1-3. (a) Sekaraia ia peroveta matamaia neganai, Iehova ena taunimanima edia noho dalana be edena bamona? (b) Dahaka dainai Iehova ia ura ena taunimanima be ia dekenai do idia giroa lou?

LOKUA TORETORE ta ia roho lao, hahine ta be bosea lalonai ia helai, bona hahine rua mai edia hanina idia roho, edia hanina be boge manu badadia edia hanina bamona. Unai be Sekaraia ese ena matahanai lalonai ia itaia gaudia. (Sek. 5:1, 7-9) Dahaka dainai Iehova ese ena peroveta tauna dekenai unai matahanai ia henia? Unai nega ai Israela taudia edia noho dalana be edena bamona? Bona hari edena dala ai unai matahanai amo namo ita abia?

² Lagani 537 B.C.E. ai, Iehova ena taunimanima idia moale bada. Idia be lagani 70 lalonai Babulonia ese ia guidia murinai, unai gabu idia rakatania. Idia moale bada dainai, maoromaoro Ierusalema dekenai tomadiho momokani ena gaukara idia hamatamaia lou. Lagani 536 B.C.E. ai, dubu helaga ena badina idia haginia. Unai nega ai, taunimanima idia “boiboi badabada, bona  unai regena be daudau dekenai danu idia kamonai.” (Esr. 3:10-13) To daudau lasi, edia gaukara dainai dagedage idia davaria. Hekwakwanai momo idia davaria dainai, dubu helaga haginia gaukarana idia rakatania bona sibodia edia ruma idia haginia bona uma gaukaradia idia karaia matamaia. Lagani 16 murinai, Iehova ena dubu haginia gaukara be ia noho kava. Namona be ta ese Dirava ena taunimanima ia hadibaia Iehova dekenai do idia giroa lou bona sibona edia ura gaudia do idia tahua lasi. Iehova ia ura ia dekenai do idia giroa lou, bona mai gari lasi ida ia do idia tomadiho henia.

³ Unai dainai lagani 520 B.C.E. ai, Dirava ese iena peroveta tauna Sekaraia ia siaia, unai amo iena taunimanima ese Babulonia idia rakatania ena badina do idia lalopararalaia. Inai ladana Sekaraia ena anina be “Iehova ese Ia Laloatao.” Ena be Israela taudia ese Iehova ena hamauria karana idia laloaboio, to Dirava be idia ia do laloa noho. (Sekaraia 1:3, 4 duahia.) Idia ia hadibaia ia ese idia do ia durua tomadiho momokanina idia haginia lou totona, to idia ia hadibaia danu, bema mai kudouna ibounai ida ia idia tomadiho henia lasi, idia do ia dadaraia. Sekaraia ena matahanai namba 6 bona 7 ai, Iehova ese Israela taudia ia durua dalana do ita itaia. Danu, unai matahanai amo ita be dahaka ita dibaia?

4. Sekaraia ena matahanai namba 6 ai dahaka ia itaia, bona dahaka dainai unai lokua toretore ena kahana rua ai toretore idia noho? (Laulau 1 herevalaia.)

⁴ Sekaraia karoa 5 ai, Sekaraia be matahanai idauna ta ia itaia. (Sekaraia 5:1, 2 duahia.) Ia itaia guba dekenai lokua toretore ta ia roho lao, ena lata be mita 9 bona lababa be mita 4.5 bamona! Unai lokua toretore be ia kehoa vadaeni duahia totona. Iena kahana kahana ai hahemaoro herevadia idia torea. (Sek. 5:3) Vaia, taunimanima ese lokua toretore ena kahana tamona sibona ai revareva idia torea, unai ese ia hahedinaraia Sekaraia ese ia itaia lokua toretorena ena hereva be mai anina bada.

5, 6. Iehova ese henaohenao karana be edena bamona ia laloa?

⁵ Sekaraia 5:3, 4 duahia. Iehova ese taunimanima ibounai do ia hahemaoro henia, iena ladana idia abia taudia dekenai unai be mai anina bada. Idia be Dirava idia lalokau henia bona idia diba henaohenao karana amo “Dirava ena ladana do [idia] hahemaraia.” (Aon. 30:8, 9) Reana haida do idia laloa idia be badina namona ta dainai idia henaohenao, unai dainai ia be kerere lasi. To herevana dahaka, ia henaohenao tauna be ena kara amo ia hahedinaraia iena mataganigani urana be mai anina bada, bona Iehova, Iena ladana, bona Iena taravatu be anina lasi.

⁶ Sekaraia 5:3, 4 ia gwau: “Davana ia henia hereva idia torea, . . . ia be henaoa taudia ta ta ibounai edia ruma lalonai do ia vareai . . . unai ruma edia lalonai do ia noho, bona ia ese idia do ia hadikaia ore momokani.” Iehova ena hahemaoro herevadia be gau ta ese do ia koua diba lasi. Iehova ese ena taunimanima huanai idia vara kara kereredia ia hahedinaraia bona hahemaoro henia diba. Ena be ta ese ia karaia henaohenao karana be pulisi taudia, gaukara taudia, elda taudia, eiava ena tama sina amo ia hunia, to Dirava amo ia hunia diba lasi, nega ta ia ese unai do ia hahedinaraia. (Heb. 4:13) Ita moale badina ita be “mai momokani ida gau ibounai [idia] karaia” taudia ita bamoa noho!​—⁠Heb. 13:18.

