JOSEP JÃN ARIMATIA ear jab jel̦ã ke enaaj kar peran in kepaake kabna eo an Rom. Armej rar jel̦ã bwe Pontiõs Pail̦at ekar juon eo epen bũruon. Ijoke, bwe ren kalibwini Jesus ilo wãween eo em̦m̦an im ekkar ñan m̦anit, ej aikuj kar wõr juon ej kajjitõk ippãn Pail̦at kõn ãnbwin eo. Ak ke Josep ear jãdel̦o̦k im̦aan mejãn Pail̦at im kajjitõk, ear jab lukkuun pen ãinwõt an kar kõtmãne. Ãlikin an kar Pail̦at kam̦oole jãn juon iaan rũttarin̦ae ro bwe em̦õj an Jesus mej, ear kõtl̦o̦k an Josep bõke ãnbwin eo. Innem Josep ear m̦õkajl̦o̦k im bõk ãnbwin eo meñe ear bũrom̦õj im eddo bũruon.​—Mark 15:42-45, UBS.

• Wõn in kar Josep jãn Arimatia?

• Etke ear jel̦ã kajjien Jesus?

• Etke jekõn̦aan jel̦ã kõn bwebwenatoon Josep?

Bokin Mark ej kwal̦o̦k bwe Josep ear “juon iaan ruutiej” ro ak council ro ilo Im̦õn Ekajet eo el̦ap an Riju. (Mark 15:1, 43, UBS) Innem Josep ear juon iaan rũtõl ro an RiJu ro. Eñin unin emaroñ kar jãde im̦aan kabna eo an Rom. Bareinwõt, Josep ear juon rũm̦weiie.​—Matu 27:57, UBS.

Enañin aolep rũtõl ro ilo Im̦õn Ekajet eo el̦ap an RiJu ro rar lukkuun kõjdate Jesus. Rar kajjioñ in kõm̦m̦an ruon Jesus im pukot kilen bwe en mej. Ak Josep ear juon “armej em̦m̦an im wãnõk.” (Luk 23:50) Ear oktak jãn rũtõl ro jet ilo Im̦õn Ekajet eo kõnke ear juon eo em̦ool im jim̦we an mour. Im ear kate joñan wõt an maroñ ñan pokake kien ko an Anij. Ear bareinwõt kõjatdikdik kõn “itok eo an Aelõñ eo an Anij.” Eñin unin Baibõl̦ ej ba bwe ear juon iaan rũkal̦oor ro an Jesus. (Mark 15:43, UBS; Matu 27:57, UBS) Ealikkar bwe ear reel kõn katak ko an Jesus kõn an kar kõn̦aan bwe en wõr ekajet jim̦we im m̦ool.

Ilo Jon 19:38 (UBS) ej ba bwe “Josep ekar rũkal̦ooran Jesus, ak ilo ittino kõn an mijak RiJu ro.” Ta eo Josep ear mijake? Ear jel̦ã kõn an RiJu ro kar kõjdate Jesus, im kõn aer kar pepe in jol̦o̦k jabdewõt eo ej kwal̦o̦k an tõmak ilo Jesus jãn im̦õn kabuñ eo an RiJu. (Jon 7:45-49, UBS; 9:22, UBS) Ñe rej jol̦o̦k juon jãn im̦õn kabuñ eo, ekkã an RiJu ro kõjdate, matõrtõre im kõjekdo̦o̦ne ãinwõt ñe ejjab juon iaaer. Eñin unin Josep emaroñ kar mijak in kwal̦o̦k ke ej tõmak ilo Jesus. Innem, enaaj kar luuji jerbal eo an im an utiej ñe en kar kõm̦m̦ane men in.

Josep ear jab make iaan ilo wãween in epen. Ilo Jon 12:42 (UBS) ej ba bwe “elõñ iaan rũtõl ro an RiJu rar tõmak ilo Jesus, ak rar jab kõnono kake ilo alikkar bwe rekkõl ñe Parisi ro renaaj jol̦o̦k er jãn im̦õn jar eo.” Nikodimõs, ear bar juon iaan rũtõl ro ilo jikin Ekajet eo El̦ap im ear bar mijak in kaalikkar bwe ej tõmak ilo Jesus.​—Jon 3:1-10, UBS; 7:50-52, UBS.

