JOSEF MA JA-ARIMATHEA ne ok par ni ne en gi chir moromo mar chomo Pilato gi wach. Pontio Pilato ne en gavana ma ne locho e lo Jo-Rumi, kendo ne ong’ere kaka ng’ama tije tek ahinya. To mondo ne yik Yesu e yo maber, ne nyaka ng’ato kwa Pilato rusa mar kawo ringrene. Yo ma gik moko notimorego ka ne Josef odhi ir Pilato nyiso ni weche ne ok obedo matek ahinya kaka Josef samoro ne paro. Pilato nopenjo ofisa moro ka be Yesu nosetho adier. Ka noyudo ni ne en kamano, noyie ne Josef kawo ringre Yesu. Josef nodhi mapiyo nyaka kama nonegie Yesu, kata obedo ni pod ne en gi kuyo mang’eny nikech tho Yesu.—Mar. 15:42-45.

• Josef ma Ja-Arimathea ne en ng’a?

• En tudruok mane ma ne en-go gi Yesu?

• To ang’o momiyo ber nono gima notimo?

Injili mar Mariko wacho ni Josef ne en ‘jal ma ne omi luor e bura mar Sanhedrin’ ma ne en kot maduong’ mar Jo-Yahudi kendo kama ne itayoe weche Jo-Yahudi. (Mar. 15:1, 43) Mano nyiso ni Josef ne en achiel kuom jotelo madongo e kind Jo-Yahudi, to e momiyo ne nyalore mondo owuo gi gavana wang’ gi wang’. Kare e gin Josef ne en jamwandu.​—Mat. 27:57.

Chutho-chutho, Jo-Sanhedrin ne ok dwar Yesu. Ne gitimo chenro mondo oneg Yesu. Kata kamano, Muma wachonwa ni Josef to “ne en ng’at maber kendo makare.” (Luka 23:50) Mopogore gi thoth Jo-Sanhedrin wetene, en ne en jaratiro, timbene ne beyo, kendo notimo duto ma nonyalo mondo oluw chike Nyasaye. Bende, ‘nosebedo ka orito Pinyruodh Nyasaye.’ Nyaka bed ni mano e momiyo nobedo jalup Yesu. (Mar. 15:43; Mat. 27:57) Nyalo bedo ni weche Yesu ne more nikech ne ogombo ng’eyo adiera kendo nojaratiro.

Ndiko mar Johana 19:38 wacho ni Josef “ne en japuonjre Yesu ling’ling’ nikech noluoro Jo-Yahudi.” En ang’o momiyo noluoro Jo-Yahudi? Nong’eyo maber ni Jo-Yahudi ne ok dwar Yesu, kendo ni ng’ato ang’ata ma ne oketo yie kuom Yesu ne iriembo e sunagogi. (Joh. 7:45-49; 9:22) Ka ne oriemb ng’ato e sunagogi, Jo-Yahudi ne chayo ng’atno kendo nene kaka ng’at manono ma piny odong’go. Mano e momiyo Josef ne luor wacho ayanga ni ne oyie kuom Yesu. Ne onyalo lalo telo kod nyadhi ma ne en-go.

Nitie jomamoko mopogore gi Josef ma bende ne nigi luoro ma kamano. Ndiko mar Johana 12:42 wacho ni “jotelo mang’eny noketo yie [kuom Yesu], to ne ok ginyal hulo mano ayanga nikech ne giluoro Jo-Farisai mondo kik riembgi a e sunagogi.” Ng’at machielo ma bende ne nigi luoro ma kamano ne en Nikodemo ma bende ne en Ja-Sanhedrin.—Joh. 3:1-10; 7:50-52.

Josef to ne en japuonjre Yesu, en mana ni ne ok owacho mano ayanga. Mano ne en nyawo maduong’ nikech Yesu nowacho kama: “Ng’ato ang’ata ma hulo e nyim ji ni oyie kuoma, an bende nahul e nyim Wuora manie polo ni ayie kode. To ng’at ma kwer e nyim ji ni ok ong’eya, an bende nakwer e nyim Wuora manie polo ni ok ang’eye.” (Mat. 10:32, 33) Josef ne ok okwer ni ne ok en jalup Yesu, to bende ne ok ohulo ayanga ni ne en jalup Yesu. To nade in?

Muma wuoyo maber kuom Josef kowacho ni Josef ne ok oriwo lwedo chenro ma Jo-Sanhedrin ne nigo mar nego Yesu. (Luka 23:51) Josomo moko wacho ni chieng’ ma ne iyalo Yesu, nyalo bedo ni Josef ne onge kanyo. Ok wanyal ng’eyo sie kaka weche ne chalo ne Josef, kata kamano, gima wang’eyo en ni nyaka bed ni nowinjo marach ahinya nikech gik maricho ma ne timorego, en mana ni onge gima ne onyalo timo mondo kik neg Yesu.

