YƆSƐFU Y’OSE ARIMATEYA kombeya woho wakandayonga la dihonga dia nsawola la nguvɛrnɛrɛ k’ase Rɔmɔ. Pɔsɔ Pilato akeyamaka oko onto laki ɔtɛ wolo efula. Koko, dia Yeso kundɛma la kɛnɛmɔ, onto ɔmɔtshi akahombe tɔlɔmba Pilato odo. Lo menda woho wakayeta akambo, nsawola okoko l’okoko komonga dui dia wolo efula oko wakafɔnyaka Yɔsɛfu. L’ɔkɔngɔ wa nde nkondja eshikikelo oma le ɔsɔlayi ɔmɔtshi ɔnɛ Yeso ambovɔ, Pilato aketawɔ kɛnɛ kakawɔlɔmbɛ. Kaanga mbakinde la nkandji efula, Yɔsɛfu akakalola lo dihole diakawodiake.​—Makɔ 15:42-45.

• Yɔsɛfu y’ose Arimateya shɔ, akinde?

• Diɔtɔnganelo diakɔna diaki lam’asande la Yeso?

• Ndo lande na kahombayɛ ndjasha lo ɔkɔndɔ ande?

Evanjiliɔ wa Makɔ wakasambiyama mbelɛka Yɔsɛfu ɔnɛ “ose tominadi ta laadiko t’ase Juda.” Lanɛ tominadi ta laadiko t’ase Juda mendanaka la weho wa tominadi tshɛ taki la wolo laadiko di’atshunda, lɛɛta ndo ɔtɛmwɛlɔ. (Makɔ 15:1, 43) Yɔsɛfu aki ɔmɔtshi l’atei wa ɛnɔmbɔdi w’anto ande ndo dui sɔ nembetshiyaka lande na kakandakoke monga la lotshungɔ la tosawola la nguvɛrnɛrɛ k’ase Rɔmɔ. Bu dui dia diambo dia mboka dia Yɔsɛfu aki nto kanga ɔngɔnyi.​—Mat. 27:57.

Oko olui, ase tominadi ta laadiko t’ase Juda wakahetshaka Yeso. Ase tominadi takɔ, wakɔtɔ sheke dia mbodiaka. Koko Yɔsɛfu mbelamɛka “onto ɔlɔlɔ ndo kanga losembwe.” (Luka 23:50) Otshikitanyi l’asekande efula wa lo tominadi ta laadiko t’ase Juda, nde aki la losembwe, lɔkɛwɔ la pudipudi ndo akasalaka la wolo dia nkitanyiya ɛlɛmbɛ wa Nzambi. Ndo nto, nde “akakongaka Diolelo dia Nzambi,” dui sɔ koka nembetshiya lande na kakandonge ombeki wa Yeso. (Makɔ 15:43; Mat. 27:57) Ondo nde akalangaka losango la Yeso nɛ dia nde akangɛnangɛnaka akambo wa mɛtɛ ndo losembwe.

Joani 19:38 mbutaka dia Yɔsɛfu aki “ombeki waki Yeso lo woshɛshɛ nɛ dia nde akokaka ase Juda wɔma.” Kakɔna kakokaka Yɔsɛfu wɔma? Nde akeyaka woho wakɔnyɔlaka ase Juda Yeso ndo yɛdikɔ yakawɔshi ya mbitshanya onto tshɛ lakataka dia nde ekɔ la mbetawɔ le Yeso oma lo shinangɔnga. (Jni. 7:45-49; 9:22) Mbitshanyema oma lo shinangɔnga kɛdikɛdi mɔnywama, minyɛma ndo salemɛ akambo oma le ase Juda oko ɔnɛ lambɔsɛkama. Diakɔ diele Yɔsɛfu akengengaka dia mbuta lo sɛkɛ ɔnɛ nde ekɔ la mbetawɔ le Yeso. Nsala dui sɔ otookonya dia nshisha dihole diande ndo kɛnɛmɔ kande.

