1-3. (1) Mala pairasoray ci Cikariya i, samaanay ko pakayraan no kitakit no Israil tamdaw? (2) Misamaanay hano saalien ni Yihofa ko finawlan pasasiyor pasayra Cingranan?

CECAY maloloday cudad maeferay i kakarayan, maroˈay i cinaw ko cecay fafahiyan, o roma tatosa fafahiyan iraay ko sano tataˈangay ˈalilis ko sapikpik maeferay i kakarayan. Oniya kasapaan a mapolosi matiliday i Cikariya. (Cikariya 5:1, 7-9) Hano paˈarawen ni Yihofa toni kasapaan mapolosi ko pairasolay Ningra hani? Samaanay ko pakayraan no kitakit no Israil itiya? Oniya mapolosi ni Cikariya misamaanay milingat kitaanan anini?

² Pakayni to finawlan ni Yihofa, ˈayaw ni Yis to saka 537 a miheca, o kalipahakan a mihecaan. Ikor no kalaholiw i Papilon to 70 a miheca, minokayayto tayni i Yirusalim cangra. Isalakat mahemekay cangra, samanen lomowadayto ko soˈlinay noka pidoyong. Isaka 536 miheca, mapatirengayto ko paranaan no fangcalay sefi, polong a tamdaw “tataˈang ko ngihaˈ nangra a milekal. Matengil i  ra:ay ko ngihaˈ nangra.” (Icra 3:10-13) ˈArawhan, tangsolay tahasiˈayaw to piconged tora mipatirengay demak, matoleday ko falocoˈ nangra, ikor sawad hananayto nangra kora demak, misatapang patireng to lomaˈ no niyah, mipamatang to omah nangra. Ikorto to 16 miheca, pahanhanayho ko pipatireng to fangcalay sefi. O papatalipaˈelalen ko finawlan, minokay tayra ci Yihofaan, cowa ko sasamacay saan tono niyah a demak. Mitokelay ci Yihofa cangranan pasasiyor i Cingranan, miliyaw a timolo misarocod ko falocoˈ a midoko Cingranan.

³ ˈAyaw ni Yis to 520 miheca, ocoran ni Yihofa ci Cikariya papipadama to finawlan Ningra, patalipaˈelal to misamaanay hano matedal cangra miliyas to Papilon. O tatodong no ngangan ni Cikariya i, “Maharatengay ni Yihofa” o sanay. Soˈlin matawalayto nangra ko pipaˈorip ni Yihofa, cowa ka tawal no Kawas ko finawlan Ningra. (ˈOsien ko Cikariya 1:3, 4.) Mikiˈokan ni Yihofa ko Israil tamdaw, o papadamaen cangra patireng to soˈlinay noka pidoko, kawra misaˈicelan Ningra mirikec cangra, cowa ko mamahemeken ano saˈamelamelas saan midoko Cingranan. Onini lalakaw mamilengo to saka 6 ato saka 7 mapolosi ni Cikariya, nengnengen ita to samaanan ni Yihofa mikowad cangra, hanaca o mamananam ita ko manan naitira tora demak?

4. (1) Itini i saka 6 mapolosi, o manan ko maˈaraway ni Cikariya? (2) Oni cudad matiliday ilalomaˈ ato papotal, iraay ko manan a mikiriwiˈay noni? (Nengnengen ko satapangan coka 1.)

⁴ Saka 5 fedengan mitiliday to cecay mikiriwiˈay a mapolosi. (ˈOsien ko Cikariya 5:1, 2.) Maˈaraway ni Cikariya ko cecay maloloday cudad, maeferay i kakarayan, 9 a kongce ko kakayaˈ nira, 4.5 kongce ko kakahad nira. Macelakay kora cudad, matiliday ko sasawkit a lihaf, matiliday ilalomaˈ ato papotal. (Cikariya 5:3) Tohatiniay, o maloloday cudad i papotalay aca mitilid, kawra iraay i felih ko matiliday noni cudad, maedeng tada o masaka limelaan koni lihaf.

5, 6. Samaanay ko pinengneng ni Yihofa to mitakaway?

