1-3. a) Cheʼ bʌ Zacarías tsaʼ caji i mel i yeʼtel bajcheʼ xʼaltʼan, ¿bajcheʼ yilal an jiñi i tejclum Dios? b) ¿Chucoch tiʼ sube Jehová jiñi i tejclum chaʼan miʼ chaʼ sujtelob tiʼ tojlel?

JUMPʼEJL bʌlbil bʌ jun welwelña ti chan, juntiquil xʼixic ñupʼul bʌ ti chiquib yicʼot chaʼtiquil xʼixic añoʼ bʌ i wichʼ lajal bajcheʼ i wichʼ jaʼal pech woliyob (choncolob) ti wejlel. Ili tac yaʼ miʼ yʌjlel ti libro i chaʼan Zacarías (Zac. 5:1, 7-9). Cheʼ bʌ Jehová tsiʼ pʌsbe tiʼ ñajal Zacarías ili tac, ¿chucoch tsiʼ mele? ¿Bajcheʼ yilal chumulob jiñi israelob ti jiñi bʌ ora? ¿Bajcheʼ miʼ coltañonla ili ora tsaʼ bʌ i qʼuele jiñi xʼaltʼan?

² Jiñi i tejclum Jehová wen tijicña ti jabil 537 cheʼ maxto tilemic Cristo (m.t.C.). 70 jab tsaʼ ajñiyob ti Babilonia, pero chaʼ librejobix. Ti ñaxan, wen tijicña tsiʼ yubiyob come mi caj i chaʼ sujtelob ti Jerusalén chaʼan miʼ chaʼ melob (pʌtob) jiñi templo i miʼ chʼujutesañob Dios. Ti jumpʼejl jach jab tsiʼ melbeyob pejtelel i yebal jiñi templo, ti 536. Jiñi Biblia miʼ yʌl chaʼan wen tijicñayob, i «pejtelel winicob tsiʼ chaʼleyob cʼam bʌ tʼan. Ñajtʌ  tsiquil i yoñelob» (Esd. 3:10-13). Pero jiñi i contrajob tsaʼ caji i ñumen mʌctañob chaʼan maʼañic miʼ melob jiñi templo. Come tsaʼ caji i wen tajob wocol, tsiʼ yubiyob i chʼijiyemlel i tsiʼ cʌyʌyob i mel jiñi templo. Tsaʼ caji i bajñel melob i yotot yicʼot i yeʼtelob (troñelob). Cheʼ añix 16 jab i melbeyob i yebal jiñi templo, tsiʼ junyajlel cʌyʌyob i mel jiñi eʼtel. Jehová tsiʼ cʼajtesʌbe jiñi israelob chaʼan miʼ cʌyob i mel chuqui bajñel yomob i miʼ chaʼ sujtelob baʼan chaʼan miʼ chʼujutesañob tiʼ tijicñʌyelob.

³ Cheʼ ti jabil 520 Jehová tsiʼ choco majlel jiñi xʼaltʼan Zacarías chaʼan miʼ cʼajtesʌbeñob chucoch tsaʼ locʼsʌntiyob yaʼ ti Babilonia. Jiñi i cʼabaʼ Zacarías yom i yʌl «Jehová tsiʼ chaʼ Cʼajtesa». Ili tajol tsiʼ yʌqʼueyob i ñaʼtan junchajp ñuc bʌ i cʼʌjñibal: Anquese jiñi israelob tsiʼ ñajʌtesayob tsaʼ bʌ i mele (chaʼle) Jehová tiʼ tojlelob, Jehová maʼañic tsiʼ ñajʌtesayob (pejcan Zacarías 1:3, 4). Dios tsiʼ yʌqʼueyob i tʼan chaʼan mi caj i chaʼ techob jiñi isujm bʌ chʼujutesaya. Pero wen tsiquil tsiʼ subeyob jaʼel chaʼan cojach mi caj i chʼʌjmelob mi ti jumpʼejlobʌch i pusicʼal miʼ melob. Laʼ laj qʼuel bajcheʼ tsiʼ cʼʌñʌ Jehová jiñi i seislel yicʼot i sietejlel i ñajal Zacarías chaʼan miʼ ñijcʌbeñob i pusicʼal, i chuqui miʼ mejlel laj cʌn.

4. a) ¿Chuqui tsiʼ qʼuele Zacarías ti jiñi i seislel i ñajal? b) ¿Chuqui yom i yʌl cheʼ jiñi bʌlbil bʌ jun tsʼijbubil tiʼ chaʼwejlel? (Qʼuele jiñi dibujo número 1).