Aha Yɔsɛfu oto mbaki l’okakatanu ɔsɔ. Lo ndjela Joani 12:42, “kaanga emboledi efula waki la mbetawɔ le [Yeso], koko l’ɔtɛ wa Afarisɛ, vɔ kombitaka dia wekɔ la mbetawɔ le nde diaha vɔ mbitshanyema oma lo shinangɔnga.” Onto okina laki la ntondo ka dui dia ngasɔ aki Nikɔdɛmɔ laki nde la wɔ ose tominadi ta laadiko t’ase Juda.​—Jni. 3:1-10; 7:50-52.

Yɔsɛfu aki ombeki, koko nde kokokaka mbuta dui sɔ lo sɛkɛ. Ɔsɔ aki okakatanu wa wolo djekoleko lo ndjela ɛtɛkɛta wa Yeso ɛnɛ: “Onto tshɛ lambetawɔ la ntondo k’anto, dimi lawɔ layowetawɔ la ntondo ka Papa lele l’olongo. Koko onto tshɛ lamanguna la ntondo k’anto, dimi lawɔ layowanguna la ntondo ka Papa lele l’olongo.” (Mat. 10:32, 33) Yɔsɛfu komanguna Yeso, koko nde komonga la dihonga dia mbuta dia nde ekɔ lo mbeetawɔ. Onde ndo wɛ?

 Yɔsɛfu akasale dui dimɔtshi dia dimɛna efula, Bible mbutaka dia nde kosukɛ sheke yakɔtwɛ ase tominadi ta laadiko t’ase Juda Yeso. (Luka 23:51) Ondo oko wata anto amɔtshi, Yɔsɛfu komonga lɛnɛ akawasoyaka Yeso. Oyadi l’ɔtɛ w’ɔkɔkɔ akɔna, weho akɔ tshɛ Yɔsɛfu akoke kandji l’ɔtɛ wa wɛngiya wa kɔlɔ efula ɔsɔ, koko nde kokoka nsala ndooko dui dia nshimba dui sɔ!

Mɛnamaka dia oya l’etena kakavu Yeso, Yɔsɛfu akahemɛ wɔma ande ndo akɔshi yɛdikɔ ya nsukɛ ambeki wa Yeso. Yɛdikɔ shɔ mɛnamaka lo ndjela ɛtɛkɛta wa lo Makɔ 15:43 wata ɔnɛ: “Nde akatshu le Pilato la dihonga tshɛ ko akɔɔlɔmbɛ odo wa Yeso.”

Mɛnamaka dia Yɔsɛfu aki laawɔ etena kakavu Yeso. Lo mɛtɛ nde akeye dia Yeso ambovɔ ntondo ka Pilato. Diakɔ diele etena kakalɔmbɛ Yɔsɛfu odo, nguvɛrnɛrɛ “akayambolaka dia kana [Yeso] amboshila mvɔ.” (Makɔ 15:44) Shi ondo woho wakɛnyi Yɔsɛfu Yeso adiɛnɛ l’otamba w’asui mbakotshutshuya dia ndjasɛdingola ndo mbɔsa yɛdikɔ ya shikimala l’akambo wa mɛtɛ? Ondo ngaasɔ. L’ekomelo Yɔsɛfu akayonga la dihonmga dia nsala akambo. Nde kondjonga ombeki wa lo woshɛshɛ nto.