⁵ ˈOsien ko Cikariya 5:3, 4. O polong a tamdaw o papasowal to demak no niyah i kaˈayaw no Kawas, mangalefay ko finawlan Ningra. O maolahay to Kawas a tamdaw mafanaˈay to papakangodo to “ngangan no Kawas” ko mitakaway. (Taneng 30:8, 9) Ano i masamaamaanay a pakayraan, masamaanay a falocoˈ, o mitakaway tamdaw paikakaan ko ˈanof no niyah ci Yihofaan. Misakaretengay to dafong, misakahemaway to rikec no Kawas, cowa pisakareteng ci Yihofaan ato ngangan Ningra.

⁶ Cikariya 5:3, 4 somowalay: “O papasadaken Ako konini a sapiˈkak, ta micomod i lomaˈ no mitatakaway a tamdaw . . . O aitira i lomaˈ nangra konini a sapiˈkak, ta matekop cangra a maemin,” sanay. O tamdaw no Kawas, ano misimed to raraw no niyah, cowa ko mamalawa to sasawkit ni Yihofa. O tamdaw ano mitakaw, soˈlin mahimeday i mikowanay, tawki, malohemay malitengay anca wama wina, cowa ko mamasafanaˈ ci Yihofa, o papatalasekalen no Kawas. (Hipray 4:13) Nikawrira, o tamdaw no Kawas mamidemak to moecelay i maamaanan a demak, minaol to matiniay a tamdaw tada masaka lipahakan.​—Hipray 13:18.

7. Oya maeferay i kakarayan a maloloday cudad a mapolosi, samaanay pasifanaˈ kitanan?

⁷ Mitakaway a waywayan maketeray ci Yihofa. Midofdof kita to ˈakawangay palinian ni Yihofa, caka pidemak to papakangodo to ngangan Ningra a demak i, o sakatadamaan ita koni. Ano mihaen to demak kita, cowa ko mamatira toya padeteng sanay misafelit to palinian no Kawas a tamdaw, matefoc no Kawas.

8-10. (1) O manan ko araaw a miketon to sowal? (2) Ci Citikiya cowa ka pitoor to manan a miketonan sowal?

⁸ Oya maeferay i kakarayan a maloloday cudad, iraayho ko roma sapasifanaˈ a lihaf, mirikecay toya pakayniay i ngangan no Kawas “misamangahay a miketon to sowal a tamdaw.” (Cikariya 5:4) O niketonan sowal hananay, o miwacayay to soˈlinay ko sowal no niyah, misakareteng a mihayda to cowa ko mamidemak to maanan a demak.

⁹ Pakayni i ngangan ni Yihofa miketon to sowal, tada o karetengay a demak. Nolitengan hongti no Israil i Yirusalim ci Citikiya, pakayniay i ngangan ni Yihofa a miketon to sowal, mikiˈok to mamadimadi to hongti no Papilon. ˈArawhan cowa pitoor ci Citikiya to niketonan a sowal, saka lasilen ni Yihofa ko sasawkit cingranan, sanay ko sowal Ningra: “Pakaynien Ako i midaˈocay a ˈorip Ako ko piketon to sowal, o mamapatay i Papilon konini a hongti.”​—Icikil 17:16.

¹⁰ Hay ano pakayniay i ngangan ni Yihofa miketon to sowal ci Citikiya, iraay ko ˈinorong ningra mitoor to mihaydaan a sowal. ˈArawhan, pasayraay i Icip misaali to sapadama, misafelit to noka pikowan no Papilon, teloc mala horacay.—2 Rayray 36:13; Icikil 17:11-15, 17, 18.

11, 12. (1) O mihaydaan a sowal ita, o manan ko masaka limelaan? (2) Ano mihaydaayto kita patafang to tireng ci Yihofaan i, mamisamaan ko demak i nokaˈorip?

¹¹ Mitengilay ci Yihofa to mihaydaan ita sowal, misakaretengay minengneng to niketonan a sowal ita, tooren ita ko niketonan sowal, hongaˈ milifok to hemek Ningra. (ˈOlic 76:11) I kihecod a mihaydaan a sowal, sakalimelaan i, o nika pihayda a patafang to tireng ci Yihofaan. Patafang to tireng ci Yihofaan o karetengay a noka pihayda, patahekalay ano masamaamaanto ko pakayraan o mamidoko Cingranan.

