JOSÉ ARIMATEAGUA ndoikuaái ni mbaʼéichapa ou ipyʼaguasuete oñeʼẽ hag̃ua Poncio Pilátope. Hiʼarive entéronte oikuaa ko governadór romano ndojaposeieteha la ótro heʼíva chupe. Upéicharõ jepe, tekotevẽ kuri ojejerure chupe Jesús retekue ikatu hag̃uáicha oñeñotỹ, ojejapoháicha peteĩ persóna ojerrespetávare. José oimoʼã kuri ijetuʼutaha okonsegi hag̃ua la oipotáva, péro amo ipahápe ndaupéichai. Peteĩ ofisiál okonfirma rire Pilátope Jesús omanóma hague, haʼe omeʼẽ permíso Josépe ojapo hag̃ua la ojeruréva. Upémarõ, José pyaʼe oho pe lúgar Jesús ojejuka haguépe, jepe oñeñandu vaieterei gueteri (Mar. 15:42-45).

• ¿Mávapa rakaʼe José Arimateagua?

• ¿Mbaʼéicha rupípa haʼe oikuaa Jesúspe?

• ¿Mbaʼérepa iporãta jaikuaave chupe?

Lívro de Marcos heʼi José Arimateagua haʼe hague “peteĩ kuimbaʼe iñimportánteva oĩva Sanedrínpe”. Pe Sanedrín ningo pe trivunál iñimportantevéva orekóva umi judío (Mar. 15:1, 43). Upéicharõ, ko kuimbaʼe haʼe vaʼekue peteĩ dirihénte del puévlo. Upévare ikatu kuri ojerure permíso oñeʼẽ hag̃ua pe governadór románondi. Avei, José ipláta heta vaʼekue (Mat. 27:57).

Pe Sanedrínpe ningo enterovéva lénto oĩ vaʼekue Jesús kóntrape, haʼekuéra voi oñemoĩ kuri okalkula mbaʼéichapa ojukaukáta chupe. Péro José idiferénte chuguikuéra, haʼe “hekojoja ha imbaʼeporã” (Luc. 23:50). Avei iñonrrádo, hekopotĩ ha oñehaʼãmbaite iñeʼẽrendu Ñandejárape. José “ohaʼarõ avei Ñandejára Rréino”, oiméne upéicha rupi oiko vaʼekue chugui Jesús disípulo (Mar. 15:43; Mat. 27:57). Haʼe omombaʼetereíne raʼe pe mensáhe Jesús opredikáva, pórke hekojoja ha oheka pe añetegua.

Juan 19:38 heʼi: “José ningo Jesús disípulo vaʼekue, péro nomombeʼúi avavépe okyhyje rupi umi hudíogui”. ¿Mbaʼérepa haʼe okyhyje kuri? Pórke oikuaa porã umi judío ndochaʼeietereiha Jesúsre, ha oĩha desidído hikuái omosẽvo sinagógagui oimeraẽ osegívape chupe (Juan 7:45-49; 9:22). Umi judío ningo oapoʼi, omboyke ha ndojeheʼaveiete voi peteĩ persóna oñemosẽvare sinagógagui. José noñanimái omombeʼu ojeroviaha Jesúsre, pórke ojapóramo upéva katuete operdéta la ikárgo ha ndojerrespetamoʼãvéima chupe.

Ndahaʼéi José añónte la oĩva ko situasiónpe. Juan 12:42-pe jalee: “Umi mburuvicha apytépe jepe oĩ heta ojeroviáva Jesús rehe, péro nomombeʼúi okyhyjégui umi fariséo omosẽrõ g̃uarã chupekuéra pe sinagógagui”. Nicodemo, oĩva pe Sanedrínpe, ojecha vaʼekue avei ko situasiónpe (Juan 3:1-10; 7:50-52).

José si haʼe vaʼekue Jesús disípulo, péro noñanimái omombeʼu ótrope. Upéva ndahaʼeiete vyrorei, pórke Jesús heʼi vaʼekue: “Enterove omombeʼúva kuimbaʼekuéra renondépe haʼeha che disípulo, che avei amombeʼúta che Ru oĩva yvágape upe kuimbaʼe haʼeha che disípulo. Péro oimeraẽ onegáva chekuaaha kuimbaʼekuéra renondépe, che avei anegáta chupe che Ru yvagapegua renondépe” (Mat. 10:32, 33). Haʼe ningo ndahaʼéi onegáva Jesúspe, upéicharõ jepe ndaipyʼaguasúi omombeʼu hag̃ua haʼeha idisípulo. ¿Ha mbaʼépa ikatu jaʼe ñane situasiónre?

La Biblia heʼi José Arimateagua nomoirũi hague umi ótro kuimbaʼe oĩvape pe Sanedrínpe, oplaneárõ guare hikuái umi mbaʼe vai Jesús kóntrape (Luc. 23:51). Amalisia noĩri vaʼekue presénte ojehusgárõ  guare Jesúspe. Tahaʼe haʼeháicha, José oime vaʼerã oñeñandu vaieterei pe inhustísia ojejapo vaʼekuére, péro haʼe ndaikatúi ojapo mbaʼeve ojoko hag̃ua upéva.

