1-3. a) Tuma min na Zakari y’a ka kiraya daminɛ, Jehova sagokɛlaw ka koow tun be cogo di? b) Mun na Jehova ko a sagokɛlaw ka kɔsegi ale ma?

SƐBƐ dɔ be sanfɛ i n’a fɔ kɔnɔ, muso dɔ datugunin be sinsin kɔnɔ ani muso fila be vanna, u gamanw be i n’a fɔ badalakɔnɔ sifa dɔ gamanw. O yelifɛn kabakomanw be sɔrɔ Zakari ka kitabu kɔnɔ (Zak. 5:1, 7-9). Mun na Jehova y’o yelifɛn kabakomanw yira a ka kira la? Israɛldenw ka koow tun be cogo di o wagati la? An be se ka kalan jumanw lo sɔrɔ o yelifɛnw na bi?

² Jehova sagokɛlaw ye saan 70 kɛ jɔnya la Babilonɛ. Nka, saan 537 Krista Tile Ɲɛ (K.T.Ɲ.), u ninsɔndiyara kosɔbɛ sabu u hɔɔrɔnyara. U ninsɔn tun ka di ka kɔsegi Zeruzalɛmu ani ka tiɲɛn batoli sigi sen kan kokura. Saan 536 K.T.Ɲ., Israɛldenw ye Alabatoso juu sigi. U ninsɔn tun ka di kosɔbɛ ani “jama  tun be mankanba le kɛra, fɔɔ k’i to yɔrɔjan i b’a mɛn.” (Ɛsid. 3:10-13). Nka, mɔgɔ dɔw y’a daminɛ k’u bali o baara la. Israɛldenw fari fagara gwɛlɛya caaman kosɔn ani u ye Alabatoso lɔli dabila. U y’a daminɛ k’u yɛrɛ ka boonw lɔ ani k’u ka forow sɛnɛ. Saan 16 Alabatoso juu siginin kɔ, a tun ma lɔ ka ban halibi. Ala sagokɛlaw mako tun b’a la u k’u hakili jigi k’u ka ɲi ka kɔsegi Jehova ma ani u kana to ka miiri u yɛrɛ dɔrɔn koo la. Jehova tun b’a fɛ u k’ale bato ni jagwɛlɛya ye ani n’u dusukun bɛɛ ye.

³ O kama, saan 520 K.T.Ɲ., Jehova ye kira Zakari ci. A y’o kɛ walisa k’a ka jama hakili jigi kuun fɔlɔ min kama u hɔɔrɔnyara ka bɔ jɔnya la Babilonɛ. Zakari yɛrɛ tɔgɔ kɔrɔ ko: “Jehova hakili jigira.” Jehova ye min kɛ u ye, hali ni Israɛldenw ɲinɛna o kɔ, Jehova kɔni ma ɲinɛ Israɛldenw kɔ (Zakari 1:3, 4 kalan). Jehova y’u hakili sigi ni kanuya ye ko a bena u dɛmɛ ka tiɲɛn batoli sigi sen kan. Nka, a y’u lasɔmi fana ko n’u m’ale bato n’u dusukun bɛɛ ye, a tɛna sɔn u ka batoli ma. An ka Zakari ka yelifɛn wɔɔrɔnan ni wolonfilanan lajɛ walisa k’a filɛ Jehova ye Israɛldenw jija cogo min na. An bena a ye fana an be se ka kalan min sɔrɔ o la bi.

4. Zakari ye mun lo ye a ka yelifɛn wɔɔrɔnan na? Mun na sɛbɛri tun kɛra o sɛbɛ ɲɛɛ fila bɛɛ kan? (Jaa fɔlɔ lajɛ, barokun daminɛ na.)

⁴ Zakari sapitiri 5 be daminɛ ni yelifɛn kabakoman dɔ ye (Zakari 5:1, 2 kalan). Kira Zakari ye sɛbɛ dɔ ye sanfɛ, a janya tun ye mɛtɛrɛ 10 ani a bonya tun ye mɛtɛrɛ 5 ye. O sɛbɛ tun melekenin tɛ ani Ala ka kiti kumaw lo tun sɛbɛnin b’a kan (Zak. 5:3). Fɔlɔfɔlɔ la, mɔgɔw tun ka teli ka sɛbɛri kɛ sɛbɛ ɲɛɛ kelen dɔrɔn lo kan. Nka, o kiti kumaw tun kɔrɔtanin lo fɔɔ u sɛbɛra o sɛbɛ ɲɛɛ fila bɛɛ kan.

5, 6. Jehova be soɲɛni sifa bɛɛ jati cogo di?