 ¹² Wa misamaan kita patahekal to mitooray to mihaydaan ita a sowal tiya patafang to tireng hani? Ano masiˈayaw ko maanan a sapalifet, o pakayraan ita miremo patahekalay to mitooran ko nano sowal ita to romiˈamiˈad, tano waywayan a pakahemek ci Yihofaan. (ˈOlic 61:8) Patinakoen, itini picudadan anca i katayalan, ano ira ko misaimahay kitanan, lalangen ita, “maolah kako to rikec Iso” saan a patahekal to niyahan han? (ˈOlic 119:113) O paro no lomaˈ ita ano cowa ko Krisciyang, o sasaalien ita ci Yihofa padama kitanan mitafo to capeling no Krisciyang han? To romiˈamiˈad mitolonay miingid to ikakarayanay a Wama, miakoˈid Cingranan malo tamdaw Ningra halo ciharateng kitanan han? Palakan ita ko toki miˈosi to Fangcalay Cudad han? Tiya patafang kita to tireng ci Yihofaan i, coko mihaenay kita a mihayda to mamihaen ko demak han? Mihaen to demak o midofdofay ci Yihofaan. Misarocod to falocoˈ kita mihodop ci Yihofaan, patahekalay to tangongolay ko olah ita Cingranan, patafang to tireng i Cingranan. Midoko to Kawas o sasahecien ita midoedo ko palinian Ningra a maˈorip, cowa ko papotal aca. Tooren ko niketonan sowal, madimadi ci Yihofaan, mihaen o mamilifok to fangcalay a noikoran.​—Limoˈot 10:12, 13.

13. O manan ko mamananam ita itini saka 6 mapolosi ni Cikariya hani?

¹³ Isaka 6 a mapolosi ni Cikariya maˈaraway ita, o maolahay ci Yihofaan a tamdaw, cowa ko ngangaˈay a mitakaw ato misamangah a miketon to sowal. Maˈaraway ita, soˈliˈlin adihay ko raraw no Israil, cowa pisawad ci Yihofa cangranan, mafanaˈay Cingra itini kaˈayaw no ˈada, taˈangayay ko piroero to Israil tamdaw. Patirengay to ngaˈayay taˈarawan ci Yihofa, matooray Ningra ko nano sowal no Niyah, hanaca makahiyay padama kitanan mitoor to miketonan a sowal ita. Pairaay to hatokel ita, mangataayto noikor aawa ko mariˈangay a demak i hekal, onini milingatay to roma a mapolosi ni Cikariya, aira ko malikatay a noikoran.

14, 15. (1) Itini i saka 7 mapolosi, o manan ko maˈaraway ni Cikariya? (Nengnengen ko satapangan coka 2.) (2) Itiniay ilalomaˈ no cinaw a fafahiyan, mitaypiyaway to manan? Hano tahafen koya cinaw hani?

¹⁴ Maˈaraw ni Cikariya koya maeferay maloloday cudad ikor, “papicaˈaan” no coyoh a minengneng cingra, dotoc maˈaraway ni Cikariya ko saka 7 a mapolosi, iraay ko cecay “cinaw”. (ˈOsien ko Cikariya 5:5-8.) Onini cinaw mitahafan to “ˈoteng”. Mafohat koni ˈoteng i, maˈaraway ni Cikariya “maroˈ i lalomaˈ ko cecay a fafahiyan.” O “tatiihay a raraw konini a fafahiyan” sanay ko coyoh a mitadatad. Haratengen hena, maˈaraw ni Cikariya koni fafahiyan sakasadakaw nai cinaw, tada kakokiˈan! Kawra tangsolan no coyoh micokeroh pacomod i cinaw koni fafahiyan, tahaf hanto ningra toya ˈoteng a satahaf. O manan ko tatodong noni mapolosi hani?

