ARIMATËAPITA JOSËQA alläpa llakishqam këkan Jesusta wanutsiyanqampita, peru shumaq pampakänantam munan. Tsëmi mantsapakïkarnimpis, valorta tsarirnin Ponciu Pilätu kaqta ëwan Jesuspa ayanta apakunampaq permïsuta mañaqnin. Y Ponciu Pilätuqa tercu nuna këkarpis Jesus wanushqana kanqanta segurakurirmi apakunampaq änirin. Tsëmi Josëqa qerupita Jesuspa ayanta jorqamunampaq raslla ëwarin (Mar. 15:42-45).

• ¿Pitaq karqan Arimatëapita Josëqa?

• ¿Jesuspaqa imantaq karqan?

• ¿Imanirtaq pëpita masllata musyëta munantsik?

Marcus libruqa willakun, Arimatëapita Josëqa “Judïukunapa Precisaq Cortinchö respetashqa” nuna kashqa kanqantam (Mar. 15:1, 43). Tsënö precisaq nuna karninchi Pilätuwan parlëtaqa puëdirqan. Jinamampis kapoqyoq nunam karqan (Mat. 27:57).

Judïukunapa Precisaq Cortinchö këkaqkunaqa cäsi llapanmi Jesuspa contran kayarqan, y wanutsiyänampaqmi willanakuyarqan. Peru Josëqa “alli nuna y alli kaqta ruraqmi karqan” (Lüc. 23:50). Dios mandakunqankunatam cumplita procuraq, jina “Diospa Gobiernuntam shuyaraq”. Tsëchi Jesus yachatsikunqankuna rasumpa kanqanta cuenta qokurirnin qateqnin tikrarirqan (Mar. 15:43; Mat. 27:57).

Juan 19:38 textum nin, Josëqa “judïukunata mantsar pakallapa Jesuspa qateqninman tikrashqa” kanqanta. Jesuspa qateqnin kanqanta musyarirqa Diosta adorayänan wayipitam qarquriyanman karqan, porqui Jesustaqa alläpam despreciayaq (Juan 7:45-49; 9:22). Diosta adorayänan wayipita qarquyaptinqa judïukunam despreciarnin mana allipa rikäyanman karqan, jina precisaq cargunta y respetashqa kënintam oqranman karqan. Tsëchi Jesusman creikunqantaqa willakurqantsu.

Peru manam pëllatsu willakïtaqa mantsapakurqan. Juan 12:42 textum kënö willakun: “Hasta judïukunapa gobernadorninkunapis atskaqmi pëman markäkuyarqan, peru fariseukunata mantsarmi tsëtaqa rikätsikuyaqtsu, tsënöpa, Diosta adorayänan wayipita mana qarqushqa kayänampaq” nishpa. Jukqa karqan Nicodëmum, pëpis Judïukunapa Precisaq Cortinchömi respetashqa nuna karqan (Juan 3:1-10; 7:50-52).

Mana willakurnimpis, Josëmi sïqa Jesuspa qateqnin karqan. Peru ¿allitatsuraq rurëkarqan mana willakurninqa? Rikärishun Jesus ima ninqanta: “Pipis noqata reqimanqanta nunakunapa nöpanchö rikätsikuptinqa, noqapis ciëluchö këkaq Teytäpa nöpanchömi pëta reqinqäta rikätsikushaq. Peru pipis nunakunapa nöpanchö negamaptinqa, noqapis ciëluchö këkaq Teytäpa nöpanchömi pëta negashaq” (Mat. 10:32, 33). Josëqa manam Jesusta neguëkarqantsu, sinöqa qateqnin kanqanta willakunampaqmi valornin karqantsu. Y ¿noqantsikqa mantsapakuntsikku?

Arimatëapita Josëpaqqa Biblia manam nintsu Jesusta wanutsiyänampaq Judïukunapa Precisaq Cortin decidiptin pëpis  yanapakunqanta (Lüc. 23:51). Jesusta condenayanqan höra tsëchö mana këkanqantam niyan. Imanö kaptimpis mana kaqpita Jesusta condenayanqampitaqa alläpa mana allichi sientikurqan.