⁵ Zakari 5:3, 4 kalan. Jehova bena adamadenw bɛɛ kiti ka kɛɲɛ n’u ka kɛwalew ye, sanko a sagokɛlaw yɛrɛ. Mun na do? Sabu ale tɔgɔ lara u kan. Minw be Ala kanu, olu b’a faamu ko soɲɛni sifa bɛɛ b’u ka “Ala tɔgɔ cɛn.” (Talenw 30:8, 9). Mɔgɔ dɔw be se k’a miiri ko ka soɲɛni kɛ k’i mako ɲɛ, o tɛ koo jugu ye. A mana kɛ min o min ye, mɔgɔ min be soɲɛni kɛ, a tigi b’a yira ko a negelakow ani bololafɛnw lo kɔrɔtanin lo a fɛ ka tɛmɛ Jehova, a tɔgɔ n’a ka sariyaw kan.

⁶ An y’a kɔrɔsi ko Zakari sapitiri 5:3, 4 kɔnɔ, a fɔra ko “danga . . . [bena] don soonw fɛ . . . a bena to u ka soo, k’a bɛɛ halaki.” O b’a yira ko koo jugu sifa minw bɛɛ be kɛra dogo la Jehova sagokɛlaw cɛma, a be se k’u bɔ kɛnɛ kan ani ka kiti tigɛ kojugukɛlaw kan. Hali ni mɔgɔ be se k’a ka soɲɛni dogo polisiw, patɔrɔnw, diinan mɔgɔkɔrɔw wala a bangebagaw la, a tɛ se k’o dogo Jehova la. Koo jugu sifa minw bɛɛ be kɛra Ala sagokɛlaw cɛma, Ala bena u bɛɛ bɔ kɛnɛ kan (Eburuw 4:13). An ninsɔndiyanin lo kosɔbɛ ka jɛn ni mɔgɔw ye minw b’u jija ka kɛ hɔɔrɔnw ye “tuma bɛɛ.”—Eburuw 13:18.

7. Kira Zakari ye sɛbɛ min ye yelifɛn na, an be kalan juman lo sɔrɔ o la?

⁷ Soɲɛni sifa si man di Jehova ye. A ye sariya minw sigi ɲuman ni juguman koo la, nɛɛma lo an fɛ k’u lɔn ani k’u sira tagama. Nɛɛma lo fana ka ɲɛnamaya kɛ cogo dɔ la min tɛ Jehova tɔgɔ nɔgɔ. N’an tɛ Jehova tɔgɔ nɔgɔ, Jehova bena kiti min tigɛ mɔgɔ juguw kan, an bena an yɛrɛ tanga o ma.

8-10. a) Ka kali koo dɔ la, o kɔrɔ ko di? b) Masacɛ Sedesiyasi tun kalila mun lo koo la ani a m’o dafa?

⁸ Sɛbɛ min tun be sanfɛ, kiti kuma dɔw tun sɛbɛnin b’a kan ka ɲɛsin mɔgɔw ma “minw be kali [Ala] tɔgɔ la ka galon tigɛ.” (Zak. 5:4). Ka kali koo dɔ la, o kɔrɔ ko ka Ala tɔgɔ wala fɛɛn dɔ tɔgɔ weele walisa k’a yira ko kuma dɔ ye tiɲɛn ye wala ko i bena koo dɔ kɛ wala ko i tɛna a kɛ.

⁹ Ka kali Jehova tɔgɔ la, o tɛ tulonko ye. An b’o lo faamu masacɛ laban Sedesiyasi koo la. Ale tun ye masacɛ ye Zeruzalɛmu. Sedesiyasi kalila Jehova tɔgɔ la ko ale bena kolo Babilonɛ masacɛ ye. Nka, a tun kalila min na, a m’o kɛ. O kosɔn, Jehova y’a fɔ a koo la ko: “Ne tɔgɔ kosɔn, . . . [Sedesiyasi] bena sa o tigi ka jamana le kɔnɔ. A ye kali min kɛ a ye, a ma o jati, a y’u ka bɛɛn cɛn. A bena sa Babilɔni.”—Ezek. 17:16.

¹⁰ Masacɛ Sedesiyasi kalila Ala tɔgɔ la. O kama, a tun y’a daa di koo min na, Jehova tun b’a fɛ a k’o dafa (2 Til. Kib. 36:13). Sedesiyasi y’a ka layidu tiɲɛ ani a y’a ɲini Ezipiti masacɛ fɛ a k’ale kisi Babilonɛkaw bolo. Nka, Ezipiti masacɛ ma se k’a dɛmɛ.—Ezek. 17:11-15, 17, 18.