¹⁵ Misaˈicelay pasowal koni mapolosi, cowa ko papasalaten ni Yihofa ko maamaan tatiihay materek ilalomaˈ no tamdaw Ningra. Ano maˈaraw Ningra ko tatiihay demak i, o tatangsol Cingra mitatoy to demak. (1 Korinto 5:13) Tangsolen no coyoh mitahaf koya cinaw, patahekalay to papalahedawen ni Yihofa ko tatiihay demak.

16. (1) Dotoc mafekaday ko manan toya cinaw? (Nengnengen ko satapangan coka 3.) (2) Tatosaay iraay ko sapikpik a fafahiyan talacowaan nangra koya cinaw?

¹⁶ Dotoc masadakay ko tatosa fafahiyan, iraay ko matiraay sapikpik no ˈalilis a ciˈicel. (ˈOsien ko Cikariya 5:9-11.) Oni tatosa fafahiyan tada cowa ka lecad toya i cinaway a fafahiyan. Oni fafahiyan mipihpihay to ciˈicelay a sapikpik nira, mitatoy talafekang toya i cinaway a “tatiihay a raraw”. O papatayraen ningra icowa hani? Onini “tatiihay a raraw” a fafahiyan, o tatelien i Papilon. Misamaanay hano tayraen cingra hani?

17, 18. (1) Hano matatodongay a telien i Papilon koya tatiihay fafahiyan? (2) Mamisetek to falocoˈ kita misamaan ko demak?

 ¹⁷ Itini i lintad ni Cikariya, pakayni to Israil tamdaw, matatodongay a telien i Papilon koya tatiihay fafahiyan. Ci Cikariya ato Israil tamdaw na maroˈay i Papilon, mafanaˈay to matomesay ko cikaditay waywayan ato mitaˈongay to samiyay demak itira. O mamisaˈicel a micoay cangra to romiˈamiˈad, ho caka madenga no mararaway a pidoyongan. Maˈaraw nangra koni mapolosi, mafanaˈayto to mikiˈokay ci Yihofa to cowa ko papakaditen ko matatodongay a pidoyongan, maedeng lipahakay ko falocoˈ nangra.

¹⁸ Soˈlin hatira, onini mapolosi patalipaˈelalay to Israil tamdaw, iraay ko ˈinorong nangra midipot to soˈlinay pidoyongan. Cowa ko papasalaten ni Yihofa ko maamaan tatiihay demak minahol to finawlan Ningra. Micomod kita i makoracay a likakawa no Kawas, siniˈadaay midimokos ato midipot kitanan, iraay ko ˈinorong ita midama to soˈlinay pidoyongan. Misetekay to falocoˈ kita mamitafo to kakorac no likakawa no Kawas han? Itini noˈadingoan lakoing, awaay ko katomirengan no maamaan a tatiihay demak.

19. Oya maˈaraway a mapolosi ni Cikariya, patalipaˈelalay kitanan to manan?

¹⁹ Pakayra toya midemakay to tatiihay demak a tamdaw, saka 6 ato saka 7 mapolosi ni Cikariya o karetengay a saparikec, patalipaˈelal cangranan cowa ko papasalat to tatiihay demak ci Yihofa. Hanaca patalipaˈelalay to midokoay ci Yihofaan tamdaw, o kakifalocoˈen nangra mikaˈinteh ko tatiihay a demak. O roma i, o sakiˈok no cinonoˈay Wama, ano misaˈicel kita malo tamdaw no Kawas, o mamilifok to hemek ato sadipot Ningra, cowa ito ko mamaˈkak a malahedaw ko ˈorip, ao mamilifok to sapalemed ni Yihofa. Soˈliˈlin itini toni matomesay ko tatiihay demak a hekalan, mitafo to makoracay cowa ko madoloay, kawra mihaen a misaˈicel o ciepocay, hanaca o papadamaen ni Yihofa kita! Kawra hano pakasoˈlin kita o soˈlinay pidoyongan cowa ko mamanahol noni hekal hani? Mangata mangata ko taˈangayay padiing i, misamaanay hano pakasoˈlin kita to dadipoten ni Yihofa ko likakawa Ningra hani? Ilaenoay lalakaw papacaˈof toni salicay.