7. Davana dikana ita abia lasi totona, dahaka ita karaia be namo?

⁷ Henaohenao karadia ibounai be Iehova ese ia inai henia. To ita moale badina ita be Iehova ena kara maoromaoro taravatudia  ita badinaia, bona ita ura lasi iseda kara amo Iehova ena ladana ita hadikaia. Bema unai ita karaia, Iehova ese taravatu utua taudia ida ita do ia hahemaoro henia lasi.

8-10. (a) Gwauhamata ena anina be dahaka? (b) King Sedekaia be dahaka gwauhamata ia karaia?

⁸ Ia roho lao lokua toretore ese Dirava ena “ladana dekenai idia gwauhamata koikoi taudia” dekenai hadibaia herevana ia henia. (Sek. 5:4) Ta ia gwauhamata neganai, ia hahedinaraia ia gwauraia herevana be momokani eiava ia gwauhamata kara ta do ia karaia o do ia karaia lasi.

⁹ Iehova ena ladanai ita gwauhamata neganai, unai ita laloa bada be namo. Ierusalema ia lohiaia king ginigabena be unai ia karaia. Sedekaia be Iehova ena ladanai ia gwauhamata, ia be Babulonia ena king do ia badinaia. To Sedekaia be iena gwauhamata ia badinaia lasi. Unai dainai Iehova ese inai hahemaoro herevana ia gwauraia: “Lau, mauri ena Dirava, egu ladana dekenai lau gwauhamata inai, . . . [Sedekaia] be Babulonia dekenai do ia mase. Inai iena mase ena badina be, Babulonia ena king ese king dagi ia henia, to iena gwauhamata helagana, bona Babulonia ena king danu ia karaia gwauhamata taravatuna ia hamakohia.”​—⁠Ese. 17:16

¹⁰ King Sedekaia be Dirava ladanai ia gwauhamata dainai, Iehova ia ura unai gwauhamata do ia badinaia. (2 Siv. 36:13) To, Sedekaia be Aigupito amo heduru ia tahua, badina ia ura Babulonia ena igui ia rakatania, to unai ia vara lasi.​—⁠Ese. 17:11-15, 17, 18.

11, 12. (a) Edena gwauhamata be mai anina bada? (b) Iseda mauri ai, edena dala ai iseda bapatiso gwauhamatana do ita badinaia?

¹¹ Iehova be ita karaia gwauhamatadia ia  kamonaia danu. Bona unai gwauhamata ia lalodia bada, unai dainai ita hagugurudia be namo bema ita ura iena lalonamo ita abia. (Sal. 76:11) Ita karaia gwauhamata ibounai amo, mai anina bada gauna be iseda bapatiso gwauhamatana. Unai neganai ita gwauhamata iseda mauri ibounai lalonai Iehova do ita hesiai henia.

¹² Iseda bapatiso gwauhamatana be edena bamona ita badinaia diba? Hahetoho badadia bona maragidia ita davaria neganai, iseda gini goada karana amo do ita hahedinaraia ita ura “dina ta ta ibounai” Iehova ita hanamoa. (Sal. 61:8) Hegeregere, bema iseda gaukara eiava sikuli gabunai, ta be ita ia hauraia kava, ia do ita dadaraia bona Iehova ena dala do ita badinaia, a? (Aon. 23:26) Bema emu famili lalonai oi sibona be Iehova oi tomadiho henia, Keristani kara namodia oi hahedinaraia noho totona Iehova ena heduru oi noia, a? Iseda guba Tamana ena lalokau karadia bona ena hakaua herevadia dainai, dina ta ta ai ia ita tanikiu henia, a? Nega ita atoa dina ta ta ai Baibel ita duahia totona, a? Bapatiso gwauhamatana ita karaia neganai, ita gwauhamata unai gaudia do ita karaia, ani? Badinaia karana be mai anina bada. Iseda tomadiho karadia ita karaia neganai, ita hahedinaraia Iehova ita lalokau henia bona ita be ia ena. Iseda tomadiho karana be iseda mauri dalana. Bona iseda gwauhamata ita hagugurua neganai, vaira nega namona do ita moalelaia.​—⁠Deu. 10:12, 13.