11, 12. a) An y’an daa di koo minw na, juman lo kɔrɔtanin lo ka tɛmɛ u bɛɛ kan? b) N’an y’an yɛrɛkun di Jehova ma, o ka ɲi ka nɔɔ juman lo to an kan loon o loon?

¹¹ An b’an daa di koo minw na, Jehova fana b’u lamɛn ani a b’u jati sɔbɛko ye. O kama, n’an b’u dafa, an koo be diya a ye (Zab. 76:12). N’a sɔrɔ an y’an daa di koo caaman na. Nka, min kɔrɔtanin lo ka tɛmɛ u bɛɛ kan, o ye ko an y’an yɛrɛkun di Jehova ma. N’an y’o kɛ, o kɔrɔ ko an y’an daa di ko an bena a sago kɛ, a mana kɛ min o min ye.

 ¹² An be se ka koow kɛ ka kɛɲɛ n’an ka yɛrɛkundili ye cogo di? “Loon o loon,” gwɛlɛyabaw wala gwɛlɛya denninw b’an ka kantigiya kɔrɔbɔ. An b’o gwɛlɛyaw ɲɛnabɔ cogo min na, o lo b’a yira ni jɛnɲɔgɔnya ɲuman b’an ni Jehova cɛ (Zab. 61:9). Miiri k’a filɛ, i be lakɔliso la wala i be baarakɛyɔrɔ ani dɔ b’i kanbeletigɛra wala k’i sungurutigɛ. Yala i be ban o ma walisa k’a yira ko i b’a fɛ k’i koo diya Jehova ye wa? (Talenw 23:26). N’i kelen lo be Jehova bato i somɔgɔw cɛma do? Yala i be Jehova deli a k’i dɛmɛ walisa i ka to ka koow kɛ kerecɛnya la wa? I ka koow cogoya mana kɛ min o min ye, yala i be Jehova fo loon o loon a ka kanuya n’a ka ɲɛminɛli kosɔn wa? Yala i be wagati ta ka Bibulu kalan loon o loon wa? I y’i yɛrɛkun di Jehova ma tuma min na, a be komi i y’i daa di ko i bena o koow bɛɛ kɛ. N’an be mɛnni kɛ Jehova fɛ ani k’an seko bɛɛ kɛ a ka baara la, an b’a yira ko an b’a kanu ani ko an y’a ta ye. An ka ɲɛnamaya faan bɛɛ la, mɔgɔw ka ɲi k’a ye ko an ye Jehova Seerew ye. An tɛ Jehova bato ka koo bɔ an kuun na. An y’an daa di Jehova ma koo minw na, n’an b’o dafa, o b’an yɛrɛ lo nafa. An ka kantigiya bena a to an be siniɲasigi ɲuman sɔrɔ.—Deter. 10:12, 13.

13. Zakari ka yelifɛn wɔɔrɔnan b’an dɛmɛ ka mun lo faamu?

¹³ Zakari ka yelifɛn wɔɔrɔnan b’an dɛmɛ k’a faamu ko minw be Jehova kanu, olu tɛ soɲɛni sifa si kɛ. U tɛ kali koo dɔ la u tɛna min dafa. An y’a faamu fana ko Israɛldenw ka filiw bɛɛ n’a ta, Jehova tun ye layidu min ta u ye, a y’o dafa ani a ma ban Israɛldenw na. A tun b’a faamu ko a tun man nɔgɔ u fɛ hali dɔɔni sabu u tun b’u juguw cɛma. Jehova ye Israɛldenw minɛ cogo min na, o b’a yira ko an y’an daa di koo minw na, an ka ɲi k’u dafa. An ka la a la ko Jehova bena an dɛmɛ k’o kɛ. Jehova be jigiya di an ma fana siniɲasigi koo la. Yanni dɔɔni, a bena mɔgɔ juguw bɛɛ halaki ka bɔ dugukolo kan. Zakari ka yelifɛn nata b’o lo yira an na ka gwɛ.

14, 15. a) Yelifɛn wolonfilanan kɔnɔ, Zakari ye mun lo ye? (Jaa 2nan lajɛ, barokun daminɛ na.) b) Muso min be sinsin kɔnɔ, o ye mun lo ye? Mun na u y’a datugu yen?

