1-3. 1) Zacariasajj profetizañ qalltkäna ukhajja, ¿kuna jan walinakansa israelitanakajj uñjasipjjäna? 2) ¿Kunatsa Jehová Diosajj kuttʼanjjapjjam sasin israelitanakar sispachäna?

 MÄ ROLLOW alton jalnaqaski, mä warmiw canasta manqhan qonuski, pä warminakaw cigüeña jamachʼin chheqanakapanïpkaspas ukhama thayamp aptata alton jalasipki. Zacarías profetajj qellqkäna uka libronwa ukanakajj qhanañchasi (Zac. 5:1, 7-9). ¿Kunatsa Jehová Diosajj profetapar uka visionanak uñjaypachäna? ¿Kuna jan walinakansa israelitanakajj uka tiempon uñjasipjjäna? ¿Kunsa uka visionanakat yateqsna?

² Khä 537 (antes de Cristo [a.C.]) maranjja Jehová Diosan servirinakapajj wali kusisitäpjjänwa. Nayrajj 70 maranakaw Babilonian katuntatäpjjäna, ukampis jichhajj librëjjapjjänwa. Jerusalenar kuttʼjjasasa, templo wasitat saytʼayasiñap yatisasa, Diosar ukan servipjjañap yatisasa wal kusisipjjäna. Qhepa marajj templon cimientonakap lurañwa qalltapjjäna. Wali  kusisitäsajj “jachʼatwa arnaqasipjjäna” ukajj wali ‘jayatpachwa istʼasïna’ (Esd. 3:10-13). Ukampis Diosar adorasiñap jan munirinakajja, templo jan lurasiñapatakejj jukʼampiw jarkʼapjjäna. Ukaw israelitanakarojj aynachtʼayäna, templo lurañsa jaytjjapjjänwa. Jupanakatakikiw utanaksa yapunaksa lurasjjapjjäna. 16 maranak qhepatjja janiw khitis templo lurjjänti. Ukatwa Jehová Diosajj munañanakap jan thaqapjjañapataki, Jupar kuttʼjjasin jan ajjsarasa taqe chuyma servipjjañapatakejj israelitanakar amtayäna.

³ Khä 520 (a.C.) maranjja, kunatsa israelitanakarojj Babiloniat salvanïna uk amtayañatakiw Diosajj Zacarías profetar khitäna. Cheqas Zacarías sutejj “Jehová Diosajj amtiwa” sañwa muni. Israelitanakajja kunjamsa Jehová Diosajj yanaptʼäna uk armapkchïnsa, Jehová Diosajj janiw jupanakat armaskänti (Zacarías 1:3, 4 liytʼañataki). Nayar cheqaparjam adorapjjañamatakejj naya pachpaw yanaptʼapjjäma sasaw Jehová Diosajj munasiñampi säna. Taqe chuyma adorapkitäta ukakwa katoqäjja sasaw qhan sarakïna. Zacariasan sojjtïri, paqallqöri visionanakapampejj kunjamsa Diosajj israelitanakar yanaptʼäna, kunsa jiwasajj ukat yateqsna ukanakwa yatjjataskañäni.

4. 1) ¿Kunsa Zacariasajj sojjtïr visionan uñjäna? 2) ¿Rollojj paypach lador qellqatätapajj kunsa uñachtʼayäna? (Página 21 ukankir nayrïr dibujo uñjjattʼäta).

⁴ Zacarías 5 capitulojja, musparkañ mä visionampiw qallti (Zacarías 5:1, 2 liytʼañataki). Uka visionanjja, Zacariasajj alton jalnaqaskir mä rollwa uñjäna, largorojj 9 metroni, anchorusti 4,5 metroniraki. Uka rollojj jistʼaratänwa, liytʼañatakis listokïnwa, purap lador qellqatarakïnwa (Zac. 5:3). Uka tiemponjja mä ladorukiw rollonakajj qellqasirïna. Ukhamasti, purap lador qellqatätapajj wali wakiskir yatiyäwinïtap uñachtʼayäna. Cheqas juzgañataki wali wakiskir yatiyäwinïnwa.

5, 6. ¿Jehová Diosajj lunthatasiñat kamsisa?

