HI JOSE NGA TAGA-ARIMATEA waray gud makatoo nga nagkaada hiya kaisog nga makiistorya ha Romano nga gobernador. Hi Ponsio Pilato kilala nga makuri gud makombinse. Pero basi matagan hi Jesus hin dungganon nga lubong, kinahanglan may maghangyo kan Pilato nga aroon an lawas ni Jesus. Pero an pakiistorya ni Jose kan Pilato diri sugad kakuri han bangin iya ginhuhunahuna. Katapos makompirma tikang ha usa nga opisyal nga patay na hi Jesus, tumugot hi Pilato nga kuhaon an lawas ni Jesus. Salit bisan kon masurub-on pa hi Jose, binalik hiya ha lugar diin ginpatay hi Jesus.—Mar. 15:42-45.

• Hin-o hi Jose nga taga-Arimatea?

• Ano an iya relasyon kan Jesus?

• Ngan kay ano nga sadang ka magin interesado ha istorya han iya kinabuhi?

An giniyahan nga Ebanghelyo ni Marcos nag-unabi kan Jose sugad nga “respetado nga membro han Konseho.” Hini nga konteksto, an Konseho nagtutudlok la ha Sanhedrin, an hitaas nga korte han mga Judio ngan an grupo nga may awtoridad ha komunidad, gobyerno, ngan relihiyon han mga Judio. (Mar. 15:1, 43) Salit hi Jose usa han mga lider han mga Judio; ini an rason nga nakahigayon hiya nga makaistorya an Romano nga gobernador. Diri urusahon nga riko liwat hi Jose.—Mat. 27:57.

Sugad nga grupo, an Sanhedrin nakontra gud kan Jesus. An mga membro hito nagkaurosa nga ipapatay hiya. Pero hi Jose gintawag nga “maopay ngan matadong . . . nga tawo.” (Luc. 23:50) Diri pariho han kadam-an han iya mga katrabaho ha Sanhedrin, tangkod hiya ngan may maopay nga moral ngan ginbubuhat niya an iya pinakamaopay ha pagsunod han mga sugo han Dios. “Naghuhulat liwat [hi Jose] han Ginhadian han Dios,” ngan bangin ini an rason nga nagin disipulo hiya ni Jesus. (Mar. 15:43; Mat. 27:57) Posible nga naruyagan niya an mensahe ni Jesus kay importante gud ha iya an kamatuoran ngan hustisya.

An Juan 19:38 nasiring nga hi Jose “disipulo ni Jesus pero sekreto la kay nahahadlok hiya ha mga Judio.” Ano an ginkakahadlokan ni Jose? Maaram hiya nga nasisina an mga Judio kan Jesus ngan determinado hira nga paiwason ha sinagoga an bisan hin-o nga nagsusumat nga natoo kan Jesus. (Juan 7:45-49; 9:22) Kon an usa paiwason ha sinagoga, tatamayon hiya, lilikyan, ngan isasalikway han mga igkasi-Judio. Salit nag-alang hi Jose nga dayag nga magpakilala nga natoo hiya kan Jesus. Kay kon buhaton niya ito, mawawad-an hiya hin posisyon ngan madadaot an iya reputasyon.

Diri la hi Jose an aada hinin makuri nga kahimtang. Sumala ha Juan 12:42, “damu an tinoo kan Jesus, bisan an Judio nga mga lider, pero tungod kay nahahadlok hira ha mga Pariseo, diri hira nagsusumat mahitungod ha iya basi diri hira paiwason ha sinagoga.” An usa pa nga indibiduwal nga aada hinin makuri nga kahimtang amo hi Nicodemo, nga membro liwat han Sanhedrin.—Juan 3:1-10; 7:50-52.

Pero hi Jose usa nga disipulo, kondi waray hiya kaisog nga dayag nga magpakilala. Seryoso gud ito nga problema uyon ha ginsiring ni Jesus: “An bisan hin-o nga nasiring ha atubangan han mga tawo nga kahiusa ako niya, ako liwat masiring ha atubangan han akon Amay nga aadto ha langit nga kahiusa ko hiya. Pero an bisan hin-o nga nagsasalikway ha akon ha atubangan han mga tawo, akon liwat isasalikway ha atubangan han akon Amay nga aadto ha langit.” (Mat. 10:32, 33) Waray man ignigar ni Jose hi Jesus, pero waray liwat hiya kaisog nga isumat nga natoo hiya kan Jesus. Kumusta ka man?

Iginrekord han Biblia an maopay nga ginbuhat ni Jose. Nagsiring ito nga waray hiya umuyon han maraot nga plano han Sanhedrin kontra kan Jesus. (Luc. 23:51) Sugad han ginhuhunahuna han iba, posible nga diri presente hi Jose han ginbista hi Jesus. Anoman an kahimtang,  sigurado nga nasubo gud hi Jose hinin duro nga kawaray-hustisya—pero waray hiya mahihimo basi pugngan ito!