Nenore maler ni chop kinde ma Yesu ne otho, Josef ne oseloyo luoro ma ne en-go, kendo noseng’ado e chunye ni ne odhi riwore gi jolup Yesu. Weche ma ni e Mariko 15:43 nyiso mano. Ndikono wacho kama kuom Josef: “Nobedo gi chir mi nodhi ir Pilato kendo nokwaye ringre Yesu.”

Nyaka bed ni Josef ne nitie sama Yesu ne otho. Kuom adier, ne okwongo ne Pilato ng’eyo ni Yesu nosetho. Mano e momiyo ka ne Josef okwayo Pilato ringre Yesu, ‘Pilato nowuoro ka be ne osetho.’ (Mar. 15:44) Ka Josef ne oneno ka Yesu tho malit e yadh-sand, be dibed ni mano e ma ne ochuoyo chunye mi oyiero chung’ kor adiera? Nyalo bedo kamano. Kendo koro ne oikore nyiso yiene ayanga. Koro ne ok onyal dhi nyime bedo jalup Yesu ma aling’ling’.

Chik Jo-Yahudi ne dwaro ni joma oneg nikech ong’adnegi buch tho oyik ka pok chieng’ opodho. (Rap. 21:22, 23) Jo-Rumi to ne timo mopogore. Ka ne gisenego joma kamago e wi yath, ne giweyogi mondo gitow kuro, kata ne giwito ringregi e bur moriwie ji mang’eny. Josef ne ok dwar ni jogo otim ringre Yesu kamano. Josef ne nigi bur moro ma nosekunyo e kor lwanda kama ne ok bor ahinya gi kama nonegie Yesu. Burno ne pod nyien kendo pok noyikie ng’ato ang’ata. Mano nyiso ni kinde ne pok okalo ahinya nyaka ne Josef a Arimathea * kodhi  dak Jerusalem. Nyaka bed ni nodwaro ni burno obednegi kar yik ka po ni ng’ato ang’ata otho e odgi. (Luka 23:53; Joh. 19:41) Mondo Josef ne chiwre yiko Yesu e bur ma kamano, mano nyiso ni ne ok en ng’ama ngudi. Gima notimono nochopo weche ma ne okor e wi Mesia ni ne idhi yike gi “jopith,” tiende ni jomwandu.​—Isa. 53:5, 8, 9.

Buge ang’wen duto mag Injili wacho ni ka ne osegol ringre Yesu e wi yath, Josef nokawe moboye gi law kitani maler kendo maber ahinya, mi nokete e liel ma mare owuon. (Mat. 27:59-61; Mar. 15:46, 47; Luka 23:53, 55; Joh. 19:38-40) Ng’ato achiel kende ma Muma wacho ni nokonyo Josef e loso ringre Yesu ne yik ne en Nikodemo ma nokelo gik ma golo suya mamit mondo tigo e loso ringre Yesu. Nikech Josef gi Nikodemo ne gin jotelo e kind oganda, nyaka bed ni ne ok giting’o ringre Yesu gin giwegi. Kar mano, nenore ni jotijgi e ma ne giketo mondo oting’ ringreno kendo soye e bur, ka gin to gitayo jogo. Bed ni ne gitiyo gi jotich e yiko Yesu kata ooyo, okang’ ma Josef gi Nikodemo nokawo mar neno ni ringre Yesu oyik maber ne ok en wach matin. Ka luwore gi chik Jo-Yahudi, ng’ato ang’ata ma ne omulo ringre ng’at motho ne bedo ma ok ler kuom ndalo abiriyo, kendo gimoro amora ma ne ginyalo mulo bende ne bedo ma ok ler. (Kwan 19:11; Hag. 2:13) Mano ne dhi miyo ok giriwre gi ji e jumb nyasi mar Pasaka. (Kwan 9:6) E wi mago, Jo-Sanhedrin bende ne nyalo chako chayo Josef kata jare nikech yiko Yesu. To e ma Josef noyie yiko Yesu maber kendo wacho ayanga ni ne en japuonjrene, kata obedo ni nong’eyo maber ni timo mano ne dhi kelone pek moko.

Bang’ ka ne oseyik Yesu, Muma ok mul wach Josef ma Ja-Arimathea kendo. Mano miyo wapenjore penjoni: Ang’o ma notimorene bang’e? Adiera en ni wakia. Kata kamano, ka luwore gi gik ma wasewuoyoe e sulani, nyaka bed ni ne odhi nyime nyiso ayanga ni ne en Jakristo. Wanyalo wacho kamano nikech kaka weche ne medo bedo matek e kaka yiene kod chir mare bende ne siko ka medore. Mano nyiso ni ne ok yot mondo odog chien kendo.

Siganani onego omi ng’ato ka ng’ato kuomwa openjre niya: Be dibed ni nitie gimoro amora​—obed tich, migawo moro, mwandu, joot, kata bedona thuolo e yo moro amora​—ma aneno kaka gima duong’ moloyo winjruokna gi Jehova?