⁴ Yaʼ ti capítulo 5 i chaʼan Zacarías miʼ tech i yʌl jiñi ñajal tsaʼ bʌ i qʼuele jiñi xʼaltʼan (pejcan Zacarías 5:1, 2). Zacarías miʼ taj i qʼuel chaʼan welwelña jumpʼejl bʌlbil bʌ jun 9 metro bʌ i tamlel yicʼot 5 i pochtʌlel. Wel jamʌl jiñi jun chaʼan miʼ mejlel ti pejcʌntel. Tiʼ chaʼwejlel añʌch chuqui tsʼijbubil (Zac. 5:3). Ti wajali, jiñi jun tac cojach miʼ tsʼijbuntel ti junwejl. Pero ili jun tsʼijbubil tiʼ chaʼwejlel, yom i yʌl chaʼan wen ñuc i cʼʌjñibal muʼ bʌ i yʌl yaʼi. Miʼ chʼʌm tilel tsʌts bʌ tʼan.

5, 6. ¿Bajcheʼ yilal miʼ qʼuel Jehová jiñi xujchʼ?

⁵ (Pejcan Zacarías 5:3, 4). Ti lac pejtelel mi caj lac mel lac bʌ ti Dios chaʼan tsaʼ bʌ lac mele. Muʼ bʌ lac chʼujutesan Jehová an chuqui ñumen ñuc bʌ ti lac tojlel. Mi laj cʼuxbin Dios, jin chaʼan la cujil chaʼan pejtelel xujchʼ miʼ bibʼesʌben i cʼabaʼ (Pr. 30:8, 9). An muʼ bʌ i ñaʼtañob chaʼan mach mulilic cheʼ an majqui miʼ chaʼlen xujchʼ mi añʌch i sujmlel chaʼan chucoch yom miʼ mel. Pero tiʼ sujm, jiñi yujil bʌ xujchʼ miʼ ñumen qʼuel ti ñuc jiñi chubʌʼañʌl tac, i mach jiñic Jehová, jiñi i cʼabaʼ yicʼot i mandar tac.

⁶ Ti Zacarías 5:3, 4 miʼ yʌl chaʼan mi caj i yochel wocol «tiʼ yotot jujuntiquil xujchʼ», i yaʼ miʼ yajñel jinto miʼ jisʌntelob. Ili yom i yʌl chaʼan Jehová miʼ mejlel i yʌcʼ ti cʌjñel yicʼot miʼ chaʼlen meloñel tiʼ tojlel jiñi i wiñicob muʼ bʌ i chaʼleñob mulil. Juntiquil am bʌ i mul, tajol miʼ mejlel i mucben jiñi añoʼ bʌ i yeʼtel, i yum ti eʼtel, jiñi ancianojob o i tatob. Pero mach mejlic i muc tiʼ tojlel Dios, come miʼ yʌcʼ i tʼan chaʼan miʼ caj ti ñaʼtʌntel majqui jach miʼ chaʼlen xujchʼ (He. 4:13). Jiñi i wiñiconbʌla Dios mi lac taj lac tijicñʌyel cheʼ añonla la quicʼot yambʌ lac piʼʌlob muʼ bʌ i melob «chuqui utsʼat» tiʼ pejtelel chuqui miʼ melob (He. 13:18).

7. ¿Chuqui miʼ mejlel laj cʌn chaʼan jiñi bʌlbil bʌ jun tsaʼ bʌ i qʼuele tiʼ ñajal Zacarías?

⁷ Jehová maʼañic miʼ mulan jiñi xujchʼ. Jiñi i wiñiconbʌla Dios mi laj qʼuel ti ñuc cheʼ cʌmbil lac chaʼan Dios yicʼot cheʼ mi lac jacʼben i mandar tac, i mi lac pʌs ti laj cuxtʌlel chaʼan mi la cʌcʼ ti ñuc i cʼabaʼ. Cheʼ bajcheʼ jiñi, mach lajalic mi caj lac jisʌntel  yicʼot jiñi muʼ bʌ i yʌlol ñusʌbeñob i tʼan ti Dios.

8-10. a) ¿Chuqui yom i yʌl cheʼ mi la cʌcʼ lac tʼan? b) ¿Chuqui ti tʼan maʼañic bʌ tiʼ tsʼʌctesa Sedequías?