Ɛlɛmbɛ w’ase Juda wakataka dia anto wakawasha dilanya dia nyɔi pombaka kundɛma ntondo ka wonya mbidja. (Eoh. 21:22, 23) Koko ase Rɔmɔ wakayambolaka dia mbeya kana edo w’atshi wa kɔlɔ wakadiakema wakahombe ntshikala l’etamba dia mpɔnda kana mbahongola lo diombo ɔtɔi. Koko aha kɛsɔ mbaki lo yimba ya  Yɔsɛfu lo dikambo dia Yeso. Yɔsɛfu aki la diombo di’oyoyo diakasalema lo woko wa dive suke la dihole diakawadiakaka anto. Woho wakiwɔ watakambaka la diombo sɔ, mɛnyaka dia Yɔsɛfu aki oma la monɔ oma la Arimateya * otsha la Jɛrusalɛma ndo ɔnɛ nde akalangaka dia ndjokamba la dihole sɔ dia kundɛka ase nkumbo kande. (Luka 23:53; Jni. 19:41) Woho wakawakundɛ Yeso lo diombo diakawahombe ndjokundɛ Yɔsɛfu aki djembetelo ya lokaho la Yɔsɛfu ndo dui sɔ diakakotsha prɔfɛsiya k’ɔnɛ Mɛsiya akahombe kundɛma “kaamɛ la kanga ɔngɔnyi.”​—Isa. 53:5, 8, 9.

Evanjiliɔ akɔ ɛnɛi tshɛ mɛnyaka dia l’ɔkɔngɔ wa odo wa Yeso minyɛma l’otamba, Yɔsɛfu akawɔmbɛ ahɔndɔ wa pudipudi wa linɛnɛ la dimɛna ko akatookundɛ lo diombo diande. (Mat. 27:59-61; Makɔ 15:46, 47; Luka 23:53, 55; Jni. 19:38-40) Onto ɔtɔi lakaye dia ndjokimanyiya Yɔsɛfu aki Nikɔdɛmɔ, ɔnɛ lakela diangɔ di’opumu dikambo di’okundelo. Lam’ele apami ahende asɔ waki la lokumu, ondo aha vɔamɛ mbakɛmbɛ odo. Mbeyaka monga ko, vɔ wakakambe l’ase olimu dia mɛmba ndo nkundɛ. Kaanga naka vɔ wakakambe l’ase olimu, olimu wakakambe apami ahende asɔ komonga anyanya. Onto tshɛ lakanandaka odo w’onto akongaka mindo l’edja ka nshi esambele, ndo ɛngɔ tshɛ kakandasakanyaka kakonge mindo. (Wal. 19:11; Han. 2:13) Dui sɔ diakalɔmbaka dia mangana l’anto lo lomingu la fɛtɛ k’Elekanelo ndo mpandja awui tshɛ wakasalemaka lo fɛtɛ. (Wal. 9:6) Ndo nto lo nsala ɛlɔngɔswɛlɔ wendana la okundelo wa Yeso, Yɔsɛfu akakoke mɔnywama oma le asekande. Koko, l’etena kɛsɔ nde aketawɔ etombelo wakakoke monga dia nkundɛ Yeso la kɛnɛmɔ ndo mbeyama oko ombeki wa Kristo.

Laadiko di’ɔkɔndɔ wendana l’okundelo wa Yeso wa l’evanjiliɔ, Bible hatɛkɛta dia Yɔsɛfu y’ose Arimateya nto, ndo dui sɔ monyiyaka dimbola nɛ: Kakɔna kakokomɛ? Kɛnɛ kele mɛtɛ ele hateye. Koko lo ndjela kɛnɛ kambotɔsɛdingola, ondo nde akayota lo sɛkɛ dia nde ekɔ Okristo. Kɛnɛ koleki tshɛ ele, l’etena k’ohemba ndo k’okakatanu, mbetawɔ ndo dihonga diande diakatafulaka koko kokitakita. Ɔsɔ aki djembetelo ya dimɛna efula.

Ɔkɔndɔ ɔnɛ monyiyaka dimbola nɛ diakoka onto tshɛ la l’atei aso nkana la diɔ yimba: Onde ekɔ dikambo dimɔtshi ɛnyɛlɔ dihole diele la mi, olimu, diangɔ diele la mi, ngandji ka nkumbo, kana lotshungɔ lele la mi, kalekami mbɔsa la nɛmɔ oleki diɔtɔnganelo diasami la Jehowa?