⁵ (Zacarías 5:3, 4 liytʼañataki). Taqeniw Diosan arunakaparjam sum sarnaqañatakejj chʼamachasiñasa, ukampis sutip apirinakjamajja, jiwasajj jukʼampiw chʼamachasiñasa. Lunthatasiñajj Diosan sutipwa qʼañuchi, ukatwa servirinakapajj janipuni kuns lunthatasiñasäkiti (Pro. 30:8, 9). Suma amtampi lunthatasiñajj walikïskiwa sasaw yaqhepajj sapjje. Ukampis lunthatasir jaqejja, lunthatasisajj Jehová Diosaru, sutiparu, leyinakaparu munasiñat sipansa, cosasanakar jukʼamp munasitapwa uñachtʼayi.

⁶ Zacarías 5:3, 4 textonjja, “nayaw apayantjja aka maldicionjja lunthataskis ukan utaparu [...]. Uka maldicionasti ukankarakiniwa khayanjja jan lawasa ni qalasa qheparañapkama” sasaw qhanañchi. Ukhamajja, Jehová Diosajj servirinakapan juchanakap qhanstayaspawa, juchañcharakispawa ukwa uka arunakajj amuytʼayistu. Maynejja, autoridadanakarusa, jefeparusa, jilïr irpirinakarusa, jan ukajj awk taykaparusa juchanakap imtʼaspawa, ukampis Jehová Diosarojj janipuniw imtʼkaspati. Jupa nayraqatanjja, janiw khitis jamasat lunthataskaspati (Heb. 4:13). Diosan servirinakapajj ‘taqe kunansa honrado chuymampi sarnaqañatakiw’ chʼamachasipjje, ukatwa jupanakampïsajj wal kusistanjja (Heb. 13:18).

7. ¿Kunsa rollon qellqatäki uka maldicionajj jiwasar jan waktʼañapatak lursna?

⁷ Jehová Diosatakejj janipuniw lunthatasiñajj walïkiti. Diosan servirinakapatakejja, leyinakap uñtʼañasa, ukarjam sarnaqañasa, sum sarnaqatasampi Diosan sutip jachʼañchañasa wali kusiskañawa. Ukham lurasajja, Diosan  leyinakap contra sarnaqerinakamp chikajj janiw juchañchatäkañäniti.

8-10. 1) ¿Kunas juramento lurañajja? 2) ¿Kuna juramento lurataparus Sedequías reyejj jan phoqkäna?

⁸ Ukatjja, rollon qellqatäki uka arunakajj Diosan sutipjjaru “kʼari juramento” luririnakatwa parlaraki (Zac. 5:4). Mä juramentojja, ‘cheqäskapuniwa’ sañatakiw lurasi, jan ukasti kun lurañataki jan ukajj jan lurañatakiw lurasiraki.

⁹ Diosan sutipjjarojja, janiw mä juramentjja ukhamak lurañasäkiti. Jerusalén marka apnaqer Sedequías sat qhep qhepa reyit parltʼañäni. Jupajja janiw Babilonia apnaqer contrajj saytʼkäti sasaw Diosan sutipjjarojj mä juramento luräna. Ukampis ‘juramento arsutap jiskʼachänwa’, janirakiw ‘arustʼäwi lurataparus phoqkänti’. Ukatwa Diosajj ‘pachpa Babilonia oraqenwa jiwäta’ sasin säna (Eze. 17:16).

¹⁰ Sedequías reyejj juramento luratap phoqaspa ukwa Jehová Diosajj munäna (2 Cró. 36:13). Ukampis uka reyejj janiw arsutap phoqkänti, Babilonionakampi jan apnaqayasjjañatakejj Egipto markaruw yanaptʼa mayïna. Ukham luratapajj janiw kunansa yanaptʼkänti (Eze. 17:11-15, 17, 18).

11, 12. 1) ¿Kuna arsutasas taqe arsutanakasat sipan jukʼamp wakiskirejja? 2) Diosar jakäwis katuyasstan ukhajja, ¿kunjamsa sarnaqañasa?

¹¹ Jehová Diosajja, kun lurañtï arsktan ukanaksa istʼarakiwa. Jupatakejja uka arsutanakasajj janiw aleq ukhamakïkiti, jupamp sum apasiñatakejj phoqañasawa (Sal. 76:11). Jehová Diosar jakäwis katuyastan ukhajja, walinsa jan walinsa serviskakïmawa sasaw Jupar sistanjja. Ukhamajj uka arsutasaw taqe arsutanakasat sipansa jukʼamp wakiskirejja.

