑна Иисуспа мӗн ҫыхӑнтарса тӑнӑ?

• Унӑн тӗслӗхӗ пире мӗншӗн интереслентермелле?

Евангели ҫыракан Марк Иосиф пирки «иудейсен канашӗнчи хисеплӗ ҫын» тенӗ. «Канаш» тенӗ сӑмах Синедрион текен аслӑ суда пӗлтерет. Ҫав суд вӑл вӑхӑтри иудейсен пурнӑҫӗ ҫине тата Турра пуҫҫапасси ҫине пысӑк витӗм кӳрсе тӑнӑ (Марк 15:1, 43). Апла пулсан, Иосиф хӑйӗн халӑхӗн ҫулпуҫӗсенчен пӗри пулнӑ тата, тен, шӑпах ҫавна пула вӑл Рим пуҫлӑхӗпе тӗл пулса куҫа-куҫӑн калаҫма пултарнӑ. Ҫавӑнпа Иосиф пуян ҫын пулни те тӗлӗнтермест (Матф. 27:57).

Пӗтӗмӗшле илсен Синедрион ҫыннисем Иисуса хирӗҫ пулнӑ, вӗсем ӑна вӗлерме кавар тунӑ. Анчах та Иосиф пирки Библире «тӳрӗ те ырӑ ҫын» тенӗ (Лука 23:50). Синедрионта ларакансенчен ытларахӑшӗпе танлаштарсан, Иосиф нравственность нормисем тӑрӑх пурӑнакан тӳрӗ кӑмӑллӑ ҫын пулнӑ тата Туррӑн саккунне пурнӑҫлама тӑрӑшнӑ. Вӑл «Турӑ Патшалӑхне» кӗтнӗ, ҫавӑнпа Иисусӑн вӗренекенӗ пулса тӑнӑ та пулӗ (Марк 15:43; Матф. 27:57). Ҫӗр ҫинче чӑнлӑхпа тӳрӗлӗх пуласса чун-чӗререн кӗтнӗрен пулӗ ӑна Иисус каланӑ хыпар интереслентернӗ.

Иоанн 19:38-мӗшӗнче Иосиф Иисусӑн вӗренекенӗ пулнӑ пулин те «иудейсенчен хӑранипе ҫакна палӑртман» тенӗ. Вӑл мӗнрен хӑранӑ-ши? Иудейсем Иисуса ним вырӑнне те хуманнине Иосиф пӗлнӗ. Вӗсем Христоса ӗненетӗп тесе калакана кирек кама та синагогӑран кӑларса яма хатӗр пулнӑ (Иоанн 7:45—49; 9:22). Ҫавӑн пек ҫынран хӑй халӑх ҫыннисемех тӑрӑхласа кулнӑ тата унран йӗрӗннӗ. Акӑ мӗншӗн вӑл Иисусӑн вӗренекенӗ пулни ҫинчен уҫҫӑн калама хӑяйман, каласан вӑл ҫав самантрах хӑйӗн влаҫне тата авторитетне ҫухатма пултарнӑ.

Ҫакӑн пек ҫӑмӑл мар лару-тӑрура Иосиф кӑна пулман. Иоанн 12:42-мӗшӗ тӑрӑх, «Иисуса пуҫлӑхсем те нумайӑшӗ ӗненнӗ, анчах та вӗсем, фарисейсем синагогӑран уйӑрса ярасран шикленсе, хӑйсем ӗненнине палӑртман». Ҫавӑн пек лару-тӑрӑвах Синедрионра ларакан тепӗр ҫын Никодим та лекнӗ (Иоанн 3:1—10; 7:50—52).

Иосиф Иисусӑн вӗренекенӗ пулнӑ, анчах та ҫавӑн ҫинчен ыттисене пӗлтерме хӑюлӑх ҫитереймен. Ҫакӑ уншӑн пысӑк йывӑрлӑх пулнӑ, мӗншӗн тесен Иисус каланӑ: «Кам хӑй Мана ӗненни ҫинчен ҫынсем умӗнче каласа пӗлтерет, Эпӗ те Ҫӳлти Аттем умӗнче ун ҫинчен каласа пӗлтерӗп. Кам ҫынсем умӗнче Манран тунать, Эпӗ те Ҫӳлти Аттем умӗнче унран тунӑп» (Матф. 10:32, 33). Иосиф, паллах, Иисусран тунман, анчах ӗненетӗп тесе калама та ӑна хӑюлӑх ҫитменни уҫҫӑн курӑнать. Эсир ун вырӑнӗнче пулнӑ пулсан хӑвӑра мӗнле тытнӑ пулӑттӑрччӗ?

 Библире Синедрион Иисуса хирӗҫ кавар тунӑ чухне Иосиф хутшӑнман тенӗ (Лука 23:51). Хӑшӗ-пӗрисем шутланӑ тӑрӑх, Иисуса суд тунӑ чухне Иосиф унта пулман. Кирек мӗнле пулнӑ пулсан та, Иосиф ҫавӑн пек тӗрӗсмарлӑха курса хытӑ куляннӑ, анчах вӑл ним тума та пултарайман.

Иисус вилнӗ тӗлнелле Иосиф хӑранине ҫӗнтерсе Христосӑн вӗренекенӗ пулса тӑма татӑклӑ йышӑну тунӑ курӑнать. Марк 15:43-мӗшӗнче каланӑ: «Иосиф... Пилат патне кӗрсе Иисус Ӳтне ыйтма хӑйнӑ».