Jesus wanuriptinqa Josëqa mananam mantsapakurqanatsu, y Jesuspa qateqnin këtam decidishqana karqan. Tsënö kanqantaqa musyantsik, Marcus 15:43 textuchö kënö ninqampitam: “Kallpata tsarirkurmi Pilätu kaqman ëwarqan y Jesuspa ayanta mañakurqan”.

Jesusta imanö wanutsiyanqantaqa, Josëqa rikarqanchi, tsëchi wanushqana kanqanta musyarnin Pilätu kaqta ëwarqan Jesuspa ayanta jorqanampaq permïsuta mañakoq (Mar. 15:44). Musyanqantsiknöpis Jesusqa alläpa sufrirninmi wanurqan, ¿tsëta rikanqantsuraq yanaparqan qateqnin kanqanta musyatsikunampaq? Itsapis. Porqui mana mantsakushpam Pilätu kaqta ëwarqan. Tsëpita witsëpaqa llapannachi musyariyarqan Jesuspa qateqnin kanqanta.

Judïukunapa leyninqa mandakoq, wanutsiyanqan nunata inti manaraq jeqaptin pampayänampaqmi (Deut. 21:22, 23). Peru romänukunaqa qeruchö ismur ushakänampaqmi jaqiriyaq o manaqa lluta uchkuman jitëkurmi pampariyaq. Peru Josëqa manam munarqantsu Jesuspa ayanta tsënö rurayänanta. Tsëmi pëpaq y  familiampaq juk qaqachö shumaq uchkutsinqan sepultüranman pampëkurqan. Tsëchöqa manam pipis pampakashqaraqtsu karqan, tsëmi rikätsikun Arimatëa markampita * Jerusalenman pöcu tiempullaraq ëwakushqa kanqanta (Lüc. 23:53; Juan 19:41). Kikin pampakänampaq kaq sepultüraman Jesusta pampanqanqa alläpa alli nuna kanqantam rikätsikun, jina tsëwanmi cumplikärirqan, “pampashqa kanqa rïcukunapa sepultüranchö” nir Biblia willakunqan (Is. 53:5, 8, 9).

Mateu, Marcus, Lücas y Juan librukunam willakuyan Jesuspa cuerpunta qerupita bajaratsimurqa, lïnupita rurashqa mas allin kaq tëlawan Arimatëapita Josë pitunqanta y pampëkunqanta (Mat. 27:59-61; Mar. 15:46, 47; Lüc. 23:53, 55; Juan 19:38-40). Bibliaqa willakun Nicodëmulla yanapanqanta y mïrrawan takushqa äloita Jesuspa cuerpunta pasatsiyänampaq apanqantam. Josëwan Nicodëmuqa precisaq nunakunam kayarqan, tsënö këkarqa manachi ishkanllaqa Jesuspa cuerpunta apayanmantsu karqan. Sinöqa sirweqninkunatachi yanapayänampaq niyarqan. Imanö kaptimpis, manam fäcil rurëtatsu rurëkäyarqan. Porqui juk ayata yataq kaqqa qanchis junaqkunapam rakcha quedaq, y hasta yatanqan kaqkunapis (Nüm. 19:11; Ageu 2:13). Y tsënö rakcha quedaq kaqqa manam tsë junaqkunaqa nunakunawan juntakïta puëdeqtsu, ni Pascua fiestatapis celebrëta puëdeqnatsu (Nüm. 9:6). Jina Josëqa musyarqanmi Jesusta pampaptinqa nunakuna despreciayänampaq kaqta. Peru tsëta musyëkarpis Jesustaqa pamparirqanmi, y qateqnin kanqantam musyatsikurirqan.

Jesusta pampanqanta willakurirqa, Bibliaqa mananam pëpaq masta parlannatsu, y manam musyantsiktsu tsëpita pëwan ima pasakunqanta. Kë willakïchö rikanqantsiknöpis Jesuspa qateqnin kanqanta willakïtaqa manachi mantsakurqannatsu. Porqui llapan nuna Jesuspa contran këkäyaptinmi, Jesusman mas confiakurqan y mantsakïnintapis vencirqan.

Arimatëapita Josëpaq willakïkunaman pensarninqa, allim kanman kënö tapukunantsik: “¿Rasumpaku valorä Jehoväwan amïgu kanqäta? ¿O imëkayoq këtaku, trabäjutaku, estudiutaku o familiätaku mas precisaqpaq churä?”.