⁸ Ti wiʼil, jiñi jun tsiʼ wʌn alʌ chuqui miʼ yujtel tiʼ tojlel jiñi muʼ bʌ i lon acʼ i tʼan tiʼ cʼabaʼ Dios (Zac. 5:4). Cheʼ mi la cʌcʼ lac tʼan, yom i yʌl chaʼan mi la cʌcʼ ti ñaʼtʌntel chaʼan mucʼʌch caj lac tsʼʌctesan muʼ bʌ la cʌl chaʼan chuqui mi caj lac mel o maʼañic bʌ mi caj lac mel.

⁹ Mach alasic cheʼ mi la cʌcʼ lac tʼan tiʼ cʼabaʼ Jehová. Laʼ laj qʼuel chuqui tsaʼ ujti tiʼ tojlel Sedequías, jiñi cojix bʌ rey ti Judá tsaʼ bʌ i chaʼle yumʌntel ti Jerusalén. Tsiʼ yʌcʼʌ i tʼan tiʼ cʼabaʼ Jehová chaʼan mi caj i jacʼben chuqui miʼ yʌl jiñi rey i chaʼan bʌ Babilonia. Pero maʼañic tiʼ tsʼʌctesa i tʼan yicʼot «tsiʼ jeme jini trato tsaʼ bʌ i mele». Tiʼ caj jiñi, Dios tsiʼ yʌlʌ chaʼan yaʼ mi caj i chʌmel (sajtel) ti Babilonia (Ez. 17:16).

¹⁰ Jehová tsiʼ lon ñaʼta chaʼan Sedequías mi caj i qʼuel ti ñuc jiñi tʼan tsaʼ bʌ i yʌcʼʌ tiʼ cʼabaʼ Dios (2 Cr. 36:13). Pero tsiʼ jeme i tʼan i tsiʼ cʼajti i coltʌntel ti Egipto chaʼan maʼañic miʼ cʌytʌl tiʼ cʼʌb Babilonia. Pero maʼañic tsiʼ taja i coltʌntel yaʼi (Ez. 17:11-15, 17, 18).

11, 12. a) ¿Baqui bʌ tʼan jiñʌch ñumen ñuc bʌ i cʼʌjñibal mi la cʌcʼ? b) ¿Bajcheʼ yilalonla ti laj cuxtʌlel cheʼ tsaʼix la cʌcʼʌ lac bʌ ti Dios?

¹¹ Jehová miʼ ñʌchʼtan jiñi lac tʼan muʼ bʌ lac waʼchocon jaʼel. Miʼ qʼuel ti ñuc, i yomʌch mi lac tsʼʌctesan chaʼan wen miʼ qʼuelonla (Sal. 76:11). Cheʼ mi la cʌcʼ lac bʌ ti Dios, jiñʌch jiñi ñumen ñuc bʌ i cʼʌjñibal lac tʼan mi la cʌcʼ tiʼ tojlel. Cheʼ mi lac mel iliyi, mi lac suben Jehová chaʼan mi caj lac melben i yeʼtel anquese chuqui jach miʼ tilel ti lac tojlel.

 ¹² ¿Bajcheʼ mi lac tsʼʌctesan lac tʼan muʼ bʌ la cʌqʼuen Jehová? Cheʼ bajcheʼ yilal mi lac ñusan jiñi wocol tac muʼ bʌ i tilel ti lac tojlel, mi ñuc o maʼañic, mi caj i yʌcʼ ti cʌjñel mi mucʼʌch lac melben i yeʼtel Jehová «ti jujumpʼejl qʼuin» (Sal. 61:8). Jumpʼejl ejemplo, mi an majqui miʼ pʌsbeñonla ti escuela o ti la queʼtel chaʼan miʼ mulañonla, ¿chuqui mi caj lac mel? ¿Muʼ ba caj lac pʌs chaʼan la com lac jacʼben i tʼan Jehová? (Sal. 119:113). O cheʼ lac bajñel jach mi lac melben i yeʼtel Jehová ti lac familia, ¿muʼ ba laj cʼajtiben i coltaya Dios chaʼan tiʼ pejtelel ora mi lac pʌs wem bʌ lac melbal? Pejtelel chuqui mi lac ñusan, ¿muʼ ba la cʌqʼuen wocolix i yʌlʌ Jehová ti jujumpʼejl qʼuin cheʼ miʼ cʼuxbiñonla yicʼot miʼ tojʼesañonla? ¿Muʼ ba lac locʼsʌben i yorajlel chaʼan ti jujumpʼejl qʼuin mi lac pejcan jiñi Biblia? Tiʼ sujm, cheʼ tsaʼ la cʌcʼʌ lac bʌ ti Dios tsaʼ lac sube chaʼan mucʼʌch caj lac mel pejtelel iliyi. Cheʼ mi lac tsʼʌctesan lac tʼan tsaʼ bʌ la cʌqʼue Jehová, yom i yʌl chaʼan xjacʼtʼañonla. Mi mucʼʌch lac wen acʼ lac bʌ tiʼ melol i yeʼtel, mi lac pʌs chaʼan mucʼʌch laj cʼuxbin yicʼot mucʼʌch lac tsʼʌctesan lac tʼan. Cheʼ mi lac melben i yeʼtel Jehová jiñʌch junchajp bajcheʼ yom mi lac chumtʌl, mach toʼol pʌsbʌjic. Lac wenlelʌch cheʼ mi lac tsʼʌctesan lac tʼan, Dios miʼ yʌl chaʼan jiñi xucʼuloʼ bʌ tiʼ tojlel mi caj i tajob bendición ti talto bʌ qʼuin (Dt. 10:12, 13).