Ak ta kõn Josep? Eokwe Josep ear juon rũkal̦oor ak epen an kar kaalikkare. Men in ear kõm̦m̦ane ear jab ekkar ñan naan kein an Jesus ke ear ba: “Jabdewõt eo ej kaalikkar im̦aan armej ke ej m̦õtta, inaaj kõm̦m̦an ãinwõt ñan e im̦aan Jema ilañ. Ak jabdewõt eo ej kaarmejjete eõ im̦aan armej, inaaj bareinwõt kaarmejjete im̦aan Jema ilañ.” (Matu 10:32, 33, UBS) Josep ear jab lukkuun kaarmejjete Jesus, ak ear jab peran in kaalikkar bwe ej rũkal̦ooran. Ãindein ke bar kwe?

Ewõr juon men em̦m̦an Josep ear kõm̦m̦ane. Baibõl̦ ej ba bwe ear jab rejetake pepe eo an rũtõl ro an jikin Ekajet eo El̦ap ñan liaakel̦o̦k Jesus. (Luk 23:51, UBS) Ãinwõt an ro jet ba, bõlen Josep ear jab pãd ilo iien eo rar ekajete Jesus. Jekdo̦o̦n ta eo  emaroñ kar wal̦o̦k, ak emaroñ kar lukkuun nana an Josep mour kõnke eban kar jim̦we aer ekajete Jesus im ejjel̦o̦k jabdewõt wãween enaaj kar kõm̦m̦ane ñan kabõjrake!

Ilo iien eo ke Jesus ear mej, ear jako an Josep mijak im ear kaalikkare bwe e ej juon iaan rũkal̦oor ro an Jesus. Ej alikkar pepe in an ilo bokin Mark 15:43 (UBS). Ej ba: “Ear peran im jãdel̦o̦k im̦aan mejãn Pail̦at im kajjitõk kõn ãnbwinnin Jesus.”

Josep ear pãd ilo iien eo ke Jesus ear mej. Alikkar bwe ear jel̦ã kõn mej eo an Jesus m̦okta jãn Pail̦at. Eñin unin ke Josep ear kajjitõk kõn ãnbwin eo, kabna eo ear kũrtok kapen in jarin tarin̦ae eo im ‘kajjitõk ippãn el̦aññe em̦ool bwe emej Jesus.’ (Mark 15:44, UBS) Ñe em̦ool bwe Josep ear loe an Jesus eñtaan ilo iien eo ear toto ioon al̦al̦ in eñtaan eo, emaroñ ke kar men eo in ear kõm̦akũti bwe en peran im kajim̦we l̦õmn̦ak eo an? Aet emaroñ kar. Tokãlik, Josep ear peran im em̦m̦akũt ñan kaalikkare bwe ej rũkal̦ooran Christ. Kiiõ ejako an juon rũkal̦ooran ilo ittino.

Armej eo me em̦õj liaakel̦o̦k e ñan mej rej aikuj kalibwini m̦okta jãn an tulo̦k al̦ ekkar ñan kien eo an RiJu. (Dt. 21:22, 23, UBS) Ijoke ekkar ñan armej in Rom, ãnbwinnin rinana ro me kar totoik er renaaj kar likũti wõt ñan ñe ekõt ak jol̦o̦ke ilo juon ro̦ñ. Ak Josep ear jab kõn̦aan kõtl̦o̦k bwe men in en wal̦o̦k ñan ãnbwinnin Jesus. Ear wõr juon an Josep wũliej ekããl me epaakel̦o̦k jikin eo Jesus ear mej ie. Ejjañin kar wõr  juon ãnbwin kar kalibwini ijin. Men in emaroñ kar kaalikkar bwe Josep ej kab em̦m̦akũttok jãn Arimatia ñan Jerusalem im ear kõtmãne bwe enaaj kõjerbale wũliej in ñan baam̦le eo an.  * (Lale kõmel̦el̦e eo itulal̦.) (Luk 23:53, UBS; Jon 19:41, UBS) Ilo an kar Josep kalibwini Jesus ilo wũliej eo an make, ej lukkuun kaalikkar an jouj im ear kakũrm̦oole kanaan eo bwe Messaia eo enaaj kar kallib ippãn “ro rũm̦weiie.”​—Ais. 53:5, 8, 9, UBS.