13. Sekaraia ena matahanai namba 6 amo dahaka ita dibaia?

¹³ Sekaraia ena matahanai namba 6 amo ita diba, Iehova idia lalokau henia taudia be do idia henaohenao lasi eiava do idia gwauhamata koikoi lasi. Danu ita itaia, ena be Israela taudia be kerere momo idia karaia, to Iehova be idia ia rakatania lasi. Edia hekwakwanai ia lalopararalaia, badina edia inai taudia be momo. Ia be haheitalai namona badina iena gwauhamata ia badinaia, bona ita do ia durua iseda gwauhamata ita badinaia totona. Heduru ia henia dalana ta be ita dekenai vaira nega ena helaro ia henia. Oibe, kahirakahira ia ese kara dika ibounai do ia haorea. Sekaraia ena matahanai ma ta ese unai helaro namona ia hahedinaraia.

14, 15. (a) Sekaraia ena matahanai namba 7 ai, dahaka ia itaia? (Laulau 2 herevalaia.) (b) Bosea lalonai ia helai hahine be dahaka ia laulaulaia, bona dahaka dainai ia be bosea lalonai idia koua?

¹⁴ Sekaraia ese ia roho lao lokua toretorena ia itaia murinai, aneru ta be ia dekenai ia gwau, “Oi itaia.” Ena matahanai namba 7 be dahaka? Ia ese bosea ta ia itaia. (Sekaraia 5:5-8 duahia.) “Unai bosea ena koua gauna be auri metauna.” Unai koua gauna idia kokia neganai, Sekaraia ia itaia “hahine ta ia helai noho!” Aneru ese ia hamaoroa unai bosea lalonai ia helai hahinena be “kara dika ena toana.” Unai hahine be bosea amo ia ura raka-lasi neganai, Sekaraia ia gari bada! To karaharaga aneru ese bosea lalonai hahine ia doria diho, bona koua gauna metauna amo ia koua. Unai ena anina be dahaka?

¹⁵ Inai matahanai ese ia hahedinaraia, Iehova ese ena taunimanima huanai idia vara kara dika ibounai do ia haorea. Bema Ia ese dika gauna ta ia itaia, karaharaga do ia kokia. (1 Kor. 5:13) Aneru ese karaharaga koua gauna amo bosea ia koua neganai, unai ia hahedinaraia.

16. (a) Sekaraia ia itaia bosea dekenai dahaka ia vara? (Laulau 3 herevalaia.) (b) Unai hahine rua mai hanina ese bosea be edeseni idia abia lao?

¹⁶ Gabeai hahine ma rua idia hedinarai, idia be mai edia hanina, boge manu badadia edia hanina bamona. (Sekaraia 5:9-11 duahia.) Inai hahine rua be bosea lalonai ia  noho hahine amo idia idau! Unai hahine ruaosi ese edia hanina goadana amo bosea mai “kara dika” idia abia isi bona idia roho lao. Unai bosea be edeseni idia abia lao? “Babulonia dekenai” idia abia lao. To, dahaka dainai Babulonia dekenai bosea idia abia lao?

17, 18. (a) Dahaka dainai kara dika be Babulonia dekenai idia abia lao? (b) Iseda lalona ita hadaia dahaka do ita karaia?

¹⁷ Sekaraia ena nega ai idia noho taudia be do idia laloparara dahaka dainai Babulonia dekenai kara dika idia abia lao. Idia diba Babulonia dekenai kara dika be bada. Danu, Sekaraia bona Iuda taudia ma haida be unuseni idia tubu daekau dainai, idia hekwarahi bada tomadiho koikoi karadia idia dadaraia totona. Reana unai matahanai ese idia ia hagoadaia, badina idia diba Iehova ena heduru amo tomadiho momokani be do ia goeva noho!

¹⁸ Unai matahanai amo Iuda taudia idia diba edia tomadiho karana ia goeva danu be namo. Iehova ena taunimanima huanai kara dika be do ia noho lasi. Hari, Iehova ese ena orea goevana lalonai ita ia abia vareai, bona unuseniai iena lalokau bona gimaia karana ita mamia. Namona be ita gaukara goada unai orea ia goeva noho totona. Unai oi karaia noho, a? Momokani, kara dika be Iehova ena taunimanima huanai ia noho lasi be namo.

19. Hari iseda nega ai Sekaraia ena matahanai ena anina be dahaka?

¹⁹ Kara dika idia karaia noho taudia dekenai, Sekaraia ena matahanai namba 6 bona 7 be hadibaia gauna. Idia ia hadibaia kahirakahira Iehova ese kara dika ibounai do ia haorea. To, ita be iena hesiai taudia dainai, kara dikadia ita dadaraia be namo. Inai matahanai ese danu ita ia hadibaia, bema iseda kara amo iseda guba Tamana ita hamoalea, ia amo davana dikana do ita abia lasi, to ia ese ita do ia gimaia bona hanamoa. Ena be inai tanobada dikana lalonai ita hekwarahi kara goevana ita badinaia totona, to ita diba momokani Iehova ena heduru amo do ita kwalimu. To, edena bamona ita diba inai tanobada dikana lalonai tomadiho goevana do ia kwalimu? Hisihisi badana be kahirakahira dainai, edena bamona ita diba Iehova ese ena orea do ia gimaia? Vaira wiki ena stadi ai unai do ita herevalaia.