¹² ¿Kunjamsa uka arsutas phoqtanjja? Kunayman yantʼanakan uñjasisajj ‘sapüruw’ arsutasarjam sarnaqañatak chʼamachastanjja  (Sal. 61:8). Sañäni, trabajosantï, jan ukajj yateqañ utantï maynejj jiwasampïñatak parljjayistaspa ukhajja, ¿jupanakarut istʼañäni, jan ukajj Jehová Diosan leyinakaparuch istʼañäni? (Pro. 23:26). Familiasantï jiwas sapaki Diosar sirvstan ukhajja, ¿cristianjam sum sarnaqañatakejj Jehová Diosar yanaptʼa mayistanti? Kunjamanakansa uñjaskchiñänejja, ¿Jehová Diosarojj yanaptʼatapatsa munasiñapatsa sapürut oracionan yuspärtanjja? ¿Biblia sapüru liyiñatakejj tiempo apsustanti? Diosar jakäwis katuyastan ukhajja taqe ukanakwa luräjja, sasaw sayätanjja. Ukhamajj uka arunakasar phoqañasawa. Jehová Diosar taqe chuyma servisajja, Jupar munasitasa, arunakasar phoqataswa uñachtʼaytanjja. Diosar serviñatakejj sapüruw Diosan arunakaparjam sarnaqañasa, janiw cristianjam aleqak tukuñasäkiti. Jehová Diosajja, nayat jan jitheqtirinakajj wali sumwa jutïrin jakasipjjani sasaw qhanañchi, ukhamajj arsutasar phoqañajj jiwasan askisatakiwa (Deu. 10:12, 13).

13. ¿Zacarías profetajj sojjtïr visión uñjkäna ukat kunsa yateqsna?

¹³ Diosar munasstan ukhajj janiw lunthatasiñasäkiti, ni arsutanakassa pʼakintañasäkiti, uk amuyañatakiw Zacarías profetan sojjtïr visionapajj yanaptʼistu. Israelitanakajj walja kutis pantjasipkchïnjja, Jehová Diosajj janiw jupanakat armaskänti uksa yateqaraktanwa. Jupanakajj uñisirinakap taypinwa jakapjjäna, ukatwa jan walinakan uñjasipjjäna, Jehová Diosajj uk sum yatïna. Jupajj arsutanakap phoqapuniwa, arsutanakas phoqañsa yanaptʼarakistaniwa, jiwasajj Jupatwa yateqasiñasa. Aka pachan jan walinakajj utjki ukanakajj niyaw tukusjjani sasaw Jehová Diosajj sistu, ukhamatwa arsutanakas phoqañ yanaptʼarakistu. Diosan uka arunakapajj phoqasipuniniwa, uka toqet jan pächasiñatakiw Zacariasan paqallqöri visionapajj yanaptʼistu.

14, 15. 1) ¿Kunsa Zacariasajj paqallqöri visionan uñjäna? (Página 21 ukankir payïr dibujo uñjjattʼäta). 2) ¿Tupuña manqhankaskäna uka warmejj kunamp sasïnsa? 3) ¿Kunatsa angelajj warmir jankʼaki jistʼantäna?

¹⁴ Zacarías profetajj visionapan mä rollo jalnaqaskir uñjkäna uka qhepatjja, mä angelaw jupar akham säna: “Amuytʼam kunatejj uñstanki ukjjata” sasa. ¿Kun uñstanirsa profetajj paqallqöri visionan uñjäna? Mä tupuña (medida) uñstanirwa uñjäna. Uka tiemponakanjja, tupuñajj mä canastar uñtasitänwa, ukampiw mä efá medidajj qhawqhänsa uk yatipjjerïna (Zacarías 5:5-8 liytʼañataki). “Uka tupuñasti plomot lurat qhopiñampi qhopintatänwa”. Zacariasajj uka qhopiña qhopiräna ukhajja, mä warmiruw uka manqhan qonuskir uñjäna. Mä angelajj Zacariasar akham sänwa: “Uka warmejj ñanqhawa [mä arunjja, jan waliwa]” sasa. Uka warmejj uka tupuña manqhat kunjamsa mistuñatak chʼamachasïna uk uñjasajj walpun ajjsarayaspachäna. Ukampis angelajja, Tupuña manqharu nukhuntasajj, plomot lurat jathi qhopiñampiw jistʼantäna. ¿Kunsa ukajj sañ munpacha?