Jesús omano rire, José ohechauka ndokyhyjeveimaha pórke ojedesidíma oñemoĩ Jesús segidorkuéra ládope. ¿Mbaʼérepa jaʼekuaa upeichaha? Marcos 15:43 omyesakã upéva. Upépe heʼi: “José Arimateagua oñembopyʼaguasu ha oho ojerure Pilátope Jesús retekue”.

Amalisia ningo José oĩ vaʼekue presénte Jesúspe ojejukárõ guare, ajeve haʼe raẽ oikuaa kuri upéva Pilátogui. Upéicha rupi, José ohórõ guare ojerure Jesús retekue, pe governadór “oikuaase omanómapa Jesús” (Mar. 15:44). Oimérire José ohecha raʼe mbaʼeichaitépa Jesús osufri pe yvyra pohýire, ¿omomýipa raʼe chupe upéva ikatu hag̃uáicha ojepyʼamongeta isituasiónre, ha ipyʼaguasu ojechauka hag̃ua Jesús disípuloramo? Ikatu oime oiko kuri upéva. Tahaʼe haʼeháicha, upe guive nomokañyvéima haʼeha Jesús disípulo.

Pe léi judía heʼi umi oñekondenáva a muérte oñeñotỹ vaʼerãha oike mboyve kuarahy (Deut. 21:22, 23). Umi romano katu oheja osaingo yvyráre umi delinkuénte retekue, térã oñemombo chupekuéra oñondivepa peteĩ yvykuápe. Péro José ndoipotái oiko upéva Jesúsre. Upévare haʼe oipuru peteĩ panteón imbaʼéva ojejapo vaʼekue peteĩ itakuápe, oĩva Jesús  omano hague ypýpe. Ko panteón ningo ndojepurúitiva arakaʼeve, upévare ikatu jaʼe José ova ramóne hague Arimatéagui Jerusalénpe. * Oiméne okonsegi raʼe ko lugár oñeñotỹ hag̃ua ihentekuérape (Luc. 23:53; Juan 19:41). Jahechaháicha, José ohechauka imbaʼeporãiterei hague, pórke oñotỹ Jesúspe pe lugár haʼe oñeñotỹtahápe avei. Péicha oñekumpli pe profesía oñeʼẽva Mesíasre, heʼíva oñeñotỹtaha “umi iplátava apytépe” (Is. 53:5, 8, 9).

Lívro de Mateo, Marcos, Lucas ha Juan omombeʼu mbaʼépa oiko oñemboguejýrõ guare Jesús retekue pe yvyrágui. Upérõ José oliapaite chupe téla de línope ha omoĩ pe sepultúrape (Mat. 27:59-61; Mar. 15:46, 47; Luc. 23:53, 55; Juan 19:38-40). La Biblia omensiona Nicodemo oipytyvõ hague Josépe upearã. Haʼe ogueru kuri umi pohã ñana hyakuã porãva omoĩ hag̃ua Jesús retekuére. Koʼã mokõi kuimbaʼe ningo iñimportánte vaʼekue, upévare katuete oĩne ombaʼapóva chupekuéra g̃uarã ha ogueraháva Jesús retekue upe lugár oñeñotỹ hag̃uáme. Tahaʼe haʼeháicha, haʼekuéra ojapo kuri peteĩ traváho iñimportantetereíva. Upe tiémpope, umi judío opokóramo peteĩ teʼõnguére opyta ikyʼa 7 día aja, ha avei opyta ikyʼa entéro mbaʼe opokóva hikuái (Núm. 19:11; Ageo 2:13). Haʼekuéra ojapórire upéva ndaikatumoʼãi kuri ojeheʼa umi ótro israelítare pe semána ojefesteha aja pe Páskua (Núm. 9:6). José oñenkarga rupi Jesús entiérrore, ikatu kuri umi ótro omboykéma chupe. Péro Josépe ndoipyʼapyvéima upéva, pórke oñotỹ porãse Jesúspe ha nomokañyvéima haʼeha idisípulo.

La Biblia noñeʼẽvéi José Arimateaguáre Jesúspe oñeñotỹ rire. Upévare katuete ñañeporandúne mbaʼépa oikóne raʼe chugui. Añetehápe ningo ndajaikuaái, péro umi mbaʼe jahechávare ko artíkulope jaʼekuaa José oikuaaukáne hague haʼeha kristiáno. ¿Mbaʼérepa jaʼe upéva? Pórke pe ijetuʼuve jave haʼe ipyʼaguasu ha ojeroviave, ha upéva oñeʼẽ porã hese.

José ehémplo ñanepytyvõ ñapensa hag̃ua oĩpa álgo ñamotenondevéva Jehovágui, por ehémplo ñande traváho, umi mbaʼerepy, ñane família, peteĩ puésto jarekóva térã jakyhyje jahárõ g̃uarã préso jaservi haguére Ñandejárape. Upéicharõ, ñamombaʼékena ñane amista Jehovándi, upéva hína la iñimportanteve vaʼerã ñandéve g̃uarã.