13. ¿Chuqui mi laj cʌn ti jiñi i seislel i ñajal Zacarías?

¹³ Jiñi i seislel i ñajal Zacarías miʼ coltañonla laj qʼuel chaʼan mi mucʼʌch laj cʼuxbin Jehová mach yomic mi lac chaʼlen xujchʼ yicʼot yom mi lac tsʼʌctesan lac tʼan. Mi laj cʌn chaʼan anquese jiñi israelob tsiʼ chaʼleyob mulil, Dios maʼañic tsaʼ ñajʌyi i chaʼañob. Dios tsiʼ qʼuele chaʼan cabʌl i contrajob yicʼot i ticʼlʌntelob. Jehová tiʼ pejtelel ora miʼ tsʼʌctesan i tʼan, i cheʼʌch miʼ pʌs bajcheʼ yom mi lac mel jaʼel. Miʼ mejlel lac ñop chaʼan mi caj i coltañonla chaʼan miʼ mejlel lac tsʼʌctesan lac tʼan. Junchajp bajcheʼ miʼ coltañonla jiñʌch ti lac pijtaya chaʼan lʌcʼʌlix mi caj i jisan jiñi jontolil wʌʼ ti Pañimil. Jiñi yambʌ i ñajal Zacarías miʼ yʌqʼueñonla lac ñaʼtan chaʼan mucʼʌch caj i tsʼʌctiyel jiñi lac pijtaya.

14, 15. a) ¿Chuqui tsiʼ qʼuele Zacarías ti jiñi i sietejlel i ñajal? (Qʼuele jiñi dibujo número 2). b) ¿Chuqui yom i yʌl jiñi xʼixic am bʌ tiʼ mal jiñi chiquib? c) ¿Chucoch tsaʼ chaʼ ñujpʼi ti chiquib jiñi xʼixic?

¹⁴ Cheʼ bʌ Zacarías tsaʼ ujti i qʼuel tiʼ ñajal jiñi bʌlbil bʌ jun, juntiquil ángel tiʼ sube: «Qʼuele jiñi woli bʌ ti wejlel tilel». ¿Chuqui tsiʼ qʼuele ti ili i sietejlel i ñajal? Jiñʌch «jumpʼejl colem chiquib», yom i yʌl, jumpʼejl pʼejt muʼ bʌ i cʼʌjñel bajcheʼ pʼisoñib (pejcan Zacarías 5:5-8). Ili pʼejt an jumpʼejl i «majc» melbil bʌ ti plomo. Cheʼ bʌ tsaʼ jajmi, Zacarías tsiʼ taja i qʼuel chaʼan «yaʼ buchul juntiquil xʼixic». Jiñi ángel tsiʼ sube chaʼan jiñʌch «i yejtal mulil». Tajol toj sajtel i pusicʼal jiñi xʼaltʼan cheʼ bʌ tsiʼ qʼuele chaʼan woli (yʌquel) i ñop loqʼuel jiñi xʼixic. Pero jiñi ángel ti ora tsiʼ chaʼ ñupʼu ti al bʌ i mʌjquib jiñi chiquib chaʼan maʼañic miʼ loqʼuel. ¿Chuqui yom i yʌl iliyi?

¹⁵ Ili miʼ pʌs chaʼan Jehová maʼañic mi caj i toʼol qʼuel jiñi jontolil tiʼ tejclum. Mi an chuqui mach bʌ weñic miʼ qʼuel, ti ora miʼ jisan (1 Co. 5:13). Cheʼʌch tsiʼ pʌsʌ jiñi ángel cheʼ ti orajach tsiʼ chaʼ ñupʼu jiñi xʼixic.