¹⁵ Uka visionajja, Jehová Diosajj janipuniw jan walinak markapan utjañap ukhamak uñchʼukkaniti ukar confiyañatakiw yanaptʼistu. Jan walinak utji ukhajja, jankʼakiw chhaqtayi (1 Cor. 5:13). Angelajj plomot lurat qhopiñampi jankʼak jistʼantkäna ukaw uk uñachtʼayistu.

16. 1) ¿Tupuñampi kun luraskirsa Zacariasajj uñjäna? (Página 21 ukankir kimsïr dibujo uñjjattʼäta). 2) ¿Kawkirus chheqani warminakajj tupuñar apapjje?

¹⁶ Ukjjarojja, cigüeña jamachʼin chheqhanakapanjam pä warminakaw uñstarakïna (Zacarías 5:9-11 liytʼañataki). Uka warminakajj janiw tupuña manqhankir warmjamäpkänti. Jupanakaw wali chʼamani chheqanakapampejj  ñanqharojja, jan ukajj jan walirojj apapjjäna, ukwa Zacariasajj uñjäna. ¿Kawkirus apapjjpachäna? Babiloniaruw apapjjäna. ¿Kunatsa ukar apapjjäna?

17, 18. 1) ¿Kunatsa ñanqhajja, jan ukajj jan walejj Babiloniar apasïna? 2) ¿Kunsa jan walinak jan utjañapatakejj lurañasa?

¹⁷ Zacariasatakisa mayni israelitanakatakisa, Babiloniaru uka “ñanqha”, jan ukajj uka jan wali apañajj walikïnwa. Nayrajja, jupanakajj yaqha diosanakar adoriri, jan wali markanwa jakapjjäna. Ukankkasajj sapüruw uka jan walinakar atipjañatakejj chʼamachasipjjañapäna. Jan walinaka uka markan utjatapjja sum yatipjjäna. Ukhamasti uka visionajj walpun jupanakar chʼamañchtʼpachäna, Jehová Diosar servipkäna ukajj janipuniw kunampis qʼañuchasiñapäkänti.

¹⁸ Zacariasajj uñjkäna uka visionajja, kunjamtï Diosajj munki ukhamarjam adorañatak chʼamachasipjjañapatakiw judionakar amtayarakïna. Jan walejj janipuniw Jehová Diosan markapan utjañapäkiti. Jupaw uka qʼoma markapar apanistu, ukanwa Diosajj munasiñamp uñjistu, jan walinakatsa jarkʼaqarakistu. Ukampis jiwasaw Diosan markapajj jan kunampis qʼañuchatäñapatak yanaptʼañasa. ¿Ukham lurañatak chʼamachasisktanti? Diosan markapanjja, janipuniw kuna jan walis utjañapäkiti.

19. Zacariasajj musparkañ visionanak uñjkäna ukajj ¿kunjamsa jiwasar yanaptʼistu?

¹⁹ Zacarías profetan sojjtïri, paqallqöri visionanakapajja, jan walinak luriri jaqenakatakejj mä amtäwiwa. Jehová Diosajj jan walinak janiw ukhamak uñchʼukkaspati uksa amtayarakistuwa. Servirinakapajj jan walinakar uñisiñasawa. Jiwasatï Diosatakjam sarnaqañatak chʼamachasiñäni ukhajja, rollon qellqatäki uka maldicionajj janiw waktʼkistaniti. Jehová Diosajj jarkʼaqestaniwa bendisirakistaniwa. Akapachan jan walinakar atipañatakis yanaptʼarakistaniwa, Jupa pachaw ukham sistu. Jehová Diosarojj wiñayatakiw kunjamtï Jupajj munki ukarjam serviñäni, ¿kunjamatsa uk yattanjja? Markaparojj wali tʼaqesiñ tiempo jakʼachasisinkipanjja jarkʼaqaniwa sasajj ¿kunatsa confiytanjja? Jutïr yatichäwinwa uka toqenakat yatjjataskañäni.