Aolepen Gospel ko emãn rej kwal̦o̦k bwe ãlikin aer kar kõm̦akũt ãnbwinnin Jesus jãn al̦al̦ eo, Josep ear kũtimi im kalibwini ilo wũliej eo an. (Matu 27:59-61, UBS; Mark 15:46, 47, UBS; Luk 23:53, 55, UBS; Jon 19:38-40, UBS) Armej eo juon me kar kwal̦o̦k bwe ear jipañ Josep ej Nikodimõs, eo im ear bõkl̦o̦k kein ekkapit ko ñan ãnbwinnin rimej. Ad jel̦ã kõn taitõl̦ kein an l̦õm̦arein ruo, jejel̦ã bwe erro ar jab make kõm̦akũt ãnbwin eo. Erro maroñ kar kõjerbal rijerbal ro aer ñan kõm̦akũt im kalibwini ãnbwin eo. Bõtab ejjab mel̦el̦ein bwe men in erro ear kõm̦m̦ane ear juon jerbal epidodo. Kõnke jabdewõt eo ej uñũr ãnbwinnin juon rimej enaaj kõm̦m̦an bwe en jab erreo ium̦win jimjuon raan, im jabdewõt men eo renaaj uñũri renaaj ettoon. (Bõn. 19:11, UBS; Hag. 2:13, UBS) Ilo wãween in enaaj kar kõm̦m̦an bwe ren jab kobal̦o̦k ilo wiik in Kwõjkwõjin Kijoone eo, im jab bõk kun̦aaer ilo m̦akũtkũt ko ilo iien in. (Bõn. 9:6, UBS) Bareinwõt ilo an kar Josep bõk eddon kalibwin Jesus, enaaj kar kõm̦m̦an bwe Parisi ro jet m̦õttan ren kajjirere kake. Ak ilo tõre in, ear m̦õn̦õn̦õ in jelm̦ae jabdewõt wãween bwe en kalibwin ãnbwinnin Jesus ilo wãween eo em̦m̦an im ekkar ñan m̦anit, im kaalikkare bwe e ej juon iaan rũkal̦oor ro an Christ.

Baibõl̦ eo ejjab bar kwal̦o̦k kõn Josep jãn Arimatia ãlikin an kar Gospel ko kõnono kake ilo iien eo ear kalibwin Jesus. Kiiõ kajjitõk eo in: Ta eo ear wal̦o̦k ñane? Ilo m̦ool, ejjel̦o̦k en̦ ejel̦ã. Ak bwebwenato in ej lukkuun kaalikkar bwe ear lukkuun peran im kwal̦o̦k bwe ej juon Kũrjin. Kõnke ilo iien eo ear pen ñane ear peran im kajoorl̦o̦k tõmak eo an im ear jab m̦õjn̦o̦l̦o̦k. Ekar juon oktak em̦m̦an.

Bwebwenato in ej bõklõñtak juon kajjitõk ñan kõj aolep bwe jen kõl̦mãnl̦o̦kjen̦ kake: Ãinwõt juon iaan rũkal̦oor ro an Jesus, ewõr ke jabdewõt iaan men kein ãinwõt taitõl̦, anemkwõj in kããlõt, men ko m̦weied, baam̦le eo ad, ak jerbal eo ad me el̦apl̦o̦k ad kaorõke jãn kõtaan eo ad ippãn Jeova?