SOSEP MEHN ARIMADEAO sohte medewe me e ahneki eimah pwehn tuhwong kepina en Rom. Pontius Pailet wia ohl emen me uhdahn kahngohdi. Ahpw pwe Sises en ketin seridi ni wahu, emen anahne peki rehn Pailet en mweidada kahlep en Siseso. Sosep medewe me en tuhwong Pailet pahn apwal, ahpw soh, e imwila mwahu. Mwurin Pailet rongasang emen sounpei ko me Sises ketin pwoulahr, e mweidada pekipeko. Mendahki Sosep nsensuwedte, e mwadang pwurala wasa me Sises ketin kamakamala ie.​—Mark 15:42-45.

• Ihs Sosep mehn Arimadea?

• Ia duwen eh ese Sises?

• Dahme kahrehda kitail en men ese koasoipe?

Rongamwahu en Mark nda me Sosep wia emen “kisehn Tohn Mwoalen Kopwung Lapalapo me aramas akan kin wauneki.” Tohn Mwoalen Kopwung Lapalapo, de pwihn en Sanedrin ko, iei mwoalen kopwung en mehn Suhs kan me keieu lapalap oh re ahneki manaman pohn aramas akan, koperment, oh pelien lamalam en mehn Suhs kan. (Mark 15:1, 43) Eri Sosep wia emen kaun en nah aramas ko, ihme kahrehda e kak tuhwong kepinahn Rom. Sosep pil kepwehpwe.​—Mad. 27:57.

Nin duwen pwihn ehu, Sanedrin ko kin uhwong Sises. Irail koasoanehdi en kemehla Sises. Ahpw Sosep, iei “ohl kadek emen oh poadidi.” (Luk 23:50) Weksang pali laud en ienge Sanedrin ko, e kin mehlel, mwakelekel oh wia uwen eh kak pwehn peikiong kosonned en Koht. E pil “kin iang kasikasik Wehin Koht,” ihme kahrehda e wiahla emen sapwellimen Sises tohnpadahk ko. (Mark 15:43; Mad. 27:57) Ele e perenki sapwellimen Sises padahk kan pwehki mehlel oh pwung pahrek kin kesempwal ong ih.

Sohn 19:38 mahsanih me Sosep iei “tohnpadahk en Sises men, ahpw ni rir, pwehki eh masak kaunen mehn Suhs ko.” Dahme Sosep masak? E ese me mehn Suhs ko kailongki Sises oh kin koasoanehdi teng en kihsang nan arail sinakokeo emen me kin kasalehda eh pwoson Sises. (Sohn 7:45-49; 9:22) Mehn Suhs ko kin kailongki, pohnsehse oh wiahki mehn liki kei irail me lekdeksang nan sinakokeo. Eri Sosep pweiek en kasalehda ni sansal me e kin pwoson Sises. Ma e wia met, e pahn luhssang eh wia aramas lapalap men oh pil eh wahu.

Ahpw kaidehn Sosep kelehpw me ahneki kahpwal wet. Sohn 12:42 mahsanih me “me tohto sang nanpwungen kaunen mehn Suhs ako pwosonla Sises, a pwehki Parisi ko me kahrehda re sohte kin koasoia ni sansal, pwe re dehr lekdeksang nan sinakoke kan.” Emen me pil ahneki soangen kahpwal wet iei Nikodihmus, me pil wia emen tohn Sanedrin ko.​—Sohn 3:1-10; 7:50-52.

Sosep iei tohnpadahk men, ahpw e sohte uhdahn kak kasalehda ni sansal. Met wia kahpwal laud ehu, ahpw mehlel ni Sises eh mahsanih: “Mehmen me pahn kadehdehda oh uhkin ie mwohn aramas akan, nahn I pahn pil kadehde oh uhki mwohn Semei me ketiket nanleng. A mehmen me pahn kahmahmkin ie mwohn aramas akan, nahn I pahn pil kahmahmki mwohn Semei me ketiket nanleng.” (Mad. 10:32, 33) Sosep sohte kahmahmki me e ese Sises, ahpw e pil sohte ahneki eimah en kadehdehda duwen Sises. Ia duwe, ke kin wia met?

Paipel kapingahki Sosep eh wiahda mehkot mwahu, pwehki e sohte utung ahn Sanedrin ko arail uhwong Sises. (Luk 23:51)  Nin duwen me ekei nda, ele Sosep sohte mi ni ahnsou me Sises ketin ale kopwung. Sohte lipilipil dahme pahn wiawi, Sosep uhdahn nsensuwedkihla kopwung sapahreko, ahpw e sohte kak wia mehkot pwehn kauhdi!