Иосиф Пилат патне килсе Иисус вилни ҫинчен каласан лешӗ тӗлӗннӗ (Марк 15:44). Апла пулсан Иисус вилни ҫинчен Иосиф Пилатран маларах пӗлнӗ, ҫавӑнпа та Иисус вилсе кайнӑ чухне вӑл ҫавӑнта пулнӑ пулӗ. Иосиф Иисус юпа ҫинче асапланнине курма пултарнӑ. Тен, ҫакӑ ӑна хӑйӗн пурнӑҫӗ ҫинчен шухӑшласа пӑхма тата чӑнлӑх ҫулӗ ҫине тӑма хистенӗ. Кирек мӗнле пулнӑ пулсан та, Иосиф татӑклӑ йышӑну туни курӑнать. Малашне вӑл Иисусӑн вӑрттӑн вӗренекенӗ ҫеҫ пуласшӑн пулман.

Моисей саккунӗ тӑрӑх, юпа ҫинче пӑталаса вӗлернӗ ҫынна хӗвел анса лариччен пытармалла пулнӑ (Сак. аст. 21:22, 23). Рим ҫыннисем вара ялан тенӗ пекех преступниксен ӳчӗсене ҫӗрме юпа ҫинчех хӑварнӑ е пурне те пӗр виле шӑтӑкне пытарнӑ. Иосиф Иисусӑн ӳчӗпе те ҫапла пулса ан тухтӑр тесе тӑрӑшнӑ. Иисуса пӑталаса вӗлернӗ ҫӗртен  инҫех мар унӑн ҫӗнӗ тупӑклӑх пулнӑ. Унччен унта никама та пытарман, апла пулсан Иосиф Иерусалима Аримафеяран * куҫнӑранпа нумай мар вӑхӑт иртнӗ. Ҫав тупӑклӑх унӑн ҫемйи валли пулнӑ (Лука 23:53; Иоанн 19:41). Иисуса хӑйӗн тупӑклӑхӗнче пытарса Иосиф мӗн тери ырӑ ӗҫ тунӑ! Ҫапла майпа Мессия ҫинчен «ӑна пуянӑн тупӑклӑхне пытарнӑ» тесе пророкла калани пурнӑҫланнӑ (Ис. 53:5, 8, 9).

Тӑватӑ Евангелире те Иосиф Иисусӑн ӳтне юпа ҫинчен антарса таса пирпе чӗркенӗ те хӑйӗн ҫемйин тупӑклӑхне хунӑ тенӗ (Матф. 27:59—61; Марк 15:46, 47; Лука 23:53, 55; Иоанн 19:38—40). Библире Иосифа пулӑшнӑ пӗр ҫын пирки ҫеҫ каланӑ. Ку вӑл Никодим, вӑл Иисуса пытарма хатӗрлемешкӗн ырӑ шӑршӑллӑ ҫу илсе килнӗ пулнӑ. Иосифпа Никодим ятлӑ-сумлӑ ҫынсем пулнӑран вӗсем пур ӗҫе те хӑйсем туман пулӗ. Иисуса пытарма кайнӑ чухне ӑна вӗсен тарҫисем йӑтса пынӑ пулмалла. Ҫапла пулнӑ пулсан та Никодимпа Иосифшӑн Иисуса пытарасси ҫӑмӑл ӗҫ пулман. Саккун тӑрӑх, кам та кам пӗр-пӗр вилнӗ ҫынна сӗртӗнсен, ҫавӑ ҫичӗ кун хушши таса мар пулнӑ. Унсӑр пуҫне, ҫав ҫын кирек мӗне сӗртӗнсен те, ҫав япаласем таса мар пулса тӑнӑ (Йыша шутл. 19:11; Аггей 2:13). Мӑнкун эрнинче ҫавнашкал ҫыннӑн халӑх патне ҫывхарма тата ҫав уява уявланӑ чухне нимӗнле йӑласене те тума юраман (Йыша шутл. 9:6). Унсӑр пуҫне, Иисуса пытарас ӗҫе хӑй ҫине илнӗшӗн Иосифран Синедрионра ларакансем тӑрӑхлама пултарнӑ. Анчах та ҫакӑ Иосифа хӑратман. Вӑл Иисуса чипер-йӗркеллӗ пытарасшӑн пулнӑ тата хӑй унӑн вӗренекенӗ пулни ҫинчен уҫҫӑн калама хӑраман.

Аримафея ҫынни Иосиф пирки Библире Иисуса пытарни ҫинчен каласа панӑ чухне ҫеҫ асӑннӑ. Ҫавӑнпа та ҫакӑн пек ыйту сиксе тухать: малалла Иосифпа мӗн пулса иртнӗ-ши? Хуравне пӗлместпӗр. Ҫӳлерех сӳтсе явнине шута илсен, вӑл хӑй христианин пулни ҫинчен уҫҫӑн каланӑ теме пулать, мӗншӗн тесен вӑл йывӑр самантра хӑраса ӳкмен, хӑй ҫирӗп ӗненнине кӑтартнӑ. Ҫакӑ лайӑх паллӑ.

Иосиф ҫинчен каласа пани пире пурне те хамӑртан ҫапла ыйтма хавхалантарать: «Маншӑн мӗн кирлӗрех? Обществӑра мӗнле вырӑн йышӑнни-и, карьера-и, пурлӑх-и, тӑванлӑх туйӑмӗсем-и, ирӗклӗх-и?.. Е Иеговӑпа туслӑ пулни-и?»