Kamatay ni Jesus, posible gud nga nalamposan ni Jose an iya kahadlok, ngan nagdesisyon hiya nga makig-upod ha mga sumurunod ni Jesus. Iginpapakita ito han ginsiring ha Marcos 15:43: “Waray hiya mahadlok pagkadto kan Pilato ngan naghangyo nga kukuhaon niya an lawas ni Jesus.”

Baga hin presente hi Jose han namatay hi Jesus. Ngani, maaram hiya nga patay na hi Jesus antes pa ito hibaroan ni Pilato. Salit han naghangyo hi Jose nga kuhaon an patay nga lawas ni Jesus, “karuyag hibaroan ni Pilato kon patay na hi Jesus.” (Mar. 15:44) Kon nakita mismo ni Jose an kasakit ni Jesus ha pasakitan nga kahoy, posible ba nga inin makasurubo gud nga panhitabo an nagpagios kan Jose nga usisahon an iya konsensya ngan magdesisyon nga kinahanglan niya dayag nga magpakilala nga nadapig hiya ha kamatuoran? Posible. Anoman an hinungdan, disidido na hi Jose nga magpakilala. Diri na hiya sekreto nga disipulo ni Jesus.

Ha Judio nga balaud, an usa nga ginsentensyahan hin kamatayon kinahanglan ilubong antes matunod an adlaw. (Deut. 21:22, 23) Kondi para ha mga Romano, an lawas han ginpatay nga mga kriminal puydi la bayaan nga nakabitay ha kahoy tubtob nga madunot o ilabog ito ngadto ha usa nga komon nga lubnganan. Pero diri ito an karuyag ni Jose nga mahitabo ha patay nga lawas ni Jesus. Hirani ha lugar diin ginpatay hi Jesus, hi Jose may bag-o nga lubnganan nga gin-ukad ha bato. Tungod kay waray pa magamit  ini nga lubnganan, iginpapakita hito nga bag-o la hi Jose nga binalhin tikang ha Arimatea * ngadto ha Jerusalem ngan ginlalaoman niya nga gagamiton ini nga panag-iya sugad nga lubnganan han iya mga kapamilya. (Luc. 23:53; Juan 19:41) An paglubong kan Jesus ha magigin lubnganan mismo ni Jose nagpapakita han pagin mahinatagon ni Jose, ngan katumanan ini han tagna nga an Mesias ilulubong kaupod han mga “bahandianon.”—Isa. 53:5, 8, 9.

An upat nga Ebanghelyo nagsasaysay nga katapos kuhaon an lawas ni Jesus ha pasakitan nga kahoy, ginputos ito ni Jose hin maopay nga klase hin tela ngan iginbutang ito ha iya mismo lubnganan. (Mat. 27:59-61; Mar. 15:46, 47; Luc. 23:53, 55; Juan 19:38-40) An espisipiko la nga gin-unabi nga binulig kan Jose amo hi Nicodemo, nga nagdara hin mga pahamot para ha paglubong. Tungod kay mga prominente hira, posible nga diri hira mismo an nagkuha han lawas ni Jesus. Posible gud nga nagsugo hira hin mga uripon ha pagdara ngan paglubong han lawas ni Jesus. Bisan pa kon sugad hito an ira ginbuhat, diri harumamay an ira sakripisyo. An bisan hin-o nga magkapot hin patay nga lawas magigin mahugaw uyon ha seremonyal nga paagi ha sulod hin pito ka adlaw, ngan an anoman nga ira kaptan magigin mahugaw liwat. (Num. 19:11; Hag. 2:13) Kon ito an kahimtang nira nga duha, kinahanglan hira humirayo ha mga tawo durante han semana han Paskua ngan diri hira makakaupod ha ngatanan nga pagsaurog ngan selebrasyon han Paskua. (Num. 9:6) Tungod han pag-asikaso ni Jose han lubong ni Jesus, posible liwat nga gintamay hiya han iya mga katrabaho. Pero hini nga takna, determinado hiya nga karawaton anoman an magin resulta han iya paghatag kan Jesus hin dungganon nga lubong ngan han iya dayag nga pagpakilala sugad nga usa han mga disipulo han Kristo.

Katapos han mga asoy han Ebanghelyo may kalabotan han lubong ni Jesus, waray na unabiha han Biblia hi Jose nga taga-Arimatea, salit nabangon an pakiana: Ano an nahitabo ha iya? Diri kita maaram. Pero uyon ha aton ginhisgotan, posible gud nga dayag nga nagpakilala hiya sugad nga Kristiano. Aton hinbaroan nga durante han magkuri nga kahimtang ngan han mga pagsari, nagtikakusog an iya pagtoo imbes nga magtikaluya ngan nagin mas maisugon hiya imbes nga mahadlok. Maopay ito nga tigaman.

Ini nga istorya han kinabuhi nagbabangon hin pakiana nga maopay nga pamalandungon naton ngatanan: Gintutugotan ba naton an bisan ano nga butang—awtoridad man, trabaho, panag-iya, gugma ha pamilya, o bisan an aton kagawasan ha pagpili—nga magin mas importante kay han aton relasyon kan Jehova?