Eri ni ahnsou me Sises ketin pwoula, e mwomwen me Sosep powehdier eh peikasal oh pilada en utung sapwellimen Sises tohnpadahk ko. Met sansalda nan Mark 15:43 me mahsanih: “Sosep patohla rehn Pailet, sohte mwahn perki mehkot, pwe en peki kahlep en Siseso.”

Mwomwen me Sosep mi ni ahnsou me Sises ketin pwoula. Ni mehlel, e ese duwen pwoulahn Sises mwohn Pailet eh esehda. Eri, ni ahnsou me Sosep peki kahlep en Siseso, kepinao “pwuriamweikihla eh ketin karongehda me Sises pwoulahr.” (Mark 15:44) Ahn Sosep kilang Sises ketin weirek ni tuhkehn kalokoloko ele kamwakid ih en kasalehda ni sansal me ih emen sapwellimen Sises tohnpadahk ko. E sohla pahn ekihla me e wia tohnpadahk men.

Nin duwen kosonned en mehn Suhs, irail kan me ale kopwung oh kamakamala anahne seridi mwohn kihrlahn ketipin. (Deud. 21:22, 23) Ahpw mehn Rom ko sohte nsenohki ma paliweren loallap kan me kamakamala kin mihmihte pohn tuhkehn kalokolok kan pwehn matala, de lekdekdiong nan sousou. Ahpw Sosep sohte ahneki soangen madamadau wet duwen Sises.  Karanih wasa me Sises ketin kamakamala, mie sousou kapw ehu me weiweida nan paip ehu me Sosep ahneki. Pwehki re saikinte doadoahngki sousowo, met kasalehda me Sosep ahpwtehn keseudo Serusalem sang Arimadea * oh e kasikasik en doadoahngki wasa kiset pwehn wia wasahn sousou ong eh peneineio. (Luk 23:53; Sohn 19:41) En Sosep eh sarepedi Sises nan eh sousowo kin kasalehda eh kadek oh kapwaiada kokohp me Mesaia pahn ketin seridi “rehn me kepwehpwe kan.”​—Ais. 53:5, 8, 9.

Pwuhken rongamwahu pahieu ko koaros kasalehda me mwurin kahlep en Siseso kohdi sang ni tuhkehn kalokoloko, Sosep kidimkipene likou linen kapw ehu oh ahpw nekidediong nan pein eh sousowo. (Mad. 27:59-61; Mark 15:46, 47; Luk 23:53, 55; Sohn 19:38-40) Ohl emente me sansalda wasaht me sewese Sosep iei Nikodihmus, me wahdo leh pwohmwahu ko. Pwehki ira wia ohl lapalap kei, mwein kaidehn ira kelehpw me kamwakid kahlep en Siseso. Mwomwen me ira doadoahngki lidu kei pwehn wahla oh sarepedi kahlep en Siseso. Ma re pil doadoahngki lidu kan, pwukoa me ohl riemeno wia sohte kesempwal. Mehmen me pahn sairada aramas mehla e pahn saminla ong kaudok rahn isuh, soahng koaros me re sairada pil pahn saminla. (Nemp. 19:11; Ak. 2:13) Eri nan soangen irairo, re anahne tohrohrasang aramas akan erein wihk en Pahsohpao oh sohte iang wia kasarawien Pahsohpa. (Nemp. 9:6) Ni eh koasoanehdi seridi en Sises, ienge Sanedrin ko kakete uhwongada ih. Ahpw nan soangen ahnsowo, e mendahkihla met oh e men sarepedi Sises ni wahu oh kasalehda me ih emen sapwellimen Sises tohnpadahk ko.

Mwurin Sises eh ketin seridi, Paipel sohla koasoia duwen Sosep. Met kahrehda peidek wet: Dahme wiawihong ih? Ni mehlel, kitail sohte ese. Ahpw nin duwen atail koasoiapene, kitail kak kamehlele me Sosep ni sansal kasalehda me e wia emen Kristian. Erein ahnsou me kasongosong oh kahpwal kan wiawi, eh pwoson oh eimah kin wie lalaudla ahpw kaidehn tikitikla. Met wia mehn kadehde mwahu ehu.

Koasoiepen Sosep kihda ehu peidek me kitail koaros anahne medemedewe laud: Mie mehkot sohte lipilipil me kitail kin kesempwalki laudsang atail nanpwungmwahu rehn Siohwa, duwehte atail pwukoa, kepwe, doadoahk en mwohni, limpoak en peneinei, de pil pein atail saledek?