亞利馬太人約瑟擁護真理
亞利馬太人約瑟連自己都唔知點解有勇氣去見羅馬總督。因為本丢·彼拉多出咗名好頑固。如果想耶穌有一個體面嘅葬禮，就需要有人去問彼拉多，將耶穌嘅遺體領返嚟。結果，約瑟發覺同彼拉多見面並唔係佢想像中咁難。彼拉多向軍官查證，證實耶穌死咗之後，就答應約瑟嘅請求。雖然約瑟心情好沉重，佢仲係趕返去耶穌被處決嘅地方。（馬可福音15:42-45）
-
亞利馬太人約瑟係邊個呢？
-
佢同耶穌有咩關係？
-
我哋通過佢嘅故事學到乜嘢？
一個公議會嘅成員
暗中做門徒
約翰福音19:38話約瑟“係耶穌嘅門徒，不過佢怕猶太人，所以係暗中做門徒嘅”。到底約瑟擔心乜嘢呢？佢知道猶太人好憎耶穌，決意要將跟隨耶穌嘅人逐出猶太會堂。（約翰福音7:45-49；9:22）被逐出猶太會堂意味住會受到同胞鄙視、排斥、抛棄。如果約瑟公開表明佢跟從耶穌，就會失去名譽同地位。所以，約瑟一直猶疑不決。
約瑟唔係唯一一個面對呢種情況嘅人。約翰福音12:42話：“就算連官長亦都有好多人信從佢，只係由於法利賽派，就唔敢公開承認，免得被開除，逐出會堂。”尼哥德慕都係公議會成員，佢面對同樣嘅情況。（約翰福音3:1-10；7:50-52）
雖然約瑟係門徒，但係佢唔敢公開承認自己嘅信仰。噉樣做後果好嚴重，因為耶穌公開講過：“凡喺人面前承認同我聯合嘅，我喺我天父面前亦會承認同佢聯合；凡喺人面前唔認我嘅，我喺我天父面前亦唔認佢。”（馬太福音10:32,33）約瑟冇話否認耶穌，不過佢冇勇氣承認自己跟從耶穌。噉你呢？
約瑟唔支持公議會謀害耶穌，呢一點係值得稱讚嘅。（路加福音23:51）有啲人覺得，耶穌受審判嗰陣，約瑟可能唔在場。無論約瑟在唔在場都好，佢見到公議會嘅人顛倒是非，一定覺得好難受，因為佢咩都做唔到！
戰勝恐懼
約瑟埋葬耶穌
按照猶太人嘅律法，判處死刑嘅人要喺日落之前埋葬。（申命記21:22,23）不過，對羅馬人嚟講，被處決罪犯嘅屍體，一係留喺木柱上腐爛，一係就全部揼晒喺一個亂葬崗度。所以，約瑟唔想耶穌嘅遺體好似嗰啲罪犯嘅屍體噉樣處置，約瑟喺靠近行刑嘅地方有一個新墓穴。呢個墓穴係喺岩石裏面鑿出嚟嘅，而且從來都冇用過，表明約瑟係啱啱從亞利馬太 *搬到耶路撒冷，佢希望呢個墓地可以作為家族嘅墓地。（路加福音23:53；約翰福音19:41）約瑟將耶穌埋葬喺自己將來嘅墓穴，佢噉樣做非常慷慨，同時亦都應驗咗聖經嘅預言，彌賽亞“死去嘅時候就同富翁喺一齊”。（以賽亞書53:5,8,9）
有乜嘢比你同耶和華嘅關係更加重要呢？
四福音書都記載咗耶穌嘅遺體俾人從柱上面搬落嚟之後，約瑟就用上等細麻布將耶穌嘅遺體包好，放喺自己嘅墓穴裏面。（馬太福音27:59-61；馬可福音15:46,47；路加福音23:53,55；約翰福音19:38-40）聖經特别提到尼哥德慕帶咗安葬嘅香料嚟幫助約瑟。按照佢哋嘅身份，應該唔使自己搬耶穌嘅遺體，好可能佢哋係叫僕人去搬運同埋葬遺體。無論點都好，佢哋兩個所做嘅唔係微不足道嘅。按照摩西律法，任何人接觸過屍體都會不潔七日，而且佢哋接觸嘅任何嘢都會不潔。（民數記19:11；哈該書2:13）任何接觸過屍體嘅人，喺逾越節期間，就唔可以同其他人接觸，仲會錯過所有紀念同慶祝活動。（民數記9:6）約瑟為咗耶穌可以有一個體面嘅葬禮，就算會俾公議會嘅其他成員嘲笑，佢都好願意噉樣做，亦都公開承認自己係耶穌嘅門徒。
故事嘅尾聲
除咗四福音書記載約瑟埋葬耶穌之外，聖經冇再提過亞利馬太人約瑟嘞。我哋可能會諗：“佢後來點呢？”我哋唔知道。不過按照故事嘅發展，佢好可能已經公開承認自己係基督徒。我哋點知道呢？佢喺面對考驗同緊急關頭之下，不斷表現出信心同勇氣，由此可見，佢已經有所改變。
呢個故事引起一個值得我哋思考嘅問題：無論係地位、事業、物質財富、親情，定係個人自由，有乜嘢會比我哋同耶和華嘅關係更重要呢？
^ 18段 亞利馬太好可能係聖經時代嘅拉瑪，就係而家嘅蘭提斯，位於耶路撒冷西北約35公里（22英里），呢度亦都係先知撒母耳嘅故鄉。（撒母耳記上1:19,20）