16. a) ¿Chuqui woliʼ melbentel tsiʼ qʼuele Zacarías jiñi chiquib? (Qʼuele jiñi dibujo número 3). b) ¿Baqui miʼ chʼʌmob majlel jiñi xʼixicob jiñi chiquib?

¹⁶ Ti wiʼil, miʼ taj i qʼuel chaʼtiquil xʼixic añoʼ bʌ i wichʼ bajcheʼ i wichʼ jaʼal pech (pejcan Zacarías 5:9-11). Iliyob mach lajalobic  bajcheʼ jiñi xʼixic cʌmbil bʌ bajcheʼ «i yejtal mulil» ñupʼul bʌ ti chiquib. Zacarías tsiʼ taja i qʼuel chaʼan miʼ chʼuyob loqʼuel jiñi chiquib. ¿Baqui miʼ pʌyob majlel? Yaʼʌch «ti Babilonia». ¿Chucoch yaʼi?

17, 18. a) ¿Chucoch yaʼʌch ti Babilonia baqui «yom miʼ cʌytʌl» jiñi «mulil»? b) ¿Chuqui yom mi lac mel ti jumpʼejl lac pusicʼal chaʼan jiñi mulil?

¹⁷ Babilonia jiñʌch jumpʼejl tejclum wem bʌ tsiʼ qʼuele Zacarías yicʼot yambʌ israelob baqui yom miʼ pʌjyel majlel jiñi «mulil». Yaʼʌch tsaʼ chumleyob i tsiʼ qʼueleyob chaʼan cabʌl tsʼiʼlel yicʼot i chʼujutesʌntel diosteʼ tac, i tsiʼ chaʼleyob wersa chaʼan mach cheʼic miʼ melob jaʼel. Jin chaʼan, miʼ mejlel i yʌlob chaʼan jiñʌch baqui an i yajñib mulil. Ili ñajal tsaʼʌch i wen pʼʌtʼesayob, come tsiʼ ñaʼtayob chaʼan chʌn sʌc mi caj i chʼujutesʌntel Jehová.

¹⁸ Jiñi ñajal tsiʼ cʼajtesʌbeyob jaʼel chaʼan yom miʼ chaʼleñob wersa chaʼan maʼañic miʼ bibʼesʌntel i chʼujutesʌntel Dios. Yaʼ tiʼ tejclum Jehová maʼañic miʼ mejlel ti ochel o ti qʼuejlel jiñi jontolil. Jiñʌch tsaʼ bʌ i pʌyʌyonla ochel tiʼ yorganización, baqui miʼ pʌsbeñonla i cʼuxbiya yicʼot miʼ cʌntañonla. Pero añʌch ti lac wenta jaʼel chaʼan chʌn sʌc miʼ yajñel. ¿Cheʼʌch ba la com lac mel? Mi jumpʼejlic mulil yom an ti ili chʼujul bʌ paraíso.

19. ¿Chuqui yom i yʌl ti lac tojlel jiñi i ñajal tac Zacarías?

¹⁹ Jiñi chaʼpʼejl i ñajal Zacarías wen tsiquil chuqui yom i suben jiñi muʼ bʌ i melob mach bʌ utsʼatic. Cheʼ jaʼel, miʼ cʼajtesʌbeñonla chaʼan Jehová mach cheʼic jach miʼ toʼol qʼuel jiñi jontolil. Yom mi lac tsʼaʼlen jaʼel jiñi jontolil. Ili ñajal tac miʼ pʌsbeñonla chaʼan maʼañic mi caj lac taj wocol mi mucʼʌch lac chaʼlen wersa chaʼan wen mi la cajñel tiʼ tojlel Jehová. Mi caj i cʌntañonla yicʼot i yʌqʼueñonla i bendición. I mi caj i coltañonla chaʼan sʌc mi la cajñel ti ili jontol bʌ pañimil (mulawil). Pero ¿chucoch miʼ mejlel lac ñop chaʼan maʼañic mi caj i jilel jiñi isujm bʌ chʼujutesaya? ¿Chuqui miʼ coltañonla lac ñop chaʼan Jehová mi caj i cʌntan i yorganización ili ora, cheʼ lʌcʼʌlix jiñi ñuc bʌ wocol? Iliyi mi caj laj qʼuel ti yambʌ temaj.