¹⁴ Zakari ye sɛbɛ dɔ ye min tun be sanfɛ. O kɔ, mɛlɛkɛ dɔ y’a fɔ a ye ko: “I ɲaa kɔrɔta ka fɛɛn dɔ natɔ filɛ.” O yelifɛn wolonfilanan tun ye mun lo ye? A ye “sinsin” wala segi dɔ natɔ ye (Zakari 5:5-8 kalan). “Nigɛdatugulan” dɔ tun kɛra k’o sinsin datugu. U y’a dayɛlɛ tuma min na, Zakari y’a ye ko “muso dɔ tun siginin b’a kɔnɔ!” Mɛlɛkɛ y’a fɔ a ye k’o muso ye “juguya lo” ye. Miiri k’a filɛ Zakari siranna cogo min na tuma min na o muso y’a ɲini ka bɔ o sinsin kɔnɔ! Nka, mɛlɛkɛ sinna k’o muso digi ka don o sinsin kɔnɔ ani k’a datugu koɲuman ni nigɛdatugulan ye. O koo kɔrɔ ko di?

¹⁵ O yelifɛn b’a yira ka gwɛ ko Jehova tɛna a ɲɛɛ tugu koo jugu si kan a sagokɛlaw cɛma. N’a ye koo jugu dɔ ye, a be daan sigi o la joona joona (1 Kor. 5:13). Mɛlɛkɛ y’o lo yira tuma min na a ye nigɛdatugulan kɛ k’o sinsin datugu joona joona.

16. a) Zakari ye sinsin min ye, mun lo kɛra o la? (Jaa 3nan lajɛ, barokun daminɛ na.) b) Muso fila minw be ni gamanw ye, olu tagara o sinsin bila min?

¹⁶ O kɔ, a ye muso fila ye, gaman barikamanw b’u fɛ i n’a fɔ badalakɔnɔ sifa dɔ ta (Zakari 5:9-11 kalan). O musow ni muso min be sinsin kɔnɔ, u tɛ  kelen ye fewu! O muso fila be vanna n’u gaman barikamanw ye. “Juguya” be sinsin min kɔnɔ, u y’o ta ka yɛlɛ n’a ye sanfɛ. U tagara n’a ye min? U tagara “juguya” bila “Babilɔni jamana na.” Mun na u tagara n’a ye o yɔrɔ la?

17, 18. a) Mun na a tun bɛnnin lo ko “juguya” ka bila Babilonɛ? b) An kelen kelen bɛɛ ka ɲi ka banba ka mun lo kɛ?

¹⁷ Israɛlden minw tun be yen Zakari ka wagati la, n’a sɔrɔ olu tun y’a faamu fɛɛn min kama a tun bɛnnin lo “juguya” ka bila Babilonɛ. U tun b’a lɔn ko koo juguw lo fanin b’o dugu la. Zakari ni Yahutu minw tun ye wagati dɔ kɛ o yɔrɔ la, u tun be jijaliba lo kɛ loon o loon walisa kafiriw ka kɛwale juguw kana nɔɔ to u kan. O yelifɛn b’a yira ka gwɛ ko Jehova tɛna a to a ka batoli senuman ka nɔgɔ!

¹⁸ O yelifɛn fana be Yahutuw hakili jigi ko olu fana ka ɲi ka banba walisa batoli senuman kana nɔgɔ. Jehova sagokɛlaw tɛ se ani u man ɲi k’u ɲɛɛ tugu koo jugu si kan Jehova ka jɛnkulu kɔnɔ. Bi, Jehova y’an sama ka na a ka ɔriganisasiyɔn saniyanin kɔnɔ. O yɔrɔ la, an b’a ye ko a b’an kanu ani k’an tanga. An kelen kelen bɛɛ ka ɲi ka banba walisa o ɔriganisasiyɔn saniyanin ka to. Koo jugu si man kan ka kɛ an cɛma.

19. Zakari ka yelifɛn kabakomanw b’an dɛmɛ ka mun lo faamu?

¹⁹ Zakari ka yelifɛn wɔɔrɔnan ni wolonfilanan be kangari la kojugukɛlaw ye. O yelifɛnw b’a yira ko Jehova t’a ɲɛɛ tugu koo jugu kan. Komi an ye a sagokɛlaw ye, an ka ɲi ka koo jugu kɔniya sɔbɛ la. O yelifɛnw b’an hakili sigi fana ani k’a yira an na ko n’an b’an seko kɛ k’an koo diya an Faa kanutigi ye, a tɛna an danga. Nka, a bena an latanga ani k’an duga kosɔbɛ. Hali n’a ka gwɛlɛ an saniyanin ka to duniɲa juguman nin kɔnɔ, an ka la a la ko Jehova bena an dɛmɛ k’o kɛ! Nka, mun lo b’a yira an na ko tiɲɛn batoli bena to yen kudayi? Mun lo b’a yira fana ko Jehova bena a ka ɔriganisasiyɔn latanga ni tɔɔrɔba wagati surunyana? An bena o ɲiningaliw jaabi barokun nata la.